តាមការចុះផ្សាយរបស់​ទីភ្នាក់ងារសារព័ត៌មានរ៉យទ័រ និយ័តករសារគមនាគមន៍ម៉ាឡេស៊ីបាន​ឱ្យដឹងពីបញ្ហានេះកាលពីថ្ងៃចន្ទ។ ចំណាត់ការរបស់ម៉ាឡេស៊ីធ្វើឡើង ចំពេលមានប្រទេសកាន់តែច្រើនបាន​ដាក់ចេញនូវច្បាប់​គ្រប់គ្រងការចូលប្រើប្រាស់បណ្ដាញសង្គម ដោយសារតែកង្វល់ពាក់ព័ន្ធនឹង​ផលប៉ះពាល់របស់បណ្ដាញសង្គមលើសុខភាព និងសុវត្ថិភាពកុមារ។ ​

គណៈកម្មការ​សារគមនាគមន៍ និងពហុប្រព័ន្ធផ្សព្វផ្សាយចម្រុះ​របស់​ម៉ាឡេស៊ី បានប្រកាសថា ចាប់ពីថ្ងៃចន្ទតទៅ វេទិកា​បណ្ដាញ​សង្គម រួមទាំង ​Facebook, Instagram, TikTok ក៏ដូចជា YouTube ត្រូវតែធ្វើការផ្ទៀងផ្ទាត់អាយុ ​ឱ្យស្របតាមការកំណត់របស់​រដ្ឋាភិបាល។

ប្រសិនបើក្រុមហ៊ុនបណ្ដាញសង្គមណាមួយបរាជ័យក្នុងការអនុវត្តតាម នោះអាចនឹងត្រូវរងការពិន័យរហូតដល់ទៅ ១០ លានរីងហ្គីត (២,៥ លានដុល្លារ)។ ​

គណៈកម្មការ​សារគមនាគមន៍បាននិយាយថា៖ «វិធានការនេះមិនមានបំណងហាមឃាត់អ្នកប្រើប្រាស់ជាកុមារពីអ៊ិនធឺណិត ឬបដិសេធមិនឱ្យពួកគេចូលប្រើបច្ចេកវិទ្យានោះទេ​» ផ្ទុយទៅវិញវាមានគោល​បំណង​បង្កើន​ទំនួល​ខុសត្រូវ​ពីបណ្ដាញ​សង្គម ឪពុកម្តាយ និងអាណាព្យាបាល ក្នុងការការពារអនីតិជនតាម​​អ៊ិនធឺណិត​​។

គួរគូសបញ្ជាក់ថា ​ម៉ាឡេស៊ីបានបង្កើនការត្រួតពិនិត្យលើក្រុមហ៊ុន​បណ្ដាញ​សង្គម បន្ទាប់ពី​ឃើញកំណើននៃមាតិកា​បង្កគ្រោះថ្នាក់​ក្នុងរយៈពេលប៉ុន្មានឆ្នាំចុងក្រោយនេះ ហើយបច្ចុប្បន្ន កំពុងបង្ក្រាប​លើ​មាតិកា​​​ដែលមាន​ចេតនាញុះញង់ឱ្យមានភាពតានតឹង​ពូជសាសន៍ ឬសាសនា ឬរិះគន់រាជានិយម​៕

The post ម៉ាឡេស៊ីចាប់ផ្ដើមហាមក្មេង​អាយុក្រោម​ ១៦ ឆ្នាំ ចូលប្រើប្រាស់បណ្ដាញសង្គម appeared first on Kampuchea Thmey Daily.

រដ្ឋ​មន្ត្រី​នៅ​រដ្ឋភាគខាងត្បូង​ប្រទេស​ឥណ្ឌាពីរ​នាក់​បាន​លើក​ឡើង​នា​ពេល​ថ្មីៗ​នេះ​ថា​ពួក​គេ​កំពុង​ពិនិត្យ​មើល ​ថាតើការហាមឃាត់​នឹង​មាន​ប្រសិទ្ធ​ភាព​ នាំ​ឱ្យ​កុមារ​ចេញ​ឆ្ងាយ​ពី​ប្រព័ន្ធ​ផ្សព្វផ្សាយ​សង្គម​ដែរ​ឬ​យ៉ាងណា​។

កាលពី​សប្តាហ៍​មុន ការស្ទង់​មតិ​ដែល​ធ្វើ​ឡើង​ដោយប្រធាន​ទី​ប្រឹក្សា​សេដ្ឋកិច្ចរបស់​ប្រទេស​ឥណ្ឌា បាន​ផ្តល់​អនុសាសន៍​ថា រដ្ឋា​ភិ​បាល​ គួរ​ពិចារ​ណា​លើ​អាយុ​ ដែល​អាច​អនុញ្ញាត្ត​ឱ្យ​ប្រើប្រាស់ប្រព័ន្ធ​ផ្សព្វ​ផ្សាយ​សង្គម​សម្រាប់​កុមារ។

គួរ​ឱ្យ​ដឹង​ថា ថ្មីៗនេះ ប្រទេសអូស្ត្រាលីបាន​ក្លាយ​ជាប្រទេសដំបូងគេ​ក្នុងពិភពលោក ដែល​ហាមឃាត់កុមារ​លើ​​ប្រព័ន្ធផ្សព្វផ្សាយសង្គម​​ សម្រាប់កុមារអាយុក្រោម ១៦ ឆ្នាំ។

ការ​ធ្វើ​បែប​នេះ​ជា​រឿង​​ចាំ​បាច់​ ដើម្បីផ្ទៀងផ្ទាត់​អាយុ​របស់​អ្នក​ប្រើ​ប្រាស់ ​និង​បិទគណនីដោយ​អ្នកប្រើប្រាស់​មិនទាន់​គ្រប់​អាយុ។​

កាល​ពីសប្តាហ៍មុន សមាជិកសភានៅក្នុងសភាជាន់​ទាប​របស់ប្រទេស​បារាំង​បានអនុម័ត​ច្បាប់​ដែល​នឹង​ហាមឃាត់​ការចូលប្រើប្រព័ន្ធ​ផ្សព្វផ្សាយសង្គមសម្រាប់ក្មេងអាយុក្រោម ១៥ ឆ្នាំ។

ចំណែក​ចក្រភពអង់គ្លេស​ក៏កំពុងពិចារណាលើការហាមឃាត់​នេះ​ផង​ដែរ​។​

នៅក្នុងប្រទេសឥណ្ឌា លោក LSK Devarayalu សមាជិកសភាមកពីគណបក្ស Telugu Desam និង​ជាមនុស្ស​ជិតស្និទ្ធ​ជាមួយ​នាយក​រដ្ឋមន្ត្រី លោក Narendra Modi បាន​ស្នើ​ច្បាប់ ដើម្បី​ស្វែង​រកការរារាំង​កុមារអាយុក្រោម ១៦ ឆ្នាំ ពីការប្រើប្រាស់ប្រព័ន្ធផ្សព្វផ្សាយ​សង្គម ​ កាលពីសប្តាហ៍មុន។

ចំណែក​រដ្ឋមន្ត្រីក្រសួងព័ត៌មាន លោក​ Nara Lokesh បាន​និយាយ​នៅ​លើ​ X កាល​ពី​សប្តាហ៍​មុន​ថា៖ «កុមារ​កំពុងចូល​ទៅ​ប្រើ​ប្រាស់បណ្តាញ​សង្គម​ឥត​ឈប់ឈរ ដែល​ប៉ះពាល់​ដល់​អារម្មណ៍​ និង​ការ​អប់រំរបស់ពួកគេ»។

លោកបានបន្ថែមថា៖ « យើងនឹងធានាថាប្រព័ន្ធផ្សព្វផ្សាយ​សង្គម​ក្លាយ​ជា​កន្លែងដែលមានសុវត្ថិភាពជាង​មុន និង​កាត់បន្ថយផល​ប៉ះ​ពាល់​ដ៏អាក្រក់ចំពោះ​ជន​រង​គ្រោះ​ ជាពិសេស​សម្រាប់ស្ត្រី និងកុមារ»។

មិន​តែ​ប៉ុណ្ណោះ​ ​រដ្ឋផ្សេង​ទៀតក៏​ចំណាប់​អារម្មណ៍​ចំពោះ​វិធាន​ការ​នេះ​ផង​ដែរ។

ការ​សិក្សានាពេលថ្មីៗ​នេះ​ដោយ​អង្គការ​ក្រៅ​រដ្ឋាភិបាល​បាន​ស្ទង់​មតិ​ថា​ក្មេង​ជំទង់​ឥណ្ឌា ចំនួន ១ ២៧៧នាក់ អាច​​ការរឹតបន្តឹងតាមអាយុ និងប្រព័ន្ធផ្ទៀងផ្ទាត់បាន ហើយ​វា​នឹង​ក្លាយ​ជា​ឧបសគ្គ​បន្ថែម​នៅ​ក្នុង​ប្រពន្ធ័ឌីជីថលរបស់​ប្រទេស​ឥណ្ឌា៕​

ប្រែសម្រួល៖ ណឺ មិនា  

The post រដ្ឋ​ខ្លះ​នៅ​ឥណ្ឌា​​ចាប់ផ្តើម​រកវិធានការ​ហាមឃាត់​ក្មេង​ក្រោម ១៦ ប្រើប្រាស់បណ្តាញ​សង្គម​ appeared first on Kampuchea Thmey Daily.

​តាំងពីដើមខែ​នេះ​មក​ អ្នកប្រើប្រាស់ Facebook បានទទួលការជូនដំណឹងពីក្រុមហ៊ុន ដោយបញ្ជាក់ថា៖ «ចាប់ពីថ្ងៃទី ៦ ខែមិថុនា វិដេអូផ្សាយផ្ទាល់នៅលើ Facebook ដែលនៅយូរ​ជាង ៣០​ ថ្ងៃ នឹងត្រូវដកចេញ»។ អ្នកប្រើប្រាស់ខ្លះថា Facebook ទុកពេលរហូតដល់ខែកក្កដា។

វេទិកាបណ្ដាញ​សង្គមដដែល បានណែនាំអ្នកប្រើប្រាស់ឱ្យទាញយក ផ្ទេរ ឬបំប្លែងវិដេអូផ្សាយផ្ទាល់របស់ពួកគេទៅជា Reels ​ដើម្បី​រក្សា​ទុក​។ អ្នកប្រើប្រាស់អាចពន្យាពេលការលុបរហូតដល់ ៦ ខែ។ បន្ទាប់​ពី​រយៈពេល​នោះ ប្រសិនបើ​មិន​មាន​សកម្មភាព​ណា​មួយ​ទេ វិដេអូ​ផ្សាយ​បន្ត​ផ្ទាល់​ចាស់ៗរបស់​ពួកគេ ​នឹង​ត្រូវ​បាន​លុប​ចេញ​ជា​អចិន្ត្រៃយ៍។

គួរគូស​បញ្ជាក់ថា​ Facebook បានចាប់ផ្តើមអនុវត្តគោលការណ៍ «លុបចេញក្រោយ​ ៣០ ថ្ងៃ​» របស់ខ្លួននៅលើទំព័រផ្ទាល់ខ្លួន និងទំព័រអ្នកគាំទ្រ (fan pages) ក្នុងខែកុម្ភៈ។ ក្រុមហ៊ុន​បាននិយាយ​ក្នុងសេចក្តីប្រកាសថ្ងៃទី ១៨ ខែកុម្ភៈ ថា៖ «ដោយសារតែការចូល​មើលវិដេអូផ្សាយផ្ទាល់ភាគច្រើន កើតឡើងក្នុង​រយៈ​ពេលប៉ុន្មានសប្តាហ៍ដំបូងនៃការផ្សាយ យើង​នឹង​ធ្វើ​បច្ចុប្បន្នភាព​អំពីរយៈពេល ដែលវិដេអូផ្សាយ​ផ្ទាល់ អាច​រក្សាទុកបាន​នៅលើ Facebook»៕

​

​

​

The post ​Facebook នឹង​លុបវិដេអូផ្សាយផ្ទាល់ ​បន្ទាប់ពី ៣០ ថ្ងៃ នៅវៀតណាម appeared first on Kampuchea Thmey Daily.

ក្រសួងបានកត់សម្គាល់បែបនេះក្នុងសេចក្ដីប្រកាសព័ត៌មានចុះថ្ងៃទី១៨ ខែធ្នូ របស់ខ្លួនដោយថាបើទោះបីពេលនេះបញ្ហាពាក់ព័ន្ធនឹងការហៅឆ្លងប្រព័ន្ធត្រូវបានដោះស្រាយឱ្យមានភាពល្អប្រសើរជាងមុន និងសម្រួលដល់ទំនាក់ទំនងរបស់ប្រជាពលរដ្ឋហើយក្ដី តែការទាក់ទងឬហៅទូរស័ព្ទដោយប្រើប្រាស់បណ្ដាញសង្គមដូចជា Telegram, Whatsapp និងFacebook Messenger ត្រូវបានពលរដ្ឋចាប់យកមកប្រើប្រាស់ជំនួសឱ្យការទាក់ទងតាមលេខទូរស័ព្ទចល័តផ្ទាល់។

ពលរដ្ឋរស់នៅរាជធានីភ្នំពេញម្នាក់លោក ស៊ឹម វិបុល បានប្រាប់កម្ពុជាថ្មីថាលោកស្ទើរតែមិនដែលទាក់ទងទៅមិត្តភ័ក្ររបស់លោកតាមលេខទូរស័ព្ទទៅហើយពេលនេះ ដោយរាល់ពេលដែលចង់ទាក់ទងលោកតែប្រើប្រាស់ Telegram ឬFacebook Messenger វិញដោយថាការប្រើប្រាស់បណ្ដាញសង្គមមានភាពងាយស្រួលជាង អាចដឹងពីពេលដែលពួកគេអនឡាញ ឬខលទៅ ភាគីម្ខាងទៀតបានឃើញឬមិនឃើញ និងអាចខលជាវីដេអូបាន។

គួរឱ្យដឹងផងដែរថានៅកម្ពុជាបច្ចប្បន្នមានក្រុមហ៊ុនទូរស័ព្ទចំនួន៥រួមមាន Cellcard, Smart, Metfone, Seatel និង Cootel ខណៈដែលពេលនេះក្រុមហ៊ុនបានផ្ដោតលើការផ្ដល់ជាកញ្ចប់អ៊ុនធើណិតដល់អ្នកប្រើប្រាស់វិញ។

ក្រសួងប្រៃសណីយ៍ និងទូរគមនាគមន៍ បានដាក់ចេញនូវផែនការសកម្មភាពជាច្រើនដើម្បីពង្រឹងគុណភាពសេវាទូរគមនាគមន៍ដោយមានការចាប់សាងសង់អង់តែនបន្ថែមនៅតាមបុរីនានាក្នុងរាជធានីភ្នំពេញ រួមទាំងក្នុងរាជធានីភ្នំពេញ និងនៅតាមបណ្ដាខេត្តផងដែរ៕

ដោយ ហ៊ុន សិរីវឌ្ឍន៍  

The post ក.ប.ទ៖ ពលរដ្ឋបានងាកមកប្រើបណ្ដាញសង្គមជំនួសការទាក់ទងតាមលេខទូរស័ព្ទផ្ទាល់ appeared first on Kampuchea Thmey Daily.

លោក ហេង សំណាង ប្រធានបណ្ដុំអង្គការសង្គមស៊ីវិល មានប្រសាសន៍ប្រាប់ “កម្ពុជាថ្មី” ថា ឥរិយាបថ សុជីវធម៌ ដែលអ្នកដទៃនឹងវាយតម្លៃបុគ្គល គឺដូចពាក្យស្លោកថា “សម្ដីសរជាតិ មាយាទសរពូជ”។ នៅពេលបច្ចុប្បន្ននេះ មិនថា ស្ថាប័នរដ្ឋ ស្ថាប័នឯកជន ឬក្រុមហ៊ុនតូចតាចក្ដី គេវាយតម្លៃបុគ្គលិកដំបូងគេគឺ​ Profile លើ Facebook ឬបណ្ដាញសង្គម ដើម្បីគេដឹងថា តើបុគ្គលនោះមកពីណា មានទំនាក់ទំនង បណ្ដាញរបស់គាត់ធ្វើអ្វីខ្លះ? ដូចនេះ អ្នកគ្រប់គ្រង ឬអ្នករើសបុគ្គលិក អ្នកចង់មានទំនាក់ទំនងមិត្តភាពជាមួយយើងក្ដី នៅពេលគេឃើញ Profile យើង គេអាចវាយតម្លៃយើងបានខ្លះ។

លោក ហេង សំណាង មានប្រសាសន៍បន្តថា៖ “នៅពេលណា យើងបង្កើត ឬបង្ហាញកំហឹងលើបណ្ដាញសង្គម ខណៈកំហឹងបង្កើតជាហិង្សា ដូចជា ហិង្សាពាក្យសម្ដី ហិង្សាដោយកាយវិការ ហិង្សាដោយចិត្តគំនិត ដែលនេះក៏អាចបង្កផលប៉ះពាល់ដល់មហាជនទូទៅ និងអ្នកដទៃអាចគិតថា ពាក្យសម្ដី ឬចិត្តគំនិតហិង្សារបស់យើងតាមបណ្ដាញសង្គម នឹងអាចចេញជាហិង្សាពិតនៅខាងក្រៅបណ្ដាញសង្គម”។  

លោក ហេង សំណាង មានប្រសាសន៍ថា ដើម្បីដោះស្រាយបញ្ហា បញ្ចេញមតិ ឬចែករំលែកនូវអ្វីដែលភ្ជាប់ដោយហិង្សា ពិសេសព័ត៌មានមិនពិត ដោយយើងគួរដឹងថា សតិអារម្មណ៍ នៃការប្រើប្រាស់បណ្ដាញសង្គម មិនខុសពីអត្តចរិត ឬសកម្មភាពខាងក្រៅរបស់បុគ្គលទេ ដូចនេះ យើងកុំទាន់អាលជឿលើអ្វីដែលយើងបានឃើញ កុំទាន់អាលជឿលើគម្ពីរ ឬសៀវភៅ កុំទាន់អាលជឿលើការបកស្រាយរបស់វាគ្មិនណាមួយ កុំទាន់អាលជឿលើគ្រូបាធ្យាយរបស់អ្នក កុំទាន់អាលជឿលើអ្វីដែលអ្នកបានស្ដាប់ កុំទាន់អាលជឿលើអ្វីផ្សេងៗទៀត។

លោក ហេង សំណាង បញ្ជាក់បន្តថា៖ “គេមិនហាមឃាត់មិនឱ្យយើងជឿទេ ប៉ុន្តែយើងត្រូវពិចារណា បើកាលណាយើងពិចារណាការណ៍ដែលគេបង្ហាញ ឬផលប៉ះពាល់នោះជារឿងពិត ហើយយើងបញ្ចេញមតិ ឬកែលម្អ នោះជាការណ៍ល្អហើយ។ ប៉ុន្តែបើរឿងនោះមិនពិត ឬមិនទាន់វាយតម្លៃច្បាស់លាស់ផង ហើយយើងចូលទៅវាយប្រហារ ខ្វះការពិចារណា នេះជាឥរិយាបទនៅក្នុងបណ្ដាញសង្គម ដែលធ្វើឱ្យប្រទេសកម្ពុជាពីមួយថ្ងៃទៅមួយថ្ងៃ គឺកាន់តែធ្លាក់ក្រមសីលធម៌សង្គមតាមរយៈការបញ្ចេញមតិ ឬបញ្ចេញសារតាមបណ្ដាញសង្គម”។

លោក ហេង សំណាង មានប្រសាសន៍ថា បច្ចុប្បន្ន នៅពេលយើងប្រើប្រាស់បណ្ដាញសង្គមមិនត្រឹមត្រូវទេ អ្នកដែលរងផលប៉ះពាល់គឺមិនត្រឹមតែខ្លួនឯងទេ គឺរួមបញ្ចូលទាំង​មជ្ឈដ្ឋានទូទៅ ហើយបើមជ្ឈដ្ឋានទូទៅបង្កើតជា គំនិតហិង្សានិយម តាមបណ្ដាសង្គមហើយ គឺប្រាកដណាស់ ជាតិ និងសង្គមយើង នឹងអាចធ្លាក់ទៅបែបហ្នឹងបាន។ ដូចនេះ តួនាទីកាតព្វកិច្ចរបស់យុវជនជំនាន់ក្រោយ សិស្សនិស្សិត មនុស្សចាស់ទុំ ត្រូវចូលរួមទាំងអស់គ្នា ដើម្បីឆ្លើយតប ឬធ្វើយ៉ាងណាឱ្យចេញជាលទ្ធផលវិជ្ជមាន ការគិតវិជ្ជាមាន ការសរសេរវិជ្ជមាន ដូចនេះអ្នកនៅជុំវិញ ឬមិត្តភក្ដិក្នុងបណ្ដាញពួកគាត់នឹងមើលឃើញថា មិត្តភក្ដិគាត់ជា មិត្តល្អ។

ដើម្បីកាត់បន្ថយ ឬលប់ការបញ្ចេញមតិអវិជ្ជាមាន និងចែលរំលែកព័ត៌មានមិនពិត និងនាំ ការសរសេរ ការបញ្ចេញមតិ ឬកាយវិការចិត្តរបស់យើងប្រកបដោយក្រមសីលធម៌ លោក ហេង សំណាង ផ្ដល់មតិថា យើងគួរមើលឃើញថា ការបង្ហាញលើបណ្ដាញសង្គម ឬព័ត៌មានណាដែលបង្កឱ្យប៉ះពាល់អារម្មណ៍ ឬព័ត៌មានមិនផ្ដល់ប្រយោជន៍ ព័ត៌មានបែបកំហឹង បែបហិង្សា ការញុះញង់… គឺយើងអាចលុបចោល ឬ Report (រាយការណ៍បិទ Page) នៅពេលយើងធ្វើបែបនេះ នឹងធ្វើឱ្យបណ្ដាញសង្គមរបស់យើង មានតែរឿងល្អ រឿងដែលមានប្រយោជន៍ដល់ខ្លួនឯង។ យ៉ាងណា ការបង្ហាញមតិល្អ ឬលើបណ្ដាញសង្គម គ្រាន់តែជាឥរិយាបថមួយផ្នែកទេ គឺសូមឱ្យឥរិយាបទទាំងការរស់នៅ ទាំងទំនាក់ទំនងខាងក្រៅ ឱ្យល្អដូចបណ្ដាញសង្គមដែរ ជួនការអ្នកខ្លះបង្ហោះលើបណ្ដាញសង្គមផ្សេង ឯការរស់នៅខាងក្រៅផ្សឹង។

គួរបញ្ជាក់ថា នៅដើមឆ្នាំ២០២៣ មានអ្នកប្រើប្រាស់អ៊ីនធឺណេតចំនួនជាង ១១ លាននាក់នៅក្នុងប្រទេសកម្ពុជា ជាមួយនឹងការភ្ជាប់បណ្តាញទូរស័ព្ទចល័តសរុបជាង ២២ លានត្រូវបានដំណើរការ ស្មើនឹងជាង ១៣១ ភាគរយ នៃចំនួនប្រជាជនសរុប នេះបើយោងតាម ​​​​Digital 2023: Cambodia ។ ក្រសួងប្រៃសណីយ៍ និងទូរគមនាគមន៍ បានឱ្យដឹងថា អ្នកប្រើប្រាស់អ៊ីនធឺណេតនៅកម្ពុជា ចាប់ផ្តើមកើនឡើងយ៉ាងខ្លាំង ក្នុងអំឡុងពេលជំងឺរាតត្បាតកូវីដ-១៩ ជាមួយនឹងតម្រូវការទិញទំនិញតាមអ៊ីនធឺណិត និងការសិក្សាតាមអ៊ីនធឺណិត៕

អត្ថបទ៖ ច័ន្ទ វីរៈ

The post ផលប៉ះពាល់ នៃការបញ្ចេញមតិ ដោយកំហឹង ឬប្រយោគចាក់ដោត appeared first on Kampuchea Thmey Daily.

លោកបណ្ឌិត ឈត ប៊ុនថង អ្នកជំនាញផ្នែកទស្សនវិជ្ជា និងកិច្ចការសង្គមនៃរាជបណ្ឌិត្យសភាកម្ពុជា បានឱ្យ “កម្ពុជាថ្មី” ដឹងនៅថ្ងៃទី១៩ ខែមករា ឆ្នាំ២០២៤ នេះថា ប្រទេសកម្ពុជា ជាសង្គមប្រកាន់របបប្រជាធិបតេយ្យ ដែលប្រជាពលរដ្ឋមានសិទ្ធិសេរីភាព ប៉ុន្តែមិនមែនសិទ្ធិសេរីភាពដែលគ្មានព្រំដែនទេ រួមទាំងការផ្សព្វផ្សាយ ការបង្ហាញក្នុងបណ្ដាញសង្គមផងដែរ។

បណ្ឌិត ឈត ប៊ុនថង មានប្រសាសន៍បន្តថា៖ “សព្វថ្ងៃយើងមានសង្គម២ ទី១ សង្គមជាក់ស្ដែង ដែលយើងកំពុងរស់នៅ និង១ទៀត គឺបណ្ដាញសង្គម ដែលជាសង្គមឌីជីថល។ អ៊ីចឹង សង្គមនីមួយៗតែងមាននិយាម មានច្បាប់ មានគោលការណ៍ យើងអត់អាចធ្វើអីតាមទំនើងចិត្តទេ។ អ៊ីចឹង ការបង្ហាញភាពស៊ិចស៊ីហួសហេតុ ឬការធ្វើអីចំឡែកៗ រួមទាំងការបង្ហាញភាពទាក់ទាញតាមការបង្ហាញទ្រព្យសម្បត្តិ ខ្ញុំមើលទៅ គឺមិនគួរធ្វើទេ”។

បណ្ឌិត ឈត ប៊ុនថង មានប្រសាសន៍ថា មានមតិលើកឡើងថា ការណ៍ដែលអ្នកបង្ហោះប្លែកៗលើបណ្ដាញសង្គម គឺដើម្បីពញ្ញាក់អារម្មណ៍ ធ្វើឱ្យមានការចាប់អារម្មណ៍ ដើម្បីបាន View Like Share ច្រើន ដែលពួកគេអាចបានប្រាក់កម្រៃពីការរកលុយតាមបណ្ដាញសង្គម ដូចជាតាម Facebook Youtube ជាដើមនោះ។ ម៉្យាងទៀត ពួកគេអាចលក់សេវាកម្ម លក់ទំនិញ លក់ផលិតផលរបស់គាត់តាមបណ្ដាញសង្គមជាដើម។ ប៉ុន្តែក៏ត្រូវគិតពីសីលធម៌ និងច្បាប់សង្គមផងដែរ។

បណ្ឌិត ឈត ប៊ុនថង លើកឡើងបន្ថែមថា៖ “ប្រសិនយើងគិតថា ធ្វើម៉េចឱ្យតែលក់សេវា លក់ផលិតផលដាច់ យើងអត់ខ្វល់ពីការប៉ះពាល់ដល់ច្បាប់សង្គម ច្បាប់រដ្ឋ ខ្ញុំគិតថា មិនមែនជារឿងល្អទេ។ យើងបានផលប្រយោជន៍យើង តែខូចដល់ប្រពៃណីទំនៀលទម្លាប់។ ព្រោះក្នុងសង្គម យើងជាសមាជិកមួយរបស់សង្គម យើងអត់អាចធ្វើអ្វីតាមចិត្តយើងទេ បើសិនជាយើងធ្វើតែក្នុងផ្ទះរបស់យើង ជាការងារឯកជននៅបន្ទប់ទឹក បន្ទប់ដេក នៅផ្ទះយើងដែលគ្មានអ្នកណាឃើញ យើងធ្វើទៅ តែកាលណាយើងផ្សព្វផ្សាយជាសាធារណៈ គឺត្រូវស្ថិតក្រោមច្បាប់មួយ ហៅថា ច្បាប់រដ្ឋដែលទាក់ទងនឹងវិស័យហ្នឹង ហើយក្រៅពីច្បាប់រដ្ឋ គឺច្បាប់សង្គម មានន័យថា ច្បាប់សីលធម៌ ប្រពៃណី ទំនៀមទម្លាប់ជាដើមហ្នឹង”។

បណ្ឌិត ឈត ប៊ុនថង បញ្ជាក់ថា ក្នុងសង្គមប្រជាធិបតេយ្យ យើងមានសិទ្ធិសេរីភាព ប៉ុន្តែអត់អាចធ្វើអីលើសពីពីច្បាប់រដ្ឋ និងច្បាប់ទំនៀមទម្លាប់ទេ បើធ្វើលើសពីហ្នឹង នឹងទទួលការរិះគន់ពីមហាជន ហើយបើកម្រិតធ្ងន់ធ្ងរទៅ អាជ្ញាធរនឹងហៅទៅវាស់កម្ពស់ឱ្យកែតម្រូវ ហើយសិនជាធ្ងន់ធ្ងរទៀត នឹងត្រូវផាកពិន័យ ឬកសាងសំណុំរឿងបញ្ជូនទៅតុលាការ ដែលការធ្វើលើសនេះ គឺជាការនាំទុក្ខដាក់ខ្លួន។

គួររំលឹកថា ក្នុងឱកាសអញ្ជើញ ពិធីបិទសន្និ​បាតបូកសរុបការងារឆ្នាំចាស់ ឆ្នាំ២០២៣ និងលើកទិសដៅការងារឆ្នាំថ្មី ឆ្នាំ២០២៤ របស់ក្រសួងកិច្ចការ​នារី កាលពីថ្ងៃទី១១ ខែមករា ឆ្នាំ២០២៤ កន្លងទៅថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា អំពាវនាវ អ្នកបង្កើតមាតិកាលើបណ្ដាញសង្គម ធ្វើអ្វី ត្រូវមានព្រំដែន គោរពច្បាប់ និងសីលធម៌សង្គម។

សម្ដេចធិបតី ហ៊ុន ម៉ាណែត បានអំពាវនាវប្រជាពលរដ្ឋ ទាំងស្រី ទាំងប្រុស ពិសេសយុវជន ធ្វើអ្វីក៏ដោយគឺត្រូវមានព្រំដែន និងការទទួលខុសត្រូវរបស់ខ្លួន។ សម្ដេចបញ្ជាក់បន្ថែមថា សិទ្ធិសេរីភាពមាន ប៉ុន្តែសូមកុំឱ្យហួសព្រំដែន សូមរួមគ្នាថែរក្សា គោរពច្បាប់ ដើម្បីចូលរួមថែរក្សាស្ថេរភាព និងសណ្ដាប់ធ្នាប់សង្គម គោរពប្រពៃណីវប្បធម៌របស់យើង៕

អត្ថបទ៖ ច័ន្ទ ​វីរៈ

The post សេរីភាពប្រើបណ្ដាញសង្គម ក្នុងសង្គមប្រជាធិបតេយ្យ គប្បីត្រូវមានព្រំដែន appeared first on Kampuchea Thmey Daily.

បណ្ឌិត ម៉ី កល្យាណ បានមានប្រសាសន៍ “កម្ពុជាថ្មី” ថ្ងៃទី១៧ ខែមករា ឆ្នាំ២០២៤ នេះថា ការបញ្ចេញមតិ ការផ្សព្វផ្សាយ ការលក់តាមអនឡាញ គឺជាបញ្ហាធំ ខណៈប៉ុន្មានថ្ងៃនេះ អ្នកប្រាជ្ញអន្តរជាតិបាននិយាយដូចៗគ្នា គឺដូចអ្វីដែលលោកបណ្ឌិតគិតឃើញដែរនោះថា ហានិភ័យធំរបស់ពិភពលោក នៅឆ្នាំ២០២៤ គឺភាពច្របូកច្របល់លើបណ្ដាញសង្គម។

បណ្ឌិត ម៉ី កល្យាណ មានប្រសាសន៍បញ្ជាក់ថា៖ “មិនមែនបញ្ហាភូមិសាស្ត្រនយោបាយ បញ្ហារុស្ស៊ី ជាមួយអ៊ុកក្រែន ឬបញ្ហាអាមេរិក ជាមួយរុស្ស៊ី ជាមួយចិនទេ រឿងធំបំផុត គឺផ្ទៃក្នុងរបស់អាមេរិកដែលឈ្លោះគ្នារហូត រវាងក្រុមសាធារណរដ្ឋ និងក្រុមប្រជាធិបតេយ្យ និយាយមិនត្រូវគ្នា។ មូលហេតុមកពី Facebook TikTok ទម្រង់បណ្ដាញសង្គមផ្សេងៗច្រើនច្របូកច្របល់​ពេក ធ្វើឱ្យមនុស្សម្នាវង្វេងវង្វាន់ មិនដឹងរឿងអីខុស ឬត្រូវ រឿងពិត ឬមិនពិត ដែលមិនមែនតែស្រុកខ្មែរទេ គឺលើពិភពលោក”។

បណ្ឌិត ម៉ី កល្យាណ មានប្រសាសន៍ថា ពីមុនមនុស្សម្នាក់កម្រមានឱកាស ឬបើប្រាប់គេម្ដង បានតែមនុស្ស ១០ ឬ ១០០នាក់ តែបច្ចុប្បន្នដោយសារមាន អ៊ិនធឺណេត Facebook TikTok… ជាដើមនោះ ធ្វើឱ្យអ្នកណានិយាយអ្វីក៏បាន លើបណ្ដាញសង្គមដ៏ទូលំទូលាយ រួមទាំងរឿងឥតប្រយោជន៍ ដែលនាំឱ្យមនុស្សវង្វេងវង្វាន់។ សូម្បីតែអាមេរិកក៏ច្របូកច្របល់ ដូចជារឿងដឹកនាំប្រទេសថាគួរ ច្បាំង ឬមិនច្បាំង ជាដើមនោះ។

បណ្ឌិត ម៉ី កល្យាណ មានប្រសាសន៍បន្តថា៖ “ខ្ញុំសរុបមកឃើញថា មនុស្សក្នុងសាកលលោកវង្វេងវង្វាន់ខ្លាំង។ បើប្រទេសខ្មែរយើង [គឺ] មានបញ្ហាពីយូរ តាំងពីរឿងសីលធម៌ គុណធម៌ រួមទាំងភាពច្របូកច្របល់ នៃការបញ្ចេញ​មតិ​លើបណ្ដញសង្គម ពិសេសពីបុគ្គលដែលខ្វះចំណេះដឹង និងគុណធម៌។​ កត្តា ២ ធំ ដែលធ្វើឱ្យមនុស្សលើសកលលោកច្របូកច្របល់ ដែលមិនមែនតែប្រជាជនខ្មែរនោះ ទី១ បញ្ហាបណ្ដាញសង្គម ទី២ ការខ្វះសីលធម៌ គុណធម៌”។

បណ្ឌិត ម៉ី កល្យាណ បញ្ជាក់បន្ថែមថា រឿងការទាក់ទាញលក់ឡេ លក់ភេសជ្ជៈ ឬលក់ផលិតផលផ្សេងៗនោះ មិនសំខាន់ទេ អ្វីដែលសំខាន់ តើយើងចេះគិតត្រឹមត្រូវ ឬទេ? មិនមែនចេះតែជឿតាមគេ ខណៈមានមតិច្រើន និងផ្ទុយគ្នា។

បណ្ឌិត ម៉ី កល្យាណ លើកឡើងថា ដើម្បីបញ្ចៀសបញ្ហាបណ្ដាញសង្គម ត្រូវមានការគ្រប់គ្រងល្អ ទី១ គឺការចេះគ្រប់គ្រងខ្លួនឯង មានវិន័យ ហើយទី២ មានច្បាប់ មានការអនុវត្តត្រឹមត្រូវក្នុងការគ្រប់គ្រងសង្គម។ ជាមួយគ្នានេះ ត្រូវមានការគ្រប់គ្រងសីលធម៌ គុណធម៌ និងបណ្ដាញសង្គម និងការចេះការចែករំលែក ជួយដាស់តឿនណែនាំគ្នា៕

អត្ថបទ៖ ច័ន្ទ ​វីរៈ

The post បញ្ហាបណ្ដាញសង្គម ជាបញ្ហាធំរបស់ កម្ពុជា និងសាកលលោក appeared first on Kampuchea Thmey Daily.

ក្រុមហ៊ុនបណ្តាញសង្គមបានបង្កើតមុខងារថ្មី និងធ្វើបច្ចុប្បន្នភាពថ្នាលរបស់ខ្លួន ដោយមានលក្ខណៈស្រដៀងគ្នាទៅនឹងមុខងាររបស់ថ្នាលផ្សេងទៀតដែលកំពុងមានប្រជាប្រិយភាព ជាហេតុធ្វើឱ្យបន្ទាត់ខណ្ឌចែកភាពលេចធ្លោ និងមុខងារពិសេសរវាងថ្នាលបណ្តាញសង្គមពីមុនលែងមានទៀតហើយ។

ការលួចចម្លង លក្ខណៈពិសេសរបស់គ្នាមិនមែនជារឿងថ្មីឡើយ នៅក្នុងពិភពបណ្តាញសង្គម ជាក់ស្តែង ដំបូងកម្មវិធី Instagram ត្រូវបានគេស្គាល់ថា ជាកម្មវិធីសម្រាប់បង្ហោះរូបភាពដ៏មានការពេញនិយមតែប៉ុណ្ណោះ ប៉ុន្តែបន្ទាប់មក Instagram បានរួមបញ្ចូលមុខងារ Stories បន្ថែមដោយមើលឃើញពីប្រជាប្រិយភាពរបស់មុខងារនេះនៅក្នុងកម្មវិធី Snapchat ។ Instagram ក៏បានបង្កើត Reels ដើម្បីប្រកួតប្រជែងជាមួយ TikTok ព្រមទាំងបានចាប់ផ្តើមមុខងារមួយហៅថា Remix for Reels ដែលត្រូវបានបង្កើតឡើងដើម្បីឆ្លើយតបទៅនឹងមុខងារ Duet ដ៏ពេញនិយមរបស់ TikTok ផងដែរ។

ថ្មីៗនេះ ក្រុមហ៊ុន Meta បានដាក់ដំណើរការថ្នាលបណ្តាញសង្គមថ្មីមួយដែលមានឈ្មោះថា Threads ជាកម្មវិធីបង្កើតឡើងមានលក្ខណៈស្រដៀងគ្នាខ្លាំងទៅនឹងកម្មវិធី Twitter ព្រមទាំងទទួលបានប្រជាប្រិយភាពខ្លាំង ដោយក្នុងរយៈពេលប៉ុន្មានថ្ងៃដំបូងចាប់តាំងពីការប្រកាសដាក់ឱ្យដំណើរការកម្មវិធី Threads ថ្នាលនេះបានប្រមូលផ្តុំអ្នកចុះឈ្មោះជាង ១០០ លាននាក់ ដែលធ្វើឱ្យកម្មវិធីនេះក្លាយជាដៃគូប្រកួតប្រជែង Twitter ដ៏ធំបំផុតនាពេលបច្ចុប្បន្ននៅក្នុងពិភពបណ្តាញសង្គម។

មិនយូរប៉ុន្មាន Elon Musk បានផ្លាស់ប្តូរម៉ាកយីហោឡើងវិញ ដោយប្តូរពី Twitter ទៅជា “X” នៅចុងខែកក្កដាផងដែរ។ នៅក្រោយការប្រកាសរបស់ Elon Musk បន្តិច TikTok ក៏បានប្រកាសពីមុខងារថ្មីរបស់ខ្លួន ដែលអនុញ្ញាតឱ្យអ្នកប្រើប្រាស់អាចបង្ហោះអត្ថបទដោយមានផ្ទៃខាងក្រោយ និងសំឡេងអមជាមួយបាន។ ការប្រកួតប្រជែងរវាងក្រុមហ៊ុនធំៗទាំងនេះបានទាក់ទាញចំណាប់អារម្មណ៍ពីមហាជនជាច្រើន និងធ្វើឱ្យបណ្តាញសង្គមមានភាពចលាចលផងដែរ៕

អត្ថបទ៖ ផល ធារិត

The post ឈ្វេងយល់ អំពី សង្រ្គាម Social Media នាពេលបច្ចុប្បន្ន appeared first on Kampuchea Thmey Daily.