បញ្ហាបណ្ដាញសង្គម ជាបញ្ហាធំរបស់ កម្ពុជា និងសាកលលោក

ខណៈមានការផ្សព្វផ្សាយ និងបង្ហោះលើបណ្ដាញសង្គម ទាំងការបញ្ចេញមតិ ពិសេសការលក់ផលិតផល ឬសម្ដែងរឿងខ្លី ដោយទាញយកការចាប់អារម្មណ៍តាមរយៈរូបភាព ពាក្យសម្ដី និងសកម្មភាពមិនសមរម្យនោះ បណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្តមក្រុមប្រឹក្សាសេដ្ឋកិច្ចជាតិ បានឱ្យដឹងថា បញ្ហាបណ្ដាញសង្គម មិនមែនតែជាបញ្ហានៅកម្ពុជាទេ គឺជាបញ្ហាធំរបស់ពិភពលោក។

បណ្ឌិត ម៉ី កល្យាណ បានមានប្រសាសន៍ “កម្ពុជាថ្មី” ថ្ងៃទី១៧ ខែមករា ឆ្នាំ២០២៤ នេះថា ការបញ្ចេញមតិ ការផ្សព្វផ្សាយ ការលក់តាមអនឡាញ គឺជាបញ្ហាធំ ខណៈប៉ុន្មានថ្ងៃនេះ អ្នកប្រាជ្ញអន្តរជាតិបាននិយាយដូចៗគ្នា គឺដូចអ្វីដែលលោកបណ្ឌិតគិតឃើញដែរនោះថា ហានិភ័យធំរបស់ពិភពលោក នៅឆ្នាំ២០២៤ គឺភាពច្របូកច្របល់លើបណ្ដាញសង្គម។

បណ្ឌិត ម៉ី កល្យាណ មានប្រសាសន៍បញ្ជាក់ថា៖ “មិនមែនបញ្ហាភូមិសាស្ត្រនយោបាយ បញ្ហារុស្ស៊ី ជាមួយអ៊ុកក្រែន ឬបញ្ហាអាមេរិក ជាមួយរុស្ស៊ី ជាមួយចិនទេ រឿងធំបំផុត គឺផ្ទៃក្នុងរបស់អាមេរិកដែលឈ្លោះគ្នារហូត រវាងក្រុមសាធារណរដ្ឋ និងក្រុមប្រជាធិបតេយ្យ និយាយមិនត្រូវគ្នា។ មូលហេតុមកពី Facebook TikTok ទម្រង់បណ្ដាញសង្គមផ្សេងៗច្រើនច្របូកច្របល់​ពេក ធ្វើឱ្យមនុស្សម្នាវង្វេងវង្វាន់ មិនដឹងរឿងអីខុស ឬត្រូវ រឿងពិត ឬមិនពិត ដែលមិនមែនតែស្រុកខ្មែរទេ គឺលើពិភពលោក”។

បណ្ឌិត ម៉ី កល្យាណ មានប្រសាសន៍ថា ពីមុនមនុស្សម្នាក់កម្រមានឱកាស ឬបើប្រាប់គេម្ដង បានតែមនុស្ស ១០ ឬ ១០០នាក់ តែបច្ចុប្បន្នដោយសារមាន អ៊ិនធឺណេត Facebook TikTok… ជាដើមនោះ ធ្វើឱ្យអ្នកណានិយាយអ្វីក៏បាន លើបណ្ដាញសង្គមដ៏ទូលំទូលាយ រួមទាំងរឿងឥតប្រយោជន៍ ដែលនាំឱ្យមនុស្សវង្វេងវង្វាន់។ សូម្បីតែអាមេរិកក៏ច្របូកច្របល់ ដូចជារឿងដឹកនាំប្រទេសថាគួរ ច្បាំង ឬមិនច្បាំង ជាដើមនោះ។

បណ្ឌិត ម៉ី កល្យាណ មានប្រសាសន៍បន្តថា៖ “ខ្ញុំសរុបមកឃើញថា មនុស្សក្នុងសាកលលោកវង្វេងវង្វាន់ខ្លាំង។ បើប្រទេសខ្មែរយើង [គឺ] មានបញ្ហាពីយូរ តាំងពីរឿងសីលធម៌ គុណធម៌ រួមទាំងភាពច្របូកច្របល់ នៃការបញ្ចេញ​មតិ​លើបណ្ដញសង្គម ពិសេសពីបុគ្គលដែលខ្វះចំណេះដឹង និងគុណធម៌។​ កត្តា ២ ធំ ដែលធ្វើឱ្យមនុស្សលើសកលលោកច្របូកច្របល់ ដែលមិនមែនតែប្រជាជនខ្មែរនោះ ទី១ បញ្ហាបណ្ដាញសង្គម ទី២ ការខ្វះសីលធម៌ គុណធម៌”។

បណ្ឌិត ម៉ី កល្យាណ បញ្ជាក់បន្ថែមថា រឿងការទាក់ទាញលក់ឡេ លក់ភេសជ្ជៈ ឬលក់ផលិតផលផ្សេងៗនោះ មិនសំខាន់ទេ អ្វីដែលសំខាន់ តើយើងចេះគិតត្រឹមត្រូវ ឬទេ? មិនមែនចេះតែជឿតាមគេ ខណៈមានមតិច្រើន និងផ្ទុយគ្នា។

បណ្ឌិត ម៉ី កល្យាណ លើកឡើងថា ដើម្បីបញ្ចៀសបញ្ហាបណ្ដាញសង្គម ត្រូវមានការគ្រប់គ្រងល្អ ទី១ គឺការចេះគ្រប់គ្រងខ្លួនឯង មានវិន័យ ហើយទី២ មានច្បាប់ មានការអនុវត្តត្រឹមត្រូវក្នុងការគ្រប់គ្រងសង្គម។ ជាមួយគ្នានេះ ត្រូវមានការគ្រប់គ្រងសីលធម៌ គុណធម៌ និងបណ្ដាញសង្គម និងការចេះការចែករំលែក ជួយដាស់តឿនណែនាំគ្នា៕

អត្ថបទ៖ ច័ន្ទ ​វីរៈ