ព័ត៌មានអន្ដរជាតិ

Facebook នឹងលុបវិដេអូផ្សាយផ្ទាល់ បន្ទាប់ពី ៣០ ថ្ងៃ នៅវៀតណាម

បានផុស

១ ខែ មុន

នៅ

ថ្ងៃអង្គារ ១១ មីនា ២០២៥

ដោយ

វេទិកាបណ្ដាញសង្គម Facebook គ្រោងនឹងចាប់ផ្តើមលុបវិដេអូឡាយ (ផ្សាយផ្ទាល់) លើសពី ៣០ ថ្ងៃ ក្នុងប្រទេសវៀតណាម ចាប់ពីខែមិថុនា ឬកក្កដា តទៅ ហើយបានជំរុញឱ្យអ្នកប្រើប្រាស់រក្សាទុកមាតិការបស់ខ្លួន។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាំងពីដើមខែនេះមក អ្នកប្រើប្រាស់ Facebook បានទទួលការជូនដំណឹងពីក្រុមហ៊ុន ដោយបញ្ជាក់ថា៖ «ចាប់ពីថ្ងៃទី ៦ ខែមិថុនា វិដេអូផ្សាយផ្ទាល់នៅលើ Facebook ដែលនៅយូរជាង ៣០ ថ្ងៃ នឹងត្រូវដកចេញ»។ អ្នកប្រើប្រាស់ខ្លះថា Facebook ទុកពេលរហូតដល់ខែកក្កដា។

វេទិកាបណ្ដាញសង្គមដដែល បានណែនាំអ្នកប្រើប្រាស់ឱ្យទាញយក ផ្ទេរ ឬបំប្លែងវិដេអូផ្សាយផ្ទាល់របស់ពួកគេទៅជា Reels ដើម្បីរក្សាទុក។ អ្នកប្រើប្រាស់អាចពន្យាពេលការលុបរហូតដល់ ៦ ខែ។ បន្ទាប់ពីរយៈពេលនោះ ប្រសិនបើមិនមានសកម្មភាពណាមួយទេ វិដេអូផ្សាយបន្តផ្ទាល់ចាស់ៗរបស់ពួកគេ នឹងត្រូវបានលុបចេញជាអចិន្ត្រៃយ៍។

គួរគូសបញ្ជាក់ថា Facebook បានចាប់ផ្តើមអនុវត្តគោលការណ៍ «លុបចេញក្រោយ ៣០ ថ្ងៃ» របស់ខ្លួននៅលើទំព័រផ្ទាល់ខ្លួន និងទំព័រអ្នកគាំទ្រ (fan pages) ក្នុងខែកុម្ភៈ។ ក្រុមហ៊ុនបាននិយាយក្នុងសេចក្តីប្រកាសថ្ងៃទី ១៨ ខែកុម្ភៈ ថា៖ «ដោយសារតែការចូលមើលវិដេអូផ្សាយផ្ទាល់ភាគច្រើន កើតឡើងក្នុងរយៈពេលប៉ុន្មានសប្តាហ៍ដំបូងនៃការផ្សាយ យើងនឹងធ្វើបច្ចុប្បន្នភាពអំពីរយៈពេល ដែលវិដេអូផ្សាយផ្ទាល់ អាចរក្សាទុកបាននៅលើ Facebook»៕