បបូរមាត់ Archives - Kampuchea Thmey Daily

កុំច្រឡំ! ជំងឺគីសបបូរមាត់ ខុសពីជំងឺមហារីកមាត់ធ្មេញ

អុន ស្រីមាន — Thu, 08 Aug 2024 03:28:26 +0000

មន្ទីរពេទ្យកាល់ម៉ែត បានឱ្យដឹងថា ជំងឺគីសបបូរមាត់ គឺកើតឡើងដោយសារនៅប្រអប់មាត់សម្បូរទៅដោយក្រពេញទឹកមាត់តូចៗ (Minor salivary glands) រាប់លានដែលស្ថិតនៅក្រោមភ្នាសស្តើងសើមក្នុងមាត់។ នៅពេលដែលមានការស្ទះ ឬដាច់រហែកនៃក្រពេញនេះ ធ្វើឱ្យមានកំណើនទឹកដក់ (Mucin) ទៅជាជាលិកាជុំវិញបង្កើតជាគីសក្រពេញទឹកមាត់។ ហើយគីសនេះ មិនមែនជាជំងឺមហារីកមាត់ធ្មេញទេ។

រូបភាព៖ មន្ទីរពេទ្យកាល់ម៉ែត

ប្រភពខាងលើបានឱ្យដឹងថា ប្រភេទគីសនេះវាអាចកើតឡើងគ្រប់កន្លែងក្នុងមាត់ លើកលែងតែលើអញ្ចាញធ្មេញ ហើយភាគច្រើនកើតឡើងញឹកញាប់លើបបូរមាត់។ មូលហេតុ ដែលនាំឱ្យកើតមានជំងឺនេះ ដោយសារការស្ទះនៃក្រពេញទឹកមាត់តូចៗ ហើយមូលហេតុចំបងមកពីការខាំបបូរមាត់ ឬប៉ះទង្គិចបបូរមាត់។ រោគសញ្ញានៃគីសនេះ មិនមានការឈឺចាប់នោះទេ មានពណ៌ក្រហមថ្លា ឬខៀវ និងមានសភាពឡើងប៉ោង និងពេលប៉ះជាដុំទន់រអិល ក្រឡាច់ផងដែរ។

រូបភាព៖ មន្ទីរពេទ្យកាល់ម៉ែត

មន្ទីរពេទ្យកាល់ម៉ែត បញ្ជាក់ទៀតថា ជំងឺនេះមិនអាចព្យាបាលដោយការលេបថ្នាំបានឡើយ។ ក្នុងករណីមានទំហំតូច វាអាចបាត់ទៅវិញដោយឯងៗ ហើយបើក្នុងករណីឡើងប៉ោងទំហំលើសពី ១សង់ទីម៉ែត្រឡើងទៅ ត្រូវការវះកាត់យកចេញតែម្តង។ យ៉ាងណាមិញ គីសបបូរមាត់នេះ ងាយនឹងកើតឡើងវិញ បើបច្ចេកទេសវះកាត់ត្រូវយកចេញទាំងស្រុងនូវដុំនោះ និងក្រពេញទឹកមាត់នៅជុំវិញ បើមិនដូចនោះទេ វានឹងកើតឡើងវិញ ចំណែកការខាំបបូរមាត់កន្លែងដដែលក៏អាចកើតឡើងវិញដែរ៕

ដោយ៖ អុន ស្រីមាន

The post កុំច្រឡំ! ជំងឺគីសបបូរមាត់ ខុសពីជំងឺមហារីកមាត់ធ្មេញ appeared first on Kampuchea Thmey Daily.

ទម្រង់បបូរមាត់ ៣ប្រភេទ បុព្វេចារជាមនុស្សមានវាសនាខ្ពស់

Sonya — Mon, 11 Apr 2022 14:22:59 +0000

ថ្វីត្បិតតែជោគជ័យឬបរាជ័យ សុភមង្គលឬទុក្ខលំបាករបស់មនុស្សម្នាក់ៗ អាស្រ័យលើការខិតខំរបស់ខ្លួនពិតមែន ប៉ុន្តែក្រៅពីនោះ ឥទ្ធិពលនៃអំណាចក្រៅខ្លួនក៏អាចកំណត់ជោគវាសនារបស់ពួកគេបានផងដែរ។

ដូច្នេះហើយ ទើបបានជានរវិទ្យាជឿថា ទម្រង់បបូរមាត់របស់មនុស្សស្រី អាចជួយឱ្យយើងទស្សន៍ទាយបានថា មនុស្សស្រីប្រភេទណានឹងមានសំណាងខ្លាំងក្នុងឆាកជីវិត។

បបូរមាត់ក្រហម ឬ Cherry

ជាទូទៅ មនុស្សស្រីដែលមានសំណាងមានមាត់ Cherry ជាមនុស្សមានសម្រស់ស្រស់ស្អាត ហើយងាយទទួលបានការចាប់អារម្មណ៍ និងភាពទាក់ទាញពីមនុស្សភេទផ្ទុយ។ ជាពិសេសមនុស្សស្រីដែលមានទម្រង់បបូរមាត់បែបនេះនឹងមានសំណាងខ្លាំងក្នុងការងារ និងជីវិតផងដែរ។ ពេលនាងពេញវ័យ នាងច្រើនតែជួបស្វាមីជាអ្នកមានទ្រព្យធន។ ដូច្នេះហើយ ជីវិតរបស់នាងក៏សម្បូរហូរហៀរ និងសុខសុភមង្គល។

បបូរមាត់ស្រស់ ឬក្រាស់បន្តិច

ភាគច្រើននៃស្ត្រីដែលមានមាត់ប្រភេទនេះ គឺជាមនុស្សដែលងាយនឹងមានសំណាងធំ ព្រមទាំងសុភមង្គលក្នុងឆាកជីវិត។ ដោយសារជ្រុងមាត់របស់នាងចង្អុលឡើងលើ នាងតែងតែមានមុខស្រស់ស្រាយ សប្បាយរីករាយ ហើយត្រូវបានមនុស្សម្នាស្រឡាញ់រាប់អាន គ្រប់ទីកន្លែងដែលនាងបានទៅ។

លើសពីនេះ នាងមានចរិតស្លូតបូត បើកចំហរ ទំនាក់ទំនងល្អ ទើបនាងច្រើនតែជោគជ័យលើគ្រប់រឿងមិនថាជីវិត ការងារ និងលាភសក្ការទ្រព្យសម្បត្តិ។

បបូរមាត់ពណ៌ផ្កាឈូក ឬរាងបេះដូង

ស្ត្រីសំណាងមានបបូរមាត់ពណ៌ផ្កាឈូក និងទម្រង់បេះដូង ជាមនុស្សកើតមកមានជោគវាសនាល្អពីកំណើត។ នាងជាមនុស្សមានភាពរីករាយ និងពោរពេញដោយថាមពលវិជ្ជមាន ដូច្នេះហើយទោះបីជាមានការលំបាកក្នុងជីវិតក៏ដោយ ក៏នាងអាចយកឈ្នះបានយ៉ាងឆាប់រហ័ស។ នៅពេលនាងឈានចូលវ័យកណ្តាល កេរ្តិ៍ឈ្មោះក្នុងអាជីពកាន់តែមានភាពរុងរឿង គ្រប់យ៉ាងកាន់តែសមប្រកបទៅៗជាលំដាប់៕

អត្ថបទ៖ សន្យា

ចុចអាន៖ នារីមានប្រជ្រុយលើដើមទ្រូងទាំង ៤កន្លែងនេះ ជាមនុស្សសំណាងធំ

The post ទម្រង់បបូរមាត់ ៣ប្រភេទ បុព្វេចារជាមនុស្សមានវាសនាខ្ពស់ appeared first on Kampuchea Thmey Daily.

៤ យ៉ាងគួរដឹង មុនចាក់បំពេញ Filler នៅត្រង់បបូរមាត់

សាង ស្រីល័ក្ខ — Fri, 11 Mar 2022 08:08:40 +0000

ការចាក់បញ្ចូលសារធាតុបំពេញ (Filler) ចូលទៅក្នុងស្បែកនៃបបូរមាត់ ដើម្បីជួយដោះស្រាយបញ្ហា ស្នាមជ្រួញ ជ្រៅនៅតំបន់ផ្សេងៗ អ្នកគួរតែពិគ្រោះជាមួយគ្រូពេទ្យជំនាញខាងសើស្បែកមុននឹងចាក់។ ជាពិសេសត្រូវអនុវត្តតាមការណែនាំមុន និងក្រោយពេលចាក់បំពេញ ដើម្បីកាត់បន្ថយលទ្ធភាពនៃភាពមិនប្រក្រតី ឬផលវិបាកកើតឡើងណាមួយ។

ទន្ទឹមនោះ មានវិធី ៤ យ៉ាង ដែលអ្នកគួរដឹង មុនពេលចាក់បំពេញ Filter ៖

១ គួរតែទៅពិគ្រោះជាមួយវេជ្ជបណ្ឌិត ដើម្បីធ្វើរោគវិនិច្ឆ័យរាល់បញ្ហា និងរៀបចំផែនការព្យាបាលសមស្រប។

២ ប្រសិនបើអ្នកមានជំងឺពីកំណើត ឬត្រូវលេបថ្នាំវីតាមីនជាប្រចាំ អ្នកគួរតែប្រាប់គ្រូពេទ្យ មុនពេលធ្វើការព្យាបាលណាមួយ។

៣ គួរជ្រើសរើសម៉ាក និងប្រភេទឧបករណ៍ចាក់បំពេញដែលមានស្តង់ដារ ហើយអាចពិនិត្យមើលព័ត៌មានលើកញ្ចប់សិន ចាំសម្រេចចិត្តថាចាក់។

៤ គួរពិនិត្យមើលមន្ទីរពេទ្យ ឬគ្លីនិកដែលមានស្តង់ដារ និងមានអាជ្ញាប័ណ្ណត្រឹមត្រូវ មុនសម្រេចចិត្តចាក់បន្ថែម។

គ្រោះថ្នាក់នៃការចាក់បំពេញមិនត្រូវស្តង់ដារ

លោកស្រី Mingkwan Wichaidit នាយកវិទ្យាស្ថានសើស្បែក បាននិយាយថា ការចាក់បំពេញមិនមានលក្ខណៈស្តង់ដារ ឬការជ្រើសរើសផលិតផលមិនសមរម្យ នឹងនាំឲ្យមានលំហូរនៃសារធាតុបំពេញស្បែកខូចទ្រង់ទ្រាយ ឬហើម ក្រាស់ ហើយមានផលវិបាកផ្សេងទៀត ដែលអាចនឹងកើតមាន។ ទន្ទឹមនោះ ក៏មានវិធីសង្កេតមើលផលវិបាក ឬភាពមិនប្រក្រតីបន្ទាប់ពីចាក់ Filler បានដែរ ៖

-ពណ៌ស្បែកខុសពីធម្មតា ដូចជាស្លេក ឬក្រហមខ្លាំង, ឈឺចាប់ ហើម ក្រហម ឬជាំជាងធម្មតា, ស្ពឹកមុខ, មានខ្ទុះ សង្ស័យថាឆ្លងមេរោគ ឬរលាកស្បែកផ្សេងៗ។ ប្រសិនបើអ្នកមានរោគសញ្ញាទាំងនេះ សូមស្វែងរកការព្យាបាលភ្លាមៗ៕

ប្រែសម្រួល៖ សាង ស្រីល័ក្ខ

ចុចអាន៖តិចនិកថែទាំស្បែកមុខ ការពារកុំឲ្យឡើងអាចម៍រុយផ្ដេសផ្ដាស

ចុចអាន៖អ្នកនិយមលេងថ្គាម V ចាក់ Botox ដឹងថាកូនៗកើតមកនឹងរងជំងឺអ្វីខ្លះដែរ?

The post ៤ យ៉ាងគួរដឹង មុនចាក់បំពេញ Filler នៅត្រង់បបូរមាត់ appeared first on Kampuchea Thmey Daily.

ហេតុអ្វីបបូរមាត់កាន់តែឡើងខ្មៅ? ដោះស្រាយបែបណា?

សាង ស្រីល័ក្ខ — Tue, 04 Jan 2022 06:00:00 +0000

បបូរមាត់ក៏ត្រូវការការថែទាំជាប្រចាំ ដូចទៅនឹងស្បែករបស់យើងដែរ ពីព្រោះស្បែកនៅលើបបូរមាត់ស្ដើង ហើយថែមទាំងមិនមានក្រពេញញើស ដែលធ្វើឲ្យងាយស្ងួត និងរបកថែមទៀតផង។ ជាក់ស្ដែង បបូរមាត់ខ្មៅ និងបាត់បង់ពណ៌ស៊ីជម្ពូបែបធម្មជាតិ ដោយសារមូលហេតុជាច្រើន ហើយពណ៌នៃបបូរមាត់អាចប្រែប្រួលអាស្រ័យលើទម្លាប់នៃការរស់នៅ និងកត្តាវេជ្ជសាស្ត្រមួយចំនួនផងដែរ។

មូលហេតុធ្វើឲ្យបបូរមាត់កាន់តែខ្មៅទៅៗ

ជក់បារី
អាលែកហ្ស៊ីនឹងក្រែមលាបមាត់
អាលែកហ្ស៊ីនឹងថ្នាំដុសធ្មេញផ្ទុកសារធាតុMenthol
ក្រែមព្យាបាលបបូរមាត់ដែលមានក្លិន
ក្រែមលាបមាត់ដែលមានគុណភាពអន់
អាលែកហ្ស៊ីនឹងថ្នាំមួយចំនួន
សង្កត់ ខាំ ឬលិឍបបូរមាត់។

តិចនិកសាមញ្ញៗមួយចំនួនជួយកាត់បន្ថយបបូរមាត់ខ្មៅ

១. រក្សាជាតិទឹកក្នុងរាងកាយ

កត្តាមួយចំនួនដូចជាការបំពុលបរិស្ថាន និងកង្វះជាតិទឹកអាចធ្វើឲ្យបបូរមាត់ស្ងួត ប្រេះ និងឡើងពណ៌ខ្មៅ។ ហេតុនេះហើយ ការញ៉ាំទឹកឲ្យបានច្រើន យ៉ាងហោចណាស់ចំនួនប្រាំបីកែវក្នុងមួយថ្ងៃមានសារសំខាន់ណាស់ ជាពិសេសនៅក្នុងរដូវរងា។

២. ឈប់ជក់បារី

ការជក់បារីមិនត្រឹមតែបំផ្លាញសុខភាពរាងកាយ និងស្បែកប៉ុណ្ណោះទេ ថែមទាំងប៉ះពាល់ដល់បបូរមាត់របស់យើង ក៏ដូចជាសុខភាពផ្លូវដង្ហើម។ ដូចនេះ បើយើងគប្បីបញ្ឈប់ការជក់បារី ទើបជាការប្រសើរ។

៣. ញ៉ាំផ្លែឈើ និងបន្លែស្រស់ៗឲ្យបានច្រើន

ទន្ទឹងនឹងនេះដែរ ការញ៉ាំផ្លែឈើ និងបន្លែស្រស់ៗដែលមានជាតិទឹកច្រើនដូចជាឪឡឹក ប៉េងប៉ោះ និងត្រសក់ ជាដើម អាចជួយផ្ដល់សំណើមដល់បបូរមាត់ ព្រមទាំងជួយឲ្យពណ៌បបូរមាត់កាន់តែប្រសើរជាងមុន។

កាត់បន្ថយស្នាមខ្មៅនៃបបូរមាត់ជាមួយនឹងត្រសក់

ត្រសក់ផ្ទុកសារធាតុប្រឆាំងនឹងអុកស៊ីតកម្ម និងសមាសធាតុសម្បូរស៊ីលីកា ដែលអាចជួយកាត់បន្ថយសារធាតុពណ៌ និងស្នាមខ្មៅនៃបបូរមាត់។ ចូរកិនត្រសក់២ទៅ៣ចំណិត និងយកល្បាយមកលាបនៅលើបបូរមាត់ ដោយទុកចោលរយៈពេល១៥ទៅ២០នាទី និងលាងជម្រះចេញជាមួយនឹងទឹកធម្មតា។ គ្នាយើងអាចអនុវត្តតិចនិកនេះចំនួន១ទៅ២ដងក្នុងមួយថ្ងៃ៕

អត្ថបទផ្ដល់ដោយ៖ Hello Krupet

ចុចអាន៖គេងស្រាតពេលយប់ ផ្ដល់ប្រយោជន៍ដល់សុខភាពច្រើន មិនជឿអានអត្ថបទសិន!

The post ហេតុអ្វីបបូរមាត់កាន់តែឡើងខ្មៅ? ដោះស្រាយបែបណា? appeared first on Kampuchea Thmey Daily.

៧ វិធីងាយៗ ជួយព្យាបាលបបូរមាត់ខ្មៅឲ្យប្រែជាស៊ីជម្ពូ និង ទន់ល្មើយ

សាង ស្រីល័ក្ខ — Thu, 25 Nov 2021 10:06:24 +0000

បញ្ហាបបូរមាត់ខ្មៅ ខ្លះអាចមកពីតំណពូជ ឬ បណ្ដាលមកពីហេតុផលមួយចំនួនទៀត។ អាកប្បកិរិយាជាច្រើន ដែលយើងធ្វើនៅក្នុងជីវិតប្រចាំថ្ងៃ អាចធ្វើឲ្យបបូរមាត់ខ្មៅ រួមទាំងអាហារដែលញ៉ាំ ប្រសិនបើការថែទាំមិនល្អគ្រប់គ្រាន់ ឬបញ្ហាមិនត្រូវបានកែតម្រូវ បបូរមាត់នឹងប្រែជាខ្មៅជាងមុន។

កម្ពុជាថ្មីមានវិធីដ៏ល្អមួយ ដើម្បីជួយដោះស្រាយបញ្ហាបបូរមាត់ខ្មៅ ឲ្យប្រែមកជាពណ៌ផ្កាឈូក ទន់ល្មើយមកវិញ។

១ ផឹកទឹកឲ្យបានច្រើន

ផឹកទឹកតិចពេក នឹងធ្វើឲ្យបបូរមាត់របស់យើងមើលទៅខ្មៅ ស្ងួត ប្រេះ មិនស្អាត ដោយសារតែទឹកជួយរក្សាសំណើមនៅក្នុងស្បែក រួមទាំងបបូរមាត់ផងដែរ។ តំបន់បបូរមាត់អាចបាត់បង់សំណើមយ៉ាងងាយ ជាងតំបន់ដទៃ។ ការផឹកទឹកនឹងជួយស្តារ ហើយចូលទៅចិញ្ចឹមស្បែកឲ្យយមានសំណើម។

២ ចៀសវាងអាកប្បកិរិយាដែលធ្វើឲ្យបបូរមាត់ខ្មៅ

ភាគច្រើនមូលហេតុនៃបបូរមាត់ខ្មៅ គឺមកពីទម្លាប់ប្រចាំថ្ងៃរបស់យើង។ មិនថាលិទ្ធបបូរមាត់ញឹកញាប់ ការជក់បារី បើអាចចៀសបាន គួរចៀសវាង។ នៅពេលញ៉ាំផ្លែឈើ និងបន្លែ អាហារ ឬបង្អែម ចូរលាងមាត់ជានិច្ច។ ចំណុចសំខាន់គឺត្រូវព្យាយាមចៀសវាងការប្រើក្រែមលាបមាត់ បង្កឲ្យមានប្រតិកម្មអាឡ័កស៊ី ហើយមុនពេលចូលគេង កុំភ្លេចលាបក្រែមបំប៉នបបូរមាត់ ដើម្បីផ្តល់សំណើម។

៣ ប្រើច្រាសដុសធ្មេញដើម្បីជួយ

បន្ទាប់ពីដុសធ្មេញរួច អ្នកក៏អាចប្រើច្រាសដុសធ្មេញមកត្រដុសថ្នមៗ នៅជុំវិញបបូរមាត់ខាងលើ និងខាងក្រោម ដើម្បីជួយជម្រុះកោសិកាចាស់ៗចោល។ ធ្វើបែបនេះរាល់ថ្ងៃ ប្រហែលមួយខែ អ្នកនឹងឃើញភាពខុសគ្នា។

៤ កុំចេះតែប្រើផលិតផលផ្ដេសផ្ដាសឲ្យសោះ

មិនថាទិញថ្នាំមកលាបខ្លួនឯង ឬមានការផ្សាយពាណិជ្ជកម្មតាមកញ្ចក់ទូរទស្សន៍ក៏ដោយ។ ផលិតផលទាំងនោះ មិនអាចធានាបានទេ ផលប៉ះពាល់អវិជ្ជមាន អាចកើតឡើងយ៉ាងធ្ងន់ធ្ងរ ឬក្នុងរយៈពេលយូរ។ ប៉ុន្តែប្រសិនបើអ្នកកំពុងជួបប្រទះភាពមិនស្រួលផ្សេងទៀត អ្នកគួរតែទៅពិគ្រោះជាមួយគ្រូពេទ្យជំនាញ ដើម្បីកំណត់ពីមូលហេតុ។

៥ វីតាមីន Bអាចស្តាស្បែកឡើងវិញ

បន្ថែមពីវិធីខាងលើ ការញ៉ាំអាហារដែលមានវីតាមីន B ជាសារធាតុសំខាន់សម្រាប់ស្បែក និងភ្នាសរំអិល។ ពួកវាមាននៅក្នុងអង្ករសំរូប ថ្លើម បន្លែស្លឹកបៃតង គ្រាប់អាល់ម៉ុន សណ្តែកដី ឬគ្រាប់ស្វាយចន្ទី។

៦ រូបមន្តទឹកឃ្មុំសំណើម

យកទឹកឃ្មុំ ស្ករ និង Vaseline កន្លះស្លាបព្រាបាយ លាយចូលគ្នា រួចម៉ាស្សាលើបបូរមាត់របស់អ្នក។ ទុកវាចោលប្រហែល ១០ នាទី រួចប្រើសំឡីដែលសើម ដោយទឹកក្ដៅឧណ្ហៗមកជូតចេញ។ រូបមន្តនេះ នឹងជួយជម្រុះកោសិកាស្បែកខ្មៅចេញ។ ជាពិសេស ជួយធ្វើឲ្យបបូរមាត់ត្រឡប់ទៅពណ៌ផ្កាឈូក ទន់ល្មើយភ្លាមៗ។

៧ រូបមន្តពណ៌ផ្កាឈូក Lemonade

ទឹកក្រូចឆ្មា ទឹកដោះគោ និងស្ករ ½ ស្លាបព្រាកាហ្វេ លាយចូលគ្នា ហើយលាបជារង្វង់លើមាត់ ឬអ្នកអាចប្រើបន្ទះសំលីកប្បាសមកជ្រលក់រួចបិទលើមាត់ ហើយទុកចោលប្រហែល ៥ នាទី កុំយូរពេក (ព្រោះទឹកក្រូចឆ្មាមានជាតិអាស៊ីត) រូបមន្តទាំងពីរនេះ គួរធ្វើតែពីរដងក្នុងមួយសប្ដាហ៍បានហើយ៕

ប្រែសម្រួល៖ សាង ស្រីល័ក្ខ

ចុចអាន៖ស្រាយចម្ងល់ពីជំងឺរើម ពិតជាបណ្ដាលឲ្យស្លាប់ឬយ៉ាងណា?

The post ៧ វិធីងាយៗ ជួយព្យាបាលបបូរមាត់ខ្មៅឲ្យប្រែជាស៊ីជម្ពូ និង ទន់ល្មើយ appeared first on Kampuchea Thmey Daily.