បិទទីតាំង Archives - Kampuchea Thmey Daily

អាជ្ញាធរខេត្តកំពង់ស្ពឺ ចុះពិនិត្យទីតាំងឆបោកអនឡាញដែលត្រូវបានបិទសៀល និងដាក់កម្លាំងប្រចាំការ ២៤ម៉ោង

Ung Meng — Sat, 25 Jul 2026 03:13:27 +0000

ក្រុមការងារប្រតិបត្តិការ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ខេត្តកំពង់ស្ពឺ បានចុះត្រួតពិនិត្យទីតាំង «សណ្ឋាគារ ឡុងវ៉ាន រីសត» ដែលជាទីតាំងធ្លាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា និងត្រូវបានសមត្ថកិច្ចបិទសៀលនាពេលកន្លងមក ដើម្បីរៀបចំប្រគល់ជូនកម្លាំងនគរបាលប្រចាំការការពារសន្តិសុខ ២៤ម៉ោង លើ ២៤ម៉ោង។

ការចុះត្រួតពិនិត្យនេះ ដឹកនាំដោយ លោកបណ្ឌិត តូច ប៉ូលីវា អភិបាលរងខេត្ត និងជាប្រធានក្រុមការងារប្រតិបត្តិការ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា តំណាង លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ដោយមានការចូលរួមពីអាជ្ញាធរ មន្ត្រីជំនាញពាក់ព័ន្ធ និងសម្របសម្រួលនីតិវិធីដោយ លោក សុខ វុទ្ធី ព្រះរាជអាជ្ញារង នៃអយ្យការអមសាលាដំបូងខេត្តកំពង់ស្ពឺ។

លោកឧត្ដមសេនីយ៍ត្រី ញ៉ែម សៅ ស្នងការរង (តំណាង លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ) បានឱ្យដឹងថា ទីតាំង «សណ្ឋាគារ ឡុងវ៉ាន រីសត» ស្ថិតនៅចំណុចប្រឡាយទឹក ភូមិវល្លិ៍ប្រេង ឃុំកាហែង ស្រុកសំរោងទង ខេត្តកំពង់ស្ពឺ ត្រូវបានកំណត់យកជាកន្លែងរក្សាទុកសម្ភារ និងវត្ថុតាងផ្សេងៗ ដែលបានដកហូតពីប្រតិបត្តិការបង្ក្រាបបទល្មើស Online Scams កន្លងមក។ ដោយទទួលបានការឯកភាពជាគោលការណ៍ពីថ្នាក់ដឹកនាំ ទីតាំងនេះត្រូវបានប្រគល់ជូនកម្លាំងស្នងការដ្ឋាននគរបាលខេត្តកំពង់ស្ពឺ ជាអ្នកគ្រប់គ្រង និងថែរក្សាសន្តិសុខផ្ទាល់។

បច្ចុប្បន្ន មានកម្លាំងនគរបាលប្រចាំការជាប្រចាំ ២៤ម៉ោង លើ ២៤ម៉ោង ព្រមទាំងបានរៀបចំកម្លាំង និងមធ្យោបាយបម្រុងគ្រប់គ្រាន់ ដើម្បីធានាសុវត្ថិភាព និងទប់ស្កាត់ការជ្រៀតជ្រែកផ្សេងៗ៕

The post អាជ្ញាធរខេត្តកំពង់ស្ពឺ ចុះពិនិត្យទីតាំងឆបោកអនឡាញដែលត្រូវបានបិទសៀល និងដាក់កម្លាំងប្រចាំការ ២៤ម៉ោង appeared first on Kampuchea Thmey Daily.

បិទទីតាំង៤កន្លែង និងយកសំណាកមនុស្ស ៣៥នាក់ ដែលពាក់ព័ន្ធនឹងលោកអភិបាលស្រុកជលគីរី

Sorn Phanith — Sun, 04 Jul 2021 02:03:02 +0000

សមត្ថកិច្ចនគរបាលក្រុងកំពង់ឆ្នាំង កាលពីថ្ងៃទី០៣ ខែកក្តដា ឆ្នាំ២០២១ នេះបានចុះបិទទីតាំងចំនួន ០៤ កន្លែង ដែលមានអ្នកពាក់ព័ន្ធចំនួន ៣៥នាក់ ដើម្បីពិនិត្យសំណាកបន្ទាន់ ជាលទ្ធផល (អវិជ្ជមាន តេស្តលើកទី ០១) និងតម្រូវឲ្យធ្វើចត្តាឡីស័ក្តរយៈពេល ១៤ថ្ងៃ តាមដានសុខភាពរបស់ខ្លួនឲ្យបានហ្មត់ចត់ រង់ចាំការយកសំណាកលើកទី ២ និងលើកទី៣ ដោយមិនអនុញ្ញាតឲ្យចាកចេញពីកន្លែងចត្តាឡីស័កនោះឡើយ។

ទីតាំងចំនួន ៤ ដែលលោកអភិបាលស្រុកជលគីរី បានធ្វើដំណើរចូលមុនថ្ងៃទី០១ ខែកក្តដា ឆ្នាំ២០២១ នៅគឺ ១. ហាងបាយដំរីស ក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង។ ២. ហាងបាយសេះសមុទ្រ និងលោកឪពុក ស្ថិតក្នុងភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង។ ៣. ផ្ទះសំណាក់វិមានជ័យ ភូមិម៉ុងបារាំង សង្កាត់ប្អេរ ក្រុងកំពង់ឆ្នាំង (ទីតាំងនេះមិនបិទទាំងអស់ទេ គឺបិទតែ មួយបន្ទប់ ដែលមានអ្នកវិជ្ជមានកូវីដ១៩ ចូលទៅសម្រាក) ។ និង៤ទីតាំងលាងម៉ូតូរថយន្ត នៅភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង។

អាជ្ញាធរក្រុងកំពង់ឆ្នាំងបានឲ្យដឹងថា លោក ហៃ មនោរម្យ អភិបាល ស្រុកជលគីរី ត្រូវបានរកឃើញវិជ្ជមានកូវីដ១៩ នៅថ្ងៃទី០១ ខែកក្តដា ឆ្នាំ២០២១ និងបានចេញចូលក្នុងទីតាំងទាំង៤ ខាងលើនេះ ។

លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានធ្វើការអំពាវនាវចំពោះប្រជាពលរដ្ឋនៅក្នុងក្រុង ដែលពាក់ព័ន្ធនឹងទីតាំងទាំង០៤នេះ សូមមកពិនិត្យសំណាកដោយស្ម័គ្រចិត្ត និងសូមអនុវត្តឲ្យបានតាមវិធានការរបស់ក្រសួងសុខាភិបាល ដែលមានដូចជាការប្រើម៉ាស អាល់កុលបាញ់ដៃ លាងដៃនឹងសាប៊ូ រក្សាគម្លាត ដែលជាកត្តាកាត់បន្ថយនូវការរីករាល ដាលឆ្លងនូវជំងឺកូវី១៩ ។

ទន្ទឹមនោះដែលលោកសូមអំពាវនាវចំពោះប្រជាពលរដ្ឋដែលត្រូវធ្វើចត្តាឡីស័ក្ត សូមអនុវត្តឲ្យបានត្រឹមត្រូវ ១៤ ថ្ងៃ កុំលួចចេញដើរផ្ដេសផ្ដាស ចំណែកអាជ្ញាធរមូលដ្ឋានសូមជួយត្រួតពិនិត្យទៅលើប្រជាពលរដ្ឋដែលត្រូវធ្វើចត្តាឡីស័កទាំងនោះ កុំឲ្យពួកគាត់ចាកចេញពីផ្ទះ ដើម្បីកុំឱ្យការឆ្លងរាលដាលកាន់តែខ្លាំង៕

អត្ថបទ៖ ឈៀងថារិទ្ធ

សូមចុចអាន៖ ខេត្តស្វាយរៀងកត់ត្រាអ្នកឆ្លងកូវីដច្រើនបំផុតមួយថ្ងៃ ១៤៧ នាក់ ស្លាប់ ៥ នាក់ទៀត

The post បិទទីតាំង៤កន្លែង និងយកសំណាកមនុស្ស ៣៥នាក់ ដែលពាក់ព័ន្ធនឹងលោកអភិបាលស្រុកជលគីរី appeared first on Kampuchea Thmey Daily.

ខារ៉ាអូខេ១កន្លែង ក្នុងខេត្តបាត់ដំបង ត្រូវសមត្ថកិច្ចបិទ ខណៈលួចបើកមិនគោរពច្បាប់

Sorn Phanith — Tue, 16 Mar 2021 05:01:23 +0000

មន្ត្រីជំនាញមន្ត្រីជំនាញខេត្តបាត់ដំបង បានចុះបិទទីតាំងខារ៉ាអូខេមួយកន្លែង ក្រោយលួចបើក មិនគោរពតាមគោលការណ៍ណែនាំរបស់អាជ្ញាធរពិសេសក្រសួងសុខាភិបាលនិងរាជរដ្ឋាភិបាលសំដៅទប់ស្កាត់ការឆ្លងរីករាលដាលនូវជំងឺកូវីដ១៩។

លោក ផេង សិទ្ធី អភិបាលក្រុងបាត់ដំបង បានឲ្យដឹងនៅថ្ងៃទី១៦ ខែមីនា ឆ្នាំ២០២១នេះថា ក្រោយពីរដ្ឋបាលខេត្តបាត់ដំបង បានចេញលិខិតជូនដំណឹងផ្អាកបណ្តោះអាសន្ននូវការរៀបចំពិធីរៀបអាពាហ៍ពិពាហ៍ជប់លៀងកម្មវិធីបុណ្យទានពិធីសាសនានិងពិធីជួបជុំប្រមូលផ្តុំមនុស្សច្រើនយ៉ាងណាក្តីក៏ម្ចាស់អាជីវកម្មក្លឹបកម្សាន្តខារ៉ាអូខេមួយចំនួន នៅក្នុងក្រុងបាត់ដំបងនៅតែល្មើសបំពានមិនគោរពតាម ខណៈក្រុមការងារបានរកឃើញជាក់ស្តែងដូចជា៖ អាហារដ្ឋានស៊ុបបងប្អូន, ស៊ុបប្រាកដ, អាហារដ្ឋានហ្គោលឌិននិងចុងក្រោយ គឺអាហារដ្ឋាន(មាន់ស្រែidol)ដែលឋិតនៅក្នុងក្រុងបាត់ដំបងខេត្តបាត់ដំបង។ ដោយឡែកក្រោយពីកិច្ចប្រតិបត្តិការខាងលើមន្ត្រីជំនាញក៏បានរកឃើញអាហារដ្ឋានបង្កប់ខារ៉ាអូខេ១កន្លែងមានយីហោ(មាន់ស្រែIdol) នៅក្នុងភូមិដំណាក់ហ្លួងសង្កាត់វត្តគរក្រុងបាត់ដំបង ក្នុងចំណោមអាហារដ្ឋានខាងលើបានផ្គើនលួចបើកអាជីវកម្មខារ៉ាអូខេមិនគោរពតាមគោលការណ៍ណែនាំរបស់អាជ្ញាធរពិសេសក្រសួងសុខាភិបាលនិងរាជរដ្ឋាភិបាលសំដៅទប់ស្កាត់ការឆ្លងរីករាលដាលនូវជំងឺកូវីដ១៩ ចូលក្នុងសហគមន៍ក៏ត្រូវបានអាជ្ញាធរក្រុងសម្រេចផ្អាកដំណើរការមួយរយៈ។

លោកអភិបាលក្រុងបានបន្តថា ការចុះត្រួតពិនិត្យលើទីតាំងក្លឹបកម្សាន្តឬខារ៉ាអូខេនេះនឹងបន្តអនុវត្តរហូតដល់ស្ថានភាពជំងឺកូវីដ១៩បានធូរស្រាល។ ដោយលោកព្រមានថា ចំពោះម្ចាស់ទីតាំងណាដែលមន្ត្រីជំនាញធ្លាប់បានណែនាំអប់រំនិងព្រមានម្តងរួចហើយនៅតែល្មើសជាលើកទី២ដោយមិនស្តាប់តាមវិធានការនិងត្រូវឃាត់ខ្លួនម្ចាស់ទីតាំងនោះថត បង្ហោះផ្សាយជាសាធារណៈហើយក្នុងករណីរកឃើញល្មើសលើកទី៣ទៀត ម្ចាស់អាជីវកម្មនោះនិងត្រូវទទួលការព្រមានចាត់ការតាមផ្លូវច្បាប់ជាក់ជាមិនខាន។ ក្រោយពីមានចំណាត់ការពីរដ្ឋបាលខេត្តខាងលើមន្ត្រីជំនាញសហការជាមួយកម្លាំងសមត្ថកិច្ចចម្រុះ ក៏បានធ្វើយុទ្ធនាចុះពិនិត្យនិងណែនាំអប់រំតាមបណ្តាអាហារដ្ឋានក្លឹបកម្សាន្តខារ៉ាអូខេ នៅក្នុងក្រុងបាត់ដំបងបានរួចរាល់ដែរហើយកាលពីយប់ថ្ងៃទី១៥ខែមីនាកន្លងមកនេះ។

អត្ថបទ៖ សៅ សារិទ្ធ

សូមចុចអាន៖ គណៈកម្មការផ្សារផ្សារអូឡាំពិក យកចិត្តទុកដាក់ទប់ស្កាត់ ជំងឺកូវីដ-១៩ទោះបីភ្ញៀវនិងអាជីវករថយចុះប្រហែល៥០ភាគរយ

The post ខារ៉ាអូខេ១កន្លែង ក្នុងខេត្តបាត់ដំបង ត្រូវសមត្ថកិច្ចបិទ ខណៈលួចបើកមិនគោរពច្បាប់ appeared first on Kampuchea Thmey Daily.

អភិបាលរងស្រុកបាទី ចុះបិទទីតាំងសំអាងការណាក់ ដាណេ និងផ្សារអង្គសឹង្ហ ខណៈជាប់ពាក់ព័ន្ធជាមួយអ្នកឆ្លងកូវីដ

Sorn Phanith — Mon, 15 Mar 2021 04:21:21 +0000

ថ្ងៃទី១៥ ខែមីនា ឆ្នាំ២០២១ លោក ហង្ស វិច្ឆិការាស្សី អភិបាលរងស្រុកបាទី តំណាងលោកអភិបាលស្រុកបានដឹកនាំកម្លាំង ការិយាល័យជំនាញ គណៈបញ្ជាការឯកភាព ចុះពិនិត្យ និងបិទទីតាំងផ្ទះសំអាងការណាក់ ដាណេ និងផ្សារអង្គសឹង្ហ មានជាប់ពាក់ព័ន្ធមង្គលការ នៅភូមិក្រាំងលាវ ឃុំរវៀង ស្រុកសំរោង ខេត្តតាកែវ ដែលបានប្រារព្ធឡើងកាលពីនៅថ្ងៃទី១២ ខែមីនា ឆ្នាំ២០២១ កន្លងទៅ។

បញ្ជាក់ផងដែរ មង្គលការខាងលើ ត្រូវបានអ្នកកំដរកូនកម្លោះមានឈ្មោះ សោភ័ណ កក្កដា ទទួលលទ្ធផលវិជ្ជមាននូវជំងឺកូវីដ-១៩ តាមការបញ្ជាក់ពីគណនី ហ្វេសប៊ុក កក្កដា សោភ័ណ ម្ចាស់សាម៉ីខ្លួនផ្ទាល់។ អតីតសង្ឃមួយរូបនេះបានប្រាប់ថា៖ “អ្វីដែលស្មានមិនដល់ បានកើតឡើងហើយ… ឥឡូវនេះ ខ្ញុំធ្វើតាមការណែនាំរបស់គ្រូពេទ្យ នឹង ពង្រឹងស្មារតីឲ្យបានល្អ រង់ចាំការព្យាបាល។ សូមទោសអ្នករាល់គ្នាផង… បើខ្ញុំមិនមកពិនិត្យ ខ្ញុំគេចវេះ វាជារឿងមិនល្អទេ សុខចិត្តឲ្យអ្នកទាំងអស់គ្នាជេរខ្ញុំ…សូមទោសមិត្តភក្តិ អ្នករាប់អាន ដែលខ្ញុំនាំទុក្ខឲ្យ.. សូមមេត្តាទៅពិនិត្យសុខភាពដែលនៅជិត និងស្តាប់តាមការណែនាំរបស់រាជរដ្ឋាភិបាល កុំឲ្យស្តាយក្រោយដូចខ្ញុំ”៕

អត្ថបទ៖ វីរៈ

សូមចុចអាន៖ លទ្ធផលផ្លូវការ អតីតសង្ឃ កក្កដា សោភ័ណ្ឌ សង្ស័យខ្លួនឯង តេស្តឆ្លងកូវីដ ១៩

The post អភិបាលរងស្រុកបាទី ចុះបិទទីតាំងសំអាងការណាក់ ដាណេ និងផ្សារអង្គសឹង្ហ ខណៈជាប់ពាក់ព័ន្ធជាមួយអ្នកឆ្លងកូវីដ appeared first on Kampuchea Thmey Daily.

អាជ្ញាធរខេត្តព្រៃវែង បិទគ្លីនិកមួយនៅអ្នកលឿង បន្ទាប់ពីមានផ្ទុះជំងឺកូវីដ១៩

Sorn Phanith — Sun, 07 Mar 2021 06:49:12 +0000

លោក ចាន់ ថា អភិបាលរងខេត្តព្រៃវែង បានណែនាំដល់អាជ្ញាធរមានសមត្ថកិច្ចពាក់ព័ន្ធទាំងអស់ ធ្វើការគ្រប់គ្រងទីតាំងមួយចំនួននិងរក្សាការចេញចូលគ្រប់ប្រភេទ សំដៅគ្រប់គ្រងសុវត្ថិភាព ក្នុងនោះមានមន្ទីរពេទ្យបង្អែកអ្នកលឿងនិងគ្លីនិករបស់ អ៊ឹម សុទ្ធី ដែលមានឆ្លងជំងឺកូវីដ១៩។

តាមរយៈសារជាសំឡេងតាមតេឡេក្រាម ដែលបានផ្សព្វផ្សាយនៅថ្ងៃនេះ បានឲ្យដឹងថា«ខ្ញុំសូមជម្រាបលោកស្នងការ លោកកងរងអាវុធហត្ថខេត្ត និងលោកស្រីអភិបាលស្រុកពាមរ។ដោយសារអ្នកលឿងនេះ ជាគោលដៅប្រតិបត្តិការ ដែលត្រូវគ្រប់គ្រង។ ខ្ញុំស្នើសុំឲ្យលោកឧត្តមសេនីយស្នងការខេត្ត មេបញ្ជាការកងរាជអាវុធខេត្តលោកស្រីអភិបាលស្រុកពាមរ ក៏ដូចជាមន្ទីរសុខាភិបាលសហការគ្នាផ្តល់កម្លាំងសមត្ថកិច្ច ដើម្បីគ្រប់គ្រងទីតាំងមួយចំនួនរក្សាការចេញចូលគ្រប់ប្រភេទសំដៅគ្រប់គ្រងសុវត្ថិភាពក្នុងនោះ គឺមានមន្ទីរពេទ្យបង្អែកអ្នកលឿងនិងគ្លីនិករបស់អ៊ឹមសុទ្ធី ដែលជាគោលដៅ។ សូមផ្តល់កម្លាំងបន្ថែមដល់ស្រុក»។

លោកអភិបាលរងខេត្តបានបន្តថា ដោយឡែកទីតាំងមួយចំនួនទៀត មានតម្រូវការគ្រប់គ្រងសូមឲ្យមានកិច្ចសហការ ដើម្បីគ្រប់គ្រងទីតាំងទាំងនោះប្រកបដោយសុវត្ថិភាព។ ពិសេសទីតាំងមួយចំនួន ដែលផ្តល់យោបល់ពីលោកវេជ្ជបណ្ឌិតលីសុវណ្ណរបស់ក្រសួងសុខាភិបាល។

លោកវេជ្ជបណ្ឌិត លីសុវណ្ណ អ្នកនាំពាក្យក្រសួងសុខាភិបាលនិងជាប្រធាននាយដ្ឋានប្រយុទ្ធនឹងជំងឺឆ្លងនៃក្រសួងសុខាភិបាលបានមានប្រសាសន៍ថា«សូមផ្តល់យោបល់ទៅក្រុមឆ្លើយតបបន្ទាន់ខេត្តព្រៃវែងនិងថ្នាក់ដឹកនាំមន្ទីរ ដោយសារតែមានគ្រូពេទ្យយើងឆ្លងកូវីដ១៩ហើយ មិនដឹងថាគាត់ឆ្លងមកពីណាទេ។ អីចឹងមានឆ្លងសហគមន៍នៅអ្នកលឿងនឹងហើយ អាចកន្លងមកមានជនជាតិវៀតណាម៩នាក់ បានត្រឡប់ទៅប្រទេសវៀតណាមវិញមានវិជ្ជមានកូវីដ១៩។ អីចឹងអាចគាត់ទៅពិគ្រោះជំងឺទៅអាចប៉ះពាល់ឆ្លង។ អីចឹងទី១ អ្នកដែលបានទៅជួបគ្លីនិកឬជួបគ្រូពេទ្យចាប់ពីថ្ងៃទី២៥កុម្ភៈរហូតដល់ថ្ងៃនេះ សូមទៅធ្វើសំណាកនៅតាមទីតាំងដែលកំណត់ដោយអាជ្ញាធរ។ ទី២ក្នុងនាមជាបច្ចេកទេសសុំសហការជាមួយអ្នកលឿងបិទជាបណ្ដោះអាសន្ននូវកន្លែងកម្សាន្តនានាទាំងអស់ផងដែរ»៕

អត្ថបទ៖ សំអឿន

សូមចុចអាន៖ លោក ឃួង ស្រេង ជំរុញឲ្យអាជ្ញាធរខណ្ឌទាំង១៤ ចុះស្រង់ស្ថិតិប្រជាពលរដ្ឋ ពិសេសអាយុចាប់ពី៦០ឆ្នាំឡើង ដើម្បីចាក់វ៉ាក់សាំង

The post អាជ្ញាធរខេត្តព្រៃវែង បិទគ្លីនិកមួយនៅអ្នកលឿង បន្ទាប់ពីមានផ្ទុះជំងឺកូវីដ១៩ appeared first on Kampuchea Thmey Daily.

បិទសណ្ឋាគារ ហេង ហេង សេរីរ័ត្ន នៅស្វាយរៀង ខណៈជាប់ពាក់ព័ន្ធស្ដ្រីជនជាតិវៀតណាម២នាក់

Sorn Phanith — Wed, 03 Mar 2021 09:24:54 +0000

លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង បានមានប្រសាសន៍នៅរសៀលថ្ងៃទី០៣មីនានេះថា អាជ្ញាធរបានសម្រេចបិទសណ្ឋាគារហេង ហេង សេរីរ័ត្ន ដែលស្ត្រីជនជាតិវៀតណាមចំនួន២នាក់ មានវិជ្ជមានកូវីដ១៩ បានស្នាក់នៅ និងយកទីតាំងនោះ សម្រាប់ធ្វើជាមណ្ឌលចត្តាឡីស័កតែម្តង។

លោកបានបន្តថា ពាក់ព័ន្ធនឹងស្ត្រីជនជាតិវៀតណាមនេះដែរ ក្រុមការងារស្រាវប្រយុទ្ធប្រឆាំងនឹងជំងឺកូវីដ១៩ បានរកឃើញអ្នកប៉ះពាល់ចំនួន២៥នាក់ និងបានយកសំណាករួចរាល់ហើយនៅព្រឹក នេះ និងកំពុងតែស្វែងរកអ្នករត់កង់បី ដែលបានដឹកស្ត្រីវៀតណាមទាំងពីរនាក់នោះផងដែរ។ លោកបានបន្តទៀតថា ក្នុងចំណោមអ្នកពាក់ព័ន្ធចំនួន២៥នាក់នោះ មានសមត្ថកិច្ចចំនួន ៧នាក់និងនារី វៀតណាមចំនួន២នាក់ទៀត ត្រូវបានបញ្ជូនមកធ្វើចត្តាឡីស័ក នៅផ្ទះសំណាក់គ្រូ បង្រៀន ក្រុងស្វាយរៀង។ ចំណែកឯ អ្នកផ្សេងទៀតដូចជាម្ចាស់សណ្ឋាគារ បុគ្គលិកនិងអ្នកដែលលក់ដូរនៅសណ្ឋាគារ ត្រូវធ្វើចត្តាឡីស័កនៅសណ្ឋាគារហេង ហេង សេរីរ័ត្ន។

យោងតាមរបាយការណ៍ស្ដីពីស្ដ្រីជនជាតិវៀតណាម២នាក់ ដែលវិជ្ជមានកូវីដ១៩ នៅខេត្តស្វាយរៀង ១. ឈ្មោះ Dinh Thi Xuon Nhi ភេទស្រី អាយុ២៧ឆ្នាំ ជនជាតិវៀតណាម មុខរបរ ធ្វើសំណង់ ២. ឈ្មោះ Nguyen Ngoc Xia ភេទស្រី អាយុ២៨ឆ្នាំ ជនជាតិវៀតណាម មុខរបរ ធ្វើ សំណង់។ អ្នកទាំង២មានអាសយដ្ឋាននៅ អាផាតមិន Star Diamonds ផ្លូវលេខ៩៩ សង្កាត់បឹងត្របែក ខណ្ឌចំការមន រាជធានីភ្នំពេញ ម្នាក់ស្នាក់នៅបន្ទាប់លេខ៤ ជាន់ទី៤ និងម្នាក់ទៀតនៅបន្ទាប់លេខ៣ ជាន់ទី៩៕

អត្ថបទ៖ សំអឿន

សូមចុចអាន៖ ស្គាល់ឈ្មោះស្ដ្រីជនជាតិវៀតណាម២នាក់ និងអ្នកជាប់ពាក់ព័ន្ធ២៣នាក់ និងកំពុងតែស្វែងរកម៉ូតូឌុបទាំង៤ជើង

The post បិទសណ្ឋាគារ ហេង ហេង សេរីរ័ត្ន នៅស្វាយរៀង ខណៈជាប់ពាក់ព័ន្ធស្ដ្រីជនជាតិវៀតណាម២នាក់ appeared first on Kampuchea Thmey Daily.

រដ្ឋបាលខេត្តព្រះសីហនុ សម្រេចផ្អាកអាជីវកម្ម២៨កន្លែង ដែលភាគច្រើនរបស់ជនជាតិចិន

Sorn Phanith — Tue, 02 Mar 2021 03:30:25 +0000

គិតត្រឹមរសៀលថ្ងៃទី២៨ ខែកុម្ភៈ ឆ្នាំ២០២១នេះ រដ្ឋបាលខេត្តព្រះសីហនុ បានសម្រេចផ្អាក អាជីវកម្មដែលភាគច្រើនជាអាជីវកម្មរបស់ជនជាតិចិន ក្នុងនោះ មានសណ្ឋាគារ, កាស៊ីណូ, ភោជនីយដ្ឋាន, អគារស្នាក់នៅ, មន្ទីរពេទ្យ សរុបចំនួន២៨ទីតាំង ហើយគ្រាដែលអ្នកពាក់ព័ន្ធចំនួន៤១១៩នាក់ ដែលត្រូវបានធ្វើតេស្ត គឺមានមនុស្សចំនួន៣០នាក់ ត្រូវបានរកឃើញថា មានឆ្លងកូវីដ១៩ គិតត្រឹមថ្ងៃទី២៧ កុម្ភៈ។

ជាមួយគ្នានេះ រដ្ឋបាលខេត្ត ព្រះសីហនុបាន ចេញសេចក្តីអំពាវនាវកុំឲ្យពលរដ្ឋ ខ្មែរ និង ជនបរទេស ដែលកំពុងរស់នៅខេត្តព្រះសីហនុ បើមិនចាំបាច់គួរកុំធ្វើការចល័តពីតំបន់មួយទៅតំបន់មួយទៀត ឬពីខេត្តជាប់មាត់សមុទ្រនេះ ទៅភ្នំពេញនិងខេត្តនានានិង មិនឲ្យពលរដ្ឋមកពីខេត្តនានានិងភ្នំពេញចូលទៅខេត្តព្រះសីហនុឡើយ។

ដោយឡែក សម្រាប់កាលពីព្រឹកថ្ងៃចន្ទថ្ងៃទី០១ ខែមីនា ឆ្នាំ២០២១ រដ្ឋបាលខេត្តព្រះសីហនុ បានបញ្ចេញម៉ាសជាង ៦០ម៉ឺនម៉ាស ផ្តល់ជូនដល់អាជ្ញាធរក្រុងស្រុកទាំង៥ ដើម្បីធ្វើយុទ្ធនាការចែកម៉ាសជូនប្រជាពលរដ្ឋ នៅតាមទីប្រជុំជនភូមិ ឃុំ សង្កាត់ ក្នុងខេត្តព្រះសីហនុ ជាពិសេស តាមទីប្រជុំជនផ្សារ និងតាមទីសាធារណៈជាដើម និងត្រូវបន្តអប់រំផ្សព្វ ផ្សាយប្រជាពលរដ្ឋត្រូវពាក់ម៉ាសនិងវិធាន ការបង្ការការពារទប់ស្កាត់ការឆ្លងរាលដាលជំងឺកូវីដ១៩ នៅក្នុងសហគមន៍មូលដ្ឋាននិងអនុវត្តតាមគោលការណ៍របស់ក្រសួងសុខាភិបាល ជាពិសេសវិធានការការពាររបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ៣.ការពារ និង ៣.កុំ។ ៣.ការពារ (១.ពាក់ម៉ាស ២.លាងដៃ ៣.រក្សាគម្លាតសុវត្ថិភាពសង្គមនិងគម្លាតសុវត្ថិភាពបុគ្គលចាប់ពី ១,៥០ម៉ែត្រឡើងទៅឲ្យបានគ្រប់គ្នានៅគ្រប់ទីកន្លែងនិងអនុវត្តឲ្យបានគ្រប់គ្នាចំណុចបីប្រការនេះ វាមានសារៈសំខាន់ណាស់ ដូច្នេះទើបយើងអាចយកឈ្នះលើកូវីដ-១៩ បានជោគជ័យ។) ៣កុំ (១.កុំចូលទៅកន្លែង បិទជិត គ្មានខ្យល់ចេញ-ចូល និងប្រើម៉ាស៊ីនត្រជាក់ច្រើនពេក រកកន្លែងមានខ្យល់ចេញ-ចូល ២.កុំទៅកន្លែងមានមនុស្ស ច្រើនកុះករ .៣.កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម)៕

អត្ថបទ៖ កោះពស់

សូមចុចអាន៖ ផ្ទុះកូវីដធ្ងន់ធ្ងរនៅខេត្តព្រះសីហនុ មួយថ្ងៃ រកឃើញអ្នកឆ្លង ១៧ នាក់

The post រដ្ឋបាលខេត្តព្រះសីហនុ សម្រេចផ្អាកអាជីវកម្ម២៨កន្លែង ដែលភាគច្រើនរបស់ជនជាតិចិន appeared first on Kampuchea Thmey Daily.

គិតត្រឹមថ្ងៃទី២៣កុម្ភៈនេះ អាជ្ញាធរភ្នំពេញ បានបិទទីតាំង៤៤កន្លែង ដើម្បីការពារជំងឺកូវីដ-១៩

Sorn Phanith — Tue, 23 Feb 2021 07:34:37 +0000

គិតត្រឹមព្រឹកថ្ងៃទី២៣កុម្ភៈនេះ នៅរាជធានីភ្នំពេញមានទីតាំងចំនួន៤៤កន្លែងហើយ ដែលអាជ្ញាធររាជធានីភ្នំពេញ សហការជាមួយក្រសួងសុខាភិបាល បានយកសំណាកនិងបានបិទទីតាំងទាំងនោះ ដើម្បីបង្ការនិងទប់ស្កាត់ការរីករាលដាលជំងឺកូវីដ-១៩។

នេះបើតាមការបញ្ជាក់ឲ្យដឹងពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ក្នុងកិច្ចប្រជុំដកស្រង់បទពិសោធន៍ការងារ ដើម្បីចូលរួមទប់ស្កាត់ជំងឺកូវីដ-១៩ ព្រឹកថ្ងៃទី២៣ខែកុម្ភៈ ឆ្នាំ២០២១ នៅសាលារាជធានីភ្នំពេញ។

លោក ឃួង ស្រេង បានមានប្រសាសន៍លើកឡើងថា រដ្ឋបាលអាជ្ញាធររាជធានីភ្នំពេញនិងអាជ្ញាធរខណ្ឌទាំង១៤ បានយកចិត្តទុកដាក់ខ្លាំងណាស់ ជុំវិញការបង្ការនិងទប់ស្កាត់ការរីកដាលជំងឺកូវីដ-១៩នេះ ដោយយើងបានបិទទីតាំងចំនួន៤៤ហើយ នៅរាជធានីភ្នំពេញ ដើម្បីបង្ការនិងទប់ស្កាត់ជំងឺនេះក្រោយពីយើងបានយកសំណាកចេញពីទីតាំងទាំង៤៤នេះ។ លោក ឃួង ស្រេង ក៏បានណែនាំទៅដល់អាជ្ញាធរមន្ទីរសុខាភិបាលនិងមន្ត្រីពាក់ព័ន្ធ ត្រូវតែសហការគ្នាធ្វើការងារនេះឲ្យបានលឿននិងមានប្រសិទ្ធភាព ដើម្បីឈានទៅលុបបំបាត់ឲ្យបាននូវព្រឹត្តិការណ៍សហគមន៍ ២០កុម្ភៈនេះ។

គួរបញ្ជាក់ដែរថា មកដល់ពេលនេះ មានទីតាំងបន្តបន្ទាប់ទៀត ដែលអាជ្ញាធររាជធានីភ្នំពេញសហការជាមួយនិងក្រសួងសុខាភិបាល គ្រោងនឹងយកសំណាកជាមួយនិងការបិទទីតាំងទាំងនោះផងដែរ ក្រោយពីបានទទួលព័ត៌មានថា ទីតាំងនោះ គឺមានអ្នកដែលសង្ស័យពាក់ព័ន្ធសហគមន៍ព្រឹត្តិការណ៍២០កុម្ភៈនេះ។ លោក ឃួង ស្រេង បានបញ្ជាក់ផងដែរថា ចំពោះកិច្ចប្រជុំខាងលើនេះ នឹងត្រូវធ្វើឡើងជារៀងរាល់ថ្ងៃចាប់ពីម៉ោង១០ទៅម៉ោង១១ព្រឹក ដើម្បីយើងគ្រប់គ្រងស្ថានការណ៍ ថាតើយើងគួរតែមានវិធានការយ៉ាងណាបន្ថែមទៀត ក្នុងការបង្ការនិងទប់ស្កាត់ជំងឺកូវីដ-១៩នេះ៕

អត្ថបទ៖ ស្រីរ័ត្ន

សូមចុចអាន៖ សមត្ថកិច្ចបង្ខំចិត្តបិទទ្វារភោជនីយដ្ឋានឡូហ្សិក ក្រោយរកឃើញបុរសម្នាក់ឆ្លងកូវីដមានប្រពន្ធធ្វើការនៅទីនោះ

The post គិតត្រឹមថ្ងៃទី២៣កុម្ភៈនេះ អាជ្ញាធរភ្នំពេញ បានបិទទីតាំង៤៤កន្លែង ដើម្បីការពារជំងឺកូវីដ-១៩ appeared first on Kampuchea Thmey Daily.

បិទទីតាំង Archives - Kampuchea Thmey Daily

អាជ្ញាធរខេត្តកំពង់ស្ពឺ ចុះពិនិត្យទីតាំងឆបោកអនឡាញដែលត្រូវបានបិទសៀល និងដាក់កម្លាំងប្រចាំការ ២៤ម៉ោង

បិទ​ទីតាំង​៤កន្លែង និង​យក​សំណាក​មនុស្ស ៣៥​នាក់ ដែល​ពាក់ព័ន្ធ​នឹងលោក​អភិបាលស្រុក​ជល​គី​រី

​ខារ៉ាអូខេ​១​កន្លែង​ ក្នុងខេត្តបាត់ដំបង ត្រូវ​សមត្ថកិច្ច​បិទ ខណៈលួច​បើក​មិនគោរព​ច្បាប់

អាជ្ញាធរខេត្ត​ព្រៃវែង​ បិទ​គ្លីនិក​មួយ​នៅ​អ្នក​លឿង​ បន្ទាប់ពី​មាន​ផ្ទុះ​ជំងឺ​កូ​វីដ​១៩

បិទ​សណ្ឋាគារ​ ហេង ហេង សេរី​រ័ត្ន​ នៅ​ស្វាយ​រៀង ខណៈ​ជាប់​ពាក់ព័ន្ធ​ស្ដ្រី​ជនជាតិវៀតណាម​​២​នាក់