នេះជាការលើកឡើងរបស់លោក អ៊ុំ រាត្រី អភិបាលខេត្តបន្ទាយមានជ័យ ក្នុងកិច្ចប្រជុំ និងចុះត្រួតពិនិត្យទីលានទុកដាក់សំរាមថ្មី និងទីតាំងកែលម្អទីលានចាក់សំរាមចាស់ និងទីតាំងស្ថានីយប្រព័ន្ធប្រត្តិកម្មទឹកកខ្វក់ និងការដ្ឋានលូទឹកកខ្វក់ ដឹកនាំដោយ លោក វង្ស ពិសិដ្ឋ អនុរដ្ឋលេខាធិការ និងជានាយកគម្រោងកែលម្អគ្រប់គ្រងបរិស្ថានក្រុងជុំវិញបឹងទន្លេសាបជំហានទី២ និងអាជ្ញាធរខេត្តបន្ទាយមានជ័យ ជាមួយក្រុមហ៊ុនអនុវត្តគម្រោងពីរដ្ឋាភិបាលនាថ្ងៃទី១៧ ខែមិថុនា ឆ្នាំ២០២៦។

ក្រៅពីការលើកឡើងខាងលើ ដោយមើលឃើញពីផលវិបាករបស់ក្រុមហ៊ុន មិនទាន់បញ្ចប់ទៅតាមគម្រោង លោកស្នើឲ្យខាងក្រុមហ៊ុនធ្វើផែនការណ៍ពីការអនុវត្តគម្រោងដាក់មករដ្ឋបាលខេត្ត ដើម្បីរដ្ឋបាលខេត្តជួយរៀបចំសណ្តាប់ធ្នាប់ និងសម្របសម្រួលបញ្ហានានា ព្រោះរដ្ឋបាលខេត្តចង់ឲ្យគម្រោងនេះបញ្ចប់ដោយជោគជ័យ ទៅតាមផែនការណ៍ ដោយលោកប្តេជ្ញាបន្តគម្រោងនេះឲ្យមាននិរន្តភាព។ លោកសង្ឃឹមថា ក្រោយចប់គម្រោងដោយជោគជ័យ ក្រុងសិរីសោភ័ណនឹងប្រែមុខមាត់ថ្មី មានសោភ័ណភាព មានប្រព័ន្ធលូបញ្ចៀសទឹកជំនន់ ពលរដ្ឋអស់កង្វល់ពីបញ្ហាទឹកកខ្វក់ ស្ទះលូដូចមុនទៀងហើយ។

ដោយឡែកលោក សាន រដ្ឋា ប្រធានក្រុមបច្ចេកទេសធនាគារអភិវឌ្ឍន៍អាស៊ី (ADB) បានឲ្យក្រុមហ៊ុនរៀបចំប្រព័ន្ធបណ្តាញលូ ប្រព័ន្ធការពារទឹកជំនន់ ប្រព័ន្ធច្រោះសម្អាតទឹកកខ្វក់ ដែលកំពុងអនុវត្តឈានទៅដល់ការបិទបញ្ចប់គម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាបជំហានទី២ នៃក្រុងសិរីសោភ័ណ ខេត្តបន្ទាយមានជ័យ ត្រូវធ្វើយ៉ាងណាឲ្យហើយទៅតាមគម្រោង ដែលត្រូវបិទបញ្ចប់នាខែមិថុនា ២០២៦នេះ។

ក្រោមបទបង្ហាញរបស់តំណាងក្រុមហ៊ុន ប្រព័ន្ធប្រត្តិកម្មទឹកកខ្វក់ និងទីលានទុកដាក់សំរាមថ្មី ដោយពុំទាន់សម្រេចបាន១០០%ទៅតាមគម្រោង លោកសូមឲ្យខាងក្រុមហ៊ុនធ្វើផែនការណ៍បិទបញ្ចប់ ទោះបីជាមិនទាន់រួចរាល់ ត្រូវធ្វើឲ្យហើយក្រោយពេលបិទបញ្ចប់ កុំទុកចោលដែលនាំឲ្យមានបញ្ហាខូចឈ្មោះក្រុមហ៊ុន និងរងការផាកពិន័យទៅតាមកិច្ចកុងត្រា ។ ដោយឡែកចំពោះ ទីលានទុកដាក់សំរាម សូមឲ្យបន្ថែមកម្មករ និងអនុវត្តទៅតាមបច្ចេកទេសដែលមានស្រាប់៕

អត្ថបទ៖ អពៅ

The post គម្រោងកែលម្អគ្រប់គ្រងបរិស្ថានក្រុង ជុំវិញបឹងទន្លេសាបជំហានទី២ ក្នុងក្រុងសិរីសោភ័ណនឹងបញ្ចប់នៅចុងខែមិថុនានេះ appeared first on Kampuchea Thmey Daily.

ការ​ជំរុញ​នេះ​នៅ​ក្នុង​កិច្ចប្រជុំ​ពិភាក្សា​ស្ដីពី​ការ​រៀបចំ​ផែនការ​ដាំ​ស្ដារ​ព្រៃលិចទឹក​ឡើងវិញ នៅ​តំបន់​ជុំវិញ​បឹង​ទន្លេ​សាប ក្នុង​ភូមិសាស្ត្រ​ខេត្ត​សៀមរាប កាលពី​ថ្ងៃ​ទី ១៦ ខែ​មីនា ឆ្នាំ ២០២៦ ម្សិលមិញ។

នា​ឱកាស​នោះ លោក ខូវ មាស បាន​ឲ្យ​ដឹង​ថា ទិន្នន័យ​បឋម​ទាំងនេះ គឺជា​មូលដ្ឋានគ្រឹះ​ដ៏​សំខាន់​សម្រាប់​ក្រុម​ការងារ​ជំនាញ នៃ​អាជ្ញាធរ​ទន្លេសាប ក្នុង​ការ​រៀបចំ​ផែនការ​សកម្មភាព​លម្អិត និង​ឈាន​ទៅ​អនុវត្ត​ការ​ដាំដុះ​ឲ្យ​បាន​ឆាប់​រហ័ស។ បន្ទាប់ពី​ទទួល​បាន​ព័ត៌មាន​គ្រប់​ជ្រុងជ្រោយ​ពី​ខេត្ត​ទាំង ៦ ជុំវិញ​បឹង​ទន្លេសាប ក្រុម​ការងារ​ជំនាញ នឹង​ចុះ​វាយតម្លៃ​ផ្ទាល់​ដល់​ទីតាំង​ជាក់ស្ដែង ដើម្បី​រៀបចំ​បញ្ចូល​ក្នុង​ផែនការ​សកម្មភាព​សម្រាប់​ឆ្នាំ ២០២៦ និង​ឆ្នាំ​បន្តបន្ទាប់​ឲ្យ​មាន​ប្រសិទ្ធភាព​ខ្ពស់។

ទន្ទឹម​នោះ​ដែរ លោក​អគ្គ​លេខាធិការ​រង បាន​អំណរគុណ​ដល់​ថ្នាក់​ដឹកនាំ​រដ្ឋបាល​ខេត្ត​សៀមរាប និង​អ្នក​ពាក់ព័ន្ធ​ទាំងអស់ ដែល​បាន​ផ្ដល់​កិច្ច​សហការ​យ៉ាង​ល្អ​ក្នុង​ការ​សម្របសម្រួល​ដល់​ក្រុមការងារ​ជំនាញ​អាជ្ញាធរ​ទន្លេសាប ជាមួយ​មន្ទីរ​ជំនាញ ជាពិសេស​អាជ្ញាធរ​មូលដ្ឋាន​តំបន់​បឹង​ទន្លេសាប។

ជាមួយ​នេះ លោក អ៊ឹង គឹមលាង អភិបាល​រង​ខេត្ត គូស​បញ្ជាក់​ដែរ​ថា កិច្ចប្រជុំ​នេះ ដើម្បី​ធ្វើ​បទ​បង្ហាញ​របស់​មន្ត្រី​ជំនាញ​អាជ្ញាធរ​ទន្លេសាប អំពី​ផែនការ​ដាំ​ស្ដារ​ព្រៃលិចទឹក​ឡើងវិញ ក្នុង​តំបន់​រង​ការ​ទន្ទ្រាន តំបន់​ព្រៃ​រេចរឹល តំបន់​ភ្លើង​ឆេះ​ព្រៃ ក្នុង​ភូមិសាស្ត្រ​ខេត្ត​សៀមរាប និង​ពិភាក្សា​ប្រមូល​ធាតុ​ចូល​បន្ថែម​ពី​មន្ទីរ​ជំនាញ​ពាក់ព័ន្ធ ដើម្បី​រៀបចំ​បច្ចុប្បន្ន​ភាព​ផែនការ​អនុវត្ត​កិច្ចការ​ដាំ​ស្ដារ​ព្រៃលិចទឹក​ឡើង​វិញ ឲ្យ​សមស្រប​តាម​ស្ថានភាព​ជាក់ស្ដែង​ក្នុង​មូលដ្ឋាន​ប្រកប​ដោយ​ប្រសិទ្ធភាព ព្រមទាំង​ចែក​រំលែក​ទិន្នន័យ​ព័ត៌មាន ផ្លាស់ប្ដូរ​បទ​ពិសោធ និង​បច្ចេកទេស​ពាក់ព័ន្ធ​កិច្ចការ​ដាំ​ស្ដារ​ព្រៃលិចទឹក​ឡើង​វិញ។

គួរ​ជម្រាប​ថា ក្រុម​ការងារ​ដាំ​ស្ដារ​ព្រៃ​លិច​ទឹក​ឡើង​វិញ នៅ​ខេត្ត​ទាំង ៦ ជុំវិញ​តំបន់​បឹង​ទន្លេសាប មាន​ខេត្ត​កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និង​ខេត្ត​កំពង់ធំ បង្កើត​ឡើង​តាម​សេចក្ដី​សម្រេច​លេខ ៦២១ របស់​អាជ្ញាធរ​ទន្លេសាប ដោយ​យោង​លើ​លិខិត​លេខ ៦៩៦ សជណ.កធ ចុះ​ថ្ងៃ​ទី ២៥ ខែ​មេសា ឆ្នាំ ២០២៥ របស់​ទីស្ដីការ​គណៈ​រដ្ឋមន្ត្រី ដោយ​បាន​ឯកភាព​ជា​គោលការណ៍​ជូន​ក្រសួង​ធនធាន​ទឹក និង​ឧតុនិយម សហការ​ជាមួយ​ក្រសួង-ស្ថាប័ន ពាក់ព័ន្ធ អាជ្ញាធរ​ដែនដី នៃ​ខេត្ត​ទាំង ៦ និង​សហគមន៍ ស្ថិត​នៅ​ក្នុង​ខេត្ត​ជុំវិញ​តំបន់​បឹង​ទន្លេសាប ធ្វើការ​ដាំ​ស្ដារ​ព្រៃលិចទឹក​ឡើង​វិញ នៅ​តាម​ទីតាំង​រង​ការ​ទន្ទ្រាន​នា​ពេល​កន្លងមក និង​តំបន់​រេចរឹល ក្នុង​ភូមិសាស្ត្រ​ខេត្ត​ទាំង ៦ ជុំវិញ​បឹង​ទន្លេសាប៕

អត្ថបទ ៖ គឿនវេត

The post អាជ្ញាធរទន្លេសាប ជំរុញអាជ្ញាធរមូលដ្ឋាន កំណត់តំបន់អាទិភាព ដើម្បីពន្លឿនការដាំស្ដារព្រៃលិចទឹកឡើងវិញឲ្យទាន់ផែនការឆ្នាំ ២០២៦ appeared first on Kampuchea Thmey Daily.

នេះជាការលើកឡើងរបស់លោកឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ដ្រៃយ៍នៃគណៈកម្មការគ្រប់គ្រងការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ ក្នុងពេលដែលលោកបានចុះជួបកងកម្លំាងចម្រុះ ដែលកំពុងប្រចាំការនៅទីបញ្ជាការស្រាលបង្ក្រាបបទល្មើសនេសាទ នៅឃុំពាមបាង ស្រុកស្ទោង ខេត្តកំពង់ធំ នាព្រឹកថ្ងៃទី២ ខែកុម្ភៈ ឆ្នាំ២០២៦។

ជាមួយនឹងការកោតសរសើរចំពោះការបំពេញភារកិច្ចកន្លងមក ឧត្ដមសេនីយ៍ទោ សោម ស៊ុន បានណែនាំដល់កងកម្លាំងចម្រុះទាំងអស់ ត្រូវបន្តរួមគ្នាគោរពបទបញ្ជារបស់សម្តេចនាយករដ្ឋមន្ត្រី ហ៊ុន ម៉ាណែត ក្នុងការការពារ ទប់ស្កាត់ និងបង្ក្រាបបទល្មើសនេសាទខុសច្បាប់ ប្រកបដោយស្មារតីទទួលខុសត្រូវខ្ពស់ មានប្រសិទ្ធភាព និងទទួលបានជោគជ័យ។ ក្នុងរដូវប្រាំងនេះ លោក ណែនាំឱ្យមានការរៀបចំផែនការបែកចែកកម្លាំង ដើម្បីការពារឱ្យបានតំបន់អភិរក្សពូត្រី ក្នុងបឹងទន្លេឆ្មារ ដើម្បីរក្សាពូជត្រីទុកសម្រាប់ពងកូនក្នុងរដូវវស្សាខាងមុខទៀត ក៏ដូចជានៅតំបន់នៅបាឡត ក្នុងលំហទន្លេសាប ក្នុងឃុំពាមបាង ស្រុកស្ទោង ខេត្តកំពង់ធំ។

លោកឧត្ដមសេនីយ៍ទោ សោម ស៊ុន បានលើកឡើងពីការអបអរសាទរ និងគាំទ្ររបស់ប្រជាពលរដ្ឋនៅទូទាំងប្រទេសចំពោះសកម្មភាពបង្ក្រាបបទល្មើសនេសាទខុសច្បាប់ពីសំណាក់កងកម្លំាងចម្រុះ ដែលបានធ្វើឱ្យផលត្រីនៅក្នុងឆ្នាំនេះសម្បូរឡើងវិញ។  

បើតាមរបាយការណ៍របស់មន្ត្រីជំនាញ បច្ចុប្បន្ន បទល្មើសនេសាទមានការថយចុះគួរឱ្យកត់សម្គាល់ ដោយពលរដ្ឋភាគច្រើន បានយល់ដឹង និងគោរពអនុវត្តតាមច្បាប់ស្តីពីជលផលថ្មី តែក៏នៅមានប្រជាពលរដ្ឋមួយចំនួនតូចនៅតែប្រព្រឹត្តិបទល្មើសនេសាទខុសច្បាប់ ពិសេសប្រជាពលរដ្ឋដែលមកពីតំបន់ និងខេត្តផ្សេងមួយចំនួន បានមកនេសាទត្រី និងលៀស ដោយប្រើប្រាស់ឧបករណ៍នេសាទខុសច្បាប់៕

The post កម្លាំងចម្រុះខេត្តកំពង់ធំបន្តពង្រឹងការបង្ក្រាបបទល្មើសនេសាទ តាមបឹងទន្លេសាប   appeared first on Kampuchea Thmey Daily.

ប្រធានសហគ្រាសអេកូឡូស៊ីខ្លាត្រី (FCEE) និងជាសមាជិកនៃអ្នកជំនាញបច្ចេកទេសអភិរក្សខ្លាត្រី លោកស្រី Vanessa Herranz Muñoz  បញ្ជាក់ថា រូបភាពនេះ គឺពិតជារូបសត្វខ្លាត្រីប្រាកដមែន។ លោកស្រីសង្កត់ធ្ងន់ថា៖«កំណត់ត្រាសត្វនេះនៅអាស៊ីអាគ្នេយ៍ គឺមានការខ្វះខាតខ្លាំង ហើយចំនួនវានៅក្នុងប្រទេសកម្ពុជាប្រហែលនៅមានតិចតួចប៉ុណ្ណោះ។ នេះគឺជាកំណត់ត្រាលើកទីពីរ ដែលត្រូវបានបញ្ជាក់វត្តមាននៃសត្វខ្លាត្រីនៅក្នុងតំបន់ទន្លេសាបទាំងមូល ហើយវាផ្តល់ឱ្យយើងនូវក្តីសង្ឃឹម សម្រាប់ការស្តារឡើងវិញនូវប្រភេទសត្វខ្លាដ៏សំខាន់នេះ។»

សត្វខ្លាត្រី (Prionailurus viverrinus) មានដើមកំណើតនៅតំបន់អាស៊ីខាងត្បូង និងអាស៊ីអាគ្នេយ៍ ហើយត្រូវបានចុះក្នុងបញ្ជីក្រហមរបស់អង្គការIUCN ជាក្រុមងាយរងគ្រោះ ដោយចំនួនរបស់វា ត្រូវបានអ្នកវិទ្យាសាស្រ្តប៉ាន់ប្រមាណថា មានតិចជាង១ម៉ឺន ក្បាលនៅទូទាំងពិភពលោក។ សត្វខ្លាត្រី ជាប្រភេទសត្វមានរូបរាងទាក់ទាញ វាមានមាឌធំជាងឆ្មាស្រុក២ដង ហើយច្រើនរស់នៅតែឯកឯង។ សត្វខ្លាត្រី ប្រមាញ់ និងរកចំណី ដោយប្រើក្រញាំមុខដ៏រឹងមាំរបស់វា។ សត្វនេះអាចហែលទឹកបានយ៉ាងជំនាញ ហើយមុជទឹកចាប់ត្រីយ៉ាងរហ័ស។ ចំណីចម្បងរបស់វាមានដូចជាសត្វត្រី សត្វកកេរ សត្វស្លាប និងសត្វល្មូន ជាដើម។ 

នៅប្រទេសកម្ពុជា កំណត់ត្រាដែលបានបញ្ជាក់អំពីខ្លាត្រី ពុំសូវមានច្រើននោះទេ ដោយគេឃើញមានកំណត់ត្រាវត្តមាននៃសត្វនេះនៅតំបន់មួយចំនួនដូចជាដែនជម្រកសត្វព្រៃគូលែនព្រហ្មទេព តំបន់ព្រៃកោងកាង ឧទ្យានជាតិរាម និងតំបន់រ៉ាមសារបឹងទន្លេឆ្មារ (គំហើញទី១កាលពីឆ្នាំ២០២២)។ ការបញ្ជាក់ពីវត្តមានសត្វនេះជារឿយៗប្រឈមនឹងបញ្ហាកំណត់អត្តសញ្ញាណដោយរូបរាងវាងាយច្រលំនឹងឆ្មារដាវ (Prionailurus bengalensis)។

នាយកប្រចាំប្រទេសនៃអង្គការអភិរក្សអន្តរជាតិកម្ពុជា លោក អ៊ុ សូនី  កត់សម្គាល់ថា ៖«ការត្រឡប់មកវិញរបស់ខ្លាត្រីនេះ គឺជាសក្ខីភាពនៃការស្តារតំបន់ដីសើមដែលផ្អែកមូលដ្ឋានវិធីសាស្រ្តបែបវិទ្យាសាស្ត្ររយៈពេលវែង ជាពិសេសគឺការចូលរួមពីសហគមន៍មូលដ្ឋាន ដោយគាំទ្រពីរាជរដ្ឋាភិបាល និងដៃគូនានាផងដែរ។»

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ចាត់ទុកវត្តមាននៃសត្វខ្លាត្រីនៅក្នុងតំបន់ព្រៃលិចទឹកនៃបឹងទន្លេសាប ជាសូចនាករដ៏សំខាន់មួយដែលបង្ហាញពីប្រសិទ្ធភាពនៃការងារគ្រប់គ្រងធនធានជលផល និងប្រព័ន្ធអេកូឡូស៊ីព្រៃលិចទឹករយៈពេលវែងរបស់កម្ពុជា។ លោក ឌិត ទីណា ថា៖«ការណ៍នេះសបញ្ជាក់ពីសារៈសំខាន់នៃការស្តារនិងការពារជម្រកព្រៃលិចទឹកឡើងវិញ ដែលមិនត្រឹមតែមានផលប្រយោជន៍ដល់ការអភិរក្សជីវៈចម្រុះប៉ុណ្ណោះទេ ប៉ុន្តែថែមទាំងជំរុញនិរន្តរភាពនៃការរក្សាធនធានជលផល និងពង្រឹងជីវភាពរស់នៅរបស់សហគមន៍ដែលពឹងផ្អែកលើតំបន់ដីសើមនេះផងដែរ។»

ចំណែករដ្ឋមន្ត្រីក្រសួងបរិស្ថាន លោក អ៊ាង សុផល្លែត ចាត់ទុកថា៖«របកគំហើញនេះ គឺភស្តុតាងបង្ហាញពីការរីកចម្រើននៃប្រភេទជីវៈចម្រុះដ៏សំខាន់នៅតាមតំបន់ការពារធម្មជាតិនៅកម្ពុជា និងពីការដាក់ចេញដ៏ត្រឹមត្រូវនៃគោលនយោបាយរបស់កម្ពុជា ក្នុងនោះមានយុទ្ធសាស្ត្រចក្រាវិស័យបរិស្ថាន និងកិច្ចខិតខំប្រឹងប្រែងរបស់រាជរដ្ឋាភិបាល និងអ្នកពាក់ព័ន្ធលើការងារអភិរក្ស គ្រប់គ្រង និងអភិវឌ្ឍវិស័យបរិស្ថាន និងធនធានធម្មជាតិយ៉ាងសកម្ម និងប្រកបដោយប្រសិទ្ធភាព។»

គួរកត់សម្គាល់ថា ចាប់តាំងពីឆ្នាំ២០១០មក អង្គការអភិរក្សអន្តរជាតិ សហការជាមួយសហគមន៍នេសាទក្នុងស្រុកចំនួន១៦ រដ្ឋបាលជលផល និងក្រសួងបរិស្ថាន បានស្តារព្រៃលិចទឹកដែលបានប្រមាណជាង១.០០០ហិកតា នៅជុំវិញបឹងទន្លេសាប។ កិច្ចខិតខំប្រឹងប្រែងរួមក្នុងការស្តារតំបន់ដីសើមឡើងវិញរួមមាន ការដាំដើមឈើឡើងវិញ និងការលើកទឹកចិត្តដល់ការការពារទីជម្រក ដោយល្បាតជាប្រចាំ អនុវត្តវិធានការបង្ការអគ្គីភ័យ និង គាំទ្រដោយផ្ទាល់ដល់ជីវភាពរស់នៅរបស់សហគមន៍ក្នុងតំបន់ ជាដើម៕

The post ខ្លាត្រីប្រភេទសត្វដ៏កម្របំផុតនៅអាស៊ីបង្ហាញវត្តមានម្ដងទៀតនៅតំបន់ព្រៃលិចទឹកដែលបានស្តារឡើងវិញនៃខេត្តពោធិ៍សាត់ជុំវិញបឹងទន្លេសាប appeared first on Kampuchea Thmey Daily.

​លោក ពុំ សុថា ​ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ​ ប្រាប់កម្ពុជាថ្មី នៅថ្ងៃទី ២៣ ខែធ្នូ ឆ្នាំ ២០២៥ ថា ត្រីទើបចាប់ផ្ដើមចុះតិចៗ ខណៈទិន្នផលត្រីនារដូវឆ្នាំថ្មីនេះ អាច​នឹង​ទទួលបានច្រើនជាងឆ្នាំមុន ដោយ​សារ​ការបង្ក្រាបបទល្មើស និងមានការចូលរួមពីមហាជន ក៏ដូច​ជាការចូលរួមពីកងកម្លាំងប្រដាប់អាវុធ។​

​លោក ពុំ សុថា បញ្ជាក់ថា៖ «មហាជនចូលរួមច្រើនមែនទែន ទាំងការលែងត្រីកម្រ ផ្ដល់ព័ត៌មាន​បទ​ល្មើស​កន្លែងនេះ កន្លែងនោះ»។

សម្រាប់ព្រឹកថ្ងៃទី ២៣ ខែធ្នូនេះ ត្រីចាប់ផ្ដើមត្រូវដោយលើកដាយម្ដងរយៈពេលមួយម៉ោងបានប្រមាណ ៧០០ គីឡូក្រាម ទៅ មួយតោន ដែលភាគច្រើនជាប្រភេទត្រីស្លឹកឫស្សី។

​យោងតាមរដ្ឋបាលជលផលនៅក្នុងឆ្នាំ ២០២៤ ផលនេសាទ និងវារីវប្បកម្មកម្ពុជា សម្រេច បាន សរុបចំនួន ៩២៦ ៩៣៤តោន កើនឡើង ៦០ ៦៨៤តោន ស្មើនឹង៧ ភាគរយ បើ​ធៀប​​ទៅនឹង ឆ្នាំ២០២៣។ 

​ក្នុងនោះ ផលនេសាទទឹកសាបទទួលបាន ៤៦៧ ៣៤៤តោន ផល​នេសាទ​សមុទ្រទទួល​បាន ១៣៩ ៣១០តោន និងផលវារីវប្បកម្ម ៣២០ ២៨០តោន៕​

The post ​រដូវ​ត្រី​ប្រហុក​ចាប់ផ្ដើម​មាន​បណ្ដើរៗ​ appeared first on Kampuchea Thmey Daily.

លោក សរ គឹមសាន្ត អគ្គលេខាធិការ​អាជ្ញាធរ​ទន្លេសាប​បាន​ប្រាប់កម្ពុជាថ្មី​តាម​ទូរសព្ទ​​​ថា គោលដៅ​នៃ​ការ​ចេញ​ផ្សាយ​សៀវភៅ​​​​នេះ​ គឺ​ដើម្បី​ផ្សព្វផ្សាយ​ចំណេះដឹង​ពី​សក្ដានុពល​នៃ​ធនធាន​ធម្មជាតិ​ និង​ជីវចម្រុះ​បឹង​ទន្លេ​សាប​របស់​ប្រទេស​កម្ពុជា។

«សៀវភៅ​ស្រាវជ្រាវ​នេះ​មាន​តម្លៃ​សម្រាប់​ការសិក្សា ដោយសារ​វា​ជួយ​ឲ្យ​យើង​ដឹង​ថា​តើ​ត្រី​ណា​ដែល​សម្បូរ ត្រី​ណា​អាច​ធ្វើ​អី​បាន និង​​ប្រភេទ​ត្រី​ដែល​ជិត​ផុត​ពូជ ឬក៏​ត្រូវអភិរក្ស»។

ការ​ចងក្រង​សៀវភៅដែល​បង្ហាញពី​ភាព​សំបូរបែបនៃធនធានធម្មជាតិនៃ​បឹងទន្លេសាប ​កើត​ឡើង​ពី​ការ​ស្រាវជ្រាវ​អស់​រយៈ​ពេលជាង ១០ ឆ្នាំ និងមាន​ការ​សហការ​គ្នា​យ៉ាង​ជិត​ស្និទ្ធ​ជាមួយ​រដ្ឋបាល​ជលផល ក្រសួងបរិស្ថាន និង​អាជ្ញាធរ​ពាក់ព័ន្ធ​ផ្សេងទៀត។

លោក សរ គឹមសាន្ត បានបញ្ជាក់​​ថា ការ​ចេញផ្សាយ​​សៀវភៅ​នេះ​​គ្រាន់​តែ​ជា​ជំហាន​ដំបូង​ មិន​ទាន់​ដាក់​ឲ្យ​ប្រើប្រាស់​ទូលំទូលាយ​នោះ​ទេ ព្រោះ​ត្រូវ​ការ​ត្រួត​ពិនិត្យ​និង​ផ្ទៀងផ្ទាត់បន្ថែមទៀត​​ដើម្បី​ធានា​ថា​ឈ្មោះ (ឈ្មោះ​បច្ចេកទេស ឈ្មោះ​វិទ្យាសាស្ត្រ) និង​ការ​កំណត់​អត្តសញ្ញាណ (ត្រី​សម្បូរ ឬ​ត្រី​ជិត​ផុតពូជ) គឺ​ត្រឹមត្រូវ​ឥត​ខ្ចោះ​មុននឹង​ចែកចាយ​ដល់​សាធារណ​ជន។

តាមរយៈ​សៀវភៅ​សិក្សា​ទាំងពីរ​​ក្បាល​ លោក សរ គឹមសាន្ត បានអះអាង​ថា នឹង​ដើរតួនាទី​យ៉ាង​សំខាន់​ជា​ឯកសារ​គោល​ និង​ជំនួយសម្រាប់ឲ្យក្រសួងស្ថាប័ន​ជំនាញ អ្នកសិក្សា​ស្រាវជ្រាវ អ្នករៀបចំ​គោលនយោបាយ និង​អ្នកពាក់ព័ន្ធនានា អាច​យកទៅធ្វើជា​អំណះអំណាង និងប្រើប្រាស់តាមតម្រូវការផ្សេងៗ។

​សៀវភៅ​​ស្រាវជ្រាវដ៏សំខាន់ចំនួន ២ ដែល​អាជ្ញាធរទន្លេសាបទើប​តែ​បោះពុម្ពផ្សព្វផ្សាយដែល​សៀវភៅទី ១៖ ​រៀប​រាប់ពីការសិក្សាប្រភេទត្រី​​នា​ចុងរដូវវស្សា​នៅទន្លេសាប​មានកម្រាស់ ២៥០ ទំព័រ។ វា​គឺជា​ឯកសារ​ចំណេះដឹង​មូលដ្ឋាន​ដែល​បង្ហាញ​ពី​ប្រភេទ​ត្រី​ចំនួន ១២១ ប្រភេទ។

សៀវភៅ​នេះផ្តោត​លើ​ប្រភេទ​ត្រី​ទឹកសាប​ដែល​ធ្វើការ​ផ្លាស់ប្ដូរ​ទីតាំង​ពី​បឹងទន្លេសាប និង​តំបន់​ពាក់ព័ន្ធ​តាម​ដងទន្លេនា​ចុង​រដូវ​វស្សា ដែល​ការស្រាវជ្រាវ​ប្រមូល​ទិន្នន័យ​បាន​ធ្វើឡើង​ចាប់ពី​រដូវ​នេសាទ​ឆ្នាំ ២០១១-២០១២ រហូត​ដល់​រដូវ​នេសាទ​ឆ្នាំ ២០២២-២០២៣។

ក្នុង​សៀវភៅ​មាន​ពិពណ៌នា​ពី​រូបរាង លក្ខណៈ​សម្គាល់ ប្រភេទ អំបូរ និង​ឈ្មោះ​វិទ្យាសាស្ត្រ​របស់ត្រី ទៅ​តាម​លំដាប់​ចំណាត់​ថ្នាក់​របស់ត្រីនីមួយៗ។

ដោយឡែក​សៀវភៅ​ស្រាវជ្រាវ​ទី ២ បង្ហាញ​អំពី​ប្រព័ន្ធ​ជីពចរ​ទឹកជំនន់​តំបន់​ទំនាប​ត្រូពិក​បឹង​ទន្លេសាប​ប្រទេស​កម្ពុជា​។ សៀវភៅ​នេះ​មាន​កម្រាស់ ២៤៣ ទំព័រ បែងចែក​ជា ៧ ជំពូក ដែល​​និយាយ​​ពី​សារៈសំខាន់​នៃ​ប្រព័ន្ធ​អេកូឡូស៊ី និង​ភាព​ងាយ​រងគ្រោះ​នៃ​ប្រព័ន្ធអេកូឡូស៊ី​បឹង​ទន្លេសាប ខណៈ​ជំពូក​បន្តបន្ទាប់ក៏​បានរំលេច​​​ពីទិដ្ឋភាព​ទូទៅ​នៃ​បឹងទន្លេសាប គុណភាព​ទឹក លក្ខណៈ​ជីវ​ភូមិសាស្ត្រ​នៃ​បរិស្ថាន​ទឹក និង​ការ​គ្រប់គ្រង​បរិយាកាស​ជាដើម​៕

The post ក្រោយ​ស្រាវជ្រាវអស់​ជាង ១០ ឆ្នាំ អាជ្ញាធរ​ទន្លេសាប​​ចេញ​ផ្សាយ​​​សៀវភៅ​​សិក្សា​ពី​ប្រភេទ​ត្រី​ និង​ជីវចម្រុះ​បឹង​ទន្លេសាប appeared first on Kampuchea Thmey Daily.

ចាប់តាំងពីថ្ងៃទី១៣ ខែវិច្ឆិកា ឆ្នាំ២០២៥ មក ផ្នែករដ្ឋបាលជលផលអន្លង់វិល សហការ និងដឹកនាំដោយគណៈបញ្ជាការឯកភាពស្រុកសង្កែ និងកម្លាំងអធិការដ្ឋាននគរបាលស្រុកសង្កែ បានចុះទប់ស្កាត់ និងបង្រ្កាបបទល្មើសជលផលនៅចំណុចអន្លង់ខ្ទីង ចំណុចបឹងសួង ស្ថិតក្នុងភូមិស្រះកែវ ឃុំកំពង់ព្រះ ស្រុកសង្កែ ខេត្តបាត់ដំបង។

នៅក្នុងកិច្ចប្រតិបត្តិការនេះ កម្លាំងចម្រុះបានរុះរើ និងកាប់បំផ្លាញឧបករណ៍នេសាទល្មើសច្បាប់ បាន០២ករណីដែលក្នុងនោះមានសាច់អួនក្រឡាល្អិត ចំនួន ៧៥០ម៉ែត្រ បង្គោលចំនួន ៣២០ដើម និងឡុក ០៣គ្រឿង។

បើតាមការលើកឡើងពីកម្លាំងសមត្ថកិច្ចបានបញ្ជាក់ថា នៅក្នុងកិច្ចប្រតិបត្តិការនោះកម្លាំងចូលរួម​ មានចំនួន ២២នាក់ និងប្រើកាណូតស្មាច់ចំនួន ៥ គ្រឿង ហើយការអនុវត្តច្បាប់នេះនឹងត្រូវបន្តជារឿយៗ ដើម្បីគ្រប់គ្រងឲ្យបាន និងលុបបំបាត់បទល្មើសនេសាទក្នុងដែនដែលពួកគេគ្រប់គ្រង ហើយនៅពេលកម្លាំងចុះប្រតិបត្តិការ គឺមិនដែលឃើញម្ចាស់បទល្មើសនៅនឹងកន្លែងនោះឡើយ៕

អត្ថបទ៖ សោ និយមរ័ត្ន

The post អាជ្ញាធរស្រុកសង្កែ ចុះបង្ក្រាបការនេសាទខុសច្បាប់​តាមដៃទន្លេសាប appeared first on Kampuchea Thmey Daily.

ប្រតិបត្តិការបង្ក្រាបនេះ បានឃាត់រថយន្តសរុបចំនួន៣គ្រឿង រួមមាន រថយន្តFUSU ចំណុះ៥តោន ផ្ទុកលៀសចំនួន១៥តោន រថយន្តកូរ៉េចំណុះ៥តោនផ្ទុកលៀសចំនួន១០តោន រថយន្តកែឆ្នៃផ្ទុកលៀសចំនួន៥តោន និងអ្នកបើកបររថយន្តចំនួន៣នាក់ បញ្ជូនទៅមន្រ្តីជំនាញកងរាជអាវុធហត្ថខេត្តកំពង់ធំ កសាងសំណុំរឿងបញ្ជូនទៅតុលាការ ដើម្បីចាត់វិធានការតាមផ្លូវច្បាប់។ ដោយឡែក លៀសដែលរឹបអូសបាន ប្រគល់ជូនមន្រ្តីជំនាញ និងកងទ័ពបានដឹកជញ្ជូនយកទៅចាក់ចូលក្នុងបឹងទន្លេសាបវិញ។ នេះបើតាមការចុះផ្សាយនៅលើទំព័រហ្វេសប៊ុកផ្លូវការរបស់កងទ័ពជើងគោកនៃកងយោធពលខេមរភូមិន្ទនៅព្រឹកថ្ងៃទី០៣ ខែតុលានេះ។

លោកឧត្តមសេនីយ៍ទោ សេង ធារិន បានបញ្ជាក់ថា បើទោះបីកងទ័ពជាប់ដៃការពារបូរណភាពទឹកដីពីការឈ្លានពានពីប្រទេសជិតខាងយ៉ាងណាក្តី តែដៃម្ខាងការពារទឹកដី និងដៃម្ខាងបន្តការពារធនធានធម្មជាតិ លើផ្ទៃបឹងទន្លេសាប ដោយបន្តបង្រ្កាបបទលើ្មសផ្សេងៗ ដូចជា ឆក់ក្តៅ ត្រជាក់ ដាក់របាំងស្បៃ លបបណរ៉ាវ ក្នុងតំបន់ព្រៃលិចទឹក និងការនេសាទដោយឧបករណ៍ខុសច្បាប់ជលផលផ្សេងៗទៀតជារៀងរាល់ថ្ងៃ ដោយពុំមានការលើកលែង និងចាត់វិធានការយ៉ាងម៉ឹងម៉ាត់បំផុត ដើម្បីធានាបាននូវការការពារធនធានធម្មជាតិ ជីវចម្រុះ លើផ្ទៃបឹងទន្លេសាប ដែលជាប្រភពធនធានមច្ឆាជាតិ ក្នុងការរួមចំណែកជួយផ្គត់ផ្គង់នូវជីវភាពរស់នៅប្រចាំថ្ងៃរបស់ប្រជាពលរដ្ឋខ្មែរមួយចំណែក និងផលប្រយោជន៍សេដ្ឋកិច្ចជាតិផងដែរ៕

The post លៀសខុសច្បាប់៣០តោន កងទ័ពចាប់យកទៅប្រគល់ឱ្យមន្រ្តីខេត្តកំពង់ធំយកទៅចាក់ចូលក្នុងបឹងទន្លេសាបវិញ appeared first on Kampuchea Thmey Daily.