ព័ត៌មានជាតិ

ក្រោយស្រាវជ្រាវអស់ជាង ១០ ឆ្នាំ អាជ្ញាធរទន្លេសាបចេញផ្សាយសៀវភៅសិក្សាពីប្រភេទត្រី និងជីវចម្រុះបឹងទន្លេសាប

បានផុស

៦ ខែ មុន

នៅ

ថ្ងៃព្រហស្បតិ៍ ២០ វិច្ឆិកា ២០២៥

ដោយ

អាជ្ញាធរទន្លេសាប បានបោះពុម្ពចេញផ្សាយសៀវភៅសិក្សាពីប្រភេទត្រីនៅទន្លេសាបនាចុងរដូវវស្សា និងអំពីប្រព័ន្ធជីពចរទឹកជំនន់តំបន់ទំនាបត្រូពិកបឹងទន្លេសាបក្នុងប្រទេសកម្ពុជា។

លោក សរ គឹមសាន្ត អគ្គលេខាធិការអាជ្ញាធរទន្លេសាបបានប្រាប់កម្ពុជាថ្មីតាមទូរសព្ទថា គោលដៅនៃការចេញផ្សាយសៀវភៅនេះ គឺដើម្បីផ្សព្វផ្សាយចំណេះដឹងពីសក្ដានុពលនៃធនធានធម្មជាតិ និងជីវចម្រុះបឹងទន្លេសាបរបស់ប្រទេសកម្ពុជា។

«សៀវភៅស្រាវជ្រាវនេះមានតម្លៃសម្រាប់ការសិក្សា ដោយសារវាជួយឲ្យយើងដឹងថាតើត្រីណាដែលសម្បូរ ត្រីណាអាចធ្វើអីបាន និងប្រភេទត្រីដែលជិតផុតពូជ ឬក៏ត្រូវអភិរក្ស»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចងក្រងសៀវភៅដែលបង្ហាញពីភាពសំបូរបែបនៃធនធានធម្មជាតិនៃបឹងទន្លេសាប កើតឡើងពីការស្រាវជ្រាវអស់រយៈពេលជាង ១០ ឆ្នាំ និងមានការសហការគ្នាយ៉ាងជិតស្និទ្ធជាមួយរដ្ឋបាលជលផល ក្រសួងបរិស្ថាន និងអាជ្ញាធរពាក់ព័ន្ធផ្សេងទៀត។

លោក សរ គឹមសាន្ត បានបញ្ជាក់ថា ការចេញផ្សាយសៀវភៅនេះគ្រាន់តែជាជំហានដំបូង មិនទាន់ដាក់ឲ្យប្រើប្រាស់ទូលំទូលាយនោះទេ ព្រោះត្រូវការត្រួតពិនិត្យនិងផ្ទៀងផ្ទាត់បន្ថែមទៀតដើម្បីធានាថាឈ្មោះ (ឈ្មោះបច្ចេកទេស ឈ្មោះវិទ្យាសាស្ត្រ) និងការកំណត់អត្តសញ្ញាណ (ត្រីសម្បូរ ឬត្រីជិតផុតពូជ) គឺត្រឹមត្រូវឥតខ្ចោះមុននឹងចែកចាយដល់សាធារណជន។

តាមរយៈសៀវភៅសិក្សាទាំងពីរក្បាល លោក សរ គឹមសាន្ត បានអះអាងថា នឹងដើរតួនាទីយ៉ាងសំខាន់ជាឯកសារគោល និងជំនួយសម្រាប់ឲ្យក្រសួងស្ថាប័នជំនាញ អ្នកសិក្សាស្រាវជ្រាវ អ្នករៀបចំគោលនយោបាយ និងអ្នកពាក់ព័ន្ធនានា អាចយកទៅធ្វើជាអំណះអំណាង និងប្រើប្រាស់តាមតម្រូវការផ្សេងៗ។

សៀវភៅស្រាវជ្រាវដ៏សំខាន់ចំនួន ២ ដែលអាជ្ញាធរទន្លេសាបទើបតែបោះពុម្ពផ្សព្វផ្សាយដែលសៀវភៅទី ១៖ រៀបរាប់ពីការសិក្សាប្រភេទត្រីនាចុងរដូវវស្សានៅទន្លេសាបមានកម្រាស់ ២៥០ ទំព័រ។ វាគឺជាឯកសារចំណេះដឹងមូលដ្ឋានដែលបង្ហាញពីប្រភេទត្រីចំនួន ១២១ ប្រភេទ។

សៀវភៅនេះផ្តោតលើប្រភេទត្រីទឹកសាបដែលធ្វើការផ្លាស់ប្ដូរទីតាំងពីបឹងទន្លេសាប និងតំបន់ពាក់ព័ន្ធតាមដងទន្លេនាចុងរដូវវស្សា ដែលការស្រាវជ្រាវប្រមូលទិន្នន័យបានធ្វើឡើងចាប់ពីរដូវនេសាទឆ្នាំ ២០១១-២០១២ រហូតដល់រដូវនេសាទឆ្នាំ ២០២២-២០២៣។

ក្នុងសៀវភៅមានពិពណ៌នាពីរូបរាង លក្ខណៈសម្គាល់ ប្រភេទ អំបូរ និងឈ្មោះវិទ្យាសាស្ត្ររបស់ត្រី ទៅតាមលំដាប់ចំណាត់ថ្នាក់របស់ត្រីនីមួយៗ។

ដោយឡែកសៀវភៅស្រាវជ្រាវទី ២ បង្ហាញអំពីប្រព័ន្ធជីពចរទឹកជំនន់តំបន់ទំនាបត្រូពិកបឹងទន្លេសាបប្រទេសកម្ពុជា។ សៀវភៅនេះមានកម្រាស់ ២៤៣ ទំព័រ បែងចែកជា ៧ ជំពូក ដែលនិយាយពីសារៈសំខាន់នៃប្រព័ន្ធអេកូឡូស៊ី និងភាពងាយរងគ្រោះនៃប្រព័ន្ធអេកូឡូស៊ីបឹងទន្លេសាប ខណៈជំពូកបន្តបន្ទាប់ក៏បានរំលេចពីទិដ្ឋភាពទូទៅនៃបឹងទន្លេសាប គុណភាពទឹក លក្ខណៈជីវភូមិសាស្ត្រនៃបរិស្ថានទឹក និងការគ្រប់គ្រងបរិយាកាសជាដើម៕