ព័ត៌មានជាតិ

រដូវត្រីប្រហុកចាប់ផ្ដើមមានបណ្ដើរៗ

បានផុស

៧ ខែ មុន

នៅ

ថ្ងៃអង្គារ ២៣ ធ្នូ ២០២៥

ដោយ

ត្រីប្រហុកនឹងចាប់ផ្ដើមត្រូវ នៅដំណាច់ខែធ្នូនេះ ខណៈត្រីចាប់ផ្ដើមបន្លាស់ទីចេញពីបឹងទន្លេសាប បឹង ស្ទឹង និងព្រែកនានា ចូលទន្លេសាប ទន្លេមេគង្គ នៅក្នុងភូមិសាស្ត្រខេត្តកណ្ដាល រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពុំ សុថា ប្រធានរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ប្រាប់កម្ពុជាថ្មី នៅថ្ងៃទី ២៣ ខែធ្នូ ឆ្នាំ ២០២៥ ថា ត្រីទើបចាប់ផ្ដើមចុះតិចៗ ខណៈទិន្នផលត្រីនារដូវឆ្នាំថ្មីនេះ អាចនឹងទទួលបានច្រើនជាងឆ្នាំមុន ដោយសារការបង្ក្រាបបទល្មើស និងមានការចូលរួមពីមហាជន ក៏ដូចជាការចូលរួមពីកងកម្លាំងប្រដាប់អាវុធ។

លោក ពុំ សុថា បញ្ជាក់ថា៖ «មហាជនចូលរួមច្រើនមែនទែន ទាំងការលែងត្រីកម្រ ផ្ដល់ព័ត៌មានបទល្មើសកន្លែងនេះ កន្លែងនោះ»។

សម្រាប់ព្រឹកថ្ងៃទី ២៣ ខែធ្នូនេះ ត្រីចាប់ផ្ដើមត្រូវដោយលើកដាយម្ដងរយៈពេលមួយម៉ោងបានប្រមាណ ៧០០ គីឡូក្រាម ទៅ មួយតោន ដែលភាគច្រើនជាប្រភេទត្រីស្លឹកឫស្សី។

យោងតាមរដ្ឋបាលជលផលនៅក្នុងឆ្នាំ ២០២៤ ផលនេសាទ និងវារីវប្បកម្មកម្ពុជា សម្រេច បាន សរុបចំនួន ៩២៦ ៩៣៤តោន កើនឡើង ៦០ ៦៨៤តោន ស្មើនឹង៧ ភាគរយ បើធៀបទៅនឹង ឆ្នាំ២០២៣។

ក្នុងនោះ ផលនេសាទទឹកសាបទទួលបាន ៤៦៧ ៣៤៤តោន ផលនេសាទសមុទ្រទទួលបាន ១៣៩ ៣១០តោន និងផលវារីវប្បកម្ម ៣២០ ២៨០តោន៕