លក្ខណៈ​ពិសេសនៃធម្មជាតិ និងទេសភាព៖

ជាមួយ​សក្តានុពល​ធនធានធម្មជាតិ​យ៉ាង​សម្បូរ​បែប ទាំង​មច្ឆាជាតិ និង​រុក្ខជាតិ អ្វី​ដែល​ប្លែក​ពី​កន្លែង​ផ្សេង​នោះ​គឺ តំបន់​អេកូទេសចរណ៍​សម្រស់​កោះហាន​ពឹងផ្អែក​ទាំងស្រុង​លើ​ទេសភាព​ដើមឈើ​ធម្មជាតិ ដែល​ដើម​ឈើ​ទាំង​នេះ​អាច​រស់រាន​មានជីវិត ទោះ​បី​ជា​ត្រូវទឹក​លិច​​នា​រដូវវស្សា​ក៏ដោយ ហើយ​វា​នឹង​លូតលាស់​បញ្ចេញ​ស្លឹក​ផ្តល់​ជា​ម្លប់​ដ៏​ត្រជាក់ត្រជុំ​នា​រដូវប្រាំង។ កាន់តែពិសេស​ប្លែក​ដើម និង​ឫស​ឈើ​នៅ​ទីនោះ​មាន​លក្ខខណៈ​រូបរាង​​កោង​លាត​សន្ធឹង​យ៉ាង​ស្រស់​ស្អាត​ទៅ​តាម​​លំហូរ​នៃ​ទឹក​នា​រដូវវស្សា។

ការកម្សាន្ត និងម្ហូបអាហារ៖

ភ្ញៀវទេសចរអាច​ទទួលបាន​អារម្មណ៍​ត្រជាក់ត្រជុំពីទឹក និង​ម្លប់ឈើ​លើ​ឆ្នេរខ្សាច់ ព្រម​ទាំង​អាច​ទទួលទាន​ម្ហូបអាហារ ជាពិសេស​គឺត្រីប្រចាំតំបន់​ដ៏មានរសជាតិឆ្ងាញ់ពិសា រួម​ជាមួយ​ផលិតផល​ផ្សេងៗ​ដែលរៀបចំ​ដោយ​ប្រជា​សហគមន៍ផ្ទាល់។

លើសពីនេះ ភ្ញៀវទេសចរមិនត្រឹមតែអាចមកកម្សាន្តពេលថ្ងៃប៉ុណ្ណោះទេ ក៏​អាចបោះតង់​សម្រាក​នៅពេលយប់នៅលើឆ្នេរខ្សាច់ក្រោមម្លប់ឈើបានផងដែរ។

សុវត្ថិភាព និងការគ្រប់គ្រង៖

តំបន់ទេសចរណ៍​ធម្មជាតិ​នេះ​ទទួលបាន​ការ​យកចិត្តទុកដាក់ខ្ពស់ពីសហគមន៍លើ​ការថែរក្សា​អនាម័យ បរិស្ថាន និង​​ការ​អភិរក្ស​ធនធាន​ធម្មជាតិ​ទាំង​ក្នុង​ទឹក​និង​លើ​ទឹក ដើម្បី​បម្រើ​​​ផលប្រយោជន៍​យូរអង្វែង​ដល់សហគមន៍​ក្នុងមូលដ្ឋាន៕

The post ទេសចរ​គួរ​ដឹង​អ្វី​ខ្លះ ពេល​ទៅ​កម្សាន្ត​តំបន់​អេកូ​ទេសចរណ៍​រ៉ាមសារ​សម្រស់​កោះហាន​​ក្នុង​ខេត្ត​ស្ទឹងត្រែង? appeared first on Kampuchea Thmey Daily.

លោក ម៉េង ហៀង ប្រធានអង្គការអភិរក្ស​សៀមប៉ាង បានផ្តល់​បទ​សម្ភាសន៍ដ​ល់​ក្រុម​អ្នក​សារព័ត៌មានពីកិច្ចការអភិរក្ស​នៅតំបន់ដែនជម្រកសត្វព្រៃសៀមប៉ាង លើការ​គ្រប់គ្រង ការពារ ការអភិរក្សជីវចម្រុះ និងធនធានធម្មជាតិដោយមាន​កា​រចូលរួមសហការ​ពី​មន្រ្តីជំនាញ និង​សហគមន៍​មូលដ្ឋាន។

១. ទិដ្ឋភាពទូទៅ និងកិច្ចសហការ

លោក ម៉េង ហៀង ប្រធានអង្គការអភិរក្ស​សៀមប៉ាង បាន​បញ្ជាក់ថា អង្គការអភិរក្ស​សៀមប៉ាង បានចុះកិច្ចព្រមព្រៀង​ជាមួយ​ក្រសួងបរិស្ថានក្នុងឆ្នាំ ២០២២ ដើម្បីគ្រប់គ្រងនិងអភិរក្ស​ដែនជម្រក​សត្វព្រៃ​សៀមប៉ាង​នៅលើផ្ទៃដីទំហំ​ប្រមាណ ១៣៥ ០០០ ហិកតា។

គម្រោងនេះក៏​មានការសហការជាមួយអង្គការ​មិនរកប្រាក់​ចំណេញ​ពី​ប្រទេស​អង់គ្លេស​ឈ្មោះ Rising Phoenix ដែល​មានបុគ្គលិក​ជំនាញ​ជាង ១០០ នាក់ រួមទាំងអ្នក​ជំនាញ​បរទេស​ដែលមានបទពិសោធន៍រាប់សិបឆ្នាំមកពី​ប្រទេស​អាហ្វ្រិកខាងត្បូង ដើម្បីជួយមើល​ការខុសត្រូវ​លើការងារ​អភិរក្ស។

២. ការងារអភិរក្សសត្វព្រៃ និងទប់ស្កាត់ការបរបាញ់

ដែនជម្រកធម្មជាតិ​នេះ​មាន​សត្វស្លាបជាង ២០០ ប្រភេទ និងប្រភេទ​សត្វកម្រ​ជិតផុតពូជ​ជាច្រើនដូចជា ត្រយងយក្ស (ដែលពិភពលោកនៅសល់តែប្រមាណ ២០០​ ក្បាល​ប៉ុណ្ណោះ​), ក្រពើភ្នំ, ត្មាត និង ទន្សោង ដែលកំពុងតែមាន​កំណើន និងបន្តពូជបានយ៉ាងល្អ។

ក្នុងរយៈពេល ៣ ឆ្នាំនៃការចុះអនុវត្តគម្រោង លោក ម៉េង ហៀង បានអះអាង​ថា ការដោះអន្ទាក់​បានធ្លាក់ចុះ​យ៉ាង​ខ្លាំង បើធៀបនឹងគ្រាដំបូងដែលការ​​ដោះ​អន្ទាក់​ឈាន​ដល់ទៅប្រមាណ ៥.០០០ ក្នុងមួយខែ (ស្មើនឹង ៦​ ម៉ឺនអន្ទាក់ក្នុងមួយឆ្នាំ)។

បន្ថែមពីនេះ អង្គការថែមទាំងផ្ដល់ការងារដល់អតីតព្រានព្រៃឲ្យមកធ្វើជាបុគ្គលិក​អភិរក្សវិញ​ ដោយសារ​ពួកគាត់​ស្គាល់​ភូមិសាស្ត្រព្រៃបានច្បាស់ល្អ។

៣. គម្រោងឥណទានកាបូន (Carbon Credits)

អង្គការបានសិក្សាលើគម្រោង​កាបូនជាង ២ ឆ្នាំមកហើយ ហើយរំពឹងថា​នឹងបញ្ចប់ការវាយ​តម្លៃ​ដើម្បីដាក់លក់នៅលើទីផ្សារក្នុងចុងឆ្នាំនេះ។

ថវិកាដែល​បានមកពីការ​លក់កាបូននេះ នឹងត្រូវយកមកប្រើប្រាស់​ដើម្បីពង្រឹង​ការងារអភិរក្ស​ព្រៃឈើ និងសត្វព្រៃបន្តទៀត។ ភាពជោគជ័យនៃគម្រោងទាមទារឲ្យមាន​ការសហការ​ពី​សហគមន៍ ដើម្បីបញ្ឈប់ការកាប់បំផ្លាញព្រៃឈើ និងការបរបាញ់។

៤. ការលើកស្ទួយជីវភាពសហគមន៍

ដើម្បីឲ្យប្រជាពលរដ្ឋជាង ៣ ម៉ឺននាក់ (ប្រមាណ ៥ ០០០គ្រួសារ) ចូលរួមការពារព្រៃឈើ អង្គការ​បានជួយបង្កើតមុខរបរ និង​ផ្លាស់ប្ដូរជីវភាពរបស់ពួកគាត់ ដោយចុះកិច្ចសន្យាទិញស្រូវសរីរាង្គ (មិន​ប្រើ​ជាតិគីមី) ក្នុងតម្លៃថ្លៃ ព្រមទាំងបង្រៀនពួកគាត់ឲ្យចេះជីកស្រះចិញ្ចឹមត្រី ចិញ្ចឹមចង្រិត និង​បង្កាត់​ពូជ​ឃ្មុំជាដើម។

ក្នុងមួយឆ្នាំៗ អង្គការបានចំណាយថវិកាប្រហែល ១,៥ លានដុល្លារ ទៅលើការងារអភិរក្ស និង​ការ​ទិញ​កសិផល (អង្ករ/ស្រូវ) ពីប្រជាពលរដ្ឋដើម្បីជួយទ្រទ្រង់សេដ្ឋកិច្ចមូលដ្ឋាន។

អង្គការ​ក៏បានបង្កើតសាលាបង្រៀនភាសាអង់គ្លេស និងជំនាញវិជ្ជាជីវៈ​ដល់បុគ្គលិក​ដែលជា​ប្រជាជន​មូលដ្ឋាន​ផងដែរ។

៥. អេកូទេសចរណ៍ និងរមណីយដ្ឋាន

អង្គការបានបង្កើតរមណីយដ្ឋានលំដាប់ខ្ពស់មួយនៅកណ្ដាលព្រៃ ដើម្បីទាក់ទាញភ្ញៀវទេសចរជាតិ និង​អន្តរជាតិ ឲ្យមកទស្សនា​សត្វព្រៃ ធ្វើសមាធិ និងទទួលយកបទពិសោធន៍បែបធម្មជាតិ។

តម្លៃកញ្ចប់សម្រាប់ដំណើរកម្សាន្ត ៣ ថ្ងៃ ២ យប់ មានតម្លៃប្រមាណ ៧០០ ទៅ ៨០០ ដុល្លារ​ក្នុងម្នាក់ (រួមបញ្ចូល​ការហូបចុក ស្នាក់នៅ និងសេវាកម្មផ្សេងៗ) ហើយ​មានការ​បញ្ចុះ​តម្លៃ​រហូតដល់ ៥០% សម្រាប់ប្រជាពលរដ្ឋខ្មែរ។

ទោះបីជារមណីយដ្ឋាននេះអាចប្រឈមនឹងការខាតបង់ថវិកាក៏ដោយ ក៏ចំណូល​ត្រូវ​​ដក ១០% ដើម្បីបរិច្ចាគទៅឲ្យកិច្ចការអភិរក្សវិញជានិច្ច។

ទេសចរដែលមក​កម្សាន្ត​មិនអនុញ្ញាតឲ្យមានការបរបាញ់ ឬបរិភោគសាច់សត្វព្រៃជាដាច់ខាត។

៦. ការសាងសង់ទីលានចុះចតយន្តហោះខ្នាតតូច

ដើម្បីជួយសម្រួលដល់ការធ្វើដំណើររបស់ភ្ញៀវទេសចរពីសៀមរាបមកស្ទឹងត្រែង អង្គការ​កំពុង​ស្ថាបនា​ទីលានចុះចតយន្តហោះខ្នាតតូចមួយ (ទំហំ ២៥ ហិកតា ដែលមានផ្លូវរត់បណ្តោយ ៨០០​ម៉ែត្រ និងទទឹង ២៥ម៉ែត្រ)។

ទីលាននេះបម្រើជូនតែយន្តហោះខ្នាតតូចដែល​បច្ចុប្បន្ន​សាងសង់​បាន ៤០% ហើយគ្រោង​នឹងដាក់ឲ្យដំណើរការនៅពាក់កណ្តាល​ឆ្នាំ២០២៧។

គម្រោងនេះត្រូវបានសិក្សាយ៉ាងយកចិត្តទុកដាក់ពីមន្ត្រីជំនាញអាកាសចរណ៍ស៊ីវិល និង​ក្រសួង​បរិស្ថាន ដើម្បីធានាថាមិនមានផលប៉ះពាល់ដល់បរិស្ថាន ឬរំខានដល់សត្វព្រៃឡើយ។

ជារួមចក្ខុវិស័យដ៏សំខាន់នៃគម្រោងនេះគឺ “Conservation in action” ដែលមានន័យថា ភ្ញៀវទេសចរ​ដែល​មកកម្សាន្តមិនត្រឹមតែទទួលបាននូវបទពិសោធន៍ធម្មជាតិដ៏អស្ចារ្យប៉ុណ្ណោះទេ ថែម​ទាំង​បានចូលរួមចំណែក​ដោយផ្ទាល់នៅក្នុងការជួយសង្គ្រោះព្រៃឈើ សត្វព្រៃ និង​លើក​ស្ទួយ​សេដ្ឋកិច្ច​របស់​ប្រជាជនកម្ពុជានៅមូលដ្ឋានផងដែរ៕

The post តោះ! មក​ដឹង​ពី​គម្រោងអភិរក្ស​ និង​អភិវឌ្ឍ​ដែនជម្រក​សត្វព្រៃ​សៀមប៉ាង​ ផ្សារ​ជាប់​ធម្មជាតិ appeared first on Kampuchea Thmey Daily.

ផ្ទៃដី​ខេត្ត​រតនគិរី​ប្រមាណ ៨០% គឺ​ជា​ដី​ក្រហម​ដែល​អំណោយ​ផល​ខ្លាំង​បំផុត​ដល់​វិស័យ​កសិកម្ម។ ខេត្ត​មាន​ដំណាំ​សក្តានុពល​ធំៗ​ដូចជា កៅស៊ូ​ជិត ៨ ម៉ឺនហិកតា និង​ស្វាយចន្ទី​ប្រមាណ ១០​ម៉ឺន ហិកតា ជាប់​ចំណាត់ថ្នាក់លេខ៣ ទូទាំង​ប្រទេស។ ក្រៅពី​នេះ ​ដំណាំ​ទុរេន​ក៏​កំពុង​មាន​សន្ទុះ​ដាំដុះ​យ៉ាង​ច្រើន ស្រប​​ដំណាំ​ចេក ម្រេច ដំឡូងមី ក៏​ដូចជា​កាកាវ និង​កាហ្វេ​ដែល​បច្ចុប្បន្ន​​កំពុង​មានតម្លៃ​ល្អ​នៅ​លើ​ទីផ្សារ។

លោក ញ៉ែម សំអឿន​ បានឲ្យ​ដឹង​ថា ខេត្ត​មាន​ក្រុមហ៊ុន​វិនិយោគ​កសិកម្ម​ធំៗដូចជា​ក្រុមហ៊ុន​ ថាកូអាគ្រី (Thaco Agri) ដែល​ផ្តោត​លើ​ការ​ចិញ្ចឹម​គោ​កម្រិត​ឧស្សាហកម្ម ដែល​បច្ចុប្បន្ន​មាន​គោ​រាប់​ម៉ឺន​ក្បាលនិង​មាន​ទិសដៅ​ពង្រីក​ដល់ ១០ ម៉ឺនក្បាល​។ ក្រុមហ៊ុន​ក៏​មាន​គោលនយោបាយ​ផ្តល់ពូជ និង​បច្ចេកទេស​ដល់​ប្រជាពលរដ្ឋ​នៅ​តំបន់​ជុំវិញ​ដើម្បី​យក​ទៅ​ចិញ្ចឹម ហើយ​ប្រមូល​ទិញ​មកវិញ។

ខេត្ត​រតនគីរី​មាន​ក្រុមហ៊ុន​សម្បទាន​សេដ្ឋកិច្ចសរុបចំនួន ២៧ (ក្នុង​នោះ​ក្រុមហ៊ុនក្នុងស្រុក​ចំនួន ១០, ក្រុមហ៊ុន​ចិន​ចំនួន ៣, ក្រុមហ៊ុន​វៀតណាម​ចំនួន ១៣ និង ក្រុមហ៊ុន​សិង្ហបុរីចំនួន ១) ដែល​កំពុងវិនិយោគលើវិស័យ​កសិកម្ម។

ខេត្តកំពុង​ត្រូវការ​ការ​​វិនិយោគ​បន្ថែម​លើ​រោងចក្រ​កែច្នៃ​ ដូចជា​រោងចក្រ​កង់ឡាន និង​រោងចក្រកែ​ច្នៃស្វាយចន្ទី ដើម្បី​ចៀសវាង​ការនាំចេញត្រឹមតែវត្ថុធាតុដើម។ លោក ញ៉ែម សំអឿន បញ្ជាក់។

សម្រាប់​វិស័យ​ទេសចរណ៍ ខេត្តរតនគិរីមានផ្ទៃដីព្រៃឈើជិត ៨០ ម៉ឺនហិកតា រួមមាន​ឧទ្យាន​ជាតិ​វីរៈជ័យ ឧទ្យានជាតិ​សៀម​ប៉ាង​វើនសៃ ឧទ្យានជាតិ​អូរយ៉ាដាវ និង​ដែនជម្រកសត្វព្រៃ ដែល​មាន​សត្វ​កម្រ​ដូចជា ស្វា​កន្ទុយ​លឿង និង​ទោចថ្ពាល់លឿង។ ខេត្ត​តំបន់​ឦសាននេះ​មានភាព​លេចធ្លោ​ ដោយសារ​មាន​បឹង​ធម្មជាតិ​ច្រើន ដែល​គ្រាន់​តែនៅក្រុងបានលុង​មានបឹងដល់ទៅ ៤ ដូចជាបឹង​យក្សឡោម បឹង​កន្សែង បឹង​កម្សាន្ត បឹង​វ៉ារី​ឬ​បឹង​ផ្តើម​ស្នេហ៍ រួម​ទាំង​បឹង​លំកុដ) និង​មាន​ទឹកជ្រោះ​ដ៏​ស្រស់ស្អាត​ជាច្រើន​ទីតាំង​ដូចជា​ទឹកជ្រោះ​កាចាញ ចាអ៊ុង កាទៀង និងអូរស៊ីនឡែរ។

ពលរដ្ឋ​ក្នុង​ខេត្ត​រតនគិរី​ប្រមាណ ៦០% គឺជា​ជនជាតិ​ដើម​ភាគតិច​មាន​ដូចជា ទំពួន ចារាយ គ្រឹង កាវ៉ែត គួយ ព្នង និង​ក្រោល។ ខេត្ត​ចង់មានការ​​វិនិយោគ​លើវិស័យ​​ទេសចរណ៍​វប្បធម៌ ដើម្បី​អនុញ្ញាត​ឱ្យ​ប្រជាពលរដ្ឋ​មូលដ្ឋាន​អាច​ធ្វើការ​នៅនឹង​កន្លែង។

ទេសចរណ៍​កសិកម្ម​វិញ ខេត្តមានការ​វិនិយោគ​ចម្ការ​កសិកម្មធំៗ​មើល​ដាច់​កន្ទុយភ្នែកកំពុង​ក្លាយ​ជា​សក្តានុពល​ថ្មី​សម្រាប់​ទេសចរណ៍​កសិកម្ម។ ដោយ​ឡែក​ក្នុង​ខេត្ត​ក៏​មាន​ធនធាន​រ៉ែ​ធម្មជាតិ​ដ៏​មាន​សក្ដានុពល​ខ្ពស់​សម្រាប់​ទាក់ទាញ​ការ​វិនិយោគ​ផង​ដែរ។ លោក ញ៉ែម សំអឿន​ បន្ថែម៕

The post វិស័យ​សក្តានុពល​ចំនួន ៣ អភិបាល​ខេត្ត​​រតនគិរី​​ លើកទឹកចិត្ត​ចង់​បាន​ការ​​វិនិយោគ​​ក្នុង​ខេត្ត​ appeared first on Kampuchea Thmey Daily.

តំបន់​អេកូ​ទេសចរណ៍​មួយ​ចំនួន​ក្នុង​ខេត្ត​ធ្លាប់​មាន​អ្នកមាន​​បំណង​ចង់​វិនិយោគ ប៉ុន្តែ​ដោយ​សារ​មាន​បញ្ហាមួយចំនួន​ក៏​បាន​ដកខ្លួន​ទៅវិញ។

​

លោក​អភិបាល​ខេត្ត​បាន​ឲ្យ​ដឹង​ថា គោលដៅទេសចរណ៍​សំខាន់ៗក្នុង​ខេត្ត​មាន​ដូចជា បឹងយក្សឡោម បឹងលំកុត និងទឹកធ្លាក់ជាច្រើនកន្លែង​ផ្សេង​ទៀត ស្ថិត​នៅ​ក្រោម​​ការ​គ្រប់គ្រង​របស់ក្រសួងបរិស្ថាន ហើយត្រូវបានប្រគល់សិទ្ធិឲ្យ​សហគមន៍​មូលដ្ឋាន​ជា​អ្នក​អភិវឌ្ឍន៍​ដូចជាករណីបឹងយក្សឡោមជាដើម។

ដោយសារ​សហគមន៍​ខ្វះខាតធនធានថវិកាក្នុងការអភិវឌ្ឍ និង​ចំណេះដឹងនៅមានកម្រិត អាជ្ញាធរ​​ខេត្ត​ចង់ឃើញមានការវិនិយោគ​ពី​វិស័យ​ឯកជន​ដោយ​ភ្ជាប់​ការ​​ថែរក្សា​ធនធាន​ធម្មជាតិ និងវប្បធម៌ជនជាតិដើមភាគតិច។ លោក ញ៉ែម សំអឿន បញ្ជាក់។

«ការវិនិយោគប្រភេទនេះ​នឹងផ្តល់ឱកាស​ការងារដល់កូនចៅជនជាតិភាគតិចនៅនឹងកន្លែងផ្ទាល់ និង​ជួយ​លើក​ស្ទួយដល់ការអភិរក្សប្រពៃណីរបស់ជនជាតិ​ដើមភាគតិច​ដូចជា ការ​ស្លៀកពាក់ ទំនៀមទម្លាប់ការរស់នៅ និងផលិតផលអត្តសញ្ញាណ​ដូចជា​ការ​ផលិត​ស្រាពាងជាដើម»។ លោក ញ៉ែម សំអឿន បន្ថែម។

លោក​អភិបាល​ខេត្ត​បន្ត​ថា ស្រាពាងរបស់សហគមន៍ត្រូវបាន​ចុះបញ្ជីជាផ្លូវការ​នៅក្នុងចលនា​ភូមិមួយ​ផលិតផល​មួយរួចរាល់ហើយ។

ពាក់ព័ន្ធ​កិច្ចការអភិវឌ្ឍ​នេះដែរ​​ លោក ញ៉ែម សំអឿន​ បានលើកឡើង​ពី​ការផ្លាស់ប្តូរផ្នត់គំនិតរបស់​សហគមន៍ជនជាតិភាគតិច​ ដែល​កាល​ពី​មុនធ្លាប់​មានការជំទាស់នឹងការអភិវឌ្ឍឬអ្នកវិនិយោគខាងក្រៅ ដោយសារ​តែមាន​ការចាក់​រុក​ពី​អ្នក​​ដទៃ ប៉ុន្តែនាពេលបច្ចុប្បន្ននេះសហគមន៍​បាន​ផ្លាស់ប្តូរគំនិតនិង​​គាំទ្រ​​ទាំងស្រុង ដោយពួក​គេត្រៀមខ្លួនរួចជាស្រេចក្នុងការចូលរួមសហការជាមួយ​វិស័យ​ឯកជន​ក្នុងការ​អភិវឌ្ឍ​ ប្រសិន​បើមានអ្នក​វិនិយោគ​ទាំំង​នោះ​ដើរតាម​គន្លង​នៃការអភិរក្សវប្បធម៌និងធម្មជាតិរបស់ពួកគេ៕

The post ខេត្ត​រតនគិរី សំបូរ​តំបន់​អេកូ​ទេសចរណ៍ តែ​ខ្វះ​ការ​​វិនិយោគ appeared first on Kampuchea Thmey Daily.

ក្រៅពី​នេះក៏​មាន​សហគមន៍​ព្រៃឈើ​ចំនួន ៣ និង​សហគមន៍​នេសាទ​ចំនួន ៣។ នេះ​បើ​តាម​លោក ផាន់ យុទ្ធ អភិបាល​ស្រុក​បុរី​អូរស្វាយ​សែន​ជ័យខេត្ត​ស្ទឹងត្រែង។

លោក ផាន់ យុទ្ធ អភិបាល​ស្រុក​បុរី​អូរស្វាយ​សែន​ជ័យ

ពាក់ព័ន្ធសក្តានុពល​តំបន់អេកូ​ទេសចរណ៍​សម្រស់​កោះហាន លោក ផាន់ យុទ្ធ ​បាន​លើក​ឡើង​ពី​ភាព​ទាក់ទាញ​តំបន់​ទេសចរណ៍​មួយ​នេះ ដែល​ភ្ញៀវទេសចរ​មក​ដល់​ហើយ​មាន​អារម្មណ៍​ស្រស់ស្រាយ​មិន​ចង់​ត្រលប់​ទៅ​វិញ។

មាន​ភូមិសាស្រ្ត​​កណ្តាល​ទន្លេ ​ទេសចរ​​ចង់ទៅកម្សាន្តរមណីយដ្ឋានអេកូទេសចរណ៍​សម្រស់កោះហាន ​អាច​ធ្វើ​ដំណើរ​តាមផ្លូវជាតិលេខ៧ឆ្លងស្ពានសេកុង ចេញ​ពីទីរួមខេត្តស្ទឹងត្រែងមានចម្ងាយប្រហែល ២៤ គីឡូម៉ែត្រ។

​លោក ផាន់ យុទ្ធ បាន​ឲ្យ​ដឹង​ថា តំបន់​នេះពីមុន​មាន​​ភាព​ស្ងាត់ជ្រងំ មិន​សូវ​មាន​ភ្ញៀវ​ទេសចរ​មកលេង​នោះ​ទេ។ ប្រជាជន​រស់នៅ​ពឹង​ផ្អែក​លើ​ការ​នេសាទ ការ​ធ្វើស្រែ​ចម្ការ និង​ការ​ដាំ​ដំណាំរួមផ្សំ ប៉ុន្តែ​ក្រោយ​មាន​ការ​​ល្បីតៗ​គ្នា និង​​ផលិតមាតិកា​ផ្សព្វផ្សាយ​លើ​បណ្ដាញ​សង្គម​ បានប្រែក្លាយ​តំបន់​នេះ​​ក្លាយ​ជា​ទីតាំង​ទាក់ទាញ​ភ្ញៀវ​យ៉ាង​ខ្លាំង។

បច្ចុប្បន្ន​នៅថ្ងៃធម្មតាមានភ្ញៀវយ៉ាងតិច ៤០ ទៅ ៥០ នាក់ ហើយ​នៅ​ថ្ងៃសៅរ៍ និង​អាទិត្យ​មាន​ភ្ញៀវ​មកលេង​ក្នុងចំនួន​យ៉ាង​ច្រើន។

តំបន់​អេកូ​ទេសចរណ៍​ម្រស់កោះហានស្ថិត​នៅ​តាម​បណ្ដោយ​ទន្លេ​មាន​ប្រវែង​ប្រហែល ៣៦ គីឡូម៉ែត្រ លាតសន្ធឹង​រហូត​ដល់​ព្រំដែន​​ឡាវ ដែល​សុទ្ធសឹង​តែជា​តំបន់ដែលអាចទាក់ទាញនិង​បង្កើត​ជា​តំបន់ទេសចរណ៍បាន។

ដោយសារកំណើនភ្ញៀវទេសចរ ប្រជាជនមួយចំនួនបាន​បោះបង់មុខរបរចាស់ដូចជាការនេសាទ ដោយ​បម្រើសេវាដឹកភ្ញៀវ​ទេសចរកម្សាន្ត​វិញ ដែល​មុខរបរ​ថ្មីនេះ​ជួយ​ដល់​សេដ្ឋកិច្ច​របស់​ពលរដ្ឋ​បានច្រើន​ជាងមុន ​និង​ថែមទាំងបានរួមចំណែក​ការពារ​បរិស្ថាន​ធម្មជាតិ​បាន​យ៉ាង​ល្អ​ទៀត​ផង។

​ពាក់ព័ន្ធ​បញ្ហា​សន្តិសុខ លោក ផាន់ យុទ្ធ អះអាង​ថា មិនដែល​មាន​បញ្ហា​ចោរកម្ម​នោះ​ទេ ហើយ​បរិស្ថាន​ក៏​មាន​អនាម័យ​ល្អ ដោយ​​សារ​មានការ​ចូល​រួម​ថែរក្សា​ពី​សំណាក់ភ្ញៀវទេសចរ និង​សហគមន៍។

លោក ផាន់ យុទ្ធ បាន​លើក​ឡើង​ពី​ទិសដៅអភិវឌ្ឍន៍នាពេលអនាគត ​ដោយ​សហគមន៍​នឹង​ពង្រឹង​ការគ្រប់គ្រងនិង​រៀបចំការ​អភិវឌ្ឍន៍​តាម​កោះ​ប្រហែល ២០​ ដោយនឹងធ្វើផ្លូវក្រវាត់​ជុំវិញ ដើម្បី​ឱ្យ​ភ្ញៀវ​ទេសចរ​អាច​ជិះ​កង់ឬដើរកម្សាន្ត និង​ទិញផ្លែឈើ​ពីប្រជាជន​មូលដ្ឋាន​នៅ​តាមកោះ​ទាំងនោះ​ដោយ​ផ្ទាល់ និង​ក៏​ត្រៀមខ្លួន​ទាក់ទាញ​អ្នក​វិនិយោគ​បន្ថែម​ទៀត ដើម្បី​បង្កើត​ជា​កន្លែង​កម្សាន្ត​ឬរីសត​ថ្មីៗ​នៅ​ពេល​ខាងមុខ៕

The post តំបន់​អេកូទេសចរណ៍​សម្រស់​កោះហាន​ ភូមិសាស្រ្ត​​កណ្ដាល​ទន្លេ ខ្យល់​ត្រជាក់ បរិស្ថាន​ស្អាត ភ្ញៀវ​ទេសចរ​ទៅ​លេង​រាល់​ថ្ងៃ appeared first on Kampuchea Thmey Daily.

អ្នកជំនាញខាងបរិស្ថាន និងទេសចរណ៍បានលើកឡើងថា នៅតំបន់អាស៊ីអាគ្នេយ៍យើងនេះ គឺគ្មានកន្លែងណាដែលមានទេសភាពស្អាតលើសវាលធំនោះទេ។

លោក ញ៉ែម សំអឿន អភិបាលនៃគណៈអភិបាលខេត្តរតនគិរីបានគូសបញ្ជាក់ថា វាលធំស្ថិតនៅក្នុងឧទ្យានជាតិវីរៈជ័យ ហើយជាតំបន់ខ្ពង់រាបមានកម្ពស់ជាមធ្យមជាង ៣០០ ម៉ែត្រ ដែលអាចខ្ពស់ជាងកម្ពស់ភ្នំទូទៅនៅក្នុងខេត្ត។

បច្ចុប្បន្នផ្លូវធ្វើដំណើរទៅកាន់វាលធំគឺមិនទាន់មានភាពងាយស្រួលនៅឡើយទេ។ ការធ្វើដំណើរពីទីរួមខេត្តឆ្ពោះទៅស្រុកតាវែងមានចម្ងាយប្រហែល ៣០ គីឡូម៉ែត្រ ហើយបន្តទៅវាលធំទៀតសរុបចម្ងាយជិត ៥០ គីឡូម៉ែត្រ ដែលអាចចំណាយពេលធ្វើដំណើរពី ១ ម៉ោង ទៅ ២ ម៉ោង។

លោក ញ៉ែម សំអឿន បានឲ្យដឹងថា ខណៈ​តំបន់នេះមិនទាន់មានការរៀបចំឬកែច្នៃជាលក្ខណៈទ្រង់ទ្រាយធំនៅឡើយ ប្រសិនមានការវិនិយោគទៅលើហេដ្ឋារចនាសម្ព័ន្ធផ្លូវថ្នល់ ជាពិសេសបើសិន​មានសាងសង់​ព្រលានយន្តហោះ នឹងជួយជំរុញវិស័យទេសចរណ៍នៅតំបន់នេះឱ្យរឹតតែមានសក្តានុពល ទាំងទេសចរណ៍បែបវប្បធម៌របស់បងប្អូនជនជាតិភាគតិច និងកសិទេសចរណ៍៕

The post វាលធំឋានសួគ៌លោកិយ ហ៊ុំព័ទ្ធដោយពពក ជួរភ្នំ ព្រៃឈើ មានចម្ងាយ​ជាង ៥០​ ពី​ក្រុងបានលុង appeared first on Kampuchea Thmey Daily.

ពាក់ព័ន្ធ​ប្រវត្តិ​តំបន់​នេះ លោក ភោគ សុវិសិដ្ឋ បាន​បញ្ជាក់​ថា ព្រះករុណា​ព្រះបរមរតន​កោដ្ឋ​ព្រះបាទ​នរោត្តម សីហនុ កាលជំនាន់ព្រះអង្គដឹកនាំប្រទេស​​បាន​នាំ​យក​ប្រជាពលរដ្ឋ​ពី​ស្រុក​ក្រោម​​ ឲ្យ​មក​រស់នៅ​តាម​បណ្តោយ​ព្រំដែន​​ក្នុងគោលបំណង​ដើម្បី​ការពារ​ទឹកដី។

លោក ភោគ សុវិសិដ្ឋ អភិបាលរង​ស្រុក​បុរីអូរស្វាយសែនជ័យ

«ព្រះអង្គ​បាន​យក​ព្រះទ័យទុកដាក់យ៉ាងខ្លាំងដោយ​បានសាងសង់ផ្ទះ ចែកដីភូមិ ដីកសិកម្ម ព្រម​ទាំង​ផ្តល់​ពូជស្រូវ និង​ពូជ​បន្លែផ្សេងៗ​ជូន​ប្រជាពលរដ្ឋសម្រាប់ធ្វើការដាំដុះ»។

បន្ថែមពីនេះ លោក​អភិបាល​រង​ស្រុកបាន​បង្ហាញពី​សំណង់ប្រវត្តិសាស្រ្ត​​ស្ដូប​អនុស្សាវរីយ៍នៅ​ទឹកដី​ស្រុក​បុរីអូស្វាយជាប់ព្រំដែន​​ឡាវ។

លោកថា សំណង់នេះសាងសង់​ឡើង​​​នៅ​ឆ្នាំ ១៩៦៦ ​ស្ថិត​នៅ​ក្នុង​ផែនការ ៥ ឆ្នាំ (១៩៦៤-១៩៦៨) ​ក្រោម​ស្នាព្រះហស្តព្រះករុណា​ព្រះបរមរតន​កោដ្ឋ​ព្រះបាទ​នរោត្តម សីហនុ ។

នៅ​ឆ្នាំ ២០២៣ ព្រះ​បរម​រាជវាំង​បាន​ធ្វើការ​ជួសជុលនិង​កែ​លម្អ​ស្ដូប​នេះ​ឡើងវិញ ខណៈ​ពីមុនស្ដូប​មាន​សភាព​បាក់បែក​ខ្លះ ដោយ​មានការ​ជួសជុលខឿន ​លាប​ថ្នាំ ​បន្ថែមការ​រៀបចំសួនច្បារយ៉ាង​ស្រស់ស្អាត​។

ខណៈ​បច្ចុប្បន្ន​ទីតាំង​ត្រូវ​បាន​គ្រប់គ្រង​ដោយ​រដ្ឋបាល​ស្រុក​បុរីអូរស្វាយ​សែនជ័យ បើតាមលោកអភិបាល​រងស្រុក តំបន់ប្រវត្តិសាស្រ្ត​នេះបាន​ក្លាយជាកន្លែងទាក់ទាញភ្ញៀវទេសចរទាំងជាតិ និងអន្តរជាតិ ដែល​តែង​តែ​មក​លេងកម្សាន្តជាហូរហែ​។ សកម្មភាព​ទេសចរ​មក​កម្សាន្ត​មាន​ដូច​ជា ការ​ទស្សនាស្ដូបអនុស្សាវរីយ៍ ជិះទូក​តាម​ដង​ទន្លេមើលព្រៃលិចទឹក បោះតង់​តាម​ឆ្នេរខ្សាច់​និង​តាម​កោះ ព្រមទាំងការស្ទូចត្រី​ជាដើម៕

The post ស្តូប​និគមជន​បុរី​អូរស្វាយ មាន​ប្រវត្តិ​អតីត​ព្រះមហាក្សត្រ​ខ្មែរ​នាំ​ពលរដ្ឋ​មក​ពី​ស្រុក​ក្រោម​បង្កើត​មូលដ្ឋាន​រស់នៅ​ដើម្បី​ការពារ​ទឹកដី appeared first on Kampuchea Thmey Daily.

លោក រឿន ភិរុណ ប្រធានការិយាល័យរដ្ឋបាលមន្ទីរទេសចរណ៍ខេត្តរតនគិរី​បាន​ឲ្យ​ដឹង​ថា នៅ​លើ​ភ្នំ​ឥសី​បតមៈឬភ្នំស្វាយ ក្រៅ​តែ​ជា​ទីតាំង​ទី​សក្ការ​ដែល​កំពុង​មាន​ការ​សាងសង់​ព្រះពុទ្ធ​បដិមា​ដ៏​ខ្ពស់​ស្កឹមស្កៃ ក៏ជា​កន្លែង​សក្តិសមបំផុត​សម្រាប់​ការទស្សនាទេសភាព​ថ្ងៃរះ និង​ថ្ងៃលិច ជាមួយ​នឹង​ខ្យល់​អាកាស​ដ៏​បរិសុទ្ធ។

លោក​​ថា ​ភ្នំ​នេះ​ជា​ចំណុចកំពូលខ្ពស់ជាងគេនៅក្នុងក្រុង ​ដែល​អាច​ឱ្យភ្ញៀវ​ទេសចរ​គយគន់​ទេសភាព​ក្រុងបានលុង​ទាំង​មូល និង​មើល​ឃើញ​ទិដ្ឋភាព​ឆ្ងាយ​រហូត​ដល់​ជើងមេឃ។

ទីតាំងភ្នំ​នេះ​គឺជាចំណុចពិសេស​បំផុតមួយ​ដែល​ភ្ញៀវទេសចរ​មិនគួររំលង​ឡើយ នៅពេល​ធ្វើ​ដំណើរ​មកកម្សាន្តនៅខេត្តរតនគិរី ដើម្បីបានគយគន់ទេសភាព ស្រូបយកខ្យល់អាកាសបរិសុទ្ធ និង​គោរពបូជា។ ជា​រៀងរាល់​ថ្ងៃមាន​ភ្ញៀវទេសចរ​យ៉ាងតិច​ប្រមាណជា​ង ១០០ នាក់ និង​អាច​កើន​ឡើង​ដល់ ៤០០ ទៅ ៥០០ នាក់ មកកម្សាន្តនៅពេលរសៀលឬពេលថ្ងៃ​ជិត​លិច ដើម្បី​ទស្សនា​ទេសភាព​ផងនិង​គោរព​បូជា​ផង។

បើតាមលោក រឿន ភិរុណ ថ្នាក់ដឹកនាំ​ខេត្ត​តែងតែ​យកចិត្តទុកដាក់​រៀបចំ​ទីតាំងនេះ ​ឱ្យក្លាយ​ជា​តំបន់​រមណីយដ្ឋាន​ទេសចរណ៍​ដ៏​ទាក់ទាញសម្រា​ប់ភ្ញៀវជាតិ អន្តរជាតិ និង​ជាពិសេស​គឺ​ពុទ្ធបរិស័ទ៕

The post ភ្នំឥសីបតមៈ ជាចំណុច​កំពូល​ខ្ពស់​ជាង​គេ​អាច​ឱ្យ​ទេសចរ​គយគន់​ក្រុង​បានលុង​ ឆ្ងាយ​ផុត​ជើង​មេឃ appeared first on Kampuchea Thmey Daily.