ព័ត៌មានជាតិ

ស្តូបនិគមជនបុរីអូរស្វាយ មានប្រវត្តិអតីតព្រះមហាក្សត្រខ្មែរនាំពលរដ្ឋមកពីស្រុកក្រោមបង្កើតមូលដ្ឋានរស់នៅដើម្បីការពារទឹកដី

បានផុស

៣ ខែ មុន

នៅ

ថ្ងៃអង្គារ ១៤ មេសា ២០២៦

ដោយ

លោក ភោគ សុវិសិដ្ឋ អភិបាលរងស្រុកបុរីអូរស្វាយសែនជ័យ ខេត្តស្ទឹងត្រែងបានរៀបរាប់ពីប្រវត្តិ និងការកកើតស្រុកបុរីអូរស្វាយ ដែលពីមុនមកតំបន់នេះមិនទាន់ត្រូវបានបង្កើតជាស្រុកនោះទេដោយគេហៅថា “និគមជនបុរីអូរស្វាយ”។

ពាក់ព័ន្ធប្រវត្តិតំបន់នេះ លោក ភោគ សុវិសិដ្ឋ បានបញ្ជាក់ថា ព្រះករុណាព្រះបរមរតនកោដ្ឋព្រះបាទនរោត្តម សីហនុ កាលជំនាន់ព្រះអង្គដឹកនាំប្រទេសបាននាំយកប្រជាពលរដ្ឋពីស្រុកក្រោម ឲ្យមករស់នៅតាមបណ្តោយព្រំដែនក្នុងគោលបំណងដើម្បីការពារទឹកដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភោគ សុវិសិដ្ឋ អភិបាលរងស្រុកបុរីអូរស្វាយសែនជ័យ

«ព្រះអង្គបានយកព្រះទ័យទុកដាក់យ៉ាងខ្លាំងដោយបានសាងសង់ផ្ទះ ចែកដីភូមិ ដីកសិកម្ម ព្រមទាំងផ្តល់ពូជស្រូវ និងពូជបន្លែផ្សេងៗជូនប្រជាពលរដ្ឋសម្រាប់ធ្វើការដាំដុះ»។

បន្ថែមពីនេះ លោកអភិបាលរងស្រុកបានបង្ហាញពីសំណង់ប្រវត្តិសាស្រ្តស្ដូបអនុស្សាវរីយ៍នៅទឹកដីស្រុកបុរីអូស្វាយជាប់ព្រំដែនឡាវ។

លោកថា សំណង់នេះសាងសង់ឡើងនៅឆ្នាំ ១៩៦៦ ស្ថិតនៅក្នុងផែនការ ៥ ឆ្នាំ (១៩៦៤-១៩៦៨) ក្រោមស្នាព្រះហស្តព្រះករុណាព្រះបរមរតនកោដ្ឋព្រះបាទនរោត្តម សីហនុ ។

នៅឆ្នាំ ២០២៣ ព្រះបរមរាជវាំងបានធ្វើការជួសជុលនិងកែលម្អស្ដូបនេះឡើងវិញ ខណៈពីមុនស្ដូបមានសភាពបាក់បែកខ្លះ ដោយមានការជួសជុលខឿន លាបថ្នាំ បន្ថែមការរៀបចំសួនច្បារយ៉ាងស្រស់ស្អាត។

ខណៈបច្ចុប្បន្នទីតាំងត្រូវបានគ្រប់គ្រងដោយរដ្ឋបាលស្រុកបុរីអូរស្វាយសែនជ័យ បើតាមលោកអភិបាលរងស្រុក តំបន់ប្រវត្តិសាស្រ្តនេះបានក្លាយជាកន្លែងទាក់ទាញភ្ញៀវទេសចរទាំងជាតិ និងអន្តរជាតិ ដែលតែងតែមកលេងកម្សាន្តជាហូរហែ។ សកម្មភាពទេសចរមកកម្សាន្តមានដូចជា ការទស្សនាស្ដូបអនុស្សាវរីយ៍ ជិះទូកតាមដងទន្លេមើលព្រៃលិចទឹក បោះតង់តាមឆ្នេរខ្សាច់និងតាមកោះ ព្រមទាំងការស្ទូចត្រីជាដើម៕