ព័ត៌មានជាតិ

ភ្នំឥសីបតមៈ ជាចំណុចកំពូលខ្ពស់ជាងគេអាចឱ្យទេសចរគយគន់ក្រុងបានលុង ឆ្ងាយផុតជើងមេឃ

បានផុស

២ ខែ មុន

នៅ

ថ្ងៃចន្ទ ១៣ មេសា ២០២៦

ដោយ

ភ្នំឥសីបតមៈ ឬភ្នំស្វាយ មានទីតាំងស្ថិតនៅមិនឆ្ងាយប៉ុន្មានពីប្រជុំជនក្រុងបានលុងក្នុងខេត្តរតនគិរី។ ទីនោះក្រៅពីមានព្រះពុទ្ធបដិមាដ៏ធំស្កឹមស្កៃដែលកំពុងសាងសង់នៅលើកំពូលភ្នំ ក៏ជាចំណុចកំពូលខ្ពស់ជាងគេដែលអាចភ្ញៀវទេសចរគយគន់ទេសភាពក្រុងបានលុងទាំងមូល និងមើលឃើញទិដ្ឋភាពឆ្ងាយរហូតដល់ជើងមេឃ។

លោក រឿន ភិរុណ ប្រធានការិយាល័យរដ្ឋបាលមន្ទីរទេសចរណ៍ខេត្តរតនគិរីបានឲ្យដឹងថា នៅលើភ្នំឥសីបតមៈឬភ្នំស្វាយ ក្រៅតែជាទីតាំងទីសក្ការដែលកំពុងមានការសាងសង់ព្រះពុទ្ធបដិមាដ៏ខ្ពស់ស្កឹមស្កៃ ក៏ជាកន្លែងសក្តិសមបំផុតសម្រាប់ការទស្សនាទេសភាពថ្ងៃរះ និងថ្ងៃលិច ជាមួយនឹងខ្យល់អាកាសដ៏បរិសុទ្ធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា ភ្នំនេះជាចំណុចកំពូលខ្ពស់ជាងគេនៅក្នុងក្រុង ដែលអាចឱ្យភ្ញៀវទេសចរគយគន់ទេសភាពក្រុងបានលុងទាំងមូល និងមើលឃើញទិដ្ឋភាពឆ្ងាយរហូតដល់ជើងមេឃ។

ទីតាំងភ្នំនេះគឺជាចំណុចពិសេសបំផុតមួយដែលភ្ញៀវទេសចរមិនគួររំលងឡើយ នៅពេលធ្វើដំណើរមកកម្សាន្តនៅខេត្តរតនគិរី ដើម្បីបានគយគន់ទេសភាព ស្រូបយកខ្យល់អាកាសបរិសុទ្ធ និងគោរពបូជា។ ជារៀងរាល់ថ្ងៃមានភ្ញៀវទេសចរយ៉ាងតិចប្រមាណជាង ១០០ នាក់ និងអាចកើនឡើងដល់ ៤០០ ទៅ ៥០០ នាក់ មកកម្សាន្តនៅពេលរសៀលឬពេលថ្ងៃជិតលិច ដើម្បីទស្សនាទេសភាពផងនិងគោរពបូជាផង។

បើតាមលោក រឿន ភិរុណ ថ្នាក់ដឹកនាំខេត្តតែងតែយកចិត្តទុកដាក់រៀបចំទីតាំងនេះ ឱ្យក្លាយជាតំបន់រមណីយដ្ឋានទេសចរណ៍ដ៏ទាក់ទាញសម្រាប់ភ្ញៀវជាតិ អន្តរជាតិ និងជាពិសេសគឺពុទ្ធបរិស័ទ៕