ព័ត៌មានជាតិ

ខេត្តរតនគិរី សំបូរតំបន់អេកូទេសចរណ៍ តែខ្វះការវិនិយោគ

បានផុស

៣ ខែ មុន

នៅ

ថ្ងៃសុក្រ ១៧ មេសា ២០២៦

ដោយ

ខេត្តរតនគិរីមានសក្តានុពលអេកូទេសចរណ៍ទាំងធម្មជាតិ និងវប្បធម៌ជនជាតិដើមភាគតិច ប៉ុន្តែមិនទាន់មានការវិនិយោគធំដុំនៅឡើយទេ។ នេះបើតាមការគូសបញ្ជាក់ពីលោក ញ៉ែម សំអឿន អភិបាលនៃគណៈអភិបាលខេត្តរតនគិរី។

តំបន់អេកូទេសចរណ៍មួយចំនួនក្នុងខេត្តធ្លាប់មានអ្នកមានបំណងចង់វិនិយោគ ប៉ុន្តែដោយសារមានបញ្ហាមួយចំនួនក៏បានដកខ្លួនទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបានឲ្យដឹងថា គោលដៅទេសចរណ៍សំខាន់ៗក្នុងខេត្តមានដូចជា បឹងយក្សឡោម បឹងលំកុត និងទឹកធ្លាក់ជាច្រើនកន្លែងផ្សេងទៀត ស្ថិតនៅក្រោមការគ្រប់គ្រងរបស់ក្រសួងបរិស្ថាន ហើយត្រូវបានប្រគល់សិទ្ធិឲ្យសហគមន៍មូលដ្ឋានជាអ្នកអភិវឌ្ឍន៍ដូចជាករណីបឹងយក្សឡោមជាដើម។

ដោយសារសហគមន៍ខ្វះខាតធនធានថវិកាក្នុងការអភិវឌ្ឍ និងចំណេះដឹងនៅមានកម្រិត អាជ្ញាធរខេត្តចង់ឃើញមានការវិនិយោគពីវិស័យឯកជនដោយភ្ជាប់ការថែរក្សាធនធានធម្មជាតិ និងវប្បធម៌ជនជាតិដើមភាគតិច។ លោក ញ៉ែម សំអឿន បញ្ជាក់។

«ការវិនិយោគប្រភេទនេះនឹងផ្តល់ឱកាសការងារដល់កូនចៅជនជាតិភាគតិចនៅនឹងកន្លែងផ្ទាល់ និងជួយលើកស្ទួយដល់ការអភិរក្សប្រពៃណីរបស់ជនជាតិដើមភាគតិចដូចជា ការស្លៀកពាក់ ទំនៀមទម្លាប់ការរស់នៅ និងផលិតផលអត្តសញ្ញាណដូចជាការផលិតស្រាពាងជាដើម»។ លោក ញ៉ែម សំអឿន បន្ថែម។

លោកអភិបាលខេត្តបន្តថា ស្រាពាងរបស់សហគមន៍ត្រូវបានចុះបញ្ជីជាផ្លូវការនៅក្នុងចលនាភូមិមួយផលិតផលមួយរួចរាល់ហើយ។

ពាក់ព័ន្ធកិច្ចការអភិវឌ្ឍនេះដែរ លោក ញ៉ែម សំអឿន បានលើកឡើងពីការផ្លាស់ប្តូរផ្នត់គំនិតរបស់សហគមន៍ជនជាតិភាគតិច ដែលកាលពីមុនធ្លាប់មានការជំទាស់នឹងការអភិវឌ្ឍឬអ្នកវិនិយោគខាងក្រៅ ដោយសារតែមានការចាក់រុកពីអ្នកដទៃ ប៉ុន្តែនាពេលបច្ចុប្បន្ននេះសហគមន៍បានផ្លាស់ប្តូរគំនិតនិងគាំទ្រទាំងស្រុង ដោយពួកគេត្រៀមខ្លួនរួចជាស្រេចក្នុងការចូលរួមសហការជាមួយវិស័យឯកជនក្នុងការអភិវឌ្ឍ ប្រសិនបើមានអ្នកវិនិយោគទាំំងនោះដើរតាមគន្លងនៃការអភិរក្សវប្បធម៌និងធម្មជាតិរបស់ពួកគេ៕