បោះឆ្នោត Archives - Kampuchea Thmey Daily

ការស្ទង់មតិ៖ គណបក្ស លោកស្រី តាកាអ៊ិឈិ ទំនងឈ្នះឆ្នោតនៅសប្តាហ៍ក្រោយ

Minea Neu — Mon, 02 Feb 2026 02:55:26 +0000

គណបក្សប្រជាធិបតេយ្យសេរី (Liberal Democratic Party (LDP)) របស់នាយករដ្ឋមន្ត្រីជប៉ុន លោកស្រី សាណាអេ តាកាអ៊ិឈិ [Sanae Takaichi] ទំនងជាទទួលបានជ័យជម្នះភ្លូកទឹកភ្លូកដី នៅក្នុងការបោះឆ្នោតសភាជាន់ទាបនៅសប្តាហ៍ក្រោយ។ នេះបើតាម ការស្ទង់មតិដោយកាសែត Asahi ចេញផ្សាយកាលពីថ្ងៃអាទិត្យ ទី១ខែកុម្ភៈ។

លោកស្រី សាណាអេ តាកាអ៊ិឈិ។ Reuters

ការបង្ហាញពីសក្តានុពលនៅក្នុងការស្ទង់មតិមុនបោះឆ្នោតផ្លូវការកាលពីថ្ងៃអាទិត្យ នឹងពង្រឹងការក្តាប់អំណាចរបស់លោកស្រី តាកាអ៊ិឈិ លើគណបក្សរបស់ខ្លួន ជាពិសេសផ្តល់នូវអាណត្តិមួយសម្រាប់គោលនយោបាយ ពង្រីកសារពើពន្ធ ដែលអាចបង្កើនការព្រួយបារម្ភពីហិរញ្ញវត្ថុរបស់ប្រទេសជប៉ុន និងជំរុញអត្រាការប្រាក់សញ្ញាបណ្ណឱ្យកាន់តែខ្ពស់។

ការស្ទង់មតិរបស់ Asahi បានឱ្យដឹងទៀតថា គណបក្សប្រជាធិបតេយ្យសេរី(LDP)របស់ លោកស្រី តាកាអ៊ិឈិ ទំនងជាមានអាសនៈច្រើន លើស២៣៣អាសនៈ ក្នុងចំណោមអាសនៈចំនួន ៤៦៥ ដើម្បីដណ្តើមយកកៅអីក្នុងសភា កើនឡើងពីចំនួន ១៩៨ អាសនៈ បច្ចុប្បន្ន។

ការស្ទង់មតិបានបង្ហាញទៀតថា ការរួមគ្នានឹងដៃគូសម្ព័ន្ធរបស់គណបក្សប្រជាធិបតេយ្យសេរី គឺគណបក្ស Japan Innovation Party ឬ Ishin ជាសម្ព័ន្ធភាពដែលកំពុងកាន់អំណាចទំនងជានឹងឈានដល់ ៣០០ អាសនៈ។

ការឈ្នះរបស់គណបក្សប្រជាធិបតេយ្យសេរី នឹងពង្រឹងការកាន់អំណាចរបស់ លោកស្រី តាកាអ៊ិឈិ បន្ថែមទៀត។

លោក Keisuke Tsuruta អ្នកយុទ្ធសាស្រ្តជាន់ខ្ពស់នៅក្រុមហ៊ុន Mitsubishi UFJ Morgan Stanley Securities លើកឡើងថា៖«វាមិនមែនគួរឱ្យភ្ញាក់ផ្អើលម្រាប់ទីផ្សារក្នុងការមើលឃើញនូវឱកាសខ្ពស់ របស់លោកស្រី ដើម្បីបន្តគោលនយោបាយសារពើពន្ធ រួមទាំងការកាត់បន្ថយពន្ធលើការប្រើប្រាស់ផ្សេងទៀតផងដែរ»។

កាសែត Asahi បានបន្តទៀតថា គណបក្សប្រឆាំងដ៏ធំបំផុត គឺសម្ព័ន្ធកំណែទម្រង់កណ្តាល [Centrist Reform Alliance] កំពុងធ្លាក់សន្លឹកឆ្នោត ហើយអាចបាត់បង់ពាក់កណ្តាលនូវចំនួនអាសនៈ ១៦៧ របស់ខ្លួន។

គួរបញ្ជាក់ថា សម្ព័ន្ធគ្រប់គ្រងរបស់ លោកស្រី តាកាអ៊ិឈិ បច្ចុប្បន្នមានសំឡេងគាំទ្រច្រើនក្នុងសភាជាន់ទាប ប៉ុន្តែមានសំឡេងតិចនៅក្នុងសភាជាន់ខ្ពស់។

មិនតែប៉ុណ្ណោះ ប្រទេសជប៉ុនបានទទួលរងនូវបញ្ហាទីផ្សារយ៉ាងខ្លាំងកាលពីខែមុន បន្ទាប់ពី លោកស្រី តាកាអ៊ិឈិ បានសន្យាថានឹងផ្អាកការយកពន្ធ ៨ភាគរយ លើការលក់អាហារក្នុងរយៈពេលពីរឆ្នាំ។ ការណ៍នេះ ធ្វើឱ្យមានការព្រួយបារម្ភពីវិនិយោគិនឡើងវិញ ចំណែកសារពើពន្ធនៅក្នុងប្រទេសមានបំណុលសាធារណៈច្រើនជាងទំហំសេដ្ឋកិច្ចរបស់ខ្លួនដល់ទៅពីរដង។

ចំណែក ភាគីផ្សេងទៀតក៏បានអំពាវនាវឱ្យមានការផ្អាក ឬកាត់បន្ថយលើពន្ធរបស់ប្រើប្រាស់ ដើម្បីទប់ស្កាត់ផលប៉ះពាល់ដល់ពលរដ្ឋ ពីការកើនឡើងថ្លៃរស់នៅប្រចាំថ្ងៃ៕

ប្រែសម្រួល៖ ណឺ មិនា

The post ការស្ទង់មតិ៖ គណបក្ស លោកស្រី តាកាអ៊ិឈិ ទំនងឈ្នះឆ្នោតនៅសប្តាហ៍ក្រោយ appeared first on Kampuchea Thmey Daily.

អាជ្ញាធរអំពាវនាវពលរដ្ឋទៅធ្វើបច្ចុប្បន្នភាពបញ្ជីឈ្មោះបោះឆ្នោត ខណៈនៅតែ ០៧ ថ្ងៃទៀតប៉ុណ្ណោះ នឹងត្រូវបញ្ចប់

អ៊ិន ពិសី — Mon, 19 May 2025 07:11:39 +0000

អាជ្ញាធរនៅថ្នាក់មូលដ្ឋាន សង្កាត់ បន្តអំពាវនាវប្រជាពលរដ្ឋនាំគ្នាទៅធ្វើបច្ចុប្បន្នភាពបញ្ជីឈ្មោះបោះឆ្នោតឱ្យបានគ្រប់ៗ គ្នា ខណៈថ្ងៃបញ្ចប់កាន់តែកៀកចូលមកដល់។

លោក ហេង ចាន់ណារិន ចៅសង្កាត់មិត្តភាព ជាសង្កាត់មួយ នៃរដ្ឋបាលខណ្ឌ ៧ មករា បានឱ្យដឹងថា ការធ្វើបច្ចុប្បន្នភាពទិន្នន័យជីវមាត្រក្នុងបញ្ជីឈ្មោះបោះឆ្នោតសម្រាប់ឆ្នាំ ២០២៥ នេះ គឺធ្វើឡើងពេញ ២៦ ថ្ងៃ តែម្ដង មិនគិតពីថ្ងៃសៅរ៍-អាទិត្យ ឬថ្ងៃបុណ្យឈប់សម្រាកនោះឡើយ ដោយមានក្រុមការងារសង្កាត់ប្រចាំការពេញ ២៦ ថ្ងៃ។

លោកចៅសង្កាត់ បានអំពាវនាវប្រជាពលរដ្ឋ ក៏ដូចជាអាណាព្យាបាលមានកូនគ្រប់អាយុ សូមអញ្ជើញទៅចុះឈ្មោះ និងពិនិត្យបញ្ជីឈ្មោះ ដើម្បីធ្វើបច្ចុប្បន្នភាពទិន្នន័យឱ្យបានត្រឹមត្រូវ ត្រៀមខ្លួនសម្រាប់ការចូលរួមបោះឆ្នោតនៅពេលខាងមុខទាំងអស់គ្នា។

លោក រឿន រ៉ាវី ប្រជាពលរដ្ឋ យល់ឃើញថា ការមកធ្វើបច្ចុប្បន្នភាពនេះ គឺជាកាតព្វកិច្ចក្នុងនាមពលរដ្ឋល្អក្នុងសង្គមជាតិ ដែលចាំបាច់មកបំពេញ ជៀសវាងការខុសទិន្នន័យណាមួយ ដើម្បីធ្វើការកែសម្រួល ឬផ្លាស់ប្ដូរទិន្នន័យថ្មីឱ្យហើយរួចរាល់ផងដែរ ដើម្បីភាពងាយស្រួលពេលបោះឆ្នោត ទិន្នន័យត្រឹមត្រូវ។

លោកបន្តទៀតថា ពេលមកត្រួតពិនិត្យចុះឈ្មោះបោះឆ្នោត មន្ត្រីមានការរាក់ទាក់ ទទួល និងផ្ដល់ជូននូវព័ត៌មាន បង្កភាពងាយស្រួល លឿនរហ័ស ជូនដល់ប្រជាពលរដ្ឋ។

សូមបញ្ជាក់ថា ការធ្វើបច្ចុប្បន្នភាពទិន្នន័យជីវមាត្រក្នុងបញ្ជីឈ្មោះបោះឆ្នោតឆ្នាំ ២០២៥ នេះ នឹងធ្វើឡើងរយៈពេល ២៦ ថ្ងៃ គិតចាប់ពីថ្ងៃទី ០១ ដល់ថ្ងៃទី ២៦ ខែឧសភា ឆ្នាំ ២០២៥ ខាងមុខ។ គិតត្រឹមថ្ងៃទី ១៩ ឧសភានេះ គឺនៅសល់តែរយៈពេល ០៧ ថ្ងៃទៀតប៉ុណ្ណោះ នឹងចូលដល់ថ្ងៃបញ្ចប់៕

អត្ថបទ ៖ សុភា

The post អាជ្ញាធរអំពាវនាវពលរដ្ឋទៅធ្វើបច្ចុប្បន្នភាពបញ្ជីឈ្មោះបោះឆ្នោត ខណៈនៅតែ ០៧ ថ្ងៃទៀតប៉ុណ្ណោះ នឹងត្រូវបញ្ចប់ appeared first on Kampuchea Thmey Daily.

បោះឆ្នោតជ្រើសរើសប្រធានការិយាល័យប្រជាពលរដ្ឋដើម្បីសម្របសម្រួលដោះស្រាយបណ្ដឹងក្រៅ ប្រព័ន្ធតុលាការ

Sokhom Khon — Fri, 09 May 2025 06:40:19 +0000

រដ្ឋបាលរាជធានីភ្នំពេញ បានធ្វើការបោះឆ្នោតជ្រើសរើសប្រធានការិយាល័យប្រជាពលរដ្ឋចំនួន១រូប ដើម្បីបំពេញការងារនៅការិយាល័យប្រជាពលរដ្ឋរាជធានីភ្នំពេញ ក្នុងតួនាទីទទួល និងសម្របសម្រួលដោះស្រាយបណ្ដឹងក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ ការគ្រប់គ្រងរដ្ឋបាលនៅថ្នាក់ក្រោមជាតិ ក្នុងគោលបំណងលើកកម្ពស់អភិបាលកិច្ចល្អក្នុងការផ្តល់សេវា និងការអភិវឌ្ឍសេដ្ឋកិច្ចមូលដ្ឋានប្រកបដោយតម្លាភាព គណនេយ្យភាព និងប្រសិទ្ធភាព សំដៅបង្កើនជំនឿទុកចិត្តរបស់ប្រជាពលរដ្ឋនៅមូលដ្ឋាន។

ការបោះឆ្នោតនេះ បានធ្វើឡើងនាព្រឹកថ្ងៃទី០៩ ខែឧសភា ឆ្នាំ២០២៥ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក កេីត ឆែ អភិបាលរង និងជាតំណាងលោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅសាលារាជធានីភ្នំពេញ។

គណៈកម្មាធិការនៃការបោះឆ្នោតនាព្រឹកនេះ មានចំនួន៣៥រូប លើ៤២រូប ដែលសមាសភាពគណៈកម្មាធិការនេះមកពីក្រុមប្រឹក្សារាជធានីភ្នំពេញ សមាគមក្រុមប្រឹក្សាខណ្ឌ សង្កាត់ រាជធានីភ្នំពេញ តំណាងសភាពាណិជ្ជកម្មកម្ពុជា និងតំណាងអង្គការ-សមាគមសង្គមស៊ីវិលជាតិក្នុងស្រុក។ បេក្ខជននៃការបោះឆ្នោតនេះ មានចំនួន២រូប គឺលោក ឌី រតនា និងលោក លន់ សុភាព។ ចំពោះលទ្ធផលនៃការបោះឆ្នោតបានទៅលើលោក លន់ សុភាព ដែលមានសំលេងឆ្នោតចំនួន២៤លើ១១សំលេង។

គួរបញ្ជាក់ថា លោក ឌី រតនា អាយុ៣៩ឆ្នាំ ឈរលេខរៀងទី១ មានកំរិតវប្បធម៌ ថ្នាក់បតិញ្ញាបត្រជាន់ខ្ពស់ «គ្រប់គ្រង និងផែនការអប់រំ» និងទី២ លោក លន់ សុភាព អាយុឆ្នាំ៣៩ឆ្នាំ ឈរលេខរៀងទី២ មានកំរិតវប្បធម៌ថ្នាក់បរិញ្ញាបត្រសង្គមសាស្រ្ត និងមនុស្សសាស្ត្រ និងនិតិសាស្រ្ត៕

អត្ថបទ៖ ស្រីរ័ត្ន

The post បោះឆ្នោតជ្រើសរើសប្រធានការិយាល័យប្រជាពលរដ្ឋដើម្បីសម្របសម្រួលដោះស្រាយបណ្ដឹងក្រៅ ប្រព័ន្ធតុលាការ appeared first on Kampuchea Thmey Daily.

ចំអកឱ្យក្រុមប្រឆាំង សម្ដេច ហ៊ុន ម៉ាណែត ថា ៥ឆ្នាំម្ដងពលរដ្ឋខ្មែរក្រោកឈរទៅបោះឆ្នោតរើសមេដឹកនាំ

Thoeun Vansong — Tue, 11 Mar 2025 05:15:42 +0000

៥ឆ្នាំម្ដង ប្រជាពលរដ្ឋខ្មែរនឹងក្រោកឈរឡើងទៅបោះឆ្នោតជ្រើសរើសមេដឹកនាំ តាមឆន្ទៈរៀងៗខ្លួនដើម្បីឱ្យដឹកនាំប្រទេសជាតិមានការអភិវឌ្ឍរីកចម្រើន។ នេះជាសាររបស់នាយករដ្ឋមន្ត្រីក្នុងតំណែងរបស់កម្ពុជា សម្ដេចធិបតី ហ៊ុន ម៉ាណែត ផ្ដាំទៅដល់ក្រុមនិន្នាការប្រឆាំងជ្រុលនិយមនៅក្រៅប្រទេស ដែលតែងតែអំពាវនាវឱ្យប្រជាពលរដ្ឋក្រោកឈរប្រឆាំងនឹងរាជរដ្ឋាភិបាលស្របច្បាប់ កើតចេញពីការបោះឆ្នោត។

ក្រុមនិន្នាការប្រឆាំង ដែលមានអ្នកនយោបាយចាស់វស្សានៅក្រៅប្រទេស ជាអ្នកដឹកមុខ តែងតែយកបញ្ហាអសកម្មនៅក្នុងសង្គមមកញុះញង់ឱ្យប្រជាពលរដ្ឋខ្មែរក្រោកឈរប្រឆាំងរាជរដ្ឋាភិបាល ក៏ប៉ុន្តែសម្ដេចធិបតី ហ៊ុន ម៉ាណែត បានគូសបញ្ជាក់ថា នេះមិនមែនជាទង្វើប្រជាធិបតេយ្យនោះទេ។

ថ្លែងពីវេទិកាប្រគល់សញ្ញាបត្រជូនដល់និស្សិត នាព្រឹកថ្ងៃទី១១ ខែមីនា ឆ្នាំ២០២៥ សម្តេចធិបតី ហ៊ុន ម៉ាណែត បានអះអាងយ៉ាងច្បាស់ថា កម្ពុជាអនុវត្តរបបលទ្ធិប្រជាធិបតេយ្យ សេរីពហុបក្ស ដែលមានការបោះឆ្នោតយ៉ាងទៀងទាត់រៀងរាល់៥ឆ្នាំម្តង។ ដូច្នេះ ប្រជាពលរដ្ឋខ្មែរនឹងក្រោកឈរឡើងដើម្បីទៅបោះឆ្នោតរៀងរាល់៥ឆ្នាំម្តង មិនមែនក្រោកឈរដើម្បីផ្តួលរំលំរដ្ឋអំណាចនោះឡើយ។

សម្ដេចធិបតី ថ្លែងដូច្នេះថា៖ «អ្នកខ្លះ ជាពិសេសអ្នកនៅក្រៅ ឱ្យតែអីបន្តិចយករឿង ដែលមិនចំណុចល្អ ដែលខ្លាំងពេលនេះ យកមក ហើយតែងតែភ្ជាប់ នៅដល់ណាទៀត ក្រោកឈរឡើង ហឹម… ៥ឆ្នាំ ក្រោកឈរទៅបោះឆ្នោតម្ដង»។

សម្ដេចធិបតី នាយករដ្ឋមន្ត្រី បន្តលើកឡើងបែបហួសចិត្តថា នៅប្រទេសប្រជាធិបតេយ្យ ពលរដ្ឋបោះឆ្នោតរួចហើយ នឹងទុកលទ្ធភាពឱ្យគណបក្សដែលឈ្នះឆ្នោត ដើម្បីបន្តដឹកនាំប្រទេស តាមអាណត្តិកំណត់ដោយច្បាប់ ក៏ប៉ុន្តែសម្រាប់កម្ពុជា បក្សដែលចាញ់ឆ្នោត តែងព្យាយាមប្រើមធ្យោបាយមិនមែនតាមបែបប្រជាធិបតេយ្យ ពោលគឺរុញចលនាពលរដ្ឋឱ្យបះបោរក្រោយពេលបោះឆ្នោតទៅវិញ។

សម្តេចធិបតី ហ៊ុន ម៉ាណែត បានបញ្ជាក់ថា រដ្ឋាភិបាលប្រទេសណាក៏ដោយ ក៏តែងតែមានបញ្ហាប្រឈមជានិច្ច ជាពិសេសបញ្ហាទូទៅនៅក្នុងសង្គម ដែលត្រូវដោះស្រាយ ហើយរាជរដ្ឋាភិបាល ខិតខំប្រឹងប្រែងដើម្បីដោះស្រាយរាល់សំណូមពររបស់ប្រជាពលរដ្ឋផងដែរ៕

អត្ថប៖ ធឿន វ៉ាន់សុង

The post ចំអកឱ្យក្រុមប្រឆាំង សម្ដេច ហ៊ុន ម៉ាណែត ថា ៥ឆ្នាំម្ដងពលរដ្ឋខ្មែរក្រោកឈរទៅបោះឆ្នោតរើសមេដឹកនាំ appeared first on Kampuchea Thmey Daily.

លោក វង្សី វិស្សុត ឱ្យក្រុមការងារចុះមូលដ្ឋានបក្សប្រជាជនកម្ពុជាពង្រឹងការចុះមូលដ្ឋាន ដើម្បីបន្តឈ្នះការបោះឆ្នោតឆ្នាំ២០២៧ និង២០២៨

Ngoeul Narath — Thu, 02 Jan 2025 09:35:34 +0000

ក្នុងការប្តេជ្ញាបន្តចូលរួមបំពេញតួនាទីភារកិច្ចជូនគណបក្សប្រជាជនកម្ពុជា លោក វង្សី វិស្សុត សមាជិកគណៈអចិន្ត្រៃយ៍នៃគណៈកម្មាធិការកណ្តាល និងជាប្រធានគណៈកម្មាធិការគណបក្សទីស្ដីការគណៈរដ្ឋមន្ត្រី បានដាក់ចេញទិសដៅការងារបន្តចំនួន១២ចំណុចសំខាន់ៗ ក្នុងនោះលោកបានណែនាំឱ្យសមាជិក សមាជិកា នៃគណៈអចិន្ត្រៃយ៍គណៈកម្មាធិការគណបក្សទីស្ដីការគណៈរដ្ឋមន្ត្រី បន្តពង្រឹងការចុះមូលដ្ឋាននិងលើកទឹកចិត្តដល់ក្រុមការងារគណបក្សចុះជួយខេត្តកំពង់ធំ និងតាមរាជធានីខេត្តមួយចំនួនទៀត ដើម្បីបន្តយកប្រៀបឈ្នះក្នុងការបោះឆ្នោតក្រុមប្រឹក្សាឃុំសង្កាត់ អាណត្តិទី៦ ឆ្នាំ២០២៧ និងការបោះឆ្នោតជ្រើសរើសតំណាងរាស្រ្តអាណត្តិទី៨ ឆ្នាំ២០២៨ខាងមុខ។

លោក វង្សី វិស្សុត ណែនាំដូច្នេះ ក្នុងពេលដឹកនាំកិច្ចប្រជុំគណៈកម្មាធិការគណបក្សទីស្ដីការគណៈរដ្ឋមន្ត្រីដែលមានការចូលរួមពីអនុប្រធាន សមាជិក សមាជិកា នៃគណៈអចិន្ត្រៃយ៍គណៈកម្មាធិការគណបក្សទីស្ដីការគណៈរដ្ឋមន្ត្រី នាព្រឹកថ្ងៃព្រហស្បតិ៍ ទី២ ខែមករា ឆ្នាំ២០២៥ នៅវិមាន៧មករា។

ក្រៅពីនេះ លោក វង្សី វិស្សុត ក្នុងរួមមាន បន្តពង្រឹងសាមគ្គីឯកភាពផ្ទៃក្នុង និងពង្រឹងជួរផ្ទៃក្នុងមន្ត្រីគណបក្ស, ខិតខំប្រព្រឹត្តអំពើល្អ ស្រឡាញ់យុត្តិធម៌ ជៀសវាងអំពើទាំងឡាយណាដែលប៉ះពាល់ដល់ប្រយោជន៍ប្រជាជន, បន្តធ្វើសកម្មភាពដោយតម្កល់ផលប្រយោជន៍ប្រជាជនជាធំ ឈរនៅខាងប្រជាជន និងរួមសុខរួមទុក្ខជាមួយប្រជាជននៅគ្រប់កាលៈទេសៈ, បន្តយកចិត្តទុកដាក់ពង្រឹងរចនាសម្ព័ន្ធ និងលើកកម្ពស់ប្រសិទ្ធភាពក្នុងការដឹកនាំ និងសម្រេចបានលទ្ធផលល្អ ក្នុងការងារកសាងពង្រឹងពង្រីកសមាជិក និងកម្លាំងគាំទ្រគណបក្ស។

ថ្លែងក្នុងឱកាសបើកកិច្ចប្រជុំ, លោក វង្សី វិស្សុត បានសម្តែងនូវគារវកិច្ចស្វាគមន៍ និងអបអរសាទរចំពោះ លោក សុខ ចិន្តាសោភា សមាជិកគណៈអចិន្ត្រៃយ៍នៃគណៈកម្មាធិការកណ្តាល ដែលត្រូវបានថ្នាក់ដឹកនាំគណបក្សប្រជាជនកម្ពុជា តែងតាំងជាអនុប្រធានគណៈកម្មាធិការគណបក្សទីស្តីការគណៈរដ្ឋមន្ត្រី។

បន្ទាប់ពីបានស្តាប់របាយការណ៍លទ្ធផលការងារគណបក្សទីស្តីការគណៈរដ្ឋមន្ត្រី ឆ្នាំ២០២៤ និងទិសដៅការងារបន្តឆ្នាំ២០២៥, លោក វង្សី វិស្សុត បានវាយតម្លៃខ្ពស់និងបានថ្លែងកោតសរសើរដល់ថ្នាក់ដឹកនាំ និងសមាជិក សមាជិកា ដែលបានខិតខំរួមគ្នាសម្រេចបានលទ្ធផលការងារជាច្រើនលើ ការងារនយោបាយ សតិអារម្មណ៍ និងចាត់តាំង, ការងារឃោសនាអប់រំ, ការងារត្រួតពិនិត្យ, ការងារហិរញ្ញវត្ថុ, ការងារចលនាមហាជន និងការងារយុវជន ព្រមទាំងបានចូលរួមអនុវត្តតួនាទីភារកិច្ចសំខាន់ៗដទៃទៀត ដែលគណបក្សប្រគល់ជូន បានយ៉ាងល្អប្រសើរ។

ជាមួយគ្នានេះ លោក វង្សី វិស្សុត បានផ្តល់អនុសាសន៍ដល់ថ្នាក់ដឹកនាំ និងសមាជិក សមាជិកាគណៈកម្មាធិការគណបក្សទីស្តីការគណៈរដ្ឋមន្ត្រី បន្តផ្សព្វផ្សាយអំពីសមិទ្ធផលនានារបស់រាជរដ្ឋាភិបាលលើគ្រប់វិស័យ ដែលទទួលបានពីការមានសន្តិភាពពេញលេញ និងនយោបាយឈ្នះឈ្នះ, ខិតខំចូលរួមអនុវត្តកម្មវិធីនយោបាយរបស់គណបក្សប្រជាជនកម្ពុជា សម្រាប់ការកសាងនិងការការពារមាតុភូមិឆ្នាំ២០២៣-២០២៨ និងយុទ្ធសាស្រ្តបញ្ចកោណ-ដំណាក់កាលទី១, ប្តេជ្ញាចូលរួមថែរក្សានិងការពារឱ្យបានសុខសន្តិភាព, បន្តគាំទ្រដោយឥតងាករេនិងគ្មានលក្ខខណ្ឌ ដើម្បីរួមចំណែកសម្រេចឱ្យបាននូវសមិទ្ធផលថ្មីៗបន្ថែមទៀតជូនប្រទេសជាតិនិងប្រជាជន ជាពិសេសការបន្តផ្តល់ការគាំទ្រដល់បេសកកម្មដ៏ឧត្តុង្គឧត្តមជាប្រវត្តិសាស្រ្តរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ឱ្យសម្រេចបានជោគជ័យ ក្នុងគោលដៅឈានឆ្ពោះទៅសម្រេចនូវចក្ខុវិស័យកម្ពុជាឆ្នាំ២០៥០។

គួរឱ្យដឹងថា កិច្ចប្រជុំគណៈកម្មាធិការគណបក្សទីស្ដីការគណៈរដ្ឋមន្ត្រី ផ្តោតលើរបៀបវារៈចំនួន៣គឺ៖ ១-សេចក្តីព្រាងរបាយការណ៍លទ្ធផលការងារគណបក្សរបស់គណៈកម្មាធិការគណបក្សទីស្តីការគណៈរដ្ឋមន្ត្រីឆ្នាំ២០២៤ និងលើកទិសដៅការងារបន្តឆ្នាំ២០២៥, ២-កែសម្រួលនិងបំពេញបន្ថែមសមាសភាពគណៈកម្មាធិការគណបក្សទីស្តីការគណៈរដ្ឋមន្ត្រី និង៣-បញ្ហាផ្សេងៗ៕

The post លោក វង្សី វិស្សុត ឱ្យក្រុមការងារចុះមូលដ្ឋានបក្សប្រជាជនកម្ពុជាពង្រឹងការចុះមូលដ្ឋាន ដើម្បីបន្តឈ្នះការបោះឆ្នោតឆ្នាំ២០២៧ និង២០២៨ appeared first on Kampuchea Thmey Daily.

សម្ដេចធិបតីថា ដោយសារបោះឆ្នោតមិនដែលឈ្នះទើប សម រង្ស៊ី ចង់យកលំនាំតាមបង់ក្លាដេស

hun sirivadh — Sat, 21 Dec 2024 05:32:44 +0000

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានថ្លែងដោយមិនចំឈ្មោះដោយហៅថា តាចាស់ម្នាក់នៅក្រៅប្រទេស ដែលទំនងជាសំដៅលើលោក សម រង្ស៊ី ថាមូលហេតុដែលទណ្ឌិតនេះចង់ឱ្យប្រជាពលរដ្ឋងើបបះបោរទម្លាក់រដ្ឋអំណាច ព្រោះគណបក្សគាត់មិនដែលបោះឆ្នោតឈ្នះបក្សប្រជាជននោះទេ។

ថ្លែងក្នុងពិធីប្រកាសខេត្តកំពង់ចាមបញ្ចប់ការវាស់វែងដីធ្លីមានលក្ខណៈជាប្រព័ន្ធ និងពិធីចែកបណ្ណកម្មសិទ្ធិដីធ្លី” នៅស្រុកស្ទឹងត្រង់ ខេត្តកំពង់ចាម ព្រឹកថ្ងៃសៅរ៍ ទី២១ ខែធ្នូ ឆ្នាំ២០២៤ សម្ដេចធិបតី ហ៊ុន ម៉ាណែត បានថ្លែងថា ក្ដីសង្ឃឹមរបស់លោក សម រង្ស៊ី ចាប់ផ្ដើមកើតឡើងខ្លាំង ក្រោយពីពលរដ្ឋបង់ក្លាដេសធ្វើបាតុកម្មទម្លាក់រដ្ឋអំណាចហើយអញ្ជើញមេបក្សប្រឆាំងបង់ក្លាដេសដែលភៀសខ្លួនទៅនៅបរទេសចូលមកដឹកនាំ ដែលនេះជាក្ដីស្រមៃរបស់អ្នកនយោបាយមិនដែលឈ្នះដូចលោក សម រង្ស៊ី ដែលបង្កើតឱ្យមានព្រឹត្តិការណ៍ ១៨សីហា។

សម្ដេចថា៖ «គាត់ចង់ធ្វើដូចបង់ក្លាដេស។ បង់ក្លាដេសគឺធ្វើឱ្យពលរដ្ឋយុវជនក្នុងប្រទេសងើបឡើងផ្ដួលរដ្ឋាភិបាលហើយតែផ្ដួលហើយទៅរកអ្នកណាមកដឹកនាំ? គេទៅដង្ហែអ្នកដែលភៀសខ្លួននៅក្រៅប្រទេសមកធ្វើជានាយករដ្ឋមន្ត្រី។ គាត់ចង់បានដូចគ្នាដែរ»។

សម្ដេចបន្ថែមថាបរាជ័យរបស់អ្នកនយោបាយនៅក្រៅប្រទេសម្នាក់នេះគឺដោយសារប្រជាជនភាគច្រើនផ្ដល់ការទុកចិត្ត និងគាំទ្រដល់គណបក្សប្រជាជនកម្ពុជា ព្រោះបក្សប្រជាជននៅជាមួយប្រជាពលរដ្ឋគ្រប់កាលៈទេសៈ និងមានភាពចាស់ទុំផ្នែកនយោបាយដែលខិតខំអនុវត្តន៍គោលនយោបាយពិតបម្រើប្រជាជន។

ជាមួយគ្នានេះសម្ដេចធិបតីនាយករដ្ឋមន្ត្រីក៏បានទទួលស្គាល់ថាការដឹកនាំក៏មានភាពខ្វះចន្លោះផងដែរ តែរដ្ឋាភិបាលមានការប្ដេជ្ញាចិត្តក្នុងការកែលម្អស្ថានភាពខ្វះចន្លោះកាន់តែល្អប្រសើរ និងអាចមើលឃើញបានតាមរយៈការគាំទ្ររបស់ប្រជាជន។

សម្ដេចបន្ថែមថា៖ «បោះឆ្នោត២០២៣ ប្រជាជន៦លាននាក់ជាងបោះឆ្នោតឱ្យគណបក្សប្រជាជនកម្ពុជាដើម្បីបន្តបម្រើប្រជាពលរដ្ឋនេះហើយគឺជាសក្ខីភាពជាក់ស្ដែង នេះហើយដែលលោកឯកនៅក្រៅប្រទេសមិនដែលឈ្នះ»។

សម្ដេចធិបតីអំពាវនាវដល់ប្រជាពលរដ្ឋបន្តទុកចិត្តការដឹកនាំរបស់បក្សប្រជាជន និងសូមកុំចូលរួមជាមួយការអំពាវនាវណាដែលធ្វើឱ្យបែកបាក់ប្រទេស។ សម្ដេចប្រាប់ពលរដ្ឋថា សូមរីករាយនឹងផ្ការីកនៃសន្ដិភាព ជាផ្ការីកនៃស្នាមញញឹម និងការអភិវឌ្ឍ ចៀសចេញពីផ្ការីកដែលបង្កប់ចលនាខឹងសម្បារបះបោប្រឆាំងរដ្ឋអំណាចដែលជាផ្ការីកនៃគ្រោះថ្នាក់ដល់ជាតិ៕

អត្តបទ៖ ហ៊ុន សិរិវឌ្ឍន៍

The post សម្ដេចធិបតីថា ដោយសារបោះឆ្នោតមិនដែលឈ្នះទើប សម រង្ស៊ី ចង់យកលំនាំតាមបង់ក្លាដេស appeared first on Kampuchea Thmey Daily.

លោក វង្សី វិស្សុត ដឹកនាំយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ខេត្តកំពង់ធំ

Sophal Tuon — Sat, 10 Feb 2024 08:29:31 +0000

នៅព្រឹកថ្ងៃទី១០ ខែកុម្ភៈ ឆ្នាំ២០២៤ គណបក្សប្រជាជនកម្ពុជា បើកយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ឆ្នាំ២០២៤ ក្រោមអធិបតីភាពលោក វង្សី វិស្សុត សមាជិកគណៈអចិន្ត្រៃយ៍គណៈកម្មាធិការកណ្តាល និង ជាប្រធានក្រុមការងារគណបក្សចុះមូលដ្ឋានខេត្តកំពង់ធំ និងលោក ជា ចាន់តូ ប្រធានកិត្តិយស ជាក្រុមការងារចុះជួយខេត្តកំពង់ធំ និងជាសមាជិកគណៈកម្មការអចិន្ត្រៃយ៍ របស់គណបក្សប្រជាជនកម្ពុជា គណៈប្រតិភូរាជធានីភ្នំពេញ ។

ថ្លែងនៅក្នុងកម្មវិធីនោះ លោក វង្សី វិស្សុត មានប្រសាសន៍ថា នៅថ្ងៃទី២៥ ខែកុម្ភៈ ឆ្នាំ២០២៤ ខាងមុខនេះ ជាថ្ងៃបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលជាការបោះឆ្នោតមួយដ៏មានសារៈសំខាន់ក្រៃលែងសម្រាប់បុព្វហេតុបន្តកសាង និងការពារមាតុភូមិកម្ពុជាយើង។ ពិតមែនតែការ បោះឆ្នោតជ្រើសតាំងសមាជិកព្រឹទ្ធសភាជាការបោះឆ្នោតអសកល ប៉ុន្តែគឺជាការបោះឆ្នោតដែលកើតចេញពីឆន្ទៈ និងបំណងប្រាថ្នារបស់ប្រជាជនកម្ពុជាពិតប្រាកដ ព្រោះថាអ្នកតំណាងរាស្ត្រ និងសមាជិក ក្រុមប្រឹក្សាឃុំ-សង្កាត់ ដែលជាអ្នកបោះឆ្នោតផ្ទាល់ គឺជាអ្នកតំណាងដ៏ឧត្តុង្គឧត្តមរបស់ប្រជាជនដែលបានប្រសូត្រចេញពីឆន្ទៈរបស់ប្រជាជន។

លោកបន្ថែមទៀតថា គណបក្សប្រជាជនកម្ពុជា សូមប្រកាសជាឱឡារិកនូវការចូលរួមក្នុងការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥នេះ ដោយគោរពអនុវត្តយ៉ាងម៉ឺងម៉ាត់ ខ្ជាប់ខ្ជួនតាមច្បាប់បទបញ្ជា នីតិវិធី ក្រមសីលធម៌នៃការបោះឆ្នោត និងគោរពលទ្ធផលនៃការបោះឆ្នោត។ គណបក្សចូលរួមសហការ ជាមួយបណ្តាគណបក្សនយោបាយ មជ្ឈដ្ឋានចម្រើនជឿនលឿននានាក្នុងសង្គម និងអាជ្ញាធរមានសមត្ថកិច្ច គ្រប់លំដាប់ថ្នាក់ ដើម្បីរក្សាបរិយាកាសនយោបាយល្អប្រសើរប្រកបដោយលក្ខណៈសេរី យុត្តិធម៌ សណ្តាប់ធ្នាប់ល្អ និងសុវត្ថិភាព សម្រាប់ការបោះឆ្នោត ក្នុងគោលដៅពង្រឹងលទ្ធិប្រជាធិបតេយ្យ និងនីតិរដ្ឋ នៅកម្ពុជាឱ្យកាន់តែរឹងមាំឡើង។ លោក ក៏បានអំពាវនាវដល់ជាសមាជិកក្រុមប្រឹក្សាឃុំ-សង្កាត់ទាំងអស់ ទៅបោះឆ្នោតឱ្យបានគ្រប់ៗគ្នា។

អត្ថបទ៖ ឈាង មករា

The post លោក វង្សី វិស្សុត ដឹកនាំយុទ្ធនាការឃោសនាបោះឆ្នោតជ្រើសតាំងសមាជិកព្រឹទ្ធសភានីតិកាលទី៥ ខេត្តកំពង់ធំ appeared first on Kampuchea Thmey Daily.

បោះឆ្នោតតៃវ៉ាន់នឹងបង្ហាញជាតិនិយមប្រឆាំងផ្នត់គំនិតដែលថាកោះនេះនៅតែជាផ្នែករបស់ចិន

Mean Ratana — Mon, 08 Jan 2024 09:54:13 +0000

កោះតៃវ៉ាន់ នឹងធ្វើការបោះឆ្នោតសកលជ្រើសរើសប្រធានាធិបតីថ្មីរបស់ខ្លួននាថ្ងៃសៅរ៍ ទី១៣ ខែមករា ឆ្នាំ២០២៤ ខាងមុខនេះ ។ ក្នុងនោះដែរ មិនថាទាំងប្រជាពលរដ្ឋដែលកំពុងរស់នៅតៃវ៉ាន់ ឬអ្នកដែលធ្វើការ និងចេញចូលពីចិនដីគោកមកបោះឆ្នោតប៉ុណ្ណោះទេ វានឹងបង្ហាញពីជាតិនិយមរបស់ខ្លួនចំពោះកោះដែលនៅមានភាពប្រទាំងប្រទិសក្នុងនិន្នាការនយោបាយ និងតំបន់ភូមិសាស្រ្តមួយនេះ ។

លោកស្រី Ivy Chen

តាមរយៈសារព័ត៌មាន Channel News Asia បានធ្វើបទសម្ភាសជាមួយគ្រួសារមកពីតៃវ៉ាន់ដែលតែងតែចេញចូលចិនដីគោកជាញឹកញាប់បានដឹងថា លោកស្រី Ivy Chen នឹងចូលរួមបោះឆ្នោតនៅទីកោះដែលជាទឹកដីកំណើតរបស់ខ្លួន ។

បើទោះបីលោកស្រីមានភារៈត្រូវមើលថែកូនស្រីទាំងពីរនៅទឹកដីតៃវ៉ាន់ តែលោកស្រីតែងចេញទៅចិនដីគោកជាញឹកញាប់ ដើម្បីទៅលេងស្វាមីរបស់ខ្លួនដែលបានផ្លាស់មកធ្វើការនៅចិនតាំងពីដើមទស្សវត្ស១៩៩០មកម្ល៉េះ។

ជីវិតចុះឡើងៗមកនៅចិនរយៈពេលខ្លី លោកស្រីតែងប្រឈមនឹងសំណួរថា លោកស្រីមកពីណា? នៅរាល់ពេលដែលលោកស្រីនិយាយ គឺភាគច្រើនជាភាសាចិនផ្លូវការ (ចិនកុកងឺ) ប៉ុន្តែមានសំនៀងបែបអ្នកតៃវ៉ាន់។ អ្នកមកពីក្រុង Tainan កោះតៃវ៉ាន់រូបនេះ បន្ថែមថា ដោយភាគច្រើនលោកស្រីចង់ចៀសពីការម៉ាក់ងាយ លោកស្រីច្រើននិយាយកុហកថា ជាអ្នកមកពីខេត្ត Fujian ដែលជាខេត្តភាគខាងកើតចិន នៅក្បែរនឹងកោះតៃវ៉ាន់។

លោកស្រីរំឭកបង្ហាញបទពិសោធកាលពីឆ្នាំ២០០០ថា មានពេលម្តងនោះ នៅឯព្រលានយន្តហោះសៀងហៃប្រទេសចិន លោកស្រីបានច្រឡំយកចេញលិខិតឆ្លងដែនពលរដ្ឋតៃវ៉ាន់ឡើងដោយអចេតនា ដែលតាមពិតគឺយកឯកសារ អនុញ្ញាតចេញដោយអាជ្ញាធរចិនសម្រាប់អ្នកនៅតៃវ៉ាន់ ឬហៅថា “Taiwan Compatriot Permit” ស្រាប់តែលោកស្រីឮសម្លេងតិះដៀលថា “បោះចោលលិខិតឆ្លងដែនតៃវ៉ាន់ទៅ អ្នកជាចិន ត្រូវប្រើលិខិតឆ្លងដែនចិន!”។ ដែលនេះលោកស្រីបង្ហាញថា ក្នុងផ្នត់គំនិតអ្នកនៅចិនដីគោក តែងមានមហិច្ឆតាគ្រប់គ្រងកោះតៃវ៉ាន់មិនលែង ហើយនៅតែមានផ្នត់គំនិតដាច់ណាត់ថា តៃវ៉ាន់ជាផ្នែកមួយរបស់ចិន។

ទិដ្ឋភាពយុវជននៅតៃវ៉ាន់

យ៉ាងណាក្តី ព្រឹត្តិការណ៍ និងបទពិសោធទាំងនោះ មិនបានធ្វើឱ្យលោកស្រីឃ្លាតឆ្ងាយពីគំនិតដែលថាលោកស្រីជាជនជាតិចិនតៃវ៉ាន់ឡើយ។ ទោះរាប់ទាំងករណីតាំងពីកុមារភាព ដែលកម្មវិធីសិក្សារៀនសូត្រនៅតៃវ៉ាន់បង្រៀនពីវប្បធម៌ ទឹកដី ដែលជាឥទ្ធិពលពីទឹកដីចិនដីគោក ក៏លោកស្រីនៅតែផ្សារភ្ជាប់នឹងសភាពពិត គឺទឹកដីកំណើតអ្នកតៃវ៉ាន់ ភាសាចិនអ្នកតៃវ៉ាន់ និងបរិយាកាសជួបជុំគ្នារបៀបប្រជាពលរដ្ឋតៃវ៉ាន់។

យោងតាមការសិក្សាជាប្រចាំឆ្នាំរបស់សាកលវិទ្យាល័យជាតិតៃវ៉ាន់ Chengchi ដែលបានស្ទង់មតិតាំងពីឆ្នាំ១៩៩២ មក ប្រមាណ៦២% នៃយុវជននៅតៃវ៉ាន់ អះអាងបញ្ជាក់ថា ខ្លួនជាប្រជាជនតៃវ៉ាន់ និងមានត្រឹម២.៥% ដែលអះអាងថាខ្លួនជាជនជាតិចិនដីគោក។

យ៉ាងណានេះជាករណីលើកឡើងមួយប៉ុណ្ណោះ សម្រាប់ទិន្នន័យពីប្រភពព័ត៌មានដដែលក៏បង្ហាញថា ប្រជាពលរដ្ឋដែលនឹងទៅបោះឆ្នោតរើសមេដឹកនាំថ្មីរបស់ខ្លួននាថ្ងៃសៅរ៍ ១៣ មករានេះ នឹងបង្ហាញអត្តសញ្ញាណថាខ្លួនគឺជាពលរដ្ឋតៃវ៉ាន់ ជាម្ចាស់ទឹកដី និងជោគវាសនា លើកោះប្រកាន់យកលិទ្ធិប្រជាធិបតេយ្យ តាមរយៈការបោះឆ្នោតមួយនេះ។

គួរបន្ថែមផងដែរថា ការបោះឆ្នោតរើសមេដឹកនាំថ្មី នៃកោះតៃវ៉ាន់ ខាងមុខនេះ បេក្ខភាពប្រធានាធិបតីផ្សេងៗគ្នា នឹងតំណាងឱ្យដំណើរឆ្ពោះទៅមុខតាមទស្សនៈផ្សេងៗគ្នា ពិសេសទៅលើបញ្ហាក្នុងតំបន់ ក៏ដូចជាស្ថិរភាពនៅលើពិភពលោក៕

ប្រែសម្រួល៖ មាន រតនា

ប្រភព៖ Channel News Asia

The post បោះឆ្នោតតៃវ៉ាន់នឹងបង្ហាញជាតិនិយមប្រឆាំងផ្នត់គំនិតដែលថាកោះនេះនៅតែជាផ្នែករបស់ចិន appeared first on Kampuchea Thmey Daily.