ព័ត៌មានជាតិ

អាជ្ញាធរអំពាវនាវពលរដ្ឋទៅធ្វើបច្ចុប្បន្នភាពបញ្ជីឈ្មោះបោះឆ្នោត ខណៈនៅតែ ០៧ ថ្ងៃទៀតប៉ុណ្ណោះ នឹងត្រូវបញ្ចប់

បានផុស

១ year មុន

នៅ

ថ្ងៃចន្ទ ១៩ ឧសភា ២០២៥

ដោយ

អាជ្ញាធរនៅថ្នាក់មូលដ្ឋាន សង្កាត់ បន្តអំពាវនាវប្រជាពលរដ្ឋនាំគ្នាទៅធ្វើបច្ចុប្បន្នភាពបញ្ជីឈ្មោះបោះឆ្នោតឱ្យបានគ្រប់ៗ គ្នា ខណៈថ្ងៃបញ្ចប់កាន់តែកៀកចូលមកដល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង ចាន់ណារិន ចៅសង្កាត់មិត្តភាព ជាសង្កាត់មួយ នៃរដ្ឋបាលខណ្ឌ ៧ មករា បានឱ្យដឹងថា ការធ្វើបច្ចុប្បន្នភាពទិន្នន័យជីវមាត្រក្នុងបញ្ជីឈ្មោះបោះឆ្នោតសម្រាប់ឆ្នាំ ២០២៥ នេះ គឺធ្វើឡើងពេញ ២៦ ថ្ងៃ តែម្ដង មិនគិតពីថ្ងៃសៅរ៍-អាទិត្យ ឬថ្ងៃបុណ្យឈប់សម្រាកនោះឡើយ ដោយមានក្រុមការងារសង្កាត់ប្រចាំការពេញ ២៦ ថ្ងៃ។

លោកចៅសង្កាត់ បានអំពាវនាវប្រជាពលរដ្ឋ ក៏ដូចជាអាណាព្យាបាលមានកូនគ្រប់អាយុ សូមអញ្ជើញទៅចុះឈ្មោះ និងពិនិត្យបញ្ជីឈ្មោះ ដើម្បីធ្វើបច្ចុប្បន្នភាពទិន្នន័យឱ្យបានត្រឹមត្រូវ ត្រៀមខ្លួនសម្រាប់ការចូលរួមបោះឆ្នោតនៅពេលខាងមុខទាំងអស់គ្នា។

លោក រឿន រ៉ាវី ប្រជាពលរដ្ឋ យល់ឃើញថា ការមកធ្វើបច្ចុប្បន្នភាពនេះ គឺជាកាតព្វកិច្ចក្នុងនាមពលរដ្ឋល្អក្នុងសង្គមជាតិ ដែលចាំបាច់មកបំពេញ ជៀសវាងការខុសទិន្នន័យណាមួយ ដើម្បីធ្វើការកែសម្រួល ឬផ្លាស់ប្ដូរទិន្នន័យថ្មីឱ្យហើយរួចរាល់ផងដែរ ដើម្បីភាពងាយស្រួលពេលបោះឆ្នោត ទិន្នន័យត្រឹមត្រូវ។

លោកបន្តទៀតថា ពេលមកត្រួតពិនិត្យចុះឈ្មោះបោះឆ្នោត មន្ត្រីមានការរាក់ទាក់ ទទួល និងផ្ដល់ជូននូវព័ត៌មាន បង្កភាពងាយស្រួល លឿនរហ័ស ជូនដល់ប្រជាពលរដ្ឋ។

សូមបញ្ជាក់ថា ការធ្វើបច្ចុប្បន្នភាពទិន្នន័យជីវមាត្រក្នុងបញ្ជីឈ្មោះបោះឆ្នោតឆ្នាំ ២០២៥ នេះ នឹងធ្វើឡើងរយៈពេល ២៦ ថ្ងៃ គិតចាប់ពីថ្ងៃទី ០១ ដល់ថ្ងៃទី ២៦ ខែឧសភា ឆ្នាំ ២០២៥ ខាងមុខ។ គិតត្រឹមថ្ងៃទី ១៩ ឧសភានេះ គឺនៅសល់តែរយៈពេល ០៧ ថ្ងៃទៀតប៉ុណ្ណោះ នឹងចូលដល់ថ្ងៃបញ្ចប់៕

អត្ថបទ ៖ សុភា