ប៉ូឡូញ Archives - Kampuchea Thmey Daily

អាមេរិកនឹងបង្កើតមូលដ្ឋានទ័ពអចិន្ត្រៃយ៍ នៅប៉ូឡូញ ដើម្បីការពារសម្ព័ន្ធមិត្តនៅអឺរ៉ុបខាងកើត

Minea Neu — Thu, 04 Jun 2026 01:35:58 +0000

ទោះបីជារដ្ឋបាល លោក ដូណាល់ ត្រាំ តែងតែបង្ហាញការថ្នាំងថ្នាក់ជាមួយសម្ព័ន្ធមិត្តនៅអឺរ៉ុបមិនព្រមជួយខ្លួន ដើម្បីវាយប្រហារអ៊ីរ៉ង់ នាពេលថ្មីៗនេះក្តី ក៏អាមេរិកមិនភ្លេចការពារសម្ព័ន្ធមិត្តពីភាពមិនប្រាកដប្រជាដែលអាចកើតមាន នាពេលអនាគតឡើយ។

កាលពីម្សិលមិញ រដ្ឋមន្ត្រីក្រសួងការពារជាតិប៉ូឡូញ លោក Wladyslaw Kosiniak-Kamysz លើកឡើងថា លោកបានស្នើជាផ្លូវការទៅកាន់សហរដ្ឋអាមេរិកក្នុងការបង្កើតមូលដ្ឋានយោធាអាមេរិកថ្មីជាអចិន្ត្រៃយ៍ក្នុងប្រទេសប៉ូឡូញ ជាសញ្ញាបង្ហាញពីបំណងរបស់ទីក្រុងវ៉ាសូវីក្នុងការពង្រឹងវត្តមានយោធារយៈពេលវែងរបស់អាមេរិក នៅភាគខាងកើតអឺរ៉ុប។ នេះបើយោងការចុះផ្សាយរបស់ភ្នាក់ងារសារព័ត៌មាន Anadolu នៅថ្ងៃទី០៣ ខែមិថុនា ឆ្នាំ២០២៦ ។

រដ្ឋមន្រ្តីក្រសួងការពារជាតិប៉ូឡូញ លោក Kamysz ។ រូបភាព៖ AA

លោក Kamysz សរសេរលើបណ្តាញសង្គម X ថា៖ « ការចូលរួមរបស់សហរដ្ឋអាមេរិកក្នុងសន្តិសុខរបស់ប៉ូឡូញមិនថយចុះទេ។ ផ្ទុយទៅវិញ វាអាចកាន់តែកើនឡើង។ ប្រទេសប៉ូឡូញដែលមានសុវត្ថិភាព មានន័យថាមានកងទ័ពរឹងមាំ សង្គមរឹងមាំ និងសម្ព័ន្ធភាពរឹងមាំ»។

យ៉ាងណា មិនទាន់មានព័ត៌មានលម្អិតណាមួយ ចេញផ្សាយទាក់ទងនឹងទីតាំង ទំហំ ឬមុខងារដែលអាចកើតមាននៃកន្លែងដែលបានស្នើឡើងនោះទេ។

ការប្រកាសនេះកើតឡើង ពេលប្រទេសណាតូទាំងអស់បន្តវាយតម្លៃ នូវជំហរការពារជាតិរបស់ពួកគេឡើងវិញ ចំពោះភាពមិនប្រាកដប្រជាកាន់តែខ្លាំងឡើងលើបរិយាកាសសន្តិសុខអឺរ៉ុបរយៈពេលវែង។

ការប្រកាសនេះក៏កើតឡើង អំឡុងពេលមានការជជែកវែកញែកពីរូបភាពនាពេលអនាគតនៃវត្តមានយោធាអាមេរិកនៅអឺរ៉ុប បន្ទាប់ពីមានរបាយការណ៍ក្នុងសប្តាហ៍ថ្មីៗនេះថា ទីក្រុងវ៉ាស៊ីនតោនកំពុងពិនិត្យដាក់ពង្រាយកងទ័ព និងសព្វាវុធ នៅទូទាំងទ្វីបឡើងវិញ។

មន្ត្រីប៉ូឡូញអះអាងម្តងហើយម្តងទៀតថា ការប្តេជ្ញាចិត្តរបស់សហរដ្ឋអាមេរិក ចំពោះប្រទេសប៉ូឡូញនៅតែមិនផ្លាស់ប្តូរ ទោះបីជាមានការពិភាក្សាយ៉ាងទូលំទូលាយអំពីឥរិយាបថនិងការចែករំលែកបន្ទុកនានាក្នុងអង្គការណាតូក៏ដោយ។

នាយករដ្ឋមន្ត្រីប៉ូឡូញ លោក Donald Tusk និង លោក Kosiniak-Kamysz បានសង្កត់ធ្ងន់ក្នុងសប្តាហ៍ថ្មីៗនេះថា ប្រទេសប៉ូឡូញនៅតែជាដៃគូសន្តិសុខដ៏ជិតស្និទ្ធបំផុតមួយរបស់ទីក្រុងវ៉ាស៊ីនតោននៅអឺរ៉ុប។

គួរបញ្ជាក់ថា ប្រទេសប៉ូឡូញបានពិភាក្សាជាមួយសហរដ្ឋអាមេរិកយូរឆ្នាំមកហើយ ពីការដាក់មូលដ្ឋានទ័ពថ្មីនៅលើទឹកដីខ្លួន ចាប់តាំងពីសង្រ្គាមរុស្ស៊ី-អ៊ុយក្រែននៅឆ្នាំ ២០២២ ៕

សម្រួល៖ ណឺ មិនា

The post អាមេរិកនឹងបង្កើតមូលដ្ឋានទ័ពអចិន្ត្រៃយ៍ នៅប៉ូឡូញ ដើម្បីការពារសម្ព័ន្ធមិត្តនៅអឺរ៉ុបខាងកើត appeared first on Kampuchea Thmey Daily.

ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ

Minea Neu — Fri, 29 May 2026 12:45:00 +0000

ប្រទេសប៉ូឡូញកំពុងស្ថិតលើគន្លងដ៏រឹងមាំមួយ ដើម្បីក្លាយជាប្រទេសផលិតអាវុធធំជាងគេមួយនៅអឺរ៉ុបខាងកើត។ ដោយមានការគាំទ្រ ដោយផ្ទេរបច្ចេកវិទ្យាសំខាន់ៗរបស់សហរដ្ឋអាមេរិក និងការផ្តល់ប្រាក់កម្ចីការពារជាតិរាប់សិបពាន់លានដុល្លារពីអឺរ៉ុប ទីក្រុងវ៉ាសូវីកំពុងផ្លាស់ប្តូរពីប្រទេសនាំចូលប្រព័ន្ធការពារជាតិពីបរទេសទៅជាមជ្ឈមណ្ឌលផលិតកម្ម និងផ្គត់ផ្គង់ខ្សែសង្វាក់ក្នុងស្រុកវិញ។

យន្តហោះចម្បាំងប៉ូឡូញ។ រូបភាព៖ AN

យោងតាមសារព័ត៌មាន Politico ចេញផ្សាយកាលពីដើមខែឧសភា ឆ្នាំ២០២៦ មានកត្តាជំរុញកំណើនផលិតកម្មអាវុធនៅប៉ុឡូញសំខាន់ៗ ចំនួនបី៖

១. កិច្ចព្រមព្រៀងបច្ចេកវិទ្យា និងផលិតកម្មរបស់សហរដ្ឋអាមេរិក៖ ទីក្រុងវ៉ាស៊ីនតោនកំពុងបើកទ្វារឱ្យប្រទេសប៉ូឡូញផ្លាស់ប្តូរពីការទិញឧបករណ៍ដែលមានស្រាប់ទៅជាការផលិតរួមគ្នាក្នុងស្រុក។

ជាពិសេស ក្រសួងការបរទេសសហរដ្ឋអាមេរិកបានអនុម័តបណ្ដោះអាសន្ននូវការផលិតមីស៊ីល Patriot PAC-3 MSE ក្នុងស្រុកក្នុងប្រទេសប៉ូឡូញ។ លើសពីនេះ ក្រុមហ៊ុនអាមេរិក Northrop Grumman កំពុងសហការជាមួយក្រុមការពារជាតិប៉ូឡូញ ដើម្បីផលិតគ្រាប់កាំភ្លើងធំរហូតដល់ ១៨០ ០០០គ្រាប់ ជារៀងរាល់ឆ្នាំ។

២. មូលនិធិអឺរ៉ុប៖ ប្រទេសប៉ូឡូញទទួលបានប្រាក់កម្ចី ជាមួយអត្រាការប្រាក់ទាប រហូតដល់ ៥២ប៊ីលានដុល្លារ ពីគម្រោងសកម្មភាពសន្តិសុខសម្រាប់អឺរ៉ុប(SAFE) របស់សហភាពអឺរ៉ុប។

ទីក្រុងវ៉ាសូវីនឹងប្រើប្រាស់មូលនិធិអឺរ៉ុបមួយចំនួនធំ ដើម្បីវិនិយោគលើឧស្សាហកម្មក្នុងស្រុក ដោយផ្តោតលើ ដ្រូន ពង្រឹងសមត្ថភាពប្រឆាំងដ្រូន និងគ្រាប់រំសេវដែលមានភាពជាក់លាក់ខ្ពស់រយៈចម្ងាយឆ្ងាយ។

៣. ការចំណាយលើការការពារជាតិខ្ពស់បំផុតមិនធ្លាប់មាន៖ ប្រទេសប៉ូឡូញចំណាយជិត៥% នៃផលិតផលក្នុងស្រុកសរុបសម្រាប់វិស័យការពារជាតិ ដែលសមាមាត្រខ្ពស់បំផុតក្នុងចំណោមប្រទេសសមាជិកណាតូទាំងអស់។

អ្នកជំនាញព្យាករណ៍ថា ការផ្ទេរបច្ចេកវិទ្យានិងខ្សែសង្វាក់ផលិតកម្មដ៏ធំទាំងនេះអាចចាត់ថ្នាក់ប្រទេសប៉ូឡូញក្នុងចំណោមក្រុមហ៊ុនផលិតសព្វាវុធកំពូលទាំងបី ឬ៤របស់អឺរ៉ុប នាពេលអនាគតដ៏ខ្លីខាងមុខ៕

សម្រួល៖ ណឺ មិនា

The post ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ appeared first on Kampuchea Thmey Daily.

អាមេរិក យល់ព្រមឱ្យប៉ូឡូញផ្តើមផលិតមីស៊ីលក្នុងស្រុក ដើម្បីការពារដែនអាកាស

Minea Neu — Wed, 27 May 2026 12:34:00 +0000

ប្រធានាធិបតីអាមេរិក លោក ដូណាល់ ត្រាំ ម្តងប្រកាសដកទ័ព ព្រោះអាមេរិកត្រូវការកម្លាំងបន្ថែមលើសង្រ្គាមនៅអ៊ីរ៉ង់ ក្រោយមក លោក ត្រាំ ផ្ទាល់ ប្រកាសថានឹងបញ្ជូនទ័ពទៅប៉ូឡូញវិញ មិនតែប៉ុណ្ណោះអាមេរិកមានគម្រោងឈប់ផ្តល់ជំនួយដល់អង្គការណាតូទៀតផង។ ការសម្រេចចិត្តទាំងនោះ គ្មាននរណាម្នាក់អាចស្មានដឹងពីផែនការរបស់មហាអំណាចលោកខាងលិចនេះ ចង់ធ្វើអ្វីនោះទេ។

ថ្ងៃនេះប្រទេសប៉ូឡូញលើកឡើងថា ខ្លួនទទួលការយល់ព្រមជាបឋមពីក្រសួងការបរទេសសហរដ្ឋអាមេរិក ដើម្បីចាប់ផ្តើមផលិតមីស៊ីល PAC-3 MSE ប្រើប្រាស់ក្នុងប្រព័ន្ធការពារដែនអាកាស Patriot ក្នុងស្រុក។ នេះបើយោងតាមការលើកឡើងរបស់អនុរដ្ឋមន្ត្រីក្រសួងការពារជាតិ លោក Cezary Tomczyk កាលពីថ្ងៃអង្គារ ដោយបង្ហាញពីការទម្លាយភាពទាល់ច្រកដែលអាចកើតមាន ក្នុងយុទ្ធនាការដ៏វែងឆ្ងាយរបស់ទីក្រុង Warsaw ឆ្ពោះទៅផលិតអាវុធទំនើបៗ។

ប្រព័ន្ធការពារដែនអាកាស Patriot របស់អាមេរិក។ រូបភាព៖ Reuters

លោក Tomczyk ប្រាប់សារព័ត៌មាន TVN24 នៅថ្ងៃទី២៦ ខែឧសភា ថា មន្ត្រីអាមេរិកបានផ្លាស់ប្តូរជំហររបស់ពួកគេ បន្ទាប់ពីមានកិច្ចពិភាក្សានៅទីក្រុងវ៉ាស៊ីនតោន។

លោក លើកឡើងថា៖ « ដំបូងឡើយ អាមេរិកមានការសង្ស័យពីប្រទេសប៉ូឡូញដែលអាចផលិតមីស៊ីល PAC-3 សម្រាប់ Patriots […] ឥឡូវនេះអ្វីៗគឺបើកចំហ ហើយយើងបានទទួលការយល់ព្រមជាបឋមហើយ»។ ការធ្វើបែបនេះនឹងពង្រឹងតួនាទីរបស់ប្រទេសប៉ូឡូញ ក្នុងខ្សែសង្វាក់ផ្គត់ផ្គង់ការពារជាតិរបស់ណាតូ ខណៈទីក្រុងវ៉ាស៊ីនតោនកំពុងស្ថិតនៅក្រោមសម្ពាធក្នុងការបំពេញស្តុកនិងធានាដល់សម្ព័ន្ធមិត្តពីការប្តេជ្ញាចិត្តផ្នែកយោធារយៈពេលវែងនៅអឺរ៉ុប។

យ៉ាងណា ប្រសិនបើប្រទេសប៉ូឡូញត្រូវបានអនុវត្ត នោះនឹងសម្គាល់ពីការចាកចេញដ៏សំខាន់មួយលើភាពស្ទាក់ស្ទើររបស់អាមេរិក ក្នុងការផ្ទេរសមត្ថភាពផលិតកម្មសម្រាប់បច្ចេកវិទ្យាការពារដែនអាកាសដ៏រសើបបំផុតរបស់ខ្លួន។

ការវិវឌ្ឍនេះកើតឡើងនៅពេលវេលាមិនធម្មតាមួយ ក្នុងទំនាក់ទំនងរវាងសហរដ្ឋអាមេរិកនិងប៉ូឡូញ។ បន្ទាប់ពីការជជែកវែកញែកជាច្រើនសប្តាហ៍ពីការដាក់ពង្រាយកងទ័ពអាមេរិកនៅអឺរ៉ុបនិងការពិភាក្សាជាមួយទីក្រុង Warsaw ឡើងវិញ ពីការពឹងផ្អែកជាយុទ្ធសាស្ត្រលើទីក្រុងវ៉ាស៊ីនតោន។

ការប្រកាសនេះបង្ហាញថា កិច្ចសហប្រតិបត្តិការយោធាអាចនឹងផ្លាស់ប្តូរកាន់តែខ្លាំងឡើង ហួសពីវត្តមានកងទ័ពនិងការផ្គត់ផ្គង់ឆ្ពោះទៅរកការធ្វើសមាហរណកម្មឧស្សាហកម្ម។

គួរបញ្ជាក់ថា ប៉ូឡូញក្លាយជាប្រទេសមួយក្នុងចំណោមប្រទេសដែលទិញឧបករណ៍ការពារជាតិអាមេរិកធំជាងគេនៅអឺរ៉ុប ដូចជាការទិញប្រព័ន្ធការពារដែនអាកាស Patriots រថក្រោះ Abrams ឧទ្ធម្ភាគចក្រ Apache និងប្រព័ន្ធបាញ់មីស៊ីល HIMARS ប៉ុន្តែរដ្ឋាភិបាលប៉ូឡូញអះអាងថា ការទិញគួរតែបង្កើតសមត្ថភាពក្នុងស្រុក និងចំណេះដឹងឧស្សាហកម្មជាជាងការពឹងផ្អែករយៈពេលវែង៕

សម្រួល៖ ណឺ មិនា

The post អាមេរិក យល់ព្រមឱ្យប៉ូឡូញផ្តើមផលិតមីស៊ីលក្នុងស្រុក ដើម្បីការពារដែនអាកាស appeared first on Kampuchea Thmey Daily.

ក្រោយប្រកាសដកកម្លាំងទ័ព៤០០០នាក់ពីប៉ូឡូញ លោក ត្រាំ បែជាសម្រេចចិត្តបញ្ជូនទ័ព ៥០០០នាក់ទៅវិញ

Minea Neu — Fri, 22 May 2026 02:25:11 +0000

មន្ទីរបញ្ចកោណប្រកាសលុបចោលផែនការដាក់ពង្រាយកងកម្លាំងចំនួន ៤០០០នាក់ ទៅកាន់ប្រទេសប៉ូឡូញកាលថ្ងៃទី១៥ ខែឧសភា ព្រោះអាមេរិកចង់បង្កើនកម្លាំងទ័ពរបស់ខ្លួនវិញ ប៉ុន្តែថ្ងៃនេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បែរជាលើកឡើងថា សហរដ្ឋអាមេរិកនឹងបញ្ជូនកងទ័ពបន្ថែមចំនួន ៥០០០នាក់ទៅកាន់ប្រទេសប៉ូឡូញវិញ។ នេះបើយោងតាមសារព័ត៌មាន BBC ផ្សាយថ្ងៃទី២២ ខែឧសភា ឆ្នាំ២០២៦ ។

លោក ត្រាំ សរសេរនៅលើបណ្តាញសង្គម Truth Social របស់លោក ថា៖ « ការសម្រេចចិត្តនេះគឺផ្អែកលើទំនាក់ទំនងរបស់សហរដ្ឋអាមេរិកជាមួយប្រធានាធិបតីប៉ូឡូញ លោក Karol Nawrocki ដែលបានគាំទ្រយើង អំឡុងពេលបោះឆ្នោតប្រធានាធិបតីកាលពីឆ្នាំមុន»។

កងទ័ពសហរដ្ឋអាមេរិក។ រូបភាព៖ Reuters

ប្រធានាធិបតីអាមេរិករូបនេះមិនបានផ្តល់ព័ត៌មានលម្អិតបន្ថែម ថាតើកងទ័ពបន្ថែមទាំងនោះជាផ្នែកមួយនៃផែនការដាក់ពង្រាយពីមុន ឬប្រតិបត្តិការផ្សេងនោះទេ។

ចំណែក សេតវិមាន បានបង្ហាញសញ្ញាកាលពីប៉ុន្មានសប្តាហ៍ថ្មីៗនេះថា ខ្លួនមានបំណងកាត់បន្ថយកម្រិតកងទ័ពសរុបនៅអឺរ៉ុប ជាផែនការមួយដែលទីក្រុងវ៉ាស៊ីនតោនចាត់ទុក «អាមេរិកមុនគេ»។

កាលពីដើមខែនេះ សហរដ្ឋអាមេរិកក៏បានប្រកាសថា ខ្លួននឹងដកកងទ័ពចំនួន ៥ ០០០នាក់ ចេញពីប្រទេសអាល្លឺម៉ង់ បន្ទាប់ពីមានជម្លោះពាក្យសម្តីរវាង លោក ត្រាំ និងអធិការបតីអាល្លឺម៉ង់ លោក Friedrich Merz ជុំវិញសង្គ្រាមជាមួយអ៊ីរ៉ង់។

យ៉ាងណាជុំវិញរឿងនេះ មិនទាន់មានការលើកឡើងច្បាស់ទេថាតើកងទ័ពបន្ថែមសម្រាប់ប្រទេសប៉ូឡូញជាផ្នែកមួយនៃកងទ័ពដែលដកចេញពីប្រទេសអាល្លឺម៉ង់ ឬក្រុមដាច់ដោយឡែក។

លោក ត្រាំ បានរិះគន់សម្ព័ន្ធមិត្តណាតូរបស់ទីក្រុងវ៉ាស៊ីនតោនថា មិនព្រមចូលរួមជាមួយសហរដ្ឋអាមេរិកក្នុងការដាក់សម្ពាធអ៊ីរ៉ង់លើច្រកសមុទ្រហ័រមូស។

ការប្រកាសរបស់ លោក ត្រាំ នៅថ្ងៃព្រហស្បតិ៍នេះកើតឡើងមួយសប្តាហ៍ បន្ទាប់ពីក្រសួងការពារជាតិថាខ្លួនកំពុងលុបចោលការដាក់ពង្រាយកងទ័ពចំនួន ៤ ០០០នាក់ទៅកាន់ប្រទេសប៉ូឡូញ។

ដោយឡែក រដ្ឋមន្ត្រីក្រសួងការពារជាតិសហរដ្ឋអាមេរិក លោក Pete Hegseth លើកឡើងថា៖ « ផែនការលុបចោលលើកមុនជាការពន្យារពេលបណ្ដោះអាសន្ននៃការដាក់ពង្រាយដែលគ្រោងទុក ហើយសហរដ្ឋអាមេរិកនឹងបន្តរក្សាវត្តមានយោធាដ៏រឹងមាំក្នុងប្រទេសប៉ូឡូញដដែល»៕

សម្រួល៖ ណឺ មិនា

The post ក្រោយប្រកាសដកកម្លាំងទ័ព៤០០០នាក់ពីប៉ូឡូញ លោក ត្រាំ បែជាសម្រេចចិត្តបញ្ជូនទ័ព ៥០០០នាក់ទៅវិញ appeared first on Kampuchea Thmey Daily.

រដ្ឋមន្ត្រីការពារជាតិប៉ូឡូញ៖ ប៉ូឡូញនឹងមានយោធាខ្លាំង និងធំជាងគេនៅអឺរ៉ុបឆ្នាំ២០៣០

Minea Neu — Thu, 07 May 2026 13:00:00 +0000

រដ្ឋមន្ត្រីក្រសួងការពារជាតិប៉ូឡូញដែលជាសមាជិកណាតូ បានលាតត្រដាងការប្តេជ្ញាចិត្ត កាលថ្ងៃពុធថា ប៉ូឡូញនឹងមានកងទ័ពខ្លាំងបំផុត និងធំជាងគេនៅអឺរ៉ុបនៅឆ្នាំ២០៣០ ។ នេះបើយោងតាមប្រព័ន្ធផ្សព្វផ្សាយប៉ូឡូញ ដែលដកស្រង់ផ្សាយបន្តដោយទីភ្នាក់ងារសារព័ត៌មានតួកគី Anadolu ផ្សាយថ្ងៃទី៦ ខែឧសភា ឆ្នាំ២០២៦ ។

ក្នុងតួនាទីជារដ្ឋមន្រ្តីនិងឧបនាយករដ្ឋមន្ត្រី លោក Wladyslaw Kosiniak-Kamysz លើកឡើងក្នុងសុន្ទរកថាលើកិច្ចប្រជុំ Defence ២៤ Days ផ្តោតលើសន្និសីទសន្តិសុខនិងការពារជាតិនៅរដ្ឋធានី Warsaw ថា៖ « នៅឆ្នាំ២០៣០ ប្រទេសប៉ូឡូញនឹងមានកងទ័ពខ្លាំងបំផុត និងធំជាងគេនៅអឺរ៉ុប […] កងទ័ពដែលមានការរៀបចំល្អ និងបំពាក់ដោយអាវុធល្អបំផុត»។

លោក Wladyslaw Kosiniak-Kamysz រដ្ឋមន្រ្តីការពារជាតិប៉ូឡូញ។ រូបភាព៖ C.AZ

លោក បន្ថែម ថា៖ « នេះ[ផែនការឆ្នាំ២០២៣០] គឺជាគោលដៅយុទ្ធសាស្ត្ររបស់យើង ហើយយើងកំពុងលះបង់សកម្មភាពដែលអាចធ្វើទៅបានទាំងអស់ [ដើម្បីមានកម្លាំងទ័ពខ្លាំង]»។

គួរបញ្ជាក់ថា ការផ្លាស់ប្តូរបានគ្រោងទុករួមមានការពង្រីកកងកម្លាំងប្រដាប់អាវុធដល់កន្លះលាននាក់ រួមទាំងទាហានអាជីពចំនួន ៣០០ ០០០នាក់ និងទាហានបម្រុងចំនួន ២០០ ០០០នាក់។

លោកលើកឡើងថា យុទ្ធសាស្ត្រការពារជាតិរបស់ប្រទេសនេះផ្អែកលើសសរស្តម្ភបីគឺ សង្គមរឹងមាំ កងទ័ពរឹងមាំ និងសម្ព័ន្ធភាពរឹងមាំ ហើយសន្តិសុខជាតិអាស្រ័យលើការចូលរួមរបស់ពលរដ្ឋទាំងអស់។

លោកមានប្រសាសន៍ថា៖ « គ្មានប្រទេសប៉ូឡូញណាដែលមានសុវត្ថិភាពទេ បើគ្មានពលរដ្ឋចូលរួម។ ការចូលរួមរបស់ជនស៊ីវិលនឹងមានសារៈសំខាន់ក្នុងករណីមានការវាយប្រហារដែលអាចកើតឡើង»។

លោក Kosiniak-Kamysz ក៏ពិពណ៌នាអំពីការត្រៀមខ្លួនសម្រាប់ការគំរាមកំហែងដែលអាចកើតឡើងថាជាផ្នែកមួយនៃការការពារជាតិទាំងស្រុង ពាក់ព័ន្ធទាំងរចនាសម្ព័ន្ធយោធានិងស៊ីវិល។

លោកបន្តថា៖ « ប្រទេសប៉ូឡូញកំពុងស្ថិតក្នុងការវិនិយោគធំបំផុតក្នុងប្រវត្តិសាស្ត្រលើវិស័យការពារជាតិ ដោយមានគោលបំណងកសាង កងទ័ពដ៏រឹងមាំ មានរបៀបរៀបរយ និងគ្រប់គ្រងបានល្អ»។

លោកក៏អំពាវនាវឱ្យមានការបង្កើនសមត្ថភាពផលិតកម្មក្នុងឧស្សាហកម្មការពារជាតិគួរតែដំណើរការ ២៤ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ ដើម្បីសម្រេចគោលដៅឆ្នាំ ២០៣០៕

ប្រែសម្រួល៖ ណឺ មិនា

The post រដ្ឋមន្ត្រីការពារជាតិប៉ូឡូញ៖ ប៉ូឡូញនឹងមានយោធាខ្លាំង និងធំជាងគេនៅអឺរ៉ុបឆ្នាំ២០៣០ appeared first on Kampuchea Thmey Daily.

ប៉ូឡូញជំរុញឲ្យពលរដ្ឋខ្លួនចាកចេញពីបេឡារុសបន្ទាន់

Rann Reuy — Fri, 26 Sep 2025 05:28:04 +0000

រដ្ឋាភិបាលប៉ូឡូញជំរុញឱ្យពលរដ្ឋរបស់ខ្លួនចាកចេញពីបេឡារុសជាបន្ទាន់ ស្របពេលដែលស្ថានភាពសន្តិសុខនៅក្នុងតំបន់នោះកាន់តែធ្លាក់ចុះដុនដាប។ ក្រសួងការបរទេសប៉ូឡូញបានសង្កត់ធ្ងន់ថា ក្នុងករណីមានការធ្លាក់ចុះដុនដាបខ្លាំងនៃស្ថានភាពសន្តិសុខ ការជម្លៀសអាចនឹងមិនអាចទៅរួចទេ។ នេះយោងតាមការចុះផ្សាយរបស់ news.liga.net

ច្រកព្រំដែនប៉ូឡូញនិងបេឡារុសដែលបានបើកដំណើរការក្រោយបិទ។ pap.pl

ក្រសួងការបរទេសប៉ូឡូញ ផ្តល់អនុសាសន៍ថា ពលរដ្ឋមិនត្រូវធ្វើដំណើរទៅប្រទេសបេឡារុស ហើយជំរុញឱ្យអ្នកដែលនៅទីនោះ ចាកចេញពីប្រទេសបេឡារុសដែលមានព្រំដែនជាប់គ្នាយ៉ាងរាប់រយគីឡូម៉ែត្រ ហើយក៏ជាសម្ព័ន្ធមិត្តដ៏សំខាន់របស់ប្រទេសរុស្ស៊ី ។ សារព័ត៌មាននោះ បានបញ្ជាក់ថា សារនេះត្រូវបានផ្សព្វផ្សាយនៅលើគេហទំព័ររបស់រដ្ឋាភិបាលប៉ូឡូញ។

ក្រសួងរបស់ប្រទេសប៉ូឡូញ បានពន្យល់ពីការអំពាវនាវរបស់ខ្លួនដោយភាពតានតឹងដែលកំពុងកើនឡើងនៅក្នុងតំបន់ សង្រ្គាមដែលកំពុងបន្ត និង «ការចាប់ខ្លួនម្តងហើយម្តងទៀត» របស់ពលរដ្ឋប៉ូឡូញនៅក្នុងប្រទេសបេឡារុស។

ប៉ូឡូញបានសង្កត់ធ្ងន់ថា «នៅក្នុងព្រឹត្តិការណ៍នៃការចុះដុនដាបយ៉ាងខ្លាំងនៅក្នុងស្ថានភាពសន្តិសុខ ការបិទព្រំដែន ឬកាលៈទេសៈដែលមិនបានមើលឃើញទុកជាមុនផ្សេងទៀត ការជម្លៀសអាចមានការលំបាកជាង ឬសូម្បីតែមិនអាចទៅរួចទេ»។

ពលរដ្ឋប៉ូឡូញ ដែលនៅក្នុងប្រទេសបេឡារុស្សត្រូវបានជំរុញឱ្យចាកចេញពីប្រទេសនេះជាបន្ទាន់ដោយប្រើមធ្យោបាយពាណិជ្ជកម្ម និងឯកជនដែលមាន។

ប្រទេសប៉ូឡូញបានប្រកាសបិទព្រំដែនទាំងអស់ជាមួយប្រទេសបេឡារុស ក្នុងពេលដែលប្រទេសបេឡារុសធ្វើសមយុទ្ធ Zapad 2025 រួមគ្នាជាមួយរុស្ស៊ីកាលពីពាក់កណ្តាលខែកញ្ញានេះ។ ការធ្វើសមយុទ្ធទ្រង់ទ្រាយធំនោះ បង្កឲ្យមានការបារម្ភយ៉ាងខ្លាំងពីសំណាក់សមាជិកណាតូ។

រហូតដល់ពេលនេះ មានការបើកព្រំដែនមួយផ្នែករវាងប៉ូឡូញ និងបេឡារុស មានតែច្រកព្រំដែន Terespol-Brest ប៉ុណ្ណោះដែលអាចប្រើបានសម្រាប់អ្នកដំណើរជាមួយប៉ូឡូញ។ លើសពីនេះទៀត Koroshchyn (Kukuryky) – ច្រកព្រំដែន Kozlovychi ត្រូវបានបើកសម្រាប់ការដឹកជញ្ជូនទំនិញ៕

រ៉ាន់ រើយ

The post ប៉ូឡូញជំរុញឲ្យពលរដ្ឋខ្លួនចាកចេញពីបេឡារុសបន្ទាន់ appeared first on Kampuchea Thmey Daily.

ប៉ូឡូញព្រមានបាញ់ទម្លាក់ «គ្រប់វត្ថុ» ទាំងអស់ ដែលបំពានដែនអាកាសរបស់ខ្លួន

Huon Dina — Tue, 23 Sep 2025 00:00:00 +0000

នាយករដ្ឋមន្ត្រីប៉ូឡូញ បានឱ្យដឹងកាលពីថ្ងៃចន្ទថា ប្រទេសប៉ូឡូញ ដែលជាសមាជិករបស់អង្គការសម្ព័ន្ធភាពយោធាណាតូ នឹងមិនស្ទាក់ស្ទើរក្នុងការបាញ់ទម្លាក់គ្រប់ «វត្ថុ» ទាំងអស់ ដែលរំលោភបំពានដែនអាកាសរបស់ខ្លួន ហើយបង្កការគំរាមកំហែងផ្សេងៗនោះទេ។ នេះបើតាមការចុះផ្សាយរបស់ទីភ្នាក់ងាររ៉យទ័រ។

ការព្រមានយ៉ាងដូច្នេះ ធ្វើឡើងចំពេលដែលភាពតានតឹងកើនឡើងរវាងណាតូ និងរុស្ស៊ី ក្រោយដ្រូនរុស្ស៊ីចំនួន ២០ គ្រឿង បានហោះចូលទៅក្នុងដែនអាកាសរបស់ប៉ូឡូញនៅថ្ងៃទី ៩ និង ១០ កញ្ញា។ ក្នុងករណីដាច់ដោយឡែក ប៉ូឡូញបាននិយាយថា យន្តហោះចម្បាំងរុស្ស៊ីចំនួន ២ គ្រឿង បានបំពាន«តំបន់សុវត្ថិភាព» នៅកន្លែងរុករកប្រេងរបស់ក្រុមហ៊ុន Petrobaltic ក្នុងសមុទ្របាល់ទិក កាលពីថ្ងៃសុក្រ។

នាយករដ្ឋមន្រ្តីប៉ូឡូញ លោក Donald Tusk បានប្រាប់សន្និសីទសារព័ត៌មាននៅថ្ងៃចន្ទថា៖ «យើងនឹងធ្វើការសម្រេចចិត្តបាញ់ទម្លាក់វត្ថុហោះហើរ ដែលបំពានទឹកដីរបស់យើង និងហោះហើរលើប្រទេសប៉ូឡូញរបស់យើង។ វាគ្មានការចរចាលើបញ្ហានេះទេ»។

យ៉ាងណាមិញ លោកបន្តយ៉ាងដូច្នេះថា នៅពេលដែលស្ថានការណ៍មិនច្បាស់លាស់ ដូចជាយន្តហោះរុស្ស៊ីដែលហោះពីលើតំបន់សុវត្ថិភាពរបស់ Petrobaltic ដែលមិនស្ថិតក្នុងដែនទឹករបស់ប៉ូឡូញ រដ្ឋាភិបាលត្រូវប្រុងប្រយ័ត្នខ្លាំងមុននឹងចាត់វិធានការណាមួយ ដែលអាចបង្កឱ្យមានជម្លោះធ្ងន់ធ្ងរ។

អ្វីគួរឱ្យកត់សម្គាល់នោះគឺថា ការព្រមានចុងក្រោយរបស់ប៉ូឡូញ ធ្វើឡើងក្រោយប្រទេសអេស្តូនី បាននិយាយថា យន្តហោះរុស្ស៊ី ៣ គ្រឿង បានរំលោភលើដែនអាកាសរបស់ខ្លួនកាលពីថ្ងៃសុក្រ ដោយបង្កើនការព្រួយបារម្ភក្នុងចំណោមប្រទេសណាតូ ដែលថា រុស្ស៊ីកំពុងសាកល្បងសម្ព័ន្ធភាពរបស់ខ្លួន។ មេដឹកនាំមួយចំនួនកំពុងអំពាវនាវឱ្យមានការឆ្លើយតបខ្លាំងៗ ខណៈក្រុមប្រឹក្សាសន្តិសុខអង្គការសហប្រជាជាតិ គ្រោងពិភាក្សាគ្នានៅថ្ងៃចន្ទនេះ។ យ៉ាងណាមិញ រុស្ស៊ីបានច្រានចោលការចោទប្រកាន់របស់អេស្ដូនីថាមិនពិត និងថាជារឿងដែលបង្កើតឡើងដើម្បីបង្កើនភាពតានតឹង៕

The post ប៉ូឡូញព្រមានបាញ់ទម្លាក់ «គ្រប់វត្ថុ» ទាំងអស់ ដែលបំពានដែនអាកាសរបស់ខ្លួន appeared first on Kampuchea Thmey Daily.

ប្រធានាធិបតីប៉ូឡូញដែលហៅអ្នកទៅមើលភាពយន្តអំពី«ព្រំដែនបៃតង» ជា«ជ្រូក» រងការប្តឹង

Rann Reuy — Mon, 30 Sep 2024 00:30:00 +0000

អង្គការក្រៅរដ្ឋាភិបាលក្នុងប្រទេសប៉ូឡូញ បានអះអាងថា ខ្លួនបានដាក់ពាក្យបណ្តឹងប្រឆាំងនឹងប្រធានាធិបតីប៉ូឡូញ លោក Andrzej Duda ជុំវិញការអត្ថាធិប្បាយដែលប្រធានាធិបតីរូបនេះបាននិយាយក្នុងឆ្នាំ២០២៣ អំពីខ្សែភាពយន្ត «ព្រំដែនបៃតង» ដែលពណ៌នាអំពីវិបត្តិជនចំណាកស្រុកនៅតាមព្រំដែនបេឡារុស។

គណបក្សច្បាប់និងយុត្តិធម៌ជាតិនិយម(PiS) ដែល Duda ជាសម្ព័ន្ធមិត្តបានថ្កោលទោសខ្សែភាពយន្តដែលទទួលបានពានរង្វាន់ ដែលដឹកនាំរឿងដោយអ្នកដឹកនាំរឿង Agnieszka Holland ដោយនិយាយថា ការបង្ហាញរបស់ខ្សែភាពយន្តនោះពីការប្រព្រឹត្តចំពោះជនចំណាកស្រុកនៅតាមព្រំដែនដោយកងកម្លាំងសន្តិសុខប៉ូឡូញបានប្រមាថដល់មនុស្សដែលការពារប្រទេសរបស់ពួកគេ។

តាមការចុះផ្សាយរបស់រ៉យទ័រ ប្រធានាធិបតីប៉ូឡូញ លោក Duda បាននិយាយនៅពេលនោះថា លោកមិនភ្ញាក់ផ្អើលទេដែលអ្នករិះគន់ភាពយន្តបានប្រើពាក្យស្លោកថា «មានតែជ្រូកទេអង្គុយក្នុងរោងកុន» ដើម្បីពណ៌នាអ្នកដែលទៅទស្សនា។

មជ្ឈមណ្ឌលឃ្លាំមើលអាកប្បកិរិយាប្រកាន់ពូជសាសន៍ និងរើសអើង (The Racist and Xenophobic Behaviour Monitoring Centre) នៅប្រទេសប៉ូឡូញ បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គមថា៖«យើងបានដាក់ពាក្យប្តឹងប្រធានាធិបតីនៃសាធារណរដ្ឋប៉ូឡូញ Andrzej Duda ពីបទប្រមាថពលរដ្ឋនៃប្រទេសរបស់គាត់ដោយហៅពួកគេថា «ជ្រូក»។

រ៉យទ័រ បានឱ្យដឹងថា ប្រធានការិយាល័យរបស់ប្រធានាធិបតី លោក Malgorzata Paprocka បានអះអាងប្រាប់រ៉យទ័រថា តាមរយៈសារជាអក្សរថា មានករណីបែបនេះ ហើយបាននិយាយថា ការកាត់ក្តីត្រូវបានកំណត់ពេលសម្រាប់ឆ្នាំក្រោយ។

ទីភ្នាក់ងារសារព័ត៌មានរដ្ឋ PAP បានដកស្រង់សម្តីលោក Paprocka ដែលនិយាយថា កាលបរិច្ឆេទកាត់ក្តីត្រូវបានកំណត់សម្រាប់ថ្ងៃទី២៤ខែតុលា ឆ្នាំ២០២៥ ហើយថា ប្រធានាធិបតីនឹងត្រូវបានតំណាងនៅក្នុងតុលាការដោយមេធាវីរបស់គាត់។

«ព្រំដែនបៃតង» ត្រូវបានគេបាញ់ជាពណ៌ខ្មៅ និងស ហើយបង្ហាញគ្រួសារមួយមកពីប្រទេសស៊ីរី និងស្ត្រីម្នាក់មកពីប្រទេសអាហ្វហ្គានីស្ថាន ត្រូវបានគេបោះទៅក្រោយ និងទៅមុខឆ្លងកាត់ព្រំដែនដោយឆ្មាំមិនអើពើនឹងការឈឺចាប់របស់ពួកគេ ខណៈដែលសកម្មជនបានតស៊ូព្យាយាមនាំពួកគេទៅកាន់ទីសុវត្ថិភាព។

ជនចំណាកស្រុកដែលភាគច្រើនមកពីអាហ្វ្រិកខាងជើង និងមជ្ឈិមបូព៌ា បានចាប់ផ្តើមសម្រុកទៅព្រំដែនក្នុងឆ្នាំ២០២១ បន្ទាប់ពីបេឡារុស ដែលជាសម្ព័ន្ធមិត្តរបស់រុស្ស៊ី បានបើកទីភ្នាក់ងារទេសចរណ៍នៅមជ្ឈិមបូព៌ា ផ្តល់ការធ្វើដំណើរមិនផ្លូវការមួយទៅកាន់អឺរ៉ុប ដែលសហគមន៍អឺរ៉ុបនិងរដ្ឋាភិបាលប៉ូឡូញចោទថា ត្រូវបានគេរៀបចំឡើងដើម្បីបង្កើតនូវវិបត្តិ៕

The post ប្រធានាធិបតីប៉ូឡូញដែលហៅអ្នកទៅមើលភាពយន្តអំពី«ព្រំដែនបៃតង» ជា«ជ្រូក» រងការប្តឹង appeared first on Kampuchea Thmey Daily.

ប៉ូឡូញ Archives - Kampuchea Thmey Daily

អាមេរិក​នឹង​បង្កើត​មូល​ដ្ឋាន​ទ័ព​​អចិន្ត្រៃយ៍ នៅ​ប៉ូឡូញ ដើម្បីការ​ពារសម្ព័ន្ធ​មិត្តនៅ​អឺរ៉ុបខាងកើត​

ប៉ូឡូញ​នឹង​ក្លាយ​ជា​ប្រទេសផលិតសព្វា​វុធធំ​​ទី​៣​ នៅ​អឺរ៉ុប​ នាពេល​ខ្លី​ខាង​មុខ​​

អាមេរិក​ យល់​ព្រម​​ឱ្យ​ប៉ូឡូញ​​ផ្តើម​ផលិត​មីស៊ីលក្នុង​ស្រុក​ ​ដើម្បី​​ការពារដែន​អាកាស​

រដ្ឋ​មន្ត្រីការពារជាតិ​​​ប៉ូឡូញ៖ ប៉ូឡូញ​នឹង​មាន​យោធា​ខ្លាំង​ និង​​ធំជាង​គេ​នៅ​អឺរ៉ុប​ឆ្នាំ​២០៣០

ប៉ូឡូ​ញ​ជំរុញ​ឲ្យពលរដ្ឋខ្លួន​ចាកចេញ​ពី​បេឡារុស​បន្ទាន់​

ប៉ូឡូញព្រមានបាញ់ទម្លាក់ «គ្រប់វត្ថុ» ទាំងអស់ ដែលបំពានដែនអាកាសរបស់ខ្លួន

ប្រធានាធិបតី​ប៉ូឡូញដែល​​​ហៅ​អ្នក​ទៅមើល​ភាព​យន្ត​​​​​​​​​អំពី«ព្រំដែន​បៃតង» ជា«ជ្រូក» រងការប្តឹង​​

អាមេរិកនឹងបង្កើតមូលដ្ឋានទ័ពអចិន្ត្រៃយ៍ នៅប៉ូឡូញ ដើម្បីការពារសម្ព័ន្ធមិត្តនៅអឺរ៉ុបខាងកើត

ប៉ូឡូញនឹងក្លាយជាប្រទេសផលិតសព្វាវុធធំទី៣ នៅអឺរ៉ុប នាពេលខ្លីខាងមុខ

អាមេរិក យល់ព្រមឱ្យប៉ូឡូញផ្តើមផលិតមីស៊ីលក្នុងស្រុក ដើម្បីការពារដែនអាកាស

រដ្ឋមន្ត្រីការពារជាតិប៉ូឡូញ៖ ប៉ូឡូញនឹងមានយោធាខ្លាំង និងធំជាងគេនៅអឺរ៉ុបឆ្នាំ២០៣០

ប៉ូឡូញជំរុញឲ្យពលរដ្ឋខ្លួនចាកចេញពីបេឡារុសបន្ទាន់

ប្រធានាធិបតីប៉ូឡូញដែលហៅអ្នកទៅមើលភាពយន្តអំពី«ព្រំដែនបៃតង» ជា«ជ្រូក» រងការប្តឹង