ព័ត៌មានអន្ដរជាតិ

ប៉ូឡូញជំរុញឲ្យពលរដ្ឋខ្លួនចាកចេញពីបេឡារុសបន្ទាន់

បានផុស

១០ ខែ មុន

នៅ

ថ្ងៃសុក្រ ២៦ កញ្ញា ២០២៥

ដោយ

រដ្ឋាភិបាលប៉ូឡូញជំរុញឱ្យពលរដ្ឋរបស់ខ្លួនចាកចេញពីបេឡារុសជាបន្ទាន់ ស្របពេលដែលស្ថានភាពសន្តិសុខនៅក្នុងតំបន់នោះកាន់តែធ្លាក់ចុះដុនដាប។ ក្រសួងការបរទេសប៉ូឡូញបានសង្កត់ធ្ងន់ថា ក្នុងករណីមានការធ្លាក់ចុះដុនដាបខ្លាំងនៃស្ថានភាពសន្តិសុខ ការជម្លៀសអាចនឹងមិនអាចទៅរួចទេ។ នេះយោងតាមការចុះផ្សាយរបស់ news.liga.net

ច្រកព្រំដែនប៉ូឡូញនិងបេឡារុសដែលបានបើកដំណើរការក្រោយបិទ។ pap.pl

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេសប៉ូឡូញ ផ្តល់អនុសាសន៍ថា ពលរដ្ឋមិនត្រូវធ្វើដំណើរទៅប្រទេសបេឡារុស ហើយជំរុញឱ្យអ្នកដែលនៅទីនោះ ចាកចេញពីប្រទេសបេឡារុសដែលមានព្រំដែនជាប់គ្នាយ៉ាងរាប់រយគីឡូម៉ែត្រ ហើយក៏ជាសម្ព័ន្ធមិត្តដ៏សំខាន់របស់ប្រទេសរុស្ស៊ី ។ សារព័ត៌មាននោះ បានបញ្ជាក់ថា សារនេះត្រូវបានផ្សព្វផ្សាយនៅលើគេហទំព័ររបស់រដ្ឋាភិបាលប៉ូឡូញ។

ក្រសួងរបស់ប្រទេសប៉ូឡូញ បានពន្យល់ពីការអំពាវនាវរបស់ខ្លួនដោយភាពតានតឹងដែលកំពុងកើនឡើងនៅក្នុងតំបន់ សង្រ្គាមដែលកំពុងបន្ត និង «ការចាប់ខ្លួនម្តងហើយម្តងទៀត» របស់ពលរដ្ឋប៉ូឡូញនៅក្នុងប្រទេសបេឡារុស។

ប៉ូឡូញបានសង្កត់ធ្ងន់ថា «នៅក្នុងព្រឹត្តិការណ៍នៃការចុះដុនដាបយ៉ាងខ្លាំងនៅក្នុងស្ថានភាពសន្តិសុខ ការបិទព្រំដែន ឬកាលៈទេសៈដែលមិនបានមើលឃើញទុកជាមុនផ្សេងទៀត ការជម្លៀសអាចមានការលំបាកជាង ឬសូម្បីតែមិនអាចទៅរួចទេ»។

ពលរដ្ឋប៉ូឡូញ ដែលនៅក្នុងប្រទេសបេឡារុស្សត្រូវបានជំរុញឱ្យចាកចេញពីប្រទេសនេះជាបន្ទាន់ដោយប្រើមធ្យោបាយពាណិជ្ជកម្ម និងឯកជនដែលមាន។

ប្រទេសប៉ូឡូញបានប្រកាសបិទព្រំដែនទាំងអស់ជាមួយប្រទេសបេឡារុស ក្នុងពេលដែលប្រទេសបេឡារុសធ្វើសមយុទ្ធ Zapad 2025 រួមគ្នាជាមួយរុស្ស៊ីកាលពីពាក់កណ្តាលខែកញ្ញានេះ។ ការធ្វើសមយុទ្ធទ្រង់ទ្រាយធំនោះ បង្កឲ្យមានការបារម្ភយ៉ាងខ្លាំងពីសំណាក់សមាជិកណាតូ។

រហូតដល់ពេលនេះ មានការបើកព្រំដែនមួយផ្នែករវាងប៉ូឡូញ និងបេឡារុស មានតែច្រកព្រំដែន Terespol-Brest ប៉ុណ្ណោះដែលអាចប្រើបានសម្រាប់អ្នកដំណើរជាមួយប៉ូឡូញ។ លើសពីនេះទៀត Koroshchyn (Kukuryky) – ច្រកព្រំដែន Kozlovychi ត្រូវបានបើកសម្រាប់ការដឹកជញ្ជូនទំនិញ៕

រ៉ាន់ រើយ