ប្រទេសក្រូអាត Archives - Kampuchea Thmey Daily

ប្រធានាធិបតីក្រូអាតថា អាមេរិក និងណាតូ កំពុងធ្វើសង្គ្រាមប្រូកស៊ីប្រឆាំង រុស្ស៊ី លើទឹកដី អ៊ុយក្រែន

Sok Chivon — Mon, 16 Jan 2023 05:00:31 +0000

ប្រធានាធិបតីប្រទេសក្រូអាតលោក Zoran Milanovic បាននិយាយនៅក្នុងសន្និសីទសារព័ត៌មានមួយនៅទីក្រុង Vukovar ភាគខាងកើតរបស់ប្រទេសថា សហរដ្ឋអាមេរិក និងអង្គការណាតូកំពុងធ្វើសង្គ្រាមប្រូកស៊ីប្រឆាំងនឹងរុស្ស៊ីនៅលើទឹកដីនៃប្រទេសអ៊ុយក្រែន ។

លោក Zoran Milanovic

ទីភ្នាក់ងារសារព័ត៌មាន HINA របស់ប្រទេសក្រូអាតបានដកស្រង់សម្តីលោក Milanovic ថា “ទីក្រុងវ៉ាស៊ីនតោន និងណាតូកំពុងយកទឹកដីអ៊ុយក្រែន ធ្វើសង្រ្គាមប្រូកស៊ីប្រឆាំងនឹងរុស្ស៊ី ហើយលោកមើលឃើញថា វាគ្មានន័យអ្វីឡើយក្នុងការដាក់ទណ្ឌកម្មប្រឆាំងនឹងក្រុងមូស្គូនោះ” ។

លោក Milanovic បានបន្តទៀតថា “ពួកគេកំពុងមានផែនការផ្លាស់ប្តូរពីសង្រ្គាមមួយទៅសង្រ្គាមមួយ ដូច្នេះសភាក្រូអាតមិនគាំទ្រសំណើរបស់រដ្ឋាភិបាលក្នុងការផ្តល់ឱកាសហ្វឹកហ្វឺនដល់យោធាអ៊ុយក្រែននៅក្នុងសាធារណរដ្ឋរបស់យើងនោះទេ ។

លោកប្រធានាធិបតីបញ្ជាក់ថា ការហ្វឹកហ្វឺនដល់ទាហានអ៊ុយក្រែននៅលើទឹកដីក្រូអាត ជាពិសេសនៅក្នុងបណ្តាប្រទេសសហភាពអឺរ៉ុបផ្សេងទៀត នឹងបង្កឲ្យមានផលវិបាកដ៏គ្រោះថ្នាក់ ហើយក៏ធ្វើឲ្យសង្គ្រាមកាន់តែអូសបន្លាយពេលផងដែរ ។

គួរបញ្ជាក់ថា កាលពីថ្ងៃទី២៤ ខែកុម្ភៈ ឆ្នាំ២០២២ លោក វ្ល៉ាឌីមៀរ ពូទីន បានចាប់ផ្តើមប្រតិបត្តិការយោធាពិសេសមួយនៅអ៊ុយក្រែន ដើម្បីឆ្លើយតបនឹងសំណើសុំជំនួយពីប្រមុខនៃសាធារណរដ្ឋ Donbass ខណៈរហូតមកដល់ពេលនេះ វាមានរយៈជាង ១០ ខែហើយ ។ បន្ទាប់មក លោកខាងលិចបានដាក់ទណ្ឌកម្មយ៉ាងខ្លាំងក្លាប្រឆាំងរុស្ស៊ី ជាពិសេសគឺបង្កើនការផ្គត់ផ្គង់សព្វាវុធដល់រដ្ឋាភិបាលទីក្រុងកៀវ ដែលមានតម្លៃរាប់សិបពាន់លានដុល្លារ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ សមយុទ្ធរួម រុស្ស៊ី-បេឡារុស កំពុងបង្កការភ័យខ្លាចដល់ប្រជាជននៅតំបន់ ភាគខាងជើង អ៊ុយក្រែន

The post ប្រធានាធិបតីក្រូអាតថា អាមេរិក និងណាតូ កំពុងធ្វើសង្គ្រាមប្រូកស៊ីប្រឆាំង រុស្ស៊ី លើទឹកដី អ៊ុយក្រែន appeared first on Kampuchea Thmey Daily.

ក្រូអាត បានលុយប៉ុន្មាន សម្រាប់ចំណាត់ថ្នាក់លេខ៣ World Cup?

Sok Sovann — Sun, 18 Dec 2022 00:27:59 +0000

ក្រុមបាល់ទាត់ឥដ្ឋការ៉ូក្រូអាត បានយកឈ្នះតោអាហ្វ្រិកម៉ារ៉ុក ក្នុងលទ្ធផល ២-១ ទទួលចំណាក់ថ្នាក់លេខ៣ ពានរង្វាន់បាល់ទាត់ពិភពលោកឆ្នាំ២០២២។

លេងបានតែ៧នាទីប៉ុណ្ណោះ ខ្សែការពារ Joško Gvardiol តែតបញ្ចូលទីយ៉ាងល្អ ជួយឲ្យក្រូអាតនាំមុខ១-០។ ប៉ុន្តែរំលងមិនបាន៣នាទីផង កីឡាករ Achraf Dari តែតបានមួយគ្រាប់វិញ ជួយឲ្យម៉ារ៉ុកតាមស្មើ។

ការប្រកួតអូសបន្លាយដល់ជិតចប់តង់ទី១ ពោលគឺនៅនាទីទី៤២ កីឡាករ Mislav Oršić ស៊ុតបានមួយគ្រាប់ ជួយឲ្យក្រូអាត នាំមុខ ម៉ារ៉ុក សាជាថ្មី។ ហើយលទ្ធផល ២-១ ក៏បន្តរហូតដល់ចប់៩០នាទី។

សម្រាប់ក្រូអាត ដែលជាប់ចំណាត់ថ្នាក់លេខ៣នៅ World Cup នឹងទទួលបានប្រាក់រង្វាន់ ២៧លានដុល្លារអាមេរិក ខណៈម៉ារ៉ុក លេខ៤ទទួលបាន២៥លានដុល្លារអាមេរិក៕

អត្ថបទ៖ Vann Vann

ចុចអាន៖ បានលេខ៤ មែន តែម៉ារ៉ុក ធ្វើឲ្យពិភពលោកភ្ញាក់ផ្អើល និងឈ្នះក្នុងដួងចិត្តមនុស្សគ្រប់គ្នា

The post ក្រូអាត បានលុយប៉ុន្មាន សម្រាប់ចំណាត់ថ្នាក់លេខ៣ World Cup? appeared first on Kampuchea Thmey Daily.

អណ្ដើកមួយក្បាលទស្សន៍ទាយពី ក្រូអាត និងម៉ារុក ទទួលចំណាត់ថ្នាក់លេខ ៣ (មានវីដេអូ)

Sok Chivon — Sat, 17 Dec 2022 02:07:18 +0000

ការប្រកួតដណ្ដើមចំណាត់ថ្នាក់លេខ ៣ សម្រាប់ព្រឹត្តិការណ៍បាល់ទាត់ពិភពលោក FIFA World Cup ឆ្នាំ ២០២២ នៅប្រទេសកាតា បានឈានមកដល់ហើយនៅថ្ងៃទី១៧ ខែធ្នូនេះ ដោយនៅរាត្រីនេះគឺការប្រកួតរវាង ក្រូអាត និងម៉ារ៉ុក ។

ក្រុមទាំងពីរធ្លាប់ជួបគ្នាម្ដងផងដែរនៅក្នុងវគ្គសន្សុំពិន្ទុតាមពូល F ដោយមិនមានអ្នកឈ្នះ និងអ្នកចាញ់នោះទេ ពោលគឺលទ្ធផល ០-០ ។

ប៉ុន្តែលើកនេះ សត្វអណ្ដើកមួយក្បាលរបស់សហរដ្ឋអាមេរិកបានទស្សន៍ទាយប្រទេស ក្រូអាត ជាអ្នកឈ្នះលើ ម៉ារ៉ុក និងទទួលបានចំណាត់ថ្នាក់លេខ ៣ សម្រាប់ World Cup ឆ្នាំ ២០២២ នេះ ដោយវាបានវាលទៅស៊ីផ្លែស្រការនាគដែលមានទង់ជាតិក្រូអាត ។

ចុះចំណែកប្រិយមិត្តគិតថា ក្រូអាត ឬក៏ ម៉ារ៉ុក ជាអ្នកឈ្នះ និងទទួលបានចំណាត់ថ្នាក់លេខ ៣?

សូមទស្សនាវីដេអូ!

ដោយ ៖ ជីវ័ន្ត

ចុចអាន ៖ Messi មិនបានហ្វឹកហាត់ជាមួយ អាហ្សង់ទីន ទេ មុនការប្រកួតផ្ដាច់ព្រ័ត្រ ដោយសាររបួស

The post អណ្ដើកមួយក្បាលទស្សន៍ទាយពី ក្រូអាត និងម៉ារុក ទទួលចំណាត់ថ្នាក់លេខ ៣ (មានវីដេអូ) appeared first on Kampuchea Thmey Daily.

កាសែតក្រូអាត បកអាក្រាតថា អាហ្សង់ទីន ត្រៀមរៀបចំ «ផែនការស្មោកគ្រោក» ដើម្បីយកឈ្នះក្រុមខ្លួន

អ៊ិន ពិសី — Tue, 13 Dec 2022 08:44:21 +0000

ស្ថាប័នសារព័ត៌មាននាំមុខគេរបស់ប្រទេសក្រូអាត ដែលមានឈ្មោះថា ‘Sportske Novosti’ បានចេញផ្សាយអត្ថបទដែលអះអាងថា ក្រុមជម្រើសជាតិអាហ្សង់ទីន បានរៀបចំ “ផែនការស្មោកគ្រោក” សម្រាប់ការប្រកួតក្នុងវគ្គពាក់កណ្ដាលផ្ដាច់ព្រ័ត្រ World Cup ឆ្នាំ ២០២២ ជាមួយក្រូអាត យប់នេះ។

អត្ថបទនេះបានបង្ហាញពីកីឡាកររបស់អាហ្សង់ទីន ១ រូប បានជជែកតាមអ៊ីនធឺណិតជាមួយមិត្តរួមក្រុមនៅក្លិបលីគអឺរ៉ុប ដោយនិយាយអំពីផែនការរបស់គេក្នុងការធ្វើឲ្យកីឡាករក្រូអាត ថា “កីឡាករអាហ្សង់ទីន ម្នាក់ យោងទៅតាមអ្វីដែលយើងត្រូវបានគេប្រាប់បានសារភាពចំពោះកីឡាករក្រូអាត។ មិត្តរួមក្រុមមកពីក្លិបអឺរ៉ុបរបស់គាត់ ដែលពួកគេត្រូវបានផ្តល់ភារកិច្ចក្នុងការបង្កហេតុ និងណែនាំពីរបៀបធ្វើឲ្យគូប្រជែងក្រូអាតមានកំហឹង”។

Sportske បានបន្តទៀតថា “គាត់ (កីឡាករអាហ្សង់ទីន) បានបង្ហាញពីជំនឿរបស់គាត់ថា កលល្បិចនឹងជំរុញឲ្យគូប្រកួតក្រូអាត ពិបាកគ្រប់គ្រងអារម្មណ៍ ហើយថាពួកគេអាចផ្ដួលក្រូអាត ក្នុងរយៈពេល ៦០ នាទី»។

អាហ្សង់ទីន ត្រូវបានគេនិយាយថា បានជ្រើសរើសកីឡាករក្រូអាត ៣ នាក់ ដែលងាយខឹង និងងាយញុះញង់បំផុត។ ប្រព័ន្ធផ្សព្វផ្សាយក្រូអាត បានរាយការណ៍ថា ការវាយប្រហារផ្លូវចិត្តរបស់អាហ្សង់ទីន ត្រូវបានអនុវត្តអាចជាការប្រើពាក្យប្រមាថចំពោះគូប្រជែង ឬប្រមាថគ្រួសាររបស់ពួកគេ។

នេះជាយុទ្ធសាស្ត្រដែលអាហ្សង់ទីនប្រើក្នុងការប្រកួតជាមួយហូឡង់។ ពួកគេសង្ឃឹមថាបន្ទាប់ពី ៦០នាទី យ៉ាងហោចណាស់កីឡាករក្រូអាតម្នាក់ នឹងត្រូវបានបណ្ដេញចេញ។ ប៉ុន្តែគ្រូបង្វឹក Dalic ដឹងថានរណាជាកីឡាករក្រូអាតជាគោលដៅ។ កាសែតបញ្ជាក់។

ព័ត៌មានខាងលើត្រូវការពេលវេលាបន្ថែមទៀតដើម្បីផ្ទៀងផ្ទាត់។ ទោះជាយ៉ាងណាក៏ដោយ ការដែលអាហ្សង់ទីន ប្រើល្បិចជាច្រើន ដើម្បីញុះញង់គូប្រកួត គឺមិនធម្មតាទេនៅក្នុងបាល់ទាត់ ជាពិសេសការប្រកួតបាល់ទាត់ពិភពលោក។ នៅក្នុងវគ្គ ៨ ក្រុមចុងក្រោយ នៃការប្រកួតបាល់ទាត់ពិភពលោក ឆ្នាំ ២០២២ ខ្សែបម្រើ Leandro Paredes ក៏មានអាកប្បកិរិយាបង្កហេតុផងដែរនៅពេលដែលគេទាត់បាល់ត្រង់ចូលទៅក្នុងតំបន់បុគ្គលិក គ្រូបង្វឹក របស់ហូឡង់។

អាកប្បកិរិយារបស់តារា Juventus រូបនេះ បានធ្វើឲ្យការប្រកួតត្រូវបានរំខាន ដោយសារតែកីឡាករ នៃក្រុមទាំង ២ ស្ទើរតែមានការប៉ះទង្គិចគ្នា។ នៅពេលនោះ អាហ្សង់ទីន នាំមុខហូឡង់ ហើយមនុស្សជាច្រើនគិតថា អាកប្បកិរិយារបស់ Paredes ត្រូវបានគិតទុកជាមុនដើម្បីធ្វើឲ្យគូប្រកួតមានកំហឹង។

នៅក្នុងការប្រកួតរវាង អាហ្សង់ទីន និងអង់គ្លេស វគ្គ ១៦ ក្រុមចុងក្រោយ នៃព្រឹត្តិការណ៍ World Cup ឆ្នាំ ១៩៩៨ លោក Diego Simeone ក៏បានបង្ករឿងបង្កហេតុឲ្យ David Beckham ទទួលបានកាតក្រហមពីទីលានផងដែរ ដោយហេតុនេះជួយឲ្យតំណាងអាមេរិកខាងត្បូងទទួលបានអត្ថប្រយោជន៍ និងឈ្នះការប្រកួតវគ្គផ្ដាច់ព្រ័ត្រ៕

ប្រភព៖ sportske.jutarnji.hr

អត្ថបទ ៖ មន្នីរ័ត្ន

The post កាសែតក្រូអាត បកអាក្រាតថា អាហ្សង់ទីន ត្រៀមរៀបចំ «ផែនការស្មោកគ្រោក» ដើម្បីយកឈ្នះក្រុមខ្លួន appeared first on Kampuchea Thmey Daily.

ពិតទេ អតីតបវរកញ្ញាក្រូអាត នឹងស្រាតសម្លៀកបំពាក់ បើជម្រើសជាតិរបស់ខ្លួនឈ្នះពាន World Cup?

Sok Sovann — Tue, 13 Dec 2022 08:28:16 +0000

“អ្នកគាំទ្រសិចស៊ីបំផុត” ក្នុងព្រឹត្តិការណ៍ប្រកួតកីឡាបាល់ទាត់ពិភពលោក បានបញ្ជាក់ច្បាស់ៗ បន្ទាប់ពីមានសេចក្តីរាយការណ៍ដែលថា នាងនឹងស្រាតខោអាវ ប្រសិនបើក្រុមជម្រើសជាតិក្រូអាតឈ្នះពាន។

តារាម៉ូដែលសញ្ជាតិក្រូអាត Ivana Knoll

តារាម៉ូដែលសញ្ជាតិក្រូអាត Ivana Knoll អាយុ៣០ឆ្នាំ ត្រូវបានដកស្រង់សម្តីដោយសារព័ត៌មានអាល្លឺម៉ង់ថា នាងនឹងស្រាត ជារង្វាន់សម្រាប់ក្រុមរបស់នាង ប្រសិនបើពួកគេឈ្នះពាន World Cup។

តារាម៉ូដែលសញ្ជាតិក្រូអាត Ivana Knoll

ទោះបីជាយ៉ាងណាក៏ដោយ អតីតបវរកញ្ញាដើមកំណើតអាល្លឺម៉ង់និងជាអ្នកជំនួញរូបនេះ បានបដិសេធថា នាងនឹងមិនដោះសម្លៀកបំពាក់អ្វីទាំងអស់ ទោះប្រទេសរបស់នាង ឈ្នះពានក៏ដោយ។

ដោយបង្ហោះ Story ក្នុង Instagram, នាង Ivana បានសរសេរជាភាសាអង់គ្លេស ក្រូអាត និងអាល្លឺម៉ង់ថា “ព័ត៌មានមិនពិត! ជាការកុហករបស់ប្រព័ន្ធផ្សព្វផ្សាយ។ ខ្ញុំមិនដោះអាវទេ បើក្រូអាតឈ្នះជើងឯក”។

គួរបញ្ជាក់ថា នៅរាត្រីនេះ ក្រុមបាល់ទាត់ជម្រើសជាតិក្រូអាត ត្រូវតតាំងជាមួយ អាហ្សង់ទីន ក្នុងវគ្គពាក់កណ្តាលផ្តាច់ព្រ័ត្រនៃពានរង្វាន់ World Cup ឆ្នាំ២០២២៕

ប្រែសម្រួល៖ Vann Vann

ប្រភព៖ SUN

ចុចអាន៖ ភ្លេចឬនៅ? World Cup វគ្គ Semi Final កាលពី៨ឆ្នាំមុន ធ្វើឲ្យប្រេស៊ីល ឈឺចាប់គ្មានថ្ងៃភ្លេច

The post ពិតទេ អតីតបវរកញ្ញាក្រូអាត នឹងស្រាតសម្លៀកបំពាក់ បើជម្រើសជាតិរបស់ខ្លួនឈ្នះពាន World Cup? appeared first on Kampuchea Thmey Daily.

លោក Scaloni ថា ក្រូអាត មានកីឡាករអាចធ្វើឲ្យ អាហ្សង់ទីន ឈឺចាប់ តែសុំមិននិយាយឈ្មោះ

អ៊ិន ពិសី — Tue, 13 Dec 2022 03:52:42 +0000

គ្រូបង្វឹកអាហ្សង់ទីន លោក Lionel Scaloni កាលពីថ្ងៃចន្ទ បាននិយាយថា ក្រុមរបស់លោករំពឹងថា នឹងមានការប្រកួតវគ្គពាក់កណ្ដាលផ្ដាច់ព្រ័ត្រ World Cup ដ៏ស្វិតស្វាញជាមួយក្រូអាត បន្ទាប់ពីក្រុមអាមេរិកខាងត្បូងមួយនេះ ហត់នឿយក្នុងការយកឈ្នះលើ ហូឡង់ ក្នុងវគ្គ ៨ ក្រុមចុងក្រោយ។

អាហ្សង់ទីន នឹងទទួល ក្រូអាត នៅកីឡដ្ឋាន Lusail ដែលមានសមត្ថភាពផ្ទុកទស្សនិកជន ៨៩,០០០ នាក់ នៅថ្ងៃអង្គារ វេលាម៉ោង ២ រំលងអធ្រាត្រយប់នេះ ដើម្បីដណ្ដើមកន្លែងនៅក្នុងវគ្គផ្ដាច់ព្រ័ត្រ។

“យើងរំពឹងថា នឹងមានការប្រកួតដ៏ស្វិតស្វាញមួយ ហើយទល់នឹងក្រុមដ៏ល្អមួយ។ ពួកគេជាក្រុមត្រឹមត្រូវ ហើយពួកគេលេងជាក្រុម។ ” Scaloni បានប្រាប់អ្នកសារព័ត៌មានក្នុងសន្និសីទមុនការប្រកួតនៅទីក្រុង Doha។ “ពួកគេនឹងធ្វើឲ្យរឿងលំបាកសម្រាប់យើង”។

“ពួកគេមានទម្រង់លេងជាក់លាក់។ ខ្ញុំមិនគិតថាពួកគេនឹងផ្លាស់ប្ដូរវាទេ។ ពួកគេមានកីឡាករល្អៗណាស់។ ហើយពួកគេមានប្រពៃណីបាល់ទាត់យូរអង្វែង”។ អតីតកីឡាករជម្រើសជាតិអាហ្សង់ទីន បាននិយាយ។

“យើងមានប្រព័ន្ធ និងរបៀបលេងរបស់យើង។ យើងនឹងមិនផ្លាស់ប្ដូររបៀបលេងរបស់យើងទេ។ យើងដឹងថា ពួកគេមានកីឡាករឆ្នើម។ ពួកគេមានកីឡាករដែលអាចធ្វើឲ្យយើងឈឺចាប់។ ខ្ញុំនឹងមិននិយាយឈ្មោះទេ”។ លោក Scaloni បានបន្ថែម។

ក្រុមទាំង ២ បានប៉ះគ្នាចំនួន ៥ លើកន្លងមក ដោយទាំងសងខាងដណ្ដើមបានជ័យជម្នះ ២ លើកដូចគ្នា ហើយការប្រកួតទី ៥ បញ្ចប់ដោយស្មើ។ នោះរាប់បញ្ចូលទាំងការជួបគ្នាពីរលើកនៅ World Cup។ នៅឆ្នាំ ១៩៩៨ អាហ្សង់ទីន បានយកឈ្នះ ក្រូអាត ១-០។ ពីរទសវត្សរ៍ក្រោយមក នៅឆ្នាំ ២០១៨ ក្រូអាត បានសងសឹកដោយយកឈ្នះអាហ្សង់ទីន ៣-០។ ប៉ុន្តែការប្រកួតទាំងពីរនោះស្ថិតក្នុងវគ្គចែកពូល ៖ នៅថ្ងៃអង្គារនេះ វានឹងខ្ពស់ជាងអ្វីដែលភាគីទាំងពីរបានជួបប្រទះពេលប្រឈមមុខដាក់គ្នា។

ក្រូអាត ប្រសិនបើពួកគេឈ្នះ – នោះនឹងក្លាយទៅជាក្រុមឡើងវគ្គផ្ដាច់ព្រ័ត្រ World Cup ២ ឆ្នាំជាប់ៗគ្នាជាលើកដំបូង ចាប់តាំងពីប្រេស៊ីល ធ្វើបានក្នុងឆ្នាំ ២០០២៕

ប្រភព ៖ aljazeera.com

អត្ថបទ ៖ មន្នីរ័ត្ន

The post លោក Scaloni ថា ក្រូអាត មានកីឡាករអាចធ្វើឲ្យ អាហ្សង់ទីន ឈឺចាប់ តែសុំមិននិយាយឈ្មោះ appeared first on Kampuchea Thmey Daily.

ផ្ទុះការបាញ់ប្រហារសម្លាប់មនុស្ស ក្រោយ ប្រេស៊ីល ប្រកួតចាញ់ ក្រូអាត

Sok Chivon — Sat, 10 Dec 2022 09:00:41 +0000

ក្មេងស្រីអាយុ ១៧ ឆ្នាំម្នាក់បានស្លាប់ក្នុងការបាញ់ប្រហារនៅជិតផ្សារទំនើបមួយកន្លែងក្នុងក្រុង Barretos រដ្ឋ Sao Paulo បន្ទាប់ពីប្រេស៊ីលប្រកួតចាញ់ក្រូអាតក្នុងវគ្គ ៨ ក្រុមចុងក្រោយនៃព្រឹត្តិការណ៍បាល់ទាត់ពិភពលោក FIFA World Cup ឆ្នាំ២០២២ នៅប្រទេសកាតា ។

បើយោងតាមមន្ត្រីអនុវត្តច្បាប់ប្រេស៊ីលបានឲ្យដឹងថា ជម្លោះមួយនេះបានផ្ដើមចេញពីកន្លែងលក់អាហាររបស់ផ្សារទំនើបមួយកន្លែង ហើយបានឈានដល់ការប៉ះទង្គិចទ្រង់ទ្រាយធំនៅខាងក្រៅអគារ ។ មួយសន្ទុះក្រោយមក ភាគីពាក់ព័ន្ធដែលមានគ្នាច្រើននាក់បានបើករថយន្តទៅផ្សារទំនើបនោះ និងបើកការបាញ់ប្រហារទៅលើមនុស្សដែលឈរនៅតាមដងផ្លូវ ។

ជាលទ្ធផលនៃការបាញ់ប្រហារនេះ ក្មេងស្រីម្នាក់បានត្រូវគ្រាប់ស្លាប់ ចំណែកមិត្តភ័ក្តិរបស់នាងត្រូវគ្រាប់ធ្លាយសួត ហើយកំពុងស្ថិតក្នុងស្ថានភាពធ្ងន់ធ្ងរនៅក្នុងមន្ទីរពេទ្យ ខណៈខ្មាន់កាំភ្លើងបានរត់គេចខ្លួនពីកន្លែងកើតហេតុ ហើយប៉ូលិសក៏កំពុងតាមរកជនសង្ស័យផងដែរ ។

គួរបញ្ជាក់ថា កាលពីថ្ងៃសុក្រ ក្រុមបាល់ទាត់ជម្រើសជាតិប្រេស៊ីលបានរងបរាជ័យក្រោមថ្វីជើងរបស់ក្រូអាតដោយបាល់កាត់សេចក្ដី ១១ ម៉ែត្រក្នុងលទ្ធផល ២-៤ ហើយត្រូវជ្រុះចេញពី World Cup ត្រឹមពេលនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ មុនប៉ះគ្នាយប់នេះ តើចាំទេ ព័រទុយហ្គាល់ ចាញ់ ឬឈ្នះ ម៉ារ៉ុក កាលពី World Cup ឆ្នាំ ២០១៨ (មានវីដេអូ)

The post ផ្ទុះការបាញ់ប្រហារសម្លាប់មនុស្ស ក្រោយ ប្រេស៊ីល ប្រកួតចាញ់ ក្រូអាត appeared first on Kampuchea Thmey Daily.