ប្រទេសថៃ Archives - Kampuchea Thmey Daily

បាក់ស្ពានអាកាសថ្មើរជើងនៅថៃ បណ្តាលឲ្យមនុស្សរងរបួស៣នាក់

Chheang — Thu, 18 Dec 2025 02:49:43 +0000

ភ្នាក់ងារសង្គ្រោះបន្ទាន់របស់ប្រទេសថៃ បានឲ្យដឹងថា ស្ពានអាកាសថ្មើរជើងមួយកន្លែងនៅលើផ្លូវបាងណា-ត្រាត (Bang Na–Trat) បានបាក់រលំនៅព្រឹកថ្ងៃព្រហស្បតិ៍ទី១៨ធ្នូនេះ បន្ទាប់ពីត្រូវរថយន្តដឹកដីមួយគ្រឿងបើកបុក ដែលបណ្តាលឲ្យសង្កត់លើរថយន្តនៅខាងក្រោម និងធ្វើឲ្យមនុស្សមួយចំនួនជាប់គាំងខ្លួននៅខាងក្នុងនោះ។

យោងតាមវិទ្យុថៃ FM91 Trafficpro និងសារព័ត៌មាន Amarin ហេតុការណ៍នេះបានកើតឡើងនៅវេលាម៉ោងប្រហែល៩:១៥នាទីព្រឹក ក្បែរចំណុចបង្គោលគីឡូម៉ែត្រលេខ៣៤ ក្នុងគន្លងផ្លូវឆ្ពោះចូលទីក្រុង បណ្តាលឲ្យមានការកកស្ទះចរាចរណ៍យ៉ាងខ្លាំង។ ក្រុមអ្នកជួយសង្គ្រោះបានបញ្ជាក់ថា យ៉ាងហោចណាស់មានមនុស្ស៣នាក់បានរងរបួស និងខ្លះជាប់គាំងខ្លួននៅក្នុងរថយន្តដឹកទំនិញ និងរថយន្តភីកអាប់មួយគ្រឿង ខណៈមានសេចក្តីរាយការណ៍អំពីការធ្លាយហ្គាសនៅកន្លែងកើតហេតុ ដែលធ្វើឲ្យការជួយសង្គ្រោះកាន់តែមានភាពស្មុគស្មាញ។

ក្រុមការងារសង្គ្រោះបន្ទាន់បានប្រញាប់ប្រញាល់កាត់កម្ទេចកម្ទីដែកដើម្បីជួយសង្គ្រោះអ្នកជាប់គាំង ចំណែកឯអាជ្ញាធរបានបិទគន្លងផ្លូវដែលរងផលប៉ះពាល់ និងបានជំរុញឲ្យអ្នកបើកបរជៀសវាងការធ្វើដំណើរតាមតំបន់នោះ។ ចំពោះមូលហេតុនៃការបុកទង្គិច និងកម្រិតនៃការខូចខាតរចនាសម្ព័ន្ធស្ពាន កំពុងស្ថិតក្រោមការស៊ើបអង្កេតនៅឡើយ៕

ប្រែសម្រួល៖ ឈាង

The post បាក់ស្ពានអាកាសថ្មើរជើងនៅថៃ បណ្តាលឲ្យមនុស្សរងរបួស៣នាក់ appeared first on Kampuchea Thmey Daily.

អាន់វ៉ាបញ្ជាក់ពីអាហ្វ្រិកខាងត្បូងមកថា គ្មានការជ្រែកចូលផ្ទៃក្នុងប្រទេសណាក្នុងជម្លោះកម្ពុជា-ថៃ

Rann Reuy — Sun, 23 Nov 2025 06:06:05 +0000

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានច្រានចោលការចោទប្រកាន់ដែលថា ការសម្របសម្រួលបញ្ចប់ជម្លោះព្រំដែនថៃនិងកម្ពុជា បានជ្រៀតជ្រែកបញ្ហាផ្ទៃក្នុងរបស់ពួកគេ ដោយការអះអាងពីការរក្សាតួនាទីអព្យាក្រឹតរបស់ម៉ាឡេស៊ីក្នុងការសម្របសម្រួលកិច្ចចរចារវាងប្រជាជាតិទាំងពីរ។

លោក អាន់វ៉ា នាយករដ្ឋមន្ត្រីម៉ាឡេស៊ី ពេលប្រជុំនៅអាហ្វ្រិកខាងត្បូង។ FB

នាយករដ្ឋមន្ត្រី អាន់វ៉ា បាននិយាយក្នុងសន្និសីទសារព័ត៌មានកាលពីថ្ងៃសៅរ៍២២ វិច្ឆិកា នៅទីក្រុង Johannesburg ប្រទេសអាហ្វ្រិកខាងត្បូងថា «ខ្ញុំសូមប្រកាសច្បាស់លាស់ដល់ប្រព័ន្ធផ្សព្វផ្សាយថា ដំបូងបំផុតជាប្រទេសជិតខាងគ្នា យើងពិតជាមានការព្រួយបារម្ភ (អំពីជម្លោះ) ប៉ុន្តែយើងមិនពាក់ព័ន្ធទេ»។

លោក អាន់វ៉ា បាននិយាយថា «យើងគ្រាន់តែសម្របសម្រួល ដើម្បីជួយពួកគេឱ្យសម្រេចបាននូវការដោះស្រាយគ្នា ឬដំណោះស្រាយចំពោះជម្លោះរបស់ពួកគេ។ យើងមិនបានផ្តល់ឱ្យពួកគេនូវការដាក់ចេញបញ្ជាជាក់លាក់ណាមួយអំពីរបៀបដែលពួកគេគួរដោះស្រាយបញ្ហារបស់ពួកគេនោះទេ» ដោយបន្ថែមថា ប្រទេសទាំងពីរបានចាត់ទុកម៉ាឡេស៊ីជា «មិត្ត»។

ការលើកឡើងរបស់លោក អាន់វ៉ា អ៊ីប្រាហ៊ីម បានកើតឡើងចំថ្ងៃដែលមានការតវ៉ាក្នុងប្រទេសថៃពីសកម្មជនជាតិនិយមថៃសំដៅទៅរដ្ឋាភិបាលលោក អាន់វ៉ា អ៊ីប្រាហ៊ីម និង រដ្ឋបាលរបស់ប្រធានាធិបតី ដូណាល់ ត្រាំ ដោយចោទប្រកាន់ថា បានជ្រៀតជ្រែកចូលក្នុងកិច្ចការចរចាបញ្ចប់ជម្លោះព្រំដែនរវាងកម្ពុជានិងថ។

លោក អាន់វ៉ា បានបន្ថែមថា ប្រធានាធិបតីសហរដ្ឋអាមេរិក លោក ដូណាល់ ត្រាំ ក៏បាននិយាយជាមួយកម្ពុជានិងថៃក្នុងការស្វះស្វែងរកដំណោះស្រាយបញ្ចប់ជម្លោះផងដែរ។

លោកបានមានប្រសាសន៍ថា៖«ពេលខ្ញុំធ្វើជាប្រធានកិច្ចប្រជុំ (រវាងភាគីជម្លោះ) ខ្ញុំបានបញ្ជាក់យ៉ាងច្បាស់»។

លោកអះអាងថា៖«ខ្ញុំគិតថា យើងមិនគួរត្រូវបានពង្វាងពីកិច្ចការសំខាន់របស់យើងដើម្បីសម្រេចបានសន្តិភាពដោយសារតែសេចក្តីថ្លែងការណ៍មួយចំនួនដែលបានធ្វើឡើងដោយធាតុមិនពេញចិត្ត និងអស់សង្ឃឹមតូចមួយនោះទេ»។

សេចក្តីថ្លែងការណ៍តូចតាចដែល លោក អាន់វ៉ា ចង់សំដៅ នៅពេលលោកប្រាប់អ្នកយកព័ត៌មាននៅទីក្រុង Johannesburg គឺក្នុងចំណោមក្រុមបាតុករបានប្រមូលផ្តុំគ្នានៅមុខស្ថានទូតម៉ាឡេស៊ីក្នុងទីក្រុងបាងកកកាលថ្ងៃសៅរ៍ ដោយចោទប្រកាន់លោកថា ហួសពីតួនាទីជាប្រធានសមាគមប្រជាជាតិអាស៊ីអាគ្នេយ៍ (អាស៊ាន) និងបានជ្រៀតជ្រែកក្នុងកិច្ចខិតខំប្រឹងប្រែងរបស់ប្រទេសថៃដើម្បីរក្សាអធិបតេយ្យភាពរបស់ខ្លួន៕

រ៉ាន់ រើយ

The post អាន់វ៉ាបញ្ជាក់ពីអាហ្វ្រិកខាងត្បូងមកថា គ្មានការជ្រែកចូលផ្ទៃក្នុងប្រទេសណាក្នុងជម្លោះកម្ពុជា-ថៃ appeared first on Kampuchea Thmey Daily.

Anutin ប្រកាសអរគុណ Vorapak ដែលចុះពីតំណែង ទាក់ទិននឹងរឿងអាស្រូវ Scam

Chheang — Thu, 23 Oct 2025 01:56:31 +0000

នាយករដ្ឋមន្ត្រីថៃ លោក Anutin Charnvirakul កាលពីថ្ងៃទី២២ខែតុលា បានប្រកាសអរគុណអនុរដ្ឋមន្ត្រីក្រសួងហិរញ្ញវត្ថុ លោក Vorapak Tanyawong ដែលបានលាលែងពីតំណែង ចំពេលមានរបាយការណ៍ដែលភ្ជាប់លោកទៅនឹងបណ្តាញបោកប្រាស់(Scam)ឆ្លងដែន ដោយបានហៅចំណាត់ការនេះថាជា«ការបង្ហាញពីចរិកលក្ខណៈ»។

លោក Anutin Charnvirakul (រូបថត៖ Reuters)

លោក Vorapak ដែលបម្រើការបានត្រឹមតែ៣៣ថ្ងៃ បាននិយាយថា លោកបានចុះចេញពីតំណែងដើម្បី«ជៀសវាងការក្លាយជាឧបសគ្គ» នៅពេលដែលរដ្ឋាភិបាលជិតដល់ការរំលាយសភានៅខែមករាឆ្នាំក្រោយ មុនការបោះឆ្នោតសកលខែមីនាឆ្នាំ២០២៦។ លោក Vorapak បានច្រានចោលរាល់ការចោទប្រកាន់ទាំងនោះ ដោយហៅថា«ការលាបពណ៌គ្មានមូលដ្ឋាន»។ ជាធនាគារិកជើងចាស់មួយរូប និងជាអតីតនាយកប្រតិបត្តិធនាគារ Krung Thai Bank លោក Vorapak បានបន្ថែមថា រាល់ជំនួញរបស់លោកកន្លងមកគឺស្របច្បាប់ និងមិនពាក់ព័ន្ធនឹងបណ្តាញបោកប្រាស់ទេ។

នៅពេលឆ្លើយសំនួរអ្នកកាសែត លោក Anutin បានប្រកែកថា រឿងអាស្រូវនេះនឹងមិនប៉ះពាល់រដ្ឋបាលរបស់លោកឡើយ ដោយទទូចថា រដ្ឋាភិបាលរបស់លោកកំពុងតាមដាន និងបង្កកទ្រព្យសម្បត្តិដែលទាក់ទងនឹងការឆបោករួចហើយ។

បន្ថែមពីនេះ លោកប្រាប់ថានឹងមិនមានការតែងតាំងអនុរដ្ឋមន្ត្រីហិរញ្ញវត្ថុថ្មី ដើម្បីជំនួសលោក Vorapak ទេ ដោយពន្យល់ថា រដ្ឋបាលរបស់លោកនៅសេសសល់ពេលវេលាមិនច្រើន ដោយសភាតំណាងរាស្រ្តបានកំណត់ថានឹងត្រូវរំលាយនៅថ្ងៃទី៣១ខែមករា ដូច្នេះហើយការបំពេញមុខតំណែងទំនេរគឺមិនចាំបាច់។

អ្នកវិភាគនយោបាយបាននិយាយថា ការលាលែងពីតំណែងយ៉ាងឆាប់រហ័សឆ្លុះបញ្ចាំងពីការខិតខំប្រឹងប្រែងរបស់រដ្ឋាភិបាលលោក Anutin ក្នុងការទប់ស្កាត់ការខូចខាតផ្នែកនយោបាយ ខណៈដែលគណបក្សប្រឆាំងបង្កើនការរិះគន់ពីអសមត្ថភាពជុំវិញការដោះស្រាយបណ្ដាញបោកប្រាស់ឆ្លងព្រំដែន៕

លោក Vorapak Tanyawong (រូបថត៖ The Nation)

ដោយ៖ ឈាង

អនុរដ្ឋមន្ត្រីហិរញ្ញវត្ថុថៃ លាលែងតំណែង ក្រោយជាប់សង្ស័យពាក់ព័ន្ធក្រុម Scam

The post Anutin ប្រកាសអរគុណ Vorapak ដែលចុះពីតំណែង ទាក់ទិននឹងរឿងអាស្រូវ Scam appeared first on Kampuchea Thmey Daily.

នាយករដ្ឋមន្ត្រីថៃ ចេញបញ្ជាឲ្យវាយកម្ទេចស្នាក់ការប៉ូលិសនៅបាងកក

Rann Reuy — Sat, 04 Oct 2025 10:16:18 +0000

នាយករដ្ឋមន្ត្រីថៃ លោក អានុទីន ចានវីរៈគុល (Anutin Charnvirakul) បានបញ្ជាឲ្យវាយកម្ទេចអគារស្ថានីយ៍ប៉ូលីសជាបន្ទាន់ បន្ទាប់ពីពិនិត្យឃើញថា អគារនោះបាក់គ្រឹះបណ្តាលមកពីការបាក់ដីលិចទៅក្រោមកាលពីចុងខែកញ្ញា។

ការបាក់ដីលិចទៅក្រោម បានកើតឡើងជាច្រើនកន្លែងរហូតមកដល់ពេលនេះ បន្ទាប់ពីការបាក់ដីដ៏រន្ធត់ក្នុងទីក្រុងបាងកក លើកដំបូងកាលពីថ្ងៃទី២៤ខែកញ្ញា ដោយលិចចុះទៅក្រោមជម្រៅប្រមាណ៥០ម៉ែត្រ ចំថ្ងៃដែលនាយករដ្ឋមន្ត្រី អានុទីន ដឹកនាំគណៈរដ្ឋមន្ត្រី ចូលស្បថនៅមុខព្រះមហាក្សត្រថៃ។

អគារស្នាក់ការប៉ូលិសថៃដែលខូចខាតគ្រឹះដោយសារបាក់ដីដីជ្រៅកន្លងមក។ Thai media

យោងសារព័ត៌មាន The Straits times នាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក អានុទីន នៅថ្ងៃទី៤ ខែតុលា បានផ្តល់ដំណោះស្រាយសម្រេចឲ្យកម្ទេចស្ថានីយ៍ប៉ូលិសដែលស្ថិតនៅទល់មុខ មន្ទីរពេទ្យ Vajira នៅតំបន់ដែលបាក់ដីលិចចុះជម្រៅរហូតដល់៥០ម៉ែត្រនោះ។

ក្រោយពីការវាយតម្លៃអគារនេះ គេបានរកឃើញគំនរគ្រឹះបន្ថែមទៀតដែលបាក់ដោយសារប្រហោងលិចដែលកើតឡើងកាលពីថ្ងៃទី២៤ ខែកញ្ញា។

លោក អានុទីន ចានវីរៈគុល បញ្ជាក់ថា៖ «ផ្អែកតាមការចុះពិនិត្យនៅយប់ថ្ងៃទី៣តុលា ខ្ញុំយល់ស្របផ្ទាល់ខ្លួនថា អគារនេះត្រូវតែរុះរើ ប៉ូលិសត្រូវការកន្លែងថ្មីធ្វើការ ព្រោះរចនាសម្ព័ន្ធបានចាប់ផ្តើមផ្តាច់ចេញពីស្នូល»៕

The post នាយករដ្ឋមន្ត្រីថៃ ចេញបញ្ជាឲ្យវាយកម្ទេចស្នាក់ការប៉ូលិសនៅបាងកក appeared first on Kampuchea Thmey Daily.

អាជ្ញាធរខេត្តនគររាជសីមាថៃ ចាប់បង្ខំបុគ្គលិករដ្ឋ២០០នាក់ធ្វើតេស្តរកសារធាតុញៀន

Rann Reuy — Wed, 09 Jul 2025 04:32:11 +0000

អាជ្ញាធរនៃខេត្តនគររាជសីមា (Nakhon Ratchasima) ប្រទេសថៃបានតម្រូវឲ្យបុគ្គលិកភ្នាក់ងាររដ្ឋប្រមាណ២០០នាក់ក្នុងខេត្តធ្វើតេស្ដរកឃើញសារធាតុញៀន ដែលជាវិធានការមួយរឹតបន្តឹងការគ្រប់គ្រងគ្រឿងញៀនដែលរីករាលដាលកាន់តែខ្លាំង ក្រោយពីការធ្វើតេស្តចៃដន្យមួយរកឃើញថា សារធាតុញៀនបានរីករាលដាលទៅដល់សូម្បីព្រះសង្ឃ និងអាជ្ញាធរមូលដ្ឋាន។

តាមសេចក្តីរាយការណ៍របស់ Bangkok Post បុគ្គលិកប្រមាណ២០០នាក់ ត្រូវបានតម្រូវឲ្យធ្វើតេស្តរកសារធាតុញៀននៅសាលាខេត្តកាលពីថ្ងៃអង្គារ ប៉ុន្តែមិនមានលទ្ធផលភ្លាមៗត្រូវបង្ហាញនោះទេ។ ការធ្វើតេស្តនេះទៀតសោត គឹបន្ទាប់ពីរកឃើញថាបុគ្គលិក ១៦៧នាក់ ដែលរួមទាំងថ្នាក់ដឹកនាំមូលដ្ឋាន និងព្រះសង្ឃមួយអង្គ បានធ្វើតេស្តវិជ្ជមាន ក្នុងអំឡុងពេលធ្វើតេស្តចៃដន្យកាលពីខែមុននៅក្នុងស្រុកទាំង៣២នៃខេត្តនេះ។

អភិបាលខេត្ត លោក Chaiwat Chuenkosum ត្រូវបានស្រង់សម្តីបញ្ជាក់ថា លោកបានបញ្ជាឱ្យពិនិត្យទឹកនោមកាលពីថ្ងៃអង្គារសម្រាប់បុគ្គលិករដ្ឋាភិបាលអចិន្ត្រៃយ៍ និងបណ្តោះអាសន្ន និងបុគ្គលិកជាប់កិច្ចសន្យារបស់ទីភ្នាក់ងាររដ្ឋដែលមានមូលដ្ឋាននៅសាលាខេត្ត។ ការធ្វើតេស្តលើ មន្ត្រីរាជការ បុគ្គលិកជាប់កិច្ចសន្យា និងបុគ្គលិករដ្ឋាភិបាលប្រមាណ ២០០នាក់ ត្រូវបានរៀបចំឡើងភ្លាមៗដោយមិនឲ្យមានការដឹងជាមុននោះទេ។

គំនិតផ្តួចផ្តើមនេះគឺជាផ្នែកមួយនៃយុទ្ធនាការ ក្នុងគោលបំណងបង្កើតតំបន់សុវត្ថិភាព និងដោះស្រាយបញ្ហាគ្រឿងញៀន។ នេះបើតាមសេចក្តីរាយការណ៍។

កាលពីខែមុន អាជ្ញាធរក្នុងខេត្តនេះ បានធ្វើតេស្តមនុស្សសរុបចំនួន ៣៤០២២ នាក់ដោយចៃដន្យ ដើម្បីស្វែងរកសារធាតុញៀនខុសច្បាប់នៅទូទាំង ៣២ ស្រុក ដោយក្នុងនោះមាន មន្ត្រីរាជការ និងបុគ្គលិករដ្ឋាភិបាលផ្សេងទៀត អ្នកស្ម័គ្រចិត្ត ថ្នាក់ដឹកនាំមូលដ្ឋាន ព្រះសង្ឃ សិស្សានុសិស្ស និងសាធារណជន។

ក្នុងចំណោមពួកគេ មនុស្សសរុបចំនួន ១៦៧នាក់ ធ្វើតេស្តវិជ្ជមានចំពោះការប្រើប្រាស់គ្រឿងញៀនខុសច្បាប់ ក្នុងនោះមានអ្នកស្ម័គ្រចិត្ត២នាក់ មេភូមិ២នាក់ ជំនួយការមេភូមិ៥នាក់ ព្រះសង្ឃ១អង្គ សមាជិកសាធារណៈ១៤៧នាក់ និង១០នាក់ផ្សេងទៀត៕

រ៉ាន់ រើយ

The post អាជ្ញាធរខេត្តនគររាជសីមាថៃ ចាប់បង្ខំបុគ្គលិករដ្ឋ២០០នាក់ធ្វើតេស្តរកសារធាតុញៀន appeared first on Kampuchea Thmey Daily.

អ្នកវិភាគថា ភាពមិនច្បាស់លាស់នយោបាយថៃត្រូវការច្រើនខែ ខណៈទីផ្សារថៃដាំក្បាលអាក្រក់បំផុត

Rann Reuy — Thu, 03 Jul 2025 09:54:13 +0000

តុលាការធម្មនុញ្ញរំពឹងថានឹងចំណាយពេលចន្លោះពី១ខែទៅ៣ខែដើម្បីប្រកាសសាលក្រមស្ថាពរចុងក្រោយស្តីពីជោគវាសនារបស់នាយករដ្ឋមន្ត្រី ផែថងថាន ស៊ីណាវ៉ាត្រ (Paetongtarn Shinawatra) បន្ទាប់ពីតុលាការបានព្យួរមុខតំណែងនាយករដ្ឋមន្ត្រី ជុំវិញការលេចធ្លាយការសន្ទនាតាមទូរស័ព្ទជាមួយ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

នាយករដ្ឋមន្ត្រីថៃ ផែថងថាន ស៊ីណាវ៉ាត្រ ដែលតុលាការធម្មនុញ្ញព្យួរតំណែង។ The Nation

ការផ្អាកលោកស្រីផែថងថាន ស៊ីណាវ៉ាត្រ ពីតួនាទីដើម្បីបើកការស៊ើបអង្កេតផ្លូវការ ហើយលោកស្រី នាយករដ្ឋមន្ត្រី មានពេល១៥ថ្ងៃ ដើម្បីឆ្លើយបំភ្លឺដាក់ភស្តុតាងដោះបន្ទុកពីការចោទប្រកាន់របស់សមាជិកសភា៣៦រូបដែលបានដាក់ពាក្យបណ្តឹងចោទប្រកាន់លោកស្រី ពីបទរំលោក្រមសីលធម៌រដ្ឋធម្មនុញ្ញដែលបានសន្ទនាសម្ងាត់ជាមួយមេដឹកនាំរដ្ឋបរទេស។

អ្នកវិភាគភាគច្រើនបានរំពឹងថានឹងមានការផ្អាកក្នុងអំឡុងពេលស៊ើបអង្កេតលើញត្តិរបស់ព្រឹទ្ធសភាដោយចោទប្រកាន់នាយករដ្ឋមន្ត្រីពីបទរំលោភលើបទដ្ឋានសីលធម៌ដោយរំលោភរដ្ឋធម្មនុញ្ញ។

សារព័ត៌មានបាងកកប៉ុស្តិ៍ បានស្រង់សម្តីអ្នកវិភាគ លោក Kasem Prunratanamala ប្រធានផ្នែកស្រាវជ្រាវនៅក្រុមហ៊ុន CGS International Securities Group ដែលមានមូលដ្ឋាននៅប្រទេសចិន ដែលលោកបានអះអាងថា៖«យើងរំពឹងថាតុលាការនឹងចំណាយពេល១ទៅ៣ខែ ដោយប្រកាសសាលក្រមនៅខែកញ្ញា»។

អ្នកវិភាគបានបន្តថា ប្រសិនបើលោកស្រី ផែថងថាន ត្រូវបានរកឃើញថាមានកំហុស លោកស្រីទំនងជាត្រូវបានហាមមិនឱ្យធ្វើនយោបាយរយៈពេល ១០ឆ្នាំ។ លោកបាននិយាយថា ទោះបីជាយ៉ាងណាក៏ដោយ សភានៅតែអាចបោះឆ្នោតជ្រើសរើសនាយករដ្ឋមន្ត្រីថ្មីពីបេក្ខជនដែលមាន រួមទាំងលោក Chaikasem Nitisiri មកពីគណបក្សភឿថៃដែលកំពុងកាន់ដឹកនាំរដ្ឋាភិបាលចម្រុះស្រាប់ ដែល CGS ជឿជាក់ថាអាចជានាយករដ្ឋមន្ត្រីថ្មី។

ការហក់ឡើងវិបត្តិនយោបាយនឹងបន្តដាក់សម្ពាធលើផ្សារហ៊ុនថៃ (SET) ដែលបានធ្លាក់ចុះ ២៣% នៅឆ្នាំនេះ ដែលធ្វើឱ្យវាក្លាយជាទីផ្សារដែលដំណើរការអាក្រក់បំផុតនៅក្នុងពិភពលោកប្រៀបធៀបនឹងអត្រាប្រចាំឆ្នាំមុន។

លោក Kasem ត្រូវបានស្រង់សម្តីដូចលើកឡើង៖«យើងជឿថាអ្នកវិនិយោគបានកំណត់តម្លៃនៅក្នុងក្តីបារម្ភផ្សេងៗ រួមទាំងពន្ធគយរបស់សហរដ្ឋអាមេរិក ភាពចលាចលនយោបាយក្នុងស្រុក និងសេដ្ឋកិច្ចក្នុងស្រុកដែលខ្សោយ»។

លោក បានលើកឡើងថា៖«ក្រុមអ្នកតវ៉ាគ្រោងនឹងប្រមូលផ្តុំគ្នាម្តងទៀត ប៉ុន្តែមិនទាន់បានកំណត់កាលបរិច្ឆេទនៅឡើយទេ។ យើងជឿថាការប្រមូលផ្តុំគ្នានៅតាមដងផ្លូវនឹងរំខានដល់អាជីវកម្មម្តងទៀត នៅពេលដែលអ្នកប្រើប្រាស់ស្នាក់នៅផ្ទះដោយខ្លាចកើតមានអំពើហិង្សា ដែលអាចបើកទ្វារឱ្យយោធាធ្វើអន្តរាគមន៍»។

ដោយមើលឃើញពីភាពមិនច្បាស់លាស់ខាងនយោបាយក្នុងស្រុក លោកបាននិយាយថា ប្រទេសថៃប្រហែលជាមិនមានអំណាចចរចាច្រើនជាមួយសហរដ្ឋអាមេរិកទេ ទាក់ទងនឹងពន្ធនាំចូលដែលបានគ្រោងទុកចំនួន ៣៦ភាគរយដែលគ្រោងនឹងចូលជាធរមាននៅថ្ងៃទី៩ខែកក្កដាខាងមុខនេះ៕

រ៉ាន់ រើយ

The post អ្នកវិភាគថា ភាពមិនច្បាស់លាស់នយោបាយថៃត្រូវការច្រើនខែ ខណៈទីផ្សារថៃដាំក្បាលអាក្រក់បំផុត appeared first on Kampuchea Thmey Daily.

មហាក្សត្រថៃ យល់ព្រមលើសំណើរុះរើគណៈរដ្ឋមន្ត្រី ចំថ្ងៃតុលាការធម្មនុញ្ញក៏នឹងពិនិត្យបណ្តឹងប្រឆាំងនាយករដ្ឋមន្ត្រី

Rann Reuy — Tue, 01 Jul 2025 03:08:19 +0000

មហាក្សត្រថៃទ្រង់យល់ព្រមលើសំណើររុះរើគណៈរដ្ឋមន្ត្រីតាមសំណើរបស់នាយករដ្ឋមន្ត្រី ផែថងថាន ស៊ីណាវ៉ាត្រ នៅថ្ងៃនេះ ដោយមិនបានឆ្លងកាត់ការបោះឆ្នោតសភាជាន់ទាបលើការស្នើរុះរើគណៈរដ្ឋមន្ត្រីថ្មីដែលមានភាពចម្រូងចម្រាស់យ៉ាងខ្លាំងក្នុងមជ្ឈដ្ឋានអ្នកនយោបាយថៃក្នុងរយៈពេល២សប្តាហ៍ចុងក្រោយនេះ ខណៈតុលាការធម្មនុញ្ញនៅថ្ងៃនេះ ក៏នឹងត្រូវសម្រេចថាតើ ខ្លួននឹងទទួលយកបណ្តឹងរបស់សមាជិកព្រឹទ្ធសភាប្រមាណ៣៦រូប ដែលប្តឹងស្នើដក នាយករដ្ឋមន្ត្រី ផែថងថាន ពីតួនាទីឬយ៉ាងណា។

នាយករដ្ឋមន្ត្រី ផែថងថាន ថ្វាយបង្គុំព្រះឆាយាល័ក្ខណ៍ព្រះមហាក្សត្រថៃក្នុងថ្ងៃស្បថចូលកាន់តំណែងកាលខែសីហាឆ្នាំ២០២៤។ FB

សារព័ត៌មាន Khaosod បានផ្សាយថា នៅថ្ងៃទី ១ខែកក្កដា ឆ្នាំ ២០២៥ គេហទំព័ររាជកិច្ច (Royal Gazette) បានផ្សព្វផ្សាយព្រះរាជក្រឹត្យប្រកាសដកតំណែង និងតែងតាំងរដ្ឋមន្ត្រី។ រាជក្រឹត្យដកតំណែង និងតែងតាំងរដ្ឋមន្ត្រីថ្មីនេះ គឺតាមសំណើរបស់នាយករដ្ឋមន្ត្រីផែថងថាន ស៊ីណាវ៉ាត្រ ដែលបានដាក់ទៅអង្គព្រះមហាក្សត្រកាលពីសប្តាហ៍កន្លងទៅនេះ។

យោងសារព័ត៌មាន The Nation តុលាការធម្មនុញ្ញរបស់ប្រទេសថៃក៏នឹងបើកកិច្ចប្រជុំនៅថ្ងៃទី១ខែកក្កដានេះ ដើម្បីពិចារណាថាតើត្រូវទទួលយកពាក្យបណ្តឹងដែលស្វែងរកការដកនាយករដ្ឋមន្ត្រី ផែថងថាន ជុំវិញវីដេអូឃ្លីបដ៏ចម្រូងចម្រាស។

ការចេញផ្សាយបានបន្តថា ថ្ងៃទី១ខែកក្កដា គឺជាថ្ងៃដ៏សំខាន់មួយ ខណៈដែលតុលាការធម្មនុញ្ញគ្រោងនឹងកោះប្រជុំ និងពិភាក្សាអំពីសក្ដានុពលលើញត្តិដ៏ខ្ពង់ខ្ពស់ដែលប្តឹងលោកនាយករដ្ឋមន្ត្រី ផែថងថាន ស៊ីណាវ៉ាត្រ បន្ទាប់ពីការចេញផ្សាយឃ្លីបសំឡេងបែកធ្លាយនៃការសន្ទនាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា។

យោងការផ្សាយនោះ ប្រសិនបើតុលាការពិចារណាលើញត្តិនៅថ្ងៃទី ១ខែកក្កដានោះ សេណារីយ៉ូដែលអាចកើតមានចំនួនបីអាចកើតឡើង៖

ការពន្យារពេល – តុលាការអាចជ្រើសរើសមិនពិចារណាលើញត្តិនេះនៅឡើយទេ ដោយលើកឡើងពីពេលវេលាដ៏ខ្លីចាប់តាំងពីប្រធានព្រឹទ្ធសភាបានបញ្ជូនរឿងនេះកាលពីពីរសប្តាហ៍មុន។
បន្តការត្រួតពិនិត្យ – តុលាការអាចលើកយកករណីនេះជាផ្លូវការ ដែលបណ្តាលឱ្យមានសកម្មភាពមួយក្នុងចំណោមសកម្មភាពជាច្រើន៖ ការទទួលយកញត្តិ បដិសេធ ឬស្នើសុំព័ត៌មានបន្ថែមពីភ្នាក់ងារ ឬបុគ្គលពាក់ព័ន្ធ។
ការច្រានចោលពាក្យបណ្តឹង – តុលាការអាចពិនិត្យមើលពាក្យបណ្តឹងនេះ ហើយកំណត់ថាវាខ្វះហេតុផលគ្រប់គ្រាន់ ដោយហេតុនេះការបដិសេធទាំងស្រុង។

រ៉ាន់ រើយ

The post មហាក្សត្រថៃ យល់ព្រមលើសំណើរុះរើគណៈរដ្ឋមន្ត្រី ចំថ្ងៃតុលាការធម្មនុញ្ញក៏នឹងពិនិត្យបណ្តឹងប្រឆាំងនាយករដ្ឋមន្ត្រី appeared first on Kampuchea Thmey Daily.

សម្ពាធកើនឡើងគរដូចភ្នំ ទាមទារឲ្យ ផែថងថាន ចុះចេញពីអំណាច

Rann Reuy — Mon, 30 Jun 2025 07:47:06 +0000

យោងសេចក្តីរាយការណ៍របស់សារព័ត៌មានថៃនៅមុននេះ អង្គការសង្គមស៊ីវិលចំនួន១៥ បានចេញសេចក្តីថ្លែងការណ៍ទាមទារឲ្យនាយករដ្ឋមន្ត្រីលាលែងពីតំណែង ប្រឆាំងនឹងរដ្ឋប្រហារ និងគ្រប់ទម្រង់នៃអំណាចក្រៅរដ្ឋធម្មនុញ្ញ។

នាយករដ្ឋមន្ត្រីផែថងថាន ស៊ីណាវ៉ាត្រ ស្ថិតក្រោមសម្ពាធគរដូចភ្នំទាមទារឲ្យចុះចេញពីអំណាច។ FB

ការចេញសេចក្តីថ្លែងការណ៍នេះ កើតឡើងបន្ទាប់ពីមានការលើកឡើងជាចំហររបស់ក្រុមមេបាតុករកាលពីថ្ងៃសៅរ៍ ដោយទាមទារឲ្យនាយករដ្ឋមន្ត្រី ផែថងថាន ស៊ីណាវ៉ាត្រ ចុះចេញពីអំណាច ហើយ ឈានទៅគាំទ្ររដ្ឋប្រហារក្នុងករណីដែលនាយករដ្ឋមន្ត្រី បិរដិសេធចុះចេញពីអំណាច។

សេចក្តីរាយការណ៍របស់ សារព័ត៌មាន The Nation នៅថ្ងៃទី ៣០ខែមិថុនា អង្គការសង្គមស៊ីវិលទាំង១៥ បានចេញសេចក្តីថ្លែងការណ៍រួមគ្នាមួយដែលមានខ្លឹមសារអំពាវនាវឱ្យនាយករដ្ឋមន្ត្រីលាលែងពីអំណាច និងជ្រើសរើសនាយករដ្ឋមន្ត្រីថ្មី ដោយសង្កត់ធ្ងន់លើការប្រឆាំងរបស់ពួកគេចំពោះអំណាចក្រៅរដ្ឋធម្មនុញ្ញ និងការជំរុញឱ្យមានវិសោធនកម្មរដ្ឋធម្មនុញ្ញឆ្នាំ ២០១៧ ដែលពូកគេយល់ថា មិនអាចដោះស្រាយវិបត្តិនយោបាយបានទេ។

សេចក្តីថ្លែងការណ៍របស់ពួកគេ មានខ្លឹមសារសំខាន់បំផុតគឺការអំពាវនាវឲ្យនាយករដ្ឋមន្ត្រីលាលែង ដើម្បីបង្ហាញពីទំនួលខុសត្រូវនយោបាយ ព្រោះនេះជាកំហុសផ្ទាល់ខ្លួន ទទួលខុសត្រូវចំពោះទង្វើរបស់ខ្លួន និងបង្កើតស្តង់ដារគណនេយ្យភាពនយោបាយតាមរបបប្រជាធិបតេយ្យ ដែលជាដំណោះស្រាយដ៏ល្អបំផុត និងអនុញ្ញាតឱ្យមានការបោះឆ្នោតជ្រើសរើសនាយករដ្ឋមន្ត្រីថ្មី តាមគោលការណ៍ប្រជាធិបតេយ្យ។

សេចក្តីថ្លែងការណ៍បន្ថែមថា ពួកគេប្រឆាំងគ្រប់ទម្រង់នៃអំណាចក្រៅរដ្ឋធម្មនុញ្ញ ក្នុងការដោះស្រាយបញ្ហា រួមទាំងរដ្ឋប្រហារដោយមេដឹកនាំយោធា ឬក្រុមណាមួយ ដែលប្រសិនបើពួកគេកើតឡើង នឹងនាំទៅរកការបរាជ័យម្តងហើយម្តងទៀតសម្រាប់ប្រទេសថៃ និងកង្វះស្ថិរភាពនយោបាយដែលនឹងបង្កើតទំនុកចិត្តក្នុងសហគមន៍អន្តរជាតិ។

តាមរយៈសេចក្តីថ្លែងការណ៍នោះ ពួកគេ ក៏អំពាវនាវឱ្យរដ្ឋាភិបាល និងសភា ធ្វើវិសោធនកម្មរដ្ឋធម្មនុញ្ញឆ្នាំ ២០១៧ ជាបន្ទាន់ ដែលជាបញ្ហា និងជាឧបសគ្គក្នុងការដោះស្រាយបញ្ហានយោបាយ ដើម្បីឈានទៅរកការផ្លាស់ប្តូរតាមគោលការណ៍ប្រជាធិបតេយ្យ និងការតាក់តែងរដ្ឋធម្មនុញ្ញប្រជាធិបតេយ្យថ្មីដោយប្រជាជន ដែលនឹងអនុញ្ញាតឱ្យប្រទេសថៃដើរទៅមុខប្រកបដោយសេចក្តីថ្លៃថ្នូរ៕

រ៉ាន់ រើយ

The post សម្ពាធកើនឡើងគរដូចភ្នំ ទាមទារឲ្យ ផែថងថាន ចុះចេញពីអំណាច appeared first on Kampuchea Thmey Daily.

​ប្រទេសថៃ Archives - Kampuchea Thmey Daily

បាក់​ស្ពានអាកាសថ្មើរជើងនៅថៃ បណ្តាលឲ្យ​មនុស្សរងរបួស​៣នាក់

Anutin ប្រកាស​​អរគុណ Vorapak ដែលចុះពី​តំណែង​ ទាក់ទិននឹង​រឿងអាស្រូវ Scam

​​នាយករដ្ឋមន្ត្រី​ថៃ ​ចេញបញ្ជា​ឲ្យ​វាយ​កម្ទេច​​ស្នាក់ការ​ប៉ូលិស​​​​នៅ​បាងកក​​​

​​​អាជ្ញាធរ​ខេត្តនគរ​រាជសីមាថៃ ​ចាប់​បង្ខំ​​បុគ្គលិក​រដ្ឋ​២០០​នាក់​​ធ្វើតេស្ត​រក​សារធាតុញៀន​

​អ្នកវិភាគថា ​ភាពមិនច្បាស់​លាស់​នយោបាយ​ថៃ​ត្រូវ​ការ​ច្រើនខែ​ ខណៈទីផ្សា​រ​ថៃ​ដាំក្បាល​​អាក្រក់​បំផុត​

សម្ពាធ​កើន​ឡើង​គរដូច​ភ្នំ ​ទាមទារ​ឲ្យ ផែថងថាន ចុះ​ចេញ​ពីអំណាច​

ប្រទេសថៃ Archives - Kampuchea Thmey Daily

បាក់ស្ពានអាកាសថ្មើរជើងនៅថៃ បណ្តាលឲ្យមនុស្សរងរបួស៣នាក់

Anutin ប្រកាសអរគុណ Vorapak ដែលចុះពីតំណែង ទាក់ទិននឹងរឿងអាស្រូវ Scam

នាយករដ្ឋមន្ត្រីថៃ ចេញបញ្ជាឲ្យវាយកម្ទេចស្នាក់ការប៉ូលិសនៅបាងកក

អាជ្ញាធរខេត្តនគររាជសីមាថៃ ចាប់បង្ខំបុគ្គលិករដ្ឋ២០០នាក់ធ្វើតេស្តរកសារធាតុញៀន

អ្នកវិភាគថា ភាពមិនច្បាស់លាស់នយោបាយថៃត្រូវការច្រើនខែ ខណៈទីផ្សារថៃដាំក្បាលអាក្រក់បំផុត

សម្ពាធកើនឡើងគរដូចភ្នំ ទាមទារឲ្យ ផែថងថាន ចុះចេញពីអំណាច