ព័ត៌មានអន្ដរជាតិ

Anutin ប្រកាសអរគុណ Vorapak ដែលចុះពីតំណែង ទាក់ទិននឹងរឿងអាស្រូវ Scam

បានផុស

៦ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

Chheang

នាយករដ្ឋមន្ត្រីថៃ លោក Anutin Charnvirakul កាលពីថ្ងៃទី២២ខែតុលា បានប្រកាសអរគុណអនុរដ្ឋមន្ត្រីក្រសួងហិរញ្ញវត្ថុ លោក Vorapak Tanyawong ដែលបានលាលែងពីតំណែង ចំពេលមានរបាយការណ៍ដែលភ្ជាប់លោកទៅនឹងបណ្តាញបោកប្រាស់(Scam)ឆ្លងដែន ដោយបានហៅចំណាត់ការនេះថាជា«ការបង្ហាញពីចរិកលក្ខណៈ»។

លោក Anutin Charnvirakul (រូបថត៖ Reuters)

លោក Vorapak ដែលបម្រើការបានត្រឹមតែ៣៣ថ្ងៃ បាននិយាយថា លោកបានចុះចេញពីតំណែងដើម្បី«ជៀសវាងការក្លាយជាឧបសគ្គ» នៅពេលដែលរដ្ឋាភិបាលជិតដល់ការរំលាយសភានៅខែមករាឆ្នាំក្រោយ មុនការបោះឆ្នោតសកលខែមីនាឆ្នាំ២០២៦។ លោក Vorapak បានច្រានចោលរាល់ការចោទប្រកាន់ទាំងនោះ ដោយហៅថា«ការលាបពណ៌គ្មានមូលដ្ឋាន»។ ជាធនាគារិកជើងចាស់មួយរូប និងជាអតីតនាយកប្រតិបត្តិធនាគារ Krung Thai Bank លោក Vorapak បានបន្ថែមថា រាល់ជំនួញរបស់លោកកន្លងមកគឺស្របច្បាប់ និងមិនពាក់ព័ន្ធនឹងបណ្តាញបោកប្រាស់ទេ។

នៅពេលឆ្លើយសំនួរអ្នកកាសែត លោក Anutin បានប្រកែកថា រឿងអាស្រូវនេះនឹងមិនប៉ះពាល់រដ្ឋបាលរបស់លោកឡើយ ដោយទទូចថា រដ្ឋាភិបាលរបស់លោកកំពុងតាមដាន និងបង្កកទ្រព្យសម្បត្តិដែលទាក់ទងនឹងការឆបោករួចហើយ។

បន្ថែមពីនេះ លោកប្រាប់ថានឹងមិនមានការតែងតាំងអនុរដ្ឋមន្ត្រីហិរញ្ញវត្ថុថ្មី ដើម្បីជំនួសលោក Vorapak ទេ ដោយពន្យល់ថា រដ្ឋបាលរបស់លោកនៅសេសសល់ពេលវេលាមិនច្រើន ដោយសភាតំណាងរាស្រ្តបានកំណត់ថានឹងត្រូវរំលាយនៅថ្ងៃទី៣១ខែមករា ដូច្នេះហើយការបំពេញមុខតំណែងទំនេរគឺមិនចាំបាច់។

អ្នកវិភាគនយោបាយបាននិយាយថា ការលាលែងពីតំណែងយ៉ាងឆាប់រហ័សឆ្លុះបញ្ចាំងពីការខិតខំប្រឹងប្រែងរបស់រដ្ឋាភិបាលលោក Anutin ក្នុងការទប់ស្កាត់ការខូចខាតផ្នែកនយោបាយ ខណៈដែលគណបក្សប្រឆាំងបង្កើនការរិះគន់ពីអសមត្ថភាពជុំវិញការដោះស្រាយបណ្ដាញបោកប្រាស់ឆ្លងព្រំដែន៕