អនុរដ្ឋមន្ត្រីហិរញ្ញវត្ថុថៃ លាលែងតំណែង ក្រោយជាប់សង្ស័យពាក់ព័ន្ធក្រុម Scam

អនុរដ្ឋមន្ត្រីក្រសួងហិរញ្ញវត្ថុថៃ Vorapak Tanyawong បានសម្រេចលាលែងពីតំណែង បន្ទាប់ពីត្រូវគេសង្ស័យថា មានជាប់ពាក់ព័ន្ធជាមួយក្រុមឧក្រិដ្ឋកម្មតាមអនឡាញ (Scam)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ The Nation, លោក Vorapak​ បានប្រកាសពីការបញ្ចប់តួនាទីកាលពីថ្ងៃពុធទី២២ខែតុលាឆ្នាំ២០២៥ ស្របពេលមានសេចក្តីរាយការណ៍ថា លោកស្ថិតក្នុងចំណោមអ្នកនយោបាយថៃ៧នាក់ ដែលជាប់ជំពាក់វាក់វិនជាមួយក្រុមបណ្តាញ Scam។

លោកបានបដិសេធយ៉ាងដាច់អហង្ការចំពោះការជាប់ពាក់ព័ន្ធណាមួយ និងបញ្ជាក់ថា ឈ្មោះនិងរូបថតរបស់លោកត្រូវបានគេយកទៅប្រើដោយគ្មានការអនុញ្ញាត។ Vorapak ក៏ច្រានចោលផងដែរចំពោះការចោទប្រកាន់លើភរិយារបស់លោកទាក់ទងនឹងរូបិយប័ណ្ណគ្រីបតូ ថាជារឿងមិនពិត។

យ៉ាងណាក្តី Vorapak លើកឡើងថា លោកលាលែងពីតំណែងគឺព្រោះតែមិនចង់ក្លាយជាបន្ទុកដល់រដ្ឋាភិបាល ដោយសម្តែងនូវការប្ដេជ្ញាចិត្តចំពោះតម្លាភាព ហើយក៏សន្យាដែរថា នឹងចាត់វិធានការផ្លូវច្បាប់ប្រឆាំងនឹងអ្នកដែលផ្សព្វផ្សាយព័ត៌មានមិនពិត។

បច្ចុប្បន្ន រឿងរ៉ាវជុំវិញការសង្ស័យលើមន្ត្រីថៃធំៗពាក់ព័ន្ធ Scam កំពុងក្លាយជាប្រធានបទក្តៅនៅក្នុងប្រទេស។ ជាក់ស្តែងករណីចុងក្រោយបំផុតគឺពាក់ព័ន្ធឧបនាយករដ្ឋមន្ត្រី និងជារដ្ឋមន្ត្រីក្រសួងកសិកម្មនិងសហករណ៍ Thamanat Prompow។

សមាជិកសភាគណបក្សប្រជាជនថៃ Rangsiman Rome បានចោទប្រកាន់ Thamanat ដោយឈ្លេចសួរជុំវិញទំនាក់ទំនងដ៏គួរឲ្យសង្ស័យរបស់ឧបនាយករដ្ឋមន្ត្រីរូបនេះ ជាមួយមេក្រុមឧក្រិដ្ឋកម្មអនឡាញសញ្ជាតិអាហ្វ្រិកខាងត្បូងម្នាក់។   

មិនត្រឹមប៉ុណ្ណឹង អ្វីដែលធ្វើឲ្យគេកាន់តែសង្ស័យនោះគឺ លោក Rangsiman ថែមទាំងបង្ហាញរូបថតប៉ុន្មានសន្លឹក ដែលលោក Thamanat នៅជាមួយបុរសសញ្ជាតិអាហ្វ្រិកខាងត្បូងក្នុងពិធីសាសនានាទៀតផង។

ម្យ៉ាងមុននេះ Thamanat ត្រូវបានកោះហៅឲ្យបង្ហាញខ្លួននៅចំពោះមុខគណៈកម្មាធិការសភាសន្តិសុខរដ្ឋ ដើម្បីបំភ្លឺពីទំនាក់ទំនងរបស់គាត់ជាមួយមេក្រុមឧក្រិដ្ឋកម្មម្នាក់នោះម្តងរួចមកហើយ៕

អត្ថបទ៖ សុខ សុវណ្ណ

ចុចអាន៖ ឧបនាយករដ្ឋមន្ត្រីថៃ សង្ស័យជាប់ពាក់ព័ន្ធបណ្តាញក្រុមឧក្រិដ្ឋកម្មអនឡាញ