ប្រធានាធិបតីអាមេរិក Archives - Kampuchea Thmey Daily

លោក Obama និងភរិយា ចង់ឃើញការផ្លាស់ប្តូរនៅអាមេរិកឲ្យមានប្រធានាធិបតីជាស្រ្តី

Minea Neu — Thu, 22 Jan 2026 06:48:33 +0000

លោកស្រី Michelle Obama បាននិយាយនៅក្នុងបទសម្ភាសន៍មួយដែលបានចេញផ្សាយកាលពីថ្ងៃពុធថា ប្រទេសអាមេរិកកំពុងឆ្ពោះទៅរកការមានប្រធានាធិបតីស្ត្រីហើយ ដោយបញ្ជាក់ពីអ្វីដែលលោកស្រីធ្លាប់បានលើកឡើង បន្ទាប់ពីមានការយល់ច្រឡំចំពោះលោកស្រី ថាសហរដ្ឋអាមេរិកមិនទាន់រួចរាល់សម្រាប់រឿងនេះ។

លោក Barack Obama និងប្រពន្ធ។ Reuters

តែយ៉ាងណា លោកស្រីបានឆ្លើយតបក្នុងកម្មវិធីទូរទស្សន៍ «Call Her Daddy» ថា៖ «វាត្រូវការពេលវេលា តែខ្ញុំគិតថាយើងកំពុងផ្លាស់ប្តូរបន្តិចម្តងៗហើយ។ ពួកយើងនឹងសម្រេចបាន ដែលសហរដ្ឋអាមេរិកគួរតែមានប្រធានាធិបតីជាស្រី្ត»។

មិនតែប៉ុណ្ណោះ លោកស្រី Obama ក៏បានលើកឡើងថា៖ «ការលើកឡើង ពីមុនមិនមែនជាការពិតទេ»។

លើសពីនេះ លោកស្រី ធ្លាប់បាននិយាយកាលពីឆ្នាំមុន អំឡុងពេលផ្សព្វផ្សាយសៀវភៅរបស់ខ្លួន ចំណងជើង «The Look» ថា៖ «នោះហើយជាមូលហេតុដែលអ្នកខ្លះមើលមកខ្ញុំ ថាកំពុងចង់ពន្លឿនតាមអ្វីតាមចិត្តឯង តាមពិតមិនមែនទេ។ ព្រោះអ្នកទាំងនោះកំពុងរកលេស ថាមិនទាន់ត្រៀមខ្លួនសម្រាប់ស្ត្រីជាថ្នាក់ដឹកនាំនៅឡើយ» ។

យោងតាម CNN, លោក Alex Cooper បានចោទសួរក្នុងកម្មវិធី «Call Her Daddy» ថា៖«តើប្រទេសមួយត្រូវធ្វើអ្វីខ្លះ ដើម្បីត្រៀមខ្លួនធ្វើជាប្រទេស ដែលមានប្រធានាធិបតីជាស្ត្រីជាលើកដំបូង?»។

លោកស្រី Michelle Obama បានឆ្លើយតបថា៖ «យើងចាំបាច់ត្រូវមានការសន្ទនាអំពីអារម្មណ៍របស់ប្រជាជន ថាតើពួកគេពេញចិត្តចំពោះស្ត្រីដែលដឹកនាំប្រទេសឬអត់!»។

លោកស្រីបានបន្តទៀតថា៖« វានឹងមានបុរសនៅទីនេះដែលមិនបោះឆ្នោតឱ្យស្ត្រី។ អ្នកដឹងទេថា … ប្រជាជននឹងលើកឡើងនួវរឿងទាំងនេះមកនិយាយ។ ប៉ុន្តែចូរនិយាយអ្វីដែលជាការពិត ហើយគួររៀបចំតុមួយ និយាយពីអ្វីដែលត្រូវនិយាយ និង ព្យាយាមរកចម្លើយឱ្យឃើញ»។

លោកស្រីបានបន្ថែមទៀតថា៖ «កុំខឹង ព្រោះតែខ្ញុំឱ្យយោបល់អី។ ឥឡូវយើងសាកក្រឡេកមើល បេក្ខភាពស្រ្តីពីររូបដែលមានសមត្ថភាពពិតៗ កន្លងមកទៅមើល៌»។

ដោយលោកស្រី បានចង្អុលបង្ហាញថា ទីមួយគឺអតីតរដ្ឋមន្ត្រីការបរទេស លោកស្រី Hillary Clinton ដែលបានឈរឈ្មោះជាប្រធានាធិបតី និងចាញ់ក្នុងឆ្នាំ ២០០៨ និង ២០១៦ នៅអាណត្តិរបស់ប្តីលោកស្រីផ្ទាល់ និងអតីតអនុប្រធានាធិបតី លោកស្រី Kamala Harris ដែលត្រូវចាញ់ ប្រធានាធិបតីបច្ចុប្បន្ន លោក ដូណាល់ ត្រាំ ក្នុងឆ្នាំ២០២៤។

មិនតែប៉ុណ្ណោះ លោកស្រី Michelle បន្ថែមទៀតថា៖«តាមពិតយើងមានស្ត្រីដែលមានសមត្ថភាព និងការអប់រំខ្ពស់រួចហើយ … ហេតុអ្វីយើងមិនអាចនិយាយអំពីរឿងនេះបាន? ហេតុអ្វីបានយើងត្រូវធ្វើពុតថាអាមេរិកមិនអាចធ្វើបាន?»៕

ប្រែសម្រួល៖ ណឺ មិនា

The post លោក Obama និងភរិយា ចង់ឃើញការផ្លាស់ប្តូរនៅអាមេរិកឲ្យមានប្រធានាធិបតីជាស្រ្តី appeared first on Kampuchea Thmey Daily.

បណ្ឌិត យង់ ពៅ៖ កម្ពុជានឹងចារឹកពីការងារដ៏មានតម្លៃរបស់លោកត្រាំជាប្រវត្តិសាស្ត្រ ក្នុងការដោះស្រាយបញ្ហាកម្ពុជា-ថៃ

អុន ស្រីមាន — Tue, 29 Jul 2025 05:01:16 +0000

បណ្ឌិត យង់ ពៅ អ្នកជំនាញភូមិសាស្ត្រនយោបាយកម្ពុជា បានលើកឡើងថា កម្ពុជានឹងចារឹកពីការងារដ៏មានតម្លៃរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ជាប្រវត្តិសាស្ត្រ ក្នុងនាមលោកជាមេដឹកនាំមហាអំណាចលេខ១ នៃពិភពលោក បានចូលខ្លួនដោយផ្ទាល់សម្របសម្រួលបទឈប់បាញ់រវាងកម្ពុជា-ថៃ ហើយលោកត្រាំមានសេណារីយ៉ូច្បាស់លាស់ និងចង់បានសន្តិភាពពិតប្រាកដ។

លោកបណ្ឌិត យង់ ពៅ អះអាងខាងលើ ព្រោះលោកត្រាំ គឺជាប្រធានាធិបតីកំពូលនៃពិភពលោកបានចូលខ្លួនមកដោះស្រាយបញ្ហាកម្ពុជា-ថៃ ដោយផ្ទាល់ លោក មិនមែនឱ្យរដ្ឋមន្ត្រីការបរទេស ឬឯកអគ្គរដ្ឋទូតសហរដ្ឋអាមេរិកមកដោះស្រាយឡើយ ពោល គឺលោកត្រាំបានទូរសព្ទផ្ទាល់មកកាន់នាយករដ្ឋមន្ត្រីកម្ពុជា និងទូរសព្ទទៅនាយករដ្ឋមន្ត្រីស្តីទីថៃ។ បន្ថែមពីនេះ លោកបណ្ឌិត ថា លោកត្រាំមានសេណារីយ៉ូច្បាស់លាស់ ដោយរៀបចំកិច្ចប្រជុំបទឈប់បាញ់នៅប្រទេសម៉ាឡេស៊ី សម្របសម្រួលពីប្រធានអាស៊ាន នៅថ្ងៃទី២៨ ខែកក្កដា ឆ្នាំ២០២៥ ព្រមទាំងមានការចូលរួមពីតំណាង អាមេរិក និងចិន ផងដែរ។

អ្នកជំនាញ បានបន្តថា ៖ «ហើយសេណារីយ៉ូមួយទៀត គាត់បានកំណត់ថា ប្រសិនបើមិនមានបទឈប់បាញ់តាមអ្វីដែលគាត់ស្នើទេ នោះនឹងសហរដ្ឋអាមេរិក នឹងមិនជជែករឿងពន្ធសម្រាប់នាំទៅសហរដ្ឋអាមេរិករវាងប្រទេសថៃ ក៏ដូចជាប្រទេសកម្ពុជានោះទេ»។ លោកបណ្ឌិត បន្ថែមថា លោកត្រាំមើលឃើញ និងមានវិធានមការណ៍ច្បាស់លាស់បែបនេះ ព្រោះរឿងពន្ធគយ ទាំងថៃ កម្ពុជា និងប្រទេសដទៃ សុទ្ធតែត្រូវការចរចារជាមួយអាមេរិក។ លោកថា កម្ពុជាត្រូវកត់សម្គាល់ក្នុងប្រវត្តិសាស្ត្រព្រោះ ប្រធានាធិបតីអាមេរិក បានធ្វើការដោយផ្ទាល់ជាមួយប្រទេសចំនួន៣ គឺកម្ពុជា ថៃ និងម៉ាឡេស៊ី ក្នុងការដោះស្រាយបញ្ហានេះ ដោយសារលោក ដូណាល់ ត្រាំ ចង់បានសន្តិភាពពិតប្រាកដ នៅតំបន់នេះ។

សូមជម្រាបថា កាលពីថ្ងៃទី២៨ ខែកក្កដា កម្ពុជា ថៃ បានចូលរួមកិច្ចប្រជុំចរចារនៅប្រទេសម៉ាឡេស៊ី ក្រោមការសម្របសម្រួលពីប្រធានអាស៊ាន និងរៀបចំដោយអាមេរិក។ បន្ទាប់ពីចប់កិច្ចប្រជុំ ភាគីកម្ពុជា និងថៃ បានឯកភាពចំនួន ៣ចំណុច៖ ១. កម្ពុជា-ថៃ បទឈប់បាញ់បន្ទាន់ ដោយឥតលក្ខខណ្ឌ ដែលនឹងចូលជាធរមាននៅវេលាម៉ោង២៤:០០នាទី ថ្ងៃទី២៨ ខែកក្កដា ឆ្នាំ២០២៥។ ២. កម្ពុជា-ថៃ រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ (ភាគីថៃ យោធភូមិភាគទី១ និងទី២ និងភាគីកម្ពុជា គឺយោធភូមិភាគទី៤ និងទី៥) នៅវេលាម៉ោង០៧:០០ ថ្ងៃទី២៩ ខែកក្កដា ឆ្នាំ២០២៥។ ៣. កម្ពុជា-ថៃ រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី៤ ខែសីហា ឆ្នាំ២០២៥ ដែលកម្ពុជានឹងធ្វើជាម្ចាស់ផ្ទះ។

ជាមួយគ្នានេះ លោក ដូណាល់ ត្រាំ ប្រធានាធិបតីសហរដ្ឋអាមេរិក បានបង្ហោះលើបណ្តាញសង្គម X នៅថ្ងៃទី២៨ ខែកក្កដា ជាភាសាអង់គ្លេស និងបកជាភាសាខ្មែរថា ៖«ខ្ញុំទើបតែបានជជែកជាមួយនាយករដ្ឋមន្រ្តីស្តីទីនៃប្រទេសថៃ និងនាយករដ្ឋមន្រ្តីនៃប្រទេសកម្ពុជា។ ខ្ញុំមានមោទនភាពប្រកាសថា បន្ទាប់ពីការចូលរួមសម្របសម្រួល ប្រទេសទាំងពីរបានឈានដល់កិច្ចព្រមព្រៀង បទឈប់បាញ់ និង សន្តិភាព។ ខ្ញុំសូមអបអរសាទរអ្នកទាំងអស់គ្នាដែលបានបញ្ចប់សង្គ្រាមនេះ ដែលបានសង្គ្រោះជីវិតមនុស្សរាប់ម៉ឺននាក់។ ជាមួយគ្នានេះ ខ្ញុំបានណែនាំក្រុមពាណិជ្ជកម្មឱ្យចាប់ផ្តើមចរចាពាណិជ្ជកម្មឡើងវិញពាក់ព័ន្ធពន្ធបដិកា។ ក្នុងអាណត្តិជាប្រធានាធិបតីសហរដ្ឋអាមេរិក ខ្ញុំបានបញ្ចប់សង្គ្រាមជាច្រើនក្នុងរយៈពេលតែប្រាំមួយខែ ហើយខ្ញុំមានមោទនភាពក្នុងនាមជាប្រធានាធិបតីនៃ សន្តិភាព!»៕

The post បណ្ឌិត យង់ ពៅ៖ កម្ពុជានឹងចារឹកពីការងារដ៏មានតម្លៃរបស់លោកត្រាំជាប្រវត្តិសាស្ត្រ ក្នុងការដោះស្រាយបញ្ហាកម្ពុជា-ថៃ appeared first on Kampuchea Thmey Daily.

លោក ដូណាល់ ត្រាំ រកប្រាក់បាន ២៣៩ លានដុល្លារពីការបរិច្ចាគសម្រាប់ពិធីឡើងកាន់អំណាច

Rann Reuy — Mon, 21 Apr 2025 04:48:25 +0000

ការឡើងកាន់អំណាចលើកទី២របស់លោក ដូណាល់ ត្រាំ (Donald Trump) ដ៏មានឥទ្ធិពលកាលពីខែមករាឆ្នាំ២០២៥ បានធ្វើឲ្យឥទ្ធិពលនយោបាយរបស់លោកជះទៅលើអ្នកជំនួញ អ្នកវិនិយោគសហរដ្ឋអាមេរិកយ៉ាងខ្លាំង។ តាមរយៈឥទ្ធិពលនយោបាយនោះ ពិធីឡើងកាន់អំណាចរបស់លោក ដូណាល់ ត្រាំ បានរៃអង្គាសប្រាក់រហូតដល់២៣៩លានដុល្លារសម្រាប់អាណត្តិទី២ ដែលកើនលើសទ្វេដងធៀបនឹងអាណត្តិទី១កាលឆ្នាំ២០១៧។

រូបភាពបង្ហាញពីលោកត្រាំក្នុងពិធីឡើងកាន់អំណាច។ WUSA9

សារព័ត៌មាន Financial Times បានចេញសេចក្តីរាយការណ៍មួយដោយដកស្រង់ឯកសារសហព័ន្ធដែលបានបង្ហាញថា លោក ដូណាល់ ត្រាំ បានរៃអង្គាសប្រាក់បានជាង ២៣៩លានដុល្លារសម្រាប់ពិធីសម្ពោធលើកទីពីររបស់គាត់ ដែលជាចំនួនបំបែកកំណត់ត្រាសម្រាប់ការឡើងកាន់ដំណែងប្រធានាធិបតីសហរដ្ឋអាមេរិក។

ថវិកាដ៏ច្រើនសន្ធឹកសន្ធាប់នេះ បានទទួលពីការបរិច្ចាគរបស់ នាយកប្រតិបត្តិក្រុមហ៊ុនខ្នាតយក្សពហុជាតិដ៏មានឥទ្ធិពលបំផុតជាច្រើនរបស់សហរដ្ឋអាមេរិក ដែលហាក់ដូចជាការគាប់គុណ បំពេញចិត្តប្រធានាធិបតីដែលចូលមកដឹកនាំប្រទេសសម្រាប់អាណត្តិ៤ឆ្នាំ។

សេចក្តីរាយការណ៍នោះ បានឲ្យដឹងថា ឯកសារដែលបានលាតត្រដាងកាលពីថ្ងៃអាទិត្យបានបង្ហាញថា ភាគច្រើននៃក្រុមហ៊ុនធំៗរបស់សហរដ្ឋអាមេរិកជាពិសេសក្រុមហ៊ុនប្រតិបត្តិការនៅក្នុងវិស័យបច្ចេកវិទ្យា បានធ្វើការបរិច្ចាគ។

នៅមុនការឡើងកាន់តំណែងជាផ្លូវការ នាយកប្រតិបត្តិក្រុមហ៊ុន Apple លោក Tim Cook ម្ចាស់ក្រុមហ៊ុន OpenAI លោក Sam Altman និងនាយកប្រតិបត្តិ Uber លោក Dara Khosrowshahi ម្នាក់ៗបានផ្តល់ប្រាក់ចំនួន ១ លានដុល្លារ។ ក្រុមហ៊ុនខ្នាតយក្សផ្សេងទៀត ដូចជា ក្រុមហ៊ុន Nvidia, Google, Meta, Broadcom, Perplexity AI, C3.AI, Micron, Qualcomm និង Intuit ក៏បានបរិច្ចាគក្នុងទំហំទឹកប្រាក់នោះដែរ។

ក្រុមហ៊ុន Robinhood ដែលដំណើរការកម្មវិធីថ្នាលបច្ចេកវិទ្យាពាណិជ្ជកម្មលក់រាយ បានផ្តល់ប្រាក់ចំនួន២លានដុល្លារ ខណៈដែលក្រុមហ៊ុនប្រាក់អេឡិចត្រូនិក (គ្រីបតូ) Coinbase និង Solana ម្នាក់ៗបានបរិច្ចាគ ១លានដុល្លារ។ តាមសេចក្តីរាយការណ៍នោះ ក្រុមហ៊ុន IBM និង Microsoft បានផ្តល់ប្រាក់ចំនួន ៧៥ម៉ឺនដុល្លារ។

នាយកប្រតិបត្តិ និងមហាសេដ្ឋីឈានមុខគេជាច្រើនរបស់អាមេរិកបានចូលរួមពិធីសម្ពោធរបស់លោក ត្រាំ រួមទាំងលោក Cook ប្រធានក្រុមហ៊ុន Meta លោក Mark Zuckerberg ថៅកែ Google Sundar Pichai និងលោក Jeff Bezos របស់ក្រុមហ៊ុន Amazon។

សេចក្តីរាយការណ៍នោះ បានឲ្យដឹងថា ការរៃអង្គាសប្រាក់បានរហូតច្រើនជាងពីរដងនៃចំនួនទឹកប្រាក់ ១០៧ លានដុល្លារដែល លោក ត្រាំ បានទទួលក្នុងពេលឡើងកាន់អំណាចក្នុងឆ្នាំ២០១៧។

ក្រុមហ៊ុនហិរញ្ញវត្ថុយក្សរួមមាន JPMorgan Chase, BlackRock, Blackstone និង Goldman Sachs ម្នាក់ៗបានបរិច្ចាគ១លានដុល្លារ ដល់គណៈកម្មាធិការ ដូចក្រុមហ៊ុនទូរគមនាគមន៍ AT&T, Comcast និង Verizon ដែរ។

កុ្រមហ៊ុនអាកាសចរណ៍អាមេរិក រួមមាន United Airlines និង Delta Air Lines ក្រុមថាមពល ConocoPhillips ក្រុមហ៊ុន ExxonMobil និង Occidental Petroleum ក្រុមឱសថ Merck និង Pfizer និងក្រុមហ៊ុនផលិតរថយន្ត Stellantis ក្រុមហ៊ុន Hyundai ក្រុមហ៊ុន General Motors និង Toyota ដោយពួកគេនិមួយៗបានផ្តល់ប្រាក់ចំនួន ១លានដុល្លារ។ ចំណែកក្រុមហ៊ុនថាមពលខ្នាតយក្ស Chevron វិញ បានផ្តល់ប្រាក់ចំនួន ២លានដុល្លារ។

ម៉ាកយីហោអាមេរិក McDonald’s, FedEx, Target និង Boeing ត្រូវបានចូលរួមដោយក្រុមហ៊ុនដែលមិនសូវស្គាល់ដូចជា Bank OZK និង Breeze Smoke ក្នុងការបរិច្ចាគ ១លានដុល្លារ ឬច្រើនជាងនេះ៕

ដោយ រ៉ាន់ រើយ

The post លោក ដូណាល់ ត្រាំ រកប្រាក់បាន ២៣៩ លានដុល្លារពីការបរិច្ចាគសម្រាប់ពិធីឡើងកាន់អំណាច appeared first on Kampuchea Thmey Daily.

លោកអូបាម៉ា ទម្លាក់សំណេរមួយ ក្រោយធ្លាយដំណឹងលែងលះជាមួយភរិយា

សាង ស្រីល័ក្ខ — Tue, 21 Jan 2025 02:00:43 +0000

អតីតប្រធានាធិបតីអាមេរិក លោក បារ៉ាក់ អូបាម៉ា បានបង្ហាញពីក្តីស្រលាញ់របស់គាត់ចំពោះភរិយា Michelle Obama បន្ទាប់ពីមានពាក្យចចាមអារ៉ាមអំពីការលែងលះបានផ្សព្វផ្សាយនៅលើបណ្តាញសង្គម កាលពីប៉ុន្មានថ្ងៃមុននេះ។

អតីតប្រធានាធិបតីសហរដ្ឋអាមេរិក បានបង្ហាញពីអារម្មណ៍ចំពោះភរិយាក្នុងថ្ងៃខួបកំណើតគម្រប់ ៦១ ឆ្នាំ ដោយសរសេរពេញដោយអទ្ថន័យថា «រីករាយថ្ងៃកំណើតដល់ក្តីស្រលាញ់នៃជីវិតរបស់ខ្ញុំ Michelle Obama។ អ្នកបំពេញគ្រប់យ៉ាងដោយភាពកក់ក្តៅ ប្រាជ្ញា ភាពកំប្លុកកំប្លែង និងការទាក់ទាញ។ អ្នកមើលទៅពូកែ ខ្ញុំមានសំណាងណាស់ដែលមានអ្នកជាដៃគូរបស់ខ្ញុំក្នុងជីវិត។ ខ្ញុំស្រឡាញ់អ្នក»។

យ៉ាងណា ទង្វើចុងក្រោយរបស់លោក និងលោកស្រី អូបាម៉ា បានធ្វើឲ្យអ្នកគាំទ្រហាក់មានអារម្មណ៍ធូរស្បើយជាងមុន ព្រោះកន្លងមក បណ្ដាញសង្គមមានការងឿងឆ្ងល់ជាមួយការសង្ស័យថា គូស្នេហ៍ដ៏មានឥទ្ធិពលមួយគូនេះ បានលែងលះគ្នាបន្ទាប់ពីរៀបការបាន ៣៣ ឆ្នាំ។

ពាក្យចចាមអារ៉ាមមួយនេះទៀតសោត បានផ្ទុះឡើង បន្ទាប់ពីអ្នកលេងអ៊ីនធឺណិតបានកត់សម្គាល់ថា Michelle មិនបានបង្ហាញខ្លួនជាមួយស្វាមីរបស់នាង ក្នុងរយៈពេលប៉ុន្មានសប្តាហ៍ថ្មីៗនេះ។ នាងបានអវត្តមានពីពិធីបុណ្យសពរបស់អតីតប្រធានាធិបតី Jimmy Carter កាលពីថ្ងៃទី ០៩ ខែមករា ដោយសារកាលវិភាគមិនត្រវគ្នា។

លើសពីនេះ ការិយាល័យបានបញ្ជាក់ថា ម្ចាស់ក្រុមហ៊ុន Becoming មិនបានចូលរួមពិធីសម្ពោធលោក Donald Trump និងលោក Obama កាលពីថ្ងៃទី២០ ខែមករា នោះទេ។ មនុស្សជាច្រើនមានមតិចម្រុះលើបញ្ហានេះដោយគិតថាវាជាសញ្ញានៃអស្ថិរភាពក្នុងអាពាហ៍ពិពាហ៍របស់គូស្វាមីភរិយាលោកអូបាម៉ា។

CNN បានរាយការណ៍ថា លោកស្រី Michelle មិនបានចូលរួមពិធីបុណ្យសពរបស់លោក Jimmy Carter ទេ ដោយសារតែនាងមានវិស្សមកាលយូរនៅហាវ៉ៃ។ ជាមួយគ្នានេះដែរ ប្រភពពី Page Six បានបង្ហើបថា មេធាវីស្ត្រីកើតនៅឆ្នាំ ១៩៦៤ មិនបានចូលរួមពិធីសម្ពោធរបស់លោក Trump ទេ ដោយសារតែនាងមិនចង់លេចមុខ។

ពួកគេត្រូវបានគេឃើញជាលើកចុងក្រោយនៅពាក់កណ្តាលខែធ្នូ នៅពេលពួកគេចេញទៅញ៉ាំអាហារពេលល្ងាចនៅ Los Angeles។ រូបថត Paparazzi បង្ហាញ Michelle ញញឹមដាក់កាមេរ៉ា ពេលនាងចាកចេញពីភោជនីយដ្ឋាន Mother Wolf ខណៈដែលលោក Obama ដើរតាមពីក្រោយដោយទឹកមុខធ្ងន់ធ្ងរ។ បន្ទាប់ពីឡើងឡាន ស្នាមញញឹមរបស់ Michelle រសាត់បាត់។

តាមរយៈរូបថតនេះ អ្នកជំនាញខាងភាសាកាយវប្បកម្មជនជាតិអង់គ្លេស Judi James បានអធិប្បាយទៅកាន់ Daily Mail ថា គូស្នេហ៍មួយគូនេះ មិនមានសញ្ញានៃការទាក់ទងគ្នានោះទេ។ បើតាមអ្នកជំនាញ លោកអូបាម៉ាមើលទៅក្រៀមក្រំណាស់ ដោយជ្រើសរើសដើរពីក្រោយ ជាជាងដើរជាមួយប្រពន្ធ។

បន្ថែមពីលើពាក្យចចាមអារ៉ាមអំពីការលែងលះ លោកស្រី អូបាម៉ា ក៏រងការរិះគន់ផងដែរ ចំពោះការមិនគោរព និងវាយតម្លៃខ្លួនឯងហួសហេតុ ដែលមិនបានចូលរួមពិធីសម្ពោធលោក Trump ជាប្រធានាធិបតីសហរដ្ឋអាមេរិក៕

អត្ថបទ៖ សាង ស្រីល័ក្ខ

ចុចអាន៖អតីតប្រធានាធិបតីអាមេរិក អូបាម៉ា ចែករំលែកអ្នកអាន ពីសៀវភៅលោកចូលចិត្តបំផុត

The post លោកអូបាម៉ា ទម្លាក់សំណេរមួយ ក្រោយធ្លាយដំណឹងលែងលះជាមួយភរិយា appeared first on Kampuchea Thmey Daily.

ប្រធានាធិបតីមានបំផុតទាំង៥រូប របស់សហរដ្ឋអាមេរិក

Sok Sovann — Fri, 15 Nov 2024 06:30:00 +0000

កាលពីថ្ងៃទី៥ខែវិច្ឆិកាឆ្នាំ២០២៤ លោក Donald Trump បានជាប់ឆ្នោតសាជាថ្មី ក្លាយជាប្រធានាធិបតីទី៤៧ របស់សហរដ្ឋអាមេរិក។

លោកគឺជាអ្នកជំនួញនិងជាមហាសេដ្ឋីមានប្រាក់វាល់លាន។ យ៉ាងណា មិនមែនតែលោក Trump ឡើយ ប្រធានាធិបតីមុនៗរបស់សហរដ្ឋអាមេរិក ក៏ជាអ្នកមានដែរ ហើយថ្ងៃនេះ កម្ពុជាថ្មី សូមបង្ហាញជូនប្រធានាធិបតីមានបំផុតទាំង៥រូបរបស់សហរដ្ឋអាមេរិក៖

1. Donald Trump

លោក Donald Trump (រូបថត៖ AP)

ប្រធានាធិបតីទី៤៥និងទី៤៧របស់សហរដ្ឋអាមេរិករូបនេះ មានទ្រព្យសម្បត្តិសុទ្ធចំនួន ៣.៧ពាន់លានដុល្លារ នៅពេលគាត់ចាប់ផ្តើមកាន់តំណែងជាប្រធានាធិបតីអាណត្តិដំបូងក្នុងឆ្នាំ២០១៧ ហើយទ្រព្យសម្បត្តិរបស់គាត់បានកើនឡើងដល់ ៥.៣ពាន់លានដុល្លារ គិតត្រឹមពេលនេះ។

ប្រាក់ចំណូលភាគច្រើនរបស់គាត់ គឺបានមកពីការវិនិយោគអចលនទ្រព្យនិងក្រុមហ៊ុន Trump Media & Technology Group ដោយឆ្នាំនេះ ភាគហ៊ុនបានកើនឡើងរហូតដល់៥៩%ឯណោះ។

2. John F. Kennedy

លោក John F. Kennedy (រូបថត៖ Getty)

ប្រធានាធិបតីទី៣៥របស់សហរដ្ឋអាមេរិក លោក John F. Kennedy មានទ្រព្យសម្បត្តិ១.៣ពាន់លានដុល្លារ ដែលភាគច្រើនគឺជាមរតកបន្សល់ទុកពីឪពុករបស់គាត់។

ឪពុករបស់គាត់ឈ្មោះ Joseph Kennedy គឺជាមហាសេដ្ឋីវិនិយោគ ហើយត្រូវតែងតាំងជាប្រធានទីមួយនៃគណៈកម្មការមូលបត្រនៅឆ្នាំ១៩៣៤។

3. George Washington

លោក George Washington (រូបថត៖ Getty)

ប្រធានាធិបតីទីមួយគឺលោក George Washington មានទ្រព្យសម្បត្តិសុទ្ធចំនួន ៧០៩លានដុល្លារ។

យោងតាមប្រវត្តិវិទូ Douglas Brinkley បានឲ្យដឹងថាថា «ប្រធានាធិបតីអាមេរិកដំបូងរូបនេះ គឺជាអ្នកមាន ហើយគាត់ជាម្ចាស់អចលនទ្រព្យជាច្រើន»។ ប្រវត្តិវិទូផ្សេងទៀតនិយាយថា លោក Washington កើបទ្រព្យសម្បត្តិពីការដាំពោត ហើយប្រើវាដើម្បីធ្វើស្រាវីស្គី។

4. Thomas Jefferson

លោក Thomas Jefferson (រូបថត៖ Getty)

ប្រធានាធិបតីទី២ លោក Thomas Jefferson មានទ្រព្យសម្បត្តិ ២៨៦លានដុល្លារ ដែលភាគច្រើនក៏បានទទួលមរតកតាមរយៈដីធ្លីពីឪពុករបស់គាត់ដែរ។

5. Theodore Roosevelt

លោក Theodore Roosevelt (រូបថត៖ Getty)

ប្រធានាធិបតីទី២៦ លោក Theodore Roosevelt មានទ្រព្យសម្បត្តិសុទ្ធចំនួន ១៦៩លានដុល្លារ។ គាត់មកពីគ្រួសារវណ្ណៈខ្ពស់មួយក្នុងទីក្រុងញូវយ៉ក ហើយជាអ្នកទទួលបានមរតក៕

អត្ថបទ៖ សុខ សុវណ្ណ

The post ប្រធានាធិបតីមានបំផុតទាំង៥រូប របស់សហរដ្ឋអាមេរិក appeared first on Kampuchea Thmey Daily.

ឆ្កែរបស់លោក ចូ បៃដិន ខាំភ្នាក់ងារសម្ងាត់ អាមេរិក ចំនួន ៧ រូប

Boa Sokunveary — Wed, 26 Jul 2023 09:23:46 +0000

គិតត្រឹមរយៈពេល ៤ ខែ ឆ្កែរបស់ប្រធានាធិបតីអាមេរិកលោក ចូ បៃដិន បានខាំមនុស្សដល់ទៅ ៧ នាក់ ក្នុងនោះមានភ្នាក់ងារសម្ងាត់ម្នាក់កំពុងសម្រាកព្យាបាលនៅមន្ទីរពេទ្យទៀតផង ។

បើយោងតាមក្រុមឃ្លាំមើល Judicial Watch បានឲ្យដឹងថា ឧប្បត្តិហេតុនេះកើតឡើងកាលពីខែវិច្ឆិកា ឆ្នាំ ២០២២ នៅពេលឆ្កែលោក បៃដិន ពូជប៊ែកហ្សេចុះពីលើជណ្ដើរ ហើយរត់ទៅខាំភ្នាក់ងារសម្ងាត់ដែលកំពុងអង្គុយនៅខាងក្រោម ។ ឆ្កែនោះមានឈ្មោះថា Commander ឬមេបញ្ជាការ អាយុ ១ ឆ្នាំ ហើយភាគច្រើនវាខាំគេត្រង់ដៃ និងភ្លៅ បណ្ដាលឲ្យឈឺចាប់ជាខ្លាំងរហូតអ្នករងរបួសត្រូវសម្រាកនៅមន្ទីរពេទ្យរយៈពេល ៣ ថ្ងៃ បន្ទាប់ពីការវាយប្រហារ ។

ពាក់ព័ន្ធនឹងករណីខាងលើ មិត្តភ័ក្ដិរបស់អ្នករងរបួសនិយាយថា “វាកំប្លែងណាស់ បើឆ្កែនោះមិនមែនជារបស់លោក បៃដិន ទេនោះ គាត់ប្រហែលជាសម្លាប់វាបាត់ហើយ” ។

ឆ្កែ Commander ត្រូវបានប្រគល់ជូនលោក បៃដិន ក្នុងខែធ្នូ ឆ្នាំ ២០២១ បន្ទាប់ពីឆ្កែចាស់របស់គាត់ដែលមានអាយុ ១៣ ឆ្នាំបានងាប់ ។ ក្នុងពេលជាមួយគ្នានេះ ឆ្កែប៊ែកហ្សេផ្សេងទៀតរបស់លោក បៃដិន ឈ្មោះ Major ក៏ត្រូវបានបញ្ជូនទៅរដ្ឋ Delaware ផងដែរ ព្រោះវាបានខាំភ្នាក់ងារសម្ងាត់ម្តងហើយម្តងទៀត ។

កាលពីថ្ងៃអង្គារ លោក Tom Fitton ប្រធានក្រុមឃ្លាំមើល Judicial Watch បាននិយាយថា “នេះជារឿងឆ្កួត និងបង្ហាញពីអំពើពុករលួយ ដែលប្រធានាធិបតីអនុញ្ញាតឲ្យឆ្កែរបស់គាត់វាយប្រហារ និងខាំមនុស្សតាមចិត្ត” ។

ដោយឡែក បន្ទាប់ពីបញ្ជូនភ្នាក់ងារសម្ងាត់រងរបួសទៅមន្ទីរពេទ្យហើយ ឆ្កែ Commander បានខាំមនុស្ស ៦ នាក់បន្ថែមទៀត បើគិតពីចន្លោះខែតុលាឆ្នាំ ២០២២ ដល់ខែមករាឆ្នាំ ២០២៣ ។ ទោះជាយ៉ាងណា គេនៅមិនទាន់ដឹងចំនួនជនរងគ្រោះ ដោយសារឆ្កែ Commander សរុបនៅឡើយទេ ដោយសារវានៅតែបន្តស្នាក់នៅសេតវិមានដដែល ។

យ៉ាងណាមិញ អ្នកស្រី Elizabeth Alexander នាយកទំនាក់ទំនងរបស់ជំទាវទីមួយលោកស្រី Jill Biden បានឲ្យដឹងថា ដោយសារសេតវិមានមានបរិយាកាសតានតឹងសម្រាប់សត្វចិញ្ចឹម គ្រួសាររបស់លោក បៃដិន កំពុងព្យាយាមដោះស្រាយបញ្ហានេះជូនអ្នកទាំងអស់គ្នាហើយ ៕

ប្រែសម្រួល៖ វារី

ប្រភព៖ RT

ចុចអាន៖ Paris Hilton កើតទុក្ខខ្លាំង ព្រោះឆ្កែជាទីស្រលាញ់ស្លាប់ចោល

ចុចអាន៖ ឆ្កែអនាថាមួយក្បាល ជួយសង្គ្រោះទារិកាពីធុងសំរាមនៅ ប្រទេសលីបង់

The post ឆ្កែរបស់លោក ចូ បៃដិន ខាំភ្នាក់ងារសម្ងាត់ អាមេរិក ចំនួន ៧ រូប appeared first on Kampuchea Thmey Daily.

អតីតប្រធានាធិបតីអាមេរិក Clinton ចេញពីពេទ្យហើយ ក្រោយព្យាបាលជំងឺឆ្លង

chean virakbot — Mon, 18 Oct 2021 06:12:53 +0000

លោក Bill Clinton នៅថ្ងៃអាទិត្យម្សិលមិញបានចេញពីមន្ទីរពេទ្យនៅកាលីហ្វញ៉ាខាងត្បូងហើយ បន្ទាប់ពីសម្រាកព្យាបាលជំងឺឆ្លងដែលមិនពាក់ព័ន្ធនឹងជំងឺកូវីដ-១៩។

មន្ត្រីបាននិយាយថា អតីតប្រធានាធិបតីសហរដ្ឋអាមេរិកអាយុ៧៥ឆ្នាំបានចូលមន្ទីរពេទ្យមួយនៅភាគខាងត្បូងទីក្រុងឡស អេនជឺឡេសកាលពីថ្ងៃអង្គារ៍ ដើម្បីព្យាបាលជំងឺឆ្លង ប៉ុន្តែវាមិនពាក់ព័ន្ធនឹងជំងឺកូវីដឡើយ។

អ្នកនាំពាក្យអតីតប្រធានាធិបតី លោក Angel Urena បាននិយាយកាលពីថ្ងៃសៅរ៍ថា លោក Clinton នឹងបន្តស្នាក់នៅមន្ទីរពេទ្យមួយយប់ទៀតដើម្បីទទួលថ្នាំអង់ទីគ័របន្ថែម។ ប៉ុន្តែក្រុមគ្រូពេទ្យនៅតែកំពុងតាមដានសុខភាពរបស់លោក។

អតីតជំនួយការម្នាក់បាននិយាយថា លោក Clinton មានជំងឺទឹកនោមប្រៃដែលបានឆ្លងរាលដាលដល់ចរន្តឈាមរបស់លោក។

រយៈពេលប៉ុន្មានឆ្នាំកន្លងទៅនេះចាប់តាំងពី Clinton បានចាកចេញពីសេតវិមាននៅឆ្នាំ២០០១ លោកប្រឈមនឹងបញ្ហាសុខភាពជាច្រើន។

នៅឆ្នាំ២០០៤ លោកបានធ្វើការវះកាត់៤ដង បន្ទាប់ពីកើតមានអាការឈឺទ្រូង និងពិបាកដកដង្ហើម។ នៅឆ្នាំ២០០៥ លោកបានធ្វើការវះកាត់សួត ហើយឆ្នាំ២០១០លោកត្រូវបានដាកស្រោមសរសៃឈាមបេះដូងមួយគូ។

ដោយសារអាការជំងឺច្រើនមុខ លោកត្រូវបានគេដឹងថា បានទទួលអាហារបួស ហើយជាលទ្ធផលលោកបានស្រកទម្ងន់ និងសុខភាពល្អប្រសើរគ្រាន់បើឡើងវិញ៕

ប្រែសម្រួល៖ វីរបុត្រ
ប្រភព៖ theguardian

The post អតីតប្រធានាធិបតីអាមេរិក Clinton ចេញពីពេទ្យហើយ ក្រោយព្យាបាលជំងឺឆ្លង appeared first on Kampuchea Thmey Daily.

លោក ចូ បៃដិន ព្រមាន«មិនលើកលែងដល់ជនវាយប្រហារនៅកាប៊ុល»

chean virakbot — Fri, 27 Aug 2021 00:54:39 +0000

លោកប្រធានាធិបតីសហរដ្ឋអាមេរិក ចូ បៃដិន បានផ្តល់ការព្រមានដល់ជនដៃដល់នៃការវាយប្រហារបំផ្ទុះគ្រាប់បែកពីរលើក នៅខាងក្រៅអាកាសយានដ្ឋានទីក្រុងកាប៊ុល។

លោក ចូ បៃដិន មានប្រសាសន៍ថា ៖«យើងនឹងមិនលើកលែងទេ។ យើងនឹងមិនភ្លេចទេ។ យើងនឹងតាមប្រមាញ់ និងសងអ្នកវិញ»។ លោកបានបង្ហើបថា អ្នកវាយប្រហារប្រហែលជាចេញមកពីពន្ធនាគារដែលត្រូវបានបើកដោយតាលីបង់។

លោកប្រធានាធិបតីសហរដ្ឋអាមេរិក ចូ បៃដិន

លោកក៏បានយោងទៅលើក្រុមភេវរករ ISIS-K ដែលបាននិយាយមុនថា ខ្លួនស្ថិតនៅពីក្រិយការបំផ្ទុះនៅព្រលានយន្តហោះ។ លោកប្រធានាធិបតីបានសង្កត់ធ្ងន់ថា អាមេរិកនឹងមិនត្រូវបានរារាំងដោយភេរវករទេ។

លោកមានប្រសាសន៍ថា ៖«យើងនឹងមិនបញ្ឈប់បេសកកម្មទេ។ យើងនឹងបន្តការជម្លៀសទៀត»។

ការវិវត្តរយៈពេល២៤ម៉ោងចុងក្រោយនៅអាហ្វហ្គានីស្ថានគិតត្រឹមព្រឹកថ្ងៃសុក្រនេះមានដូចខាងក្រោម៖

ហោចណាស់ជនជាតិអាហ្វហ្គានីស្ថានជាង៦០នាក់ត្រូវបានសម្លាប់ និង១៤០នាក់របួសពីការផ្ទុះគ្រាប់បែកអត្តឃាត២លើកនៅព្រលានយន្តហោះកាប៊ុលកាលពីយប់មិញ។
កម្លាំងទ័ពអាមេរិក១៣នាក់ត្រូវបានសម្លាប់។ វាជាការវាយប្រហារថ្លុកឈាមបំផុតគិតចាប់តាំងពីកម្លាំងអាមេរិកស្ថិតនៅអាហ្វហ្គានីស្ថានពីឆ្នាំ២០១១។
ឆ្លើយតបនឹងការវាយប្រហារ លោកប្រធានាធិបតីអាមេរិក ចូ បៃដិន បានប្រាប់ជនដៃដល់ថា ៖«យើងនឹងតាមប្រមាញ់ និងសងអ្នកវិញ»។
លោកក៏បានប្តេជ្ញាបញ្ឈប់ការដកពលរដ្ឋងាមេរិក ប៉ុន្តែទទួលស្គាល់ថា ការជម្លៀសមនុស្សចេញមិនធានាសុវត្ថិភាពទេ។
លោកប្រធានាធិបតីនិយាយថា រហូតដល់ពេលនេះមិនមានភស្តុតាងនៃការបំផ្ទុះរវាងតាលីបង់ និងរដ្ឋឥស្លាមនិយម ដែលអះអាងថា ខ្លួនស្ថិតនៅក្រោយពីការវាយប្រហារ។
មេដឹកប្រទេសលោកខាងលិចបានថ្កោលទោសការវាយប្រហារនៅកាប៊ុល ខណៈប្រទេសជាច្រើនកំពុងប្រឹងប្រែងប្រតិបត្តិការជម្លៀសពលរដ្ឋរបស់ពួកគេ៕

អានបន្ថែម៖ Update! យោធាអាមេរិក និងពលរដ្ឋអាហ្វហ្គានីស្ថាន ជាង៧០នាក់ ស្លាប់ក្នុងការផ្ទុះគ្រាប់បែកអត្តឃាត នៅព្រលានយន្តហោះក្រុង កាប៊ុល

ប្រែសម្រួល៖ វីរបុត្រ
ប្រភព៖ BBC

The post លោក ចូ បៃដិន ព្រមាន«មិនលើកលែងដល់ជនវាយប្រហារនៅកាប៊ុល» appeared first on Kampuchea Thmey Daily.