Update! យោធាអាមេរិក និងពលរដ្ឋអាហ្វហ្គានីស្ថាន ជាង៧០នាក់ ស្លាប់ក្នុងការផ្ទុះគ្រាប់បែកអត្តឃាត នៅព្រលានយន្តហោះក្រុង កាប៊ុល

យោធាអាមេរិកចំនួន ១៣ នាក់និងជនជាតិអាហ្វហ្គានីស្ថានយ៉ាងតិច ៦០នាក់ ត្រូវបានសម្លាប់ ក្នុងការវាយប្រហារបំផ្ទុះគ្រាប់បែកពីរលើក នៅខាងក្រៅអាកាសយានដ្ឋានទីក្រុងកាប៊ុល។

ការផ្ទុះដ៏សាហាវនេះ បានកើតឡើងចំពេលដែលសហរដ្ឋអាមេរិក និងបណ្តាប្រទេសលោកខាងលិចផ្សេងទៀត ព្យាយាមបញ្ចប់ការជម្លៀសប្រជាជននិងសម្ព័ន្ធមិត្តអាហ្វហ្គានីស្ថានរបស់ពួកគេ បន្ទាប់ពីក្រុមតាលីបង់ កាន់កាប់ប្រទេសនេះ។

មន្រ្តីម្នាក់នៅក្រសួងសុខាភិបាលអាហ្វហ្គានីស្ថានបានប្រាប់ CNN កាលពីថ្ងៃព្រហស្បតិ៍ថា ជនជាតិអាហ្វហ្គានីស្ថានជាង ៦០ នាក់បានស្លាប់និង ១៤០ នាក់ទៀតរងរបួស។

យោធាអាមេរិកចំនួន ១៨ នាក់ បានរងរបួសបន្ថែមពីលើអ្នកស្លាប់ទាំង ១៣ នាក់។ នេះបើតាមការបញ្ជាក់របស់លោក Bill Urban នៃបញ្ជាការកណ្តាលអាមេរិក (Centcom)។

ក្រុម ISIS នៅខេត្ត Khorasan ដែលគេស្គាល់ថា ISIS-K បានអះអាងថា ក្រុមសកម្មប្រយុទ្ធ ISIS បានធ្វើការវាយប្រហារអត្តឃាតនេះ។

កាលពីប៉ុន្មានថ្ងៃមុន ប្រធានាធិបតីអាមេរិកលោក ចូ បៃដិន បានលើកឡើងពីហានិភ័យនៃការវាយប្រហារភេរវកម្មថា ជាហេតុផលដែលនាំឲ្យកងទ័ពអាមេរិកចាកចេញពីប្រទេសអាហ្វហ្គានីស្ថានត្រឹមថ្ងៃទី ៣១ ខែសីហា។

មន្រ្តីអាមេរិកបានព្រមានកាលពីសប្តាហ៍មុនថា ការគំរាមកំហែងនៃការវាយប្រហារភេរវកម្មនៅព្រលានយន្តហោះកាន់តែមានភាពស្រួចស្រាវទៅៗ។ ហើយកាលពីព្រឹកព្រលឹមថ្ងៃព្រហស្បតិ៍ ក្រុមអ្នកការទូតអាមេរិកនៅទីក្រុងកាប៊ុល បានព្រមានពលរដ្ឋអាមេរិកឲ្យចាកចេញភ្លាមៗតាមច្រកនានាចូលទៅក្នុងអាកាសយានដ្ឋាន ដោយលើកឡើងពីការគំរាមកំហែងសន្តិសុខ៕

ប្រែសម្រួល៖ Vann Vann

ប្រភព៖ CNN

ចុចអាន៖ បណ្តាប្រទេសជាច្រើនបញ្ឈប់ការជម្លៀសប្រជាជនចេញពី អាហ្វហ្គានីស្ថាន ក្រោយការគំរាមវាយប្រហារភេរវកម្មពីក្រុម ISIS