ប្រុសៗ Archives - Kampuchea Thmey Daily

សញ្ញាព្រមានទាំង ៥ បញ្ជាក់ថាបុ្រសៗមានអតុល្យភាពអ័រម៉ូន

សាង ស្រីល័ក្ខ — Mon, 12 Jun 2023 01:20:18 +0000

អតុល្យភាពអ័រម៉ូនមិនមែនកើតតែលើស្ត្រីនោះទេ សូម្បីតែប្រុសៗយើងក៏ប្រឈមនឹងបញ្ហាសុខភាពមួយនេះដែរ។ តាមការសិក្សាជាច្រើនបានបង្ហាញថា អតុល្យភាពអ័រម៉ូនលើបុរសកំពុងតែកើនឡើងជាលំដាប់។ ដូច្នេះហើយ យើងគួរតែយល់ដឹងពីសញ្ញាព្រមានមួយចំនួន និងវិធីសាស្ត្រដោះស្រាយឲ្យបានទាន់ពេលវេលា ជៀសវាងប្រឈមនឹងផលវិបាកធ្ងន់ធ្ងរនៅពេលក្រោយ។

សញ្ញា និងរោគសញ្ញានៃអតុល្យភាពអ័រម៉ូនលើបុរស

១. ចំណង់ផ្លូវភេទធ្លាក់ចុះ

អ័រម៉ូនTestosterone ដើរតួនាទីយ៉ាងសំខាន់ក្នុងចំណង់ផ្លូវភេទបុរស។ ប្រសិនបើកម្រិតអ័រម៉ូនមួយនេះធ្លាក់ចុះ គ្នាយើងក៏ថយចុះចំណង់ផ្លូវភេទដូចគ្នា។ ក្នុងករណីដែលយើងសង្កេតឃើញការធ្លាក់ចុះនៃចំណង់ផ្លូវភេទ ឬលិង្គមិនឡើងរឹង នោះអាចបណ្តាលមកពីកម្រិតអ័រម៉ូនTestosteroneទាប។

២. អស់កម្លាំង និងកម្រិតថាមពលថយចុះ

ជាមួយគ្នានេះដែរ អ្នកដែលមានកម្រិតអ័រម៉ូនTestosteroneទាប ក៏អាចមានអាការៈហត់នឿយ និងអស់កម្លាំងដូចគ្នា ពិសេសទោះក្រោយពេលដែលយើងបានសម្រាកគ្រប់គ្រាន់ហើយក៏ដោយ។

៣. បាត់បង់ម៉ាសសាច់ដុំ និងកម្លាំងថយចុះ

អ័រម៉ូនTestosterone មានសារៈសំខាន់ណាស់ក្នុងការកសាង និងរក្សាម៉ាសសាច់ដុំ។ ការថយចុះកម្រិតអ័រម៉ូនTestosterone អាចបណ្តាលឲ្យយើងបាត់បង់ម៉ាសសាច់ដុំ និងកម្លាំងថយចុះ។

៤. ប្រែប្រួលអារម្មណ៍

អតុល្យភាពអ័រម៉ូនក៏អាចប៉ះពាល់ដល់អារម្មណ៍ និងសុខភាពផ្លូវចិត្តដែរ។ ប្រុសៗដែលមានអ័រម៉ូនTestosteroneទាប ច្រើនតែប្រឈមនឹងការប្រែប្រួលអារម្មណ៍ ឆាប់ខឹងមួម៉ៅ ឬបាក់ទឹកចិត្ត។

៥. ខ្លាញ់រាងកាយកើនឡើង

អ័រម៉ូនTestosteroneជួយគ្រប់គ្រងការចែកចាយជាតិខ្លាញ់ក្នុងរាងកាយ ប៉ុន្តែបើអ័រម៉ូនមួយនេះ មានកម្រិតទាប នោះនឹងអាចបណ្តាលឲ្យកើនឡើងជាតិខ្លាញ់នៅក្នុងរាងកាយ ជាពិសេសនៅតំបន់ពោះ។

គន្លឹះព្យាបាលអតុល្យភាពអ័រម៉ូនចំពោះបុរស

ជាក់ស្តែង មានគន្លឹះជាច្រើនក្នុងការដោះស្រាយបញ្ហាអតុល្យភាពអ័រម៉ូននេះ។ ដូច្នេះហើយ ប្រុសៗដែលមានរោគសញ្ញាដូចខាងលើ គួរពិគ្រោះយោបល់ជាមួយនឹងគ្រូពេទ្យជំនាញជាមុនសិន និងជ្រើសរើសវិធីព្យាបាលដែលស័ក្តិសមជាមួយនឹងខ្លួនឯង។គន្លឹះដោះស្រាយបញ្ហាអតុល្យភាពអ័រម៉ូនមានដូចជា៖

១. ផ្លាស់ប្ដូរបែបបទរស់នៅ

ការផ្លាស់ប្ដូរបែបបទរស់នៅ ដូចជាការធ្វើលំហាត់ប្រាណទៀងទាត់ ញ៉ាំអាហារសុខភាព គ្រប់គ្រងស្រ្តេសឲ្យបានល្អ និងគេងឲ្យគ្រប់គ្រាន់ មិនត្រឹមតែអាចជួយឲ្យកម្រិតអ័រម៉ូនTestosteroneឲ្យប្រសើរឡើងប៉ុណ្ណោះទេ ថែមទាំងជួយឲ្យយើងមានសុខភាពល្អថែមទៀតផង។

២. ការប្រើប្រាស់ថ្នាំ

ក្នុងករណីខ្លះ គ្រូពេទ្យអាចចេញវេជ្ជបញ្ជាឲ្យប្រើប្រាស់ថ្នាំ ដើម្បីបង្កើនការផលិតអ័រម៉ូនTestosterone ឬរារាំងការបំប្លែងអ័រម៉ូនTestosteroneទៅជាអ័រម៉ូនEstrogen។

៣. អាហារបំប៉ន

អាហារបំប៉នជាក់លាក់ ដែលផ្ទុកទៅដោយសារធាតុរ៉ែ និងវីតាមីន ដូចជាម៉ាញេស្យូម សេលេញ៉ូម វីតាមីនD អាចបង្ហាញភស្តុតាងវិទ្យាសាស្ត្រក្នុងការបង្កើនកម្រិតអ័រម៉ូនTestosteroneនៅក្នុងរាងកាយយើងបាន។ ដូច្នេះហើយ ប្រុសៗយើងគួរញ៉ាំអាហារបំប៉នប្រចាំថ្ងៃឲ្យបានទៀងទាត់ យ៉ាងហោចណាស់ពី៣ ទៅ៤ខែទើបជាការប្រសើរ។ គួរប្រឹក្សាជាមួយគ្រូពេទ្យអំពីការប្រើប្រាស់អាហារបំប៉នទាំងនេះ៕

អត្ថបទផ្ដល់ដោយ៖Hello Krupet

ចុចអាន៖អត្ថប្រយោជន៍ទទួលបាន បន្ទាប់ពីញ៉ាំសូកូឡាជារៀងរាល់ព្រឹក

The post សញ្ញាព្រមានទាំង ៥ បញ្ជាក់ថាបុ្រសៗមានអតុល្យភាពអ័រម៉ូន appeared first on Kampuchea Thmey Daily.

ប្រុសៗមានទម្លាប់អាក្រក់ទាំងនេះ ស្រីៗអត់ចូលចិត្តទេ

សាង ស្រីល័ក្ខ — Tue, 23 Aug 2022 01:00:00 +0000

ប្រុសៗខ្លះមានទម្លាប់មិនល្អមួយចំនួន ធ្វើឲ្យស្រីៗអត់ចង់នៅក្បែរ។ “Hello គ្រូពេទ្យ” ប្រាប់ចិត្តសាស្ត្រ និងមូលហេតុខ្លះឲ្យដឹង ព្រោះប្រុសៗអាចមើលរំលងចំណុចទាំងនោះ។

១- មិនប្រើក្រែមលាបមុខឲ្យមានសំណើម

ប្រុសៗភាគច្រើនគិតថា ខ្លួនគ្មានពេលគ្រប់គ្រាន់សម្រាប់ដើរទិញក្រែមមកលាបទេ តែទោះរវល់យ៉ាងណា ត្រូវចាំថាភាពចាស់នៅលើផ្ទៃមុខ ស្បែកធ្លាក់យារ ធ្វើឲ្យបាត់បង់ភាពទាក់ទាញពីស្រីៗបាន។ ហេតុនេះ សាកសួរដៃគូ ឬមិត្តភក្ដិ តើមានក្រែមរក្សាសំណើមលើផ្ទៃមុខបែបណាសក្ដិសមសម្រាប់យើង។

២- ទុកពុកចង្កាវែងៗ

ទុកពុកចង្កាវែងៗរឹតតែធ្វើឲ្យបាត់បង់នូវភាពទាក់ទាញមួយកម្រិតទៀត។ អាចទៅហាងកាត់សក់ណាយើងចូលចិត្ត ដើម្បីតុបតែងពុកមាត់ ពុកចង្កាតាមបំណងប្រាថ្នា។ ត្រូវចាំថា គួរប្រើសាប៊ូ ឬប្រេងលាបទៅលើពុកចង្កា ផ្ទៃមុខ និងសក់ផង។

៣- ប្រើទឹកអប់ហួសប្រមាណ

រាល់ពេលស្លៀកពាក់ចេញទៅក្រៅធ្វើការ ឬណាត់ជួប និងចូលរួមព្រឹត្តិការណ៍អ្វីមួយ ប្រុសៗមិនគួរបាញ់ទឹកអប់ច្រើនពេក រហូតជះក្លិនខ្លាំងឆួលដល់ខ្លួននោះទេ ព្រោះអាចប៉ះពាល់អារម្មណ៍អ្នកដទៃ ស្រីៗភាគច្រើន មិនចូលចិត្តក្លិនឆួលរបស់ទឹកអប់ទេ។ បាញ់ទឹកអប់បន្តិចបន្តួចនៅលើកដៃ ផ្នែកខាងក្រោយកញ្ចឹងក ឬស្លឹកត្រចៀកបានហើយ ពេលនោះកម្ដៅរាងកាយ នឹងអប់ក្លិនឲ្យក្រអូបជាប់ខ្លួនពេញមួយថ្ងៃបាន។

៤- មិនកាត់ក្រចកឲ្យបានស្អាត

រឿងនេះ ប្រុសៗភាគច្រើនមើលរំលង មិនសូវយកចិត្តទុកដាក់សម្អាតក្រចក។ បើដៃយើងស្អាតហើយ តែក្រចកដៃមិនស្អាត បណ្តាលឲ្យស្រីៗមានអារម្មណ៍មិនល្អ ពេលនៅក្បែរយើង។ ហេតុនេះ គួរចំណាយពេលបន្តិច ទៅរកជាងធ្វើក្រចក ឬកាត់ដោយខ្លួនឯង ឲ្យបានស្អាតជាប្រចាំ។

៥- រោមច្រមុះវែងៗពេក

គួរកាត់រោមច្រមុះចេញ យ៉ាងហោចណាស់ឲ្យបានម្ដងក្នុងមួយសប្ដាហ៍។ ទុករោមច្រមុះវែងៗ មើលទៅប្រៀបដូចយើងអត់អនាម័យ៕

អត្ថបទផ្ដល់ដោយ៖ Hello Krupet

The post ប្រុសៗមានទម្លាប់អាក្រក់ទាំងនេះ ស្រីៗអត់ចូលចិត្តទេ appeared first on Kampuchea Thmey Daily.

តំបន់ស្រើបស្រាលលើដងខ្លួនស្រីៗ ៥ កន្លែង គូស្នេហ៍គួរស្វែងយល់

សាង ស្រីល័ក្ខ — Sat, 09 Apr 2022 06:23:49 +0000

ពិតណាស់ការស្វែងយល់ និងដឹងពីតំបន់ធ្វើឲ្យស្រីៗមានភាពស្រើបស្រាលនៅអំឡុងពេលរួមភេទ គឺជារឿងសំខាន់មួយ សម្រាប់ជីវិតផ្លូវភេទរបស់ភរិយា និងស្វាមី។

ហេតុផលមួយដែលស្រីៗពេលខ្លះមិនបានទទួលអារម្មណ៍ល្អពីការរួមភេទ ឬមិនមានអារម្មណ៍សុខស្រួលទាល់តែសោះនោះ ក៏ព្រោះតែបុរសជាដៃគូមិនបានដឹងពីវិធីជួយភ្ញោចអារម្មណ៍ដល់ស្រីៗ ជាហេតុនាំឲ្យសកម្មភាពលើគ្រែបែរជាសោះកក្រោះទៅវិញ។

អ៊ីចឹងបើស្វាមីចង់ឲ្យសកម្មភាពលើគ្រែរបស់ខ្លួនដំណើរការទៅដោយរលូន មានភាពរីករាយ និងពេញចិត្តទាំងអស់គ្នា គួរស្វែងយល់ពីតំបន់ស្រើបស្រាលលើដងខ្លួនស្រីៗទាំងនេះ។

១. មុខ

មុខជាតំបន់មានរំញោចខ្លាំងមួយលើដងខ្លួនស្រីៗ ដូចនេះបុរសត្រូវបង្ហាឲ្យដៃគូដឹងថាខ្លួនកំពុងយកចិត្តទុកដាក់លើនាង ដោយអាចឱប កាន់ដៃ និងថើបថ្ងាសថ្នមៗ។ ការធ្វើដូចនេះ អាចធ្វើឲ្យភាគីខាងស្រីមានអារម្មណ៍កក់ក្ដៅ និងក៏ចាប់ផ្ដើមមានរំញោចដល់អារម្មណ៍ផ្លូវភេទដែរ។

២. ត្រចៀក

បើតាមអ្នកជំនាញផ្នែកសុខភាពផ្លូវភេទ អារម្មណ៍ស្រើបស្រាលអាចកើតចេញពីផ្លូវកាយ និងផ្លូវចិត្ត។ ដូចគ្នាដែរ ត្រចៀក ក៏ជាច្រកមួយជួយបើកផ្លូវឲ្យនារីជាដៃគូមានអារម្មណ៍នេះដែរ។ បើសិនជាប្រុសៗយើងចង់ឲ្យដៃគូរបស់ខ្លួនមានអារម្មណ៍ល្អក្នុងពេលរួមភេទនោះ គួរសាកល្បងយកមេដៃ ឬម្រាមដៃអង្អែលបរិវេណត្រចៀកដៃគូថ្នមៗ។ ដូចគ្នាដែរ ពេលឃើញថាដៃគូខ្លួនមានអារម្មណ៍ស្រើបស្រាលបន្តិចហើយនោះ ភាគីខាងប្រុសអាចប៉ះចុងច្រមុះនាង និងខាំតិចៗ ដើម្បីជួយភ្ញោចអារម្មណ៍បន្ថែមទៀតក៏បាន។ មួយវិញទៀត ប្រុសៗយើងក៏អាចខ្សឹបដាក់ត្រចៀកដៃគូខ្លួននូវពាក្យផ្អែមល្ហែមមួយចំនួន និងសរសើរពីសម្រស់ ឬក្លិនរបស់ដៃគូខ្លួនថែមទៀតកាន់តែប្រសើរ។

៣. ក

ទីតាំងដែលមានរំញោចខ្លាំងរបស់ស្រីៗមួយទៀតគឺនៅត្រង់ក។ ក ជាកន្លែងដែលងាយមានរំញោចមួយនៅលើរាងកាយស្រីៗ ដោយសារថាស្បែកនៅទីនោះមានសភាពស្ដើងជាងកន្លែងផ្សេង ដូចនេះសរសៃឈាមក៏នៅកៀកទៅនឹងផ្ទៃស្បែកដែរ។ ការណ៍នេះធ្វើស្រីៗឆាប់មានអារម្មណ៍នៅពេលមានការប៉ះ ឬស្ទាប។

៤. បបូរមាត់

ការថើបដៃគូរបស់ខ្លួនដោយក្ដីស្រឡាញ់ មិនប្រញាប់ប្រញាល់ នឹងជួយបង្កើនអារម្មណ៍ដៃគូទាំងពីរអាចបន្តសកម្មភាពលើគ្រែបានយូរ។ ថើបបបូរមាត់ថ្នមៗ ជាវិធីមួយជួយរំញោចអារម្មណ៍ផ្លូវភេទរបស់ស្រីៗ ដែលដៃគូជាបុរសគួរធ្វើ និងបង្ហាញពីក្ដីស្រឡាញ់។

៥. ម្រាមដៃ

ពេលកំពុងថើបដៃគូរបស់ខ្លួន ប្រុសៗយើងក៏គួរចាប់ម្រាមដៃខាងស្រីថ្នមៗដូចគ្នា។ ការថើប បបោសអង្អែល និងការចាប់ម្រាមដៃថ្នមៗ នឹងបង្កើនភាពស្និទ្ធស្នាលរវាងដៃគូកាន់តែខ្លាំង និងធ្វើឲ្យរាងកាយទាំងមូលមានរំញោចថែមទៀតផង។

អ្វីគួរដឹង ពិសេសប្រុសៗ គឺថានារីនៅបណ្ដាប្រទេសនៅអាស៊ីច្រើនមានការអៀនខ្មាសពេលនិយាយដល់រឿងលើគ្រែ ដែលនេះជាហេតុមួយភាគីខាងប្រុសគួរស្វែងយល់ពីចំណុចសំខាន់ដែលភាគីខាងស្រីត្រូវការ និងកន្លែងសំខាន់ៗ អាចជួយភ្ញោចអារម្មណ៍របស់ដៃគូខ្លួនបាន។ មួយវិញទៀត ត្រូវចាំថា ការរួមភេទដោយគ្មានការព្រមព្រៀង ឬយល់ចិត្ត គឺនឹងមិនធ្វើឲ្យសកម្មភាពមួយនេះមានក្ដីសុខនោះទេ។ ចូរស្វែងយល់ពីដៃគូរបស់យើង ដើម្បីឲ្យជីវិតគូធ្វើដំណើរទៅមុខប្រកបដោយភាពរីករាយ៕

អត្ថបទផ្ដល់ដោយ៖ HelloKrupet

ចុចអាន៖នោមក្រោយរួមភេទរួច អាចបញ្ចៀសការមានផ្ទៃពោះបានអត់?

ចុចអាន៖ស្រីៗពិបាកមានកូន អាចមកពីមូលហេតុទាំង ៥នេះ

The post តំបន់ស្រើបស្រាលលើដងខ្លួនស្រីៗ ៥ កន្លែង គូស្នេហ៍គួរស្វែងយល់ appeared first on Kampuchea Thmey Daily.

កុំច្រឡំ! ប្រុសៗវ័យកណ្ដាល ក៏ពុកឆ្អឹងមិនចាញ់ ស្រីៗដែរ

សាង ស្រីល័ក្ខ — Sun, 10 Oct 2021 08:44:30 +0000

ធម្មតា ស្រីៗភាគច្រើនប្រឈមនឹងការពុកឆ្អឹង ជាពិសេសឆ្អឹងត្រគាកដែលបណ្ដាលឲ្យស្រីៗជួបការឈឺឆ្អឹងខ្នង។ រឿងពុកឆ្អឹងនេះ ប្រុសៗក៏មិនចាញ់ស្រីៗដែរ ហើយប្រសិនបើជួបការឈឺឆ្អឹងខ្នង គួរចាំបាច់ទៅជួបពេទ្យ ដើម្បីពិនិត្យកំហាប់ឆ្អឹង។

អ្នកស្រាវជ្រាវធ្វើការសិក្សាលើមនុស្សពេញវ័យ ១៧៣ នាក់ អាយុពី ៣៥-៥០ឆ្នាំ រកឃើញថា ប្រុស និងស្រី មានកំហាប់ឆ្អឹងទាប សឹងប្រហាក់ប្រហែលគ្នា ដោយប្រុសមាន ២៨% ចំណែកស្រីមាន ២៦%។

អ្នកស្រាវជ្រាវបញ្ជាក់ថា អ្នកចូលរួមក្នុងសិក្សាមានញ៉ាំប្រៃ ដោយករណីខ្លះ វាវិវត្តទៅជាឈឺខ្នង ឈឺចង្កេះ និងជំងឺឆ្អឺង Brittle ធ្វើឲ្យខូចឆ្អឺងតែម្ដង។ ការសិក្សានេះចេញផ្សាយលើកាសែតវេជ្ជសាស្ត្រដ៏ល្បី Webmd។

ការរកឃើញថា បញ្ហាពុកឆ្អឺងលើប្រុសៗ សឹងប្រហាក់ប្រហែលគ្នានឹងស្រីៗ ជារឿងគួរឲ្យភ្ញាក់ផ្អើលមួយ ដោយសារការពុកឆ្អឺង ជាបញ្ហារួមរបស់ស្រីៗ។ នេះលោកស្រី Allison Ford សាស្ត្រាចារ្យផ្នែកវិទ្យាសាស្ត្រសុខាភិបាល នៅសាកលវិទ្យាល័យ Mississippi របស់អាមេរិក។

លោកស្រី Allison Ford ណែនាំថា ប្រុសៗ គួរអនុវត្ដទម្លាប់មួយចំនួន ដើម្បីឲ្យឆ្អឹងរឹងមាំល្អ ដូចជា ញ៉ាំរបបអាហារមានតុល្យភាពល្អ រួមាន កាល់ស្យូម និងវីតាមីន D ឲ្យបានគ្រប់គ្រាន់ និងហាត់ប្រាណ ដើម្បីឲ្យរាងកាយមានតុល្យភាព៕

អត្ថបទផ្ដល់ដោយ៖Hello Krupet

ចុចអាន៖ប្រុសៗខ្លួនក្មេងមុខចាស់ តែងមើលរំលងទម្លាប់អាក្រក់ទាំងនេះ

The post កុំច្រឡំ! ប្រុសៗវ័យកណ្ដាល ក៏ពុកឆ្អឹងមិនចាញ់ ស្រីៗដែរ appeared first on Kampuchea Thmey Daily.

ប្រុសៗខ្លួនក្មេងមុខចាស់ តែងមើលរំលងទម្លាប់អាក្រក់ទាំងនេះ

សាង ស្រីល័ក្ខ — Sat, 21 Aug 2021 09:22:51 +0000

រឿងថែសម្រស់ ប្រុសៗមិនឈ្នះស្រីៗក៏ពិតមែន ប៉ុន្តែក៏មិនគួរបណ្តោយខ្លួនឲ្យគេហៅ “ខ្លួនក្មេង មុខចាស់” ដែរ។ សម័យនេះ ប្រុសៗបើមិនចេះថែខ្លួន ប្រយ័ត្នអត់លិឍ ប្រពន្ធលែងឲ្យនៅជិតទៅ។ “Hello គ្រូពេទ្យ” នឹងប្រាប់ពីកំហុសធំៗទាំង ៥ ប្រុសៗតែមើលរំលង នាំឲ្យមុខកាន់តែចាស់។

១- មិនប្រើក្រែមលាបផ្តល់សំណើមមុខ

ប្រុសៗជាច្រើនគិតថា ខ្លួនគ្មានពេលគ្រប់គ្រាន់សម្រាប់ដើរទិញក្រែមមកលាបទេ។ តែទោះរវល់យ៉ាងណា គ្នាយើងត្រូវចាំ ភាពចាស់នៅលើផ្ទៃមុខ ស្បែកធ្លាក់យារ គ្មានភាពទាក់ទាញចំពោះស្រីៗឡើយ។ អាចសួរប្រពន្ធ ឬមិត្តស្រី មិត្តភក្ដិ ថាតើមានក្រែមរក្សាសំណើមផ្ទៃមុខបែបណាសក្ដិសមសម្រាប់យើង។

២- ទុកពុកចង្កាវែងៗ

ទុកពុកចង្កាវែងៗ រឹតតែធ្វើឲ្យប្រុសៗគ្នាយើងបាត់បង់ភាពទាក់ទាញមួយកម្រិតទៀត។ សូមទៅហាងកាត់សក់ណាយើងពេញចិត្ត ឬមានម៉ូយដឹងចិត្តនៅទីនោះ ដើម្បីតុបតែងស្តាយពុកមាត់ ពុកចង្កាឲ្យមើលទៅសម សង្ហា មិនដូចតាអាយុ ៦០ ឆ្នាំឲ្យសោះ។ ចាំថា គួរប្រើសាប៊ូ ឬប្រេងលាបទៅលើពុកចង្កា និងសក់រផង ពេលកាត់រួចរាល់។

៣- កុំប្រើទឹកអប់មានក្លិនខ្លាំងពេក

រាល់ពេលស្លៀកពាក់ចេញទៅក្រៅធ្វើការ ណាត់ជួប ឬចូលរួមព្រឹត្តិការណ៍អ្វីមួយ បើបាញ់ទឹកអប់ច្រើនពេក រហូតជះក្លិនខ្លាំងឈួលដល់ក្បែរខ្លួន ក៏ជារឿងមិនល្អដែរ។ អាចបាញ់ទឹកអប់បន្តិចបន្តួចនៅលើកដៃ ផ្នែកខាងក្រោយកញ្ចឹងក ឬស្លឹកត្រចៀកបានហើយ ពេលនោះកម្ដៅរាងកាយអប់ក្លិនក្រអូបជាប់ខ្លួន យើងបានពេញ ១ ថ្ងៃឯណោះ។

៤- មិនកាត់ក្រចកឲ្យស្អាត

ប្រុសៗច្រើនគួរសម មិនសូវយកចិត្តទុកដាក់សម្អាតក្រចកដៃ ក្រចកជើងទេ។ បើដៃយើងស្អាត តែក្រចកដៃមិនស្អាត បង្កឲ្យអ្នកជុំវិញខ្លួន មានចំណាប់អារម្មណ៍មិនល្អចំពោះយើង ពិសេសមិត្តស្រីយើងតែម្តង។ ហេតុនេះ គួរចំណាយពេលបន្តិចបន្តួច ទៅរកជាងធ្វើក្រចក ឬអាចស្នើមិត្តភក្ដិ បងប្អូន និងមិត្តស្រី ឬប្រពន្ធ ឲ្យកាត់តម្រឹមឲ្យក៏បាន។

៥- រោមច្រមុះ រោមចញ្ចើមវែងៗពេក

គួរកាត់រោមច្រមុះចេញ យ៉ាងហោចណាស់ម្ដងក្នុងមួយសប្ដាហ៍ ក្រៅពីនេះលាបក្រមួនលើរោមចិញ្ចើមពេលទៅកាត់សក់។ រោមចិញ្ចើមក្រាស់ធ្វើឲ្យមានអារម្មណ៍ថាពិសេសខ្លាំង បើវាដុះលើត្របកភ្នែកទាំងមូល នឹងធ្វើយើងមើលទៅ ដូចជា រញ៉ាំរញ៉ូវគ្រប់ពេលវេលា៕

អត្ថបទផ្ដល់ដោយ៖ Hello Krupet

ចុចអាន៖ហើមមុខពេលព្រឹកព្រលឹម អាចមកពីមូលហេតុទាំង ៤ នេះ

The post ប្រុសៗខ្លួនក្មេងមុខចាស់ តែងមើលរំលងទម្លាប់អាក្រក់ទាំងនេះ appeared first on Kampuchea Thmey Daily.

ជឿអត់ថាមនុស្សស្រី មានចរិតចាស់ទុំជាងប្រុសៗ?

សាង ស្រីល័ក្ខ — Sat, 29 May 2021 02:43:19 +0000

គ្នាយើងប្រាកដជាធ្លាប់ឃើញ ម៉េចបានពេលខ្លះ ប្រុសៗ ទោះមានគ្រួសារហើយ ក៏នៅតែលេងសើចដូចកូនក្មេង ថែមពីលើសនោះទៀត ពេលខ្លះអាចឃើញ ពួកនៅលេងសើចដូចកាលពីនៅវ័យជំទង់ទៀតផងបើជួបជុំជើងគ្នា ពេលនេះ អ្នកវិទ្យាសាស្រ្តក៏បានស្រាយចម្ងល់មួយចំនួនអំពីបញ្ហានេះ។

ក្រុមអ្នកវិទ្យាសាស្រ្ត មកពីសាកលវិទ្យាល័យ Oxford ចក្រភពអង់គ្លេស បានសិក្សា បញ្ហាខាងលើ ដោយផ្តោតលើការ ពិនិត្យតាមដានលើការវិវឌ្ឍខួរក្បាល រវាងមនុស្សប្រុស និងស្រី ប្រមាណ១២១នាក់ ក្នុងអាយុចាប់ពី ៤ដល់៤០ឆ្នាំ។ តាមរយៈម៉ាស៊ីនតាមដាន ពួកគេអាចមើលតាមរូបថតពិសេស អំពីការប្រែប្រួលខួរក្បាល ភេទប្រុស និងស្រី លទ្ធផលឃើញថា មនុស្សប្រុសមានលក្ខណៈវិវឌ្ឍចំពោះ ផ្នែកមុខងារមួយចំនួននៃខួរក្បាល ហើយផ្ទុយទៅវិញ ខួរក្បាលមនុស្សបែរជាវិវឌ្ឍមុខងារអត្តចរិកនៃភាពចាស់ទុំ (Maturity) លឿនជាងមនុស្សប្រុសទៅវិញ។

ករណីសិក្សាមួយផ្សេងទៀត ធ្វើឡើងដោយលោក សាស្រ្តាចារ្យ Eduardo Calixto ជាអ្នកសិក្សាសរីរវិទ្យា និងផ្នែកឱសថសាស្រ្ត នៃសាកលវិទ្យាល័យ Windhoek អាហ្វ្រិកខាងត្បូង បានរកឃើញ ដោយការវិភាគលើសំណុំស្មុគស្មាញនៃខួរក្បាល មនុស្សប្រុស និងមនុស្សស្រី ឃើញមនុស្សស្រី មានសំណុំខួរក្បាល ដ៏ស្មុគស្មាញល្អិតច្រើនជាងមនុស្សប្រុស ជាឧទាហរណ៍សាមញ្ញគឺ មានប្រព័ន្ធស៊ាំញ៉ាំ ទាក់ទងគ្នាប្រទាក់ក្រឡាច្រើនជាងខួរក្បាលមនុស្សប្រុស ទាំងពណ៌ និងអ័រម៉ូនបញ្ចេញដោយខួរក្បាល ក៏ត្រូវបានរកឃើញថាខុសគ្នាដែរ ដែលជាហេតុធ្វើឲ្យការគិតរបស់ ស្រ្តីឆាប់មានភាពចាស់ទុំជាងបុរសៗ៕

អត្ថបទផ្ដល់ដោយ៖Hello Krupet

ចុចអាន៖តែក្រូចឆ្មារជាឱសថទិព្វការពារទាំងរាងកាយពីរោគរាតត្បាត និងជាភេសជ្ជៈពង្រឹងប្រព័ន្ធភាពស៊ាំបានល្អ

ចុចអាន៖ប្រុងប្រយ័ត្ន! អាហារពេលល្ងាចមានសាច់ខ្លាញ់ច្រើនរាល់ថ្ងៃ ប្រឈមហានិភ័យខ្ពស់នៃជំងឺបេះដូងមិនដឹងខ្លួន

The post ជឿអត់ថាមនុស្សស្រី មានចរិតចាស់ទុំជាងប្រុសៗ? appeared first on Kampuchea Thmey Daily.

ប្រុសៗ Archives - Kampuchea Thmey Daily

សញ្ញាព្រមានទាំង ៥ បញ្ជាក់ថាបុ្រសៗមានអតុល្យភាពអ័រម៉ូន

ប្រុសៗមានទម្លាប់អាក្រក់ទាំងនេះ ស្រីៗអត់ចូលចិត្តទេ

តំបន់ស្រើបស្រាលលើដងខ្លួនស្រីៗ ៥ កន្លែង គូស្នេហ៍គួរស្វែងយល់

កុំច្រឡំ! ប្រុសៗវ័យកណ្ដាល ក៏ពុកឆ្អឹងមិនចាញ់ ស្រីៗដែរ

ប្រុសៗខ្លួនក្មេងមុខចាស់ តែងមើលរំលងទម្លាប់អាក្រក់ទាំងនេះ

ជឿ​អត់​ថា​មនុស្ស​ស្រី មាន​ចរិត​ចាស់​ទុំ​ជាង​ប្រុសៗ?

ជឿអត់ថាមនុស្សស្រី មានចរិតចាស់ទុំជាងប្រុសៗ?