សម្តេចធិបតីមានប្រសាសន៍ថា បច្ចុប្បន្នប្រជាពលរដ្ឋកម្ពុជាកំពុងងាកមកគាំទ្រផលិតផលក្នុងស្រុកកាន់តែច្រើន ដែលអាចមានកត្តាខាងក្រៅមួយចំនួន រួមទាំងបញ្ហាព្រំដែន។ ប៉ុន្តែ ប្រសិនបើចង់ឱ្យការគាំទ្រនេះបន្តទៅមុខប្រកបដោយនិរន្តរភាព ផលិតផលក្នុងស្រុកត្រូវតែបង្កើនគុណភាព និងមានតម្លៃសមរម្យ ទើបអាចជំនួសទំនិញនាំចូលបាន ព្រមទាំងបង្កើនទំនុកចិត្តរបស់អ្នកប្រើប្រាស់។

សម្តេចធិបតីបានសង្កត់ធ្ងន់ថា គុណភាពជាកត្តាសំខាន់បំផុត ព្រោះពាក់ព័ន្ធនឹងសុខភាព និងជីវិតរបស់ប្រជាពលរដ្ឋ។ ដូច្នេះ អ្នកផលិតមិនត្រឹមតែផលិតសម្រាប់លក់ប៉ុណ្ណោះទេ ប៉ុន្តែត្រូវមានការទទួលខុសត្រូវខ្ពស់ ប្រកាន់ខ្ជាប់នូវភាពស្មោះត្រង់ និងធានាសុវត្ថិភាពផលិតផលដែលដាក់លក់លើទីផ្សារ។

ជាមួយគ្នានេះ សម្តេចធិបតីបានលើកឧទាហរណ៍ករណីក្រសួងសុខាភិបាលទើបប្រកាសហាមប្រើប្រាស់ផលិតផលឡេមួយប្រភេទ ក្រោយពិនិត្យឃើញមានផ្ទុកសារធាតុបារ៉តលើសកម្រិត ដែលអាចបង្កគ្រោះថ្នាក់ដល់សុខភាពអ្នកប្រើប្រាស់។ ករណីនេះបង្ហាញថា ការមិនគិតពីគុណភាពផលិតផល អាចជះផលប៉ះពាល់ធ្ងន់ធ្ងរដល់សាធារណជន។

សម្តេចធិបតីបានបន្ថែមថា គុណភាព និងតម្លៃត្រូវដើរទន្ទឹមគ្នា ខណៈរាជរដ្ឋាភិបាលនឹងបន្តគាំទ្រសហគ្រាសធុនតូច មធ្យម និងសិប្បកម្ម តាមរយៈការកាត់បន្ថយពន្ធ ការសម្រួលនីតិវិធី និងវិធានការជំរុញផ្សេងៗ ដើម្បីបង្កើនការផលិតក្នុងស្រុក និងជំនួសទំនិញនាំចូលតាមលទ្ធភាពដែលអាចធ្វើទៅបាន៕

The post សម្តេចធិបតី ហ៊ុន ម៉ាណែត ជំរុញអ្នកផលិតក្នុងស្រុកបង្កើនគុណភាពនិងតម្លៃសមរម្យ ទើបទទួលការគាំទ្រយូរអង្វែង appeared first on Kampuchea Thmey Daily.

​សម្ដេច ​ហ៊ុន ម៉ាណែត ​លើកឡើងថា៖ «យើងកំពុងជំរុញនូវការផលិតផលិតផលក្នុងស្រុក​ អញ្ចឹង​គិត​មើល​ៗ ​ខ្សែច្រវាក់នៃការលើកទឹកចិត្ត កៅស៊ូមាននៅក្នុងស្រុក ​ផលិតផលអ្វីខ្លះមាននៅក្នុង តើ​អាច​យកទៅជួយដល់សិប្បកម្មផលិត​ ឧទា​ហរ​ណ៍​​គ្រឿងផ្ទះបាយ ចាន ស្លាបព្រា ជ័រ ក្រដាស ​ដាំឬស្សី ​តើអាចធ្វើបានទេតភ្ជាប់ ​លើកទឹកចិត្តតាមកម្រិតណា​ដើម្បីជួយដល់ឧស្សាហកម្មក្នុងស្រុក ​ដោយយកគំរូកង់ឡានជាគោល»។​

​សម្ដេច ​ហ៊ុន ម៉ាណែត ​បានជំរុញឱ្យមើលឧស្សាហកម្មយុទ្ធសាស្ត្រ​ វិនិយោគឧស្សាហកម្មយុទ្ធ​សាស្ត្រ​មួយណា​ដើម្បីបង្កើន និងពង្រីកលទ្ធភាពក្នុងស្រុក ចាប់យកឱកាសដែលប្រជាពលរដ្ឋងាក​មក​គាំទ្រផលិត​ផល​ក្នុង​ស្រុក ​អំឡុង​ពេលមានបញ្ហាព្រំដែន។​

សម្ដេច ​ហ៊ុន ម៉ាណែត ​បន្ថែមថា៖ «ឥឡូវយើងធ្វើឧស្សាហកម្មមួយចំនួន​ពេលដែលយើងមាន​បញ្ហា​ព្រំ​ដែន​ ខ្ញុំបានជំរុញឱ្យមើលឧស្សាហកម្មយុទ្ធសាស្ត្រ​ ការវិនិយោគយុទ្ធសាស្ត្រមួយណា ​ដើម្បី​បង្កើនក្នុងស្រុក ដែលអាចធ្វើបាន ពង្រីកលទ្ធភាពក្នុងស្រុក ​ចាប់យកឱកាសដែលប្រជា​ពលរដ្ឋ​មកគាំទ្រ​ផលិតផលក្នុងស្រុក​ ត្រូវមានចីរភាព ​ដែលចីរភាពវាត្រូវ​មានទាំងពីរទាំង​ផលិតផល​ដែល​មាន​គុណភាព​ និងអ្នកទិញដែលមានគុណភាពចីរភាព​»។

​សម្ដេច ​ហ៊ុន ម៉ាណែត ​បានឱ្យសាកល្បងជំរុញផលិតផល៤ ប្រភេទ ​ដូចជាទឹកដោះគោ ​មី ​ស្ករស ​ជាដើម ដែលរដ្ឋដាក់គោលដៅក្នុងការកាត់បន្ថយការនាំចូលឈានទៅដល់ការកាត់ជាអតិបរមា ​ហើយ​ពង្រីក៕

អត្ថបទ៖ ឡេង ដេត

The post ​នាយករដ្ឋមន្ត្រី ជំរុញ​ឱ្យវិស័យ​ឯកជន​ ចាប់យកឱកាស​ពង្រីក​ផលិតកម្មក្នុង​ស្រុក ​នៅ​ចំពេល​ប្រជា​ពលរដ្ឋងាក​មកគាំទ្រផលិតផលខ្មែរ​ appeared first on Kampuchea Thmey Daily.

សូមបញ្ជាក់ថា ក្រោមការដឹកនាំ និងការគាំទ្ររបស់ក្រសួងពាណិជ្ជកម្ម  និងរដ្ឋបាលខេត្ត  សម្របសម្រួលដោយមន្ទីរពាណិជ្ជកម្មខេត្តកណ្តាល ក្រោមគម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម បានរៀបចំ និងដាក់ឲ្យដំណើរការ (ផ្សារផលិតផលខ្មែរ) ចាប់តាំងពីឆ្នាំ២០១៩ រហូតមកដល់បច្ចុប្បន្ន។

ផ្សារផលិតផលខ្មែរនេះ មានគោលបំណងផ្ដល់ឱកាសទីផ្សារបន្ថែមដល់កសិករ ផលិតករ អាជីវករខ្នាតតូច តំណាងឱ្យចង្កោមផលិត ក្រុមកសិករផលិត និងការតភ្ជាប់ទំនាក់ទំនងទីផ្សារឱ្យកាន់តែប្រសើរ ដល់គ្រួសារផលិត (ដាំដុះ ចិញ្ចឹម កែច្នៃ )ដែលអាចរកប្រាក់ចំណូល សំដៅលើកកម្ពស់ជីវភាពរស់នៅឱ្យប្រសើរជាងមុន។ ការចូលរួមលើកកម្ពស់ និងប្រើប្រាស់ផលិតផលខ្មែរ ជាការរួមចំណែកបង្កើនផលិតភាព ផលិតផលក្នុងស្រុក បង្កើនប្រាក់ចំណូល និងលើកស្ទួយជីវភាពរស់នៅរបស់ប្រជាជន ដែលស្ថិតនៅក្នុងបន្ទាត់ក្រ១ ក្រ២ នឹងជិតក្រ ជួយជំរុញអភិវឌ្ឍឱ្យពួកគាត់មានជីវភាពកាន់តែប្រសើរឡើង។

ជាមួយគ្នាផងដែល ក្នុងនាមអាជ្ញាធរក៏សំណូមពរដល់ប្រជាពលរដ្ឋទាំងអស់ សូមចូលរួមគាំទ្រផ្សារផលិផលខ្មែរ ដើម្បីលើកស្ទួយជីវភាពកសិករ និងផលិតករខ្មែរ៕

The post ផ្សារផលិតផលខ្មែរ បានកំពុងដំណើរការលក់នៅចុងសប្ដាហ៍ ដើម្បីរួមចំណែកបង្កើនផលិតភាព ផលិតផលក្នុងស្រុក appeared first on Kampuchea Thmey Daily.

មន្ត្រីជំនាញកសិកម្ម និងកសិករដាំដំណាំបន្លែនៅឃុំកូនសត្វ ស្រុកទឹកឈូ បញ្ជាក់ថា រយៈពេល៣ខែមកនេះ តម្រូវការបន្លែ និងតម្លៃទីផ្សារល្អ ដោយសារមានការគាំទ្រពីអាជ្ញាធរ មន្ត្រីជំនាញ ពិសេសអ្នកទទួលទានក្នុងការជួយលើកកម្ពស់តម្លៃផលិតផលក្នុងស្រុក ធ្វើឲ្យកសិករចំណេញបានច្រើន។

លោក ស្រូន សារឿន កសិករដាំបន្លែច្រើនជាងគេនៅឃុំកូនសត្វ បានបញ្ជាក់ថា រដូវរំហើយមានពិធីការ និងបុណ្យទានផ្សេងៗច្រើន ធ្វើតម្រូវការទីផ្សារច្រើន ហើយតម្លៃក៏ហក់ឡើងខ្ពស់ កសិករដាំបន្លែនៅឃុំកូនសត្វ កំពុងសប្បាយចិត្ត ក្នុងការប្រមូលផល។ កសិកររូបនោះក៏បានបញ្ជាក់ដែរថា ចម្ការរបស់លោកកំពុងត្រូវការជ្រើសរើសកម្មករមានបទពិសោធជាច្រើននាក់ ដើម្បីជួយការងារដាំបន្លែឲ្យបានកាន់តែច្រើន ដោយលោកផ្តល់កន្លែងស្នាក់ អាហារហូបចុក និងប្រាក់ខែចាប់ពី៣០០ដុល្លាឡើង។

លោក មុី ភារ៉ា មន្ត្រីបច្ចេកទេសកសិកម្មឃុំកូនសត្វ បានបញ្ជាក់ឱ្យដឹងនៅថ្ងៃទី២៤វិច្ឆិកាថា ដោយមានការយកចិត្តទុកដាក់ពីអាជ្ញាធរ ជាពិសេស លោក អ៊ឺម សោធន អភិបាលស្រុកទឹកឈូដែលតែងតែជំរុញឲ្យប្រជាកសិករឲ្យមានការដាំដុះ និងចិញ្ចឹមសត្វ និងជួយស្វះស្វែងលើកកម្ពស់ទីផ្សារផងនោះ ទើបធ្វើឲ្យប្រជាកសិករនៅទូទាំងស្រុកនាំគ្នាងាកមកដាំបន្លែលក់កាន់តែច្រើន ហើយដោយមានការចុះជាប់ជាប្រចាំពីមន្ត្រីកសិកម្មឃុំ ដើម្បីណែនាំបច្ចេកទេសផងធ្វើឱ្យការចំណាយលើការដាំដុះត្រូវបានកាត់បន្ថយ គុណភាពបន្លែកាន់តែល្អតម្រូវការលើទីផ្សារបានច្រើន និងបានតម្លៃខ្ពស់សមរម្យ ខណៈប្រជាពលរដ្ខភាគច្រើននាំគ្នាជួយគាំទ្រ និងលើកកម្ពស់ផលិតផលក្នុងស្រុកយើងផងដែ៕

អត្ថបទ៖ សឹង រ៉ាត់

The post ប្រជាកសិកររស់នៅក្នុងឃុំកូនសត្វ កំពុងរីករាយក្នុងការប្រមូលផលបន្លែ ខណៈតម្លៃលើទីផ្សារបានល្អ appeared first on Kampuchea Thmey Daily.

លោកស្រី អ៉ឹង ឈុនដារី ជាអាជីវករលក់ដូរក្នុងផ្សារអូរឡាំពិក បានសម្តែងក្តីសប្បាយរីករាយពេញចិត្ត គាំទ្រថ្នាក់ដឹកនាំរាជរដ្ឋាភិបាលកម្ពុជា ដែលព្យាយាមជួយឲ្យផលិតផលក្នុងស្រុក កាន់តែសម្បូរបែប។ ទោះមិនមានផលិតផលមកពីប្រទេសថៃ ក៏កម្ពុជានៅតែមានដង្ហើមដកដែរ ព្រោះបច្ចុប្បន្ននេះ កម្ពុជាមានរោងចក្រធំៗក្នុងស្រុកជាច្រើន ដែលផលិតដោយកូនខ្មែរ ហើយចែកចាយលក់ក្នុងស្រុកខ្មែរ ដើម្បីបង្កើនចំណូលសេដ្ឋកិច្ចសម្រាប់ប្រជាជន និងសេដ្ឋកិច្ចសង្គមជាតិទាំងមូល។

លោកស្រីបានបន្ថែមទៀតថា ទំនិញ និងផលិតផលខ្មែរក្នុងស្រុក បន្តវាយលុកកាន់តែខ្លាំងលើទីផ្សារ បណ្តាអាជីវករបង្កើនការលក់ ហើយប្រជាពលរដ្ឋក៏នៅតែបន្តបង្កើនការប្រើប្រាស់។ 

ក្នុងនោះដែរលោក ថៃ ធួន ប្រធានគណៈកម្មការគ្រប់គ្រងផ្សារអូរឡាំពិក បានឲ្យដឹងថា បច្ចុប្បន្ននេះ កម្ពុជាជាប្រទេស ដែលអាចមានសមត្ថភាពផលិតទំនិញក្នុងស្រុក សម្រាប់ប្រើប្រាស់បានដោយខ្លួនឯង ដោយពុំចាំបាច់ពឹងផ្អែកទាំងស្រុងលើប្រទេសណាមួយនោះទេ។ ជាក់ស្តែង អាជីវករលក់ដូរក្នុងផ្សាររបស់លោក កំពុងតែសប្បាយរីករាយ ក្នុងការលក់ដូរផលិតផល និងទំនិញក្នុងស្រុក ដើម្បីជាផ្នែកមួយ នៃការជួយដល់សេដ្ឋកិច្ចជាតិ។ លោកសង្កត់ធ្ងន់ថា កម្ពុជាក្រោមការដឹកនាំរបស់ សម្ដេចតេជោ បន្តដល់សម្ដេចមហាបរវធិបតី ហ៊ុន ម៉ាណែត នាយករដ្ឋមន្រ្តី បន្តរក្សាសន្តិភាព ដើម្បីប្រទេសជាតិមានការរីកចម្រើន និងការអភិវឌ្ឍ។

គួររំលឹកថា កាលពីពេលថ្មីៗ សម្តេចតេជោ ហ៊ុនសែន បានប្រកាន់គោលជំហរខ្ពស់ថា កម្ពុជា មិនថោកទៅសុំអង្វរថៃឲ្យបើកច្រកព្រំដែនវិញនោះទេ ទោះថៃបិទ១០០ឆ្នាំ ឬជារៀងរហូត ក៏កម្ពុជាអាចមានដង្ហើមដកដែរ ពិសេសទោះបីមិនមានទំនិញថៃចូល ក៏កម្ពុជាអាចមានលទ្ធភាពគ្រប់គ្រាន់សម្រាប់ការផលិតប្រើប្រាស់ និងឈានដល់ការនាំចេញទៅបរទេសក៏មានដែរ៕

អត្ថបទ ៖ សុភា

The post អាជីវករបង្កើនការលក់ ពលរដ្ឋបន្តបង្កើនការប្រើប្រាស់ផលិតផលក្នុងស្រុក ដើម្បីសេដ្ឋកិច្ចសង្គមជាតិ appeared first on Kampuchea Thmey Daily.

ក្នុងឱកាសប្រារព្ធ “ទិវាសត្វផ្សោតទន្លេមេគង្គ” មន្ទីរទេសចរណ៍ខេត្តក្រចេះ បានចូលរួមរៀបចំ ដាក់តាំងបង្ហាញនូវផលិតផលមកពីសហគមន៍មូលដ្នាននានាជាច្រើនដើម្បីឲ្យគណអធិបតី ភ្ញៀវកិត្តិយសដែលបានចូលរួមក្នុងកម្មវិធី បានទស្សនា បានភ្លក់ និងបានស្គាល់អំពីផលិតផល ក្នុងសហគមន៍នីមួយៗ ក្នុងខេត្តក្រចេះ សំដៅចូលរូមពង្រឹង លើកទឹកចិត្ត លើកកម្ពស់គុណភាពផលិតផលប្រកបដោយការទទួលខុសត្រូវរួមចំណែកស្រូបទាញការចាប់អារម្មណ៍កាន់តែខ្លាំងពីភ្ញៀវទេសចរ ជាពិសេស ក្រឡានថ្មគ្រែ ដែលជាអត្តសញ្ញាណរបស់ខេត្តក្រចេះ។

បន្ទាប់ពីបានទស្សនាការតាំងបង្ហាញផលិតផលសហគមន៍ និងបានភ្លក់នូវរសជាតិដ៏ឈ្ងុយឆ្ងាញ់របស់ក្រឡានថ្មគ្រែ រួចមក កញ្ញា អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានបង្ហាញនូវចំណាប់អារម្មណ៍ចំពោះរសជាតិក្រឡានថ្មគ្រែថា តាមអ្វីដែលកញ្ញាបានដឹង គឺថា ក្រឡានមុននឹងសាយភាយល្បីទៅដល់ខេត្តផ្សេងនោះ គឺផ្ដើមចេញពីខេត្តក្រចេះ។ «ខ្ញុំជាកូនអ្នកក្រចេះ ជាអ្នកគាំទ្រដ៏ស្មោះត្រង់របស់ក្រឡានថ្មគ្រែ ឥឡូវនេះក្រឡានយើងមានរស់ជាតិច្រើនមែនទែន តាមបែបប្រពៃណី មានរស់ជាតិ បាយដំណើប លាយសណ្ដែក លាយដូង និងមានលាយខ្នុរបន្ថែមទៀត»។

កញ្ញា អ៊ឹម រចនា សង្ឃឹមថា ថ្ងៃក្រោយបើអាចទៅរួច ទី១ កញ្ញាសូមលើកទឹកចិត្តឲ្យធ្វើក្រឡាន ងាយស្រួលបកជាងនេះបន្តិច ដើម្បីស្រួលទទួលទាន ហើយទី២ លើកទឹកចិត្តឲ្យកែច្នៃចចេញ ជារស់ថ្មីផ្សេងៗបន្ថែមទៀត ដើម្បីទាក់ភ្ញៀវទេសចរណ៍ឲ្យបានភ្លក់ និងទិញក្រឡាន ទៅតាមចំណង់ចំណូលចិត្តរបស់គាត់ ព្រោះភ្ញៀវខ្លះអត់អាចញ៉ាំសណ្ដែកបានទេ យើងអាច បន្ថយសណ្ដែក និងភ្ញៀវខ្លះទៀតគាត់អត់អាចញ៉ាំផ្អែមបានទេ អញ្ចឹងយើងគួរកាត់បន្ថយ ផ្អែមបាន។

ដើម្បីត្រៀមទទួលស្វាគមន៍ភ្ញៀវទេសចរណ៍ជាតិ និងអត្តរជាតិ មកទស្សនាកំសាន នៅក្នុងខេត្តក្រចេះ នាពិធីបុណ្យឆ្លងឆ្នាំសកល និងត្រៀមស្វាគមន៍ទេសចរណ៍ឆ្នាំ២០២៦ ខាងមុខនេះ មន្ទីរទេសចរណ៍ខេត្តក្រចេះ បានបង្កើតពាក្យស្លោក គឺ «ក្រឡានរសជាតិឆ្ងាញ់ល្អ ទេសចរមានកំណើន» «ក្រឡានថ្មគ្រែ ថែកេរ្តិ៍ដូចតា» «ក្រឡានល្អ ស្វាគមន៍ទេសចរណ៍ ឆ្នាំ២០២៦»៕

អត្ថបទ៖ ប្រុញ វិធិន

The post ផលិតផលសហគមន៍ជាច្រើនមុខ ត្រូវបានដាក់តាំងបង្ហាញក្នុងកម្មវិធី “ទិវាសត្វផ្សោតទន្លេមេគង្គ” appeared first on Kampuchea Thmey Daily.

​លោកបណ្ឌិត គឺ សិរីវឌ្ឍន៍ ​បានប្រាប់ឱ្យដឹងថា ​ដើមឡើយ ​យើងមិនអាចឆក់យកទីផ្សារ ​ដែលកំពុង​តែ​គាំទ្រ​ផលិតផល​មកពីបរទេស (ថៃ) ​​នោះទេ ​ប្រជាពលរដ្ឋ បាន​ដាក់សេចក្ដីទុកចិត្ត ​ទៅលើ​ទំនិញ​ថៃ​រួច​ទៅហើយ​ ដូច្នេះ ​ផលិតករ​ក្នុងស្រុក ​ដែលយើងទើបតែជាអ្នកចាប់ផ្ដើម ​ចូលទៅក្នុងទីផ្សារ ​មិន​អាច​ទៅដណ្ដើម​ទីផ្សារបាន ​ដោយសារតែសេចក្ដីទុកចិត្តទៅលើគុណភាព។​

​លោកបណ្ឌិត គឺ សិរីវឌ្ឍន៍ បន្ថែមថា៖ «ក៏ប៉ុន្តែនៅពេលនេះ ​ប្រជាពលរដ្ឋ​បានធ្វើពហិការ ​លែង​ប្រើ​ប្រាស់​ទំនិញថៃ ​មួយចំនួនធំ ​ដែលធ្វើឱ្យក្លាយទៅជាឱកាស​ អញ្ចឹងនៅក្នុងឱកាសនេះ ​ប្រសិន​បើ​ផលិតករ​របស់យើង ​គាត់ចាប់ឱកាសនេះបាន ​ហើយពង្រីកផលិតកម្ម ​នោះវាជាឱកាសល្អមួយ ​ក៏​ប៉ុន្តែ ​ជាមួយគ្នានេះ វាត្រូវតែមានការគាំទ្រ ​ពីរដ្ឋាភិបាល ​ប្រសិនបើគ្មានការគាំទ្រពីរដ្ឋាភិបាលទេ ​ផលិតករគាត់ធ្វើហើយ ​គាត់មិនអាចទៅ ​ប្រកួតប្រជែងបាន ​ធ្វើឱ្យគាត់ដួល ក្ស័យធន់ នៅ​ពេល​ខាង​មុខ​ទៀត វាក៏ជាកត្តាមួយរារាំង ​ដែលផលិតករទាំងអស់ ​បច្ចុប្បន្ន គឺគាត់ស្ថិតនៅ​ក្នុង​ស្ថានភាពនេះ»។

​លោកបណ្ឌិត គឺ សិរីវឌ្ឍន៍ ​បញ្ជាក់បន្ថែមថា ​ផលិតករគាត់បារម្ភថា នៅពេលគាត់ចាប់ផ្ដើម សង់​រោង​ចក្រវិនិយោគទៅ ស្រាប់តែបើកឱ្យមានទំនិញថៃចូលមកវិញ ​អញ្ចឹងគាត់លក់មិនបាន ទំនិញថៃ​ចូល​មកលក់​ថោកជាទំនិញក្នុងស្រុក ​គាត់មិនអាចបន្តអាជីវកម្មគាត់បាន គឺធ្វើឱ្យគាត់ខាត។​

​បើតាម លោក បណ្ឌិត គី សិរីវឌ្ឍន៍ ​វាគឺជាឱកាស ទាំងរដ្ឋាភិបាល ទាំងអាជីវករ ទាំងប្រជាពលរដ្ឋ គឺយើង​ត្រូវរួមគ្នា ជាក្រុមតែមួយ យើងប្រើប្រាស់ផលិតផលក្នុងស្រុក អ្នកផលិត ដាក់ដើមទុន​ដើម្បី​បំពេញតម្រូវការក្នុងស្រុក រដ្ឋាភិបាលគាំទ្រការផលិតឱ្យថ្លៃដើមទាប បង្កើនគុណភាព។

នៅពេលនេះ គឺការកសាងទំនុកចិត្តជាមួយអ្នកប្រើប្រាស់ ប្រសិនបើអ្នកប្រើប្រាស់​មានទំនុក​ចិត្ត​ហើយ ការគាំទ្រពីរដ្ឋាភិបាល ការផ្ដល់ការលើកទឹកចិត្តដល់ផលិតករឱ្យគាត់មានប្រាក់ចំណេញ គាត់​លក់​ថ្លៃទាបបាន ថ្ងៃក្រោយទៅទោះបីបើកព្រំដែនឡើងវិញ ក៏ទំនិញថៃ មិនអាចចូលមកដណ្ដើម​ទីផ្សារ​យើងបានដែរ ព្រោះយើងបានកសាងភាពរឹងមាំហើយ៕

The post ​ពហិការ​ទំនិញ​ថៃ ​ជា​ឱកាស​សម្រាប់​ផលិតករ​ក្នុងស្រុក​ appeared first on Kampuchea Thmey Daily.

​លោកបណ្ឌិត គី សិរីវឌ្ឍន៍ ​បានលើកឡើងថា កន្លងមក​ប្រជាពលរដ្ឋ​ធ្លាប់​បាន​គាំទ្រ​ផលិតផល​ក្នុង​ស្រុក​ដែរ ​ប៉ុន្តែសកម្មភាពផុសផុល ​មិនទាន់បានច្រើន​ដូចនៅក្នុងពេលនេះ ​ដែលសន្ទុះគាំទ្រ​មានការ​កើនឡើង​ ​ហើយមានទំនិញមួយចំនួន​បានផលិតមក​ហើយ ​តម្រូវការខ្ពស់ជាងការផលិត​ ដែលធ្វើឱ្យ​ខ្វះ​ទំនិញ​មួយចំនួនផងដែរ​។

​បើតាមអ្នកជំនាញផ្នែកសេដ្ឋកិច្ចរូបនេះ​ ​ស្ថានភាពបច្ចុប្បន្ន ​ផ្នែកផលិតកម្ម ​មាន​កំណើន​យឺត​ ​​ចំណែក​ឯ​តម្រូវការ​មាន​កំណើន​លឿន​ ដែល​នេះ​គឺ​ជា​ភាព​បត់បែន​នៅ​ក្នុង​ទ្រឹស្ដី​សេដ្ឋកិច្ច​ ​ដូច្នេះ​ហើយ​ ​ក្នុង​ខណៈ​ពេលដែលសន្ទុះ ​ងាកមកគាំទ្រផលិតផលក្នុងស្រុក​ មានសន្ទុះឡើងលឿន ​ដូច្នេះ ​ឧស្សាហកម្ម ដែល​ផលិតក្នុងស្រុក ​នឹង​ផ្គត់ផ្គង់ ​មាន​កម្រិតតិចជាងតម្រូវការ ​នៅឡើយ។

​លោកបណ្ឌិត គី សិរីវឌ្ឍន៍ ​បញ្ជាក់ថា៖ «​ឧស្សាហកម្មយើង​មិនទាន់អាចបំពេញតម្រូវការ​បាន​គ្រប់​ជ្រុងជ្រោយ​នៅឡើយទេ មានទំនិញខ្លះ​ក៏យើងអាចផ្គត់ផ្គង់បាន ​ដោយសារតម្រូវការនៅតូច ហើយ​មានទំនិញខ្លះ​តម្រូវការមានសន្ទុះលឿន ​ក៏មិនអាចផ្គត់ផ្គង់បាន ប៉ុន្តែ​ យើងនិយាយជារួមថា ​បច្ចុប្បន្ន ​ឧស្សាហកម្ម​នៅក្នុងស្រុក​ចាប់ផ្ដើមងើបឡើង​បន្តិចម្ដងៗ ​ដើម្បី​ឈានទៅរក​ ការផ្គត់ផ្គង់ឱ្យ​បាន​គ្រប់​ជ្រុង​ជ្រោយ​ជូនទៅដល់ទីផ្សារនៅ​ក្នុងប្រទេសកម្ពុជា​»។

​អ្នកស្រី សម្បត្តិ អមរៈ វិប្បស្សិនី នាយិកាគ្រប់គ្រងក្រុមហ៊ុន Sabara Best Food មានប្រសាសន៍ថា ​សន្ទុះ​គាំទ្រផលិតផល​ក្នុង​ស្រុក​បានហក់ឡើង​ ​បន្ទាប់ពីមានជម្លោះព្រំដែន​កម្ពុជា-ថៃ ​ខណៈផលិត​កម្មរបស់អ្នកស្រី ​បានបង្កើនការផលិត​ដោយបន្ថែមម៉ោងការងារ។

​អ្នកស្រី សម្បត្តិ អមរៈ វិប្បស្សិនី ​បន្តថា ​ផលិតផលខ្មែរ​ភាគច្រើន ស្ថិតក្នុងរង្វង់សិប្បកម្មខ្នាតតូច និងមធ្យមនៅឡើយ ជាហេតុធ្វើឱ្យពិបាកប្រជែងនឹងក្រុមហ៊ុនក្រៅស្រុកធំៗ ដែល​បណ្តុំដោយផលិតផលមានតម្រូវការចាំបាច់ច្រើនមុខ។

​អ្នកស្រី សម្បត្តិ អមរៈ វិប្បស្សិនី ជឿជាក់យ៉ាងមុតមាំថា បើសន្ទុះនៃការគាំទ្រ​ផលិតផល​ក្នុងស្រុក​នៅតែបន្ត នៅ៤-៥ឆ្នាំខាងមុខ ទីផ្សារផលិតផលខ្មែរនឹងពង្រីកខ្លួនកាន់តែធំ ពិសេសគឺហុចប្រយោជន៍ដល់សង្គមជាតិទាំងមូល។

​ស្របពេលដែលដំណើរការនៃការពង្រឹង និងពង្រីកការផលិតផលិតផលក្នុងស្រុក មិនទាន់អាចឆ្លើយ​តបនឹងតម្រូវការភ្លាមៗនៅឡើយ អ្នកស្រី សម្បត្តិ អមរៈ វិប្បស្សិនី សំណូមពរដល់​ពលរដ្ឋខ្មែរមាន​ការអត់ធ្មត់សិន។

​អ្នកស្រីជឿថា បើសន្ទុះនៃការគាំទ្រផលិតផលក្នុងស្រុកមានអាយុវែងឆ្ងាយ យ៉ាងយូរបំផុត ៤-៥ឆ្នាំ​ខាងមុខ នឹងហុចប្រយោជន៍ដល់សង្គមជាតិទាំងមូល៕

អត្ថបទ៖ ឡេង ដេត

The post ​អ្នក​ជំនាញ​៖ ​ឧស្សាហកម្ម​ផលិតកម្មក្នុងស្រុក ​ចាប់ផ្ដើម​ងើបឡើង​ ក្រោយ​ពលរដ្ឋ​ពហិការ​ទំនិញថៃ​ appeared first on Kampuchea Thmey Daily.