ទីបំផុតទៅ ផ្លូវក្រួសក្រហមដែលធ្លាប់ពិបាកធ្វើដំណើរទៅមករដូវប្រាំង រដូវវស្សា បានប្រែក្លាយជាផ្លូវកៅស៊ូយ៉ាងថ្មីសន្លាងមានទទឹង ៦ ម៉ែត្រ និង ប្រវែង ១៦ គីឡូម៉ែត្រ ក្រោមគម្រោងនិរន្តរភាពតំបន់ទេសភាព និង ទេសចរណ៍ធម្មជាតិកម្ពុជា ដែលមានក្រសួងអភិវឌ្ឍន៍ជនបទ និង ក្រសួងទេសចរណ៍ សហការគ្នា។

អ្នកស្រី អ៊ី គឹមជី និង លោក ប៉ន រិទ្ធី ជាពលរដ្ឋរស់នៅក្នុងភូមិជីផាត ឃុំជីផាត ស្រុកថ្មបាំង បានលើកឡើងកាលពីថ្ងៃទី ២៦ ខែឧសភា ឆ្នាំ ២០២៦ ថ្មីៗ នេះថា ពួកគាត់ពិតជាសប្បាយចិត្តរកអ្វីប្រៀបផ្ទឹមមិនបាននោះទេ ពេលទទួលបានផ្លូវកៅស៊ូថ្មីនេះឡើងដែលផ្តើមពីកែងផ្លូវជាតិលេខ ៤៨ ស្រុកបូទូមសាគរ រហូតដល់កំពង់ចម្លងជីផាត។

ពលរដ្ឋដដែល បន្ថែមថា កន្លងទៅ កំណាត់ផ្លូវខាងលើជាប្រភេទផ្លូវក្រួសក្រហមលំបាកធ្វើដំណើរពេលខែប្រាំង និង វស្សា ថែមទាំងពិបាកដឹកជញ្ចូនទិន្នផលកសិកម្មទៅកាន់ទីផ្សារទៀតផង រីឯ អ្នកទេសចរ ក៏ចំណាយពេលវេលាយូរមកកម្សាន្តតំបន់អេកូទេសចរណ៍ធម្មជាតិជីផាតដែរ ខណៈមានសក្តានុពលខ្ពស់ នៃវិស័យទេសចរណ៍គ្រប់ភ្ញៀវទេសចរទាំងអស់។

ទន្ទឹមនោះការទទួលបានផ្លូវកៅស៊ូថ្មីស្អាតល្អហើយ ពលរដ្ឋ នៅតែស្នើសុំឲ្យមានការជួយកសាងស្ពានប្រវែង ១៦២ ម៉ែត្រ ឆ្លងកាត់ព្រែកជីផាត បន្ថែមទៀត គ្រាជាបំណងប្រាថ្នាយូរឆ្នាំមកហើយរបស់ពួកគាត់ ព្រោះថា សព្វថ្ងៃ មិនថាពលរដ្ឋ ឬ អ្នកទេសចរ ត្រូវចំណាយពេលវេលាថវិកាច្រើនគួរសម ដើម្បីធ្វើដំណើរឆ្លងទៅមក។ អ្វីដែលសំខាន់គឺពេលមានជំងឺឈឺយប់ព្រលប់អ្វី ពិបាកឆ្លងទៅរកសេវាពិនិត្យព្យាបាលសុខភាព។

លោក អៀង ដារ៉ាវុធ ប្រធានមន្ទីរអភិវឌ្ឍន៍ជនបទខេត្តកោះកុង បានឲ្យដឹងថា ផ្លូវកៅស៊ូប្រវែងជាង ១៦ គីឡូម៉ែត្រ ប្រភេទ DBST ផ្តើមចេញពីកែផ្លូវជាតិលេខ ៤៨ ឆ្ពោះទៅកាន់តំបន់អេកូទេសចរណ៍ធម្មជាតិជីផាត ស្រុកថ្មបាំង ខេត្តកោះកុង សម្រេចការស្ថាបនាបានស្ទើរតែ ១០០ ភាគរយហើយ។ ១០ ភាគរយទៀត នៅសេសសល់តែការដំឡើងស្លាកសញ្ញា និង គំនូសសញ្ញាចរាចរណ៍ប៉ុណ្ណោះ។

លោក អៀង ដារ៉ាវុធ អះអាងដែរថា ផ្លូវកៅស៊ូ ១ ខ្សែនេះ នឹងសម្រួលការធ្វើដំណើរប្រកបដោយសុខសុវត្ថិភាពរបស់ប្រជាសហគមន៍រស់នៅក្នុងឃុំជីផាត និង លើកកម្ពស់វិស័យទេសចរណ៍កាន់តែល្អប្រសើរ ខណៈតំបន់នេះជាគោលដៅទេសចរណ៍ដ៏មានសក្តានុពលមួយនៅកម្ពុជា។

ក្រសួងអភិវឌ្ឍន៍ជនបទ សហការជាមួយ ក្រសួងទេសចរណ៍ បានបើកការដ្ឋានសាងសង់ផ្លូវទាំង ២ ខ្សែ ប្រវែងសរុប ៣២ ម៉ែត្រ ដែលមានតម្លៃប្រមាណជាង ៥ លានដុល្លាអាមេរិក នឹង ផ្តល់ផលប្រយោជន៍ដល់ប្រជាជនចំនួន ១.៣៩៣ គ្រួសារ ស្មើនឹង ៦.១៤៥ នាក់ រស់នៅក្នុងឃុំចំនួន ៤ គឺ ឃុំកណ្តោល ឃុំជីផាត ឃុំឬស្សីជ្រុំ និង ឃុំជំនាប់ នៃស្រុកថ្មបាំង ខេត្តកោះកុង។

លោក ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ កាលពីខែវិច្ឆិកា ឆ្នាំ ២០២៦ ធ្លាប់និយាយថា ក្រសួង កំពុងសិក្សាលម្អិតផ្នែកបច្ចេកទេសជាមួយនឹងក្រសួង-ស្ថាប័នពាក់ព័ន្ធ កសាងស្ពានប្រវែង ១៦២ ម៉ែត្រ និង ទទឹង ១០ ម៉ែត្រ ឆ្លងកាត់តភ្ជាប់រវាងភូមិទឹកល្អក់ និង ភូមិជីផាត ថា ធ្វើជាស្ពានបាឡេ ឬ ស្ពានបេតុង ដើម្បីឆ្លើយតបនឹងការស្នើសុំរបស់សហគមន៍ ក៏ដូចជាអាជ្ញាធរមូលដ្ឋានគ្រប់លំដាប់ថ្នាក់៕
អត្ថបទ ៖ សិរីវឌ្ឍនៈ

The post អ្នកទេសចរ និង ពលរដ្ឋឃុំជីផាត លែងពិបាកធ្វើដំណើរ ក្រោយទទួលបានផ្លូវកៅស៊ូថ្មីប្រវែង ១៦ គីឡូម៉ែត្រ appeared first on Kampuchea Thmey Daily.

បើតាមក្រសួងសាធារណការ នៅចំណុចគ.មលេខ៦៨ ស្រុកបុទុមសាគរ ក្រុមការងារបានត្រួតពិនិត្យយានយន្តចំនួន០៤គ្រឿង ផ្ទុកទម្ងន់សរុបលើសកម្រិតកំណត់ចំនួន ០២គ្រឿង ចន្លោះពី៤៥តោនដល់៤៦តោន លើសទម្ងន់អនុញ្ញាត ចន្លោះពី២០ដល់២១តោន។

នៅចំណុចគ.មលេខ៣ ស្រុកស្រែអំបិល ក្រុមការងារបានត្រួតពិនិត្យយានយន្តចំនួន០៣គ្រឿង មានបិទឡូហ្គោ CR, P ក្នុងនោះផ្ទុកទម្ងន់សរុបលើសកម្រិតកំណត់ចំនួន០១គ្រឿង ចំនួន ៤៨តោន លើសទម្ងន់អនុញ្ញាត ២៣តោន។

សរុបលទ្ធផលក្នុងប្រតិបត្តិការត្រួតពិនិត្យយានយន្តទាំង២ទីតាំងខាងលើ ក្រុមការងារបានត្រួតពិនិត្យយានយន្តសរុបចំនួន ០៧គ្រឿង ផ្ទុកលើសទម្ងន់ចំនួន០៣គ្រឿង ចន្លោះពី២០តោនដល់២៣តោន ត្រូវបានពិន័យជាប្រាក់ទាំងផ្ទុកលើសទម្ងន់សរុប និងផ្ទុកលើសទម្ងន់នៃភ្លៅនីមួយៗ តាមច្បាប់ស្តីពីផ្លូវថ្នល់មាត្រា២៦ និងមាត្រា៦០ និងសេចក្តីជូនដំណឹងលេខ០១០ សក.សជណ.គតលទ ចុះថ្ងៃទី១៨ ខែមីនា ឆ្នាំ២០២៥ ស្តីពីការដោះលែង និងរឹតបន្តឹងការអនុវត្តច្បាប់លើយានយន្តដឹកជញ្ជូនលើសទម្ងន់កម្រិតកំណត់។

ក្រសួងសាធារណការ និងដឹកជញ្ជូន អះអាងថានៅតែបន្តយុទ្ធនាការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់នៅទូទាំងប្រទេស ដើម្បីទប់ស្កាត់ និងចាត់វិធានការរឹតបន្តឹងការអនុវត្តច្បាប់យ៉ាងតឹងរ៉ឹងបំផុតដោយគ្មានការលើកលែងឡើយ៕

The post ក្រសួងសាធារណការ ពិន័យរថយន្តដឹកលើសទម្ងន់ ០៣គ្រឿង នៅលើផ្លូវជាតិ៤៨ appeared first on Kampuchea Thmey Daily.

មន្រ្តីក្រសួង​សាធារណការ​និង​ដឹកជញ្ជូន កាលពី​ថ្ងៃ​ទី១៧ ខែមិថុនា ឆ្នាំ២០២៥ រួមទាំងក្រុមហ៊ុនទីប្រឹក្សាបច្ចេកទេស KCIeng & KECC Joint Venture និងក្រុមហ៊ុនសាងសង់សម្ព័ន្ធក្រុមហ៊ុនកូរ៉េ ILSUNG & HANIL Joint Venture បាន​ចុះពិនិត្យគុណភាព និងបច្ចេកទេសលើការអនុវត្តគម្រោងលើកកម្រិតគុណភាព​ផ្លូវជាតិលេខ៤៨ ដើម្បីធ្វើពិធីប្រគល់-ទទួល។

លោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងបាន​គូស​បញ្ជាក់​ថា បេសកកម្ម​នេះ​គឺដើម្បី​ពិនិត្យគុណភាពនៃការសាងសង់ ដោយក្នុងនោះបានធ្វើការពិនិត្យទៅលើកម្រាស់ និងការបង្ហាប់ស្រទាប់កៅស៊ូ AC (ខួង និងពិសោធ) ធ្វើតេស្តជម្រាបទឹកលើស្រទាប់កៅស៊ូ និងពិនិត្យចំណុចបច្ចេកទេសមួយទៀត។

ក្រោយពីបានត្រួតពិនិត្យរួចរាល់ លោក សូរ វ៉ិចទ័រ បាន​ដឹកនាំក្រុមការងារប្រជុំវាយតម្លៃ និងបានឯកភាពធ្វើការប្រគល់-ទទួល ផ្លូវជាតិលេខ ៤៨ ជាផ្លូវការ។ ក្នុង​នោះដែរ ក្រុមហ៊ុនសាងសង់​ក៏​ត្រូវ​មានកាតព្វកិច្ចថែទាំ និង​ធានារយៈពេល​ពីរឆ្នាំបន្ថែមទៀតបន្ទាប់ពីការប្រគល់-ទទួលនេះ។ នេះបើតាមលោក សូរ វ៉ិចទ័រ។

ផ្លូវជាតិលេខ៤៨ ដែល​មានប្រវែង ១៤៨ គីឡូម៉ែត្រ សាងសង់ជាប្រភេទស្រទាប់កៅស៊ូ AC ដែល​បានបើកការដ្ឋាន​សាងសង់​នៅ ថ្ងៃទី៣ ខែមករា ឆ្នាំ២០២២ ក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា។ ផ្លូវនេះស្ថាបនាជាបួនគន្លង​មាន​ចំនួន ៥ ទីតាំង ប្រវែង ៣០ គីឡូម៉ែត្រ និងពីរកន្លង ប្រវែង ១១៨ គីឡូម៉ែត្រ។ តាមផែនការគម្រោង គ្រោងបញ្ចប់នៅខែមេសា ឆ្នាំ២០២៤ ប៉ុន្តែដោយស្ថានភាពការរីករាលដាលនៃកូវីដ-១៩ និងកត្តាភូមិសាស្ត្រតំបន់ភ្នំ ធ្វើឱ្យគម្រោងពន្យាពេលសាងសង់ជាង ១ ឆ្នាំ ពោលគឺបញ្ចប់ការសាងសង់នៅខែឧសភា ឆ្នាំ២០២៥។

ផ្លូវជាតិលេខ ៤៨ សាងសង់​តភ្ជាប់ជាមួយផ្លូវជាតិលេខ ១០ និងតភ្ជាប់ទៅខេត្តពោធិ៍សាត់ ខេត្តបាត់ដំបង និងខេត្តប៉ៃលិន មកកាន់តំបន់ឆ្នេរកម្ពុជា ដែលភ្ជាប់ប្រទេសកម្ពុជាទៅប្រទេសថៃ។ ផ្លូវនេះ​ត្រូវបានចាត់ទុកជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើសមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅនៅក្រុងព្រះសីហនុ សំដៅរួមចំណែកក្នុងការជំរុញការដោះដូរពាណិជ្ជកម្ម វិនិយោគ និងការដឹកជញ្ជូនដំណាំកសិផល និងកសិឧស្សាហកម្ម ឱ្យកាន់តែមានប្រសិទ្ធភាពខ្ពស់ ឆាប់រហ័ស និងចំណាយតិច៕

The post ផ្លូវជាតិលេខ ៤៨ ទៅកោះកុង បញ្ចប់​ការ​ស្ថាបនា ១០០% ធ្វើ​ពិធីប្រគល់-ទទួលជា​ផ្លូវការ appeared first on Kampuchea Thmey Daily.

កិច្ចប្រជុំដែលមានការចូលរួមពីលោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង រៀបចំឡើងក្នុងគោលបំណង ដើម្បី​ពិនិត្យនិងពិភាក្សាលើវឌ្ឍនភាពការងារស្ថាបនា​ផ្លូវជាតិលេខ៤៨ និង​ស្វែងរកដំណោះស្រាយលើបញ្ហាប្រឈមនានា ព្រមទាំងធានាការអនុវត្តគម្រោងឱ្យបានទាន់ពេលវេលាតាមផែនការដែលបានគ្រោងទុក។

បើតាមមន្រ្តីក្រសួង​សាធារណការ​និង​ដឹកជញ្ជូន ខណៈ​គម្រោងលើកកម្រិតគុណភាពផ្លូវជាតិលេខ ៤៨ សម្រេចលទ្ធផល​ការងារបាន​ប្រមាណ ៩៧,៣៧% គិតត្រឹមថ្ងៃទី២២ ខែឧសភា ឆ្នាំ ២០២៥ ការ​ស្ថាបនា​គ្រោងបញ្ចប់​ឲ្យរួចរាល់​នៅក្នុងអំឡុង​ខែមិថុនា ឆ្នាំ២០២៥ ខាងមុខ៕

The post ផ្លូវជាតិលេខ ៤៨ ពី​ផ្លូវ​បំបែក​ស្រែអំបិល​ទៅ​ក្រុង​ខេមរភូមិន្ទ ​គ្រោង​បញ្ចប់ការ​សាងសង់​នៅ​ខែ​​មិថុនា​​នេះ appeared first on Kampuchea Thmey Daily.

ខណៈ​ខ្សែ​ផ្លូវជាតិ​​ដ៏​សំខាន់នេះ កំពុង​ឈាន​ទៅ​បញ្ចប់​ក្នុង​ពេល​ដ៏ខ្លី​ខាងមុខ មន្រ្តីក្រសួង​សាធារណការ​និង​ដឹកជញ្ជូន កាលពីម្សិលមិញនេះ​ ក៏​បានដឹកនាំក្រុមការងារបច្ចេកទេសក្រសួង ក្រុមហ៊ុនទីប្រឹក្សាបច្ចេកទេស និងក្រុមហ៊ុនសាងសង់ ចុះពិនិត្យការអនុវត្តគម្រោងលើកកម្រិតគុណភាពផ្លូវជាតិលេខ៤៨។

លោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូនបាន​គូស​បញ្ជាក់ថា ការចុះពិនិត្យនេះ ដើម្បីពិនិត្យមើលវឌ្ឍនភាពការងារគម្រោង ដោយក្នុងនោះបានធ្វើការពិនិត្យឆែកកម្រាស់ និងការបង្ហាប់ស្រទាប់កៅស៊ូ AC (ខួង និងពិសោធ) និងចុះពិនិត្យទីតាំងដំឡើងផ្លាក «អរគុណសន្តិភាព» និង​ពិនិត្យមើលវឌ្ឍនភាពគម្រោង និងការងារនូវសល់មួយចំនួន។

ក្នុងដំណើរ​ចុះ​ត្រួត​ពិនិត្យ​បច្ចេកទេស​និង​វឌ្ឍនភាព​គម្រោងលើ​កកម្រិត​ផ្លូវជាតិលេខ ៤៨ មន្រ្តីក្រសួង​សាធាណការ​និងដឹកជញ្ជូន ក៏បានណែនាំទៅដល់ក្រុមការងារបច្ចេកទេសសាងសង់ទាំងអស់ ត្រូវ​ពិនិត្យបន្ថែមលើគ្រឿងបរិក្ខារសុវត្ថិភាពចរាចរណ៍ និងប្រព័ន្ធបង្ហូររំដោះទឹកភ្លៀង នៅតាមទីតាំងមួយចំនួនដែលងាយនឹងរងគ្រោះ និងឱ្យបន្តយកចិត្តទុកដាក់និងខិតខំអនុវត្តការងារសម្រេចឱ្យបានតាមផែនការដែលបានគ្រោងទុក ប្រកប​ដោយគុណភាពផងដែរ។

គិតត្រឹមដើមខែមេសា ឆ្នាំ ២០២៥ គម្រោងលើកកម្រិតគុណភាពផ្លូវជាតិលេខ៤៨ សម្រេចវឌ្ឍនភាពការងារ​បាន​ប្រមាណ ៩៤.៣០% និងគ្រោងបញ្ចប់ការងារសាងសង់នៅរដូវប្រាំងនេះ៕

The post មន្រ្តីក្រសួង​សាធារណការ ចុះឆែក​​ស្តង់ដា​កម្រាស់កៅស៊ូ ចាក់​ក្រាល​អ៊ុត​លើ​ផ្លូវ​ជាតិលេខ ៤៨ ទៅ​ខេត្តកោះកុង appeared first on Kampuchea Thmey Daily.

នៅ​រសៀល​ថ្ងៃ​ទី​ ២៤ ខែ​មីនា នេះ លោក ផន រឹម បានមានប្រសាសន៍​ថា គិត​ត្រឹមថ្ងៃទី២៣ ខែ​មីនា ឆ្នាំ២០២៥ នេះ គម្រោងលើកកម្រិតគុណភាពផ្លូវជាតិលេខ ៤៨ ប្រវែង ១៤៨ គីឡូម៉ែត្រ សម្រេចលទ្ធផល ៩៣,២៨% ដោយអ្នកដំណើរ​អាច​បើកបរ​ជាមួយ​​ផ្លូវ​កៅស៊ូ​ចាក់​យ៉ាង​រលោងស្រិល​អម​ដោយទេសភាព​ ព្រៃព្រឹក្សាខៀវស្រងាត់ ត្រជាក់ភ្នែក ជាទីដ៏មនោរម្យ​។

មន្តីអ្នកនាំពាក្យរូបនេះ បានអះអាងថា ផ្លូវជាតិលេខ៤៨ ចាប់​ពីបំបែកផ្លូវជាតិលេខ ៤ រហូតដល់​ក្រុង​ខេមរភូមិន្ទ ខេត្ត​កោះកុង កំពុង​សម្រុក​អ៊ុត AC, គូស​គំនូស​ចរាចរណ៍​បែក​ចែក​ទ្រូង, ដំឡើង​បង្គោល​គីឡូ​ម៉ែត្រ, ដំឡើង​ផ្លាក​សញ្ញា​ចរាចរណ៍, ដំឡើង​ផ្លាក​សញ្ញា​កំណត់​ល្បឿន ជា​ដើម​។

ផ្លូវជាតិលេខ៤៨ គឺជា​ខ្សែផ្លូវ​ដ៏​សំខាន់ និង​យុទ្ធសាស្ត្រ ប្រកប​ដោយ​សក្តានុពល​សេដ្ឋកិច្ច ពាណិជ្ជកម្ម ដឹកជញ្ជូន ភស្តុភារកម្ម ទេសចរណ៍ និង​ដើរតួនាទី ជា​សរសៃឈាម​សេដ្ឋកិច្ច​ដ៏​មាន​​សក្តានុពល​របស់​កម្ពុជា ក៏ដូចជាខេត្ត​កោះកុង​ផ្ទាល់ ក្នុងការជួយសម្រួលដល់ការតភ្ជាប់ទំនាក់ទំនងគមនាគមន៍ និងការធ្វើ​សមាហរណកម្ម​តភ្ជាប់​ផ្ទៃក្នុង​ប្រទេស។

ផ្លូវ​មួយ​ខ្សែ​នៃ​ខ្សែ​ផ្លូវតភ្ជាប់​ទៅ​សមុទ្រនេះ​ តាមបច្ចេកទេស​ត្រូវ​ចាក់ក្រាល​បេតុង​កៅស៊ូ​កម្រាស់ ៧ តឹក ដើម្បី​ធានា​គុណភាព​ជាប់​យូរ​អង្វែរ​។ ជាមួយ​ថវិកាចំណាយ​​សាងសង់​ប្រមាណ ៦៥,១៤ លាន ដុល្លារ​អាមេរិក ការដ្ឋាន​ផ្លូវនេះបែងចែក​មួយ​កំណាត់​ប្រវែង ១២២,៩គីឡូម៉ែត្រ មាន ២ គន្លង និង​មួយកំណាត់​ប្រវែង ២៥,១ គីឡូម៉ែត្រ មាន ៤ គន្លង ក្រាល​ដោយ​បេតុងកៅស៊ូ (AC)​ រួមជាមួយបេតុងសរសៃដែកនៅ​ត្រង់ផ្លូវប្រសព្វចំនួន ៥ ទីតាំង៕

The post ផ្លូវជាតិលេខ ៤៨ (ស្រែអំបិល-កោះកុង) ចាក់​ក្រាល​​កៅស៊ូ​កម្រាស់ ៧ ហ៊ុន​ សម្រេចស្ទើរ​ ១០០% appeared first on Kampuchea Thmey Daily.

ផ្លូវ​ជាតិ​លេខ ១០

ដំណើរការ​ស្ថាបនាផ្លូវជាតិលេខ១០ តភ្ជាប់​ខេត្ត ៣ គឺ​ខេត្តកោះកុង ពោធិ៍សាត់ និងបាត់ដំបង (កោះកុង-​វាលវែង-សំឡូត) ប្រវែង​សរុប ១៩៨ គីឡូម៉ែត្រ សម្រេច​ការសាងសង់ជិត ១០០%។

ផ្លូវជាតិលេខ ១០ ជាប្រភេទផ្លូវ Grade III ក្រាលកៅស៊ូពីរស្រទាប់ DBST ប្រើប្រាស់​រយៈពេល​​សាងសង់​ចំនួន ៦៦ ខែ ដោយចាប់ផ្ដើម​បើក​ការដ្ឋាន​​កាល​ពី​ថ្ងៃទី១៨ ខែធ្នូ ឆ្នាំ២០១៩ និង​គ្រោង​បញ្ចប់​អំឡុង​ខែ​មិថុនា ឆ្នាំ​២០២៥​ ខាងមុខ។

ផ្លូវ​ជាតិ​លេខ ៤៨

គម្រោងលើកកម្រិតគុណភាពផ្លូវជាតិលេខ ៤៨ ប្រវែង​ជាង ១៤៨ គីឡូម៉ែត្រ នៅសល់ផ្លូវដីតែ​ប្រមាណ ១០ គីឡូម៉ែត្រ​ប៉ុណ្ណោះនិង​ត្រៀមក្រាលថ្មអ៊ុតកៅស៊ូ AC បញ្ចប់​គម្រោង​។

បើ​តាម​មន្រ្តី​អ្នក​នាំពាក្យ​ក្រសួង​សាធារណការ​និង​ដឹកជញ្ជូន ផ្លូវដី​ដែល​នៅ​សេសសល់តិចតួចនេះ ត្រូវ​រក្សាទុក​​ឲ្យ​មាន​រយៈ​ពេល​កំណត់​តាម​បច្ចេកទេស ដោយសារ​ទីតាំងសាងសង់​ត្រូវ​កាត់​ពុះ​ជ្រៀក​ជម្រាល​ភ្នំ ដើម្បីធានាការធ្វើដំណើរ និង​ការដឹកជញ្ជូន​ឲ្យ​មាន​សុវត្ថិភាព​ នៅ​ពេល​ផ្លូវ​ស្ថាបនា​រួចរាល់។

គិតត្រឹមថ្ងៃទី៥ ខែមីនា ឆ្នាំ២០២៥ គម្រោងលើកកម្រិតគុណភាពផ្លូវជាតិលេខ ៤៨ សម្រេចលទ្ធផល​វឌ្ឍនភាព​បានប្រមាណ ៨៩%។

ផ្លូវ​ខេត្ត​លេខ ៣៧៧ និង ៣៧៧ A

ផ្លូវខេត្តលេខ ៣៧៧ ស្ថិតនៅតាមបណ្តោយដងទន្លេមេគង្គ តភ្ជាប់ពីរង្វង់មូលព្រាបស ក្នុង​ក្រុង​ក្រចេះ ឆ្ពោះ​ទៅទីរួមស្រុកសំបូរ ប្រវែង ៣៥.៥ គីឡូម៉ែត្រ និងផ្លូវខេត្តលេខ ៣៧៧A តភ្ជាប់​ពី​សណ្តាន់​ទៅ​សង្គម ប្រវែង ១៣.៦ គីឡូម៉ែត្រ គ្រោង​នឹងបញ្ចប់ការស្ថាបនាជាស្ថាពរនាខែមេសា ឆ្នាំ​២០២៥ មុន​ពិធីបុណ្យចូលឆ្នាំថ្មីប្រពៃណីខ្មែរ​ចូលមកដល់។

​ប្រធាន​មន្ទីរ​សាធារណៈការ និង​ដឹកជញ្ជូន​ខេត្តក្រចេះ លោក សាំង ប៊ុនថេន បានឲ្យកម្ពុជាថ្មី​ដឹង​កន្លង​ទៅ​ថា យោងតាមកិច្ច​សន្យា គឺគម្រោងស្តារ ជួសជុល និងថែទាំផ្លូវខេត្តលេខ ៣៧៧ និង ៣៧៧A ដោយ​ក្រាលកៅស៊ូ AC គ្រោង​បញ្ចប់ការ​ស្ថាបនាជាស្ថាពរនៅក្នុងខែធ្នូ ឆ្នាំ២០២៤ ប៉ុន្តែ​ត្រូវ​បាន​ពន្យាពេល។

ផ្លូវខេត្តលេខ ៣៧៧ និង ៣៧៧A បានសម្ពោធបើកការដ្ឋានកាលពីថ្ងៃទី ៤ ខែមេសា ឆ្នាំ២០២៣ ដោយ​ប្រើប្រាស់​ថវិកា​ពី​ធនាគារ​ពិភពលោក (World Bank) ប្រចាំកម្ពុជា។

បើ​តាម​ក្រុម​ការងារ​សាងសង់​ ផ្លូវខេត្តលេខ ៣៧៧ និង ៣៧៧A កំពុង​សរម្រុក​បញ្ចប់​ឲ្យ​មុនពិធីបុណ្យប្រពៃណីជាតិខ្មែរចូលមកដល់ ខណៈ​ដែល​បច្ចុប្បន្ន​ក្រុមការងារបាននឹង​កំពុងស្ថាបនាជួសជុលផ្លូវ និងស្ពាននៅសង្កាត់ក្រគរ និងនៅទីរួមស្រុកសំបូរតែប៉ុណ្ណោះ ដែល​នឹង​អាច​បើកឲ្យប្រជាពលរដ្ឋធ្វើដំណើរនៅពេលដ៏ខ្លី​ខាងមុខ​នេះ។

ផ្លូវជាតិ​លេខ ២៣

ផ្លូវជាតិលេខ ២៣ ជា​ផ្លូវប្រវត្តិសាស្រ្ត​ថ្មី​ តភ្ជាប់ពីស្រុកកោះធំ​ដល់ស្រុកលើក​ដែក​ កំពុង​ឈានទៅ​ចាក់កៅស៊ូ​គ្រោង​បញ្ចប់​ក្នុង​ពេល​ឆាប់ៗ​នេះ។

ផ្លូវជាតិលេខ ២៣ (NR23) មាន​ប្រវែង ១៩,៨ គីឡូម៉ែត្រ ទទឹង ១១ ម៉ែត្រ ចាប់​ពី​គល់​ស្ពាន​កោះធំ ត្រើយខាងកើត ក្នុងឃុំជ្រោយតាកែវ ស្រុកកោះធំ ដល់ផ្លូវជាតិលេខ ១៤ ឃុំពាមរាំង ស្រុក​លើកដែក ខេត្តកណ្តាល ឆ្លងកាត់ឃុំចំនួន ៤ គឺឃុំជ្រោយតាកែវ ឃុំកំពង់កុង ឃុំលើកដែក និង​ឃុំ​ពាមរាំង។

ខ្សែផ្លូវនេះជាផ្នែកចម្បង និងយុទ្ធសាស្ត្ររបស់រាជរដ្ឋាភិបាល តភ្ជាប់នៅក្នុងតំបន់ដ៏ប្រទាក់ក្រឡា ព្រម​ទាំងផ្តល់អាទិភាពសម្រាប់សម្រួលដល់ការធ្វើចរាចរណ៍របស់ពលរដ្ឋ។

តាម​រយៈ​ផ្លូវ​មួយ​ខ្សែ​ថ្មីនេះ អាច​ឲ្យ​ប្រជាពលរដ្ឋធ្វើដំណើរបានដោយងាយស្រួលពីស្រុកកោះធំ ទៅ​ស្រុក​លើកដែកខេត្តកណ្តាល ដោយមិនចាំបាច់ធ្វើដំណើរ​វាង​ចូលរាជធានី​ភ្នំពេញ ហើយ​បើតាម​មន្រ្តី​ក្រសួង​សាធារណគារ​និង​ដឹកជញ្ជូន ចូលឆ្នាំខ្មែរខាងមុខនេះ ពលរដ្ឋ​អាច​ជិះកាត់ពីកោះធំទៅលើកដែក លែង​លំបាក​ទៀតហើយ។

ផ្លូវ​ខេត្ត​លេខ ៣១២

ផ្លូវខេត្តលេខ ៣១២ មាន​ប្រវែង ២៨,៣៧ គ.ម ចាប់​ផ្តើមពីភូមិសំរោង ឃុំល្វា (ត្រង់​បំបែកផ្លូវជាតិ​លេខ១ គីឡូម៉ែត្រលេខ ៧៧+០៨២) រហូត​ដល់ភូមិករគោ ឃុំបន្ទាយចក្រី (ព្រំប្រទល់កម្ពុជា-វៀតណាម) ក្នុងភូមិសាស្រ្តស្រុកព្រះស្តេច នៃខេត្តព្រៃវែង។

ផ្លូវ​ខេត្ត​លេខ ៣១២ ត្រូវស្តារពង្រីកទទឹងតួផ្លូវរហូតដល់ ១២ ម៉ែត្រ និងលើកកម្រិតគុណភាព ពីប្រភេទ​ផ្លូវក្រាលកៅស៊ូពីរស្រទាប់ (DBST) ទៅជាប្រភេទផ្លូវក្រាលបេតុងកៅស៊ូ (AC) និង​ផ្នែកខ្លះ​ក្រាលបេតុងសរសៃដែកកម្រាស់ ២៥ ស.ម ដែល​​មានទទឹងរួម ១១ ម៉ែត្រ និងមាន ២ គន្លងទៅ-មក។

ផ្លូវ​នេះ​ជា​ខ្សែ​ផ្លូវយុទ្ធសាស្រ្តដ៏សំខាន់មួយ មានភាពប្រទាក់ក្រឡាគ្នាជាមួយនឹងផ្លូវជាតិលេខ១ ផ្លូវខេត្តលេខ ៣១២A និងផ្លូវក្រវាត់ព្រំដែនដែលបានតភ្ជាប់តំបន់​ទីប្រជុំជន ទៅកាន់តំបន់​ព្រំដែន ​(កម្ពុជា-វៀតណាម)។

ផ្លូវខេត្តលេខ៣១២ បាន​បើកការដ្ឋានកាលពីថ្ងៃទី៩ ខែមិថុនា ឆ្នាំ២០២៣ ដែល​អនុវត្តការ​សាងសង់​ដោយក្រុមហ៊ុន ILSUNG-KR JOINT VENTURE ប្រើប្រាស់​ថវិកា​ឥណទានសម្បទាន​ពី​ធនាគារអភិវឌ្ឍន៍អាស៊ី សរុបប្រមាណ ២៥ លានដុល្លារអាមេរិក។

គិត​ត្រឹម​ដើម​ខែ​មីនា ឆ្នាំ ២០២៥ ការ​សាងសង់​ស្ទើរ​រួចរាល់ ១០០%៕

កំណាត់​ផ្លូវ​ជាតិលេខ ៧

កំណាត់​ផ្លូវ​ជាតិ​លេខ ៧ ពី​ស្ពាន​សេកុង​ដល់​ច្រក​ទ្វារ​អន្តរជាតិ​ត្រពាំង​ក្រៀល​ក្នុង​ខេត្ត​ស្ទឹងត្រែង​ មាន​ប្រវែង ៥៨ គីឡូម៉ែត្រ បាន​បញ្ចប់ការ​សាងសង់​ ១០០%។

លោក សរ គឹមណាត ប្រធាន​មន្ទីរ​សាធារណការ​និង​ដឹក​ជញ្ជូន​ខេត្ត​ស្ទឹងត្រែង​បាន​ឲ្យ​កម្ពុជា​ថ្មី​ដឹង​ថា កំណាត់​ផ្លូវ​នេះ​កន្លង​មក​​​រង​ការ​ខូចខាត​ជា​ខ្លាំង ​ពិបាក​សម្រាប់​ការ​ធ្វើ​ដំណើរ​និង​ការ​ដឹកជញ្ជូន​ទំនិញ​ផ្សេងៗ។

លោក សរ គឹមណាត បាន​គូស​បញ្ជាក់ថា ​ដំបូង​ឡើង ការ​សាងសង់​កំណាត់​ផ្លូវ​នេះគ្រោង​ប្រើប្រាស់​ថវិកា​របស់​រដ្ឋាភិបាល​​ចិន​ ដោយ​លើក​កម្រិត​ទៅ​ជា​បេតុង​កៅស៊ូ (AC) ចាប់​ពី​ព្រំ​ប្រទល់​ខេត្ត​ក្រចេះ​រហូត​ដល់​ច្រក​ត្រពាំង​ក្រៀល​ជាមួយ​ឡាវ ប៉ុន្តែ​ដោយ​មិនចង់​រង់ចាំ​យូរ​ រដ្ឋាភិបាល​បាន​ទម្លាក់​ថវិកា​ដើម្បី​ជួសជុល​បណ្ដោះ​អាសន្ន ដើម្បី​សម្រួល​ការ​ធ្វើ​ដំណើរ​របស់​ពលរដ្ឋ។ សម្តេច​ធិបតី​នាយករដ្ឋមន្ត្រី​បាន​ទម្លាក់​ថវិកា​ជួសជុល​ឡើងវិញ​ ដោយ​ក្រាល​កៅស៊ូ​ពីរ​ស្រទាប់ DBST និង​ពង្រីក​ទទឹង​រហូត​ដល់ ១០ ម៉ែត្រ។

ក្រោយ​លើក​កម្ពស់​គុណភាព​បាន​ល្អ​ប្រសើរ​ឡើង​វិញ​ បើ​តាម​លោក សរ គឹមណាត ចរាចរណ៍​ដឹក​ទំនិញ​និង​ការ​ធ្វើ​ដំណើរ​មាន​កំណើន​ជាង ៦០% មិនដូច​ប៉ុន្មានឆ្នាំ​មុន​ស្ទើរ​តែ​​គ្មាន​ចរាចរណ៍​​ធ្វើ​ដំណើរ​ទាល់​​តែ​សោះ។

ផ្លូវជាតិលេខ ៧៣

គម្រោងកែលម្អ ជួសជុល និងការថែទាំផ្លូវជាតិ ៧៣ ប្រវែង ៤៩,៨១២ គីឡូម៉ែត្រ លាត​សន្ធឹង​ពី​ខេត្ត​ត្បូងឃ្មុំ-ខេត្ត​ក្រចេះ សម្រេច​វឌ្ឍនភាព​បាន​ប្រមាណ ៩៣.០៦% គិតត្រឹមដើមខែកុម្ភៈ ឆ្នាំ២០២៥។

បើគ្មានការ​ប្រែប្រួល គម្រោងការកែលម្អ ជួសជុល និងការថែទាំ ផ្លូវជាតិ ៧៣ នឹង​ត្រូវ​បញ្ចប់​នៅចុង​ខែមីនា ឆ្នាំ២០២៥ ខាងមុខនេះ។ នេះ​បើតាមលោក ផន រឹម មន្រ្តី​អ្នក​នាំពាក្យ​ក្រសួង​សាធារណការ និង​ដឹកជញ្ជូន​ ដែល​បង្ហាញ​ពី​វឌ្ឍនភាព​នៃ​ដំណើរការ​ការ​ស្ថាបនា​ផ្លូវ​ជាតិលេខ ៧៣ ដែលកំពុង​អ៊ុតកៅស៊ូ​ឈាន​ទៅ​បញ្ចប់​ឆាប់ៗ​នេះ។

ការ​​ស្ថាបនាផ្លូវជាតិលេខ ៧៣ ត្រូវ​​​ពង្រីកទទឹងផ្លូវ​ពី ៨-៩ ម៉ែត្រ ដល់ ១១ ម៉ែត្រ ដោយ​អ៊ុត​ក្រាល​កៅស៊ូ (AC) និង​នៅ​តំបន់ផ្សារចាក់បេតុងបន្ថែម។

តាមរយៈផ្លូវជាតិ​លេខ ៧៣ នឹង​នាំមកអត្ថប្រយោជន៍យ៉ាងសម្បើម​ដល់ប្រជាពលរដ្ឋក្នុងស្រុក និង​ធានា​អត្ថប្រយោជន៍​ដល់សហគមន៍មូលដ្ឋាន និង​ក្នុងខេត្តចំនួន ៦ របស់កម្ពុជាគឺ កំពង់ចាម ត្បូងឃ្មុំ ខេត្តក្រចេះ មណ្ឌលគិរី រតនគិរី និងខេត្តស្ទឹងត្រែង ដោយកាត់បន្ថយពេលវេលាធ្វើដំណើរ ចំណាយពេល​តិច ភាពងាយស្រួល និងការតភ្ជាប់កាន់តែល្អតាមបណ្តាញផ្លូវជាតិនានា។

ស្ពាន​ឆ្លង​ទន្លេ​មេគង្គ​ក្រចេះ

គិតត្រឹម​ពាក់កណ្តាល​ខែមីនា ឆ្នាំ២០២៥ ដំណើរការ​សាងសង់​ស្ពានឆ្លងកាត់​ទន្លេមេគង្គ​ខេត្តក្រចេះ វឌ្ឍនភាព​សម្រេច​បាន​ប្រមាណ ៩០%។

ស្ពានឆ្លងកាត់ទន្លេមេគង្គខេត្តក្រចេះ ប្រវែង ១ ៧៦១ ម៉ែត្រ។ បើ​តាម​ការ​គ្រោងទុក ស្ពានឆ្លងកាត់​ទន្លេ​មេគង្គ​ខេត្តក្រចេះ អាច​នឹងបើកឱ្យប្រជាពលរដ្ឋធ្វើដំណើរឆ្លងកាត់បណ្តោះអាសន្ន នៅ​អំឡុង​ខែ​កញ្ញា ឆ្នាំ២០២៥ ខាងមុខនេះ៕

បន្ត​ចុចអាន៖ ផ្លូវ​ជាតិ​សំខាន់ៗ ៣ ខ្សែ បញ្ចប់​ការ​សាងសង់​១០០% ​តភ្ជាប់​គ្នា​យ៉ាង​ប្រទាក់ក្រឡា
បន្តចុចអាន៖ ៥ សមិទ្ធផលធំៗ បាន​ផ្លាស់ប្តូរ​មុខមាត់​​ថ្មី​ខេត្ត​កែបកាន់តែ​ស្រស់បំព្រង និង​រីកចម្រើន

The post ​ផ្លូវ​ស្ពាន​ធំៗចំនួន ៩ គ្រោង​បញ្ចប់​ការ​សាង​សង់​នៅ​ឆ្នាំ ២០២៥ appeared first on Kampuchea Thmey Daily.

ផ្លូវជាតិ​លេខ ៤៨ ចាប់ចេញពី​ផ្លូវ​បំបែក​​ស្រែអំបិល​មក​ដល់​ទីរួម​ក្រុង​ខេមរភូមិន្ទ​ខេត្ត​កោះកុង គិត​មកត្រឹមថ្ងៃទី ៥ ខែមីនា ឆ្នាំ ២០២៥ វឌ្ឍនភាព​សម្រេច​បាន​ប្រមាណ ៨៩%។

ផ្លូវ​ជាតិលេខ៤៨ គឺជាខ្សែផ្លូវដ៏សំខាន់ និង​បណ្តាញ​ផ្លូវ​យុទ្ធសាស្ត្រ​តភ្ជាប់​ប្រកប​ដោយសក្តានុពលសេដ្ឋកិច្ច ពាណិជ្ជកម្ម ដឹកជញ្ជូន ភស្តុភារកម្ម និង​ទេសចរណ៍។

ខ្សែផ្លូវនេះ​ជាសរសៃឈាមសេដ្ឋកិច្ចដ៏មានសក្តានុពលរបស់កម្ពុជា ក៏ដូចជាខេត្តកោះកុង ក្នុងការ​ជួយ​សម្រួល​ដល់ការតភ្ជាប់ទំនាក់ទំនងគមនាគមន៍ ការធ្វើសមាហរណកម្មតភ្ជាប់ផ្ទៃក្នុងប្រទេស ជាពិសេសកំពង់ផែទឹកជ្រៅក្រុងព្រះសីហនុ​។

បច្ចុប្បន្ននេះ ការដ្ឋានលើកកម្រិតគុណភាពផ្លូវជាតិលេខ ៤៨ កំពុងសម្រុកសាងសង់​ ដើម្បីធានាសម្រេចវឌ្ឍនភាពតាមការគ្រោងទុកនៅបំណាច់រដូវប្រាំងឆ្នាំ ២០២៥ ខាងមុខ។

លោក ផន រឹម មន្រ្តីអ្នកនាំពាក្យក្រសួងសាធារណការនិងដឹកជញ្ជូន​បាន​គូស​បញ្ជាក់ថា គម្រោង​លើកកម្រិត​គុណភាព​ផ្លូវជាតិលេខ ៤៨ ប្រវែង ១៤៨,០៣៨ គីឡូម៉ែត្រ (ចាប់ពី PK0+000-១៤៨+០៣៨ ភូមិអូរជ្រៅ ឃុំបឹងព្រាវ ស្រុកស្រែអំបិល ដល់​ក្រុងខេមរភូមិន្ទ ខេត្តកោះកុង) នៅសល់ផ្លូវដីមិនដល់ ២០ គីឡូម៉ែត្រ​​ទៀត​នោះ​ទេ និង​កំពុង​ត្រៀមចាក់ក្រាល​កៅស៊ូ AC ជា​បន្តបន្តាប់។

ផ្លូវ​ដីដែល​នៅសេសសល់ ជា​កន្លែងដែល​ត្រូវ​កាត់​ពុះជ្រៀក​ជម្រាលភ្នំ ដើម្បី​ធានា​ការធ្វើ​ដំណើរនិង​ការ​ដឹក​ជញ្ជូន​ប្រកប​ដោយ​​សុវត្ថិភាព ពេល​ស្ថាបនារួចរាល់។ លោក ផន រឹម បន្ថែម។

ដោយ​ឡែក​ផ្លូវ​មួយ​ខ្សែ​ទៀត​ ដែល​កំពុងដំណើរក​សាងសង់​តភ្ជាប់​មក​ខេត្ត​កោះកុង​ដែរ​នោះ​គឺ​ផ្លូវ​ជាតិ​លេខ ១០ ដែលមាន​ប្រវែង​ជាង ១៩៨ គីឡូម៉ែត្រ ដែល​​ជា​ខ្សែ​ផ្លូវ​ថ្មី​សាងសង់​កាត់ ៣ ខេត្ត គឺ​ពី​​ស្រុក​សំឡូត (ខេត្ត​បាត់ដំបង) កាត់វាលវែង (ពោធិ៍សាត់) ដល់​ក្រុង​ខេមរភូមិន្ទ (​ខេត្ត​កោះកុង) ដែល​វឌ្ឍនភាពសម្រាប់ដំណើរការសាងសង់​សម្រេចបានប្រមាណ​ ៩៧​%​។

នៅ​លើ​កំណាត់​​​ផ្លូវ​ជាតិ​មួយ​ខ្សែនេះ ក៏​មានការ​សាងសង់​ស្ពាន​កម្ពស់​​ជាង ៩០ ម៉ែត្រ ដែល​នឹង​បើក​ឱ្យ​ពលរដ្ឋ​អាច​ធ្វើដំណើរ​ឆ្លងកាត់​បណ្តោះ​អាសន្ន​រយៈពេល ៧ ថ្ងៃ គឺមុន​និងអំឡុងបុណ្យចូលឆ្នាំខ្មែរ។

តាម​រយៈ​ផ្លូវជាតិ​លេខ ១០ ​ប្រជាពលរដ្ឋ​នៅ​ខេត្ត​បាត់ដំបង ពោធិ៍សាត់ នឹង​អាច​ធ្វើ​ដំណើរ​មក​លេង​សមុទ្រ​ក្នុង​ខេត្ត​កោះកុង​​​កាន់​តែ​ងាយស្រួល ខណៈ​ផ្លូវ​ជាតិថ្មីមួយខ្សែ​នេះ​ក៏​​នឹង​ក្លាយ​ជា​ផ្លូវ​សេដ្ឋកិច្ច​ដ៏​មាន​សក្តានុពល​របស់​កម្ពុជា ក្នុង​ការ​រួមចំណែក​បង្ក​លក្ខណៈ​ងាយស្រួល​នៃ​ការដោះដូរ​ពាណិជ្ជកម្ម ការ​វិនិយោគ និង​ការ​ធ្វើ​ដំណើរ​បាន​ឆាប់រហ័ស និង​ចំណាយ​​តិច​។

អ្នក​ឧកញ៉ា សួរ វិរៈ​ ដែល​គេ​ដឹងថា​ជា​អ្នក​ជំនួញ​លើ​វិស័យ​ដឹកជញ្ជូន និង​ទេសចរណ៍ ​ដែល​បាន​សាង​ជំនួញ​ល្បីល្បាញ​​ចេញ​ពី​ខេត្ត​កោះកុង ក៏​មើល​ឃើញ​ពី​តម្លៃ​នៃ​​ផល​សេដ្ឋកិច្ច​តាមរយៈ​ផ្លូវ​ជាតិ​ជាច្រើន​ខ្សែ ដែល​កំពុង​​សាងសង់​ឆ្ពោះមកខេត្ត​កោះកុង ខណៈ​​អ្នក​ឧកញ៉ា​ក៏​កំពុង​ពង្រីក​ការ​វិនិយោគ​នៅ​ខេត្ត​ជាប់​ព្រំដែន​សមុទ្រ​ជាមួយ​ថៃ​នេះ។

នៅ​លើ​បណ្តាញ​សង្គម អ្នក​ឧកញ៉ា​បាន​លើក​ពី​គម្រោងវិនិយោគ​ជាច្រើន រួមទាំងកំពុង​​អភិវឌ្ឍ​​រីសត​​មួយ​កន្លែង​នៅ​តាម​បណ្តោយ​​ឆ្នេរ​នៅ​​ក្រុង​ខេមរភូមិន្ទ ដែលនឹង​ត្រៀម​ទទួល​ភ្ញៀវ​មក​កម្សាន្ត​នៅ​ចុង​ឆ្នាំ​ ២០២៥ ស្រប​ការ​បញ្ចប់​ការ​ស្ថាបនា​​ផ្លូវ​ជាតិ​លេខ ៤៨ និង​ផ្លូវជាតិលេខ ១០៕

The post ផ្លូវ​ជាតិ​ពីរ​ខ្សែ​នឹង​ជំរុញ​​ការអភិវឌ្ឍ​សេដ្ឋកិច្ច​ និង​ផ្លាស់ប្តូរ​មុខមាត់​ថ្មី​ខេត្ត​កោះកុង appeared first on Kampuchea Thmey Daily.