ផ្លូវជាតិលេខ ៤៨ ពី​ផ្លូវ​បំបែក​ស្រែអំបិល​ទៅ​ក្រុង​ខេមរភូមិន្ទ ​គ្រោង​បញ្ចប់ការ​សាងសង់​នៅ​ខែ​​មិថុនា​​នេះ

ផ្លូវជាតិលេខ ៤៨ ចាប់​ពី​ផ្លូវ​បំបែក​ស្រែអំបិល​ទៅ​ក្រុង​ខេមរភូមិន្ទខេត្តកោះកុង សម្រេចវឌ្ឍនភាព​បានប្រមាណ​ ៩៧%។ នេះបើតាមការ​គូស​បញ្ជាក់ពី​​មន្រ្តី​ក្រសួង​សាធារណការ​និងដឹកជញ្ជូន​ នៅក្នុង​ប្រជុំអំពីវឌ្ឍនភាពការងារគម្រោងលើកកម្ពស់​គុណភាពផ្លូវជាតិ​លេខ​៤៨ ដោយមានការចូលរួមពីថ្នាក់ដឹកនាំក្រសួង ក្រសួងសេដ្ឋកិច្ច និងហិរញ្ញវត្ថុ តំណាងមូលនិធិសហប្រតិបត្តិការអភិវឌ្ឍន៍សេដ្ឋកិច្ច (EDCF) ក្រុមហ៊ុនទីប្រឹក្សាបច្ចេកទេស ក្រុមហ៊ុនសាងសង់ និងមន្ត្រីជំនាញពាក់ព័ន្ធជាច្រើនរូប។

កិច្ចប្រជុំដែលមានការចូលរួមពីលោក សូរ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង រៀបចំឡើងក្នុងគោលបំណង ដើម្បី​ពិនិត្យនិងពិភាក្សាលើវឌ្ឍនភាពការងារស្ថាបនា​ផ្លូវជាតិលេខ៤៨ និង​ស្វែងរកដំណោះស្រាយលើបញ្ហាប្រឈមនានា ព្រមទាំងធានាការអនុវត្តគម្រោងឱ្យបានទាន់ពេលវេលាតាមផែនការដែលបានគ្រោងទុក។

បើតាមមន្រ្តីក្រសួង​សាធារណការ​និង​ដឹកជញ្ជូន ខណៈ​គម្រោងលើកកម្រិតគុណភាពផ្លូវជាតិលេខ ៤៨ សម្រេចលទ្ធផល​ការងារបាន​ប្រមាណ ៩៧,៣៧% គិតត្រឹមថ្ងៃទី២២ ខែឧសភា ឆ្នាំ ២០២៥ ការ​ស្ថាបនា​គ្រោងបញ្ចប់​ឲ្យរួចរាល់​នៅក្នុងអំឡុង​ខែមិថុនា ឆ្នាំ២០២៥ ខាងមុខ៕