ពន្ធបដិការ Archives - Kampuchea Thmey Daily

កិច្ចព្រមព្រៀងពន្ធបដិការ ជាមូលដ្ឋានសម្រាប់កម្ពុជា ក្នុងការតថ្លៃជាមួយអាមេរិកមិនឱ្យពន្ធខ្ពស់ជាង ១៩% ក្នុងករណីមានការកំណត់អត្រាពន្ធថ្មីៗ

deth leng — Thu, 07 May 2026 07:52:10 +0000

រាជរដ្ឋាភិបាលកម្ពុជា បានអនុវត្តការងារចរចាបញ្ចុះពន្ធបដិការជាមួយសហរដ្ឋអាមេរិកហើយជាផ្លែផ្កា កម្ពុជាបានក្លាយជាប្រទេសទី១ ដែលបានចុះហត្ថលេខាលើកិច្ចព្រមព្រៀងពាណិជ្ជកម្មបដិការជាមួយសហរដ្ឋអាមេរិក កាលពីថ្ងៃទី ២៦ តុលា ២០២៥។

ឧបនាយករដ្ឋមន្ត្រី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា មានប្រសាសន៍នៅថ្ងៃទី ០៧ ឧសភា ២០២៦ថា ទោះបីជាតុលាការកំពូលរបស់សហរដ្ឋអាមេរិកបានសម្រេចលុបចោលពន្ធគយបដិការនោះក្ដី ប៉ុន្តែផ្អែកតាមតាមបុព្វសិទ្ធិរបស់ប្រធានាធិបតីសហរដ្ឋអាមេរិក ការដាក់ពន្ធគយនានា ក៏នៅតែអាចធ្វើទៅបាន។

លោក ស៊ុន ចាន់ថុល បន្ថែមថា៖ «យើងនៅតែមានលទ្ធភាពក្នុងការចរចាជាមួយសហរដ្ឋអាមេរិក ធ្វើយ៉ាងណាប្រើប្រាស់លទ្ធផលនៃកិច្ចព្រមព្រៀងពាណិជ្ជកម្មបដិការ ដែលបានសម្រេចកន្លងមក ជាមូលដ្ឋានក្នុងការកំណត់អត្រាពន្ធគយថ្មីៗនៅពេលខាងមុខ មិនឱ្យខ្ពស់ជាងអត្រាពន្ធ១៩% ដែលយើងទទួលបានលើកិច្ចព្រមព្រៀងពាណិជ្ជកម្មបដិការជាមួយសហរដ្ឋអាមេរិក»។

ក្រុមការងារពិសេសរបស់រាជរដ្ឋាភិបាលក៏បានជួបជាមួយតំណាងពាណិជ្ជកម្មសហរដ្ឋអាមេរិក ដើម្បីពិភាក្សាគ្នា តើអាមេរិកនៅតែបន្តគោរពកិច្ចព្រមព្រៀងដែលខ្លួនបានចុះហត្ថលេខាជាមួយកម្ពុជា ដែលផ្ដល់ពន្ធបដិការ ១៩% ឬយ៉ាងណា។ ចម្លើយថា គឺនៅតែគោរពនឹងផ្ដល់ពន្ធបដិការកម្ពុជាយ៉ាងច្រើន ១៩% ដោយសារយើងបានចុះកិច្ចព្រមព្រៀងរួចហើយ។

បើតាមលោក ស៊ុន ចាន់ថុល ប្រធានាធិបតីរបស់សហរដ្ឋអាមេរិក មានសិទ្ធិប្រើប្រាស់មាត្រាផ្សេងៗមួយចំនួនរបស់ច្បាប់ពាណិជ្ជកម្មសហរដ្ឋអាមេរិក ដូចជាមាត្រា ១២២ សព្វថ្ងៃនេះ មាត្រានេះ ប្រើប្រាន ៦ ខែ ដាក់ពន្ធ ១០% លើប្រទេសទាំងអស់នៅលើពិភពលោក ដែលនឹងបញ្ចប់នៅថ្ងៃទី ២៤ ខែកក្កដា ២០២៦ ខាងមុខ។

ឧបនាយករដ្ឋមន្ត្រីបញ្ជាក់ថា សហរដ្ឋអាមេរិកក៏ប្រើមាត្រា ៣០១ ឬមាត្រា ២៣២ ដើម្បីប្រមូលពន្ធឡើងវិញ គាត់លុបបានមែន ប៉ុន្តែប្រធានាធិបតីមានសិទ្ធិ អាចដំឡើងបាន។ ហើយមាត្រា ៣០១ នេះ មិនមានកំណត់អត្រាទេ ចង់ដាក់ ៥០% ក៏បាន ៦០% ក៏បាន ៧០% ក៏បាន។ ដោយសារយើងបានចុះកិច្ចព្រមព្រៀងនេះហើយ គេមិនយកមាត្រា ៣០១ មកដាក់ពន្ធលើស ១៩% ទេ ផ្ទុយទៅវិញគេបានបញ្ជាក់ប្រាប់យើងថា មិនអោយកម្ពុជាមានពន្ធខ្ពស់ជាងប្រទេសនៅក្នុងតំបន់របស់យើងទេ អញ្ចឹងយើងមិនមានបញ្ហាទេ ដោយសារយើងបានបញ្ចប់ការចរចារួចហើយ។

លោកឧបនាយករដ្ឋមន្ត្រីអំពាវនាវកុំឱ្យអ្នកវិនិយោគបារម្ភទោះអាមេរិកប្រើមាត្រា ៣០១ មានឈ្មោះកម្ពុជាក៏ដោយ ក៏មិនមានបញ្ហាអីឱ្យមានពន្ធលើសពី១៩% ផ្ទុយទៅវិញអាចទាបជាងហ្នឹង៕

អត្ថបទ៖ ឡេង ដេត

The post កិច្ចព្រមព្រៀងពន្ធបដិការ ជាមូលដ្ឋានសម្រាប់កម្ពុជា ក្នុងការតថ្លៃជាមួយអាមេរិកមិនឱ្យពន្ធខ្ពស់ជាង ១៩% ក្នុងករណីមានការកំណត់អត្រាពន្ធថ្មីៗ appeared first on Kampuchea Thmey Daily.

ឧបនាយករដ្ឋមន្ត្រី ស៊ុន ចាន់ថុល ស្នើដល់អ្នកវិនិយោគកុំបារម្ភពីការប្រើប្រាស់មាត្រា៣០១របស់អាមេរិកលើទំនិញកម្ពុជា

hun sirivadh — Thu, 07 May 2026 07:38:20 +0000

អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោកឧបនាយករដ្ឋមន្ត្រី ស៊ុន ចាន់ថុល ថារដ្ឋបាលប្រធានាធិបតី ដូណាល់ត្រាំ បានសន្យាហើយថានឹងមិនឱ្យកម្ពុជាមានអត្រាពន្ធនាំចូលអាមេរិកខ្ពស់ជាងគេក្នុងតំបន់នោះទេ។ ការបញ្ជាក់នេះគឺបន្ទាប់ពីរដ្ឋាភិបាលអាមេរិកបានសម្រេចប្រើមាត្រា៣០១ នៃច្បាប់ពាណិជ្ជកម្មដែលឱ្យប្រទេសនេះអាចបន្តការប្រមូលពន្ធខ្ពស់ក្រោយតុលាការកំពូលអាមេរិកបានលុបចោលអត្រាពន្ធបដិការបស់លោកត្រាំកាលពីកន្លងទៅ។

ក្រោយការប្រកាសលុបកាលពីថ្ងៃទី២០ ខែកុម្ភៈ រដ្ឋបាលរបស់លោកត្រាំ ថានឹងស្វែងរកការដាក់ពន្ធដដែលតាមច្បាប់ផ្សេងៗ។ ហើយនៅថ្ងៃទី១១ ខែមីនា បានប្រកាសប្រើប្រាស់មាត្រា៣០១ នៃច្បាប់ពាណិជ្ជកម្ម ដើម្បីស៊ើបអង្កេតលើប្រទេស និងតំបន់សេដ្ឋកិច្ចចំនួន១៦ រួមទាំងកម្ពុជា ផងដែរ។

ថ្លែងក្នុងវេទិកាវិនិយោគកម្ពុជាឆ្នាំ២០២៦ ព្រឹកថ្ងៃទី៧ ខែឧសភា ឆ្នាំ២០២៦នេះ លោកឧបនាយករដ្ឋមន្ត្រី ស៊ុន ចាន់ថុល មានប្រសាសន៍ថា មន្ត្រីអាមេរិកបានបញ្ជាក់មកកម្ពុជាវិញហើយថា បើទោះបីអាមេរិកប្រើប្រាស់មាត្រា៣០១ ដើម្បីកំណត់តម្លៃពន្ធថ្មីក្ដីតែសម្រាប់ទំនិញពីកម្ពុជានៅតែរក្សាតម្លៃពន្ធដែលបានចរចារួចដដែលគ្មានការផ្លាស់ប្ដូរនោះទេ ឬទាបជាងនេះទៀតផង។

លោកថា៖ «មាត្រា៣០១នេះគឺអត់មានកំណត់អត្រាទេ! ចង់ដាក់៥០%ក៏បាន ៦០%ក៏បាន ៧០%ក៏បានសម្រាប់៤ឆ្នាំ។ ក៏ប៉ុន្ដែកម្ពុជាដោយសារយើងបានចុះកិច្ចព្រមព្រៀងនេះហើយគេមិនយកអា៣០១ហ្នឹងមកដាក់ពន្ធលើស១៩%ទេ។ ផ្ទុយមកវិញគេបានបញ្ជាក់ថាមិនឱ្យកម្ពុជាមានពន្ធខ្ពស់ជាងប្រទេសក្នុងតំបន់របស់យើងទេ»។

លោកសំណូមពរដល់អ្នកវិនិយោគសូមកុំមានការបារម្ភពីវិធានការពន្ធថ្មីរបស់រដ្ឋបាលលោកដូណាល់ត្រាំ ខណៈមន្ត្រីកម្ពុជានឹងធ្វើដំណើរទៅសហរដ្ឋអាមេរិកនៅថ្ងៃទី១៤ ខែឧសភា ខាងមុខដើម្បីបញ្ចប់កិច្ចព្រមព្រៀងនេះដែរ។

គួរឱ្យដឹងដែរថា កាលពីថ្ងៃទី១១ ខែមីនា រដ្ឋាភិបាលអាមេរិកបានសម្រេចប្រើប្រាស់មាត្រា៣០១ នៃច្បាប់ពាណិជ្ជកម្មឆ្នាំ១៩៧៤ ដើម្បីស៊ើបអង្កេតលើប្រទេសនិងតំបន់សេដ្ឋកិច្ចចំនួន១៦ រួមទាំងប្រទេសកម្ពុជាផងដែរ។ ការស៊ើបអង្កេតនោះដោយថាផលិតផលនាំចូលពីប្រទេសទាំងនោះបាននាំចូលទំនិញចូលទីផ្សារអាមេរិកលើសពីតម្រូវការក្នុងស្រុក ដែលធ្វើឱ្យប៉ះពាល់ដល់រោងចក្រ និងកម្មករអាមេរិក៕

អត្ថបទដោយ ហ៊ុន សិរីវឌ្ឍន៍

The post ឧបនាយករដ្ឋមន្ត្រី ស៊ុន ចាន់ថុល ស្នើដល់អ្នកវិនិយោគកុំបារម្ភពីការប្រើប្រាស់មាត្រា៣០១របស់អាមេរិកលើទំនិញកម្ពុជា appeared first on Kampuchea Thmey Daily.

ត្រាំ ព្រមានដាក់ពន្ធខ្ពស់លើប្រទេសណាដែលដកខ្លួនចេញពីកិច្ចព្រមព្រៀងពាណិជ្ជកម្មបដិការ

Huon Dina — Tue, 24 Feb 2026 02:50:27 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីថ្ងៃចន្ទ (២៣ កុម្ភៈ) បានព្រមានថានឹងដាក់ពន្ធខ្ពស់លើប្រទេសផ្សេងៗដោយប្រើច្បាប់ពាណិជ្ជកម្មខុសៗគ្នា ប្រសិនបើពួកគេហ៊ានដកខ្លួនចេញពីកិច្ចព្រមព្រៀងពាណិជ្ជកម្មដែលសម្រេចឡើងថ្មីៗក្រោមបរិបទពន្ធបដិការរបស់អាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការគំរាមរបស់លោក ត្រាំ យ៉ាងដូច្នេះ ធ្វើឡើងបន្ទាប់ពីតុលាការកំពូលអាមេរិកកាលពីសប្ដាហ៍មុន បានសម្រេចថា ប្រធានាធិបតីរូបនេះបានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសនៅជុំវិញពិភពលោក ដោយខុសច្បាប់ច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧។

ការណ៍នេះកំពុងបង្កើនភាពស្រពេចស្រពិលនៃគោលនយោបាយពន្ធគយជាថ្មីសម្រាប់ពាណិជ្ជកម្មសកល ក៏ដូចជាកិច្ចព្រមព្រៀងពាណិជ្ជកម្មរវាងបណ្ដាប្រទេសផ្សេងៗ និងសហរដ្ឋអាមេរិក ដែលបង្កើតឡើងដោយសារតែគំនាបពន្ធរបស់លោក ត្រាំ។

លោក ត្រាំ សរសេរបង្ហោះនៅលើបណ្ដាញសង្គមយ៉ាងដូច្នេះថា៖ «ប្រទេសណាក៏ដោយ ដែលចង់ល្បងនឹងការសម្រេចចិត្តដ៏គួរឱ្យអស់សំណើចរបស់តុលាការកំពូល ជាពិសេសប្រទេសដែល «បឺតជញ្ជក់ប្រយោជន៍» ពីសហរដ្ឋអាមេរិកអស់រយៈពេលជាច្រើនឆ្នាំ ឬក៏រាប់ទសវត្សរ៍មកហើយនោះ នឹងរងនូវការដាក់ពន្ធកាន់តែខ្ពស់ និងអាក្រក់ជាងមុន ជាងអត្រាដែលពួកគេបានយល់ព្រមទទួលថ្មីៗនេះ។ សូមប្រយ័ត្នឱ្យមែនទែន»។

ប្រធានាធិបតីដដែលបានគូសបញ្ជាក់ថា ទោះបីជាតុលាការបានសម្រេចចិត្តលុបចោលពន្ធគយរបស់លោកក្រោមច្បាប់ IEEPA ក៏ដោយ ប៉ុន្តែលោកអាចដាក់ពន្ធក្រោមច្បាប់ផ្សេងទៀត «តាមរបៀបដ៏មានឥទ្ធិពល និងអាក្រក់ខ្លាំង ដោយមានភាពប្រាកដប្រជាផ្នែកច្បាប់» ជាងពន្ធគយចាស់ ដែលរាប់បញ្ជូលទាំងពន្ធគយបដិការ។

គួររំឭកថា ក្រោយតុលាការចេញការសម្រេចនៅថ្ងៃសុក្រ លោក ត្រាំ បានប្រកាសពីការដាក់ពន្ធថ្មី ១៥% លើទំនិញពីគ្រប់ប្រទេសទាំងអស់ក្រោមច្បាប់ពាណិជ្ជកម្មឆ្នាំ ១៩៧៤ ដែលអនុញ្ញាតឱ្យប្រធានាធិបតីដាក់ពន្ធរយៈពេល ១៥០ ថ្ងៃ៕

The post ត្រាំ ព្រមានដាក់ពន្ធខ្ពស់លើប្រទេសណាដែលដកខ្លួនចេញពីកិច្ចព្រមព្រៀងពាណិជ្ជកម្មបដិការ appeared first on Kampuchea Thmey Daily.

គយអាមេរិកគ្រោងឈប់អនុវត្តពន្ធបដិការរបស់ ត្រាំ តាមការសម្រេចរបស់តុលាការនៅថ្ងៃអង្គារ

Huon Dina — Mon, 23 Feb 2026 07:11:49 +0000

ទីភ្នាក់ងារគយ និងការពារព្រំដែនសហរដ្ឋអាមេរិក បានឱ្យដឹងថា ខ្លួននឹងបញ្ឈប់ការប្រមូល «ពន្ធបដិការ» ដែលលោកប្រធានាធិបតី ដូណាល់ ត្រាំ បានដាក់ក្រោមច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ចាប់ពីរំលងអាធ្រាត្រឈានចូលព្រឹកថ្ងៃអង្គារ (២៤ កុម្ភៈ ម៉ោងនៅសហរដ្ឋអាមេរិក)។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រនាថ្ងៃចន្ទនេះ។

ការប្រកាសយ៉ាងដូច្នោះ ធ្វើឡើងបន្ទាប់ពីតុលាការកំពូលអាមេរិកកាលពីថ្ងៃសុក្រសប្ដាហ៍មុនថា លោក ត្រាំ បានបំពានអំណាចរបស់ខ្លួនចំពោះការដាក់ពន្ធបដិការកាលពីឆ្នាំមុនដោយខុសច្បាប់ IEEPA ដែលទាមទារឱ្យរដ្ឋបាល ត្រាំ ដកពន្ធនេះចេញភ្លាមៗ ហើយសងប្រាក់ទៅកាន់អ្នកនាំចូលទាំងអស់។

ភ្នាក់ងារគយបាននិយាយក្នុងសារមួយទៅកាន់ក្រុមហ៊ុនដឹកជញ្ជូនផ្សេងៗតាមរយៈសេវាកម្មផ្ញើសារប្រព័ន្ធដឹកទំនិញ (CSMS) ថា ភ្នាក់ងារនឹងដកកូដពន្ធគយទាំងអស់របស់ ត្រាំ ដែលពាក់ព័ន្ធច្បាប់ IEEPA គិតត្រឹមថ្ងៃអង្គារ។

ភ្នាក់ងារមិនបានបញ្ជាក់ពីមូលហេតុដែលធ្វើឱ្យខ្លួនបន្តប្រមូលពន្ធដល់ថ្ងៃអង្គារនោះទេ ទោះបីជាតុលាការកំពូលចេញការសម្រេចតាំងតែពីថ្ងៃសុក្រក្ដី។

គេមើលឃើញថា ការប្រកាសរបស់ភ្នាក់ងារគយអាមេរិក គឺធ្វើឡើងក្រោយលោក ត្រាំ កាលពីចុងសប្ដាហ៍កន្លងទៅ បានប្រកាសពីការដាក់ពន្ធថ្មី ១៥% លើទំនិញពីគ្រប់ប្រទេសទាំងអស់ ដោយផ្អែកលើច្បាប់ពាណិជ្ជកម្មឆ្នាំ ១៩៧៤ ដែលមិនធ្លាប់ប្រើពីមុនមកនោះទេ។ ច្បាប់នោះ អនុញ្ញាតឱ្យប្រធានាធិបតីដាក់ពន្ធនាំចូលរហូតដល់ ១៥% ក្នុងរយៈពេល ១៥០ ថ្ងៃ ហើយផុតពីនោះ រដ្ឋបាលត្រូវតែស្វែងរកការអនុម័តពីសភា។

រ៉យទ័របានរាយការណ៍កាលពីថ្ងៃសុក្រថា រដ្ឋាភិបាលអាមេរិកប្រឈមនឹងការសងប្រាក់ត្រឡប់ទៅក្រុមហ៊ុនអ្នកនាំចូលវិញជាង ១៧៥ ប៊ីលានដុល្លារ ដែលប្រមូលបានតាំងពីឆ្នាំមុន ពីពន្ធរបស់ ត្រាំ ក្រោមច្បាប់ IEEPA៕

The post គយអាមេរិកគ្រោងឈប់អនុវត្តពន្ធបដិការរបស់ ត្រាំ តាមការសម្រេចរបស់តុលាការនៅថ្ងៃអង្គារ appeared first on Kampuchea Thmey Daily.

ត្រាំ ប្រកាសដំឡើងពន្ធសកលជាថ្មីដល់ ១៥% ក្រោយការសម្រេចពីតុលាការកំពូល

Huon Dina — Sun, 22 Feb 2026 03:24:05 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីថ្ងៃសៅរ៍ (២១ កុម្ភៈ) ថា លោកនឹងដំឡើងពន្ធជាសកលថ្មីក្នុងអត្រា ១៥% ដោយបន្តសម្ដែងអំពីការប្រឆាំងទៅនឹងការសម្រេចរបស់តុលាការកំពូលអាមេរិក ដែលប្រកាសកាលពីថ្ងៃសុក្រថា ពន្ធបដិការលើប្រទេសនីមួយជុំវិញពិភពលោករបស់ ត្រាំ គឺខុសច្បាប់ និងត្រូវដកចោលភ្លាមៗ។

ការគំរាមនៅថ្ងៃសៅរ៍នេះ ធ្វើឡើងត្រឹមតែ១ថ្ងៃប៉ុណ្ណោះ ក្រោយលោកបានប្រកាសដាក់ពន្ធ ១០% លើគ្រប់ប្រទេសទាំងអស់កាលពីថ្ងៃសុក្រ ពោលគឺបន្ទាប់ពីការសម្រេចរបស់តុលាការកំពូល។ លោកថាការដាក់ពន្ធ ១៥% គឺផ្អែកលើច្បាប់ពាណិជ្ជកម្មឆ្នាំ ១៩៧៤ ដែលមិនធ្លាប់ប្រើពីមុនមកនោះទេ ដែលច្បាប់នោះ អនុញ្ញាតឱ្យប្រធានាធិបតីដាក់ពន្ធនាំចូលរហូតដល់ ១៥% ក្នុងរយៈពេល ១៥០ ថ្ងៃ ហើយផុតពីនោះរដ្ឋបាលត្រូវតែស្វែងរកការអនុម័តពីសភា។

ដើមឡើយ ពន្ធ ១០% ត្រូវបានកំណត់ចូលជាធរមាននៅថ្ងៃអង្គារ ទី២៤ កុម្ភៈ។ ប៉ុន្តែសម្រាប់ពន្ធ ១៥% លោក ត្រាំ ថាវានឹងចូលជាធរមានភ្លាមៗ ទោះបីជាលោកមិនបង្ហាញឯកសារណាមួយស្ដីពីការអនុវត្តជាផ្លូវការនៅឡើយក៏ដោយ។

លោក ត្រាំ និយាយនៅថ្ងៃសៅរ៍ថា រដ្ឋបាលរបស់លោកបានមូលមតិគ្នាដំឡើងពន្ធគឺដោយសារតែការសម្រេចចិត្តស្ដីពីពន្ធរបស់តុលាការកំពូល ដែល «ដ៏គួរឱ្យអស់សំណើច ប្រកបដោយការសរសេរអន់ និងប្រឆាំងអាមេរិកខ្លាំងក្លា»។

គួរំឭកថា កាលពីថ្ងៃសុក្រ តុលាការកំពូលអាមេរិក ក្នុងសម្លេងគាំទ្រ ៦ ទល់នឹង ៣ បានប្រកាសថា លោក ត្រាំ បានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសនៅជុំវិញពិភពលោក ដោយខុសច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧។ នេះមានន័យថា រាល់ពន្ធដែលលោក ត្រាំ បានដាក់ក្រោមច្បាប់នេះ គឺត្រូវដកចេញភ្លាមៗដោយស្វ័យប្រវត្តិ។

ពន្ធទាំងនោះរួមមាន ពន្ធលើគ្រប់មុខទំនិញតាមប្រទេសនីមួយៗ ឬ «ពន្ធបដិការ» ដែលមានចាប់ពីអត្រាមូលដ្ឋាន ១០% រហូតដល់ ៣៤% លើចិន និងពន្ធ ២៥% ដែលលោកដាក់លើកាណាដា ចិន និងម៉ិកស៊ិក ចំពោះបញ្ហាអន្តោប្រវេសន៍ និងលំហូរថ្នាំញៀនហ្វេនតានីល។ ច្បាប់ IEEPA កំណត់ថា មានតែសភាទេ អាចមានអំណាចក្នុងការសម្រេចដាក់ពន្ធ៕

The post ត្រាំ ប្រកាសដំឡើងពន្ធសកលជាថ្មីដល់ ១៥% ក្រោយការសម្រេចពីតុលាការកំពូល appeared first on Kampuchea Thmey Daily.

តុលាការកំពូលអាមេរិកប្រកាសថា ពន្ធបដិការរបស់ ត្រាំ ខុសច្បាប់ និងត្រូវលុបចោលភ្លាមៗ

Huon Dina — Fri, 20 Feb 2026 16:09:24 +0000

តុលាការកំពូលសហរដ្ឋអាមេរិកនៅព្រឹកថ្ងៃសុក្រ (ម៉ោងនៅក្រុងវ៉ាស៊ីនតោន ថ្ងៃទី ២០ កុម្ភៈ) បានសម្រេចសាលក្រមដោយប្រកាសថា លោកប្រធានាធិបតីអាមេរិក លោក ដូណាល់ ត្រាំ បានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសនៅជុំវិញពិភពលោក។ នេះបើតាមការចុះផ្សាយរបស់សារព័ត៌មានផ្សេងៗរួមទាំង NBC និងរ៉យទ័រ។

ការសម្រេចនេះ ទទួលបានការគាំទ្រពីចៅក្រម ៦ ទល់នឹង ៣ ដោយកំណត់ថា នយោបាយពន្ធរបស់លោក ត្រាំ លើទំនិញនាំចូលអាមេរិកពីទូទាំងពិភពលោក គឺខុសច្បាប់អំណាចសេដ្ឋកិច្ចបន្ទាន់អន្តរជាតិ (IEEPA) ឆ្នាំ ១៩៧៧។ នេះមានន័យថា រាល់ពន្ធដែលលោក ត្រាំ បានដាក់ក្រោមច្បាប់នេះ គឺត្រូវដកចេញភ្លាមៗដោយស្វ័យប្រវត្តិ។

ការសម្រេចចិត្តនេះ មិនប៉ះពាល់ដល់ពន្ធគយទាំងអស់របស់លោក ត្រាំ ទេ តួយ៉ាងដូចជាពន្ធលើដែកថែក និងអាលុយមីញ៉ូមជាដើម ដែលលោកបានប្រើប្រាស់ច្បាប់ផ្សេងដើម្បីដាក់។

យ៉ាងណាមិញ ពន្ធលើគ្រប់មុខទំនិញលើប្រទេសនីមួយៗ ឬ «ពន្ធបដិការ» ដែលមានចាប់ពីអត្រាមូលដ្ឋាន ១០% រហូតដល់ ៣៤% លើចិន ត្រូវលុបចោលភ្លាមៗ។ ពន្ធ ២៥% ដែលលោកដាក់លើកាណាដា ចិន និងម៉ិកស៊ិក ចំពោះបញ្ហាអន្តោប្រវេសន៍ និងលំហូរថ្នាំញៀនហ្វេនតានីល ក្រោមច្បាប់ IEEPA ដូចគ្នា ក៏ត្រូវចាត់ទុកជានិរាករណ៍ផងដែរ។

ឥឡូវនេះ លោក ត្រាំ អាចនឹងស្វែងរកការដាក់ពន្ធដដែលតាមច្បាប់ផ្សេងៗ។ យ៉ាងណាមិញ ការលុបចោលពន្ធរបស់តុលាការកំពូលនាពេលនេះមានន័យថា ក្រុមហ៊ុន និងអ្នកនាំចូលទៅអាមេរិកទាំងអស់ អាចទៅដាក់ពាក្យសុំដកប្រាក់ដែលខ្លួនបានបង់ពន្ធរួចយកមកវិញ ខណៈមានក្រុមហ៊ុនជាង ១ ០០០ រួចមកហើយ ដែលបានប្ដឹងលោក ត្រាំ ចំពោះការដាក់ពន្ធបដិការរាប់តាំងពីឆ្នាំ ២០២៥ មក។

កន្លងមក លោក ត្រាំ តែងតែទទូចថា ពន្ធរបស់ខ្លួនធ្វើឡើងដើម្បីកាត់បន្ថយឱនភាពពាណិជ្ជកម្ម និងការពារ និងលើកកម្ពស់ផលិតកម្មក្នុងស្រុក ប៉ុន្តែក្រុមអ្នករិះគន់និយាយថា វាធ្វើឱ្យទំនិញឡើងថ្លៃ ដោយធ្វើឱ្យអ្នកប្រើប្រាស់ចំណាយប្រាក់កាន់តែច្រើន។

រដ្ឋធម្មនុញ្ញអាមេរិកបានចែងថា អំណាចក្នុងការកំណត់ពន្ធត្រូវបានប្រគល់ឱ្យសភា។ ច្បាប់ IEEPA មិនបានបញ្ជាក់ជាក់លាក់អំពីពន្ធគយទេ ប៉ុន្តែអនុញ្ញាតឱ្យប្រធានាធិបតី «គ្រប់គ្រង» ការនាំចូល និងនាំចេញ នៅពេលខ្លួនយល់ថាមានអាសន្នដោយសារតែ «ការគំរាមកំហែងមិនប្រក្រតី» ចំពោះប្រទេសជាតិ។ មុនលោក ត្រាំ គ្មានប្រធានាធិបតីណាម្នាក់ធ្លាប់ប្រើច្បាប់នេះ ដើម្បីដាក់ពន្ធគយលើការនាំចូលនោះទេ។

គិតត្រឹមពាក់កណ្តាលខែធ្នូ ពន្ធក្រោមច្បាប់ IEEPA របស់ ត្រាំ បានប្រមូលប្រាក់ប្រហែល ១៣០ ប៊ីលានដុល្លារ។នេះបើយោងតាមទិន្នន័យចុងក្រោយបំផុតមកពីគយ និងការពារព្រំដែនសហរដ្ឋអាមេរិក។ កន្លងមក លោក ត្រាំ បានអួតអាងពីចំនួនប្រមូលបានខ្ពស់ជាងនេះទៅទៀត រហូតដល់ ៣ ទ្រីលានដុល្លារ ដោយលោករាប់បញ្ចូលទាំងកិច្ចព្រមព្រៀងពាណិជ្ជកម្មដែលរដ្ឋបាលរបស់លោកបានចរចាជាមួយប្រទេសដទៃ។ លោកបានព្រមានពីមុនផងដែរថា ការលុបចោលពន្ធរបស់លោក នឹងបង្កជា «មហន្តរាយសម្រាប់ប្រទេស» និង «ផលវិបាកដ៏ធ្ងន់ធ្ងរសម្រាប់សេដ្ឋកិច្ច»៕

The post តុលាការកំពូលអាមេរិកប្រកាសថា ពន្ធបដិការរបស់ ត្រាំ ខុសច្បាប់ និងត្រូវលុបចោលភ្លាមៗ appeared first on Kampuchea Thmey Daily.

ឧបនាយករដ្ឋមន្ត្រី ស៊ុន ចាន់ថុល អះអាងថា កិច្ចព្រមព្រៀងពាណិជ្ជកម្មបដិការកម្ពុជា-អាមេរិក ការពារកម្ពុជាពីហានិភ័យ

deth leng — Fri, 09 Jan 2026 10:10:38 +0000

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា មានប្រសាសន៍ថា កំណើននៃការនាំចេញរបស់កម្ពុជានៅក្នុងឆ្នាំ ២០២៥ បានឆ្លុះបញ្ចាំងពីប្រសិទ្ធភាពនៃកិច្ចចរចា និងកិច្ចសហប្រតិបត្តិការពាណិជ្ជកម្មជាមួយដៃគូសំខាន់ៗ។

លោកឧបនាយករដ្ឋមន្ត្រីបានលើកឡើងនៅក្នុងពិធីបិទសន្និបាតបូកសរុបលទ្ធផលការងារក្រសួងពាណិជ្ជកម្មឆ្នាំ២០២៥ និងទិសដៅការងារ សម្រាប់ឆ្នាំ២០២៦។

លោក ដូណាល់ ត្រាំ ប្រធានធិបតីអាមេរិក កាលពីថ្ងៃទី ០២ ខែមេសា ឆ្នាំ២០២៥ បានប្រកាសដាក់ពន្ធគយបដិការទៅលើប្រទេសជាង១៨០នៅទូទាំងពិភពលោក ក្នុងនោះក៏មានប្រទេសកម្ពុជាផងដែរដែលបានដាក់ពន្ធ៤៩%។

លោកឧបនាយករដ្ឋមន្ត្រី ស៊ុន ចាន់ថុល បានរំលឹកថា បន្ទាប់ពីទទួលបានបុព្វសិទ្ធិពីរាជរដ្ឋាភិបាលកម្ពុជា រូបលោក និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងក្រុមការងារបានខិតខំដឹកនាំគណៈប្រតិភូជួបប្រជុំចរចា ជាច្រើនលើកជាមួយភាគីសហរដ្ឋអាមេរិក ជុំវិញកិច្ចព្រមព្រៀងពាណិជ្ជកម្មបដិការ។

កម្ពុជាជាប្រទេសទី១ ដែលបានធ្វើការចរចាចប់សព្វគ្រប់នូវកិច្ចព្រមព្រៀងពាណិជ្ជកម្មបដិការ។ ប្រទេសមួយចំនួន បានត្រឹមចុះកិច្ចព្រមព្រៀងក្របខណ្ឌ តែយើងចប់ទាំងស្រុង។ ម៉ាឡេស៊ីជាប្រទេសទី២ ក្នុងការចរចាពន្ធបដិការជាមួយអាមេរិក។

លោក ស៊ុន ចាន់ថុល បន្ថែមថា៖ «តើខែនេះ ឬខែក្រោយ តុលាការកំពូលអាមេរិកលុបចោលការដាក់ចេញ។ ទោះយ៉ាងណាក៏ដោយ ដោយសារយើងបានធ្វើការនេះចប់សព្វគ្រប់យើងមិនសូវមានហានិភ័យច្រើនទេ ទោះជាតុលាការកំពូលលុបចេញនូវកិច្ចពន្ធបដិការក៏ដោយ ក៏ប៉ុន្តែប្រធានាធិបតីមានឧបករណ៍ច្រើន ក្នុងការដាក់ពន្ធបន្ថែម»។

លោកឧបនាយករដ្ឋមន្ត្រី ចាត់ទុកការបញ្ចប់ការចរចានេះ ជារឿងសំខាន់ ដែលអាចការពារហានិភ័យសម្រាប់កម្ពុជា។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាលើកិច្ចព្រមព្រៀងស្ដីពីពាណិជ្ជកម្មបដិការ ១៩% ជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី ២៦ ខែតុលា ឆ្នាំ ២០២៥ នៅប្រទេសម៉ាឡេស៊ី៕

អត្ថបទ៖ ឡេង ដេត

The post ឧបនាយករដ្ឋមន្ត្រី ស៊ុន ចាន់ថុល អះអាងថា កិច្ចព្រមព្រៀងពាណិជ្ជកម្មបដិការកម្ពុជា-អាមេរិក ការពារកម្ពុជាពីហានិភ័យ appeared first on Kampuchea Thmey Daily.

កម្ពុជាកំពុងបន្តចរចាពន្ធបដិការលើផលិតផលកាត់ដេរជាមួយអាមេរិកបន្ថែមទៀត

hun sirivadh — Thu, 27 Nov 2025 05:02:47 +0000

អនុប្រធានទី១ក្រុមប្រឹក្សាអភិវឌ្ឍន៍កម្ពុជាលោកឧបនាយករដ្ឋមន្ត្រី ស៊ុន ចាន់ថុល ថាបើទោះបីការចរចាពន្ធបដិការសហរដ្ឋអាមេរិកសម្រេចជោគជ័យហើយក្ដី តែបច្ចុប្បន្នក្រុមការងាររដ្ឋាភិបាលកំពុងបន្តចរចាបន្ថែមទៀតដោយសង្ឃឹមថាអាមេរិកនឹងអាចបន្តចុះពន្ធលើផលិតផលកាត់ដេរ ស្បែកជើង និងកាបូបធ្វើដំណើរឱ្យបានក្រោម១៩%ទៀត។

កម្ពុជាគឺជាប្រទេសទី១នៅលើពិភពលោកដែលសម្រេចបានការចុះហត្ថលេខាលើកិច្ចព្រមព្រៀងពាណិជ្ជកម្មជាមួយអាមេរិកកាលពីថ្ងៃទី២៦ ខែតុលា កន្លងទៅ។

ថ្លែងក្នុងពិធីផ្សព្វផ្សាយរបាយការណ៍ប្រចាំឆមាសទី១នៃការអនុវត្តវិធានការកែទម្រង់មុតស្រួចជាកញ្ចប់ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ នៅសណ្ឋាគារឡឺរ៉ូយ៉ាល់ភ្នំពេញថ្ងៃទី២៧ ខែវិច្ឆិកា ឆ្នាំ២០២៥នេះ ឧបនាយករដ្ឋមន្ត្រី ស៊ុន ចាន់ថុល មានប្រសាសន៍ថា កាលពីថ្ងៃអង្គារកន្លងទៅលោកបានដឹកនាំក្រុមការងារដើម្បីចរចាសុំឱ្យអាមេរិកបញ្ចុះពន្ធលើផលិតផលកាត់ដេរ ស្បែកជើង កាបូបធ្វើដំណើរពីកម្ពុជាចុះបន្តទៀត ខណៈលោកបានបង្ហាញក្ដីសង្ឃឹមថាអាមេរិកនឹងអាចចុះពន្ធលើផលិតផលទាំងនេះក្រោម១៩%។

លោកបានបញ្ជាក់ប្រាប់ក្រុមអ្នកសារព័ត៌មានថា៖ «យើងសង្ឃឹមថាក្រោមហ្នឹងទៀត ឬសូន្យតែម្ដងទៅដោយសារតែគាត់មិនមានរោងចក្រកាត់ដេរ អាវទ្រនាប់ ខោទ្រនាប់អីនៅស្រុកអាគាំងទេ! ខ្ញុំមិនជឿទេ កាបូបយូរអីគាត់មិនធ្វើទេ។ គាត់ធ្វើតែឧស្សាហកម្មធុនធ្ងន់នោះ។ យើងធ្វើការបន្តពិភាក្សាអត់ឈប់ទេ ខិតចំយ៉ាងណាឱ្យយើងមានឱកាសទាក់ទាញអ្នកវិនិយោគលើវិស័យនេះដើម្បីបង្កើតការងារឱ្យបានច្រើនជូនប្រជាពលរដ្ឋរបស់យើង»។

October 26, 2025. REUTERS/Evelyn Hockstein

លោកឧបនាយករដ្ឋមន្ត្រីបានបង្ហាញមោទនភាពពីការសម្រេចបានជោគជ័យនៃការចរចាពន្ធបដិការជាមួយអាមេរិក ដោយថាតាមរយៈការសម្រេចបាននេះកម្ពុជានៅតែជាប្រទេសមួយដែលមានការប្រកួតប្រជែងខ្ពស់ក្នុងតំបន់ក្នុងការទាក់ទាញអ្នកវិនិយោគមកបន្ថែមទៀត ខណៈក្នុងរយៈពេល១០ខែនៃឆ្នាំ២០២៥នេះ គម្រោងវិនិយោគរោងចក្រសហគ្រាសដែលត្រូវបានក្រុមប្រឹក្សាអភិវឌ្ឍន៍កម្ពុជាអនុម័តមានជិត៦០០គម្រោង ដែលនឹងបង្កើតការងារដល់ប្រជាពលរដ្ឋជាង៤០ម៉ឺននាក់៕

អត្ថបទដោយ ហ៊ុន សិរីវឌ្ឍន៍

The post កម្ពុជាកំពុងបន្តចរចាពន្ធបដិការលើផលិតផលកាត់ដេរជាមួយអាមេរិកបន្ថែមទៀត appeared first on Kampuchea Thmey Daily.

ពន្ធបដិការ Archives - Kampuchea Thmey Daily

ត្រាំ ព្រមាន​ដាក់ពន្ធខ្ពស់លើប្រទេសណាដែលដកខ្លួនចេញពីកិច្ចព្រមព្រៀងពាណិជ្ជកម្មបដិការ

គយ​អាមេរិកគ្រោងឈប់អនុវត្តពន្ធបដិការរបស់ ត្រាំ តាមការសម្រេចរបស់តុលាការនៅថ្ងៃអង្គារ

ត្រាំ ប្រកាសដំឡើងពន្ធសកលជាថ្មី​ដល់ ១៥% ក្រោយការសម្រេចពីតុលាការកំពូល

តុលាការកំពូលអាមេរិកប្រកាសថា ពន្ធបដិការរបស់ ត្រាំ ខុសច្បាប់ និងត្រូវលុបចោលភ្លាមៗ

កម្ពុជា​កំពុង​បន្ត​ចរចា​ពន្ធ​បដិការ​លើ​ផលិត​ផល​កាត់ដេរ​ជាមួយ​អាមេរិក​បន្ថែម​ទៀត

ត្រាំ ព្រមានដាក់ពន្ធខ្ពស់លើប្រទេសណាដែលដកខ្លួនចេញពីកិច្ចព្រមព្រៀងពាណិជ្ជកម្មបដិការ

គយអាមេរិកគ្រោងឈប់អនុវត្តពន្ធបដិការរបស់ ត្រាំ តាមការសម្រេចរបស់តុលាការនៅថ្ងៃអង្គារ

ត្រាំ ប្រកាសដំឡើងពន្ធសកលជាថ្មីដល់ ១៥% ក្រោយការសម្រេចពីតុលាការកំពូល

កម្ពុជាកំពុងបន្តចរចាពន្ធបដិការលើផលិតផលកាត់ដេរជាមួយអាមេរិកបន្ថែមទៀត