ស្ត្រីរងគ្រោះខាងលើមានឈ្មោះ សាយ ខាំឌី អាយុ ៦៩ ឆ្នាំ ជនជាតិដើមភាគគ្រឹង រស់នៅភូមិទៀមលើ ឃុំកាចូន ស្រុកវើនសៃ ខេត្តរតនគិរី  បានស្លាប់នៅថ្ងៃទី ៣០ ខែ មេសា ឆ្នាំ ២០២៦ វេលាម៉ោង ៧ ព្រឹក ។ នេះបើតាម លោក ស្វែង បាន មេភូមិទៀមលើ បានថ្លែងប្រាប់កម្ពុជាថ្មី។

​បើតាមការអះអាងកូនរបស់ជនរងគ្រោះ រៀបរាប់ថា អំឡុងពេលរើសគ្រាប់ស្វាយចន្ទី ម្តាយរបស់ខ្លួនបានប្រទះពស់ស្រកាចាស់ ពួនសម្ងំនៅគុម្ពព្រៃហក់មកចឹកបណ្តាលឲ្យរងរបួស។ ភ្លាមៗក្រោយកើតហេតុ នៅវេលាម៉ោង ១ រសៀល ស្រី្តរងគ្រោះ និងកូនបានវិលត្រទប់មកផ្ទះវិញ។ បន្ទាប់មកទៀត កូនរបស់អ្នកស្រី បានហៅទូរសព្ទទៅកាន់មន្ទីរពេទ្យដើម្បីជួយសង្គ្រោះ។

លោក ហ្វឿយ បុប្ផា ប្រធានមណ្ឌលសុខភាពកាចូន បានឱ្យដឹងថា ក្រោយទទួលបានដំណឹង ក៏បានចាត់បញ្ជូនក្រុមគ្រូពេទ្យ និងឡាន ដើម្បីមកដឹកជនរងគ្រោះទៅព្យាបាល។ ប៉ុន្តែនៅពេលដែលលើកជនរងគ្រោះដាក់ឡាន គឺជនរងគ្រោះតែងតែសន្លប់ ទើបក្រុមគ្រួសារសម្រេចទុកព្យាបាលនៅផ្ទះ ដោយប្រើថ្នាំបុរាណ និងឬសឈើជាដើម។ លុះយប់ឡើង អ្នកជំងឺ បានក្អកក្អួតឈាម ទើបបណ្តាលឱ្យទទួលមរណៈនៅវេលាម៉ោង ៧ ព្រឹក។

បើតាមកូនរបស់គាត់ ជនរងគ្រោះធ្លាប់ពស់ចឹកម្តងហើយ ដែលពេលនោះគាត់បានប្រើថ្នាំបុរាណ និងឬសឈើដូងសព្វដងសម្រាប់ព្យាបាល៕

The post សង្វេគ! ពស់ចឹក បណ្តាលឱ្យស្រ្តីជនជាតិដើមភាគតិចម្នាក់ស្លាប់ អំឡុងពេលបេះស្វាយចន្ទី appeared first on Kampuchea Thmey Daily.

តាមការផ្សាយរបស់ BBC ដែលដកស្រង់ការសិក្សាមួយក្នុងឆ្នាំ២០២០, ការប៉ាន់ប្រមាណខ្លះបង្ហាញថា ចំនួនអ្នកស្លាប់អាចមានកម្រិតខ្ពស់ជាងនេះទៅទៀត ពោលគឺចន្លោះឆ្នាំ ២០០០ ដល់ ២០១៩ ប្រទេសឥណ្ឌាអាចមានអ្នកស្លាប់រហូតដល់ ១.២ លាននាក់ ឬជាមធ្យម ៥៨ ០០០ នាក់ឯណោះក្នុងមួយឆ្នាំ។

សេចក្តីរាយការណ៍ខាងលើបានឲ្យដឹងថា កន្លែងជួបគ្រោះថ្នាក់ពស់ចឹកខ្លាំងបំផុតគឺនៅភាគកណ្តាល ដែលជាតំបន់ក្រីក្រ។

ទន្ទឹមនោះដែរ របាយការណ៍ថ្មីមួយពីអង្គការពិនិត្យគ្រោះថ្នាក់ដោយសារពស់ចឹក ហៅកាត់ GST បានបង្ហាញថា ៩៩% នៃបុគ្គលិកសុខាភិបាលនៅក្នុងប្រទេសឥណ្ឌា កំពុងប្រឈមមុខនឹងឧបសគ្គធំៗ ក្នុងការផ្ដល់ថ្នាំបន្សាបពិស។

ងាកទៅមើលឆ្នាំ២០១៧ អង្គការសុខភាពពិភពលោក (WHO) បានបញ្ចូលគ្រោះថ្នាក់ពស់ចឹកទៅក្នុងបញ្ជី «ជំងឺតំបន់ក្ដៅដែលត្រូវបានគេមើលរំលង និងជាអាទិភាពខ្ពស់បំផុត» ដោយសារតែចំនួនមនុស្សស្លាប់ដ៏ច្រើនលើសលប់បង្កឡើងដោយសារវា។

យោងតាម WHO, ជាមធ្យមមានមនុស្សប្រមាណ ៥.៤ លាននាក់នៅទូទាំងពិភពលោក ត្រូវបានពស់ចឹកជារៀងរាល់ឆ្នាំ ហើយក្នុងនោះមានមនុស្សជាង ១០០,០០០ នាក់បានបាត់បង់ជីវិត។

នេះមានន័យថា គ្រាន់តែមនុស្សស្លាប់ដោយសារពស់ចឹកនៅប្រទេសឥណ្ឌាក្នុងមួយឆ្នាំៗ គឺស្មើនឹងជាងពាក់កណ្តាលទៅឲ្យបើធៀបនឹងមនុស្សស្លាប់ដោយសារពស់ចឹង ទូទាំងពិភពលោក៕

អត្ថបទ៖ សុខ សុវណ្ណ

The post មួយឆ្នាំៗ ជនជាតិឥណ្ឌា ជាង ៥០ ០០០នាក់ត្រូវពស់ចឹកស្លាប់ appeared first on Kampuchea Thmey Daily.

តើគួរធ្វើបែបណា ដើម្បីការការពារ និងសង្គ្រោះបឋមបន្ទាប់ពីពស់ចឹក?

បើតាមប្រភពពីមន្ទីរពេទ្យកាល់ម៉ែត ដើម្បីការពារពីហានិភ័យពស់ចឹក គឺត្រូវពាក់ស្បែកជើងកវែងពេលធ្វើដំណើរកាត់ព្រៃ ឬកាត់វាលបឹង (៥០ % នៃពស់ចឹក គឺចឹកជើងក្រោមជង្គង់)។ ចំពោះអ្នកនៅជនបទស្រែចំការសម្រាន្តលើគ្រែចងមុង ហាមសម្រាន្តផ្ទាល់ដី ឬលើស្មៅ។ ធ្វើដំណើរពេលយប់ត្រូវប្រើភ្លើងពិល ព្រមទាំងសម្អាតទីធ្លាជុំវិញផ្ទះកុំឱ្យមានស្មៅ និងហាមចាប់ពស់។

ក្នុងការជួយសង្រ្គោះបឋម ត្រូវកំណត់ប្រភេទពស់ (វាមានសារៈសំខាន់ក្នុងការព្យាបាលដោយប្រើថ្នាំបន្សាប) ផ្លាស់ទីឆ្ងាយពីពស់។ ចំពោះអ្នកពស់ចឹកតាំងចិត្តនៅឱ្យស្ងៀមកុំភ័យស្លន់ស្លោ កាលណាភ័យស្លន់ស្លោនាឱ្យបេះដូងដើរលឿននាំឱ្យពិសពស់ជ្រាបលឿនបណ្តាលឱ្យគ្រោះថ្នាក់ធ្ងន់ធ្ងរ។ ហាមលើកដៃ ឬជើងកន្លែងពស់ចឹកខ្ពស់ជាងបេះដូង (បេះដូងនៅក្រោមដោះខាងឆ្វេង)។ បញ្ជូនអ្នកត្រូវពស់ចឹកទៅមន្ទីរពេទ្យដែលនៅជិតអ្នកជាបន្ទាន់។

ត្រូវដោះគ្រឿងអលង្ការ ឬសម្លៀកបំពាក់ដែលតឹងចេញពីកន្លែងពស់ចឹកចេញ។ លាងសម្អាតមុខរបួសកន្លែងពស់ចឹកដោយសាប៊ូ និងទឹក ឬ នឹងទឹកថ្នាំសម្លាប់មេរោគ។ រុំមុខរបួសដោយបង់ ដោយចាប់ផ្តើមពីក្រោមមុខរបួសឡើងទៅលើ និងរក្សាគម្លាត ២ម្រាមដៃ ឬ២សង់ទីម៉ែត្រពីកន្លែងពស់ចឹកពេលរុំបង់៕

The post ឈ្វេងយល់ពីវិធានការការពារ និងការសង្គ្រោះបឋមបន្ទាប់ពីពស់ចឹក appeared first on Kampuchea Thmey Daily.

ហេតុការណ៍ដ៏អាក្រក់ បានកើតឡើងអំឡុងពេលស្រ្តីជនជាតិដើមភាគតិចរូបនេះ អង្គុយលើប៉ៅអី រួចដាក់ជើងនៅជិតគំនរធ្យូងដែលទុកចោលយូរខែ ស្រាប់តែពស់វែកមួយក្បាល អើតក្បាលមកចឹក បណ្តាឱ្យឈឺចុកចាប់យ៉ាងខ្លាំង។ ភ្លាមៗនោះ ក្រុមគ្រួសារ បានយកក្រមាចងរឹតជើងនៅម្តុំខាងលើនៃកន្លែងពស់ចឹកនោះ ហើយវាយសម្លាប់ពស់នោះនៅនឹងកន្លែងដែលមានទំហំប៉ុនកជើង ។ 

ឈ្មោះ លឿន កាំម៉ារី បានរៀបរាប់ហេតុការណ៍ប្រាប់កម្ពុជាថ្មីនៅថ្ងៃទី ១៣ ខែ មិថុនា នេះថា៖«បន្ទាប់ពីនោះក្រុមគ្រួសារ បញ្ចូនតាមឡានទៅមន្ទីរពេទ្យក្រុងបានលុង និងបានប្រាប់ពីប្រភេទពស់ដែលចឹកនោះ។ ក្រោយមកគ្រូពេទ្យបានចាក់ថ្នាំ ទើបអាការៈចុកចាប់បានធូរស្រាលបន្តិច ប៉ុន្តែនៅឈឺស្នាមរបួស និងពុំទាន់អាចដើរបានរយៈពេល ១១ ថ្ងៃមកហើយ»។

កាំម៉ារី ក៏បានក្រើនរំឭកប្រជាពលរដ្ឋឱ្យមានការប្រុងប្រយ័ត្នខ្ពស់ការពារប្រសើរជាងព្យាបាលចំពោះសត្វអាសិរពិស ក្នុងរដូវវស្សានេះ។ បើតាមការរៀបរាប់របស់ស្រ្តីដែលត្រូវបានពស់ចឹកនោះ នៅរដូវវស្សាមានភ្លៀងធ្លាក់ជោគជាំដី មានទឹកពេញទន្លេទឹកអូរ បឹង បួរ ថ្លុកត្រពាំង នៅតាមទីព្រៃភ្នំសើម ជារឿយៗធ្វើឱ្យសត្វពស់មានអាសិរពិសផ្លាស់ប្ដូរទីលំនៅជាចាំបាច់ដោយពួកវាត្រូវតែស្វែងរកទីជម្រកថ្មីជាបណ្ដោះអាសន្ន។

សត្វទាំងនោះភាគច្រើន ចូលចិត្តរស់នៅទីកន្លែងគម្ពោតព្រៃ កន្លែងងងឹត ដើមចេក គុលស្លឹកគ្រៃ គំនរសំរាម និងគំនរឈើចាស់ៗដែលទុកយូរ។ សត្វពស់ចូលចិត្តរស់នៅព្រៃជុំវិញផ្ទះ និងគំនរអុស ដើម្បីចាប់សត្វកណ្តុរ កង្កែប ឬមាន់ធ្វើជាចំនី និងធ្វើសំបុកសម្រាប់បង្កើតកូន។ ដូច្នេះនៅពេលដែលមនុស្សដើរទៅជិតតំបន់របស់វា ពស់ក៏ចឹក អាចបណ្តាលឱ្យមានគ្រោះថ្នាក់ដល់អាយុជីវិត បើមិនជួយសង្គ្រោះទាន់ពេល ឬយកទៅមន្ទីរពេទ្យ ។ លើសពីនេះទៀតប្រភេទ សត្វខ្ទួយ ខ្ញាដំរី ក្អែប ក៏មានពិសដែរ នៅពេលវា ទិច ឬខាំដែលអាចបង្កការរំខានដល់ការរស់នៅ។

គន្លឹះចម្បងៗមួយចំនួន ដែលយើងអាចយកមកអនុវត្តបាន ត្រូវកម្ចាត់ចោលនូវប្រភពចំណីរបស់ពស់ ដែលមានដូចជា កណ្ដុរ និងកង្កែប ជាដើម។ បើកាលណាផ្ទះសម្បែងរបស់យើងសម្បូរដោយកណ្ដុរ ឬកង្កែប នោះប្រហែលជាកត្តាចម្បងមួយដែលទាក់ទាញសត្វពស់ឱ្យចូលមកនៅរស់។

បើសិនជាអាច គួររកអ្វីមកបិទរន្ធបំពង់បង្ហូរទឹកនានានៅក្នុងផ្ទះជាបណ្ដោះអាសន្ន ឬធ្វើជាសំណាញ់ដាក់ចំកន្លែងបង្ហូរទឹកទាំងនោះក៏បាន ។ បិទទ្វារផ្ទះឱ្យជិតល្អ ដោយមិនត្រូវបន្សល់ប្រហោង ឬចន្លោះណាមួយឡើយ ព្រោះងាយស្រួលឱ្យសត្វពស់វារចូលបាន។ នារដូវវស្សា អាចពាក់ស្បែកជើងកវែង និងខោជើងវែង នៅរាល់ពេលធ្វើដំណើរចូលក្នុងព្រៃ និងកុំប៉ះឬរំខានសត្វពស់ឱ្យសោះក្នុងករណីដែលប្រទះឃើញ៕

The post ប្រុងប្រយ័ត្ន! ស្រី្តជនជាតិដើមភាគតិចត្រូវបានពស់វែកចឹកបណ្តាលឱ្យដើរមិនរួច នារដូវវស្សា appeared first on Kampuchea Thmey Daily.

សារព័ត៌មាន Mirror របស់អង់គ្លេស បានរាយការណ៍ថា ហេតុការណ៍នេះបានកើតឡើងនៅទីក្រុង Hennenman ប្រទេសអាហ្រ្វិកខាងត្បូង។ លោក Marius Joubert អាយុ ២៨ ឆ្នាំ​ ជាសន្តិសុខម្នាក់ត្រូវបានប៉ូលិសស៊ើបអង្កេតពីបទចោរកម្ម។​ ក្នុងអំឡុងពេលឆែកឆេរផ្ទះរបស់គាត់ ត្រូវបានគេរកឃើញថាគាត់កំពុងលាក់សត្វពស់ជាង ៦០ ក្បាល ក៏ដូចជាសត្វព្រៃដទៃទៀត រួមមាន ក្រពើ អាយហ្គូណា សត្វចចក សត្វពីងពាង ចចក ដូច្នេះគាត់ត្រូវបានគេសង្ស័យថា ជាប់ពាក់ព័ន្ធនឹងការរត់ពន្ធសត្វព្រៃ។

Joubert ដឹងថាស្ថានភាពធ្ងន់ធ្ងរ បន្ទាប់ពីគាត់ត្រូវបានចាប់ខ្លួន​ គាត់បានប្រាប់ប៉ូលិសថាគាត់ព្រួយបារម្ភខ្លាចសត្វនឹងអត់ឃ្លាន គាត់សង្ឃឹមថានឹងអាចដោះសោខ្នោះចេញដើម្បីឲ្យខ្លួនឯងអាចមើលសត្វចិញ្ចឹមលើកចុងក្រោយ។ ក្រោយដោះខ្នោះដៃ Joubert បានដាក់ដៃរបស់គាត់ចូលទៅក្នុងទ្រុងមួយដែលមានពស់ពិសពីរក្បាល បន្ទាប់មកគាត់ត្រូវបានពស់ពិសខាំនៅលើកដៃ។

សមត្ថកិច្ចពាក់ព័ន្ធបានបញ្ជាក់ថា Joubert មានចេតនាឲ្យខ្លួនឯងត្រូវពស់ពិសខាំ។ ក្រោយពេលកើតហេតុ ប៉ូលិសបានប្រញាប់ប្រញាល់បញ្ជូនគាត់ទៅកាន់មន្ទីរពេទ្យ។ ក្រុមគ្រូពេទ្យបានព្យាយាមអស់ពីលទ្ធភាពដើម្បីជួយសង្គ្រោះ ប៉ុន្តែដោយសារតែខ្វះថ្នាំសំលាប់មេរោគ ទើប Joubert នៅតែស្លាប់។

យោងតាមរបាយការណ៍ ប្រភពដែលមានចំណេះដឹងអំពីការស៊ើបអង្កេតបាននិយាយថា Joubert បានជ្រើសរើសបញ្ចប់ជីវិតដោយដឹងថា គាត់នឹងត្រូវបានចោទប្រកាន់ពីបទឧក្រិដ្ឋកម្មធ្ងន់ធ្ងរ ហើយការកាន់កាប់សត្វព្រៃដោយខុសច្បាប់អាចនឹងត្រូវជាប់គុករហូតដល់ ២៥ ឆ្នាំឯណោះ។

លើសពីនេះទៀតដែរ យោងតាមរបាយការណ៍ដដែល ពស់ពិសមួយក្បាលដែលខាំ Joubert គឺជាពស់វែកថៃ (Indochinese Spitting Cobra) ហើយមួយទៀតជាប្រភេទសត្វមិនស្គាល់។ ដោយសារពិសនៃសត្វពស់កម្រទាំងនេះមិនមាននៅក្នុងស្រុក ទើប Joubert បានស្លាប់ ១២ម៉ោងក្រោយមក។

យោងតាមប៉ូលិស បានបញ្ចាក់បន្ថែមទៀតថា ពិសរបស់ពស់វែកថៃ គឺជាសារធាតុ neurotoxin និង cytotoxin បន្ទាប់ពីជាតិពុលចូលទៅក្នុងខ្លួន វាអាចបណ្តាលឲ្យខូចសួត ថប់ដង្ហើម ហូរឈាមធ្ងន់ធ្ងរ និងខូចខាតជាលិការាងកាយ៕

អត្ថបទ៖ សាង ស្រីល័ក្ខ

ចុចអាន៖បវរកញ្ញា ​ម៉ាឡេស៊ី ​ត្រូវ​​គេ​ដក​តំណែងចេញភ្លាមៗ ក្រោយ​​លេង​សើច​ជាមួយ​អ្នក​រាំ​ប្រុស​នៅ ​ថៃ

The post បុរស អាហ្រ្វិកខាងត្បូង ម្នាក់ សុខចិត្តឲ្យពស់ចឹកស្លាប់ ដើម្បីគេចទោសជាប់ពន្ធធនាគារ ២៥ ឆ្នាំ appeared first on Kampuchea Thmey Daily.

នៅ​ព្រឹក​ថ្ងៃ​ទី ២៦ ខែ​កញ្ញា ឆ្នាំ ២០២៣ នេះ ដោយ​យោង​តាមរយៈ​ផេក​ហ្វេស​ប៊ុក Dr. Beat Richner បាន​ឲ្យ​ដឹង​ថា ក្មេង​ប្រុស អាយុ ៦ ឆ្នាំ ម្នាក់ ត្រូវ​ពស់​ស្រកា​ចាស់​ចឹក ហើយ​បាន​បញ្ជូន​មក​មន្ទីរពេទ្យ​ខេត្ត​កំពត ២ ថ្ងៃ បន្ទាប់មក​ពិស​ពស់​ក៏​ជ្រាបចូល​ក្នុង​ឈាម ធ្វើ​ឲ្យ​រលួយ​ដៃ និង​ខ្សោយ​ដង្ហើម ហើយ​ចុង​ក្រោយ​បណ្ដាល​ឲ្យ​ពុល​ខ្សោយ​តម្រងនោម​ស្រួច​ស្រាវ​យ៉ាង​ធ្ងន់ធ្ងរ​បំផុត។

ផេក​ហ្វេសប៊ុក ដដែល​បន្ថែម​ថា ក្មេង​ប្រុស​រង​គ្រោះ​ខាង​លើ ត្រូវ​បាន​ជួយ​សង្គ្រោះ​ជីវិត​ដោយ​ចាក់​ថ្នាំ​បន្សាប​ចម្រុះ​ពិស លាង​ឈាម​តាម​ស្រោមពោះ​សង្គ្រោះ​តម្រងនោម និង​សង្គ្រោះ​ដង្ហើម​ដោយ​ម៉ាស៊ីន​សប់​ដង្ហើម អស់​រយៈពេល ២១ ថ្ងៃ។ ហើយ​ថ្ងៃនេះ ក្មេង​ប្រុស​រង​គ្រោះ បាន​រួច​ជីវិត តែ​ត្រូវ​បន្ត​ព្យាបាល​បណ្ដុះ​ស្បែក​ឡើងវិញ។

ផេក​ហ្វេស​ប៊ុក Dr. Beat Richner បាន​បញ្ជាក់​ថា ពស់​ស្រកា​ចាស់ គឺ​មាន​ពិស​ចម្រុះ​គ្នា ធ្វើ​ឲ្យ​រលួយ​សាច់​វិបត្តិ​កំណក​ឈាម និង​ហូរ​ឈាម ហើយ​អាច​ធ្វើ​ឲ្យ​ប្រព័ន្ធ​ប្រាសាទ​ឈប់​ដំណើរការ និង​ធ្វើ​ឲ្យ​តម្រងនោម​លែង​ដំណើរការ​ទៀត​ផង។

សូម​បញ្ជាក់​ថា រាល់​ការ​ព្យាបាល​ទាំងអស់ គឺ ឥត​គិត​ថ្លៃ​សម្រាប់​គ្រប់ៗ គ្នា ដោយ​គ្មាន​ការ​រើសអើង​ចំពោះ​បុគ្គល​ណា​ម្នាក់​ឡើយ៕

អត្ថបទ ៖ ពិសី

The post មន្ទីរពេទ្យគន្ធបុប្ផា សង្គ្រោះក្មេងប្រុសម្នាក់ ដែលត្រូវពស់ស្រកាចាស់ចឹក រហូតពិសពស់ជ្រាបចូលឈាម រលួយដៃ ពុលខ្សោយតម្រងនោមធ្ងន់ធ្ងរបំផុត ឲ្យរួចជីវិត appeared first on Kampuchea Thmey Daily.

លោកសាស្ត្រាចារ្យវេជ្ជបណ្ឌិត ឆាំ សារី ជាប្រធានសង្គ្រោះបន្ទាន់នៃមន្ទីរពេទ្យគន្ធបុបា្ផទី៤ បាន​ឱ្យ​ដឹងថា ពស់ពិសដែលយើងជួបប្រទះញឹកញាប់នៅក្នុងស្រុកខ្មែរមាន ១០ ប្រភេទហើយចែកចេញជា ២ ក្រុមដូចជា៖

ពស់ពិសក្រុមទី ១៖ ជាពពួកពស់ដែលចឹកទៅធ្វើឱ្យមានបញ្ហាឈាមមិនកក ហើយមាន ៣ ប្រភេទដូចជា ពស់ពព្លាក់ ពស់​ស្រកាចាស់ និងពស់បៃតង (ពស់ស្លឹកឈើ ឬពស់ធាងត្រាវ)។

ពស់ពិសក្រុមទី ២៖ ជាពពួកពស់ដែលចឹកទៅហើយធ្វើឱ្យប៉ះពាល់ដល់សរសៃប្រសាទ និងមាន ៧ ប្រភេទដូចជា ពស់​វែក (វែកដំបូក វែកក្របី និងវែករនាម) ពស់ក្រាយបង្កង់សខ្មៅ ក្រាយបង្កង់លឿងខ្មៅ ក្រាយក្បាល​ក្រហម​កន្ទុយក្រហម និងពស់សមុទ្រ។

១. អាការពេលកូនត្រូវពស់ពិសចឹក

ពស់មានពិសចឹកអាចបង្កឱ្យកុមារមានអាការៈ ឬរោគសញ្ញាដូចជា៖

• នៅត្រង់កន្លែងស្នាមចឹកឈឺចាប់ខ្លាំង ហើម ឬអាចរលួយស្បែក
  ហូរឈាមត្រង់ស្នាមចឹករហូត (ករណីពស់ពិសដែលធ្វើឱ្យឈាមមិន​កក)
• ធ្លាក់ត្របកភ្នែក អត់ចង់និយាយស្តី ចេះតែងងុយគេង អត់ចង់​ញុំា​អីទាំងអស់ រកក្អួត ទន់ដៃទន់ជើង កម្រើកដៃកម្រើក​ជើងមិនរួច ឬមិនដកដង្ហើមក្នុងរយៈពេល ១ ទៅ ២ ម៉ោង (ករណីពស់ពិសដែលធ្វើឱ្យប៉ះពាល់ដល់សរសៃប្រសាទចឹក)

២. ក្រោយពេលពស់ចឹកភ្លាម អាណាព្យាបាលគួរធ្វើបែបម៉េច?

ឪពុកម្តាយភាគច្រើនភ័យណាស់ពេលកូនត្រូវពស់ចឹក តែគួរដឹងពី​របៀប​ជួយ​សង្រ្គោះ​បឋម​សិន​ចាំ​បី​កូន​មក​កាន់​មន្ទីរពេទ្យ៖

• ដំបូងត្រូវសម្អាតកន្លែងពស់ចឹកជាមួយទឹក និងសាប៊ូឱ្យបានស្អាតដើម្បីការពារ​មេរោគ​ឆ្លងចូល​តាមមុខរបួស បើកុមារដើរលេងក្នុង​ភក់ ឬកន្លែងពស់ចឹកមានប្រឡាក់ដីជាដើម
• ទុកអវយវៈកន្លែងពស់ចឹកនៅឱ្យនឹងមួយ​កន្លែង ដើម្បីកុំឱ្យពិសដែល​ពស់​បញ្ចូលមករត់លឿនចូលមកបេះដូង ហើយបេះដូងចែកចាយ​ឈាម​ដែលពោរពេញទៅដោយពិសពស់​ទៅកាន់​រាងកាយ​លឿនពេក​ដែលអាចធ្វើឱ្យកុមារគ្រោះថ្នាក់ ហើយធ្វើឱ្យឪពុកម្តាយគ្មាន​ឱកាស​យក​កូន​មកកាន់មន្ទីរពេទ្យបានទាន់ពេលវេលា
• រុំស្ទាក់ខាងលើស្នាមពស់ចឹកដោយបង់ទទឹងពីរធ្នាប់ដៃដោយប្រើកន្សែង ឬក្រមាក្នុង​បំណងស្ទាក់កុំឱ្យពិសរត់​ចូលក្នុងបេះដូង តែត្រូវរុំឱ្យល្មមមិន​ឱ្យ​តឹងពេកទេ ហើយចៀសវាងយកខ្សែមករឹតខ្លាំង​ដែល​អាច​ធ្វើ​ឱ្យ​ខ្មៅចុងដៃ ឬចុងជើង
• អាចឱ្យអាអូនញុំាថ្នាំប៉ារ៉ាសេតាមុលដើម្បីបំបាត់ការឈឺចាប់
• ហាមយកឡាម ឬកាំបិតមកចៀរស្នាមពស់ចឹកដើម្បីឱ្យហូរ​ឈាម​ពិសចេញ
• ហាមយកមាត់បឺតពិសពីស្នាមពស់ចឹក

បើកូនត្រូវពស់ចឹក ឪពុកម្តាយត្រូវនាំអាអូនមកកាន់មន្ទីរពេទ្យដែលមានជំនាញច្បាស់លាស់​ក្នុងការព្យាបាលពស់ចឹក និងមានថ្នាំបន្សាបពិសគ្រប់គ្រាន់​ដើម្បីឱ្យគ្រូពេទ្យ​ធ្វើការ​ព្យាបាល​ឱ្យ​បាន​ទាន់ពេលវេលា៕

អត្ថបទផ្ដល់ដោយ៖Hello Krupet

ចុចអាន៖ស្រីៗខ្លះចេះតែរាករូស អំឡុងពេលមករដូវ ធ្វើម៉េចទើបបាត់?

ចុចអាន៖ដំបៅក្រពះបង្កឡើងដោយមូលហេតុអ្វី? មានរោគសញ្ញាអ្វីខ្លះ?

The post គ្រូពេទ្យប្រាប់ពីប្រការគួរធ្វើ និងចៀសវាងពេលកូនត្រូវពស់ចឹក appeared first on Kampuchea Thmey Daily.

​បើតាម​ការ​បង្ហោះ​លើ​បណ្តាញ​ផេ​ក​ហ្វេ​សប៊ូ​ករ​បស់ Dr.beat richner កាលពី​រសៀល​ថ្ងៃទី 15 ខែធ្នូ​ឆ្នាំ 2021 នេះ​បាន​បញ្ជាក់ថា​ក្មេងប្រុស​ម្នាក់​ត្រូវបាន​សត្វ​ពស់វែកដំបូក​ចឹក​បណ្ដាល​ឲ្យ​ជាតិ​ពិស​ជ្រាបចូល​ពេញ​ប្រព័ន្ធ​ប្រសាទ​ហើយ​ ត្រូវបាន​ឪពុកម្ដាយ​បញ្ជូនទៅ​ព្យាបាល​នៅ​គ្រូខ្មែរ​ ប៉ុន្តែ​ដោយ​ស្ថានភាព​កាន់តែ​ធ្ងន់ធ្ងរ​ ក៏បាន​បញ្ជូនមក​មន្ទីរ​ពេទ្យ​គន្ធបុប្ផា​ភ្នំពេញ​ទាន់ពេល​ ហើយ​ក្រុមគ្រូពេទ្យ​បាន​យកចិត្តទុកដាក់​ជួយសង្គ្រោះ​ក្មេង​រូបនោះ​រហូត​បាន​ដោយ​ជោគជ័យ​។​

​ក្មេងប្រុស​ម្នាក់នេះ អាយុ​៥​ឆ្នាំ មកពី​ខេត្តកំពុងធំ ត្រូវបាន​ពស់វែកដំបូក ចឹក ពេល​លេង​នៅក្រោម​ផ្ទះ ព្យាបាល​នៅ​គ្រូខ្មែរ អស់​៣​ថ្ងៃ រហូតដល់​រលួយ​ជើង និង​សន្លប់​បាត់​ដង្ហើម​(​ដោយសារ​ពិសពស់ ជ្រាប​ចូលដល់​ប្រព័ន្ធ​ប្រាសាទ​ខួរក្បាល​-neurotoxicity) ត្រូវបាន​ជួយសង្គ្រោះ ដោយ​ម៉ា​ស៊ុន​ជំនួយ​ដង្ហើម និង​ថ្នាំ​បន្សាបពិស អស់ ៣០​ដប នៅ​បន្ទប់សង្គ្រោះបន្ទាន់​គន្ធបុប្ផា ថ្ងៃទី​៥ បានដឹងខ្លួន​និង​រស់រាន មានជីវិត​ឡើងវិញ ។​ព្រោះ​រាល់​១​ដុល្លារ របស់លោក​អ្នក គឺ​ពិតជា​បាន​ជួយ​ព្យាបាល សង្គ្រោះ និង​ការពារ​ជីវិត អរគុណ​មូលនិធិ​គន្ធបុប្ផា​កម្ពុជា​-​មូលនិធិ​គន្ធបុប្ផា​ស្វី​ស តាំងពី​ឆ្នាំ​១៩៩២៕

អត្ថបទ៖ ​រស្មី​

The post កុមារាអាយុ ៥ ឆ្នាំម្នាក់ ត្រូវពស់ចឹករលួយជើង សំណាងល្អ បញ្ជូនមកមន្ទីរពេទ្យគន្ធបុប្ផាជួយសង្គ្រោះទាន់ពេល appeared first on Kampuchea Thmey Daily.