ការចុះពិនិត្យនេះបានធ្វើឡើងកាលពីព្រឹកថ្ងៃទី ២១ ខែមិថុនា ឆ្នាំ ២០២៦ ក្រោមការដឹកនាំរបស់លោក កៅ វគ្គសែល អភិបាល នៃគណៈអភិបាលស្រុកសំរោង រួមជាមួយក្រុមការងារ និង មន្ត្រីពាក់ព័ន្ធ ដើម្បីវាយតម្លៃពីកម្រិត នៃការខូចខាត និង សិក្សាលទ្ធភាពក្នុងការជួសជុល ឬ សាងសង់ស្ពានឡើងវិញឱ្យបានឆាប់រហ័ស។

តាមការពិនិត្យជាក់ស្តែង ស្ពានបេតុងខាងលើ បានរងការបាក់ស្រុតយ៉ាងខ្លាំងនៅត្រង់ចំណុចកណ្ដាលស្ពាន ដែលធ្វើឱ្យការធ្វើដំណើរឆ្លងកាត់មានការលំបាក និង ប្រឈមនឹងគ្រោះថ្នាក់។ ស្ថានភាពនេះ កំពុងបង្កផលប៉ះពាល់ដោយផ្ទាល់ដល់សិស្សានុសិស្សដែលធ្វើដំណើរទៅសាលារៀនជារៀងរាល់ថ្ងៃ ព្រមទាំងការដឹកជញ្ជូនកសិផល និង ទំនិញផ្សេងៗ របស់ប្រជាពលរដ្ឋក្នុងតំបន់ផងដែរ។

លោក កៅ វគ្គសែល បានបញ្ជាក់ថា ការចុះពិនិត្យនៅពេលនេះ ដើម្បីប្រមូលទិន្នន័យ និង វាយតម្លៃពីផលប៉ះពាល់ជាក់ស្តែង សម្រាប់រៀបចំផែនការជួសជុលឱ្យមានប្រសិទ្ធភាព និង ឆ្លើយតបតាមតម្រូវការជាក់ស្តែងរបស់ប្រជាពលរដ្ឋ។

ជាមួយគ្នានេះ លោកអភិបាលស្រុក ក៏បានណែនាំដល់រដ្ឋបាលឃុំខ្វាវ ឱ្យរៀបចំឯកសារ និង របាយការណ៍លម្អិតពាក់ព័ន្ធនឹងការខូចខាតស្ពាន ដើម្បីដាក់ជូនមន្ទីរជំនាញ និង អាជ្ញាធរថ្នាក់ខេត្ត ស្នើសុំកិច្ចអន្តរាគមន៍ និង ការគាំទ្រថវិកា សម្រាប់ការជួសជុល ឬ សាងសង់ស្ពានឡើងវិញ។

ប្រជាពលរដ្ឋក្នុងមូលដ្ឋាន បានសម្តែងការព្រួយបារម្ភចំពោះស្ថានភាពស្ពានដែលកំពុងខូចខាតនេះ និង សង្ឃឹមថា អាជ្ញាធរ និង មន្ទីរជំនាញពាក់ព័ន្ធ នឹងចាត់វិធានការឆាប់រហ័ស ដើម្បីស្តារស្ពានឱ្យដំណើរការឡើងវិញ សម្រួលដល់ការធ្វើដំណើរ ការសិក្សារបស់សិស្សានុសិស្ស និង ការប្រកបរបររកស៊ីរបស់ប្រជាពលរដ្ឋ។

អាជ្ញាធរស្រុកសំរោង បានអះអាងថា នឹងបន្តសហការជាមួយស្ថាប័នជំនាញពាក់ព័ន្ធ ដើម្បីជំរុញការស្វែងរកថវិកា និង ដំណោះស្រាយឱ្យបានឆាប់បំផុត ដើម្បីធានាសុវត្ថិភាព និង ភាពងាយស្រួលក្នុងការធ្វើដំណើររបស់ប្រជាពលរដ្ឋនៅក្នុងតំបន់ឡើងវិញ៕​
អត្ថបទ ៖ វីរៈ

The post អភិបាលស្រុកសំរោង ចុះពិនិត្យស្ពាន «កាប់នឹម» បាក់ស្រុតធ្ងន់ សិក្សាលទ្ធភាពជួសជុលឡើងវិញ ដើម្បីធានាសុវត្ថិភាពពលរដ្ឋ appeared first on Kampuchea Thmey Daily.

លោក ម៉ែន អេង បានទទួលស្វាគមន៍យ៉ាងកក់ក្តៅចំពោះវត្តមានរបស់ លោក គីម ឆាងយ៉ូង និង គណៈប្រតិភូស្ថានទូតកូរ៉េ។ បន្ទាប់មក ភាគីទាំងពីរ បានបន្តចូលរួមក្នុងកិច្ចប្រជុំពិភាក្សាការងារយ៉ាងយកចិត្តទុកដាក់នៅច្រកទ្វារព្រំដែនអន្តរជាតិបាវិត ដើម្បីស្វែងយល់បន្ថែមអំពីស្ថានភាពសន្តិសុខ ការគ្រប់គ្រងលំហូរឆ្លងដែន និង កិច្ចសហប្រតិបត្តិការនានា។

នៅក្នុងដំណើរចុះពិនិត្យជាក់ស្តែង លោកអភិបាលរងខេត្ត និង លោកឯកអគ្គរដ្ឋទូត រួមជាមួយកងកម្លាំងមានសមត្ថកិច្ច បានអញ្ជើញទៅពិនិត្យមើលអគារ និង ទីតាំងមួយចំនួនដែលធ្លាប់រងការបង្ក្រាបពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យា (Online Scams) ក្នុងក្រុងបាវិត។ ការចុះពិនិត្យនេះ ដើម្បីបង្ហាញពីភាពម៉ឺងម៉ាត់ និង កិច្ចខិតខំប្រឹងប្រែងរបស់អាជ្ញាធរមានសមត្ថកិច្ចកម្ពុជា ក៏ដូចជាខេត្តស្វាយរៀង ក្នុងការលុបបំបាត់រាល់បទល្មើសបច្ចេកវិទ្យាឆ្លងដែនខុសច្បាប់ ធានាសន្តិសុខ សណ្តាប់ធ្នាប់សង្គម និង ការពារសុវត្ថិភាពជូនដល់ជនបរទេសដែលមកវិនិយោគ និង ស្នាក់នៅក្នុងប្រទេសកម្ពុជា។

ជាទីបញ្ចប់ នៃដំណើរទស្សនកិច្ចនេះ លោក ម៉ែន អេង និង លោក គីម ឆាងយ៉ូង ព្រមទាំងគណៈប្រតិភូ និង មន្ត្រីជំនាញពាក់ព័ន្ធទាំងអស់ បានអញ្ជើញទៅពិនិត្យច្រកព្រំដែនអន្តរជាតិបាវិត និង ថតរូបនៅបង្គោលព្រំដែន ដើម្បីទុកជាអនុស្សាវរីយ៍ និង បង្ហាញពីចំណងមិត្តភាព កិច្ចសហប្រតិបត្តិការដ៏ល្អប្រពៃរវាងប្រទេសទាំងពីរផងដែរ៕
អត្ថបទ ៖ ភក្ដី

The post អភិបាលរងខេត្តស្វាយរៀង ដឹកនាំ ទូតកូរ៉េ ពិនិត្យទីតាំងបង្ក្រាប Online Scams និង ច្រកព្រំដែនអន្តរជាតិបាវិត appeared first on Kampuchea Thmey Daily.

ឆ្លៀត​ក្នុង​វេលា​នេះ លោកជំទាវ​បណ្ឌិត បាន​អញ្ជើញ​សួរ​សុខទុក្ខ​កុមារ​ដែល​កំពុង​សម្រាក​ព្យាបាល​ជំងឺ ដោយ លោកជំទាវ​បណ្ឌិត បាន​ភ្ជាប់​មក​ជាមួយ​ប្រសាសន៍​សួរសុខទុក្ខ និង​ជូនពរ​ដ៏​ខ្ពង់ខ្ពស់​របស់ សម្តេច​អគ្គ​មហា​សេនា​បតី​តេ​ជោ ហ៊ុន សែន សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ព្រមទាំង សម្តេច​មហា​បវរ​ធិបតី ហ៊ុន ម៉ាណែត ផង​ដែរ។ លោកជំទាវ​បណ្ឌិត ថែមទាំង​បាន​ជួប​សំណេះសំណាល​ជាមួយ​ក្រុម​គ្រូពេទ្យ គិលានុបដ្ឋាក បុគ្គលិក​មន្ទីរពេទ្យ រួម​ទាំង​ក្រុម​គ្រូពេទ្យ​ស្ម័គ្រ​ចិត្ត​របស់​សមាគម​សុខាភិបាល​ខ្មែរ​នៅ​អាមេរិក (CHPAA) ដែល​កំពុង​បម្រើការ​ក្នុង​គម្រោង​នេះ។

ជា​ក្តី​ថ្លែងអំណរគុណ លោកជំទាវ​បណ្ឌិត សូម​អរគុណ​ចំពោះ​កិច្ច​សហ​ប្រតិបត្តិការ​ប្រកប​ដោយ​គុណភាព និង​ក្តី​ស្រឡាញ់​ដល់​កុមារ​កម្ពុជា និង​សូម​ជូនពរ​ឲ្យ​គម្រោង​វះកាត់​បេះដូង​កុមារ ដំណើរការ​ដោយ​រលូន និង​ជោគជ័យ៕

The post លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត អញ្ជើញពិនិត្យវឌ្ឍនភាពគម្រោងវះកាត់​បេះដូងកុមារ នៅមន្ទីរពេទ្យកុមារជាតិ appeared first on Kampuchea Thmey Daily.

តាម​ប្រភព​ពី លោក ស្លៃម៉ាន អលវី អនុ​ប្រធាន​ភូមិ​អូរអណ្តូង ១ បាន​ឲ្យ​ដឹង​ថា នៅ​ព្រឹក​ថ្ងៃ​ទី ១៩ នេះ លោក ម៉ូ​វ ម៉ានិត ​ដែល​ទើប​នឹង​ទទួល​តំណែង បាន​ដឹកនាំ​ក្រុម​ការងារ​បច្ចេកទេស និង​អាជ្ញាធរ​ពាក់ព័ន្ធ ចុះ​ពិនិត្យ​ភូមិសាស្ត្រ​រង​ការ​លិចលង់​បន្ទាប់ពី​ភ្លៀង​ធ្លាក់​ខ្លាំង កាលពី​យប់​ថ្ងៃ​ទី ១៨ មក។

លោក​អនុ​ប្រធាន​ភូមិ បាន​បន្ត​ថា នៅ​ពេល​ពិនិត្យ​ទីតាំង​រង​ការ​លិចលង់​រួចមក លោក​អភិបាល​ខណ្ឌ បាន​ពិភាក្សា​ជាមួយ​ក្រុមការងារ ដើម្បី​រក​វិធី​រំដោះ​ទឹក​ចេញពី​ទីតាំង​ដែល​រង​ការ​លិចលង់។

លោក ម៉ូវ ម៉ានិត បាន​ឲ្យ​កម្ពុជា​ថ្មី​ដឹង​ថា នៅ​ពេល​​លោក​ចុះ​ទៅ​ដល់​ទីតាំង​ដែល​រង​ការ​លិចលង់​​ព្រឹក​មិញ​នេះ លោក​មាន​ផែនការ​ចំនួន ២ គឺ ទី១-ដាក់​គ្រឿង​ចក្រ​កាយ​ដី​ជា​ប្រឡាយ​សម្រាប់​បង្ហូរ​ទឹក​ឲ្យ​ចូល​ទៅ​ដៃ​ព្រែក ស្ថិតនៅ​ខាងត្បូង​ភូមិ​អណ្តូង ១ ហើយ​ផែនការ​ទី​២ គឺ យក​ម៉ាស៊ីន​ចំនួន ២ គ្រឿង​ដើម្បី​បូម​ទឹក​ពី​តំបន់​ដែល​រង​ការ​លិចលង់​ចូល​ទៅ​លូ​ធំ។

លោក​អភិបាល​ខណ្ឌ មាន​ក្តី​អាណិតអាសូរ​ដល់​ប្រជាពលរដ្ឋ​ដែល​រង​ការ​លិចលង់​ដោយ​ជំនន់​ទឹក​ភ្លៀង​នេះ ហើយ​លោក​នឹង​បន្ត​រិះរក​មធ្យោបាយ​រំដោះ​ទឹក​ចេញ​ឲ្យ​បាន​លឿន​បំផុត៕

អត្ថបទ ៖ នរា

The post អភិបាលខណ្ឌច្បារអំពៅ ដឹកនាំក្រុមការងារ ចុះពិនិត្យទីតាំងភូមិអូរអណ្តូង ១ ដែលរងការលិចលង់ធ្ងន់ធ្ងរ បន្ទាប់ពីភ្លៀងធ្លាក់យប់មិញ appeared first on Kampuchea Thmey Daily.

លោក ភន់ សុខុម អភិបាល​ស្រុក​អង្គរជុំ បាន​ឱ្យ​ដឹង​ថា សម្រាប់​ជំនន់​ទឹកភ្លៀង​នេះ​កើតឡើង​នៅ​ក្នុង​សាលាស្រុក វិទ្យាល័យ​អង្គរជុំ និង​តាម​បណ្ដា​ស្រែ​មួយ​ចំនួន​របស់​ប្រជាពលរដ្ឋ។ ចំពោះ​ការ​ជន់​លិច​នៅ​ក្នុង​វិទ្យាល័យ បាន​ធ្វើ​ឱ្យ​សិស្សានុសិស្ស​ផ្អាក​ការ​សិក្សា​ជា​បណ្ដោះអាសន្ន ដើម្បី​អាជ្ញាធរ​ដោះស្រាយ​ទឹក​ជន់​លិច​នេះ​បាន​ឆាប់រហ័ស​ទាន់​ពេលវេលា និង​សិស្ស​ឆាប់​បាន​ចូលរៀន​វិញ​ផង​ដែរ។

លោក អ៊ឹង គឹមលាង អភិបាលរង​ខេត្ត មាន​ប្រសាសន៍​ថា ដើម្បី​កាត់បន្ថយ​ទឹកជំនន់​នៅ​តាម​ទី​ប្រជុំ​ជន មាន​ដូចជា​ក្នុង​សាលាស្រុក វិទ្យាល័យ និង​មន្ទីរពេទ្យ និង​កន្លែង​ផ្សេងៗ ទៀត ត្រូវ​រក​ឲ្យ​ឃើញ​ថា តើ​ទឹក​ហូរ​មកពី​ប្រភព​ណា ដើម្បី​ធ្វើការ​បិទ​លូ បិទ​ខ្ទប់ បញ្ចៀស​ទឹក កុំ​ឱ្យ​លិច​តាម​ទីប្រជុំ​ជា​បន្ត​ទៀត។ ជាក់ស្ដែង ក្រុមការងារ បាន​រក​ឃើញ​ប្រភព​ដែល​ហូរ​មក​ទីប្រជុំជន គឺ​នៅ​បណ្ដោយ​ផ្លូវ​លំ​ចាប់ពី​ភូមិ​តា​លាវ ដល់​ភូមិ​ចារ ភ្ជាប់​ពី​ឃុំ​ចារ​ឈូក​ទៅ​ឃុំ​តា​សោម។

លោក​អភិបាលរង​ខេត្ត បាន​ណែនាំ​ដល់​អាជ្ញាធរ​ស្រុក ឱ្យ​រៀបចំ​ធ្វើការ​បិទ​លូ​កុំ​ឱ្យ​ហូរ​ចូល​មក​ទី​ប្រជុំជន និង​កន្លែង​ផ្សេងៗ ទៀត និង​បញ្ចៀស​ទឹក​ឱ្យ​ហូរ​ទៅ​លូ​នៅ​ភូមិ​យាង ក្នុង​ឃុំ​ចារ​ឈូក ហើយ​ហូរ​ចូល​ទៅ​ក្នុង​ប្រឡាយ។

លោក​អភិបាលរង​ខេត្ត បាន​បន្ត​ដឹកនាំ​ក្រុមការងារ ចុះ​ពិនិត្យ​តំបន់​ទឹក​ជន់​ដូចជា​ក្នុង​សាលាស្រុក វិទ្យាល័យ​អង្គរជុំ និង​ពិនិត្យមើល​លូ​ស្ទះ​នៅ​តាម​បណ្ដោយ​ផ្លូវ​នៅ​ទីប្រជុំ ដើម្បី​ធ្វើការ​កកាយ ស្ដារ​សំរាម និង​ស្មៅ​ស្ទះ​នៅមុខ​លូ ឱ្យ​ទឹក​ហូរ​បាន​លឿន។

លោក​ក៏បាន​ណែនាំ និង​ជំរុញ​ដល់​អាជ្ញាធរ​ស្រុក សហការ​ជាមួយ​មន្ទីរ​អង្គភាព​ពាក់ព័ន្ធ មន្ត្រី​ជំនាញ ធ្វើការ​រំដោះ​ទឹក និង​បញ្ចៀស​ទឹក​ឱ្យ​បាន​ឆាប់រហ័ស ដើម្បី​កុំ​ឱ្យ​ជន់​លិច​កសិផល​របស់​ប្រជាពលរដ្ឋ​ផង​ដែរ៕

អត្ថបទ ៖ គឿនវេត

The post អាជ្ញាធរខេត្តសៀមរាប ចុះពិនិត្យទីតាំងបង្កផលប៉ះពាល់ដោយជំនន់ទឹកភ្លៀង ក្នុងភូមិសាស្ត្រស្រុកអង្គរជុំ appeared first on Kampuchea Thmey Daily.

កាលពី​ថ្ងៃ​ទី ២១ ខែ​តុលា ឆ្នាំ ២០២៥ ម្សិលមិញ លោក គួច ចំរើន អភិបាល នៃ​គណៈ​អភិបាល​ខេត្ត​កណ្តាល បាន​ដឹកនាំ​មន្ទីរ​ជំនាញ មន្ត្រី​បច្ចេកទេស អាជ្ញាធរ​ដែនដី ព្រះសង្ឃ និង​ប្រជាពលរដ្ឋ​ចំណុះ​ជើង​វត្ត ចុះ​ពិនិត្យ​ជាក់ស្ដែង​ទីតាំង​មាត់​ស្ទឹង​លើកដែក ដែល​រង​ការ​បាក់​ច្រាំង នៅ​ចំណុច​វត្ត​ជ្រោយ ភូមិ​អន្លង់​ស្លាត ឃុំ​លើកដែក ស្រុក​កោះធំ ខេត្ត​កណ្ដាល។

តាម​របាយការណ៍​លោក​អភិបាល​ស្រុក​កោះធំ បាន​ឲ្យ​ដឹង​ថា ទីតាំង​បាក់​ស្រុត​នេះ ស្ថិត​នៅ​វត្ត​ជ្រោយ ជាប់​មាត់​ស្ទឹង​លើកដែក។ នៅ​ពេល​ទឹក​ពី​ទន្លេ​មេគង្គ និង​ទន្លេបាសាក់ ហូរ​ចូល​តាម​ព្រែក​លើក​ដែក មក​ប្រសព្វ​ត្រង់​ចំណុច​មុខ​វត្ត​ជ្រោយ​នេះ ធ្វើ​ឲ្យ​ចរន្ត​ទឹក​កួច​វិល បណ្តាល​ឲ្យ​ដី​ច្រាំង​សឹក​រិច​រិល ស្រប​ពេល​លូ​រំដោះ​ទឹកភ្លៀង​ក្នុង​វត្ត​បង្ហូរ​ធ្លាក់​ចំ​ទីតាំង​បាក់​ស្រុត ដែល​ជា​ផ្នែក​មួយ​ធ្វើ​ឲ្យ​មាន​ជម្រាប​ទឹក​ក្រោម​ដី បណ្តាល​ឲ្យ​បាក់​ស្រុត​តែម្ដង។

របាយការណ៍​ដដែល បញ្ជាក់​ថា ហេតុការណ៍​បាក់​ស្រុត​ច្រាំង​នេះ​បាន​បណ្តាល​ឲ្យ​ច្រាំង​ស្ទឹង​លើក​ដែក​បាក់​ស្រុត​ប្រវែង ៤០ ម៉ែត្រ និង​បាក់​ចូល​ជម្រៅ​ប្រហែល ២០ ម៉ែត្រ ព្រមទាំង​បង្ក​ការ​ខូចខាត​រោង​លោកតា​ធ្វើ​ពី​បេតុង ១ ខ្នង ទំហំ ៤x៤ , របង​គ្រឹះ ១២ ម៉ែត្រ​ , សាប​បេតុង ២០x២០ ម៉ែត្រ ​, កុដិ​ឈើ​ប្រក់​ក្បឿង ទំហំ ៦x២៤ , ខ្ចុស​បេតុង​ប្រក់​ក្បឿង ទំហំ ៤x៦ , ជណ្ដើរ​បេតុង​ចុះ​មាត់​ស្ទឹង​ទំហំ ២x៦ , ដើម​រាំងភ្នំ ២ ដើម ​, ដើមឈើ​ទាល ៥ ដើម និង​ដើម​ស្វាយ ២ ដើម៕

អត្ថបទ ៖ ម៉េង

The post អាជ្ញាធរខេត្តកណ្ដាល ចុះពិនិត្យទីតាំងមាត់ស្ទឹងលើកដែក ដែលបាក់ច្រាំងខូចខាតសម្ភារៈអស់មួយចំនួន appeared first on Kampuchea Thmey Daily.

អាជ្ញាធរ​បាន​ឲ្យ​ដឹង​ថា ដោយសារតែ​ប្រជាពលរដ្ឋ​មួយ​ចំនួន​ដែល​រស់នៅ​តាម​ផ្លូវ​បេតុង ភូមិ​ចាក់​ជ្រូក សង្កាត់​សំរោងក្រោម បាន​សាងសង់​សំយាប​ផ្ទះ​រំលោភ​ចូល​ចំណី​ផ្លូវ​សាធារណៈ ដោយ​មាន​ការ​យកចិត្តទុកដាក់​ពី លោក សក់ ច័ន្ទ​កញ្ញា​រិ​ទ្ធ អភិបាល នៃ​គណៈ​អភិបាល​ខណ្ឌ​ពោធិ៍​សែន​ជ័យ នៅ​វេលា​ម៉ោង ៨ និង ០០ នាទី​ព្រឹក ថ្ងៃ​ទី ១១ ខែ​កញ្ញា ឆ្នាំ ២០២៥ លោក ប៉ាង លីដា អភិបាល​រង​ខណ្ឌ បាន​ដឹកនាំ​ក្រុម​ការងារ​រដ្ឋបាល​ខណ្ឌ ចុះ​ពិនិត្យ​មើល​ការ​រុះរើ​សំយាប​ផ្ទះ​ដោយ​ស្ម័គ្រចិត្ត ដើម្បី​សម្រួល​ចរាចរណ៍ និង​រក្សា​ចិញ្ចើម​ផ្លូវ​សាធារណៈ។

ជាមួយ​គ្នា​នេះ លោក ប៉ាង លីដា ក៏បាន​ដឹកនាំ​ក្រុមការងារ​ចុះ​កាប់​ឆ្ការ​ព្រៃ​រកមើល​មាត់​លូ និង​ពិនិត្យ​ស្ថានភាព​ប្រឡាយ​មេ រក​វិធីសាស្ត្រ​កាយ​ស្តារ​ប្រព័ន្ធ​លូ​ខាង​លើ ដើម្បី​សម្រួល​ចរន្តទឹក​ហូរ​បាន​លឿន បញ្ចៀស​ការ​ជន់​លិច​ដោយ​ជំនន់​ទឹកភ្លៀង​នា​រដូវវស្សា។

លោក ប៉ាង លីដា បាន​បញ្ជាក់​ថា ក្រោយ​កាប់​ឆ្ការ​ព្រៃ​ឃើញ​ថា នៅ​លើ​ផ្ទៃ​ទឹក​ប្រឡាយ និង​ប្រព័ន្ធ​លូ​ពោរពេញ​ទៅ​ដោយ​សំរាម កាកសំណល់​ជា​ច្រើន ដែល​ពលរដ្ឋ​មួយ​ចំនួន​បាន​បោះចោល។ អាជ្ញាធរ អំពាវនាវ​ដល់​ពលរដ្ឋ​ទាំងអស់ សូម​មេត្តា​វេច​ខ្ចប់​សំរាម​ឲ្យ​បាន​ត្រឹមត្រូវ ងាយស្រួល​ដល់​ឡាន​ដឹក​សំរាម​មក​យក​ទៅ​ចាក់ចោល និង ដើម្បី​បរិស្ថាន អនាម័យ សោភ័ណភាព​ទីក្រុង​ស្អាត៕

អត្ថបទ ៖ សុខា

The post អាជ្ញាធរខណ្ឌពោធិ៍សែន​ជ័យ ចុះពិនិត្យការរុះរើសំយាបផ្ទះ និងកាប់ឆ្ការព្រៃ បើកប្រព័ន្ធលូបង្ហូរទឹក បញ្ចៀសការជន់លិច appeared first on Kampuchea Thmey Daily.

នា​ឱកាស​ចុះ​ពិនិត្យ​នោះ លោក ជិន ប៊ុនធឿន បាន​អំពាវនាវ​ប្រជាពលរដ្ឋ​ទាំងអស់ សហការ​ជាមួយ​អាជ្ញាធរ ដើម្បី​រក្សា​ចិញ្ចើម​ផ្លូវ​សាធារណៈ និង​ចូលរួម​សម្អាត​អនាម័យ​បរិស្ថាន​នៅ​មុខ​ផ្ទះ​របស់​ខ្លួនឯង​ឲ្យ​បាន​ស្អាតស្អំ​ជាប្រចាំ។

ជាមួយ​នេះ លោក គន់ សោភា ប្រធាន​ការិយាល័យ​សាធារណការ​ខណ្ឌ បាន​ប្រាប់​កម្ពុជា​ថ្មី​ឲ្យ​ដឹង​ថា ក្នុង​ឱកាស​នោះ បាន​ណែនាំ​ឲ្យ​មន្ត្រី​ជំនាញ​ពាក់ព័ន្ធ សិក្សា​ស្តារ​ឡើង​វិញ​នូវ​ការ៉ូឡា​ដែល​ខូចខាត​តាម​បណ្ដោយ​ផ្លូវជាតិ ៥ និង​បណ្ដោយ​ផ្លូវ​សំខាន់ៗ ក្នុង​មូលដ្ឋាន​ឫស្សីកែវ។

លោក គន់ សោភា បាន​បញ្ជាក់​ថា តាម​ប្រសាសន៍​ដឹកនាំ​របស់​លោក​អភិបាល​ខណ្ឌ​ឫស្សីកែវ បាន​ឲ្យ​រៀបចំ​សម្អាត​ស្មៅ និង​សំរាម តាម​បណ្ដោយ​ផ្លូវជាតិ ៥ និង​បណ្ដោយ​ផ្លូវ​សំខាន់ៗ និង​នៅ​តាម​ចំណត​រថយន្ត​ក្រុង រៀបចំ​គាស់​ការ៉ូឡា​ចាស់ៗ ខូចៗ ដោយ​ឲ្យ​ចាក់​បេតុង​ជំនួស​វិញ។

ចំណែក លោក សំ អឿន ជា​ប្រជាពលរដ្ឋ​រស់នៅ​សង្កាត់​ទួល​សង្កែ​ទី ១ បាន​យល់​ឃើញ​ថា ការ​រៀបចំ​ឡើងវិញ​នេះ ជួយ​ឲ្យ​ផ្លូវរដ្ឋ​កាន់តែ​ទូលាយ ងាយស្រួល​សម្រាប់​ការ​ធ្វើ​ដំណើរ។ លោក សង្ឃឹម​ថា ពលរដ្ឋ​ទាំងអស់ នឹង​គោរព​តាម និង​សហការ​ជាមួយ​អាជ្ញាធរ។

ដោយឡែក អ្នកស្រី ណៃ រស់ អ្នក​លក់​តាម​ចិញ្ចើម​ផ្លូវ​ម្នាក់ បាន​ប្រាប់​ដែរ​ថា ពេល​ដំបូង មាន​ការ​លំបាក ខ្លាច​ថា​មិន​មាន​កន្លែង​លក់ ប៉ុន្តែ​បើ​គោរព​ច្បាប់ និង​អាជ្ញាធរ​ជួយ​រៀបចំ​កន្លែង​លក់​ឲ្យ​សមរម្យ ក៏​អាច​ទាំង​រក​ចំណូល​បាន ទាំង​រក្សា​សោភ័ណភាព​បាន​ផង​ដែរ។

អ្នកស្រី បន្ថែម​ថា ការ​ចូលរួម​របស់​ប្រជាពលរដ្ឋ​ក្នុង​ការ​ថែរក្សា​ចិញ្ចើម​ផ្លូវ មិន​ត្រឹមតែ​ជួយ​ឲ្យ​ទីក្រុង​កាន់តែ​ស្អាត​ទេ ប៉ុន្តែ​ជា​កត្តា​សំខាន់​កាត់បន្ថយ​ការ​កកស្ទះ​ចរាចរណ៍ និង​បង្កើន​សុវត្ថិភាព​ផង​ដែរ៕

អត្ថបទ ៖ សំណាង

The post អភិបាលខណ្ឌឫស្សីកែវ ចុះពិនិត្យការងារស្ដារឡើងវិញ ចិញ្ចើមផ្លូវ ចំណតរថយន្តក្រុង និងសម្អាតបរិស្ថាន appeared first on Kampuchea Thmey Daily.