ព័ត៌មានជាតិ

អាជ្ញាធរខេត្តសៀមរាប ចុះពិនិត្យទីតាំងបង្កផលប៉ះពាល់ដោយជំនន់ទឹកភ្លៀង ក្នុងភូមិសាស្ត្រស្រុកអង្គរជុំ

បានផុស

៨ ខែ មុន

នៅ

ថ្ងៃសុក្រ ១៤ វិច្ឆិកា ២០២៥

ដោយ

កាលពីព្រឹកថ្ងៃទី ១៣ ខែវិច្ឆិកា ឆ្នាំ ២០២៥ ម្សិលមិញ លោក អ៊ឹង គឹមលាង អភិបាលរងខេត្ត តំណាងដ៏ខ្ពង់ខ្ពស់ លោក ប្រាក់ សោភ័ណ អភិបាល នៃគណៈអភិបាលខេត្តសៀមរាប បានដឹកនាំក្រុមការងារ ចុះពិនិត្យ និងឆ្លើយតបទៅនឹងផលប៉ះពាល់បង្កឡើងពីជំនន់ទឹកភ្លៀងក្នុងភូមិសាស្ត្រស្រុកអង្គរជុំ ដែលអមដំណើរដោយលោកប្រធានមន្ទីរធនធានទឹក និងឧតុនិយមខេត្ត ព្រមទាំងអាជ្ញាធរពាក់ព័ន្ធជាច្រើនរូបទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភន់ សុខុម អភិបាលស្រុកអង្គរជុំ បានឱ្យដឹងថា សម្រាប់ជំនន់ទឹកភ្លៀងនេះកើតឡើងនៅក្នុងសាលាស្រុក វិទ្យាល័យអង្គរជុំ និងតាមបណ្ដាស្រែមួយចំនួនរបស់ប្រជាពលរដ្ឋ។ ចំពោះការជន់លិចនៅក្នុងវិទ្យាល័យ បានធ្វើឱ្យសិស្សានុសិស្សផ្អាកការសិក្សាជាបណ្ដោះអាសន្ន ដើម្បីអាជ្ញាធរដោះស្រាយទឹកជន់លិចនេះបានឆាប់រហ័សទាន់ពេលវេលា និងសិស្សឆាប់បានចូលរៀនវិញផងដែរ។

លោក អ៊ឹង គឹមលាង អភិបាលរងខេត្ត មានប្រសាសន៍ថា ដើម្បីកាត់បន្ថយទឹកជំនន់នៅតាមទីប្រជុំជន មានដូចជាក្នុងសាលាស្រុក វិទ្យាល័យ និងមន្ទីរពេទ្យ និងកន្លែងផ្សេងៗ ទៀត ត្រូវរកឲ្យឃើញថា តើទឹកហូរមកពីប្រភពណា ដើម្បីធ្វើការបិទលូ បិទខ្ទប់ បញ្ចៀសទឹក កុំឱ្យលិចតាមទីប្រជុំជាបន្តទៀត។ ជាក់ស្ដែង ក្រុមការងារ បានរកឃើញប្រភពដែលហូរមកទីប្រជុំជន គឺនៅបណ្ដោយផ្លូវលំចាប់ពីភូមិតាលាវ ដល់ភូមិចារ ភ្ជាប់ពីឃុំចារឈូកទៅឃុំតាសោម។

លោកអភិបាលរងខេត្ត បានណែនាំដល់អាជ្ញាធរស្រុក ឱ្យរៀបចំធ្វើការបិទលូកុំឱ្យហូរចូលមកទីប្រជុំជន និងកន្លែងផ្សេងៗ ទៀត និងបញ្ចៀសទឹកឱ្យហូរទៅលូនៅភូមិយាង ក្នុងឃុំចារឈូក ហើយហូរចូលទៅក្នុងប្រឡាយ។

លោកអភិបាលរងខេត្ត បានបន្តដឹកនាំក្រុមការងារ ចុះពិនិត្យតំបន់ទឹកជន់ដូចជាក្នុងសាលាស្រុក វិទ្យាល័យអង្គរជុំ និងពិនិត្យមើលលូស្ទះនៅតាមបណ្ដោយផ្លូវនៅទីប្រជុំ ដើម្បីធ្វើការកកាយ ស្ដារសំរាម និងស្មៅស្ទះនៅមុខលូ ឱ្យទឹកហូរបានលឿន។

លោកក៏បានណែនាំ និងជំរុញដល់អាជ្ញាធរស្រុក សហការជាមួយមន្ទីរអង្គភាពពាក់ព័ន្ធ មន្ត្រីជំនាញ ធ្វើការរំដោះទឹក និងបញ្ចៀសទឹកឱ្យបានឆាប់រហ័ស ដើម្បីកុំឱ្យជន់លិចកសិផលរបស់ប្រជាពលរដ្ឋផងដែរ៕

អត្ថបទ ៖ គឿនវេត