ព័ត៌មានជាតិ

អាជ្ញាធរខណ្ឌពោធិ៍សែនជ័យ ចុះពិនិត្យការរុះរើសំយាបផ្ទះ និងកាប់ឆ្ការព្រៃ បើកប្រព័ន្ធលូបង្ហូរទឹក បញ្ចៀសការជន់លិច

បានផុស

១០ ខែ មុន

នៅ

ថ្ងៃព្រហស្បតិ៍ ១១ កញ្ញា ២០២៥

ដោយ

កាលពីព្រឹកថ្ងៃទី ១១ ខែកញ្ញា ឆ្នាំ ២០២៥ នេះ អាជ្ញាធរខណ្ឌពោធិ៍សែនជ័យ ចុះពិនិត្យមើលការចុះរុះរើសំយាបផ្ទះដែលពលរដ្ឋសាងសង់រំលោភចំណីផ្លូវសាធារណៈ និងកាប់ឆ្ការព្រៃដុះទ្រុបលើប្រឡាយទឹក ដើម្បីកាយស្តារបើកចរន្តទឹកឲ្យហូរបានលឿន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរបានឲ្យដឹងថា ដោយសារតែប្រជាពលរដ្ឋមួយចំនួនដែលរស់នៅតាមផ្លូវបេតុង ភូមិចាក់ជ្រូក សង្កាត់សំរោងក្រោម បានសាងសង់សំយាបផ្ទះរំលោភចូលចំណីផ្លូវសាធារណៈ ដោយមានការយកចិត្តទុកដាក់ពី លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ នៅវេលាម៉ោង ៨ និង ០០ នាទីព្រឹក ថ្ងៃទី ១១ ខែកញ្ញា ឆ្នាំ ២០២៥ លោក ប៉ាង លីដា អភិបាលរងខណ្ឌ បានដឹកនាំក្រុមការងាររដ្ឋបាលខណ្ឌ ចុះពិនិត្យមើលការរុះរើសំយាបផ្ទះដោយស្ម័គ្រចិត្ត ដើម្បីសម្រួលចរាចរណ៍ និងរក្សាចិញ្ចើមផ្លូវសាធារណៈ។

ជាមួយគ្នានេះ លោក ប៉ាង លីដា ក៏បានដឹកនាំក្រុមការងារចុះកាប់ឆ្ការព្រៃរកមើលមាត់លូ និងពិនិត្យស្ថានភាពប្រឡាយមេ រកវិធីសាស្ត្រកាយស្តារប្រព័ន្ធលូខាងលើ ដើម្បីសម្រួលចរន្តទឹកហូរបានលឿន បញ្ចៀសការជន់លិចដោយជំនន់ទឹកភ្លៀងនារដូវវស្សា។

លោក ប៉ាង លីដា បានបញ្ជាក់ថា ក្រោយកាប់ឆ្ការព្រៃឃើញថា នៅលើផ្ទៃទឹកប្រឡាយ និងប្រព័ន្ធលូពោរពេញទៅដោយសំរាម កាកសំណល់ជាច្រើន ដែលពលរដ្ឋមួយចំនួនបានបោះចោល។ អាជ្ញាធរ អំពាវនាវដល់ពលរដ្ឋទាំងអស់ សូមមេត្តាវេចខ្ចប់សំរាមឲ្យបានត្រឹមត្រូវ ងាយស្រួលដល់ឡានដឹកសំរាមមកយកទៅចាក់ចោល និង ដើម្បីបរិស្ថាន អនាម័យ សោភ័ណភាពទីក្រុងស្អាត៕

អត្ថបទ ៖ សុខា