កម្មវិធីពិព័រណ៍នេះ រៀបចំរយៈពេល ៤ថ្ងៃ ពីថ្ងៃទី២០ ដល់ថ្ងៃទី២៣ ខែឧសភា ឆ្នាំ២០២៦ នៅមជ្ឈមណ្ឌលធនធាននៃអង្គជំនុំជម្រះ​វិសាមញ្ញក្នុងតុលាការកម្ពុជា (អ.វ.ត.ក.) ចាប់ពីម៉ោង ៩ព្រឹក ដល់ម៉ោង ៨យប់។

លោក ក្រាញ់ តូនី បានថ្លែងក្នុងពិធីបើកពិព័រណ៍ នារសៀលថ្ងៃទី២០ ខែឧសភា ថា ការរៀបចំការតាំងពិព័រណ៍សំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា នេះឡើង គឺដើម្បីបង្ហាញពីសិទ្ធិក្នុងការទាមទារសំណង លើកតម្លៃបទពិសោធ និងតម្រូវការរបស់ដើម្បបណ្តឹងរដ្ឋប្បវេណី និងអ្នករស់រានមានជីវិតក្នុងដំណើរការស្វែងរកយុត្តិធម៌ និងលើកទឹកចិត្តឱ្យមានការបង្កើតភាពជាដៃគូ និងការប្តេជ្ញាចិត្តបន្តដោះស្រាយតម្រូវការរបស់ជនរងគ្រោះនាពេលអនាគត។ ចំណែក ការតាំងពិព័រណ៍សៀវភៅវិញ លោកថា ធ្វើឡើងដើម្បីចូលរួមរម្លឹកដល់ការចងចាំពីព្រឹត្តិការណ៍ក្នុងរបបខ្មែរក្រហម បង្ហាញពីការរួមចំណែករបស់ អ.វ.ត.ក ក្នុងដំណើរការស្វែងរកយុត្តិធម៌ ការផ្សះផ្សារជាតិ ការថែរក្សាសន្តិភាព និងការចងចាំ។

លោក ក្រាញ់ តូនី សង្កត់ធ្ងន់ថា៖ “ព្រឹត្តិការណ៍នេះ ពិតជាមានសារៈសំខាន់ណាស់សម្រាប់យុវជនជំនាន់ក្រោយ ក្នុងការស្រាវជ្រាវ និងអានសៀវភៅ ការទស្សនាការតាំងពិព័រណ៍ ដើម្បីយល់ដឹងពីប្រវត្តិសាស្ត្រ និងអត្តសញ្ញាណរបស់ខ្លួន”។ លោក ក៏បានបន្ថែមទៀតថា៖ “ទោះបីជាយ៉ាងនេះក្តី ក៏នៅមានសំណើ និងតម្រូវការរបស់ជនរងគ្រោះ ឬដើមបណ្តឹងរដ្ឋប្បវេណីមួយចំនួនទៀតមិនទាន់ត្រូវបានដោះស្រាយបាននៅឡើយ។ ដូច្នេះ តាមរយៈការតាំងពិព័រណ៍នៅថ្ងៃនេះ ខ្ញុំសង្ឃឹមថា អង្គការដៃគូជាតិ និងអន្តរជាតិ ម្ចាស់ជំនួយ និងរាជរដ្ឋាភិបាល នឹងបន្តជួយគាំទ្រដល់ពួកគាត់”។

ពិព័រណ៍នេះ មានការចូលរួមពីស្ថាប័នបោះពុម្ពផ្សាយ អង្គការអប់រំ បណ្ណាល័យ និងអង្គការដៃគូជាច្រើន តាមរយៈស្តង់ពិព័រណ៍ចំនួន៤០ស្តង់ ក្នុងនោះក៏មានស្តង់សម្រាប់ដើមបណ្តឹងរដ្ឋប្បវេណីផងដែរ។ ការតាំងបង្ហាញសៀវភៅ គឺពាក់ព័ន្ធនឹងប្រវត្តិសាស្ត្រ អក្សរសាស្ត្រ សិទ្ធិមនុស្ស សន្តិភាព សៀវភៅសម្រាប់កុមារ និងឯកសារអប់រំផ្សេងៗ។ ជាមួយគ្នានេះ ពិព័រណ៍រយៈពេល ៤ថ្ងៃ នឹងមានការពិភាក្សាឬកិច្ចសន្ទនាអន្តរជំនាន់ជាមួយភ្ញៀវកិត្តិយស រួមមាន  លោក ខៀវ កាញារីទ្ធ,  លោក ព្រុំ សុខា , លោកស្រី ប៉ុក ណណ្តា ​(Pok Nanda) និងលោកស្រី សុភីលីន ជាម សាភីរ៉ូ, (Sophiline Cheam Shapiro) ព្រមទាំងមានការចាក់បញ្ចាំងខ្សែភាពយន្តពាក់ព័ន្ធសម័យខ្មែរក្រហម ដែលបានផលិត និងដឹកនាំដោយបញ្ញវ័ន្តខ្មែរ និងអ្នកមានស្នាដៃល្បីទៀតផង។ នេះ បើតាមការបញ្ជាក់របស់ លោក ក្រាញ់ តូនី៕

The post លោក ក្រាញ់ តូនី៖ ពិព័រណ៍ក្នុងឱកាសទិវាជាតិនៃការចងចាំមិនត្រឹមរម្លឹកដល់ជនរងគ្រោះក្នុងរបបខ្មែរក្រហមទេ ក៏អប់រំដល់យុវជនជំនាន់ក្រោយ appeared first on Kampuchea Thmey Daily.

ពិព័រណ៍ រៀបចំឡើងដោយមានគោលបំណង ៦។ ទី១ ដើម្បីបង្ហាញអំពីសិទ្ធិទទួលបានសំណង និងការវិវត្តរបស់គម្រោងសំណងនៅក្នុងបរិបទរបស់ អ.វ.ត.ក.។ ទី២ នាំឱ្យមានការយល់ដឹងច្បាស់លាស់និងងាយស្រួលអំពីប្រព័ន្ធសំណងរបស់ អ.វ.ត.ក. ចាប់ពី​ដំណាក់កាលដាក់ពាក្យរហូតដល់ការអនុវត្ត។ ទី៣ គោរព ផ្ដល់តម្លៃ សេចក្តីត្រូវការ និងសេចក្តីថ្លៃថ្នូររបស់ដើមបណ្តឹងរដ្ឋប្បវេណី និងជនរងគ្រោះ។ ទី៤ ជំរុញការឆ្លុះបញ្ចាំងប្រកបដោយស្ថាបនាអំពីសមិទ្ធផល ដែនកំណត់ និងឥទ្ធិពលនៃសំណងដែលតុលាការបានផ្តល់។ ទី៥ បង្ហាញពីគំនិតផ្តួចផ្តើមរបស់អង្គការសង្គមស៊ីវិល ដែលបន្តគាំទ្រជនរងគ្រោះលើសពីក្របខណ្ឌយុត្តិធម៌របស់ អ.វ.ត.ក. និងទី៦ ជំរុញភាពជាដៃគូ គំនិតថ្មីៗ និងការប្តេជ្ញាចិត្តសម្រាប់ស្ថាប័នកេរដំណែក អ.វ.ត.ក. នាពេលអនាគត។

សម្រាប់ពិព័រណ៍សំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជា នឹងដាក់តាំងបង្ហាញអំពីគម្រោងសំណងនៅចំពោះមុខអង្គជំនុំជម្រះវិសាមញ្ញក្នុងតុលាការកម្ពុជានៅក្នុងបរិវេណនៃមជ្ឈមណ្ឌលធនធាន អ.វ.ត.ក. តាមរយៈរូបថត ឯកសារ សក្ខីកម្ម និងផ្ទាំងព័ត៌មានអប់រំផ្សេងៗ ដែលបង្ហាញពីដំណើរការនៃសំណង ចាប់ពីគោលការណ៍ រហូតដល់ការអនុវត្តជាក់ស្តែង និងផលទទួលបានពីសំណងទាំងនោះដល់ជនរងគ្រោះ និងក្នុងសង្គមទាំងមូល។

រីឯ ពិព័រណ៍សៀវភៅស្ដីពី “អក្សរសាស្ដ្រ ប្រវត្តិសាស្ដ្រដើម្បីការចងចាំ” ធ្វើឡើងដើម្បីរម្លឹកកដល់ការចងចាំពីព្រឹត្តការណ៍ក្នុងរបបខ្មែរក្រហម ក្នុងទិវានៃការចងចាំ២០ ឧសភា ឆ្នាំ២០២៦ ដែលផ្តោតសំខាន់ទៅលើសៀវភៅប្រវត្តិសាស្រ្ត សៀវភៅច្បាប់ និងប្រភេទសៀវភៅមួយចំនួនទៀត ដើម្បីបង្ហាញនូវការរួមចំណែករបស់ អ.វ.ត.ក.ដែលបានធ្វើការងារលើដំណើរការស្វែងរកយុត្តិធម៌ ការផ្សះផ្សា ការចងចាំ សន្តិភាព ដែលជាកេរដំណែលមិនអាចកាត់ថ្លៃបាន។ បន្ថែមពីនេះ ពិព័រណ៍នឹងមានស្ដង់ដាក់លក់និងចែកចាយសៀវភៅនិងឯកសារផ្សេងៗពាក់ព័ន្ធនឹងប្រវត្តិសាស្ត្រ ច្បាប់ យុត្តិធម៌អន្តរកាលនិងឯកសារអប់រំផ្សេងៗ ដោយមានការចូលរួមពីអ្នកនិពន្ធ បណ្ណាល័យ បណ្ណាគារ ស្ថាប័នអប់រំនិងសង្គមស៊ីវិល។ ក្រៅពីស្ដង់ពិព័រណ៍សៀវភៅ កម្មវិធីនេះក៏នឹងមានការធ្វើបទបង្ហាញ កិច្ចពិភាក្សា និងការចាក់បញ្ចាំងភាពយន្តឯកសារ ផងដែរ។

រយៈពេល ៤ថ្ងៃ នៃការរៀបចំពិព័រណ៍ រំពឹងថានឹងមានការចូលរួមពីជនរងគ្រោះ ដើមបណ្តឹងរដ្ឋប្បវេណី យុវជន អ្នកស្រាវជ្រាវ អង្គការសង្គមស៊ីវិល ដៃគូអភិវឌ្ឍន៍ និងសាធារណជនទូទៅ ដើម្បីរួមគ្នាឆ្លុះបញ្ចាំងអំពីសារៈសំខាន់នៃការចងចាំ ការទទួលខុសត្រូវ និងការផ្សះផ្សានៅក្នុងសង្គមកម្ពុជា៕

The post ស្អែកនេះ អង្គជំនុំជម្រះវិសាមញ្ញក្នុងតុលាការកម្ពុជា រៀបចំពិព័រណ៍សៀវភៅ ក្នុង​ឱកាសទិវាជាតិនៃការចងចាំ appeared first on Kampuchea Thmey Daily.

​ព្រឹត្តិការណ៍ពិព័រណ៍នេះ​ គឺជាវេទិកាសកលមួយសម្រាប់ក្រុមហ៊ុនម្ហូបអាហារ​ និងភេសជ្ជៈ ក្នុង​ការ​ផ្សព្វផ្សាយ​ផលិតផលរបស់ខ្លួន ​និងពង្រឹងទំនាក់ទំនងជាមួយអ្នកបញ្ជាទិញអន្តរជាតិ តាម​រយៈការ​ដាក់​តាំងបង្ហាញផលិតផល ​រួមមាន ​នំដុត ភេសជ្ជៈ បន្លែនិងផ្លែឈើ ប្រភេទសាច់ គ្រឿងសមុទ្រ ផលិតផល​ធ្វើពីរុក្ខជាតិ នំកញ្ចប់ និងសេវាកម្មពាក់ព័ន្ធ។

ពិព័រណ៍នេះ ក៏នឹងផ្តល់នូវកាលានុវត្តភាពសម្រាប់ក្រុមហ៊ុន សហគ្រាសកម្ពុជា ក្នុងការចាប់​ដៃគូ​ជា​មួយអ្នកបញ្ជា​ទិញ អន្តរជាតិ អ្នកនាំចូល និងអ្នកលក់បន្ត ក្នុងវិស័យកសិ-ចំណីអា​ហារ និងផ្នែក​ផ្សេងៗទៀត នៃធុរកិច្ចកសិកម្ម៕

The post ក្រសួងពាណិជ្ជកម្ម ​អំពាវនាវ​ឱ្យពាណិជ្ជករ ​ចូលរួម​ពិព័រណ៍អាហារអន្តរជាតិហ្វីលីពីន ​នៅសប្ដាហ៍​ក្រោយ​ appeared first on Kampuchea Thmey Daily.

ក្នុងកិច្ចប្រជុំត្រៀមរៀបចំកម្មវិធី កាលពីនៅថ្ងៃទី១១ ខែមីនា ឆ្នាំ២០២៦ លោកបណ្ឌិត ជីវ រដ្ឋា អធិការបតីរងប្រតិបត្តិ នៃសាកលវិទ្យាល័យបញ្ញាសាស្ត្រកម្ពុជា ខេត្តសៀមរាប បានឱ្យដឹងថា ពិព័រណ៍នេះ នឹងបង្ហាញពីផលិតផលទេសចរណ៍បៃតងដែលមិនប៉ះពាល់ដល់បរិស្ថានពីក្រុងស្រុកទាំង១៣ ក្នុងខេត្តសៀមរាប។ លោកកថា តាមរយៈពិព័រណ៍នេះ ជាការអប់រំ និងលើកកម្ពស់ការយល់ដឹងដល់អ្នកទេសចរ និងប្រជាជនមូលដ្ឋានឱ្យយល់ដឹងពីសារៈសំខាន់របស់ទេសចរណ៍បៃតង និងការអនុវត្តប្រកបដោយនិរន្តរភាព បង្កើតវេទិកាអន្តរកម្មសម្រាប់អាជីវកម្មក្នុងស្រុក និងប្រតិបត្តិករទេសចរណ៍។ ជាពិសេសជួយជំរុញ និងផ្ដល់ឱកាសដល់ក្រុងស្រុកទាំង១៣ ក្នុងការរួមចំណែកអនុវត្តទេសចរណ៍បៃតង ដើម្បីលើកកម្ពស់មុខមាត់ខេត្តទាំងមូល។

ចំណែក លោក យុន លីនណេ អភិបាលរងខេត្ត បានបញ្ជាក់ថា «តាមរយៈការប្រមូលផ្ដុំផលិតផលពីតាមក្រុងស្រុកទាំង១៣ យើងនឹងឃើញពីភាពច្នៃប្រឌិត និងការប្ដេជ្ញាចិត្តរបស់សហគមន៍មូលដ្ឋាននីមួយៗ ក្នុងការរួមចំណែកអភិរក្សបេតិកភណ្ឌធម្មជាតិ និងវប្បធម៌របស់ខេត្តសៀមរាប»។ មិនតែប៉ុណ្ណោះ វាក៏បានផ្ដល់នូវអត្ថប្រយោជន៍ជាច្រើន ដែលជាផ្នែកមួយជួយដល់កំណើនសេដ្ឋកិច្ចក្នុងតំបន់។ សម្រាប់ភ្ញៀវទេសចរវិញ ក៏អាចទទួលបាននូវបទពិសោធន៍នៃការកម្សាន្ត ជាផ្នែកមួយនៃការចូលរួមចំណែក ដើម្បីលើស្ទួយវិស័យទេសចរណ៍ប្រកបដោយនិរន្តរភាពក្នុងពេលតែមួយទៀតផង។

ដើម្បីឱ្យការរៀបចំពិព័រណ៍ផលិតផលទេសចរណ៍ខាងលើប្រព្រឹត្តទៅបានល្អប្រសើរ ស្របតាមផែនការគ្រោងទុក លោកអភិបាលរងខេត្ត សូមឱ្យសាកលវិទ្យាល័យបញ្ញាសាស្ត្រកម្ពុជាខេត្តសៀមរាប សហការជាមួយរដ្ឋបាលក្រុងសៀមរាប ស្នងការដ្ឋាននគរបាលខេត្ត មន្ទីរអង្គភាពពាក់ព័ន្ធ ដើម្បីការពារសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈទូទៅ៕

The post ខេត្តសៀមរាប នឹងរៀបចំពិព័រណ៍ផលិតផលទេសចរណ៍បៃតងសហគមន៍ភូមិវត្តបូព៌ ២ថ្ងៃ ដើម្បីលើកកម្ពស់សេដ្ឋកិច្ចមូលដ្ឋាន appeared first on Kampuchea Thmey Daily.

​ព្រឹត្តិការណ៍ពិព័រណ៍នេះ គឺជាឱកាសដ៏ល្អសម្រាប់កសិករ អាជីវករ និងសហគ្រិន ដើម្បីផ្សព្វផ្សាយ​ផលិតផល និងស្វែង​រកឱកាសធ្វើអាជីវកម្មថ្មី និងកិច្ចសហការពាណិជ្ជកម្ម ដែលក្នុងឱកាស​នៃការ​រៀបចំពិព័រណ៍នេះ ក៏មានរៀបចំកម្មវិធីអមនានាជាច្រើន រួមមាន៖ សិក្ខាសាលាស្តីពី៖ «បរិបទថ្មីនៃ​ការប្រើប្រាស់ផលិតផលជាតិប្រកបដោយចីរភាព», សិក្ខាសាលាស្តីពី៖ «ការជំរុញ​និងលើកកម្ពស់​ផលិតផលកសិ-ពាណិជ្ជកម្មវិស័យស្វាយចន្ទីនិងម្រេចកម្ពុជា», យុទ្ធនា​ការលើក​កម្ពស់តម្បាញ និងការប្រើប្រាស់ផលិតផលសូត្រកម្ពុជា, ៤.កម្មវិធីបង្ហាញអំពីការចម្អិនម្ហូបអាហារខ្មែរ និងការសម្តែងសិល្បៈ និងតន្រ្តីស្គរដៃ។​

​ក្រសួងពាណិជ្ជកម្ម អំពាវនាវឱ្យ​ជាអាជីវករ ​ផលិតករ អ្នកផ្គត់ផ្គង់ អ្នកកែច្នៃ សហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ និងបងប្អូនប្រជាពលរដ្ឋគ្រប់មជ្ឈដ្ឋាន ចូលរួមទស្សនា​ពិព័រណ៍នេះឱ្យបានច្រើនកុះករ ព្រមទាំងស្វែងរកឱកាសបង្កើតដៃគូពាណិជ្ជ​កម្ម​ជាមួយ​សហ​គមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ អ្នកចែកចាយ អ្នកលក់ដុំ-រាយ អ្នកកែច្នៃ និងម្ចាស់អាជីវកម្មនានា៕​

The post ​ពិព័រណ៍ផលិតផលខ្មែរ និងបន្លែផ្លែឈើ លើកទី១៩ ​រៀបចំនៅខេត្តសៀមរាបរយៈពេល ​៤ ថ្ងៃ​ appeared first on Kampuchea Thmey Daily.

ស្ថានទូតបានបញ្ជាក់ថា កាលពីឆ្នាំមុន ផ្សារបារាំងទទួលបានការគាំទ្រយ៉ាងខ្លាំង ដោយមានអ្នកចូលទស្សនាជាង ១ម៉ឺននាក់ ហេតុនេះ នៅឆ្នាំ២០២៥ នឹងមានការតាំងពិព័រណ៍ជាង ៧០ រួមទាំងការតាំងបង្ហាញផលិតផល និងសេវាកម្មជាច្រើនប្រភេទ ដូចជាមុខ‍ម្ហូបពិសេសៗរបស់បារាំង និងការភ្លក់រសជាតិមុខម្ហូបឆ្ងាញ់ៗជាច្រើន។ បន្ថែមពីនេះ ក៏មានសកម្មភាពកីឡាផ្សេងៗ ទីលានវាយកូនបាល់ អមជាមួយសួនច្បារដ៏ស្រស់ស្អាតរបស់ស្ថានទូត ដែលអាចឱ្យមហាជនទទួលបានអារម្មណ៍ស្រស់ថ្លា ខ្យល់អាកាសបរិសុទ្ធ និងការបន្ធូរអារម្មណ៍ជាមួយធម្មជាតិ។

សូមបញ្ជាក់ថា ការចូលរួមនេះមិនគិតថ្លៃនោះទេ ចំពោះកាតាប ឬកាបូប សត្វចិញ្ចឹម ឬសម្ភារៈសំពីងសំពោង មិនត្រូវបានអនុញ្ញាតឱ្យយកចូលឡើយ៕

The post ស្ថានទូតបារាំង នឹងបើកទ្វារ​ឱ្យសាធារណជនចូលរួមទស្សនាដោយសេរី នូវព្រឹត្តិការណ៍ផ្សារបារាំងឆ្នាំ២០២៥ appeared first on Kampuchea Thmey Daily.

លោក ស៊ុន មេសា មានប្រសាសន៍នៅថ្ងៃទី២៨ ខែតុលានេះថា ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ ដោយសហការជាមួយបេឡាជាតិសន្តិសុខសង្គម (ប.ស.ស.) អាជ្ញាធរខេត្តបាត់ដំបង, ខេត្តបន្ទាយមានជ័យ, ខេត្តសៀមរាប, ខេត្តព្រៃវែង និងខេត្តកំពង់ធំ និង ស.ស.យ.ក. វិស័យការងារ សន្តិសុខសង្គម និងបណ្តុះបណ្តាលវិជ្ជាជីវៈ បានរៀបចំពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ ប្រកបដោយជោគជ័យ ចាប់ពីថ្ងៃទី៣ ដល់ថ្ងៃទី២៦ ខែតុលា ឆ្នាំ២០២៥ ដោយនាំយកឱកាសការងាររាប់ម៉ឺនកន្លែង ជូនបងប្អូនពលករត្រឡប់មកពីថៃ និងយុវជនដែលកំពុងស្វែងរកការងារធ្វើ។ 

អ្នកនាំពាក្យក្រសួងការងារ បានឱ្យដឹងបន្តថា ពិព័រណ៍ការងារនៅក្នុងខេត្តធំៗទាំង៥នេះ មានអ្នកចូលរួមសរុប ៥ ៧៦៨នាក់ ហើយអ្នកទទួលបានការងារធ្វើភ្លាមៗ មានចំនួន ២ ២៨៩នាក់។ ដោយឡែកអ្នកចូលរួម តែមិនទាន់បានការងារធ្វើ គឺទីភ្នាក់ងារជាតិមុខរបរ និងការងារ (NEA) នឹងបន្តផ្គូផ្គងដូចជា៖ ផ្តល់បញ្ជីអ្នកចុះឈ្មោះទៅតាមបណ្តាក្រុមហ៊ុន ដែលមានតម្រូវការ ត្រូវនឹងការងារដែលគាត់ចង់ធ្វើ, ខលផ្គូផ្គងការងារបន្ថែមតាមលេខ ១២៩៧, ប្រើប្រាស់យន្តការផ្គូផ្គងការងាររបស់មជ្ឈមណ្ឌលការងារ ដែលមានស្រាប់បន្ថែម និងតាមដានលទ្ធផលទទួលបានការងារជាប្រចាំ ជាមួយនិយោជក ព្រមទាំងជាមួយបេក្ខជនដោយផ្ទាល់ ផងដែរ៕

The post ពិព័រណ៍ការងារ សន្តិសុខសង្គម និងបណ្តុះបណ្តាលវិជ្ជាជីវៈ តាមបណ្ដាខេត្តធំៗ៥ បានបញ្ចប់ដោយជោគជ័យ appeared first on Kampuchea Thmey Daily.

យោថ​តាមការ​ចុះ​ផ្សាយ​របស់​អាជ្ញាធរ​ជាតិ​អប្សរា​ពិព័រណ៌​នេះ​ចាប់​ផ្ដើម​ពី​ថ្ងៃទី​២៣ ខែ​តុលា​រហូត​ដល់​ចុង​ខែ​ធ្នូ ឆ្នាំ​២០២៥ ដែល​មាន​កុលាលភាជន៍ប្រមាណ២០ប្រភេទ ដែល​ផលិត​នាសម័យ​អង្គរ ជា​ពិសេស​នៅ​ចុងសតវត្សរ៍ទី៩ រហូតដល់សតវត្សរ៍ទី១៤ ជាប្រភេទកុលាលភាជន៍ រួមមាន៖ ក្រឡ ផើង ក្អម ដន្លាប់ ចាន ពែង ខួច និងការផលិតក្បឿងជាដើម។

ប្រធានការិយាល័យសិក្សាកុលាលភាជន៍អង្គរ​លោក ឆាយ រចនា ឱ្យ​ដឹង​ថា​ដែល​មនុស្ស​សម័យ​បុរាណ​តែង​ប្រើប្រាស់ប្រចាំថ្ងៃដោយកុលាលភាជន៍ទាំងនោះ ភាគច្រើនមាន​ប្រភពមក​ពីស្ថានីយ​ផលិតភាជន៍​ថ្នល់ម្រេចភ្នំគូលែន និងស្ថានីយផលិតភាជន៍សសី។

លោកបន្ថែម​ថា៖ «បើទោះបីសម័យអង្គរ មានទំនាក់ទំនងជាមួយអន្តរជាតិយ៉ាងណាក៏ដោយ ក៏បុព្វបុរសខ្មែរនៅតែផលិតសម្រាប់ប្រើប្រាស់ប្រចាំថ្ងៃ មិនពឹងផ្អែកលើការនាំចូលឡើយ។ ទាំងនេះ​បង្ហាញ​ថានៅក្នុងអរិយធម៌ខ្មែរនាសម័យបុរាណកុលាលភាជន៍ក្រៅពីប្រើប្រាស់ក្នុងជីវភាពរស់នៅ​ប្រចាំ​ថ្ងៃនៅក្នុងព្រះបរមរាជវាំងរហូតដល់ប្រជាពលរដ្ឋធម្មតាប៉ុណ្ណោះទេសូម្បីកិច្ចពិធី​គោរពបូជា​ផ្សេងៗ​ ឬសម្រាប់រក្សាទុកអដ្ឋិធាតុរបស់បុព្វការីជនជាដើម»។

ពិព័រណ៍នេះ​រៀបចំ​ឡើង​នៅ​សាល​ទី​១ របស់​សារមន្ទីរ​ ខណៈ​អ្នក​ទេស​ចរណ៍​ក៍អាច​ដើរទស្សនា​វត្ថុបុរាណរាប់រយប្រភេទទៀតដែលបានអភិរក្សថែរក្សាទុកនៅក្នុងសារមន្ទីរ។ បន្ថែមពីនេះ ក៏មានមគ្គុទ្ទេសក៏ទេសចរណ៍ របស់សារមន្ទីរធ្វើបទបង្ហាញជូនតាមសាលពិព័រណ៍នីមួយៗផងដែរ។ 

សូមជម្រាបថា សារមន្ទីរព្រះនរោត្តមសីហនុ-អង្គរ មានទីតាំងក្នុងភូមិបឹងដូនប៉ា សង្កាត់ស្លក្រាម ក្រុងសៀមរាប។ សារមន្ទីរបើកឱ្យភ្ញៀវទេសចរជាតិ និងអន្តរជាតិ ចូលទស្សនាចាប់ពីថ្ងៃអង្គារ ដល់ថ្ងៃអាទិត្យ វេលាម៉ោង៨:៣០នាទីព្រឹក ដល់ម៉ោង ៤:៣០ល្ងាច៕

អត្ថបទដោយ ហ៊ុន សិរីវឌ្ឍន៍

The post ពិព័រណ៌កុលភាជន៍​​សារមន្ទីរ​ព្រះនរោត្តមសីហនុ-អង្គរ​បង្ហាញ​ពី​ការ​រីក​ចម្រើន​​ឧស្សាហកម្ម​ខ្មែរ​ក្នុង​សម័យ​អង្គរ appeared first on Kampuchea Thmey Daily.