ស្ថានទូតបារាំង នឹងបើកទ្វារ​ឱ្យសាធារណជនចូលរួមទស្សនាដោយសេរី នូវព្រឹត្តិការណ៍ផ្សារបារាំងឆ្នាំ២០២៥

ស្ថានទូតបារាំងប្រចាំកម្ពុជា បានប្រកាសថា នៅថ្ងៃទី២២ ខែវិច្ឆិកា ឆ្នាំ២០២៥ ខាងមុខ ស្ថានទូតនឹងរៀបចំព្រឹត្តិការណ៍ផ្សារបារាំងឆ្នាំ២០២៥ ដែលអស្ចារ្យ និងធំជាងមុន ព្រមទាំងអនុញ្ញាតឱ្យសាធារណជនចូលរួមទស្សនាដោយសេរីពីស្តង់ផលិតផល អាហារ និងសួនច្បារដ៏ស្រស់ស្អាតចាប់ពីម៉ោង ១០ ព្រឹកដល់ម៉ោង ៦ ល្ងាច។ 

ស្ថានទូតបានបញ្ជាក់ថា កាលពីឆ្នាំមុន ផ្សារបារាំងទទួលបានការគាំទ្រយ៉ាងខ្លាំង ដោយមានអ្នកចូលទស្សនាជាង ១ម៉ឺននាក់ ហេតុនេះ នៅឆ្នាំ២០២៥ នឹងមានការតាំងពិព័រណ៍ជាង ៧០ រួមទាំងការតាំងបង្ហាញផលិតផល និងសេវាកម្មជាច្រើនប្រភេទ ដូចជាមុខ‍ម្ហូបពិសេសៗរបស់បារាំង និងការភ្លក់រសជាតិមុខម្ហូបឆ្ងាញ់ៗជាច្រើន។ បន្ថែមពីនេះ ក៏មានសកម្មភាពកីឡាផ្សេងៗ ទីលានវាយកូនបាល់ អមជាមួយសួនច្បារដ៏ស្រស់ស្អាតរបស់ស្ថានទូត ដែលអាចឱ្យមហាជនទទួលបានអារម្មណ៍ស្រស់ថ្លា ខ្យល់អាកាសបរិសុទ្ធ និងការបន្ធូរអារម្មណ៍ជាមួយធម្មជាតិ។

សូមបញ្ជាក់ថា ការចូលរួមនេះមិនគិតថ្លៃនោះទេ ចំពោះកាតាប ឬកាបូប សត្វចិញ្ចឹម ឬសម្ភារៈសំពីងសំពោង មិនត្រូវបានអនុញ្ញាតឱ្យយកចូលឡើយ៕