​

ការបង្ក្រាបនេះបានធ្វើឡើងនៅពេលរំលោភអាធ្រាត ឈានចូលយប់ថ្ងៃទី១២ ខែកក្កដា ឆ្នាំ២០២៦ នៅក្នុងភូមិសាស្ត្រចប់ព្រំដែនកម្ពុជាស្ថិតក្នុងស្រុកអារញ្ញប្រាថេត ខេត្តសះកែវ ហើយគាត់មានមជ្ឈដ្ឋានជាច្រើនកំពុងមានការងឿងឆ្ងល់ ព្រោះកម្លាំងឈរជើងការពារព្រំដែន ពិសេស វរសេនាតូចនគរបាលការពារព្រំដែនគោកលេខ និង កងពលតូចថ្មើរជើងលេខ ចំនួនពីរកងពល  ដែលមានតួនាទីស្នូលក្នុងការយាមកាម ពង្រឹង និងទប់ស្កាត់រាល់បទល្មើសឆ្លងដែនខុសច្បាប់គ្រប់ប្រភេទ តើកម្លាំងទៅណាអស់ បានជាបទល្មើសនៅតែឆ្លងដែនយ៉ាងរលូនចូលទៅដល់ប្រទេសថៃ ដែលទំនិញគេចពន្ធយ៉ាងច្រើនសន្ធឹកសន្ធាប់ទាំងនេះ បានយកទៅគរទុកនៅក្នុងព្រៃក្នុងចំការអំពៅក្បែរខ្សែបន្ទាត់ព្រំដែន ហើយឆ្លងទៅដីថៃបានដោយរលូនបែបនេះ? ហើយដែលទំនិញគេចពន្ធរាប់កេះ ( ប្រអប់ ) អាចចេញពីទឹកដីកម្ពុជាទៅដល់ដីថៃ លុះភាគីថៃបង្ក្រាបបាន ទើបធ្លាយព័ត៌មានបែបនេះ។

បទល្មើសឆ្លងដែនទាំងនេះប្រហែលជាការផ្ដល់ «ផលប្រយោជន៍» មិនស្របច្បាប់ណាមួយ ទើបបានជាធ្វើឱ្យសមត្ថកិច្ច និងអាជ្ញាធរពាក់ព័ន្ធមួយចំនួនហាក់ធ្វើមិនដឹងមិនឮ និងបណ្តោយឱ្យក្រុមឈ្មួញធ្វើព្យុះធ្វើភ្លៀងតាមអំពើចិត្ត បំផ្លាញដល់សន្តិសុខសេដ្ឋកិច្ច និងមុខមាត់ប្រទេសជាតិបែបនេះ។

ជុំវិញបញ្ហានេះប្រភពជាច្រើនកំពុងរង់ចាំមើលថា តើថ្នាក់ដឹកនាំស្ថាប័នពាក់ព័ន្ធ នឹងមានចំណាត់ការបែបណា ឬមានការស៊ើបអង្កេតផ្ទៃក្នុងទៅលើមន្ត្រីឈរជើងនៅតំបន់នោះដែរឬទេ ជុំវិញភាពធូរលុងដែលបង្កើតឱ្យមានបទល្មើសឆ្លងដែនដ៏ច្រើនបែបនេះ៕

អត្ថបទ ៖ សោ និយមរ័ត្ន

The post ថៃបង្ក្រាបទំនិញគេចពន្ធឆ្លងដែនពីកម្ពុជាយ៉ាង​សន្ធឹក​​សន្ធាប់ ជំរុញ​ឱ្យ​មាន​ការ​សង្ស័យ​លើ​ភាព​ធូរលុង​នៃ​ការការពារ​ព្រំដែន​ appeared first on Kampuchea Thmey Daily.

ក្នុងបទសម្ភាសន៍ជាមួយទូរទស្សន៍ជាតិកម្ពុជា នាពេលថ្មីៗនេះ លោក អុិត សុត្ថា រដ្ឋលេខាធិការប្រចាំការ នៃរដ្ឋលេខាធិការដ្ឋានកិច្ចការព្រំដែន បានបង្ហាញផែនទីថតពីផ្កាយរណប ដោយប្រៀបធៀបរវាងខ្សែបន្ទាត់ព្រំដែនដែលកំណត់តាមផែនទីមាត្រដ្ឋាន ១/២០០,០០០ និងកំណត់ហេតុ (PV) នៃការបោះបង្គោលព្រំដែនរបស់គណៈកម្មការឥណ្ឌូចិន–សៀម ឆ្នាំ១៩០៨ និងឆ្នាំ១៩១៩ ជាមួយខ្សែបន្ទាត់ព្រំដែនក្នុងផែនទី L7017 ដែលភាគីថៃបានគូសដោយខ្លួនឯង។

យោងតាមលទ្ធផលនៃការប្រៀបធៀបនេះ លោកបញ្ជាក់ថា ទីតាំងប្រាសាទតាមាន់ធំ ស្ថិតនៅក្នុងទឹកដីកម្ពុជា ទាំងតាមផែនទីដែលមានមូលដ្ឋានច្បាប់ និងតាមផែនទី L7017 របស់ភាគីថៃ។ នេះមានន័យថា សូម្បីតែផែនទីដែលថៃបានគូស និងប្រើប្រាស់ដោយឯកតោភាគី នៅតែបង្ហាញថា «ប្រាសាទតាមាន់ធំ» ស្ថិតក្នុងទឹកដីកម្ពុជាដែរ។

មន្ត្រីជំនាញរូបនេះ បន្ថែមទៀតថា ទោះបីភាគីថៃកំពុងព្យាយាមគូសខ្សែបន្ទាត់ព្រំដែនថ្មី ដើម្បីដាក់បញ្ចូលតំបន់ដែលបានឈ្លានពាន និងកាន់កាប់ដោយខុសច្បាប់ទៅក្នុងទឹកដីរបស់ខ្លួនយ៉ាងណាក្តី ក៏ផែនទីដែលត្រូវបានគូសឡើងដោយឯកតោភាគីទាំងនោះ មិនមានតម្លៃ និងមិនមានអានុភាពតាមផ្លូវច្បាប់ឡើយ៕

The post មន្ត្រីជំនាញកិច្ចការព្រំដែន៖ សូម្បីផែនទីដែលថៃគូសដោយខ្លួនឯង ក៏បង្ហាញថា «ប្រាសាទតាមាន់ធំ» ស្ថិតក្នុងទឹកដីកម្ពុជា appeared first on Kampuchea Thmey Daily.

លោក អ៊ុង សំអឿន អ្នកប្រកបរបររត់ម៉ូតូកង់បី និងអ្នកស្រី ឌួង គឹមលី ប្រកបរបរលក់គ្រឿងម្ជូរ នៅក្រុងខេមរភូមិន្ទ បានរៀបរាប់ថា ពិតជាគាំទ្រពេញទំហឹងនូវប្រសាសន៍របស់សម្តេចតេជោ ចំពោះវិធានការលើជនណាដែលបន្តនាំទំនិញខុសច្បាប់មកពីថៃ ចូលកម្ពុជា តាមរយៈការដកហូតទ្រព្យសម្បត្តិ និងបញ្ជូនឱ្យទៅជីកដីធ្វើលេណដ្ឋាននៅតាមព្រំដែន ។

ពលរដ្ឋទាំង២រូប ក៏បានចាត់ទុកថា សកម្មភាពរបស់ក្រុមជនលួចលាក់នាំចូលទំនិញខុសច្បាប់ពីថៃចូលមកកម្ពុជាតាមច្រកផ្លូវទឹក ផ្លូវគោក ជាទង្វើក្បត់ជាតិ និងអាត្មានិយម ដោយមិនគិតពីភាពឈឺចាប់វេនទារបស់ពលរដ្ឋខ្មែរទូទាំងប្រទេស។ ដូច្នេះប្រសិនបើដាក់ទោសទណ្ឌជនទាំងនោះកាន់តែធ្ងន់ធ្ងរ គឺកាន់តែល្អ ដើម្បីឱ្យស័ក្តិសមនឹងទង្វីរបស់ពួកគេបានសាង។

ជាមួយគ្នានេះ ពួកគាត់ក៏បានអំពាវនាវដល់ប្រជាពលរដ្ឋខ្មែរទូទាំងប្រទេស ឱ្យចូលរួមគាំទ្រផលិតផលក្នុងស្រុក ដែលជាស្នាដៃរបស់កូនខ្មែរ ដើម្បីលើកកម្ពស់ជីវភាពប្រជាពលរដ្ឋ សេដ្ឋកិច្ចជាតិ និងរួមចំណែកជំរុញការអភិវឌ្ឍសង្គមឱ្យកាន់តែរឹងមាំ ពិសេសគ្រាគ្មានផលិតផលសៀមនៅលើទីផ្សារ។

ការគាំទ្រនេះ ធ្វើឡើងបន្ទាប់ពីសម្តេចតេជោ ហ៊ុន សែន ថ្លែងក្នុងឱកាសជួបសំណេះសំណាលជាមួយប្រជាពលរដ្ឋនៅមណ្ឌលបណ្តោះអាសន្ន ឃុំស្លក្រាម ស្រុកស្វាយចេក ខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦ ដោយបានណែនាំដល់អាជ្ញាធរ និងស្ថាប័នពាក់ព័ន្ធទាំងអស់ ពង្រឹងការត្រួតពិនិត្យ និងអនុវត្តវិធានការយ៉ាងម៉ឺងម៉ាត់ចំពោះជនដែលបន្តនាំទំនិញខុសច្បាប់មកពីថៃចូលមកកម្ពុជា ដោយការដកហូតទ្រព្យសម្បត្តិ និងបញ្ជូនពួកគេឱ្យទៅជីកដីនៅតាមព្រំដែន។

សម្តេចតេជោ សង្កត់ធ្ងន់ដែរថា កម្ពុជាបច្ចុប្បន្នមានអ្វីៗស្ទើរតែគ្រប់យ៉ាងហើយ ហេតុអ្វីចាំបាច់នាំចូលទំនិញពីថៃ ដូច្នេះត្រូវតែចាត់វិធានការចំពោះសកម្មភាពនាំចូលខុសច្បាប់ឱ្យបានម៉ឺងម៉ាត់ និងមានប្រសិទ្ធភាព ដោយមិនត្រូវមានការលើកលែងនោះឡើយ។

ជាក់ស្តែង នេះក៏ជាបំណងរបស់ពលរដ្ឋយូរមកហើយ ចំពោះវិធានការដ៏ម៉ឺងម៉ាត់នេះ ទៅលើជនខិលខូចដែលតែងតែលួចលាក់នាំចូលទំនិញខុសច្បាប់ពីថៃ តាមព្រំដែនគោក និងព្រំដែនទឹក ហើយបើទោះបីជាកន្លងទៅ អាជ្ញាធរធ្លាប់បង្ក្រាបករណីលួចដឹកជញ្ជូនទំនិញខុសច្បាប់តាមផ្លូវទឹក និងផ្លូវគោកក៏ពិតមែន ប៉ុន្តែពលរដ្ឋយល់ថា សកម្មភាពខុសច្បាប់មួយចំនួនទៀត អាចនឹងនៅតែបន្តកើតមានដោយសម្ងាត់៕ អត្ថបទ៖ សិរីវឌ្ឍនៈ

The post អ្នកជាយដែនខេត្តកោះកុង គាំទ្រពេញទំហឹង ចំពោះចំណាត់ការលើអ្នកលួចនាំចូលទំនិញខុសច្បាប់ពីថៃ មកកម្ពុជា appeared first on Kampuchea Thmey Daily.

បើតាមសេចក្តីប្រកាសព័ត៌មានរបស់លោកស្រី ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ ការចុះបេសកកម្មនេះ ធ្វើឡើងក្នុងគោលបំណងតាមដានការគោរព និងអនុវត្តវិធានការទាំងអស់ ដែលមានចែងក្នុងសេចក្តីប្រកាសរួម បន្ទាប់ពីបទឈប់បាញ់ចូលជាធរមាន។

សេចក្តីប្រកាសបានបញ្ជាក់ថា បេសកកម្មលើកនេះ គឺជាផ្នែកមួយនៃការផ្លាស់ប្តូរវេនដឹកនាំក្នុងយន្តការអាស៊ាន ដោយប្រទេសម៉ាឡេស៊ីបានបញ្ចប់អាណត្តិ ខណៈប្រទេសហ្វីលីពីននឹងបន្តដឹកនាំក្នុងនាមជាប្រធានអាស៊ានប្តូរវេន និងជាប្រធានក្រុមអ្នកសង្កេតការណ៍អាស៊ាន (AOT) ប្រចាំនៅកម្ពុជា។

ជាមួយគ្នានេះ រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់សាជាថ្មីពីការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ និងមានការទទួលខុសត្រូវខ្ពស់ ក្នុងការគោរព និងអនុវត្តយ៉ាងពេញលេញនូវសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ ក៏ដូចជាសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពកម្ពុជា-ថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងៗទៀត។

ការប្តេជ្ញានេះ មានគោលបំណងឆ្ពោះទៅរកការស្តារស្ថានភាពប្រក្រតីវិញឆាប់រហ័ស និងធានាសន្តិភាព និងស្ថិរភាពយូរអង្វែងនៅតាមតំបន់ព្រំដែន។ នេះ បើតាមក្រសួងការពារជាតិ៕

The post កម្ពុជា​សម្របសម្រួល​ក្រុម AOT ចុះពិនិត្យ​ស្ថានភាព​ព្រំដែន ​នៅតំបន់ភូមិព្រៃចាន់ appeared first on Kampuchea Thmey Daily.

ថ្លែងមកកាន់ក្រុមអ្នកសារព័ត៌មាន នៅព្រឹកថ្ងៃទី២៣ ខែមីនា ឯកអគ្គរាជទូតជប៉ុនប្រចាំកម្ពុជា  លោក អ៊ូអិណុ អាត់ស៊ូស៊ី បញ្ជាក់លម្អិតថា សម្រាប់ជំនួយទាក់ទងនឹងបញ្ហាព្រំដែន រដ្ឋាភិបាលជប៉ុនសហការជាមួយអង្គការ IOM និង UNICEF បានផ្តល់ជំនួយសង្គ្រោះបន្ទាន់ដែលស្មើនឹងទឹកប្រាក់ ១លាន ៨សែនដុល្លារអាម៉េរិកដល់ជនភៀសសឹកនៅតាមតំបន់ព្រំដែនកាលពីខែសីហាឆ្នាំមុន។

លោក អះអាងទៀតថា ចាប់តាំងពីខែមករា ឆ្នាំ២០២៦នេះ ជប៉ុនបាននិងកំពុងផ្តល់ការគាំទ្រដល់ពលករដែលត្រឡប់មកពីប្រទេសថៃ និងជនងាយរងគ្រោះនៅតាមតំបន់ព្រំដែនផងដែរ។ ជាងនេះទៅទៀត ជប៉ុនក៏បាននិងកំពុងបន្តផ្តល់ការគាំទ្រ ដោយសហការ ជាមួយរាជរដ្ឋាភិបាលកម្ពុជា និងអង្គការអន្តរជាតិនានា លើវិស័យនានាដូចជា វិធានការប្រឆាំងគ្រាប់ មីន និងយុទ្ធភណ្ឌមិនទាន់ផ្ទុះជាដើមផងដែរ។ ទំហំទឹកប្រាក់សរុបនៃជំនួយទាំងនេះ គឺប្រមាណ ១៧ លានដុល្លារអាមេរិក។ ជប៉ុនមានបំណងបន្តគាំទ្រសន្តិភាព និងស្ថិរភាពក្នុងតំបន់ ក៏ដូចជាជម្រុញការស្តារ និងអភិវឌ្ឍន៍ជីវភាពរស់នៅរបស់ប្រជាជននៅតាមតំបន់ព្រំដែននាពេលអនាគតផងដែរ។

ចំពោះបញ្ហាជម្លោះរវាងកម្ពុជា-ថៃនេះ, ជប៉ុនសង្ឃឹមយ៉ាងមុតមាំថា ទំនាក់ទំនងរវាងប្រទេសទាំងពីរនឹងមានភាពប្រក្រតីឡើង វិញឆាប់ៗតាមដែលអាចធ្វើ តាមដែលអាចធ្វើបាន តាមរយៈការអនុវត្តយ៉ាងប្រាកដប្រជានូវកិច្ចព្រមព្រៀងឈប់បាញ់ ការអត់ធ្មត់ជាអតិបរមា និងការបន្ថយភាពតានតឹងតាមរយៈការសន្ទនាដោយសន្តិវិធី។ ជប៉ុននឹងបន្ត កិច្ចសហប្រតិបត្តិការជាមួយប្រទេសពាក់ព័ន្ធ ដើម្បីកាត់បន្ថយភាពតានតឹងបន្ថែមទៀត ហើយនឹងបន្ត ផ្តល់ការគាំទ្រក្រោមទម្រង់ផ្សេងៗ។

គួររម្លឹកថា កម្ពុជា និងជប៉ុន បានចាប់ផ្ដើមបង្កើតទំនាក់ទំនងការទូតជាមួយគ្នាជាផ្លូវការនៅ ថ្ងៃទី៩ ខែមករា ឆ្នាំ១៩៥៣ ដែលគិតមកទល់ឆ្នាំ២០២៦ នេះ ទំនាក់ទំនងប្រទេសទាំងពីរឈានដល់ខួប៧៣ឆ្នាំហើយ។ ថ្នាក់ដឹកនាំកម្ពុជា និងជប៉ុន បានព្រមព្រៀងគ្នាដំឡើងកម្រិតទំនាក់ទំនងការទូតទ្វេភាគីទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ដែលជាកម្រិតខ្ពស់បំផុត នៅដើមឆ្នាំ២០២៣ ចំគ្រាដែលទំនាក់ទំនងប្រទេសទាំងពីរគ្រប់អាយុ៧០ឆ្នាំគត់។

ជប៉ុន បានដើរតួនាទីយ៉ាងសំខាន់ក្នុងការអភិវឌ្ឍន៍ហេដ្ឋារចនាសម្ព័ន្ធ ការអភិវឌ្ឍធនធានមនុស្ស និងការកែ លម្អសេវាសាធារណៈនៅកម្ពុជា។ កិច្ចសហប្រតិបត្តិការដែលជប៉ុនមានជាមូយកម្ពុជា គឺជាមូលដ្ឋានគ្រឹះដ៏សំខាន់ដែលគាំទ្រ ដល់កំណើនសេដ្ឋកិច្ចរបស់ប្រទេសកម្ពុជា ការពង្រឹងការតភ្ជាប់ក្នុងតំបន់ និងការលើកកម្ពស់កម្រិត ជីវភាពរបស់ប្រជាជន៕

ដោយ៖ ង៉ិល ណារ៉ាត់

The post តាំងពីកម្ពុជា-ថៃ មានជម្លោះនៅឆ្នាំ២០២៥ ជប៉ុនបានផ្ដល់ជំនួយដល់ពលរដ្ឋកម្ពុជាប្រមាណជិត ២០លានដុល្លារ appeared first on Kampuchea Thmey Daily.

លោកបានឱ្យដឹងថា បច្ចុប្បន្នលោក ប្រាក់ សុខុន ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ កំពុងបន្តដំណើរទស្សនកិច្ចនៅ អូស្ត្រាលី បន្ទាប់ពីបញ្ចប់ទស្សនកិច្ចផ្លូវការនៅ សិង្ហបុរី និង នូវែលសេឡង់។ ក្នុងជំនួបជាមួយមន្ត្រីជាន់ខ្ពស់នៃប្រទេសទាំងនេះ ភាគីទាំងពីរបានពិភាក្សាអំពីការពង្រឹងទំនាក់ទំនងទ្វេភាគី បញ្ហាសន្តិសុខ សន្តិភាព និងស្ថិរភាពក្នុងតំបន់ និងពិភពលោក ពិសេសការវិវត្តថ្មីៗនៃស្ថានការណ៍តាមបណ្តោយព្រំដែនកម្ពុជា-ថៃ។

ក្នុងឱកាសនោះដែរ លោក ប្រាក់ សុខុន ក៏បានថ្លែងអំណរគុណដល់ប្រទេសជាមិត្ត ដែលបានគាំទ្រកម្ពុជា ក្នុងការដោះស្រាយជម្លោះតាមវិធីសន្តិភាព ដើម្បីធានាសន្តិភាពយូរអង្វែងតាមបណ្តោយព្រំដែន។

អ្នកនាំពាក្យរាជរដ្ឋាភិបាលបន្តថា ក្នុងអំឡុងដំណើរទស្សនកិច្ចនេះ ប្រមុខការទូតកម្ពុជា ក៏បានជួបសំណេះសំណាលជាមួយសហគមន៍ខ្មែរ និងនិស្សិតកម្ពុជា ដែលកំពុងរស់នៅ និងសិក្សានៅ នូវែលសេឡង់ និង អូស្ត្រាលី ដោយបានពាំនាំសារសួរសុខទុក្ខពីព្រះមហាក្សត្រ ពី ហ៊ុន សែន ប្រធានព្រឹទ្ធសភា និងពី ហ៊ុន ម៉ាណែត នាយករដ្ឋមន្ត្រី ជូនដល់បងប្អូនខ្មែរនៅក្រៅប្រទេស។

ជាមួយគ្នានេះ លោក ប៉ែន បូណា បានបញ្ជាក់ថា រាជរដ្ឋាភិបាលកម្ពុជា បានដាក់អាទិភាពខ្ពស់បំផុតលើការការពារបូរណភាពទឹកដី ដោយប្រើប្រាស់គ្រប់មធ្យោបាយសន្តិវិធី រួមមានការទូត នយោបាយ សាធារណមតិ និងផ្លូវច្បាប់ ស្របតាមអនុសញ្ញា សន្ធិសញ្ញា និងច្បាប់អន្តរជាតិ ខណៈក៏ត្រៀមខ្លួនផ្នែកយោធា ដើម្បីអនុវត្តសិទ្ធិការពារខ្លួនផងដែរ។

លោកបន្ថែមថា រាជរដ្ឋាភិបាលកម្ពុជា បានតាមដានយ៉ាងជិតស្និទ្ធចំពោះសកម្មភាពរបស់កងកម្លាំងប្រដាប់អាវុធថៃ ហើយបានធ្វើការតវ៉ាជាផ្លូវការចំពោះរាល់សកម្មភាពដែលរំលោភលើអធិបតេយ្យភាព និងបូរណភាពទឹកដីកម្ពុជា។ ជាក់ស្តែង នៅថ្ងៃទី១៣ ខែមីនា ឆ្នាំ២០២៦ កម្ពុជាបានធ្វើការតវ៉ាជាផ្លូវការទៅភាគីថៃ ជំទាស់ចំពោះសកម្មភាពសាងសង់សំណង់នានា ដែលមានលក្ខណៈពង្រឹងទីតាំងយោធា និងស៊ីវិល នៅតំបន់ដែលបានកាន់កាប់ដោយខុសច្បាប់តាមរយៈការប្រើកម្លាំង។

អ្នកនាំពាក្យរាជរដ្ឋាភិបាល បានសង្កត់ធ្ងន់ថា កម្ពុជា បន្តគោរពយ៉ាងម៉ឺងម៉ាត់នូវបទឈប់បាញ់ និងគ្រប់ចំណុចនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ព្រមទាំងកិច្ចព្រមព្រៀងពាក់ព័ន្ធផ្សេងៗទៀត។ កម្ពុជា ប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ និងគោលការណ៍ខ្សែព្រំដែនមិនកែប្រែ (Uti Possidetis Juris)។

លោក ប៉ែន បូណា បានបញ្ជាក់ថា កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយ ដែលកើតចេញពីការប្រើប្រាស់កម្លាំងនោះឡើយ៕

The post លោក ប៉ែន បូណា៖ រាជរដ្ឋាភិបាលកម្ពុជា បន្តសកម្មភាពការទូត និងតវ៉ាចំពោះសកម្មភាពថៃតាមព្រំដែន appeared first on Kampuchea Thmey Daily.

តំបន់​ប្រជុំ​ជន​នេះ​មាន​ចំនួន ៤ ភូមិ​ និង​មុន​សង្គ្រាម​ឈ្លាន​ពាន​របស់​ថៃ​មាន​ពលរដ្ឋ​ខ្មែរ​រស់នៅ​ប្រមាណ​ប្រមាណ ១ ៥២០ គ្រួសារ​​ស្មើ​ចំនួន​មនុស្ស​ ៥ ៧៣៥ នាក់​។ នេះបើតាមប្រភពពី​អាជ្ញាធរ​ខេត្ត​បន្ទាយមានជ័យ។

ភូមិ​ទាំង ៤ ដែលមានទីតាំង​នៅក្នុង​តំបន់​បឹង​ត្រកួន​ មាន​ភូមិ​ត្រពាំង​សំរោង ភូមិ​សាមគ្គី ភូមិ​បន្ទាយ​មាន​ឫទ្ធិ និង​ភូមិ​ផ្លូវ​បំបែក។

​

អាជ្ញាធរ​ខេត្ត​បន្ទាយមានជ័យបាន​​ប្រាប់​បណ្តាញ​សារព័ត៌មាន​ថា មុន​ថៃ​ឈ្លាន​ពាន​ ក្នុង​តំបន់​នេះទាំងមូល​មាន​ពលរដ្ឋ​ខ្មែរ​រស់នៅ​យ៉ាង​កុះករ​បង្កើត​ជា​ផ្ទះ និង​អាជីវកម្ម​លក់​ដូរ​យ៉ាង​មមាញឹក ខណៈ​តំបន់នេះ​មាន​ច្រក​ទ្វារ​​តំបន់​មួយ​សម្រាប់​ធ្វើ​ទំនាក់ទំនង​ជាមួយ​ប្រទេស​ថៃ។

ភូមិសាស្រ្ត​នៅ​ក្នុង​តំបន់​បឹង​ត្រកួន​ បច្ចុប្បន្ន​ត្រូវ​បានយោធា​ថៃ​ដាក់ទូកុងតឺណ័រ និង​រាយបន្លាសលួសព័ទ្ធ​យកផ្ទះនិងដីធ្លីពលរដ្ឋខ្មែរ ខណៈ​​អាជ្ញាធរបាន​​ជម្លៀសពលរដ្ឋ​​មក​ស្នាក់នៅមណ្ឌលសុវត្ថិភាព​ក្នុង​​វត្ត​កណ្តោល ដែល​មាន​ចម្ងាយ​ប្រមាណ ១០ គីឡូម៉ែត្រ​ពី​ទីតាំង​ប្រឈម។

ពាក់ព័ន្ធ​ទឹកដី​​ជាយដែន​នេះ លោក អុំ រាត្រី អភិបាល​ខេត្ត​បន្ទាយមានជ័យ​បាន​គូស​បញ្ជាក់​ថា ក្រោយ​សង្គ្រាមឈ្លានពាន ២១ ថ្ងៃ ថៃ​បាន​ចូល​កាន់កាប់​តំបន់​បឹងត្រកួន​​មាន​ទំហំ​ផ្ទៃដី​រហូត​ដល់​ ៥៨៤ ហិកតា។

លោកថា ​ថៃ​បាន​រាយ​បន្លា​លួស ដាក់​ទូរ​កុងតឺន័រ រួម​ទាំង​កម្ទេច​ផ្ទះ​ពលរដ្ឋ​ខ្មែរបង្កើត​ស្ថានភាព​ថ្មីនៅ​លើ​ទីតាំង​ជាក់ស្តែង (fait accompli) ក្រោយ​ការ​អនុវត្ត​បទ​ឈប់បាញ់​ចូលជាធរមាន។

ក្នុង​បទ​សម្ភាសន៍​ជាមួយសារព័ត៌មាន Reuters និង ​Fox News សម្ដេចធិបតី ហ៊ុន ម៉ាណែត នាយករដ្ឋមន្រ្តី​កម្ពុជា​បាន​ថ្លែង​ថា កង​កម្លាំង​ថៃ​បាន​ចូល​កាន់កាប់​ជ្រៅ​ទៅក្នុងទឹកដីកម្ពុជានៅក្នុងតំបន់​ជាច្រើន​ហួសពី​​ផែនទី ​ដែល​ថៃ​គូសជា​ឯកតោភាគី​គ្មាន​ការទទួលស្គាល់ពីអន្តរជាតិ។

សម្ដេច​បាន​សង្កត់ធ្ងន់​ថា «នេះមិនមែនជាការ​ចោទប្រកាន់ទេ ប៉ុន្តែវាជាការពិត​នៅលើ​ដី​ផ្ទាល់»។

រាជរដ្ឋាភិបាលកម្ពុជាបានបញ្ជាក់ម្ដងហើយម្ដងទៀតថា កម្ពុជាមិនទទួលស្គាល់​ដាច់ខាត​ការកែប្រែ​ខ្សែ​បន្ទាត់​ព្រំដែន ឬការកាន់កាប់ទឹកដី​ដោយខុសច្បាប់​អន្តរជាតិ តាមរយៈ​ការប្រើប្រាស់​កម្លាំង៕

The post ស្វែង​យល់​ពី​តំបន់​បឹង​ត្រកួន ដែល​ថៃ​លើក​ទូ​កុង​តឺណ័រ​រំលោភ​ចូល​កាន់កាប់​ទឹកដី​ខ្មែរ​​ជាង​ ៥៨៤ ហិកតា​ appeared first on Kampuchea Thmey Daily.

បើតាមប្រភពនានាពីឈ្មួញ និងប្រជាពលរដ្ឋដែលនៅតាមបន្ទាត់ព្រំដែនកម្ពុជាថៃក្នុងភូមិសាស្ត្រខេត្តបន្ទាយមានជ័យ បានឱ្យដឹងថា ជំនួញសត្វគោពីប្រទេសថៃ នៅតែមានជាបន្តបន្ទាប់ ជាពិសេសខណៈពេលព្រំដែនគ្មានការប្រយុទ្ធគ្នា ការរត់ពន្ធនាំសត្វគោ ពីប្រទេសថៃចូលកម្ពុជា កំពុងត្រូវឈ្មួញលួចនាំចូលតាមច្រករបៀងអូរបីជាន់ ច្រករបៀងធ្នង់ ច្រករបៀងនៃស្រុកថ្នពួក និងស្រុកអូរជ្រៅ។

ប្រភពបានឱ្យដឹងទៀតថា សត្វគោដែលឈ្មួញថៃនាំចូលមកកម្ពុជាត្រូវបានឈ្មួញថៃដេញឆ្លងព្រំដែនដោយថ្មើរជើងប្រគល់ឱ្យឈ្មួញកម្ពុជាដឹកបន្តតាមរថយន្តឬតាមគោយន្តកន្រ្តៃយ៍ពេលខ្លះស្ថានភាពតានតឹង គឺដេញរយៈចំងាយឆ្ងាយ ទើបបានយករថយន្តនិងគោយន្តដឹងបន្តទៅស្តុបទីតាំងក្រោលគោណាមួយបានច្រើនទើបឈ្មួញក្នុងស្រុកមកប្រមូលទិញដឹកទៅខេត្តកំពង់ចាម និងព្រៃវែង តាមរថយន្តធុនធំ។

ជាក់ស្តែង កាលពីយប់ឈានចូលថ្ងៃទី៤ មីនា២០២៦នេះ ប្រភពបានឃើញមន្រ្តីជំនាញឃាត់ត្រួតពិនិត្យរថយន្តដឹងគោមួយគ្រឿងសង្ស័យគ្មានច្បាប់អនុញ្ញាតនៅក្នុងមូលដ្ឋានឃុំអូរបីជាន់ស្រុកអូរជ្រៅ កាលពីព្រឹកថ្ងៃទី ២៦ ខែ កុម្ភៈ ឆ្នាំ២០២៦។

ក្រុមអន្តរាគមការិយាល័យ បសុពេទ្យខេត្តបន្ទាយមានជ័យដឹកនាំដោយលោកហ៊ុយ ទូច ប្រធានការិយាល័យបសុពេទ្យសហការជាមួយនគរបាលស្រុកស្វាយចេក ក្រោមកិច្ចសម្របសម្រួលនីតិវិធីពីលោក សោ វុទ្ធី ព្រះរាជអាជ្ញារង នៃអយ្យការអមសាលាដំបូងខេត្តបន្ទាយមានជ័យ បានចុះធ្វើអធិការកិច្ចនៅដីឡូត៍១កន្លែង រកឃើញផ្ទុកគោសរុប ៥៩ក្បាល (គោថៃ ៤៥ក្បាល និងគោខ្មែរ ១៤ក្បាល) ដែលមានម្ចាស់គោឈ្មោះ យួង សុខ ស្ថិតនៅ ឃុំផ្គាំ ស្រុកស្វាយចេកបាន បញ្ជូនទៅតុលាការផ្តន្ទាទោសតាមមច្បាប់។

មុនបញ្ជូនខ្លួនទៅតុលាការ លោក យួង សុខ បាននិយាយចំពោះសមត្ថកិច្ចថា ការរកស៊ីនាំសត្វគោពីប្រទេសថៃមកលក់នៅខ្មែរនេះមិនមែនមានតែលោកម្នាក់ឯងនោះទេ គឺមានអ្នកប្រកបរបនេះជាច្រើនអ្នកទៀត។

លោកហ៊ុយ ទូច ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្មខេត្តបន្ទាយមានជ័យ អះអាងថា ចាប់តាំងពីមុន និងពេលមានបញ្ហាជម្លោះព្រំដែនកម្ពុជាថៃ គឺមន្ទ្រីជំនាញ និងសមត្ថកិច្ចបានទប់ស្កាត់ការលួចនាំចូលសត្វ និងសាច់សត្វពីប្រទេសថៃដើម្បីបង្ការការឆ្លងជំងឺ និងលើកស្ទួយការចិញ្ចឹមសត្វក្នុងស្រុក៕

ដោយ ៖ អពៅ

The post ឈ្មួញនៅតែអាចលួចលាក់នាំសត្វគោពីថៃចូលកម្ពុជា ក្នុងភូមិសាស្ត្រ ខេត្តបន្ទាយមានជ័យ appeared first on Kampuchea Thmey Daily.