ព័ត៌មានជាតិ

ស្វែងយល់ពីតំបន់បឹងត្រកួន ដែលថៃលើកទូកុងតឺណ័ររំលោភចូលកាន់កាប់ទឹកដីខ្មែរជាង ៥៨៤ ហិកតា

បានផុស

៤ ខែ មុន

នៅ

ថ្ងៃសៅរ៍ ៧ មីនា ២០២៦

ដោយ

តំបន់បឹងត្រកួនដែលយោធាថៃបានរំលោភចូលកាន់កាប់ដោយកម្រោល មានទីតាំងស្ថិតនៅឃុំគោករមៀត ស្រុកថ្មពួក ខេត្តបន្ទាយមានជ័យ នៅក្បែរចន្លោះបង្គោលគីឡូម៉ែត្រលេខ ៥៥ និង ៥៦ នៅលើកំណាត់ផ្លូវជាតិលេខ ៥៨។

តំបន់ប្រជុំជននេះមានចំនួន ៤ ភូមិ និងមុនសង្គ្រាមឈ្លានពានរបស់ថៃមានពលរដ្ឋខ្មែររស់នៅប្រមាណប្រមាណ ១ ៥២០ គ្រួសារស្មើចំនួនមនុស្ស ៥ ៧៣៥ នាក់។ នេះបើតាមប្រភពពីអាជ្ញាធរខេត្តបន្ទាយមានជ័យ។

ភូមិទាំង ៤ ដែលមានទីតាំងនៅក្នុងតំបន់បឹងត្រកួន មានភូមិត្រពាំងសំរោង ភូមិសាមគ្គី ភូមិបន្ទាយមានឫទ្ធិ និងភូមិផ្លូវបំបែក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរខេត្តបន្ទាយមានជ័យបានប្រាប់បណ្តាញសារព័ត៌មានថា មុនថៃឈ្លានពាន ក្នុងតំបន់នេះទាំងមូលមានពលរដ្ឋខ្មែររស់នៅយ៉ាងកុះករបង្កើតជាផ្ទះ និងអាជីវកម្មលក់ដូរយ៉ាងមមាញឹក ខណៈតំបន់នេះមានច្រកទ្វារតំបន់មួយសម្រាប់ធ្វើទំនាក់ទំនងជាមួយប្រទេសថៃ។

ភូមិសាស្រ្តនៅក្នុងតំបន់បឹងត្រកួន បច្ចុប្បន្នត្រូវបានយោធាថៃដាក់ទូកុងតឺណ័រ និងរាយបន្លាសលួសព័ទ្ធយកផ្ទះនិងដីធ្លីពលរដ្ឋខ្មែរ ខណៈអាជ្ញាធរបានជម្លៀសពលរដ្ឋមកស្នាក់នៅមណ្ឌលសុវត្ថិភាពក្នុងវត្តកណ្តោល ដែលមានចម្ងាយប្រមាណ ១០ គីឡូម៉ែត្រពីទីតាំងប្រឈម។

ពាក់ព័ន្ធទឹកដីជាយដែននេះ លោក អុំ រាត្រី អភិបាលខេត្តបន្ទាយមានជ័យបានគូសបញ្ជាក់ថា ក្រោយសង្គ្រាមឈ្លានពាន ២១ ថ្ងៃ ថៃបានចូលកាន់កាប់តំបន់បឹងត្រកួនមានទំហំផ្ទៃដីរហូតដល់ ៥៨៤ ហិកតា។

លោកថា ថៃបានរាយបន្លាលួស ដាក់ទូរកុងតឺន័រ រួមទាំងកម្ទេចផ្ទះពលរដ្ឋខ្មែរបង្កើតស្ថានភាពថ្មីនៅលើទីតាំងជាក់ស្តែង (fait accompli) ក្រោយការអនុវត្តបទឈប់បាញ់ចូលជាធរមាន។

ក្នុងបទសម្ភាសន៍ជាមួយសារព័ត៌មាន Reuters និង Fox News សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានថ្លែងថា កងកម្លាំងថៃបានចូលកាន់កាប់ជ្រៅទៅក្នុងទឹកដីកម្ពុជានៅក្នុងតំបន់ជាច្រើនហួសពីផែនទី ដែលថៃគូសជាឯកតោភាគីគ្មានការទទួលស្គាល់ពីអន្តរជាតិ។

សម្ដេចបានសង្កត់ធ្ងន់ថា «នេះមិនមែនជាការចោទប្រកាន់ទេ ប៉ុន្តែវាជាការពិតនៅលើដីផ្ទាល់»។

រាជរដ្ឋាភិបាលកម្ពុជាបានបញ្ជាក់ម្ដងហើយម្ដងទៀតថា កម្ពុជាមិនទទួលស្គាល់ដាច់ខាតការកែប្រែខ្សែបន្ទាត់ព្រំដែន ឬការកាន់កាប់ទឹកដីដោយខុសច្បាប់អន្តរជាតិ តាមរយៈការប្រើប្រាស់កម្លាំង៕