មន្ត្រីជំនាញកិច្ចការព្រំដែន៖ សូម្បីផែនទីដែលថៃគូសដោយខ្លួនឯង ក៏បង្ហាញថា «ប្រាសាទតាមាន់ធំ» ស្ថិតក្នុងទឹកដីកម្ពុជា

មន្ត្រីជំនាញនៃរដ្ឋលេខាធិការដ្ឋានកិច្ចការព្រំដែន បានបញ្ជាក់ជាថ្មីថា ប្រាសាទតាមាន់ធំ ស្ថិតក្នុងដែនអធិបតេយ្យរបស់កម្ពុជាយ៉ាងច្បាស់ក្រឡែត មិនថាយោងតាមផែនទីមាត្រដ្ឋាន ១/២០០,០០០ និងកំណត់ហេតុ (PV) នៃការបោះបង្គោលព្រំដែនរបស់គណៈកម្មការឥណ្ឌូចិន–សៀម ឆ្នាំ១៩០៨ និងឆ្នាំ១៩១៩ ឬផែនទី L7017 មាត្រដ្ឋាន ១/៥០,០០០ ដែលភាគីថៃបានគូស និងប្រើប្រាស់ដោយឯកតោភាគីនោះឡើយ។

ក្នុងបទសម្ភាសន៍ជាមួយទូរទស្សន៍ជាតិកម្ពុជា នាពេលថ្មីៗនេះ លោក អុិត សុត្ថា រដ្ឋលេខាធិការប្រចាំការ នៃរដ្ឋលេខាធិការដ្ឋានកិច្ចការព្រំដែន បានបង្ហាញផែនទីថតពីផ្កាយរណប ដោយប្រៀបធៀបរវាងខ្សែបន្ទាត់ព្រំដែនដែលកំណត់តាមផែនទីមាត្រដ្ឋាន ១/២០០,០០០ និងកំណត់ហេតុ (PV) នៃការបោះបង្គោលព្រំដែនរបស់គណៈកម្មការឥណ្ឌូចិន–សៀម ឆ្នាំ១៩០៨ និងឆ្នាំ១៩១៩ ជាមួយខ្សែបន្ទាត់ព្រំដែនក្នុងផែនទី L7017 ដែលភាគីថៃបានគូសដោយខ្លួនឯង។

យោងតាមលទ្ធផលនៃការប្រៀបធៀបនេះ លោកបញ្ជាក់ថា ទីតាំងប្រាសាទតាមាន់ធំ ស្ថិតនៅក្នុងទឹកដីកម្ពុជា ទាំងតាមផែនទីដែលមានមូលដ្ឋានច្បាប់ និងតាមផែនទី L7017 របស់ភាគីថៃ។ នេះមានន័យថា សូម្បីតែផែនទីដែលថៃបានគូស និងប្រើប្រាស់ដោយឯកតោភាគី នៅតែបង្ហាញថា «ប្រាសាទតាមាន់ធំ» ស្ថិតក្នុងទឹកដីកម្ពុជាដែរ។

មន្ត្រីជំនាញរូបនេះ បន្ថែមទៀតថា ទោះបីភាគីថៃកំពុងព្យាយាមគូសខ្សែបន្ទាត់ព្រំដែនថ្មី ដើម្បីដាក់បញ្ចូលតំបន់ដែលបានឈ្លានពាន និងកាន់កាប់ដោយខុសច្បាប់ទៅក្នុងទឹកដីរបស់ខ្លួនយ៉ាងណាក្តី ក៏ផែនទីដែលត្រូវបានគូសឡើងដោយឯកតោភាគីទាំងនោះ មិនមានតម្លៃ និងមិនមានអានុភាពតាមផ្លូវច្បាប់ឡើយ៕