អ្នកជាយដែនខេត្តកោះកុង គាំទ្រពេញទំហឹង ចំពោះចំណាត់ការលើអ្នកលួចនាំចូលទំនិញខុសច្បាប់ពីថៃ មកកម្ពុជា

ពលរដ្ឋរស់នៅក្នុងមូលដ្ឋាន ក្រុងខេមរភូមិន្ទ ខេត្តកោះកុង បានសម្តែងការគាំទ្រពេញទំហឹងចំពោះវិធានការរឹតបន្តឹងរបស់សម្តេចតេជោ ហ៊ុន សែន ប្រមុខរដ្ឋស្តីទី ក្នុងការទប់ស្កាត់សកម្មភាពលួចនាំចូលទំនិញខុសច្បាប់ពី ថៃ ចូលមក កម្ពុជា។

លោក អ៊ុង សំអឿន អ្នកប្រកបរបររត់ម៉ូតូកង់បី និងអ្នកស្រី ឌួង គឹមលី ប្រកបរបរលក់គ្រឿងម្ជូរ នៅក្រុងខេមរភូមិន្ទ បានរៀបរាប់ថា ពិតជាគាំទ្រពេញទំហឹងនូវប្រសាសន៍របស់សម្តេចតេជោ ចំពោះវិធានការលើជនណាដែលបន្តនាំទំនិញខុសច្បាប់មកពីថៃ ចូលកម្ពុជា តាមរយៈការដកហូតទ្រព្យសម្បត្តិ និងបញ្ជូនឱ្យទៅជីកដីធ្វើលេណដ្ឋាននៅតាមព្រំដែន ។

ពលរដ្ឋទាំង២រូប ក៏បានចាត់ទុកថា សកម្មភាពរបស់ក្រុមជនលួចលាក់នាំចូលទំនិញខុសច្បាប់ពីថៃចូលមកកម្ពុជាតាមច្រកផ្លូវទឹក ផ្លូវគោក ជាទង្វើក្បត់ជាតិ និងអាត្មានិយម ដោយមិនគិតពីភាពឈឺចាប់វេនទារបស់ពលរដ្ឋខ្មែរទូទាំងប្រទេស។ ដូច្នេះប្រសិនបើដាក់ទោសទណ្ឌជនទាំងនោះកាន់តែធ្ងន់ធ្ងរ គឺកាន់តែល្អ ដើម្បីឱ្យស័ក្តិសមនឹងទង្វីរបស់ពួកគេបានសាង។

ជាមួយគ្នានេះ ពួកគាត់ក៏បានអំពាវនាវដល់ប្រជាពលរដ្ឋខ្មែរទូទាំងប្រទេស ឱ្យចូលរួមគាំទ្រផលិតផលក្នុងស្រុក ដែលជាស្នាដៃរបស់កូនខ្មែរ ដើម្បីលើកកម្ពស់ជីវភាពប្រជាពលរដ្ឋ សេដ្ឋកិច្ចជាតិ និងរួមចំណែកជំរុញការអភិវឌ្ឍសង្គមឱ្យកាន់តែរឹងមាំ ពិសេសគ្រាគ្មានផលិតផលសៀមនៅលើទីផ្សារ។

ការគាំទ្រនេះ ធ្វើឡើងបន្ទាប់ពីសម្តេចតេជោ ហ៊ុន សែន ថ្លែងក្នុងឱកាសជួបសំណេះសំណាលជាមួយប្រជាពលរដ្ឋនៅមណ្ឌលបណ្តោះអាសន្ន ឃុំស្លក្រាម ស្រុកស្វាយចេក ខេត្តបន្ទាយមានជ័យ នាព្រឹកថ្ងៃទី៩ ខែមិថុនា ឆ្នាំ២០២៦ ដោយបានណែនាំដល់អាជ្ញាធរ និងស្ថាប័នពាក់ព័ន្ធទាំងអស់ ពង្រឹងការត្រួតពិនិត្យ និងអនុវត្តវិធានការយ៉ាងម៉ឺងម៉ាត់ចំពោះជនដែលបន្តនាំទំនិញខុសច្បាប់មកពីថៃចូលមកកម្ពុជា ដោយការដកហូតទ្រព្យសម្បត្តិ និងបញ្ជូនពួកគេឱ្យទៅជីកដីនៅតាមព្រំដែន។

សម្តេចតេជោ សង្កត់ធ្ងន់ដែរថា កម្ពុជាបច្ចុប្បន្នមានអ្វីៗស្ទើរតែគ្រប់យ៉ាងហើយ ហេតុអ្វីចាំបាច់នាំចូលទំនិញពីថៃ ដូច្នេះត្រូវតែចាត់វិធានការចំពោះសកម្មភាពនាំចូលខុសច្បាប់ឱ្យបានម៉ឺងម៉ាត់ និងមានប្រសិទ្ធភាព ដោយមិនត្រូវមានការលើកលែងនោះឡើយ។

ជាក់ស្តែង នេះក៏ជាបំណងរបស់ពលរដ្ឋយូរមកហើយ ចំពោះវិធានការដ៏ម៉ឺងម៉ាត់នេះ ទៅលើជនខិលខូចដែលតែងតែលួចលាក់នាំចូលទំនិញខុសច្បាប់ពីថៃ តាមព្រំដែនគោក និងព្រំដែនទឹក ហើយបើទោះបីជាកន្លងទៅ អាជ្ញាធរធ្លាប់បង្ក្រាបករណីលួចដឹកជញ្ជូនទំនិញខុសច្បាប់តាមផ្លូវទឹក និងផ្លូវគោកក៏ពិតមែន ប៉ុន្តែពលរដ្ឋយល់ថា សកម្មភាពខុសច្បាប់មួយចំនួនទៀត អាចនឹងនៅតែបន្តកើតមានដោយសម្ងាត់៕ អត្ថបទ៖ សិរីវឌ្ឍនៈ