ភ្លើងឆេះព្រៃ Archives - Kampuchea Thmey Daily

ភ្លើងឆេះព្រៃកាន់តែសាហាវនៅអាហ្សង់ទីន ប៉ុន្តែប្រធានាធិបតី មិនជឿលើការប្រែប្រួលអាកាសធាតុ

Minea Neu — Thu, 05 Feb 2026 07:00:25 +0000

ក្នុងរយៈពេលប៉ុន្មានថ្ងៃនេះ ជម្រកព្រៃដ៏ធំសម្បើមមួយនៃតំបន់ Patagonia របស់ប្រទេសអាហ្សង់ទីន មើលទៅដូចជាតំបន់សង្រ្គាមដ៏ក្តៅគគុក។ ពពកផ្សែងហុយឡើងលើមេឃ ដូចការបាញ់មីស៊ីល។ អណ្ដាតភ្លើងដ៏ធំបំភ្លឺពេលយប់ ដូចព្រះចន្ទពណ៌ទឹកក្រូច។

ភើងឆេះព្រៃនៅតំបន់អឺរុប។ Reuters

ខណៈប្រធានាធិបតី អាហ្សង់ទីន លោក Javier Milei មិនជឿថាការប្រែប្រួលអាកាសធាតុជាបញ្ហាដែលគួរតែយកចិត្តទុកដាក់នោះទេ។ ថែមទាំងបានកាត់បន្ថយលើការចំណាយផ្នែកអគ្គិភ័យនៅក្នុងប្រទេសរបស់ខ្លួនទៀតផង។

ព្រៃដ៏ធំនៃឧទ្យានជាតិ Los Alerces ជាតំបន់បេតិកភណ្ឌពិភពលោករបស់អង្គការយូណេស្កូ (UNESCO) ដែលជាជម្រករបស់ដើមឈើ មានអាយុ ២ ៦០០ ឆ្នាំ ឥឡូវនេះភ្លើងឆាបឆេះហើយ។

ភ្លើងឆេះព្រៃ ក្នុងចំណោមគ្រោះរាំងស្ងួតដ៏អាក្រក់បំផុតដែលបានវាយប្រហារតំបន់ Patagonia ដោយគ្រោះរាំងស្ងួតក្នុងរយៈពេលជាច្រើនទសវត្សរ៍កន្លងមក បានបំផ្លិចបំផ្លាញព្រៃឈើជាង ៤៥ ០០០ហិកតានៃប្រទេសអាហ្សង់ទីនក្នុងរយៈពេលមួយខែកន្លះចុងក្រោយនេះ។ ជាពិសេសស្ថានភាពបានបង្ខំឱ្យប្រជាជនជម្លៀសទៅកន្លែងសុវត្ថិភាព និងប៉ះពាល់ដល់ភ្ញៀវទេសចររាប់ពាន់នាក់។ តួរលេខនេះ គិតត្រឹមថ្ងៃចន្ទ ទី២ ខែកុម្ភៈ គ្រោះមហន្តរាយនេះនៅតែបន្តរីករាលដាល។

ភ្លើងឆេះនៅប្រទេសអាហ្សង់ទីននៅតែបន្ត លោក Luis Schinelli មន្ត្រីអនុរក្សឧទ្យានម្នាក់ក្នុងព្រៃដែលគ្របដណ្តប់លើផ្ទៃដី ២៥៩ ០០០ហិកតា នៃឧទ្យានជាតិ Los Alerces ថា៖ «គឺមានការសម្រេចចិត្តរបស់អ្នកនយោបាយ ក្នុងការរុះរើស្ថាប័នពន្លត់អគ្គិភ័យ។ ចំណែកក្រុមពន្លត់អគ្គិភ័យបានពង្រីកការការពារ លើសដែនកំណត់របស់ពួកគេ»។

បន្ទាប់ពីឡើងកាន់តំណែង ជាមួយយុទ្ធនាការជួយសង្គ្រោះសេដ្ឋកិច្ចរបស់ប្រទេសអាហ្សង់ទីនពីបំណុលជាច្រើនទសវត្សរ៍មក ប្រធានាធិបតី លោក Javier Milei បានកាត់បន្ថយការចំណាយលើសេវាគ្រប់គ្រងអគ្គិភ័យជាតិចំនួន ៨០ ភាគរយ ក្នុងឆ្នាំ ២០២៤ បើប្រៀបធៀបទៅនឹងឆ្នាំមុន។

ក្នុងនោះរួមមាន ទីភ្នាក់ងារទទួលខុសត្រូវលើការដាក់ពង្រាយកងពលតូច ថែទាំនាវាដឹកយន្តហោះ ការទិញឧបករណ៍បន្ថែម និងការតាមដានគ្រោះថ្នាក់ដោយភ្លើងឆេះ។

សេវាកម្មជួយសង្រ្គោះទាំងអស់នោះ ប្រឈមនឹងការកាត់បន្ថយចំនួន ៧១ ភាគរយក្នុងឆ្នាំនេះ។ បើយោងតាមការវិភាគនៃថវិកាឆ្នាំ ២០២៦ ដោយមូលនិធិបរិស្ថាន និងធនធានធម្មជាតិ និងអង្គភាព FARN ដែលជាក្រុមស្រាវជ្រាវ និងតស៊ូមតិបរិស្ថានរបស់ប្រទេសអាហ្សង់ទីន។

យ៉ាងណាភ្លើងឆេះព្រៃដ៏ខ្លាំងនេះ អ្នកវិទ្យាសាស្រ្តបាននិយាយថា វាបណ្តាលមកពីការប្រែប្រួលអាកាសធាតុ ធ្វើឱ្យបរិយាកាសកាន់តែក្តៅ និងធ្ងន់ធ្ងរ នាំឱ្យមានភ្លើងឆេះព្រៃជាបន្តបន្ទាប់។ លើសពីនេះការប្រែប្រួលអាកាសធាតុ គឺកើតឡើងដោយសកម្មភាពមនុស្សធ្ងន់ធ្ងរពេក៕

ប្រែសម្រួល៖ ណឺ មិនា

The post ភ្លើងឆេះព្រៃកាន់តែសាហាវនៅអាហ្សង់ទីន ប៉ុន្តែប្រធានាធិបតី មិនជឿលើការប្រែប្រួលអាកាសធាតុ appeared first on Kampuchea Thmey Daily.

ភ្លើងឆេះព្រៃនៅអូស្ត្រាលីកំពុងបន្ត ក្រុមអ្នកពន្លត់អគ្គិភ័យ ព្រមានពលរដ្ឋឱ្យជម្លៀសបន្ទាន់

Minea Neu — Wed, 28 Jan 2026 10:20:17 +0000

ក្រុមអ្នកពន្លត់អគ្គិភ័យនៅក្នុងរដ្ឋ Victoria នៃប្រទេសអូស្ត្រាលី កំពុងប្រយុទ្ធនឹងភ្លើងឆេះដ៏ធំចំនួន៦ទីតាំងផ្សេងៗគ្នា ខណៈដែលរលកកម្តៅបំបែកកំណត់ត្រា ក្នុងការវាយប្រហារភាគអាគ្នេយ៍ប្រទេសកាន់តែធ្ងន់ធ្ងរ។

ភ្លើងឆេះព្រៃនៅអូស្រ្តាលី ឆ្នាំ ២០១៩។ Reuters

ការផ្សាយរបស់ទូរទស្សន៍ក្នុងស្រុក ABC News ឱ្យដឹងថា៖«អគ្គិភ័យចំនួនពីរកន្លែងកំពុងឆេះដល់កម្រិតប្រកាសអាសន្ន។ ប្រជាជនក្នុងសហគមន៍ជាច្រើនត្រូវ អាជ្ញាធរព្រមានឱ្យជម្លៀសចេញជាបន្ទាន់ដើម្បីសុវត្ថិភាព។ ស្ថានការណ៍កំពុងមានការប្រែប្រួលយ៉ាងឆាប់រហ័ស»។

ការិយាល័យឧតុនិយមបានឱ្យដឹងថាផ្នែកខ្លះនៃរដ្ឋ ឱ្យដឹងថា សីតុណ្ហភាពហក់ឡើងខ្ពស់គ្រប់ពេលវេលា ដោយតំបន់ខ្លះឡើងដល់កម្រិត ៤៨.៩ °C ចំណែកទីក្រុងមែលប៊ន [Melbourne] បានកត់ត្រាសីតុណ្ហភាព ៤១°C ។

លោក Chris Hardman ប្រធានផ្នែកពន្លត់អគ្គិភ័យនៅរដ្ឋ Victoria [Forest Fire Management Victoria] បានប្រាប់អ្នកសារព័ត៌មានថា៖ « ស្ថានភាពកម្តៅក្នុងរដ្ឋកំពុងមានលក្ខខណ្ឌពិបាកស្មាន សម្រាប់អ្នកពន្លត់អគ្គិភ័យ»។

ចំណែកអគ្គិភ័យចំនួនពីរ នៅតំបន់ Camperdown និង Otways កំពុងឆេះក្នុងកម្រិតសង្គ្រោះបន្ទាន់។ ភ្លើងថ្មី ឆាបឆេះនៅតំបន់ Larralea ក៏កំពុងតែបង្កឱ្យមានការព្រួយបារម្ភយ៉ាងខ្លាំង។

ប្រធានអាជ្ញាធរអគ្គិភ័យប្រចាំប្រទេស (CFA) លោក Jason Heffernan បានប្រាប់វិទ្យុ ABC ថា៖«មានគ្រោះថ្នាក់ដែលភ្លើងឆេះនៅតំបន់ Otways អាចបង្កើតជាភ្លើងរូបរាងផ្កាឈូក អាចបង្កើតភ្លើងបន្ថែមទៀតនៅពីមុខភ្លើងធំ» ។

ចំណែក លោក Alistair Drayton អនុប្រធានគ្រប់គ្រងឧប្បត្តិហេតុរបស់ប្រទេសអូស្ត្រាលី បាននិយាយថា៖ «វាមិនច្បាស់ថា ការខូចខាតបណ្តាលមកពីភ្លើងអ្វីនោះទេ។ ចំណែកភស្តុតាងវាអាថ៌កំបាំងពេក ដែលមានផ្ទះមួយចំនួនឆេះអស់»។

ក្រៅពីរដ្ឋ Victoria ជាកន្លែងដែលមានការហាមឃាត់ភ្លើងឆេះទាំងស្រុង អូស្ត្រាលីខាងត្បូងក៏ត្រូវបានដាក់ឱ្យស្ថិតក្រោមការប្រុងប្រយ័ត្ន ចំពោះហានិភ័យភ្លើងឆេះខ្លាំងផងដែរ។

មិនតែប៉ុណ្ណោះ មន្ត្រីសុខាភិបាលតំបន់ Meanhwile ព្រមានថា កម្តៅដែលអូសបន្លាយយូរ នាំមកនូវហានិភ័យចំពោះសុខភាពយ៉ាងខ្លាំង។

ប្រធានមន្ត្រីសុខាភិបាល Victoria លោកស្រី Caroline McElnay បានប្រាប់អ្នកយកព័ត៌មានថា៖ « មនុស្សចាស់ កុមារ និងមនុស្សដែលមានស្ថានភាពសុខភាពស្រាប់ គឺមានគ្រោះថ្នាក់បំផុត»។ វាអាចបណ្តាលឱ្យមានបញ្ហាសុខភាពដែលអាចបណ្តាលឱ្យស្លាប់ ដូចជាការហត់នឿយនឹងកម្តៅ និងអាចកើតជំងឺដាច់សរសៃឈាមខួរក្បាល ប៉ុន្តែវាក៏អាចបង្កឱ្យមានការគាំងបេះដូង ឬដាច់សរសៃឈាមខួរក្បាលផងដែរ»។

អ្នកវិទ្យាសាស្ត្រលើកឡើងថា៖ «ច្បាស់ណាស់ការប្រែប្រួលអាកាសធាតុដែលបង្កឡើងដោយមនុស្ស កំពុងធ្វើឱ្យរលកកម្តៅកាន់តែមានការកើនឡើង និងកាន់តែខ្លាំងនៅទូទាំងពិភពលោក»៕

ប្រែសម្រួល៖ ណឺ មិនា

The post ភ្លើងឆេះព្រៃនៅអូស្ត្រាលីកំពុងបន្ត ក្រុមអ្នកពន្លត់អគ្គិភ័យ ព្រមានពលរដ្ឋឱ្យជម្លៀសបន្ទាន់ appeared first on Kampuchea Thmey Daily.

អាជ្ញាធរព្រមានឲ្យឈប់តស៊ូពន្លត់ ខណៈភ្លើងឆេះព្រៃរីករាលដាលដល់សហគមន៍ច្រើននៅអូស្រ្តាលី

Minea Neu — Fri, 09 Jan 2026 03:38:11 +0000

ក្រុមអ្នកពន្លត់អគ្គីភ័យនៃប្រទេសអូស្ត្រាលី បានព្រមានថា ភ្លើងឆេះព្រៃបានគំរាមកំហែងដល់ទីប្រជុំជន ជនបទ រាប់សិបសហគមន៍នៅភាគអាគ្នេយ៍នៃប្រទេសអូស្ត្រាលីនៅថ្ងៃសុក្រ ទី៩ខែមករានេះ ខណៈដែលខ្យល់ក្តៅបានបង្កើនឥទ្ធ៊ិពលក្នុងលក្ខខណ្ឌរាលដាលកាន់តែខ្លាំងនិងលឿន នៅតំបន់ជនបទដែលស្ងួតហួតហែងខ្លាំង។

ភ្លើងឆេះព្រៃនៅអូស្រ្តាលី។ Reuters

យោងតាមការផ្សាយរបស់ទីភ្នាក់ងារសារព័ត៌មាន AFP សីតុណ្ហភាពត្រូវបានព្យាករណ៍នឹងកើនឡើងកម្រិតកម្តៅលើសពី ៤០អង្សារសេ នៅក្នុងតំបន់មួយចំនួន ដែលបង្កើតបានជាបរិយាកាសដែលមានភ្លើងឆេះព្រៃដ៏អាក្រក់និងគ្រោះថ្នាក់បំផុត ចាប់តាំងពីភ្លើងឆេះនារដូវក្តៅខ្លាំង [ Black Summer] កាលឆ្នាំ២០១៩ ដល់ ២០២០។

ក្នុងនោះដែរ ភូមិជនបទរាប់សិបនៅក្នុងរដ្ឋវីតូរៀ (Victoria) ត្រូវបានអាជ្ញាធរជំរុញឱ្យជម្លៀសចេញឲ្យបានឆាប់បំផុត ខណៈពេលដែលពួកគេនៅតែប្រឹងប្រយុទ្ធពន្លត់ភ្លើងដោយខ្លួនឯងនោះ។

លោក Jason Heffernan ប្រធានអាជ្ញាធរអគ្គីភ័យប្រចាំប្រទេសបាននិយាយថា៖ «ស្ថានភាពភ្លើងឆេះគឺខ្លាំងកាលពីម្សិលមិញ។ ថ្ងៃនេះគ្រោះថ្នាក់ណាស់»។

លោកបានបន្ថែមថា៖ «អ្នកភូមិនៅរដ្ឋនេះ គួរតែការពារខ្លួនឯងឱ្យបានសិន កុំចង់បានទ្រព្យសម្បត្តិទៅជាមួយ ព្រោះវាអាចបាត់បង់ជីវិតអាក្រក់ជាងនេះ។ [ …] ថ្ងៃនេះនឹងក្លាយជាថ្ងៃដែលភ្លើងរីករាលដាលខ្លាំង ជាពិសេសអ្នកពន្លត់អគ្គីភ័យ អាជ្ញាធរពន្លត់អគ្គីភ័យ ពិបាកស្មានស្ថានការណ៍»។

ភ្លើងឆេះព្រៃដ៏សាហាវបំផុតនេះបានលេបត្របាក់ផ្ទៃដីប្រហែល ២៨ ០០០ហិកតា នៅជិតទីក្រុង Longwood ចម្ងាយប្រហែល ១៥០គីឡូម៉ែត្រភាគខាងជើងនៃក្រុង Melbourne របស់រដ្ឋ Victoria ។

លោក George Noye ប្រធានក្រុមពន្លត់អគ្គីភ័យក្នុងតំបន់ បាននិយាយថា៖«ទ្រព្យសម្បត្តិមួយចំនួនរបស់ប្រជាជនបានបាត់បង់ស្ទើរតែទាំងអស់ហើយ»។

លោកបានប្រាប់ទូរទស្សន៍ជាតិ ABC ថា៖«ពួកគេបានបាត់បង់ទ្រព្យសម្បត្តិ ចំណែកសត្វពាហនៈខ្លះទៀតបានឆេះរោម យ៉ាងអណោចអធម។ ប៉ុន្តែយើងក៏អរគុណដែលនៅពេលនេះមិនមាននរណាម្នាក់បាត់បង់ជីវិតនៅឡើយទេ»៕

ប្រែសម្រួល៖ ណឺ មិនា

The post អាជ្ញាធរព្រមានឲ្យឈប់តស៊ូពន្លត់ ខណៈភ្លើងឆេះព្រៃរីករាលដាលដល់សហគមន៍ច្រើននៅអូស្រ្តាលី appeared first on Kampuchea Thmey Daily.

ទប់ស្កាត់ភ្លើងឆេះក្នុងរដូវប្រាំង អាជ្ញាធរខេត្តកណ្ដាល ហាមពលរដ្ឋដុតសំរាមនៅតាមទីវាល

Thoeun Vansong — Mon, 03 Feb 2025 03:26:24 +0000

ជាវិធានការការពារ និងទប់ស្កាត់ភ្លើងឆេះព្រៃក្នុងភូមិសាស្ត្រខេត្តកណ្តាល នៅរដូវប្រាំង រដ្ឋបាលខេត្តកណ្ដាលបានហាមដាច់ខាតមិនឱ្យពលរដ្ឋដុតសំរាម និងសំណល់រឹងនៅតាមដងផ្លូវ ទីសាធារណៈ ទីវាល ដុតរានព្រៃ វាលស្មៅ សំណល់កសិកម្ម គល់ជញ្ជ្រាំងនៅទីចំហ ឬក្នុងដីកម្មសិទ្ធិឯកជន។

ក្នុងករណីចាំបាច់ដែលត្រូវប្រើភ្លើងជាមធ្យោបាយក្នុងការដុតកាកសំណល់ឈើព្រៃ ក្រោមគោលបំណងដាំដំណាំកសិកម្ម និងសកម្មភាពស្របច្បាប់ផ្សេងទៀត ត្រូវជូនដំណឹងដល់អាជ្ញាធរមានសមត្ថកិច្ច ដើម្បីអាជ្ញាធរណែនាំនូវការអនុវត្តវិធានការបច្ចេកទេសសមស្របដែលអាចធានាសុវត្ថិភាពចំពោះភ្លើងឆេះព្រៃ។ នេះជាសេចក្ដីជូនដំណឹងរបស់រដ្ឋបាលខេត្តកណ្ដាល នៅថ្ងៃទី០២ ខែកុម្ភៈ ឆ្នាំ២០២៥។

ជារៀងរាល់ឆ្នាំ ធាតុអាកាសនៅទូទៅប្រទេសកម្ពុជា នៅរដូវប្រាំងមានសភាពក្តៅ ហួតហែង ស្ងួតខ្លាំង ដែលជាកត្តាងាយបង្កនូវភ្លើងឆេះព្រៃ។ ជាការកត់សម្គាល់របស់រដ្ឋបាលខេត្តកណ្តាល ក្រៅពីបាតុភូតធម្មជាតិ ដែលអាចបង្កឱ្យមានភ្លើងឆេះព្រៃ ប្រការដែលគួរឱ្យព្រួយបារម្ភបំផុតនោះ គឺភ្លើងឆេះព្រៃ ដែលបង្កឡើងដោយសារសកម្មភាពរបស់មនុស្សផ្ទាល់។

រដ្ឋបាលខេត្ត បានកត់សម្គាល់ឃើញថា ភ្លើងឆេះព្រៃជារៀងរាល់ឆ្នាំបានបង្កឱ្យមានបញ្ហាដល់ការបាត់បង់ធនធានព្រៃឈើ ធនធានធម្មជាតិ និងឈានដល់លំនៅដ្ឋានរបស់ប្រជាពលរដ្ឋ ដែលអាចបង្កឱ្យមានការខូចខាតផ្នែកសេដ្ឋកិច្ច ធនធានធម្មជាតិ និងប៉ះពាល់យ៉ាងធ្ងន់ធ្ងរដល់បរិស្ថាន។

ការណ៍នេះ រដ្ឋបាលខេត្តកណ្តាល ក៏បានណែនាំដល់ប្រជាពលរដ្ឋ និងអ្នកពាក់ព័ន្ធទាំងអស់ត្រូវមានការប្រុងប្រយ័ត្នខ្ពស់ក្នុងការប្រើប្រាស់ភ្លើងសម្រាប់ជាមធ្យោបាយ ដើម្បីចម្អិនអាហារ ការយកឃ្មុំ ការដុតស្មៅព្រៃ ការដុតស្ទាក់ចាប់សត្វ ជាអាទិ៍។ បើក្នុងករណី កើតមានភ្លើងឆេះព្រៃត្រូវប្រញាប់ចាត់វិធានការទប់ស្កាត់ជាបន្ទាន់ហើយ គណៈបញ្ជាការឯកភាពរដ្ឋបាលក្រុង ស្រុក ត្រូវដឹកនាំបញ្ជាផ្ទាល់ ដើម្បីរួមគ្នាទប់ស្កាត់ និងពន្លត់ភ្លើងឱ្យមានប្រសិទ្ធភាព៕

ដោយ៖ ធឿន វ៉ាន់សុង

The post ទប់ស្កាត់ភ្លើងឆេះក្នុងរដូវប្រាំង អាជ្ញាធរខេត្តកណ្ដាល ហាមពលរដ្ឋដុតសំរាមនៅតាមទីវាល appeared first on Kampuchea Thmey Daily.

ក្រោយភ្លើងឆេះដ៏សាហាវបំផុត រដ្ឋកាលីហ្វ័រញ៉ា នឹងជួបព្យុះភ្លៀងនាំសារធាតុពុលម្តង

Bun sopheap — Wed, 22 Jan 2025 03:58:10 +0000

ក្រុមអ្នកព្យាករណ៍បាននិយាយថា រដ្ឋកាលីហ្វ័រញ៉ាភាគខាងត្បូងបន្តប្រឈមនឹងខ្យល់បក់ដ៏គ្រោះថ្នាក់ ប៉ុន្តែអាចនឹងមានភ្លៀងធ្លាក់យ៉ាងខ្លាំងនៅចុងសប្តាហ៍នេះ ដោយកាត់បន្ថយភ្លើងឆេះព្រៃដ៏សាហាវ ប៉ុន្តែជំនួសមកវិញ ដោយការបញ្ហាប្រឈមថ្មីដូចជាការហៀរផេះពុល និងទឹកភ្លៀងលាយសារធាតុពុល។ យោងទីភ្នាក់ងារព័ត៌មាន AP។

(រូបភាព៖ AP)

មន្ត្រីទីក្រុង Los Angeles កំពុងរៀបចំទប់ទល់នឹងការព្យាករណ៍នេះ ទោះបីជាអ្នកស្រុកមួយចំនួនតូចត្រូវបានអនុញ្ញាតឱ្យត្រឡប់ទៅតំបន់ Pacific Palisades វិញក៏ដោយ ខណៈក្រុមអ្នកពន្លត់អគ្គីភ័យនៅតែបន្តប្រយុទ្ធនឹងអណ្តាតភ្លើងតូចៗដែលបន្តឆេះថ្មីៗទៀត។

អភិបាលក្រុង Los Angeles លោកស្រី Karen Bass បានចេញបទបញ្ជាប្រតិបត្តិមួយ ដើម្បីពន្លឿនកិច្ចខិតខំប្រឹងប្រែងសម្អាតនៅតំបន់ដែលមានភ្លើងឆេះ និងកាត់បន្ថយផលប៉ះពាល់បំពុលបរិស្ថានដែលទាក់ទងនឹងភ្លើង តាមរយៈការដំឡើងរបាំង និងពង្រឹងផ្លូវនៅមុនពេលមានភ្លៀងធ្លាក់ចុងសប្តាហ៍ដែលអាចបង្កឱ្យមានភក់ និងកម្ទេចកម្ទីហូរចូល ។

តាមការព្យាករណ៍មានប្រហែល ៦០% ទៅ ៨០% នៃបរិមាណទឹកភ្លៀងធ្លាក់នៅរដ្ឋកាលីហ្វ័រញ៉ាភាគខាងត្បូងនឹងចាប់ផ្តើមថ្ងៃសៅរ៍ចុងសប្តាហ៍នេះ ដោយតំបន់ភាគច្រើនទំនងជាទទួលបានមិនលើសពី០.៨សង់ទីម៉ែត្រ។ ទោះយ៉ាងណាក៏ដោយ ប្រសិនបើទឹកភ្លៀងមានរហូតដល់២សង់ទីម៉ែត្រលាយឡំជាមួយព្យុះ ផ្គរ និងរន្ទះ នោះវានឹងក្លាយជាសេណារីយ៉ូដ៏អាក្រក់បំផុត បណ្ដាលឲ្យកំទេចកំទីលើភ្នំដែលឆេះហូរធ្លាក់មក។

ខ្យល់បានធូរស្រាលបន្តិចនៅរសៀលថ្ងៃអង្គារ បន្ទាប់ពីបានឡើងដល់កំពូលក្នុងល្បឿន៩៦គីឡូម៉ែត្រក្នុងមួយម៉ោង នៅក្នុងតំបន់ជាច្រើន ប៉ុន្តែលក្ខខណ្ឌខ្យល់ព្យុះត្រូវបានគេរំពឹងថា នឹងត្រលប់មកវិញក្នុងរយៈពេលពីរថ្ងៃបន្ទាប់។ ការព្រមានទង់ក្រហមសម្រាប់ហានិភ័យអគ្គីភ័យធ្ងន់ធ្ងរត្រូវបានបន្តរហូតដល់ម៉ោង៨យប់ថ្ងៃព្រហស្បត្តិ៍នៅក្នុងស្រុក LA និង Ventura។

ក្រុមហ៊ុនអគ្គិសនីនៅភាគខាងត្បូងរដ្ឋកាលីហ្វ័រញ៉ាបានបិទភ្លើងជាបណ្តោះអាសន្នដល់អតិថិជនជាង ៦ម៉ឺននាក់នៅក្នុងតំបន់ចំនួន៥ ដើម្បីរារាំងភ្លើងឆេះថ្មីពីឧបករណ៍អគ្គិសនី តែក្រោយមកអគ្គិសនីត្រូវបានស្ដារឡើងវិញខ្លះ។ ក្រុមហ៊ុននេះក៏កំពុងពិចារណាបិទការផ្គត់ផ្គង់ដល់អតិថិជនជាង២០ម៉ឺននាក់បន្ថែមទៀត។

ទោះយ៉ាងណាមានពាក្យបណ្តឹងជាច្រើនប្តឹងដោយអ្នកដែលបាត់បង់ផ្ទះរបស់ពួកគេនៅក្នុងអគ្គីភ័យ ចោទប្រកាន់ថា ក្រុមហ៊ុនអគ្គិសនីនោះបានបង្កឱ្យមានអគ្គីភ័យ។

(រូបភាព៖ AP)

តាមការសន្និដ្ឋានកន្លងមក សំណើមទាប អាកាសធាតុស្ងួតខ្លាំង ស្មៅងាប់និងស្ងួតខ្លាំង និងខ្យល់បក់ខ្លាំង បណ្ដាលឲ្យភ្លើងឆេះព្រៃរាលដាលយ៉ាងឆាប់រហ័សនៅរដ្ឋកាលីហ្វ័រញ៉ា សម្លាប់មនុស្សយ៉ាងហោចណាស់២៨នាក់ និងបានបំផ្លាញសំណង់ជាង១៤០០០ចាប់តាំងពីបានផ្ទុះឡើងកាលពីថ្ងៃទី៧ខែមករា។

ពាក់ព័ន្ធបញ្ហានេះ លោកប្រធានាធិបតី ដូណាល់ ត្រាំ ដែលបានរិះគន់ចំពោះវិធានការឆ្លើយតបទៅនឹងភ្លើងឆេះព្រៃក្នុងអំឡុងពេលសុន្ទរកថាឡើងកាន់ដំណែងរបស់គាត់កាលពីថ្ងៃចន្ទថា គាត់នឹងធ្វើដំណើរទៅកាន់ទីក្រុង Los Angeles នៅថ្ងៃសុក្រនេះ៕

(រូបភាព៖ AP)

អត្ថបទ៖ ប៊ុន សុភាព

The post ក្រោយភ្លើងឆេះដ៏សាហាវបំផុត រដ្ឋកាលីហ្វ័រញ៉ា នឹងជួបព្យុះភ្លៀងនាំសារធាតុពុលម្តង appeared first on Kampuchea Thmey Daily.

ឆេះភ្នំនៅថៃ បង្កការភ្ញាក់ផ្អើលនិងភ័យរន្ធត់

Sok Sovann — Thu, 16 Jan 2025 01:14:19 +0000

កាលពីរាត្រីថ្ងៃពុធទី១៥ខែមករាឆ្នាំ២០២៥ ខេត្តឈុនបុរី នៃប្រទេសថៃ បានកើតមានភ្លើងឆេះភ្នំ យ៉ាងសន្ធោសន្ធៅ ធ្វើឲ្យពលរដ្ឋភ្ញាក់ផ្អើលនិងភ័យរន្ធត់យ៉ាងខ្លាំង។

(រូបថត៖ Khaosod)

តាមការចុះផ្សាយរបស់ Khaosod, ហេតុការណ៍នេះកើតឡើងនៅម៉ោង៩:៣០នាទីយប់ ក្នុងភូមិ៤ នៃឃុំ Pong ស្រុក Bang Lamung ហើយរាលដាលយ៉ាងខ្លាំង គំរាមកំហែងដល់វត្តលើភ្នំផងដែរ។

ភ្លាមៗនោះ ក្រុមពន្លត់អគ្គិភ័យក៏ត្រូវបានបញ្ជូនទៅដើម្បីពន្លត់ភ្លើងផងដែរ ប៉ុន្តែដោយសារវាមានទំហំធំពេក ហើយរាលដាលខ្លាំងដោយសារខ្យល់បក់និងព្រៃស្ងួត ស្ថានការណ៍មិនអាចគ្រប់គ្រងបានឡើយ។

ទោះបីជាយ៉ាងណាក៏ដោយ មិនមានការបញ្ជាឲ្យជម្លៀសពលរដ្ឋនោះទេព្រោះតែទីតាំងឆេះ ហាក់នៅឆ្ងាយពីតំបន់លំនៅដ្ឋានប្រជាជនរស់នៅគួរសម ខណៈភ្លាមៗ ក៏មិនទាន់មានសេចក្តីរាយការណ៍អំពីទំហំនៃការខូចខាតដែរ ប៉ុន្តែគេបារម្ភថា គុណភាពខ្យល់ដែលបណ្តាលមកពីផ្សែងភ្លើង នឹងប៉ះពាល់ដល់សុខភាពមនុស្ស។

គេនៅមិនទាន់ដឹងឡើយថាតើអគ្គិភ័យនេះ បណ្តាលមកពីអ្វី ប៉ុន្តែបើតាមធម្មតា រាល់ឆ្នាំឲ្យតែដល់ខែធ្លាក់ខ្យល់ ប្រទេសថៃ តែងកើតមានភ្លើងឆេះព្រៃជានិច្ច គ្រាន់តែថាឆ្នាំនេះ រដូវភ្លើងឆេះព្រៃ ហាក់កើតឡើងលឿនជាងសព្វមួយដង៕

អត្ថបទ៖ សុខ សុវណ្ណ

ចុចអាន៖ ទិន្នន័យសំខាន់ៗក្នុងហេតុការណ៍ភ្លើងឆេះព្រៃនៅ LA រយៈពេល១សប្តាហ៍ដល់ថ្ងៃអង្គារនេះ

The post ឆេះភ្នំនៅថៃ បង្កការភ្ញាក់ផ្អើលនិងភ័យរន្ធត់ appeared first on Kampuchea Thmey Daily.

ភូមិគ្រឹះនៅ LA តម្លៃជិត ៩លានដុល្លារ ឈរយ៉ាងរឹងមាំ ទោះជាភ្លើងឆេះជុំវិញសល់តែផេះក្ដី

សាង ស្រីល័ក្ខ — Tue, 14 Jan 2025 07:33:31 +0000

ភូមិគ្រឹះដ៏ស្គឹមស្គៃមានតម្លៃជិត៩លានដុល្លារ ដែលស្ថិតនៅជាប់មាត់សមុទ្រ និងជាកម្មសិទ្ធិរបស់ពាណិជ្ជករអ្នកមានគឺលោក David Steiner ស្រាប់តែបានរួចផុតពីភ្លើងឆេះព្រៃនៅទីក្រុង LA ស្ថិតក្នុងរដ្ឋកាលីហ្វ័រញ៉ា ដែលបានបំផ្លាញផ្ទះនៅក្បែរនោះក្លាយជាផេះផង់ក្នុងមួយរំពេចភ្នែក។

អ្នកជំនួញប្រុសរូបនេះបានចែករំលែកថា «ខ្ញុំមិនប្រើពាក្យអព្ភូតហេតុទេ! ខ្ញុំនិយាយថាវាជាស្ថាបត្យកម្មដ៏អស្ចារ្យ អ្នកពន្លត់អគ្គីភ័យដ៏ក្លាហាន និងប្រហែលជាអព្ភូតហេតុតិចតួចប៉ុណ្ណោះ» ។ នៅពេលមានពេលភ្លើងឆាបឆេះ គ្រួសាររបស់លោកមិនបានស្នាក់នៅផ្ទះទេ ហើយពេលឮថាផ្ទះអ្នកជិតខាងកំពុងឆេះ គាត់ស្មានថា ផ្ទះរបស់គាត់ក៏អាចជួបវាសនាដូចគ្នា។ ប៉ុន្តែគួរឲ្យភ្ញាក់ផ្អើល គឺនៅតែនៅដដែល។

លោក David បាននិយាយថា គាត់បានទិញផ្ទះនេះក្នុងឆ្នាំ ២០១៥ នៅពេលដែលកូនប្រុសរបស់គាត់ពីរនាក់បានចូលរៀននៅមហាវិទ្យាល័យក្នុងតំបន់។ តាមពិតទៅលោកទិញផ្ទះ ក៏ដើម្បីឲ្យពេលចេញមកលេងកូនៗអាចមានកន្លែងស្នាក់នៅតែប៉ុណ្ណោះ! ជាពិសេស ផ្ទះនេះត្រូវបានទុកចោល និងមិនដែលមកស្នាក់នៅដូចអ្នកជិតខាងផ្សេងទេ។

លោក David បាននិយាយបន្ថែមទៀតថា មូលហេតុដែលភូមិគ្រឹះបស់គាត់រួចផុតពីភ្លើងគឺដោយសារតែរចនាសម្ព័ន្ធដ៏រឹងមាំរបស់វា ដែលត្រូវរចនាឡើងដើម្បីទប់ទល់នឹងការរញ្ជួយដី។ វាសង់ពីឥដ្ឋនិងថ្ម ដែលមានដំបូលប្រក់ស័ង្កសីមានជម្រៅ១៥ម៉ែត្រ ហើយសង់យ៉ាងរឹងមាំដោយសារគាត់ចង់ឲ្យវាងើបឡើងក្នុងពេលមានគ្រោះរញ្ជួយដី។

គួររម្លឹកដែរថា ទីក្រុង LA ទើបតែបានទទួលរងនូវគ្រោះមហន្តរាយភ្លើងឆេះព្រៃដ៏អាក្រក់បំផុតក្នុងប្រវត្តិសាស្ត្រ។ មិនត្រឹមតែប៉ុណ្ណោះ អគ្គីភ័យបានឆក់យកជីវិតមនុស្ស២៤នាក់ និងរបួសជាច្រើននាក់ទៀត ថែមទាំងបានឆេះបំផ្លាញទ្រព្យសម្បត្តិមានតម្លៃជាច្រើន បង្ខំឲ្យមនុស្សរាប់រយនាក់ត្រូវជម្លៀសចេញថែមទៀតផង៕

អត្ថបទ៖ សាង ស្រីល័ក្ខ

ចុចអាន៖ភ្លើងឆេះព្រៃនៅ LA លេបត្របាក់ផ្ទះតារាហូលីវូដជាច្រើន ខណៈអ្នកផ្សេងត្រូវបង្ខំចិត្តជម្លៀសចេញ

The post ភូមិគ្រឹះនៅ LA តម្លៃជិត ៩លានដុល្លារ ឈរយ៉ាងរឹងមាំ ទោះជាភ្លើងឆេះជុំវិញសល់តែផេះក្ដី appeared first on Kampuchea Thmey Daily.

ទិន្នន័យសំខាន់ៗក្នុងហេតុការណ៍ភ្លើងឆេះព្រៃនៅ LA រយៈពេល១សប្តាហ៍ដល់ថ្ងៃអង្គារនេះ

Rann Reuy — Tue, 14 Jan 2025 04:26:07 +0000

ចាប់តាំងពីថ្ងៃអង្គារទី៧សប្តាហ៍មុន ភ្លើងឆេះព្រៃដ៏សាហាវបំផុតក្នុងប្រវត្តិសាស្រ្តអាមេរិក បានចាប់ផ្តើមដោយវាបង្កើនការឆាបឆេះរាលដាលយ៉ាងរហ័សបំផុត ដោយសារតែអាកាសធាតុស្ងួត ការចាប់ផ្តើមរដូវប្រាំងលឿនជាសព្វដង និងជាពិសេសខ្វល់បាក់ខ្លាំង។ ក្នុងរយៈពេល១សប្តាហ៍នេះ គ្រោះមហន្តរាយភ្លើងឆេះដែលគេអាចសន្និដ្ឋានថា ជាគ្រោះមហន្តរាយធំបំផុតក្នុងប្រវត្តិសាស្ត្រអាមេរិក បានបង្កមហន្តរាយធ្ងន់ធ្ងរ។ ខាងក្រោមនេះ គឺជាការសង្ខេបព្រឹត្តិការណ៍និងវិធានការចុងក្រោយរបស់រដ្ឋបាលសហព័ន្ធនិងរដ្ឋកាលីហ្វ័រញ៉ា៖

ក្រុមពន្លត់អគ្គីភ័យត្រូវបានដាក់ពង្រាយបន្ថែមនៅ Palisades ដែលឆេះខ្លាំងនិងគ្រប់គ្រងបានតិចគិតត្រឹមថ្ងៃទី១៤ខែមករានេះ។ Reuter

អភិបាលរដ្ឋកាលីហ្វ៍័រញ៉ា លោក Gavin Newsom បានអំពាវនាវឲ្យស្ថាប័ននីតិបញ្ញត្តិនៅក្នុងរដ្ឋដ៏ធំជាប់មហាសមុទ្រប៉ាស៊ីហ្វិកនេះ អនុម័តកញ្ចប់ជំនួយបន្ថែមទៀតដែលមានទំហំទឹកប្រាក់ ២,៥ពាន់លានដុល្លារ ស្របពេលដែលអ្នកជំនាញបានព្យាករថា ភ្លើងឆេះព្រៃអាចជាគ្រោះមហន្តរាយដ៏ធំបំផុតក្នុងប្រវត្តិសាស្ត្រសហរដ្ឋអាមេរិក។
រដ្ឋកាលីហ្វ័រញ៉ាបានដាក់ពង្រាយក្រុមពន្លត់អគ្គីភ័យប្រមាណ១៥៣០០នាក់ ដោយបន្ថែមការដាក់ពង្រាយក្រុមអ្នកពន្លត់អគ្គីភ័យ៣០០ទៀតនៅថ្ងៃអង្គារ។
មនុស្សយ៉ាងហោចណាស់២៤នាក់បានស្លាប់ក្នុងហេតុការណ៍ភ្លើងឆេះព្រៃនេះ ខណៈពេលនេះសាច់ញាតិបានកំណត់អត្តសញ្ញាណសាកសពនៃអ្នកស្លាប់ នៅពេលពួកគេត្រូវឡប់ទៅកាន់ទីតាំងផ្ទះ បន្ទាប់ពីអាជ្ញាធរមូលដ្ឋានជូនដំណឹង។
ភ្លើងឆេះព្រៃនេះបានបំផ្លាញហេដ្ឋារចនាសម្ព័ន្ធជាង១២០០០កន្លែង ទៅជាគំនរផេះផង់ក្នុងរយៈពេលដ៏ខ្លីបំផុត។
យោងការប៉ានស្មាន់បឋមនៃការខូចខាត និងការបាត់បង់ផ្នែកសេដ្ឋកិច្ច ច្រើនជាង២៥០ពាន់លានដុល្លារ។ យោងតាម AccuWeather ដែលជាក្រុមហ៊ុនប្រព័ន្ធផ្សព្វផ្សាយក្នុងវិស័យឯកជនអាមេរិក ដែលផ្តល់សេវាព្យាករណ៍អាកាសធាតុពាណណិច្ចកម្ម។
ដោយអាកាសធាតុក្តៅត្រូវបានរំពឹងបន្តទៀតនៅក្នុងតំបន់នៃទីក្រុង Los Angeles (LA) រហូតដល់ថ្ងៃពុធ មន្ត្រីពន្លត់អគ្គីភ័យនៅក្នុងរដ្ឋ និងទីក្រុង បានដាក់ពង្រាយក្រុមពន្លត់អគ្គីភ័យនៅទូទាំង LA។
អាជ្ញាធរនៅ LA បានចាប់មនុស្ស៣នាក់ ពាក់ពាន់ការប្រើប្រាស់ដ្រូន២គ្រឿងដែលប៉ះពាល់ដល់ប្រតិបត្តិការប្រយុទ្ធអគ្គិភ័យ ខណៈពេលដែលការិយាល័យមេធាវីតំបន់ LA ក៏បានចោទប្រកាន់មនុស្ស១០នាក់ទាក់ទងបទល្មើសប្រព្រឹត្តក្នុងអំឡុងពេលភ្លើងឆេះព្រៃ ដោយ៩នាក់ពាក់ព័ន្ធការលួច។
ប្រជាជនរស់នៅតំបន់ Altadena បានដាក់ពាក្យបណ្តឹងចំនួន៣ ប្រឆាំងអាជ្ញាធរនៅតំបន់ Edison ដោយចោទប្រកាន់ជុំវិញការប្រើប្រាស់សម្ភារៈឆ្លើយតបចំពោះភ្លើងឆេះនៅ Eaton ដោយពាក្យបណ្តឹងនោះលើកឡើងនូវភស្តុតាងដែលថា ភ្លើងចាប់ផ្តើមឆេះក្រោមបង្គោលខ្សែភ្លើង និងយោងទៅលើតួនាទីអង្គភាពក្នុងហេតុការណ៍ភ្លើងឆេះព្រៃដទៃទៀត។ ទោះបីយ៉ាងណា ក៏មិនមានមូលហេតុផ្លូវការត្រូវបានបញ្ជាកសម្រាប់ភ្លើងឆេះព្រៃត្រូវបានបញ្ជាក់នៅឡើយ។
ប្រធានសភាអាមេរិក លោក Mike Johnson បាននិយាយថា គាត់ជឿថា នឹងមានលក្ខខណ្ឌស្តីពីជំនួយគ្រោះមហន្តរាយទៅដល់រដ្ឋកាលីហ្វ័រញ៉ា ដោយលើកឡើងថា «ថ្នាក់ដឹកនាំរដ្ឋ និងមូលដ្ឋានព្រងើយកណ្តើយតួនាទីរបស់ពួកគេ។
ប៉ុន្មានម៉ោងក្រោយការលើកឡើងរបស់ប្រធានរដ្ឋសភា ប្រធានាធិបតីដេលផុតអាណត្តិនៅសប្តាហ៍ក្រោយ បាននិយាយនៅក្នុងសន្និសីទសារព័ត៌មានថា «សភាត្រូវការបង្កើនល្បឿន និងអនុម័តមូលនិធី។
ទន្ទឹមនឹងនេះ លោកប្រធានាធិបតីជាប់ឆ្នោត លោក ដូណាល់ ត្រាំ (Donald Trump) បានប្រាប់សារព័ត៌មានអភិរក្សនិយម NewsMax ថាគាត់កំពុងសម្លឹងមើលការខូចខាតជាមួយនឹងទស្សនវិស័យដែលគាត់បានអភិវឌ្ឍជាអ្នកអភិវឌ្ឍន៍អចលនទ្រព្យ។
រហូតដល់ពេលនេះ ភ្លើងឆេះព្រៃនៅតែបន្តចំនួន៣តំបន់ផ្សេងៗគ្នា នៅ Los Angeles រួមមានៈ ភ្លើងឆេះព្រៃនៅតំបន់ Polisades មានទំហំ២៣៧១៣អា និងគ្រប់គ្រងបានត្រឹមតែ១៤ភាគរយប៉ុណ្ណោះ។ ភ្លើងឆេះព្រៃនៅ Eaton មានទំហំ ១៤១១៤ អា និងគ្រប់គ្រងបាន៣៣ភាគរយ និង ភ្លើងឆេះព្រៃនៅ Hurst មានទំហំ៧៩៩អា និងគ្រប់គ្រងបាន៩៧ភាគរយ។

ដោយ រ៉ាន់ រើយ

អគារពាណិជ្ជកម្មឆេះនៅPacific Palisades។ REUTERS

ទិដ្ឋភាពភ្នំឆេះ នៅតំបន់ Palisades។ REUTERS

The post ទិន្នន័យសំខាន់ៗក្នុងហេតុការណ៍ភ្លើងឆេះព្រៃនៅ LA រយៈពេល១សប្តាហ៍ដល់ថ្ងៃអង្គារនេះ appeared first on Kampuchea Thmey Daily.

ភ្លើង​ឆេះ​ព្រៃ​ Archives - Kampuchea Thmey Daily

​អាជ្ញាធរ​ព្រមានឲ្យ​ឈប់តស៊ូ​ពន្លត់​ ខណៈ​ភ្លើង​ឆេះ​ព្រៃ​រីករាល​ដាល​​ដល់​សហគមន៍​​ច្រើន​នៅអូស្រ្តាលី​

ទប់ស្កាត់ភ្លើងឆេះក្នុងរដូវប្រាំង អាជ្ញាធរខេត្តកណ្ដាល ហាមពលរដ្ឋដុតសំរាមនៅតាមទីវាល

ក្រោយភ្លើង​ឆេះ​ដ៏សាហាវ​បំផុត​ រដ្ឋកាលីហ្វ័រញ៉ា​ នឹង​ជួបព្យុះភ្លៀង​នាំ​សារធាតុ​​ពុល​ម្តង​​

ឆេះភ្នំនៅថៃ បង្កការភ្ញាក់ផ្អើលនិងភ័យរន្ធត់

ភូមិគ្រឹះនៅ LA តម្លៃជិត ៩លានដុល្លារ ឈរយ៉ាងរឹងមាំ ទោះជាភ្លើងឆេះជុំវិញសល់តែផេះក្ដី

ទិន្នន័យសំខាន់ៗ​​ក្នុងហេតុការណ៍​ភ្លើង​ឆេះ​ព្រៃ​​នៅ LA រយៈពេល​១ស​ប្តាហ៍​ដល់​ថ្ងៃ​​អង្គារ​នេះ​​

ភ្លើងឆេះព្រៃ Archives - Kampuchea Thmey Daily

អាជ្ញាធរព្រមានឲ្យឈប់តស៊ូពន្លត់ ខណៈភ្លើងឆេះព្រៃរីករាលដាលដល់សហគមន៍ច្រើននៅអូស្រ្តាលី

ក្រោយភ្លើងឆេះដ៏សាហាវបំផុត រដ្ឋកាលីហ្វ័រញ៉ា នឹងជួបព្យុះភ្លៀងនាំសារធាតុពុលម្តង

ទិន្នន័យសំខាន់ៗក្នុងហេតុការណ៍ភ្លើងឆេះព្រៃនៅ LA រយៈពេល១សប្តាហ៍ដល់ថ្ងៃអង្គារនេះ