មជ្ឈមណ្ឌលជាតិផ្ដល់ឈាម Archives - Kampuchea Thmey Daily

របាយការណ៍៖ អំណោយឈាមសប្បុរសជនស្ម័គ្រចិត្តបានតែ២២%នៃតម្រូវការប៉ុណ្ណោះ

hun sirivadh — Wed, 31 Dec 2025 09:31:42 +0000

របាយការណ៍របស់មជ្ឈមណ្ឌលជាតិផ្ដល់ឈាមឱ្យដឹងថាតម្រូវការឈាមប្រចាំថ្ងៃក្នុង១ថ្ងៃត្រូវការប្រមាណ៤០០ប្លោក ខណៈឈាមដែលទទួលបានពីសប្បុរសជនស្ម័គ្រចិត្តបានតែ២២,១%នៃតម្រូវការប៉ុណ្ណោះ ដោយជំរុញធ្វើយ៉ាងណាឱ្យបង្កើតនូវទម្លាប់ និងបណ្ដុះវប្បធម៌បរិច្ចាគឈាមដោយស្ម័គ្រចិត្តបន្ថែមទៀតក្នុងប្រទេសកម្ពុជា។

ថ្លែងក្នុងពិធីបរិច្ចាគឈាមដោយស្ម័គ្រចិត្តជូនមជ្ឈមណ្ឌលជាតិផ្តល់ឈាមនៅវិមានរដ្ឋសភាថ្ងៃទី៣០ ខែធ្នូ ប្រធានមជ្ឈមណ្ឌលជាតិផ្ដល់ឈាម លោកវេជ្ជបណ្ឌិត សុខ ប៉ូ បានឱ្យដឹងឈាមដែលត្រូវផ្គត់ផ្គង់នៅតាមមន្ទីរពេទ្យជាង៧០%គឺបានមកពីការផ្ដល់ឈាមជំនួស ដោយលោកជំរុញយ៉ាងណាឱ្យបង្កើតនូវទម្លាប់ និងវប្បធម៌នៃការបរិច្ចាគឈាមស្ម័គ្រចិត្តឱ្យបានច្រើនដើម្បីធានាការផ្ដត់ផ្គង់ឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាមនៅតាមមន្ទីរពេទ្យ។

យោងតាមទិន្នន័យអង្គការសុខភាពពិភពលោកការបរិច្ចាគឈាមដោយស្ម័គ្រចិត្តត្រូវមាន ៩០%នៃតម្រូវការទើបជាគោលដៅល្អស្របតាមនិយាមការអន្តរជាតិ។

កាលពីថ្ងៃទី៣០ ខែធ្នូ រដ្ឋសភាជាតិបានរៀបចំកម្មវិធីបរិច្ចាគឈាមជួយសង្គ្រោះជីវិតវីរកងទ័ពនិងពលរដ្ឋភៀសសឹកដែលមានការចូលរួមពីសមាជិក និងមន្ត្រីនៃអគ្គលេខាធិការដ្ឋានរដ្ឋសភាយ៉ាងច្រើន។

ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន (គណៈកម្មការទី៥)លោក សួស យ៉ារ៉ា បានថ្លែងថាការបរិច្ចាគឈាមថ្ងៃនេះគឺជាការធានាដល់ការផ្គត់ផ្គង់ឈាមរៀងរាល់ថ្ងៃដល់មន្ទីរពេទ្យទូទាំងប្រទេស ព្រមទាំងបង្ហាញនូវសាមគ្គីភាពជាមួយកងទ័ពកម្ពុជាផងដែរ។ លោកថាការបរិច្ចាគឈាមរបស់មន្ត្រីសភានេះនឹងបន្តធ្វើបន្ថែមទៀត ដោយមានកិច្ចសហការជាមួយមជ្ឈមណ្ឌលជាតិផ្ដល់ឈាមទៅតាមបណ្ដារាជធានី និងខេត្តនានានៅកម្ពុជាផងដែរ។

ក្នុងឆ្នាំ ២០២៥ នេះមជ្ឈមណ្ឌលជាតិផ្ដល់ឈាមគ្រោងនឹងប្រមូលឈាមស្ម័គ្រចិត្តឱ្យបាន ១ សែន ៨ ម៉ឺនប្លោក បង្កើន ២០% បើធៀបទៅនឹងឆ្នាំ ២០២៤ ប្រមូលបានតែ ១ សែន ៧ ម៉ឺនប្លោក៕

អត្ថបទដោយ ហ៊ុន សិរីវឌ្ឍន៍

The post របាយការណ៍៖ អំណោយឈាមសប្បុរសជនស្ម័គ្រចិត្តបានតែ២២%នៃតម្រូវការប៉ុណ្ណោះ appeared first on Kampuchea Thmey Daily.

ជាង ១ ខែ មជ្ឈមណ្ឌលជាតិផ្តល់ឈាម ទទួលបានអំណោយឈាម ៧ ពាន់ប្លោក កើនឡើងជិត ៤០%

អ៊ិន ពិសី — Tue, 12 Aug 2025 08:02:29 +0000

នៅក្នុងរយៈពេលជាង ១ ខែនេះ មជ្ឈមណ្ឌលជាតិផ្តល់ឈាម ទទួលបានអំណោយឈាមប្រមាណ ៧ ពាន់ប្លោក កើនឡើងជិត ៤០% ដែលធ្វើឱ្យមជ្ឈមណ្ឌលមានស្តុកឈាមគ្រប់គ្រាន់ក្នុងការជួយសង្គ្រោះដល់ជនរងគ្រោះ។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅរសៀលថ្ងៃទី ១២ សីហា នេះថា ចាប់តាំងពីខែកក្កដា រហូតដល់ដើមខែសីហា ឆ្នាំ ២០២៥ នេះ មជ្ឈមណ្ឌលជាតិ បានទទួលអំណោយឈាមប្រមាណពី ៦ ទៅ ៧ ពាន់ប្លោក មានកំណើនជិត ៤០% ដែលបានជួយសម្រួលក្នុងការផ្តល់ឈាមបានលឿន ដើម្បីជួយសង្គ្រោះដល់ជនរងគ្រោះដែលត្រូវការឈាមជាចាំបាច់ ពិសេសចូលរួមកាត់បន្ថយការបូមឈាមជំនួសពីសំណាក់បងប្អូនសាច់ញាតិរបស់អ្នកជំងឺបានមួយកម្រិត ខណៈមានអ្នករង់ចាំបរិច្ចាគឈាមជិត ២ ម៉ឺននាក់ទៀត មានឈ្មោះនៅក្នុងបញ្ជីបរិច្ចាគឈាមរួចជាស្រេច ពេលមានតម្រូវការបន្ទាន់ យើងនឹងអញ្ជើញពួកគាត់ចូលរួមបរិច្ចាគឈាមបានគ្រប់ពេលវេលា។

លោកវេជ្ជបណ្ឌិត បានបន្តថា ការកើនឡើង នៃចំនួនអ្នកបរិច្ចាគឈាមនេះ បន្ទាប់ពីប្រទេសកម្ពុជារងការឈ្លានពានពីសំណាក់ប្រទេសថៃ ធ្វើឱ្យប្រជាពលរដ្ឋខ្មែរក្មេងចាស់ប្រុសស្រី រួមទាំងព្រះសង្ឃស្ម័គ្រចិត្តចូលរួមបរិច្ចាគឈាមយ៉ាងផុសផុល ដើម្បីត្រៀមនៅពេលមានតម្រូវការឈាមជាបន្ទាន់ ពិសេសបង្ហាញការគាំទ្រដល់កងទ័ពជួរមុខកម្ពុជាដែលកំពុងប្រយុទ្ធការពារទឹកដីកម្ពុជា។

លោកវេជ្ជបណ្ឌិត សុខ ប៉ូ បានបន្ថែមថា «ទោះបីជាបច្ចុប្បន្នកំណើនអ្នកចូលរួមបរិច្ចាគឈាមកើនក៏ដោយ តែខ្ញុំមិនចង់ឱ្យកើនខ្ពស់ពេកទេ ដោយសារខ្លាចបងប្អូនយើងភ្លេចខ្លួនចូលរួមបរិច្ចាគឈាមបានតែរយៈពេលខ្លី ទៅថ្ងៃក្រោយយើងនៅតែខ្វះឈាមដដែល។ ដូចនេះខ្ញុំអំពាវនាវដល់បងប្អូនប្រជាពលរដ្ឋបន្តចូលរួមបរិច្ចាគឈាមឱ្យបានទៀងទាត់ ដើម្បីឱ្យមជ្ឈមណ្ឌលជាតិអាចមានស្តុកឈាមគ្រប់គ្រាន់ក្នុងការជួយសង្គ្រោះដល់អ្នកជំងឺដែលត្រូវការឈាម»។

លោកវេជ្ជបណ្ឌិត បានបញ្ជាក់ថា មណ្ឌលនៅតែត្រូវការឈាមពីសាច់ញាតិ ឬបងប្អូនអ្នកជំងឺមកផ្តល់ឈាមជំនួសដដែល ព្រោះថាបច្ចុប្បន្នយើងបានកាត់បន្ថយការផ្តល់ឈាមជំនួសបាន ៥០% ពោលគឺពេលអ្នកជំងឺត្រូវការឈាមយើងផ្តល់ជូនទៅតាមស្ថានភាពជាក់ស្តែង តែបើអាចមានអ្នកបូមឈាមជំនួសបាន យើងអនុញ្ញាត ដោយសារយើងនៅមិនទាន់ហ៊ានលែងទាំងស្រុងនោះទេ។

លោកវេជ្ជបណ្ឌិត បានបន្ថែមទៀតថា បច្ចុប្បន្ន ក្នុង ១ ថ្ងៃ យើងមានតម្រូវការឈាមនៅទូទាំងប្រទេសកើនឡើងដល់ ៤០០ ប្លោក ក្នុងនោះ នៅរាជធានីភ្នំពេញ មានតម្រូវការឈាមដល់ ៣៥០ ប្លោក និងតាមខេត្ត ៥០ ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺក្នុង ១ នាទី ត្រូវការឈាម ១ ប្លោក ដើម្បីយកទៅប្រើប្រាស់ក្នុងការជួយសង្គ្រោះអាយុជីវិតអ្នកជំងឺពាក់ព័ន្ធទៅនឹងគ្រោះចរាចរណ៍ ស្ត្រីឆ្លងទន្លេ ការវះកាត់ធំៗ ដូចជា វះកាត់ជំងឺបេះដូង ជំងឺមិនឆ្លងរួមមាន ជំងឺមហារីក និងជំងឺលាងឈាមជាដើម ខណៈសម្រាប់ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក មានការកើនឡើង ២០% បើធៀបទៅនឹងឆ្នាំ ២០២៤ ប្រមូលបាន ១ សែន ៧ ម៉ឺនប្លោក៕

អត្ថបទ ៖ សំអឿន

The post ជាង ១ ខែ មជ្ឈមណ្ឌលជាតិផ្តល់ឈាម ទទួលបានអំណោយឈាម ៧ ពាន់ប្លោក កើនឡើងជិត ៤០% appeared first on Kampuchea Thmey Daily.

៥ ខែ ឆ្នាំនេះ មជ្ឈមណ្ឌលជាតិផ្តល់ឈាម ទទួលបានអំណោយឈាមជាង ៥៥ ០០០ ប្លោក កើនជាងឆ្នាំមុន

អ៊ិន ពិសី — Mon, 09 Jun 2025 02:50:41 +0000

នៅក្នុងរយៈពេល ៥ ខែ ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម បានទទួលអំណោយឈាមប្រមាណជាង ៥៥ ០០០ ប្លោក មានការកើនឡើង បើធៀបទៅនឹងរយៈពេល ៥ ខែដូចគ្នា កាលពីឆ្នាំ ២០២៤ កន្លងទៅ។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅព្រឹកថ្ងៃទី ៩ មិថុនា នេះថា រយៈពេល ៥ ខែ ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម ទទួលបានអំណោយឈាមចំនួន ៥៥ ៧៣៤ ប្លោក ក្នុងនោះ អ្នកបរិច្ចាគឈាមដោយស្ម័គ្រចិត្តមានចំនួន ១៤ ៨៧០ ប្លោក និងអ្នកផ្តល់ឈាមជំនួសចំនួន ៤០ ៨៦២ ប្លោក។

លោកវេជ្ជបណ្ឌិត បានបន្តទៀតថា ចំនួននេះ បើធៀបទៅនឹងរយៈពេល ៥ ខែ ឆ្នាំ ២០២៤ កន្លងទៅ ឃើញថា មានការកើនឡើង ដោយ ៥ ខែ ឆ្នាំ ២០២៤ មជ្ឈមណ្ឌលជាតិផ្តល់ឈាម មានចំនួន៤៧ ៩២៦ ប្លោក ក្នុងនោះ អ្នកបរិច្ចាគឈាមដោយស្ម័គ្រចិត្តមានចំនួន ១០ ១៧១ ប្លោក និងអ្នកផ្តល់ឈាមជំនួសចំនួន ៣៧ ៧៥៥ ប្លោក។

លោកវេជ្ជបណ្ឌិត បន្តទៀតថា ការទទួលបានអំណោយឈាមច្រើននេះដោយសារមានការចូលរួមការបរិច្ចាគឈាមពីសំណាក់យុវជនយ៉ាងផុលផុស ពិសេសមានការចូលរួមពីសហភាពសហព័ន្ធយុវជនកម្ពុជាគ្រប់វិស័យ យុវជនកាកបាទក្រហម យុវជនកាយរឹទ្ធិ ក្រសួងស្ថាប័នពាក់ព័ន្ធ វិស័យឯកជន និងសប្បុរសជននានា។

លោកវេជ្ជបណ្ឌិត បានបន្ថែមថា សន្ទុះ នៃការចូលរួមបរិច្ចាគឈាមកើនឡើងនេះបានធ្វើឱ្យមជ្ឈមណ្ឌលជាតិផ្តល់ឈាមអាចមានលទ្ធភាពស្តុកឈាមបានគ្រប់គ្រាន់ ជួយកាត់បន្ថយការបរិច្ចាគឈាមជំនួសសាច់ញាតិ និងបងប្អូនរបស់អ្នកជំងឺបានមួយកម្រិត ខណៈបច្ចុប្បន្ន ក្នុង ១ ថ្ងៃ មានតម្រូវការឈាមនៅទូទាំងប្រទេសបានកើនឡើងដល់ ៤០០ ប្លោក ក្នុងនោះ នៅរាជធានីភ្នំពេញមានតម្រូវការឈាមដល់ ៣៥០ ប្លោក និងតាមខេត្ត ៥០ ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺក្នុង ១ នាទី ត្រូវការឈាម ១ ប្លោក។

យ៉ាងណាក៏ដោយ លោកវេជ្ជបណ្ឌិត សុខ ប៉ូ បានបញ្ជាក់ថា សម្រាប់ឆ្នាំ ២០២៥ នេះ មជ្ឈមណ្ឌលជាតិផ្តល់ឈាម គ្រោងនឹងប្រមូលឈាមឱ្យបាន ១ សែន ៨ ម៉ឺនប្លោក ដើម្បីជួយសង្គ្រោះអាយុជីវិតមនុស្សមានការកើនឡើង ២០% បើធៀបទៅនឹងឆ្នាំ ២០២៤ ប្រមូលបាន ១ សែន ៧ ម៉ឺនប្លោក ហើយឈាមទាំងនោះយកទៅប្រើប្រាស់ក្នុងការជួយសង្គ្រោះអាយុជីវិតអ្នកជំងឺពាក់ព័ន្ធទៅនឹងគ្រោះថ្នាក់ចរាចរណ៍ ស្ត្រីឆ្លងទន្លេ ការវះកាត់ធំៗ ដូចជា វះកាត់ជំងឺបេះដូង ជំងឺមិនឆ្លងរួមមាន ជំងឺមហារីក និងជំងឺលាងឈាមជាដើម៕

អត្ថបទ ៖ សំអឿន

The post ៥ ខែ ឆ្នាំនេះ មជ្ឈមណ្ឌលជាតិផ្តល់ឈាម ទទួលបានអំណោយឈាមជាង ៥៥ ០០០ ប្លោក កើនជាងឆ្នាំមុន appeared first on Kampuchea Thmey Daily.

មជ្ឈមណ្ឌលជាតិផ្ដល់ឈាម ត្រៀមឈាម ៥ ពាន់ប្លោក សម្រាប់ជួយសង្គ្រោះជនរងគ្រោះ ក្នុងឱកាសបុណ្យចូលឆ្នាំថ្មី

អ៊ិន ពិសី — Thu, 10 Apr 2025 04:16:59 +0000

នៅក្នុងពិធីបុណ្យចូលឆ្នាំថ្មី ប្រពៃណីជាតិ ដែលនឹងឈានចូលមកដល់នាពេលខាងមុខនេះ មជ្ឈមណ្ឌលជាតិផ្តល់ឈាម បានត្រៀមឈាមប្រមាណ ៥ ពាន់ប្លោក សម្រាប់ជួយសង្គ្រោះដល់ជនរងគ្រោះជួបបញ្ហាផ្សេងៗ ពិសេសអ្នកជំងឺដែលត្រូវការឈាមជាចាំបាច់។

លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍នៅព្រឹកថ្ងៃទី ១០ មេសា នេះថា «ការត្រៀមឈាម ៥ ពាន់ប្លោកនេះ ដោយសារតែឆ្នាំនេះការរៀបចំសង្ក្រាន្តអបអរចូលឆ្នាំថ្មីមានការផុសផុលខ្លាំងជាងរាល់ឆ្នាំ ទើបយើងត្រៀមច្រើនទៅតាមហ្នឹងដែរ ខណៈឆ្នាំមុនត្រៀមតែ ៤០០ ទៅ ៥០០ ប្លោក ប៉ុណ្ណោះ។ ឈាមទាំងនេះគឺយើងមិនខ្វះទេ ដោយសារតែមានការចូលរួមបរិច្ចាគឈាមយ៉ាងសកម្មពីសំណាក់ប្រជាពលរដ្ឋមានការកើនឡើងខ្ពស់ ពិសេសក្រុមយុវជនដែលជាក្រុមស្នូលយ៉ាងសំខាន់ក្នុងការធ្វើឱ្យចំនួនឈាមមានការកើនឡើងជាបន្តបន្ទាប់»។

លោកវេជ្ជបណ្ឌិត បានបន្តថា ជាក់ស្តែងឆ្នាំ ២០២៤ យើងប្រមូលអំណោយឈាមបានប្រមាណ ១ សែន ៧ ម៉ឺនប្លោក ខណៈឆ្នាំ ២០២៥ នេះ យើងដាក់ផែនការប្រមូលឱ្យបាន ១ សែន ៨ ម៉ឺនប្លោក ដើម្បីជួយសង្គ្រោះអាយុជីវិតមនុស្សមានការកើនឡើង ២០%។ ឈាមទាំងនោះយកទៅប្រើប្រាស់ក្នុងការជួយសង្គ្រោះអាយុជីវិតអ្នកជំងឺពាក់ព័ន្ធទៅនឹងគ្រោះចរាចរណ៍ ស្ត្រីឆ្លងទន្លេ ការវះកាត់ធំៗ ដូចជា វះកាត់ជំងឺបេះដូង ជំងឺមិនឆ្លងរួមមានជំងឺមហារីក និងជំងឺលាងឈាមជាដើម។

លោកវេជ្ជបណ្ឌិត បានបន្ថែមថា «សន្ទុះ នៃការចូលរួមបរិច្ចាគឈាមកើនឡើងនេះបានធ្វើឱ្យមជ្ឈមណ្ឌលជាតិផ្តល់ឈាមអាចមានលទ្ធភាពស្តុកឈាមបានគ្រប់គ្រាន់ ជួយកាត់បន្ថយការបរិច្ចាគឈាមជំនួសសាច់ញាតិ និងបងប្អូនរបស់អ្នកជំងឺបានមួយកម្រិត ខណៈបច្ចុប្បន្នក្នុង ១ ថ្ងៃ យើងមានតម្រូវការឈាមនៅទូទាំងប្រទេសបានកើនឡើងដល់ ៤០០ ប្លោក ក្នុងនោះ នៅរាជធានីភ្នំពេញមានតម្រូវការឈាមដល់ ៣៥០ ប្លោក និងតាមខេត្ត ៥០ ប្លោក ដោយសារនៅតាមខេត្តការវះកាត់មានតិចជាងនៅរាជធានីភ្នំពេញ ពោលគឺក្នុង ១ នាទី ត្រូវការឈាម ១ ប្លោក»។

លោកវេជ្ជបណ្ឌិត សូមកោតសរសើរយុវជនកម្ពុជាដែលបានចូលរួមបរិច្ចាគឈាមយ៉ាងផុលផុស និងបានបំបែកឯតទគ្គកម្មការបរិច្ចាគឈាមដែលមានចំនួនច្រើនមិនធ្លាប់មានពីមុនមកដែលធ្វើឱ្យកំណើនការបរិច្ចាគឈាមដោយស្ម័គ្រចិត្តកើនឡើងខ្ពស់ និងសូមយុវជនបន្តចូលរួមការបរិច្ចាគឈាមនេះឱ្យបានផុលផុសបន្ថែមទៀត ដើម្បីឱ្យមជ្ឈមណ្ឌលជាតិមានស្តុកឈាមគ្រប់គ្រាន់សម្រាប់ជួយសង្គ្រោះអាយុជីវិតអ្នកជំងឺដែលត្រូវការឈាមជាចាំបាច់។

គួរបញ្ជាក់ថា ពិធីបុណ្យចូលឆ្នាំថ្មី ប្រពៃណីជាតិ ឆ្នាំនេះ នឹងប្រព្រឹត្តិទៅរយៈពេល ៣ ថ្ងៃ គឺ ចាប់ពីថ្ងៃទី ១៤-១៥ និង ១៦ ខែមេសា ឆ្នាំ ២០២៥៕

អត្ថបទ ៖ សំអឿន

The post មជ្ឈមណ្ឌលជាតិផ្ដល់ឈាម ត្រៀមឈាម ៥ ពាន់ប្លោក សម្រាប់ជួយសង្គ្រោះជនរងគ្រោះ ក្នុងឱកាសបុណ្យចូលឆ្នាំថ្មី appeared first on Kampuchea Thmey Daily.

មជ្ឈមណ្ឌលជាតិផ្ដល់ឈាម អំពាវនាវវិស័យឯកជន និងសាធារណជន ចូលរួមបរិច្ចាគឈាមបន្ថែមទៀត ជួយសង្គ្រោះជីវិតអ្នកជំងឺ

អ៊ិន ពិសី — Fri, 08 Nov 2024 08:06:31 +0000

មន្ត្រីជាន់ខ្ពស់ នៃមជ្ឈមណ្ឌលជាតិផ្ដល់ឈាម បានធ្វើការអំពាវនាវដល់វិស័យឯកជន និងសាធារណជន ចូលរួមបរិច្ចាគឈាមឱ្យបានច្រើនបន្ថែមទៀត ដើម្បីឱ្យមជ្ឈមណ្ឌលអាចមានស្តុកឈាមគ្រប់គ្រាន់ជួយសង្គ្រោះជីវិតជនរងគ្រោះ ឬ អ្នកជំងឺដែលត្រូវការឈាមជាបន្ទាន់ ដោយសារបច្ចុប្បន្ននេះការផ្តល់ឈាមដោយស្ម័គ្រចិត្ត និងមិនគិតកម្រៃមានត្រឹមតែ ២០ ភាគរយប៉ុណ្ណោះ ខណៈការផ្តល់ឈាមដោយក្រុមគ្រួសារ និងសាច់ញាតិបងប្អូនរបស់អ្នកជំងឺមានរហូតដល់ ៨០ ភាគរយឯណោះ។

ថ្លែងក្នុងកម្មវិធីបរិច្ចាគឈាមដោយស្ម័គ្រចិត្តនៅព្រឹកថ្ងៃទី ៨ វិច្ឆិកា នេះ លោកវេជ្ជបណ្ឌិត លី សុវិទ្យ អនុប្រធានមជ្ឈមណ្ឌលជាតិផ្តល់ឈាម មានប្រសាសន៍ថា ការចូលរួមបរិច្ចាគឈាមមិនត្រឹមតែជាសកម្មភាពមនុស្សធម៌ជួយសង្គ្រោះអាយុជីវិតមនុស្សប៉ុណ្ណោះទេ ថែមទាំងអាចឱ្យយើងដឹងពីសុខភាព និងជំងឺរបស់ខ្លួនដូចជា ជំងឺថ្លើមប្រភេទ បេ, សេ, ស្វាយ និងជំងឺអេដស៍ និងជួយកាត់បន្ថយជំងឺមហារីក ឬ កាត់បន្ថយការលើសជាតិដែកធ្វើឱ្យប៉ះពាល់ដល់ថ្លើម និងលំពែង ព្រមទាំងជួយសម្រួលសុខភាពបេះដូងផងដែរ។

លោកវេជ្ជបណ្ឌិត បានបន្តថា «ឈាមទោះបីជាយើងមិនផ្តល់យើងកំពុងធ្វើចលនានិយាយស្តីដើរឈរអង្គុយ ក៏វាគង់តែស្លាប់ ហើយក៏គង់តែកើតឡើងវិញដែរ។ អីចឹងបើទោះបីជាយើងមិនផ្តល់ ក៏ឈាមស្លាប់ចោលអាសាបង់ដែរ»។

លោកវេជ្ជបណ្ឌិត បានបន្តថា ពេលផ្តល់ឈាមមានចំណុះត្រឹមតែ ៣៥០ មីលីលីត្រ ហើយបន្ទាប់ពីផ្តល់ឈាមហើយភ្លាម ឈាមនឹងកកើតឡើងវិញភ្លាមដែរ តែគ្រាន់តែថាឈាមនៅខ្ចី។ ដូចនេះបានជាគេតម្រូវឱ្យបុរសអាចផ្តល់ឈាមក្នុងរយៈពេល ៣ ខែម្តង។ ចំណែកស្ត្រីវិញ អាចផ្តល់ ៤ ខែម្តង ដោយសារស្ត្រីមករដូវជារៀងរាល់ខែ។

លោកវេជ្ជបណ្ឌិត ជំរុញឱ្យយុវជន ស្ថាប័នរដ្ឋ និងឯកជន សូមចូលរួមបរិច្ចាគឈាមឱ្យបានទៀងទាត់ដោយស្ម័គ្រចិត្ត ដើម្បីជួយសង្គ្រោះដល់អ្នកជំងឺ ពិសេសអ្នកជំងឺដែលត្រូវការឈាមជាចាំបាច់ដូចជា ស្ត្រីឆ្លងទន្លេ អ្នកជំងឺមហារីក អ្នកជំងឺទឹកនោមផ្អែមរ៉ាំរ៉ៃ ត្រូវការលាងឈាមជាដើម។

បើតាមលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ធ្លាប់បានអះអាងថា បច្ចុប្បន្នក្នុង ១ ថ្ងៃ កម្ពុជា ត្រូវការឈាមសម្រាប់ជួយសង្គ្រោះអាយុជីវិតដល់អ្នកជំងឺ និងជនរងគ្រោះប្រមាណ ៤០០ ប្លោក ក្នុងនោះនៅរាជធានីភ្នំពេញ ត្រូវការប្រមាណ ៦៥% ស្មើនឹង ២៦០ ប្លោក និងតាមបណ្ដាខេត្ត ៣៥% ត្រូវការប្រមាណ ១៤០ ប្លោក។

លោករដ្ឋមន្ត្រី បានណែនាំដល់មជ្ឈមណ្ឌលជាតិផ្តល់ឈាម ត្រូវរៀបចំបែងចែកក្រុមការងារផ្តល់ឈាម ដើម្បីចុះទៅប្រមូលឈាមតាមគោលដៅនីមួយៗ នៅក្នុងរាជធានីភ្នំពេញ ក៏ដូចជាតាមបណ្តាខេត្តនៅតាមសាកលវិទ្យាល័យ ស្ថាប័នរដ្ឋ និងវិស័យឯកជននានា សំដៅធ្វើយ៉ាងណាប្រមូលឈាមឱ្យបានច្រើន ដើម្បីជួយដល់ជនរងគ្រោះដែលកំពុងត្រូវការឈាមជាចាំបាច់ ពិសេសឱ្យប្រទេសកម្ពុជាទទួលបានឯករាជ្យ ដោយទទួលបានការផ្តល់ឈាមដោយស្ម័គ្រចិត្តច្រើនដូចបណ្តាប្រទេសជិតខាងមានរហូតដល់ទៅជាង ៩០% ធ្វើឱ្យគេអាចផ្គត់ផ្គង់ឈាមបានគ្រប់គ្រាន់ដោយមិនចាំបាច់ឱ្យក្រុមគ្រួសារ ឬ សាច់ញាតិ បរិច្ចាគឈាមជំនួសនោះទេ៕

អត្ថបទ ៖ សំអឿន

The post មជ្ឈមណ្ឌលជាតិផ្ដល់ឈាម អំពាវនាវវិស័យឯកជន និងសាធារណជន ចូលរួមបរិច្ចាគឈាមបន្ថែមទៀត ជួយសង្គ្រោះជីវិតអ្នកជំងឺ appeared first on Kampuchea Thmey Daily.

សារៈសំខាន់នៃកម្មវិធីបរិច្ចាគឈាមមនុស្សធម៌របស់មិត្តហ្វូន “ដំណក់ឈាមមួយលានបេះដូង”

Sorn Phanith — Mon, 30 Sep 2024 02:57:47 +0000

នៅព្រឹកថ្ងៃទី២៨ ខែកញ្ញា នៅទីក្រុងភ្នំពេញ ប្រទេសកម្ពុជា ក្រុមហ៊ុនមិត្តហ្វូន សហការជាមួយមជ្ឈមណ្ឌលជាតិផ្តល់ឈាម បានរៀបចំកម្មវិធីបរិច្ចាគឈាមមនុស្សធម៌ ឆ្នាំ២០២៤ ជាមួយនឹងសារ «ដំណក់ឈាមមួយដំណក់ មួយលានបេះដូង»។

ក្នុងព្រឹត្តិការណ៍នេះ បុគ្គលិក ដៃគូ និងអតិថិជនរបស់មិត្តហ្វូនរាប់រយនាក់បានចូលរួមបរិច្ចាគឈាម។ អ្នកស្ម័គ្រចិត្ដត្រូវបានបែងចែកទៅជាក្រុមដាច់ដោយឡែក និងបានកំណត់ពេលវេលាផ្សេងៗគ្នា ដើម្បីធានាថាដំណើរការបរិច្ចាគឈាមត្រូវបានរៀបចំយ៉ាងល្អ។ កន្លែងបរិច្ចាគត្រូវបានបែងចែកទៅជាផ្នែកជាច្រើន៖ តំបន់ផ្តល់តែស្ករ ដើម្បីបំពេញថាមពលដល់អ្នកបរិច្ចាគ កន្លែងពិនិត្យសុខភាពមុនពេលបរិច្ចាគឈាម តំបន់បរិច្ចាគឈាម និងផ្នែកត្រួតពិនិត្យសុខភាពក្រោយបរិច្ចាគ។

ថ្លែងនៅក្នុងសុន្ទរកថានៅក្នុងព្រឹត្តិការណ៍នេះ លោក ញ៉ុង ឌិនថន អគ្គនាយករងក្រុមហ៊ុនមិត្តហ្វូន បានសង្កត់ធ្ងន់ថា៖ ការបរិច្ចាគឈាមដោយស្ម័គ្រចិត្តគឺជាទង្វើដ៏ថ្លៃថ្នូរដែលឆ្លុះបញ្ចាំងពីការទទួលខុសត្រូវរបស់បុគ្គលម្នាក់ៗចំពោះសហគមន៍។ លោកបានលើកទឹកចិត្តដល់បុគ្គលិក មិត្តហ្វូន ដោយស្មារតីមនុស្សធម៌ខ្ពស់ បន្តចូលរួមបរិច្ចាគឈាមដោយស្ម័គ្រចិត្ដគ្រប់ពេលដែលអាចធ្វើទៅបាន ដោយរួមចំណែកដល់ការបម្រុងឈាមក្នុងគោលបំណងសង្គ្រោះបន្ទាន់ និងការព្យាបាល។ លោកក៏បានសម្តែងក្តីសង្ឃឹមថា កម្មវិធី “បរិច្ចាគឈាមមនុស្សធម៌” ក្រោមសារ “ដំណក់ឈាមមួយដំណក់ មួយលានបេះដូង” នឹងរីករាលដាលបន្ថែមទៀត។

ឈាមដែលបានបរិច្ចាគនឹងត្រូវរក្សាទុក និងប្រើប្រាស់ប្រកបដោយប្រសិទ្ធភាពដោយមជ្ឈមណ្ឌលជាតិផ្តល់ឈាម ដើម្បីជួយបំពេញតម្រូវការឈាមសម្រាប់ការថែទាំសង្គ្រោះបន្ទាន់ និងការព្យាបាលអ្នកជំងឺ។

ក្នុងប៉ុន្មានឆ្នាំថ្មីៗនេះ ទន្ទឹមនឹងសកម្មភាពអាជីវកម្មរបស់ខ្លួន មិត្តហ្វូនតែងតែជាអ្នកត្រួសត្រាយក្នុងការអនុវត្តគំនិតផ្តួចផ្តើមសង្គមសម្រាប់សហគមន៍។ គេរំពឹងថា នាពេលខាងមុខនេះ មិត្តហ្វូននឹងបន្តជំរុញចលនាបរិច្ចាគឈាមដោយស្ម័គ្រចិត្ត និងរៀបចំសកម្មភាពសប្បុរសធម៌ផ្សេងៗ ដើម្បីពង្រឹងសាមគ្គីភាព ការចែករំលែក និងការទទួលខុសត្រូវចំពោះសហគមន៍ និងសង្គមកម្ពុជា៕

The post សារៈសំខាន់នៃកម្មវិធីបរិច្ចាគឈាមមនុស្សធម៌របស់មិត្តហ្វូន “ដំណក់ឈាមមួយលានបេះដូង” appeared first on Kampuchea Thmey Daily.

មជ្ឈមណ្ឌលផ្តល់ឈាម នឹងជួបហានិភ័យ បើប្រមូលឈាមមិនបាន ៣ ពាន់ប្លោក ក្នុង ១ខែ

KC Virak — Mon, 27 May 2024 02:37:42 +0000

មន្ត្រីជាន់ខ្ពស់ នៃមជ្ឈមណ្ឌលជាតិផ្តល់ឈាម បានអះអាងថា មជ្ឈមណ្ឌលនឹងជួបហានិភ័យខ្វះឈាម ប្រសិនបើមិនអាចប្រមូលឈាមបានជិត ៣ពាន់ប្លោកក្នុង ១ខែទេនោះ។ វេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ នៅព្រឹកថ្ងៃទី២៧ ខែឧសភា នេះថា ជារៀងរាល់ខែ ធ្វើយ៉ាងណាយើងត្រូវចុះប្រមូលឈាមពីអ្នកស្ម័គ្រចិត្តឱ្យបានយ៉ាងហោចណាស់ជិត ៣ ពាន់ប្លោកដែរទើបយើងអាចទប់ទល់បាន ហើយប្រសិនបើយើងមិនមានយុទ្ធសាស្ត្រកៀរគរឱ្យបានទៀងទាត់ និងហ្មត់ចត់ទេ គឺយើងមិនអាចផ្គត់ផ្គង់បានទេ យើងនឹងជួបហានិភ័យ នៃការខ្វះខាតឈាមហើយ។

លោកវេជ្ជបណ្ឌិតបានបន្តថា ក្នុងការទទួលអំណោយឈាមឱ្យបានច្រើននេះ គឺមានផែនការច្រើនដូចជា បង្កើនការផ្សព្វផ្សាយដល់ប្រជាពលរដ្ឋឱ្យមានការយល់ដឹងពីសារសំខាន់ នៃការបរិច្ចាគឈាមដើម្បីឱ្យចូលរួមផ្តល់ឈាមឱ្យបានច្រើនបន្ថែមទៀត។ ក្រៅពីនេះមជ្ឈមណ្ឌលបានសហការជាមួយក្រសួងចំនួន១២ ដែលនឹងជួយផ្តល់ឈាមទៀតទាត់ហើយគ្រោងនឹងបន្តសហការជាមួយក្រសួងដែលនៅសេសសល់ឱ្យចូលរួមជាបន្តបន្ទាប់ទៀត ក៏ដូចជាសហការជាមួយវិស័យឯកជន ធនាគារ សាកលវិទ្យាល័យ ស្ថាប័នរដ្ឋ និងសហភាពសហព័ន្ធយុវជនកម្ពុជា។

លោកវេជ្ជបណ្ឌិត បានអំពាវនាវប្រជាពលរដ្ឋ ចូលរួមបរិច្ចាគឈាមដោយស្ម័គ្រចិត្តឱ្យបានផុសផុលដើម្បីអត្ថប្រយោជន៍ផ្ទាល់ខ្លួន និងសង្គម។ ព្រោះការបរិច្ចាគឈាមដោយស្ម័គ្រចិត្តមានសារប្រយោជន៍ច្រើនដូចជា កាត់បន្ថយជាតិដែក សម្រួលសរសៃឈាម ស្ត្រូក មហារីកឈាម និងចូលរួមសង្គ្រោះជីវីតអ្នកជំងឺជាមួយគ្រូពេទ្យ ពិសេសទទួលបានបុណ្យកុសលមិនអាចកាត់ថ្លៃបានក្នុងនាមពលរដ្ឋជាកាន់ព្រះពុទ្ធសាសនា ខណៈបច្ចុប្បន្នការផ្តល់ឈាមដោយការស្ម័គ្រចិត្តមានត្រឹមតែ ២០% ប៉ុណ្ណោះ ដែលតម្រូវឱ្យក្រុមគ្រួសារ ឬសាច់ញាតិអ្នកជំងឺបូមឈាមជំនួស ស្របពេលប្រទេសជិតខាងមានអ្នកស្ម័គ្រចិត្តផ្តល់ឈាមរហូតដល់ទៅជាង ៩០% ។

យ៉ាងណាក៏ដោយក្នុងរយៈពេល ៥ ខែ ឆ្នាំ២០២៤ នេះ មជ្ឈមណ្ឌលជាតិផ្តល់ឈាម បានទទួលអំណោយឈាមទាំងអ្នកផ្តល់ជំនួស និងអ្នកស្ម័គ្រចិត្តប្រមាណជាង ៥ ម៉ឺនប្លោក សម្រាប់ជួយដល់អ្នកជំងឺដែលត្រូវការឈាមជាចាំបាច់ក្នុងការសង្គ្រោះអាយុជីវិត។

លោកវេជ្ជបណ្ឌិត បានបន្តទៀតថា ក្នុងចំណោមអំណោយឈាមទាំងនោះ មជ្ឈមណ្ឌលជាតិផ្ដល់ឈាម ទទួលបាន ៤១ ០០០ ប្លោក និងតាមបណ្តាខេត្តទទួលបានជាង ១ ម៉ឺនប្លោក សរុបជាង ៥ ម៉ឺប្លោក និងបានផ្គត់ផ្គង់ឈាមប្រមាណជាង ៦ ម៉ឺនប្លោកទៅតាមមន្ទីរពេទ្យនានាទូទាំងប្រទេស។ លោកវេជ្ជបណ្ឌិត រំពឹងថា នៅបំណាច់ឆ្នាំ២០២៤ នេះ នឹងទទួលបានអំណោយឈាមប្រមាណ ១ សែន ៦ ម៉ឺនប្លោក៕

អត្ថបទ៖ សំអឿន

The post មជ្ឈមណ្ឌលផ្តល់ឈាម នឹងជួបហានិភ័យ បើប្រមូលឈាមមិនបាន ៣ ពាន់ប្លោក ក្នុង ១ខែ appeared first on Kampuchea Thmey Daily.

រដ្ឋមន្ត្រី ថ្នាក់ដឹកនាំ បុគ្គលិក ក្រសួងសុខាភិបាល រួមគ្នាបរិច្ចាគឈាម លើកទី១០

KC Virak — Thu, 25 Apr 2024 08:47:00 +0000

សាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញជាអធិបតីភាពក្នុង ពិធីបរិច្ចាគឈាម លើកទី១០ របស់ថ្នាក់ដឹកនាំ មន្រ្តីរាជការ បុគ្គលិកសុខាភិបាល នៅមន្ទីរពេទ្យកាល់ម៉ែត ក្រោមប្រធានបទ “រួមគ្នាបរិច្ចាគឈាមសង្គ្រោះជីវិត” ដែលចូលរួមសហការរៀបចំដោយ មជ្ឈមណ្ឌលជាតិផ្តល់ឈាម នៅនៅថ្ងៃទី២៥ ខែមេសា ឆ្នាំ២០២៤ នៅមន្ទីរពេទ្យកាល់ម៉ែត។

សាស្រ្តាចារ្យរដ្ឋមន្រ្តី បានថ្លែងបញ្ជាក់ថា កម្មវិធីបរិច្ចាគឈាមនាពេលនេះ ជាពិធីដ៏មានគុណតម្លៃជាកុសលផលបុណ្យដ៏ប្រសើរ និងពិតជាកាយវិការមនុស្សធម៌គំរូ គួរឱ្យកោតសរសើរយ៉ាងក្រៃលែង ក្នុងពេលវេលាដែល មន្ត្រី បុគ្គលិករបស់មន្ទីរពេទ្យគ្រប់ឋានានុក្រម កំពុងតែមមាញឹកក្នុងការសង្គ្រោះអាយុជីវិត ថែទាំ និងព្យាបាលអ្នកជំងឺយើង ដោយប្រើអស់កម្លាំងកាយ កម្លាំងចិត្ដ ក្នុងភារកិច្ចរបស់ខ្លួន បន្ថែមពីលើនោះ បានបន្តស្ម័គ្រចិត្ដមកបរិច្ចាគឈាម ដើម្បីសង្គ្រោះអាយុជីវិតអ្នកជំងឺ ដោយផ្ទាល់ថែមទៀតផង។

សាស្ត្រាចារ្យរដ្ឋមន្រ្តី សូមលើកទឹកចិត្ដបងប្អូនទាំងអស់ដែលមានវត្តមាននៅទីនេះ និងតាមបណ្តាស្ថាប័ន អង្គភាពនានា ដែលបានយល់ច្បាស់អំពីអត្ថន័យ នៃការបរិច្ចាគឈាម សូមបន្ដចូលរួមចំណែកក្នុងការបរិច្ចាគឈាមឱ្យក្លាយជាទម្លាប់ដ៏ប្រពៃយូរអង្វែង និងដោយផុលផុសបន្ថែមទៀត។ កិច្ចការដែលយើងទាំងអស់គ្នាកំពុងប្រឹងប្រែងធ្វើគ្រប់សកម្មភាព គឺសុទ្ធតែដើម្បីជាគុណប្រយោជន៍ជូនដល់អ្នកជំងឺយើង ហើយការផ្តល់ឈាម មួយប្លោក គឺមានន័យស្មើនឹងសង្គ្រោះអាយុជីវិតបានមួយនាក់។

ជាចុងក្រោយ សាស្ត្រាចារ្យរដ្ឋមន្រ្តី សូមថ្លែងអំណរគុណ និងវាយតម្លៃខ្ពស់ចំពោះ មន្ទីរពេទ្យកាល់ម៉ែត លើការរៀបចំកម្មវិធីនេះឡើង ដោយមានកិច្ចសហការរវាង មជ្ឈមណ្ឌលជាតិផ្ដល់ឈាម និងគណៈកម្មការ និងក្រុមការងារទាំងអស់។

លោកស្រី ជឹង សុគន្ធាវី នាយិកាប្រតិបត្តិក្រុមហ៊ុនវីតាល់ និងមូលនិធិ ២៥ រៀល នឹងបន្តចូលរួមគាំទ្រជានិច្ចនូវយុទ្ធនាការចុះប្រមូលអំណោយឈាម របស់មជ្ឈមណ្ឌលជាតិផ្តល់ឈាម និងបង្កើតគម្រោងថ្មីៗ ដើម្បីរួមគ្នាដោះស្រាយ និងឆ្លើយតបបញ្ហានានា ពិសេសជាមួយយុទ្ធនាការទទួលអំណោយឈាមដោយស្ម័គ្រចិត្ត និងក្តីមេត្តាករុណា។

ក្នុងឱកាសនោះដែរ សាស្រ្តចារ្យរដ្ឋមន្រ្តី បានផ្ដើមស្ម័គ្រចិត្ដធ្វើការបរិច្ចាគឈាមដោយផ្ទាល់ ជាមួយបុគ្គលិក មន្រ្តីរាជការក្រសួង មន្ទីរពេទ្យជាតិ រួមជាមួយនឹងបងប្អូន ក្រុមគ្រួសារញាតិមិត្ដ នៃអ្នកជំងឺ ដែលកំពុងត្រូវបានកំពុងសង្គ្រោះព្យាបាលនៅមន្ទីរពេទ្យកាល់ម៉ែត និងនៅបណ្តាមន្ទីរពេទ្យផ្សេងៗផងដែរ។

គួរបញ្ជាក់ផងដែរថា ពិធីដ៏មានសារៈសំខាន់នេះ ក៏មានព្រះវត្តមានរបស់ ព្រះភិក្ខុវជិរប្បញ្ញោ គូ សុភាព ជាការលើកទឹកចិត្តដល់សប្បុរសជនស្ម័គ្រចិត្តបរិច្ចាគឈាម បានយល់ដឹងអំពីការធ្វើអំពើល្អដោយទឹកចិត្តបរិសុទ្ធ តាមរយៈការលះបង់លោហិតរបស់ខ្លួន ដើម្បីជួយដល់អ្នកជំងឺ ដែលលោកកំពុងរង់ចាំការជួយសង្គ្រោះអាយុជីវិត ពីក្រុមវេជ្ជបណ្ឌិតជំនាញគ្រប់ឯកទេស មន្រ្តីថែទាំគ្រប់ថានានុក្រមទទួលខុសត្រូវ ជាមួយនឹងឈាមដែលជាឱសថមានគុណតម្លៃឧត្តុង្គឧត្តមបំផុត ព្រោះលើលោកនេះពុំមានមន្ទីរពិសោធន៍ណាអាចផលិតឈាមបាននៅឡើយ។

កម្មវិធីបរិច្ចាគឈាមនាព្រឹកនេះ ប្រព្រឹត្ដទៅដោយភាពរីករាយ ស្និតស្នាល សស្រាក់សស្រាំ និងប្រកបដោយជោគជ័យ ដែលអ្នកចូលរួមបរិច្ចាគឈាមសរុបមានចំនួន ៣៨៦ នាក់។ ក្នុងពិធីនេះផងដែរ ក៏មានការអញ្ជើញចូលរួមពី រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង អគ្គនាយក អគ្គនាយករងមន្ទីរពេទ្យកាល់ម៉ែត លោកប្រធានមជ្ឈមណ្ឌលជាតិផ្តល់ឈាម និងថ្នាក់ដឹកនាំ មន្រ្តីរាជការ នៃមន្ទីរពេទ្យកាល់ម៉ែត មន្ទីរពេទ្យជាតិ តេជោសន្តិភាព មន្ទីរពេទ្យព្រះសីហនុមណ្ឌលនៃក្តីសង្ឃឹម រួមទាំងមន្ទីរពេទ្យជាតិនានា និងនិស្សិត នៃសាកលវិទ្យាល័យវិទ្យាសាស្រ្តសុខាភិបាល៕

The post រដ្ឋមន្ត្រី ថ្នាក់ដឹកនាំ បុគ្គលិក ក្រសួងសុខាភិបាល រួមគ្នាបរិច្ចាគឈាម លើកទី១០ appeared first on Kampuchea Thmey Daily.

មជ្ឈមណ្ឌលជាតិផ្ដល់ឈាម Archives - Kampuchea Thmey Daily

របាយការណ៍៖ អំណោយ​ឈាម​សប្បុរស​ជន​ស្ម័គ្រចិត្ត​បាន​តែ​២២​%​នៃ​តម្រូវ​ការ​ប៉ុណ្ណោះ

ជាង ១ ខែ មជ្ឈមណ្ឌលជាតិផ្តល់ឈាម ទទួលបានអំណោយឈាម ៧ ពាន់ប្លោក កើនឡើងជិត ៤០%

៥ ខែ ឆ្នាំនេះ មជ្ឈមណ្ឌលជាតិផ្តល់ឈាម ទទួលបានអំណោយឈាមជាង ៥៥ ០០០ ប្លោក កើនជាងឆ្នាំមុន

មជ្ឈមណ្ឌលជាតិផ្ដល់ឈាម ត្រៀមឈាម ៥ ពាន់ប្លោក សម្រាប់ជួយសង្គ្រោះជនរងគ្រោះ ក្នុងឱកាសបុណ្យចូលឆ្នាំថ្មី

សារៈសំខាន់នៃកម្មវិធីបរិច្ចាគឈាមមនុស្សធម៌របស់មិត្តហ្វូន “ដំណក់ឈាមមួយលានបេះដូង”

មជ្ឈមណ្ឌលផ្តល់ឈាម នឹងជួបហានិភ័យ បើប្រមូលឈាមមិនបាន ៣ ពាន់ប្លោក ក្នុង ១ខែ

រដ្ឋមន្ត្រី ថ្នាក់ដឹកនាំ បុគ្គលិក ក្រសួងសុខាភិបាល រួមគ្នាបរិច្ចាគឈាម លើកទី១០

របាយការណ៍៖ អំណោយឈាមសប្បុរសជនស្ម័គ្រចិត្តបានតែ២២%នៃតម្រូវការប៉ុណ្ណោះ