ដោយមានការចូលរួមពីលោក សាំង សុផល ប្រធានការិយាល័យសុខភាពសិក្សាតំណាង លោក ហែម ស៊ីណារ៉េត ប្រធានមន្ទីរអប់រំយុវជន និងកីឡារាជធានីភ្នំពេញលោកវេជ្ជបណ្ឌិត ចន ផាន់ណា ប្រធានកម្មវិធីប្រចាំប្រទេសកម្ពុជានៃអង្គការមូលនិធិថែទាំសុខភាពអ្នកជំងឺអេដស៍នាយកសាលា លោកគ្រូអ្នកគ្រូនិងសិស្សានុសិស្សប្រមាណ៣០០នាក់។

ថ្លែងក្នុងទិវាសុខភាពពេលមករដូវនាឱកាសនោះ លោកវេជ្ជបណ្ឌិត ចន ផាន់ណា បានមានប្រសាសន៍ថាទិវាសុខភាពពេលមករដូវនេះធ្វើឡើងក្នុងគោលបំណងដើម្បីផ្តល់ចំណេះដឹងទាក់ទិន ការប្រឈមនិងដំណោះស្រាយផ្សេងៗនៅពេលមករដូវដើម្បីកាត់បន្ថយការរើសអើងអំឡុងពេលមករដូវ និងលើកកម្ពស់ការទទួលបានសម្ភារៈបរិក្ខារដែលមានសុវត្ថិភាព ស្អាត និងសំឡីអនាម័យឥតគិតថ្លៃ ឬមានតម្លៃសមរម្យសម្រាប់តម្រូវការ រួមទាំងវិធានការសំខាន់ៗក្នុងការការពារសុខភាពទូទៅ និងកាត់បន្ថយភាពងាយរងគ្រោះចំពោះមេរោគអេដស៍ និងការឆ្លងមេរោគផ្លូវភេទផ្សេងទៀត។

លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីរបស់ អង្គការ AHF បានមានប្រសាសន៍ថានៅក្នុងតំបន់ជាច្រើននៃទ្វីបអាស៊ី ការរើសអើង និងភាពស្ងៀមស្ងាត់ជុំវិញការមករដូវនៅតែបន្តជាឧបសគ្គក្នុងការទទួលបានផលិតផលសម្រាប់មករដូវ និងព័ត៌មានសុខភាពសំខាន់ៗ ។ នៅពេលដែលមនុស្សមិនអាចគ្រប់គ្រងដោយសុវត្ថិភាពចំពោះការមករដូវរបស់ពួកគេបាន គឺជាផលវិបាកដល់សុខភាព នឹងសុត្តិភាព និងធ្វើឲ្យពួកគេទទួលភាពងាយរងគ្រោះចំពោះមេរោគអេដស៍ និងជំងឺកាមរោគផ្សេងទៀត។

លោកវេជ្ជបណ្ឌិតបានបន្តថាដូចនេះទិវាសុខភាពពេលមករដូវគឺជាការរំលឹកថា ការលើកកម្ពស់ការទទួលបាន ការអប់រំ និងការពិភាក្សាដ៏ទូលំទូលាយ មានសារៈសំខាន់ណាស់ក្នុងការការពារសុខភាពបុគ្គល និងសាធារណៈ។ ប្រទេសអាស៊ីជាច្រើនដែលបានលុបចោលពន្ធលើផលិតផលសម្រាប់ការមករដូវ កំពុងជួយពង្រីកលទ្ធភាពទទួលបានសម្ភារៈបរិក្ខារ និងការប្រើប្រាស់សម្រាប់ពេលមករដូវ។ អង្គការAHF សូមលើកទឹកចិត្តឱ្យប្រទេសដទៃទៀតជាច្រើន គួរតែលុបចោលពន្ធលើផលិតផលសម្រាប់ការមករដូវ ។

លោកវេជ្ជបណ្ឌិតបានបន្តទៀតថានៅទូទាំងពិភពលោក ប្រជាជនជិត២ពាន់លាននាក់មករដូវ ដែលក្នុងនោះ ៥០០លាននាក់កំពុងជួបប្រទះនឹងភាពក្រីក្រនៅពេលមករដូវ រួមទាំងកង្វះផលិតផលគ្រប់គ្រាន់ គ្រឿងបរិក្ខារ និងបរិយាកាសគាំទ្រ។ បញ្ហាប្រឈមទាំងនេះអាចនាំឱ្យមានការខកខានទៅសាលារៀន ឬការងារ ភាពងាយរងគ្រោះផ្នែកសេដ្ឋកិច្ច និងក្នុងករណីខ្លះ ការពឹងផ្អែកលើទំនាក់ទំនងផ្លូវភេទ ឬទំនាក់ទំនងដែលមានភាពខុសគ្នានៃអាយុយ៉ាងច្រើន ដែលកាត់បន្ថយសមត្ថភាពក្នុងការចរចាការរួមភេទដែលមានសុវត្ថិភាព និងបង្កើនហានិភ័យនៃមេរោគអេដស៍ និងជំងឺកាមរោគផ្សេងទៀត។ អង្គការAHF សូមកោតសរសើរប្រទេសដែលបានកាត់បន្ថយ ឬលុបបំបាត់ពន្ធលើផលិតផលសម្រាប់មករដូវ ហើយជំរុញឱ្យទូទាំងពិភពលោកធានាបានដូចគ្នា ដើម្បីធានាលទ្ធភាពទទួលបាន និងប្រើប្រាស់សម្រាប់តម្រូវការ។

លោកវេជ្ជបណ្ឌិតបានបន្ថែមថាលើសពីនេះទៅទៀត ការរើសអើង និងភាពមិនអើពើរជុំវិញការមករដូវនៅតែជាឧបសគ្គចម្បង។ នៅក្នុងសហគមន៍ជាច្រើន ការហាមឃាត់រារាំងការពិភាក្សាដោយបើកចំហ ការទទួលបានព័ត៌មានសុខភាពផ្លូវភេទ និងសុខភាពបន្តពូជមិនទាន់គ្រប់គ្រាន់ត្រឹមត្រូវ និងបំបាក់ទឹកចិត្តមនុស្សពីការស្វែងរកការថែទាំ។ ការដោះស្រាយបញ្ហាសុខភាពរដូវត្រូវតែដើរទន្ទឹមគ្នាជាមួយនឹងកិច្ចខិតខំប្រឹងប្រែងដើម្បីធ្វើឱ្យការមករដូវជាលក្ខណៈធម្មតា ពង្រីកការទទួលបានសេវាកម្មសំខាន់ៗ រួមទាំងការបង្ការការឆ្លងមេរោគអេដស៍។ ការធ្វើតេស្ត និងការព្យាបាល ជាមួយនឹងការធានាឱ្យបានមនុស្សគ្រប់គ្នាអាចគ្រប់គ្រងសុខភាពរបស់ពួកគេបានដោយសុវត្ថិភាព ដោយសេចក្តីថ្លៃថ្នូរ និងដោយគ្មានការភ័យខ្លាច ឬការរើសអើង។

លោកវេជ្ជបណ្ឌិតបានបន្ថែមទៀតថាអង្គការAHFគាំទ្រដល់ស្ត្រី និងក្មេងស្រី និងស្ត្រីវ័យក្មេងតាមរយៈកម្មវិធីផ្តល់ភាពអង់អាចដល់ក្មេងស្រី ដែលធ្វើការសម្រាប់ក្មេងស្រីនៅក្នុងសហគមន៍ ក្មេងស្រីដែលរងគ្រោះ និងក្មេងស្រីដែលងាយរកគ្រោះដទៃទៀត។

លោក សាំង សុផល ប្រធានការិយាល័យសុខភាពសិក្សា មន្ទីរអប់រំយុវជន និងកីឡារាជធានីភ្នំពេញបានចាត់ទុកទិវាសុខភាពពេលមករដូវនេះពិតជាមានសារសំខាន់ណាស់ក្នុងការចូលរួមចំណែក ស្វែងរកការគាំទ្រ និងដំណោះស្រាយ គ្រប់គ្រងសុខភាព ការអប់រំសុខភាពបន្តពូជដែលសម ស្របតាមវ័យ និងពង្រឹងពីសារៈសំខាន់នៃក្មេងស្រីដែលកំពុងចូលរៀន ចៀសវាងការឆ្លងមេរោគអេដស៍ ការមានផ្ទៃពោះដោយមិនបានគ្រោងទុក ការកសាងជំនាញបំណិនជីវិត និងបញ្ហាសំខាន់ៗផ្សេងទៀតដែល ប៉ះពាល់ដល់សុខភាពរបស់ពួកគេពិសេសចូលរួមលើកកម្ពស់ ការអប់រំសុខភាពបន្តពូជដ៏ទូលំទូលាយ និងសមភាពយេនឌ័រ ការយល់ដឹង និងជួយក្មេង ស្រីឱ្យរស់នៅមានសុខភាពល្អដែលអាចឲ្យពួកគេបានចូលរៀន និងផ្តល់សិទ្ធិគ្រប់គ្រងជីវិតរបស់ពួកគាត់។

គួរបញ្ជាក់ថាអង្គការមូលនិធិថែទាំសុខភាពអ្នកជំងឺអេដស៍ (AHF) ដែលជាអង្គការថែទាំសុខភាពអ្នកជំងឺអេដស៍ធំជាងគេបំផុតរបស់ពិភពលោក ស្វែងរការគាំទ្រ និងផ្តល់ឳសថព្យាបាលដោយមិនគិតពីលទ្ធភាពនៃការបង់ប្រាក់ ដល់ប្រជាជនជាង ៣ លាននាក់នៅទូទាំង ៥០ ប្រទេស រួមទាំងសហរដ្ឋអាមេរិក និងនៅអាហ្វ្រិក អាមេរិកឡាទីន/ការ៉ាប៊ីន តំបន់អាស៊ី/ប៉ាស៊ីហ្វិក និងអឺរ៉ុបខាងកើត៕ អត្ថបទ៖សំអឿន

The post អង្គការAHFប្រារព្វទិវាសុខភាព ពេលមករដូវដើម្បីលើកកម្ពស់សុខភាពស្ត្រី និងក្មេងស្រីឱ្យកាន់តែប្រសើរ appeared first on Kampuchea Thmey Daily.

ការជំរុញនេះ ក្នុងឱកាស លោកសាស្ត្រាចារ្យ ឈាង រ៉ា​ រដ្ឋមន្ត្រីក្រសួងសុខាភិបាល បានអញ្ជើញចូលរួមក្នុងពិធីប្រកាសចូលកាន់តំណែងជាប្រធានមន្ទីរសុខាភិបាល នៃរដ្ឋបាលខេត្តកំពង់ចាមថ្មី​ ដោយលោកវេជ្ជបណ្ឌិត វ៉ា សាវុធ ត្រូវបានជាប្រធានមន្ទីរសុខាភិបាល នៃរដ្ឋបាលខេត្តកំពង់ចាម ជំនួសលោកវេជ្ជបណ្ឌិត គឹមសួរ ភីរុណ ដែលត្រូវបានចូលនិវត្តន៍ កាលពីព្រឹកថ្ងៃទី ៣១ ខែមីនា ឆ្នាំ ២០២៦ នៅសាសាខេត្តកំពង់ចាម។

នាឱកាសនោះ លោកសាស្ត្រាចារ្យ ឈាង រ៉ា​ បានជំរុញណែនាំដល់លោកប្រធានមន្ទីរសុខាភិបាល នៃរដ្ឋបាលខេត្តកំពង់ចាម ដែលទើបតែទទួលបានការតែងតាំងថ្មី ត្រូវបង្កើនការយកចិត្តទុកដាក់ និងត្រួតពិនិត្យមើលផងដែរថា មានកត្តាច្រើនណាស់ជះឥទ្ធិពលមកលើសមិទ្ធផល នៃវិស័យសុខាភិបាល។ ក្នុងនោះ ទាមទារឲ្យមានការខិតខំប្រឹងប្រែងយ៉ាងខ្លាំង ធ្វើយ៉ាងណាឲ្យមាននូវកិច្ចសហការសម្របសម្រួល និងឲ្យមានការចូលរួមយ៉ាងស្មោះស្ម័គ្រ អស់ពីកម្លាំងកាយ កម្លាំងចិត្ត ពីសំណាក់មន្ត្រីរាជការ និងបុគ្គលិកសុខាភិបាល គ្រប់លំដាប់ថ្នាក់ ដើម្បីធានាបាននូវជោគជ័យក្នុងការលើកកម្ពស់សុខភាព និងសុខមាលភាពជូនប្រជាជន ជាពិសេសនៅតាមទីជនបទដាច់ស្រយាល និងជាអាទិ៍ មានការចូលរួមកិច្ចសហប្រតិបត្តិការល្អក្នុងការប្រយុទ្ធប្រឆាំងនឹងជំងឺគ្រប់ប្រភេទ ដែលកើតមានក្នុងដំណាក់កាលនេះជាដើម។

លោកសាស្ត្រាចារ្យ ឈាង រ៉ា​ បានរំពឹងទុក មានជំនឿយ៉ាងមុតមាំ និងសង្ឃឹមយ៉ាងជាក់ច្បាស់ថា លោកប្រធានមន្ទីរសុខាភិបាល នៃរដ្ឋបាលខេត្តកំពង់ចាម ដែលទើបទទួលបានការតែងតាំងថ្មី នឹងយកចិត្តទុកដាក់ខិតខំប្រឹងប្រែងអស់សមត្ថភាពរបស់ខ្លួន អនុវត្តការងារឲ្យទទួលបានលទ្ធផលល្អត្រចះត្រចង់ ស្របតាមកម្មវិធីគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕
អត្ថបទ និង រូបភាព ៖​ ឡេក​ ចាន់ពេជ្រ

The post រដ្ឋមន្ត្រីសុខាភិបាល ជំរុញ ប្រធានមន្ទីរសុខាភិបាលខេត្តកំពង់ចាមថ្មី​ ត្រូវពិនិត្យបញ្ហាដែលជះឥទ្ធិពលលើវិស័យសុខាភិបាល appeared first on Kampuchea Thmey Daily.

លោក ងី មានហេង នាយក​មន្ទីរ​សុខាភិបាល​រាជធានី​ភ្នំពេញ បាន​ឲ្យ​ដឹង​នៅ​ព្រឹក​ថ្ងៃ​ទី ៣ ធ្នូ នេះ​ថា ដោយ​មាន​ការ​យកចិត្តទុកដាក់ និង​ការ​ចង្អុលបង្ហាញ​ពី​លោក ឃួង ស្រេង អភិបាល នៃ​គណៈ​អភិបាល​រាជធានី​ភ្នំពេញ បាន​ណែនាំ​ឲ្យ​មន្ទីរ​សុខាភិបាល​រាជធានី​ភ្នំពេញ ចុះ​បាញ់ថ្នាំ​មូស​ក្នុង​មូលដ្ឋាន​ភូមិ-សង្កាត់ ក្នុង​ខណ្ឌ​ទាំង ១៤ និង​នៅ​តាម​សាលារៀន។ សកម្មភាព​នេះ បាន​ធ្វើ​ឡើង​ជាប់​ជាប្រចាំ តាំងពី​ដើម​ខែ​មករា ឆ្នាំ ២០២៥ មក ហើយ​គ្រោង​បញ្ចប់​នៅ​ខែ​ធ្នូ ឆ្នាំ ២០២៥ នេះ។

ការ​យកចិត្តទុកដាក់​ចំពោះ​សុខុមាលភាព​ប្រជាពលរដ្ឋ​នេះ បាន​ធ្វើ​ឲ្យ​ ពលរដ្ឋ លោកគ្រូ អ្នកគ្រូ និង​សិស្សានុសិស្ស សម្តែង​នូវ​ទឹកចិត្ត​សប្បាយរីករាយ​យ៉ាង​ក្រៃលែង និង​បាន​ថ្លែងអំណរគុណ​ដល់​លោក ឃួ​ង ស្រេង និង​រដ្ឋបាល​ខណ្ឌ​ទាំងអស់ ដែល​តែងតែ​គិតគូរ​ពី​សុខុមាលភាព​សាធារណៈ​នៅ​ក្នុង​មូលដ្ឋាន​ខណ្ឌ​នានា​ក្នុង​រាជធានី​ភ្នំពេញ។

ដោយឡែក មន្ទីរ​សុខាភិបាល​រាជធានី​ភ្នំពេញ បាន​ចាត់ចែង​ឲ្យ​ក្រុម​បាញ់ថ្នាំ​មូស​របស់​មន្ទីរពេទ្យ​បង្អែក​ព្រែក​ព្នៅ និង​មណ្ឌល​សុខភាព សហការ​ជាមួយ​កម្លាំង​អាជ្ញាធរ​ខណ្ឌ ចុះ​បាញ់ថ្នាំ​មូស​នៅ​ភូមិ-​សង្កាត់ នានា៕

អត្ថបទ ៖ ស្រីរ័ត្ន

The post ការបាញ់ថ្នាំមូសទូទាំងរាជធានីភ្នំពេញ ធ្វើឡើងជាប្រចាំ ពេញមួយឆ្នាំ គ្រោងបញ្ចប់នៅខែធ្នូនេះ appeared first on Kampuchea Thmey Daily.

ក្នុង​យុទ្ធនាការ​ប្រយុទ្ធ​ទប់ស្កាត់​ការ​រីក​រាលដាល នៃ​ជំងឺគ្រុនឈាម ឆ្នាំ ២០២៥ នេះ លោក​វេជ្ជបណ្ឌិត ងី ប៊ុនឡែន បាន​ឲ្យ​ដឹង​ថា មន្ទីរ​សុខាភិបាល​ខេត្ត បាន​ធ្វើ​យុទ្ធនាការ​ចុះ​អប់រំ ផ្សព្វផ្សាយ ណែនាំ លុប​បំបាត់​ជម្រក​មូស និង​ដាក់​ថ្នាំ​អាបែត បាន​ចំនួន ១៣៩ ភូមិ ដោយ​ប្រើប្រាស់​ម៉ាស៊ីន​បាញ់​កម្ចាត់​មូស ១០ លើក ចុះ​អប់រំ​តាម​សាលារៀន ៤៥ សាលា ចាក់​សារ​អប់រំ​ចល័ត ១០ លើក និង​ចាក់​ផ្សាយ​សារ​អប់រំ​គ្រប់​មណ្ឌល​សុខភាព​ជា​រៀងរាល់ថ្ងៃ។ ចំពោះ​ផែនការ​បន្ត មន្ទីរ​សុខាភិបាល​ខេត្ត​ក្រចេះ នឹង​បន្ត​សហការ​ជាមួយ​អាជ្ញាធរ​មូលដ្ឋាន​គ្រប់​លំដាប់​ថ្នាក់ ពង្រីក​ការ​តាមដាន ចុះ​អប់រំ ផ្សព្វផ្សាយ និង​ដាក់​ថ្នាំ​អាបែត ព្រមទាំង​ពង្រឹង​ការ​ព្យាបាល​នៅ​តាម​មន្ទីរពេទ្យ​មណ្ឌល​សុខភាព​ដោយ​យក​ចិត្ត​ទុក​ដាក់​ខ្ពស់​បំផុត។

ពាក់ព័ន្ធ​ការ​កើន​ឡើង នៃ​ជំងឺ​គ្រុនឈាម លោក​វេជ្ជបណ្ឌិត ងី ប៊ុនឡែន បាន​បញ្ជាក់​ថា តប​តាម​ការ​សិក្សា​ស្រាវជ្រាវ​វដ្ដ នៃ​ការ​ឆ្លង​ជំងឺគ្រុនឈាម គឺ ៤ ឆ្នាំ អាច​ឡើង​ម្ដង។ ចំពោះ ឆ្នាំ ២០២៥ នេះ គឺជា​ឆ្នាំ​ដែល​កើន​ឡើង​នៅ​ទូទាំង​គ្រប់​រាជធានី-ខេត្ត។ ដូច្នេះ​ហើយ មន្ទីរ​សុខាភិបាល​ខេត្ត​ក្រចេះ បាន​រៀបចំ​ផែនការ ត្រៀម​បម្រុង​ទប់ស្កាត់​តាំងពី​ដើម​រដូវ​មក​ម្ល៉េះ។

លោក​វេជ្ជបណ្ឌិត បាន​អំពាវនាវ​ដល់​ប្រជាពលរដ្ឋ​ចូលរួម​លុបបំបាត់​ជម្រក​មូស ដោយ​រស់នៅ​ប្រកប​ដោយ​អនាម័យ និង​ឲ្យ​កុមារ​ស្លៀក​សំលៀកបំពាក់ ខោ​អាវ​វែង។ ក្នុង​នោះ​ដែរ លោក​ក៏បាន​ សំណូមពរ​ពលរដ្ឋ​ឲ្យ​ពិនិត្យ​តាមដាន​កូនចៅ បើ​មាន​អាការ​គ្រុនក្ដៅ ត្រូវ​នាំ​កូន​ទៅ​មណ្ឌល​សុខភាព​ដែល​នៅ​ជិត​បំផុត ដើម្បី​ទទួល​ការ​ព្យាបាល​បាន​ទាន់​ពេលវេលា៕

អត្ថបទ ៖ ប្រុញ វិធិន

The post ៦ ខែ ដើមឆ្នាំ ២០២៥ ខេត្តក្រចេះ កើតមានជំងឺគ្រុនឈាម ៨១៥ ករណី និងស្លាប់ ៤ ករណី កើនឡើងជាងឆ្នាំមុន appeared first on Kampuchea Thmey Daily.

ដោយមានការព្រួយបារម្ភអំពី វីរុសបម្លែងខ្លួនថ្មីនេះ មន្ទីរសុខាភិបាលខេត្តមណ្ឌលគិរី បានចេញសេចក្ដីជូនដំណឹងនៅថ្ងៃទី១៩ ខែឧសភា ឆ្នាំ២០២៥ ស្ដីពីការចាក់វ៉ាក់សាំងការពារជំងឺកូវីដ-១៩ ជូនដល់ថ្នាក់ដឹកនាំកងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋទូទាំងខេត្តមណ្ឌលគិរី ទៅទទួលការចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នានៅតាមមន្ទីរពេទ្យបង្អែក និងមណ្ឌលសុខភាព ដែលនៅជិតបំផុត ដោយភ្ជាប់ឯកសារមកជាមួយ រួមមាន បណ្ណចាក់វ៉ាក់សាំងលើកមុន អត្តសញ្ញាណប័ណ្ណ ឬលិខិតបញ្ជាក់កំណើត ដើម្បីឱ្យក្រុមគ្រូពេទ្យបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំង។

ក្រោយពីចេញសេចក្ដីជូនដំណឹងនេះ មន្ទីរសុខាភិបាលខេត្តមណ្ឌលគិរី សង្ឃឹមនិងជឿជាក់ថា មន្ត្រីរាជការកងកម្លាំងប្រដាប់អាវុធ និងប្រជាពលរដ្ឋ ក្នុងខេត្តមណ្ឌលគិរីទាំងអស់ នឹងមកទទួលការចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នាដើម្បីការពារសុខភាព និងរួមចំណែកទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងសហគមន៍ ជាពិសេសវីរុសបម្លែងខ្លួនថ្មី(JN.1) នេះ៕

អត្ថបទ៖រៀម សុខហេង

The post មន្ទីរសុខាភិបាលខេត្តមណ្ឌលគិរី ជំរុញឱ្យពលរដ្ឋ ទៅទទួលការចាក់វ៉ាក់សាំងការពាកូវីដ-១៩ ឱ្យបានគ្រប់ៗគ្នា appeared first on Kampuchea Thmey Daily.

លោកប្រធានមន្ទីរ បានបញ្ជាក់ថា ភារកិច្ចរបស់លេខាធិការដ្ឋាន គឺជាសេនាធិការផ្ទាល់របស់គណៈកម្មាធិការប្រយុទ្ធនឹងជំងឺអេដស៍ខេត្ត ដោយមានជំនួយពីក្រុមបច្ចេកទេសអន្តរក្រសួងលេខាធិការដ្ឋាន មានតួនាទីវិភាគលើស្ថានភាពនៃការរីករាលដាលជំងឺអេដស៍ មុខសញ្ញាប្រឈមនៃកត្តាជំរុញឱ្យមានការរីករាលដាល និងដំណោះស្រាយ ធ្វើការបណ្តុះបណ្តាលដល់មន្រ្តីជំនាញរដ្ឋបាលក្រុងស្រុក ឃុំសង្កាត់ សហគមន៍ និងអ្នកស្ម័គ្រចិត្តអំពីការងារដែលពាក់ព័ន្ធនឹងកិច្ចការដែលប្រយុទ្ធ និងជំងឺអេដស៍។

លោកប្រធានមន្ទីរ បានឱ្យដឹងថា បច្ចុប្បន្នអត្រាប្រេវ៉ាឡង់ និងអត្រាឆ្លងថ្មីនៃមេរោគអេដស៍នៅតែមានកម្រិតខ្ពស់ក្នុងចំណោមក្រុមប្រឈមមុខ ដែលអត្រានៃអ្នកដឹងអំពីស្ថានភាពផ្ទុកមេរោគអេដស៍របស់ខ្លួនទើបតែសម្រេចបាន ៨៩% ធៀបនឹងគោលដៅ ៩៥% សម្រាប់គោលដៅទី១ ខណៈខេត្តសៀមរាប មាន ៨៥%។ ដោយឡែក ការទទួលបានសេវាលេបថ្នាំបង្ការជាមុន នៅពេលប្រឈមមុខនឹងការឆ្លងមេរោគអេដស៍ និងសេវាធ្វើតេស្តរកមេរោគអេដស៍ក្នុងចំណោមក្រុមប្រឈមមុខនៅមានកម្រិតទាប ជាមួយនឹងការលេចឡើងនូវឥរិយាបទប្រឈមថ្មីៗ ដូចជា ការប្រើប្រាស់គ្រឿងញៀននៅពេលរួមភេទដោយមិនបានបង្ការការឆ្លងមេរោគអេដស៍ជាដើម។

ក្នុងន័យនេះ លោកសូមឱ្យអ្នកពាក់ព័ន្ធទាំងអស់ ចូលរួមឱ្យបានសកម្មលើគ្រប់រូបភាព និងលទ្ធភាព ដើម្បីទប់ស្កាត់ការរីករាលដាលនៃជំងឺអេដស៍ ពិសេសលើកកម្ពស់គោលការណ៍ PAC ឱ្យបានទូលំទូលាយ ជំរុញ និងលើកទឹកចិត្តដល់មន្ទីរជំនាញពាក់ព័ន្ធ ខិតខំអនុវត្តគោលនយោបាយយុទ្ធសាស្រ្តរបស់ក្រសួងសុខាភិបាល និងអជ្ញាធរជាតិប្រយុទ្ធនឹងជំងឺអេដស៍។

ចំណែក លោក នាក់ ណេរ៉ុន មានប្រសាសន៍ថា កិច្ចប្រជុំនាពេលនេះ គឺដើម្បីស្វែងរកធាតុចូល ក៏ដូចជាពិភាក្សាគ្នា និងស្វែងរកយុទ្ធសាស្ដ្រ ធ្វើយ៉ាងណាកុំឱ្យការកើនឡើងនូវជំងឺអេដស៍ មេរោគអេដស៍នៅតាមសហគមន៍ ក៏ដូចជាការកើតឡើងដល់ប្រជាពលរដ្ឋ ពិសេសយុវជន។ ដូច្នេះ លោកសូមឱ្យគ្រប់អ្នកពាក់ព័ន្ធ តាមដានដោយយកចិត្ដទុកដាក់ ចំពោះអ្នកប្រឈមនឹងកើតជំងឺអេដស៍ ធ្វើយ៉ាងណាដើម្បីលុបបំបាត់ការឆ្លងមេរោគអេដស៍ជំងឺអេដស៍ឱ្យបាន៕

ដោយ៖ គឿន វេត

The post មន្ត្រីជំនាញជំរុញគាគីពាក់ព័ន្ធចូលរួមទប់ស្កាត់ការរីករាលដាលនៃជំងឺអេដស៍ ខណៈអត្រាឆ្លងថ្មីនៅតែមានតួលេខខ្ពស់ appeared first on Kampuchea Thmey Daily.

ក្នុងបទសម្ភាសជាមួយសារព័ត៌មានកម្ពុជាថ្មី នៅថ្ងៃទី៧ ខែកុម្ភៈនេះ លោក ងី មានហេង បានថ្លែងប្រាប់ថា បច្ចុប្បន្នជំងឺគ្រុនឈាមនៅភ្នំពេញ ស្ថិតនៅក្នុងស្ថានភាពដែលយើងគ្រប់គ្រងបាន បើទោះបីជាចំនួនសត្វមូសមានការកើនឡើងក្តី។ លោកបញ្ជាក់ថា៖ «បើយើងធៀបករណីគ្រុនឈាមក្នុងខែមករា ឆ្នាំ២០២៥ នេះ មានធៀបឆ្នាំ២០២៤ តិចជាងឆ្ងាយ។ អ៊ីចឹង!អត់មានអីគួរឱ្យបារម្ភទេ ដោយសារតែចំនួននេះស្ថិតក្នុងស្ថានភាពមួយដែលគ្រប់គ្រងបាន។ និយាយឱ្យខ្លីជំងឺគ្រុនឈាមមិនមានបញ្ហាដែលគួរឱ្យបារម្ភចំពោះរាជធានីភ្នំពេញទេ»។

លោកកត់សម្គាល់ថា ចំនួនអ្នកកើតជំងឺគ្រុនឈាមថ្មីនៅភ្នំពេញពិតជាមាន ប៉ុន្តែចំនួនដែលកើតថ្មីនេះមិនមានអ្វីដែលគួរឱ្យព្រួយបារម្ភ ហើយមិនមានការរាតត្បាតនោះឡើយ។ លោកបញ្ជាក់ថា៖«ជំងឺគ្រុនឈាមអាចឆ្លងបានលុះត្រាតែមានភ្នាក់ងារចម្លង គឺមូសខ្លា រីឯមូសបច្ចុប្បន្ននេះមានទាំងមូសខ្លា និងមូសអង្កាម តែខ្ញុំជឿថាមូសខ្លាមានតិចព្រោះករណីគ្រុនឈាមមានតិច។ចឹងភាគច្រើនមូសសព្វថ្ងៃនេះ គឺមូសអង្កាម»។

លោកបញ្ជាក់ថា មូសដែលមានការកើនឡើងនាពេលបច្ចុប្បន្ននេះ គឺជាមូសអង្កាម ពុំមានជាមូសខ្លាដែលជាភ្នាក់ងារចម្លងជំងឺគ្រុនឈាមនោះទេ។ លោកពន្យល់ថា៖«មូសអង្កាមមិនមែនជាភ្នាក់ងារចម្លងជំងឺគ្រុនឈាមនោះទេ តែមូសអង្កាមពេលខាំយើង ធ្វើឱ្យបង្កភាពរំខានដល់មនុស្ស។ទោះជាមានច្រើនក៏ដោយ យើងមិនបារម្ភអំពីការចម្លងជំងឺគ្រុនឈាមនោះទេ»។

រដ្ឋបាលរាជធានីភ្នំពេញ បានចាប់ផ្តើមយុទ្ធនាការកម្ចាត់មូសនៅទូទាំង១០៥ខណ្ឌ ចាប់ពីថ្ងៃទី១៦ ដល់ថ្ងៃទី២៩ ខែមករា។បន្ថែមលើនេះ នៅថ្ងៃទី៥ ខែកុម្ភៈ អភិបាលរាជធានីភ្នំពេញ បានចេញសេចក្តីណែនាំដល់មន្ត្រីសុខាភិបាលខណ្ឌ និងមណ្ឌលសុខភាព ធ្វើការបាញ់ថ្នាំមូសនៅតាមមូលដ្ឋានរៀងៗខ្លួន ដើម្បីធានាបាននូវសុខសន្តិភាព និងសុវត្ថិភាពជូនប្រជាពលរដ្ឋ។ នេះបើតាមការបញ្ជាក់បន្ថែមពីប្រធានមន្ទីរសុខាភិបាល។

លោក ងី មានហេង បញ្ជាក់បន្ថែមថា មន្ទីរសុខាភិបាលរាជធានីភ្នំពេញ កំពុងស្នើសុំគោលការណ៍បន្ថែមពីលោកអភិបាលរាជធានីភ្នំពេញ ដើម្បីដឹកនាំឱ្យសហគមន៍ចូលរួមលុបបំបាត់ជម្រកមូស។ លោកបន្តថា ៖«ការលុបបំបាត់ជម្រកមូសនេះដែរ គឺត្រូវការការចូលរួមពីប្រជាពលរដ្ឋ ដើម្បីលុបបំបាត់ថ្លុកដក់ទឹកដែលជាជម្រកមូស និងសម្អាតបរិស្ថានជុំវិញផ្ទះឱ្យបាន៣០០ម៉ែត្រ គ្រប់ៗគ្នា ទើបអាចកាត់បន្ថយការកកើតមូសទាំងនេះបាន»។

បច្ចុប្បន្ន រដ្ឋបាលរាជធានីភ្នំពេញ និងមន្ទីរសុខាភិបាលរាជធានីភ្នំពេញ បានសហការគ្នាយ៉ាងសស្រាក់សស្រាំ អនុវត្តយុទ្ធនាការកម្ចាត់មូសខ្លា និងមូសអង្កាម ដើម្បីឈានទៅលុបបំបាត់ជំងឺគ្រុនឈាមគ្រប់ទីតាំងភូមិសាស្ត្រក្នុងរាជធានីភ្នំពេញ៕

The post មន្រ្តីសុខាភិបាល៖ បច្ចុប្បន្នជំងឺគ្រុនឈាមនៅភ្នំពេញ ស្ថិតក្នុងស្ថានភាពគ្រប់គ្រងបាន appeared first on Kampuchea Thmey Daily.

ការ​អំពាវនាវ​បែបនេះ បានធ្វើឡើងនារសៀលថ្ងៃទី១៨ធ្នូ ឆ្នាំ២០២៤នេះ ខណៈ​លោក​បាន​អញ្ជើញក្នុង​ពិធី​ផ្សព្វផ្សាយការពង្រឹងនិយត័កម្មសុខាភិបាល ក្រោមអធិបតីភាព លោក​អ៊ឹមរ៉ន ហាស្សាន់ អភិបាលរងតំណាង​លោក​ឃួង ស្រេង អភិបាលនៃ គណៈអភិបាលរាជធានីភ្នំពេញនៅសាលារាជធានីភ្នំពេញ។

លោកងី មានហេង បាន​ឱ្យ​ដឹង​ថា ស្ថិតិ​សេវា​សុខាភិបាល​ឯកជន ក្នុង​ខែវិច្ឆិកា ឆ្នាំ២០២៤ ក្នុងរាជធានីភ្នំពេញ​ខ្នាត​តូច​មាន មានចំនួនសរុប៣.៨៤៧ ទីតាំង,ស្ថិតិ​ឱសថ​ស្ថាន​ឯកជន​ក្នុងខែវិច្ឆិកា មានចំនួន១៨០៣កន្លែង,អគារ​លក់ ឱសថបូរាណមាន៩២ទីតាំង។

លោក​ប្រធាន​មន្ទីរសុខាភិបាលបានអំពាវនាវដល់ អាជ្ញាធរ​ដែនដី បុគ្គលិកសុខាភិបាល​គ្រប់ជាន់ថ្នាក់​ត្រូវ​ចាត់​ការ​ភ្លាមនៅពេលដឹងថា មូលដ្ឋាន​នោះ​បើក​អាជីវកម្មលើវិស័យសុខាភិបាល​ដោយគ្មានច្បាប់អនុញ្ញាតិ ឬខុសច្បាប់។

លោក​ក៏​បាន​អំពាវ​នាវ​ដល់​អាជ្ញាធរដែនដី បុគ្គលិក​សុខាភិបាល ត្រូវ​ស្គាល់​ទី​តាំង​អាជីវកម្ម​ណា​ដែល​ខុស​ច្បាប់ ទីតាំងណាដែលស្របច្បាប់ ដោយអនុវត្តតាមការណែនាំរបស់រដ្ឋមន្ត្រីក្រសួងសុខាភិបាល ក៏ដូចប្រសាសន៏ណែនាំរបស់លោកឃួង ស្រេង អភិបាលរាជធានីភ្នំពេញ ដោយប្រាប់ឱ្យប្រធានមណ្ឌលសុខភាព សហការជាមួយអាជ្ញាធរដែនដី(ត្រូវចុះមើលផ្កា) មានន័យថាត្រូវដឹងពីទីតាំងអាជីវកម្ម ផ្តល់​សេវា​សុខាភិបាលឯកជនទាំងអស់​ក្នុង​មូលដ្ឋានរបស់ខ្លួនទទួលខុសត្រូវ។

លោក​អ៊ឹមរ៉ន ហាស្សាន់ បានមានប្រសាសន៍​ថា អ្នក​គ្មាន​វិជ្ជាជីវៈ​សុខាភិបាល មិន​អាច​ផ្តល់សេវាសុខាភិបាលបានទេ បើប្រព្រឹត្ត នោះ​ជា​អំពើ​ខុសច្បាប់។កន្លងមកយើងបានទប់ស្កាត់សេវាសុខាភិបាលឯកជនខុសច្បាប់​ជាហូរហែ ដូច​ជា​បន្ទប់​ពិគ្រោះព្យាបាលជំងឺខុសច្បាប់ មជ្ឈមណ្ឌលកែសម្ផស្សខុសច្បាប់ជាដើម។

លោក​អភិបាល​រង​រាជធានីភ្នំពេញបានក្រើនរំលឹកដល់អស់លោក លោក​ស្រី​អភិបាលរង​ខណ្ឌទាំង១៤សង្កាត់ទាំង១០៥ និង ថ្នាក់ដឹកនាំមន្ទីរសុខាភិបាលព្រមទាំងបុគ្គលិក សុខាភិបាលគ្រប់ជាន់ថ្នាក់ត្រូវត្រួតពិនិត្យឡើងវិញ នូវ​មូលដ្ឋានសុខាភិបាល​ឯកជន​ទាំងអស់​ដែល​បាន​ចែង​ក្នុង​ការណែនាំ​និង​ផ្សព្វផ្សាយ​ស្តីពីការ​ពង្រឹង​និយ័តកម្ម​សុខាភិបាល​ឯកជន​នៅរាជធានីភ្នំពេញ៕

ដោយ ៖ ស្រីរ័ត្ន

The post ប្រធាន​មន្ទីរ​សុខាភិបាល​រាជធានី ៖ មិន​ត្រូវ​ខ្លាច​បិទ​ទីតាំង​អាជីវកម្ម​សុខាភិបាល​ខុសច្បាប់ទេ appeared first on Kampuchea Thmey Daily.