មន្ទីរសុខាភិបាលខេត្តមណ្ឌលគិរី ជំរុញឱ្យពលរដ្ឋ ទៅទទួលការចាក់វ៉ាក់សាំងការពាកូវីដ-១៩ ឱ្យបានគ្រប់ៗគ្នា

យោងតាមសេចក្ដីប្រកាសព័ត៌មានរបស់ក្រសួងសុខាភិបាល បានបង្ហាញថា ស្ថានភាពការចម្លងវីរុសកូវីដ-១៩ កំពុងតែ កម្រើកឡើងវិញនៅក្នុងប្រទេសកម្ពុជា ដែលបានរកឃើញមានការឆ្លងដោយកន្លែង នៃជំងឺកូវីដ-១៩ ពីពពួកវីរុសបម្លែងថ្មីប្រភេទ ជេអិន១(JN.1) បង្ហាញពីលទ្ធភាពឆ្លងកាន់តែខ្ពស់ ឆ្លងលឿន និងអាចបញ្រ្ជបចូលប្រព័ន្ធភាពសាំរបស់មនុស្សកាន់តែខ្លាំងដោយសារការបន្តផ្លាស់ប្តូរនៅក្នុងប្រូតេអ៊ីនបង្គោលរបស់វីរុស។

ដោយមានការព្រួយបារម្ភអំពី វីរុសបម្លែងខ្លួនថ្មីនេះ មន្ទីរសុខាភិបាលខេត្តមណ្ឌលគិរី បានចេញសេចក្ដីជូនដំណឹងនៅថ្ងៃទី១៩ ខែឧសភា ឆ្នាំ២០២៥ ស្ដីពីការចាក់វ៉ាក់សាំងការពារជំងឺកូវីដ-១៩ ជូនដល់ថ្នាក់ដឹកនាំកងកម្លាំងប្រដាប់អាវុធ មន្ត្រីរាជការ និងប្រជាពលរដ្ឋទូទាំងខេត្តមណ្ឌលគិរី ទៅទទួលការចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នានៅតាមមន្ទីរពេទ្យបង្អែក និងមណ្ឌលសុខភាព ដែលនៅជិតបំផុត ដោយភ្ជាប់ឯកសារមកជាមួយ រួមមាន បណ្ណចាក់វ៉ាក់សាំងលើកមុន អត្តសញ្ញាណប័ណ្ណ ឬលិខិតបញ្ជាក់កំណើត ដើម្បីឱ្យក្រុមគ្រូពេទ្យបញ្ចូលទិន្នន័យក្នុងប្រព័ន្ធគ្រប់គ្រងការចាក់វ៉ាក់សាំង។

ក្រោយពីចេញសេចក្ដីជូនដំណឹងនេះ មន្ទីរសុខាភិបាលខេត្តមណ្ឌលគិរី សង្ឃឹមនិងជឿជាក់ថា មន្ត្រីរាជការកងកម្លាំងប្រដាប់អាវុធ និងប្រជាពលរដ្ឋ ក្នុងខេត្តមណ្ឌលគិរីទាំងអស់ នឹងមកទទួលការចាក់វ៉ាក់សាំងការពារជំងឺកូវីដ-១៩ ឱ្យបានគ្រប់ៗគ្នាដើម្បីការពារសុខភាព និងរួមចំណែកទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងសហគមន៍ ជាពិសេសវីរុសបម្លែងខ្លួនថ្មី(JN.1) នេះ៕

អត្ថបទ៖រៀម សុខហេង