ការជំរុញនេះធ្វើឡើងកាលពីថ្ងៃទី ១ ខែកក្កដា ឆ្នាំ ២០២៦ ក្នុងឱកាស លោករដ្ឋមន្ត្រី អញ្ជើញចុះសួរសុខទុក្ខ និង ពិនិត្យនៅមណ្ឌលសុខភាពគំរូ ព្រៃព្នៅ ស្ថិតនៅស្រុកពារាំង ខេត្តព្រៃវែង។

លោកសាស្ត្រាចារ្យ រដ្ឋមន្ត្រី មានប្រសាសន៍ថា «សម្រាប់ប្រជាពលរដ្ឋ មណ្ឌលសុខភាព គឺជាច្រកទ្វារទី ១ របស់ក្រសួងសុខាភិបាល ដែលពួកគាត់ជួបផ្ទាល់ជាបឋម ទន្ទឹមនឹងនោះ អាកប្បកិរិយា និង គុណភាពសេវា គឺជាកិត្តិយសរបស់វិស័យសុខាភិបាលទាំងមូល»។

លោករដ្ឋមន្ត្រី បន្ថែមថា ជ័យលាភីដែលមណ្ឌលសុខភាពព្រៃព្នៅ ទទួលបាន ជាមោទនភាពសម្រាប់ការសម្រេចបានកន្លងមក ប៉ុន្តែសូមប្រែក្លាយភាពជោគជ័យនេះទៅជាកម្លាំងជំរុញសម្រាប់ការកែលម្អជាបន្តបន្ទាប់ទៀត ព្រោះអ្នកវាយតម្លៃពិតប្រាកដគឺប្រជាពលរដ្ឋដែលមកទទួលសេវារាល់ថ្ងៃ។ រីឯគុណភាពសេវាជាការអនុវត្តដែលត្រូវបន្តជាប្រចាំ ហើយអ្នកជំងឺអាចជឿជាក់លើគ្រូពេទ្យជំនាញ លុះត្រាពួកគាត់មានអារម្មណ៍ថាទទួលបានការយកចិត្តទុកដាក់ជាមុន។

លោករដ្ឋមន្រ្តី បានថ្លែងអំណរគុណដល់មន្រ្តីសុខាភិបាលទាំងអស់ ដែលបានខិតខំផ្តល់សេវាសុខាភិបាល រហូតទទួលបានការវាយតំលៃជាវិជ្ជមាន ពីថ្នាក់ដឹកនាំ នៃរាជរដ្ឋាភិបាល និង បានជំរុញឱ្យមន្រ្តីសុខាភិបាល រក្សារូបភាពវិជ្ជមាននេះឱ្យមាននិរន្តរភាព។

បើតាមក្រុមការងារ នៃមណ្ឌលសុខភាពស្វាយជុក នៃមន្ទីរសុខាភិបាលខេត្តកំពង់ឆ្នាំង ធ្លាប់បានលើកឡើងនាពេលថ្មីៗ នេះថា ការរួបរួមសាមគ្គីគ្នា រវាងបុគ្គលិកមណ្ឌលសុខភាព និង ការសហការល្អរវាងមណ្ឌលសុខភាព និង អាជ្ញាធរមូលដ្ឋាន គឺជាចំណុចខ្លាំងរបស់មណ្ឌលសុខភាព ហើយលទ្ធផល នៃការសហការដ៏ល្អនេះ បានជំរុញឱ្យមណ្ឌលសុខភាពទទួលបានការគាំទ្រយ៉ាងខ្លាំងពីអាជ្ញាធរគ្រប់លំដាប់ថ្នាក់ សហគមន៍ និង ការិយាល័យសុខាភិបាលស្រុកប្រតិបត្តិ នៅក្នុងដំណើរអភិវឌ្ឍន៍ខ្លួនឱ្យក្លាយទៅជាមណ្ឌលសុខភាពគំរូថ្នាក់ជាតិ៕
អត្ថបទ ៖ សំអឿន

The post រដ្ឋមន្ត្រីសុខាភិបាល ជំរុញមន្ត្រី ត្រូវផ្តល់សេវាដោយភាពរាក់ទាក់ មានគុណភាព ដើម្បីលើកមុខមាត់វិស័យសុខាភិបាល appeared first on Kampuchea Thmey Daily.

ការប្តេជ្ញានេះបានធ្វើឡើងកាលពីថ្ងៃទី ២ ខែមិថុនា ឆ្នាំ ២០២៦ ក្នុងឱកាសលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបសម្តែងការគួរសម និង ពិភាក្សាការងារ ជាមួយ លោក Sonexay Vannaxay ឯកអគ្គរដ្ឋទូតវិសាមញ្ញ និង ពេញសមត្ថភាព នៃសាធារណរដ្ឋប្រជាធិបតេយ្យប្រជាមានិតឡាវ ប្រចាំព្រះរាជាណាចក្រកម្ពុជា នៅទីស្តីការក្រសួង។

នៅក្នុងជំនួបនោះ លោកសាស្ត្រាចារ្យរដ្ឋមន្ត្រី បានបញ្ជាក់ពីការត្រៀមខ្លួនរបស់ក្រសួងសុខាភិបាលកម្ពុជា ក្នុងការបន្តធ្វើការជាមួយស្ថានទូត និង ក្រសួងសុខាភិបាលឡាវ ដើម្បីជំរុញការរៀបចំអនុស្សរណៈ នៃការយោគយល់គ្នាថ្មីរវាងក្រសួងសុខាភិបាល នៃប្រទេសទាំងពីរ ដោយផ្តោតលើការបង្ការ និង គ្រប់គ្រងជំងឺឆ្លង ជាពិសេសជំងឺគ្រុនចាញ់ នៅតាមបណ្តាខេត្តជាប់ព្រំដែន និង ឆ្លើយតបឲ្យបានទាន់ពេលវេលាចំពោះស្ថានការណ៍អាសន្នផ្នែកសុខាភិបាល ជាពិសេសនៅច្រកព្រំដែន ព្រមទាំងពង្រឹងសមត្ថភាពរួម ក្នុងការអនុវត្តនិយ័តកម្មសុខភាពអន្តរជាតិ តាមរយៈការបណ្តុះបណ្តាលរួម ការវាយតម្លៃ និង ការផ្លាស់ប្តូរព័ត៌មានសុខាភិបាលជាក់ស្តែង។

ក្នុងកិច្ចពិភាក្សា ភាគីទាំងពីរ បានផ្តោតលើលទ្ធភាព ពង្រឹងកិច្ចសហប្រតិបត្តិការវិស័យសុខាភិបាល ជាពិសេសកិច្ចសហប្រតិបត្តិការសុខាភិបាលរវាងខេត្តជាប់ព្រំដែន នៃប្រទេសទាំងពីរ។ លើសពីនេះ ភាគីទាំងពីរ បានឯកភាពឲ្យមានការផ្លាស់ប្តូរចំណេះដឹងដោយផ្ទាល់រវាងមន្ទីរសុខាភិបាលខេត្តជាប់ព្រំដែន តាមរយៈការប្រាស្រ័យទំនាក់ទំនងគ្នាជាប្រចាំ ការរៀបចំលំហាត់សមយុទ្ធរួមនៅទីតាំងជាក់ស្តែង និង ការចែករំលែកបទពិសោធពីករណីជំងឺឆ្លងដែន ដើម្បីពង្រឹងសមត្ថភាពត្រៀមបង្ការ និង ឆ្លើយតបរួមឲ្យកាន់តែមានប្រសិទ្ធភាព។

ក្រសួងសុខាភិបាល សូមស្វាគមន៍គំនិតផ្តួចផ្តើមរៀបចំពិព័រណ៍ឱសថ និង បរិក្ខារពេទ្យរួម ដើម្បីអបអរសាទរខួប ៧០ ឆ្នាំ នៃទំនាក់ទំនងការទូតកម្ពុជា-ឡាវ និង បន្តគាំទ្រគ្នាក្នុងក្របខណ្ឌអាស៊ាន មេគង្គ-ឡានឆាង និង កិច្ចសហប្រតិបត្តិការកម្ពុជា-ឡាវ-វៀតណាម៕
អត្ថបទ ៖ សំអឿន

The post កម្ពុជា-ឡាវ ប្តេជ្ញាពង្រឹងកិច្ចសហប្រតិបត្តិការលើវិស័យសុខាភិបាល ខេត្តជាប់ព្រំដែនប្រទេសទាំងពីរ appeared first on Kampuchea Thmey Daily.

ការប្តេជ្ញាចិត្តនេះបានធ្វើឡើងកាលពីថ្ងៃទី ១៨ ខែឧសភា ឆ្នាំ ២០២៦ នៅក្នុងកិច្ចពិភាក្សាថ្នាក់រដ្ឋមន្ត្រី ស្តីពីរបួសខួរក្បាលដោយការប៉ះទង្គិច នៅមហាសន្និបាតសុខភាពពិភពលោក លើកទី ៧៩ នៅទីក្រុងហ្សឺណែវ ប្រទេសស្វីស។

ចូលរួមជាវាគ្មិនកិត្តិយស ក្នុងកិច្ចពិភាក្សាថ្នាក់រដ្ឋមន្ត្រី ស្តីពី “ភាពជាអ្នកដឹកនាំជាតិ និង ការប្តេជ្ញាចិត្តជាសកលលើប្រធានបទ របួសខួរក្បាលដោយការប៉ះទង្គិចរួមមាន លោកសាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល តំណាងព្រះរាជាណាចក្រកម្ពុជា និង ថ្នាក់ដឹកនាំរដ្ឋមន្ត្រីមកពីប្រទេសហ្គាតេម៉ាឡា អ៊ីតាលី ប៉ាគីស្ថាន និង តង់ហ្សានី។

នៅក្នុងកិច្ចពិភាក្សា លោកសាស្ត្រាចារ្យ ឡឹម តារា បានលើកឡើងថា របួសខួរក្បាលដោយការប៉ះទង្គិច គឺជាបញ្ហាប្រឈមដ៏សំខាន់ផ្នែកវេជ្ជសាស្ត្រ សេដ្ឋកិច្ច និង សង្គម ហើយកំពុងមាននិន្នាការកើនឡើងនៅក្នុងប្រទេសកម្ពុជា ដែលភាគច្រើនបណ្តាលមកពីគ្រោះថ្នាក់ចរាចរណ៍។

លោកសាស្រ្តាចារ្យ បានគូសបញ្ជាក់ពីអាទិភាពជាតិរបស់កម្ពុជា ក្នុងការដោះស្រាយបញ្ហានេះ តាមរយៈវិធានការសំខាន់ៗ ដូចជា ៖ ១.ការផ្សព្វផ្សាយឱ្យប្រជាជនយល់ដឹងអំពីសារៈសំខាន់ នៃការពាក់មួកសុវត្ថិភាពឱ្យកាន់តែប្រសើរ។ ២.ការអនុវត្តច្បាប់សុវត្ថិភាពចរាចរណ៍។ ៣.ការពង្រឹងប្រព័ន្ធថែទាំមុនចូលមន្ទីរពេទ្យ និង ប្រព័ន្ធសង្គ្រោះបន្ទាន់។ ៤.ការស្តារសមត្ថភាពពលកម្ម រួមជាមួយការថែទាំរយៈពេលវែង។ ៥.ការវិនិយោគជាបន្តបន្ទាប់លើធនធានមនុស្ស ក្នុងជំនាញវះកាត់សរសៃប្រសាទ ការវះកាត់របួស និង ការសង្គ្រោះកម្រិតធ្ងន់ធ្ងរ។

លោកសាស្រ្តាចារ្យ បានលើកឡើងថា កម្ពុជា បានបញ្ជាក់ជាថ្មីនូវការប្តេជ្ញាចិត្តរបស់ខ្លួន ក្នុងការគាំទ្រភាពជាដៃគូសកល ដើម្បីកាត់បន្ថយបន្ទុក នៃរបួសខួរក្បាលដោយការប៉ះទង្គិច ដែលបណ្តាលឱ្យមានការស្លាប់អាចការពារបាន និង ពិការភាពរយៈពេលវែង។

កាលពីថ្ងៃទី ១៨ ខែឧសភា ឆ្នាំ ២០២៦ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និង គណៈប្រតិភូជាន់ខ្ពស់ក្រសួងសុខាភិបាល អមដំណើរដោយ លោកឯកអគ្គរាជទូត កែ សុវណ្ណ តំណាងអចិន្ត្រៃយ៍ នៃកម្ពុជាប្រចាំអង្គការសហប្រជាជាតិ និង អង្គការអន្តរជាតិ នៅទីក្រុងហ្សឺណែវ ប្រទេសស្វីស បានអញ្ជើញចូលរួមក្នុងពិធីបើកមហា សន្និបាតសុខភាពពិភពលោក លើកទី ៧៩ ក្រោមប្រធានបទ «ការកែទម្រង់សុខភាពសកល ៖ ការទទួលខុសត្រូវរួមគ្នា» ក្រោមអធិបតីភាពរបស់ លោកវេជ្ជបណ្ឌិត Tedros Adhanom Ghebreyesus អគ្គនាយកអង្គការសុខភាពពិភពលោក ដោយមានការចូលរួមពីរដ្ឋមន្ត្រីសុខាភិបាលទូទាំងពិភពលោក នៃបណ្តារដ្ឋសមាជិកចំនួន ១៩៤៕
អត្ថបទ ៖ សំអឿន

The post កម្ពុជា បញ្ជាក់ជាថ្មីក្នុងការប្តេជ្ញាចិត្តគាំទ្រភាពជាដៃគូសកល ដើម្បីកាត់បន្ថយបន្ទុក នៃរបួសខួរក្បាលដោយការប៉ះទង្គិច appeared first on Kampuchea Thmey Daily.

ថ្លែងក្នុងពិធីបិទ​សន្និបាត​បូកសរុបការងារសុខាភិបាលឆ្នាំ ២០២៥ និងលើកទិសដៅឆ្នាំ ២០២៦ របស់​មន្ទីរ​សុខាភិបាល នៃរដ្ឋបាលខេត្តកំពង់ឆ្នាំង កាលពីថ្ងៃទី ១៩ ខែមីនា លោក​សាស្ត្រាចារ្យ ឈាង រ៉ា បាន​ជំរុញ​ឲ្យ​មន្ត្រីត្រូវបន្តបង្កើនគុណភាពសេវា​ឲ្យ​ប្រសើរ​តាមរយៈ​ការ​អនុវត្ត​ស្តង់ដារ និង​គោលការណ៍​បច្ចេកទេស​សុខាភិបាល , ពង្រឹង​សមត្ថភាព​សង្គ្រោះបន្ទាន់នៅមន្ទីរពេទ្យបង្អែក , ធ្វើ​ទំនើបកម្ម​ប្រព័ន្ធ​ព័ត៌មាន​សុខាភិបាល , គ្រូពេទ្យ និង​អ្នក​វិជ្ជាជីវៈ ត្រូវរក្សាសេចក្តីថ្លៃថ្នូរ និង​ក្រម​សីលធម៌​វិជ្ជាជីវៈ។ លើសពីនេះទៀត ត្រូវយកចិត្តទុកដាក់ កែលម្អ​ហេដ្ឋារចនាសម្ព័ន្ធ និង​សម្ភារ​បរិក្ខារ​នៅ​គ្រប់មន្ទីរពេទ្យ មណ្ឌលសុខភាព និងថែទាំអគារ និងបន្ទប់បម្រើសេវាឲ្យបានសមស្រប រួម​ទាំង​អនាម័យល្អ , បរិក្ខារពេទ្យ និង​ប្រព័ន្ធ​​ការ​គ្រប់គ្រង​ឲ្យ​បាន​ត្រឹមត្រូវ។ បន្ថែម​ពី​នេះ ត្រូវ​បង្ការ​ជំងឺ​ឆ្លង និងស្រាវជ្រាវជំងឺមិនឆ្លងតាមរយៈការពង្រឹងការតាមដាន និងឆ្លើយតបជំងឺឆ្លង​រាតត្បាត​ឲ្យ​បាន​ឆាប់ និងដោយ​បុរេ​សកម្ម និងបន្តកម្មវិធីចាក់វ៉ាក់សាំងបង្ការដល់កុមារឲ្យបានគ្រប់ៗ គ្នា និង​ការ​អប់រំ​សុខភាព​ដល់​ប្រជាពលរដ្ឋ។ បង្កើនការថែទាំមុនពេលសម្រាល និងក្រោយសម្រាល ធានា​ការ​សម្រាល​ដោយ​សុវត្ថិភាព និងពង្រីកកម្មវិធី​អាហារូបត្ថម្ភ​កុមារ​ដើម្បី​លើក​កម្ពស់​សុខភាព​មាតា ទារក និង​កុមារ​កាន់តែ​ប្រសើរ។ លើកទឹកចិត្ត​សហគមន៍​ចូល​រួម​ក្នុង​ការ​ថែទាំ​សុខភាព និង​ការ​ផ្សព្វផ្សាយ​អប់រំ​សុខភាព​ដល់​ប្រជាពលរដ្ឋ ពង្រឹងតួនាទី​គណៈកម្មការ​គ្រប់គ្រង​មណ្ឌល​សុខភាព និង​ក្រុម​ទ្រទ្រង់​សុខភាព​ភូមិ​ដើម្បីលើកកម្ពស់ការចូលរួមរបស់សហគមន៍ និងបង្កើនកិច្ចសហការគ្រប់វិស័យ អាជ្ញាធរ​មូលដ្ឋាន អង្គការដៃគូនានា។

លោក​រដ្ឋមន្ត្រី បានណែនាំថ្នាក់ដឹកនាំ និងមន្ត្រីសុខាភិបាលទាំងអស់ មិនត្រូវមើលរំលងចំណុច​ខ្សោយ​របស់​ខ្លួន​ឡើយ ព្រោះថាការទទួលស្គាល់ចំណុចទាំងនោះ គឺជា​ជំហានឆ្ពោះទៅរកការ​កែលម្អ​បាន​ប្រសើរ​ឡើង៕

អត្ថបទ ៖ សំអឿន

The post រដ្ឋមន្ត្រីសុខាភិបាល ណែនាំពង្រឹងសមត្ថភាពមណ្ឌលសុខភាព និងមន្ទីរពេទ្យបង្អែក ឲ្យបានរឹងមាំ appeared first on Kampuchea Thmey Daily.

នៅក្នុង​ពិធី​បើក​សិក្ខាសាលា​ស្ដីពី​ការ​ពិនិត្យ​លទ្ធផល​ឆ្នាំ​ ២០២៥ និង​ការរៀបចំ​ផែនការ​អនុវត្ត​សកម្មភាព​ឆ្នាំ ​២០២៦ សម្រាប់​មន្ទីរពេទ្យ​រាជធានី ខេត្ត នៅ​សណ្ឋាគារ​រ៉េស៊ីដង់ សុខា ភ្នំពេញ​ កាលពី​ថ្ងៃទី ​៥​ កុម្ភៈ លោក​រដ្ឋមន្ត្រី ​បាន​បន្តថា ​«ប្រជាពលរដ្ឋ​នៅ​ទូទាំងប្រទេស មាន​ក្តីសង្ឃឹម និង​ជឿជាក់​ថា នៅពេលដែល​ក្រុមគ្រួសារ ឬ​មនុស្ស​ជាទី​ស្រឡាញ់​របស់​គាត់ ត្រូវការ​ការ​ថែទាំ ព្យាបាល ជា​ពិសេស​ម្តាយ​សម្រាលកូន នៅពេលដែល​អ្នកជំងឺ​ត្រូវការ​ការវះកាត់ ឬ​នៅពេលដែល​ត្រូវការ​ចម្លើយ​រោគវិនិច្ឆ័យ​ជាបន្ទាន់ គឺ​ មន្ទីរពេទ្យ តែងតែ​បម្រើ​ប្រកប​ដោយ​សុវត្ថិភាព គុណភាព សមភាព និង​ទាន់ពេលវេលា តាម​ការ​ជាក់ស្តែង​របស់​យើង។ ទំនុក​ចិត្ត​ទាំងនេះ គឺជា​ចំណុច​ដ៏​ល្អ ហើយ​ការ​រៀបចំ​សិក្ខាសាលា​ នា​ថ្ងៃនេះ ជា​ការ​ប្រមូលផ្ដុំ ដើម្បី​បង្កើន​ភាព​ទុកចិត្ត និង​ក្តីសង្ឃឹម​ដល់​អ្នកជំងឺ ឱ្យ​ស័ក្ដិសម​នឹង​ទទួល​បាន​នូវ​គុណ​តម្លៃ​នេះ​»។

លោក​រដ្ឋមន្ត្រី បានលើកឡើង​ទៀតថា «ការ​វិនិយោគ​លើ​គុណភាព​សេវា​សុខាភិបាល​នៅថ្ងៃនេះ គឺជា​ការវិនិយោគ​លើ​មូលធន​មនុស្ស​សម្រាប់​ថ្ងៃ​អនាគត។ បើ​ប្រជាជន​មាន​សុខភាព​ល្អ ប្រជាជន​នឹង​មាន​សមត្ថភាព​ខ្ពស់​ក្នុង​ការ​រៀន​សូត្រ បង្កើន​ផលិតភាព ​និង​ចូលរួម​អភិវឌ្ឍន៍​សេដ្ឋកិច្ចជាតិ​ឱ្យ​កាន់តែ​រីកចម្រើន ស្របតាម​គោលនយោបាយ​របស់​រាជរដ្ឋាភិបាល។ គោលដៅ​យុទ្ធសាស្ត្រ​របស់​យើង គឺ​ការ​បម្រើ​សេវា​ដែល​ប្រកបដោយ​គុណភាព សុវត្ថិភាព និង​ប្រសិទ្ធភាព និង​សមធម៌​»។

លោក​រដ្ឋមន្ត្រី បាន​ណែនាំ​មន្ទីរពេទ្យ​ជាតិ ​ត្រូវ​មាន​ទំនាក់ទំនង​ល្អ ខិតខំ​ឆ្លើយតប ​និង​ជួយ​ដល់​មន្ទីរពេទ្យ​ខេត្ត​ដែល​ជា​សម្ព័ន្ធ​មេត្រី​គ្នា ក្នុង​ភាព​ជា​លំនាំ​ការ​រៀបចំ​រចនាសម្ព័ន្ធ​ និង​បទបញ្ជាផ្ទៃក្នុង​នៅ​មន្ទីរពេទ្យ​ខ្លួន​ឱ្យ​បាន​ត្រឹមត្រូវ។ ចំណែក​ថ្នាក់ដឹកនាំ និង​អ្នក​ជំនាញ​សុខាភិបាល ត្រូវ​ពិនិត្យ​លើ​ដំណើរការ​របស់​អង្គភាព​ជា​រួម​តាម​បែបបទ​រដ្ឋបាល នៃ​ការ​គ្រប់គ្រង​លក្ខន្តិកៈ​ដោយឡែក ធនធាន​មនុស្ស និង​ការ​ទុកដាក់​គ្រប់គ្រង​ហិរញ្ញវត្ថុ​បាន​ត្រឹមត្រូវ​សមស្រប​តាម​នីតិវិធី។

លើស​ពី​នេះ​ទៀត ​ថ្នាក់ដឹកនាំ បុគ្គលិក មន្ត្រីរាជការ​សុខាភិបាល ត្រូវ​ខិតខំ​បង្កើត​ស្នាដៃ (Legacy) នៃ​ការងារ​វិជ្ជាជីវៈ​របស់​ខ្លួន ទុកជា​ថ្ងៃ​អនាគត​សម្រាប់​អ្នក​បន្ត​ជំនាន់​ក្រោយ៕

អត្ថបទ ៖ សំអឿន

The post រដ្ឋមន្ត្រីសុខាភិបាល អះអាងថា មន្ទីរពេទ្យរាជធានី ខេត្ត និងស្រុក ជាសសរទ្រូង នៃក្តីសង្ឃឹមសម្រាប់ប្រជាពលរដ្ឋកម្ពុជា appeared first on Kampuchea Thmey Daily.

ថ្លែង​ក្នុង​សន្និសីទ​សារ​ព័ត៌មាន​ស្ដីពី​សមិទ្ធផល​ការងារ​ឆ្នាំ​ ២០២៥ ​របស់​ក្រសួងសុខាភិបាល​ កាលពី​រសៀល​ថ្ងៃ​ទី ២៦ ​មករា លោក​រដ្ឋមន្ត្រី​ បាន​បន្តថា ​ក្នុងនោះ​ ករណី​ជំងឺ​ទឹកនោមផ្អែម​ថ្មី​ បាន​មក​ពិនិត្យ​ព្យាបាល​ជំងឺ​នៅ​មូលដ្ឋាន​សុខាភិបាល​មាន​ចំនួន ​២៩២១៩៧​ ករណី ​មានការ​កើនឡើង ២៦,៨%​ បើ​ប្រៀបធៀប​នឹង​ឆ្នាំ ​២០២៤​ និង​មាន​អ្នកជំងឺ​សម្រាក​ពេទ្យ​ចំនួន​ ១៨៤២៩​ នាក់​។ ចំណែក ករណី​ថ្មី​ ជំងឺ​លើស​សម្ពាធ​ឈាម​វិញ​ មាន​អ្នកជំងឺ​មក​ពិនិត្យ​ព្យាបាល​ជំងឺ​នៅ​មូលដ្ឋាន​សុខាភិបាល​មាន​ចំនួន​ ៤៥១០០៩​ ករណី​ កើនឡើង​ ១២,២០%​ និង​មាន​អ្នកជំងឺ​សម្រាក​ពេទ្យ​ ៤១៤៦៣ ​នាក់ កើន​ឡើង ​១៩,១៧%​ ធៀប​នឹង​ឆ្នាំ​ ២០២៤។ ចំពោះ​ករណី​ថ្មី​ នៃ​ជំងឺ​​សរសៃឈាម​បេះដូងមាន ​អ្នកជំងឺ​ពិនិត្យ​ព្យាបាល​ជំងឺ​នៅ​មូលដ្ឋាន​សុខាភិបាល​មាន​ចំនួន​ ១៥៣២៤ ​ករណី​ និង​អ្នកជំងឺ​សម្រាក​ពេទ្យ​ ២៥៤៨០​ នាក់​ ក្នុងនោះ​ ស្លាប់​ ១០៩១​ នាក់​ និង​ករណី​ថ្មី​ នៃ​ជំងឺ​មហារីក មាន​អ្នកជំងឺ​ពិនិត្យ​ព្យាបាល​ជំងឺ​នៅ​មូលដ្ឋាន​សុខាភិបាល​មាន​ចំនួន ​៣៥៩២១​ ករណី​ កើនឡើង​ ១៣,៩%​ ធៀប​នឹង​ឆ្នាំ ២០២៤ ​ក្នុងនោះ ​ស្លាប់ ១៥៥ នាក់។

បើ​តាម​ លោក​រដ្ឋមន្ត្រី​ ថា ការកើនឡើង ​នៃ​ជំងឺមិនឆ្លង​ នាពេលនេះ កើតឡើង​ដោយសារ​កត្តា​ហានិភ័យ​ពាក់ព័ន្ធ​នឹង​ឥរិយាបថ​ចម្បង​រួមគ្នា ​គឺ របប​អាហារ​ដែល​គ្មាន​សុខុមាលភាព ការប្រើប្រាស់​ថ្នាំ​ជក់ កង្វះ​សកម្មភាព​រាងកាយ និង​ការ​ប្រើប្រាស់​គ្រឿង​ស្រវឹង។ ឥរិយាបថ​ដែល​គ្មាន​សុខុមាលភាព ចូលរួម​ចំណែក​ធ្វើ​ឲ្យ​មាន​កត្តា​ហានិភ័យ​ផ្នែក​ជីវសាស្ត្រ​ពាក់ព័ន្ធ រួមមាន ការ​ឡើង​សម្ពាធ​ឈាម ការ​កើនឡើង​ជាតិ​ស្ករ និង​កូ​ឡេ​ស្តេ​រ៉ុល​ក្នុង​ឈាម ការ​លើស​ទម្ងន់ ភាព​ធាត់ និង​ការ​ប្រែប្រួល​ប្រជាសាស្ត្រ​ក៏​ជា​កត្តា​ចូលរួម​ចំណែក​ឲ្យ​កើត​មាន​ជំងឺ​មិន​ឆ្លង។ ដូច្នេះ ការ​បង្ការ​ជំងឺ​មិន​ឆ្លង អាច​អនុវត្ត​ប្រកប​ដោយ​ជោគជ័យ​បាន ចាំបាច់​ត្រូវមាន​ការចូលរួម​ពី​ប្រជាជន​គ្រប់រូប អង្គការ​ដៃគូ ក្រសួង​ស្ថាប័ន-ពាក់ព័ន្ធ និង​ការ​ចូលរួម​របស់​អាជ្ញាធរ ភូមិ ឃុំ សង្កាត់។

លោក​រដ្ឋមន្ត្រី បញ្ជាក់​ទៀតថា ​ក្នុងការ​ជៀសវាង​បាន​ពី​ជំងឺ និង​ស្លាប់​ដោយសារ​ជំងឺមិនឆ្លង​ចម្បងៗ ត្រូវការ​សមត្ថភាព​ប្រព័ន្ធ​សុខាភិបាល រឹងមាំ អភិក្រម នវានុវត្តន៍ និង​យន្តការ​ហិរញ្ញប្បទាន​សមស្រប ដើម្បី​ផ្តល់​សេវា​ជំងឺ​មិន​ឆ្លង សេវា​ជំងឺ​សុខភាព​ផ្លូវចិត្ត ប្រកប​ដោយ​ប្រសិទ្ធភាព និង​កាត់បន្ថយ​ជា​អតិបរមា​ឥរិយាបថ​ហានិភ័យ​ដល់​សុខភាព នៅ​ក្នុង​ក្របខណ្ឌ​រួម ​នៃ​ការ​ពង្រឹង​សមត្ថភាព និង​ទំនើបកម្ម​ប្រព័ន្ធ​ផ្តល់​សេវា​ថែទាំ​សុខភាព៕

អត្ថបទ ៖ សំអឿន

The post រដ្ឋមន្ត្រីសុខាភិបាល ៖ ឆ្នាំ ២០២៥ ជំងឺមិនឆ្លង ៤ ប្រភេទ ហក់ឡើងខ្ពស់គួរឲ្យព្រួយបារម្ភ appeared first on Kampuchea Thmey Daily.

ថ្លែង​ក្នុង​ពិធី​ប្រកាស​ដាក់ឱ្យអនុវត្ត​ជា​ផ្លូវការ​ម​គ្គុ​ទេ្ទ​សក៍​ព្យាបាល​គ្លីនិក វេជ្ជសាស្ត្រ​ទូទៅ សល្យសាស្ត្រ វេជ្ជសាស្ត្រ​កុមារ សម្ភព​ និង​រោគ​ស្ត្រី និង​ទន្តសាស្ត្រ កាលពី​ថ្ងៃទី ​៨​ មករា លោក​រដ្ឋមន្ត្រី​ បាន​បន្តថា ដាក់ឱ្យ​ប្រើប្រាស់​ជា​ផ្លូវការ​មគ្គុទេសក៍​ព្យាបាល​គ្លីនិក​នេះ​ជា​ជំហាន​ដ៏​សំខាន់​មួយ​ក្នុងការ​ធានាថា អ្នកជំងឺ​គ្រប់រូប​នៅ​គ្រប់​ទីកន្លែង​អាច​ទទួលបាន​សេវា​ថែទាំ និង​ព្យាបាល​ប្រកបដោយ​គុណភាព ផ្អែក​លើ​ភស្តុតាង និង​ផ្តោតលើ​មនុស្ស​ជា​មូលដ្ឋាន ​ពិសេស​នឹង​ចូលរួម​គាំទ្រ​កំណែទម្រង់​ប្រព័ន្ធ​សុខាភិបាល​ទូលំទូលាយ​ផងដែរ ជូន​ប្រជាជន​គ្រប់រូប ទទួលបាន​តាមរយៈ​សេចក្ដីណែនាំ​ប្រតិបត្តិ និង​សំណុំ​សកម្មភាព​សម្រាប់​អភិវឌ្ឍន៍​មន្ទីរពេទ្យបង្អែក ជួយ​ពង្រឹង​គោលនយោបាយ​ជាតិ​សម្រាប់​ប្រព័ន្ធ​បញ្ជូន និង​គាំទ្រ​ការលើកកម្ពស់​ស្តង់ដារ​ទទួលស្គាល់​គុណភាព​មន្ទីរពេទ្យ។

លោក​រដ្ឋមន្ត្រី​ បាន​បន្ថែមទៀតថា ​លើសពីនេះ​ មគ្គុទ្ទេសក៍​នេះ នឹង​ជួយ​ជា​គោលការណ៍​ក្នុង​ការ​បង្ហាញ​ផ្លូវ​ឱ្យ​កាន់តែច្បាស់​ពី​កត្តា​ធ្វើឱ្យមាន​សុវត្ថិភាព និង​កត្តា​ដែល​អាច​កាត់បន្ថយ​ការ​ធ្ងន់​ខ្លាំង ដែល​ជួយ​ឱ្យ​ក្រុមគ្រូពេទ្យ​កាន់តែ​ប្រាកដ​ពី​ការ​អនុវត្តបាន ឬ​មិនបាន ត្រូវ​បញ្ជូនបន្ត ទាន់ពេលវេលា និង​ចំ​គោលដៅ ព្រមទាំង​ជួយ​ដល់​ចំណុច​អាទិភាព ឬ​ពុំ​ចាំបាច់ ​ក៏ដូចជា​ជួយ​នៅពេល​ធ្វើ​អភិបាលកិច្ច ដើម្បីឱ្យ​កាន់តែ​មានគុណ​ភាព និង​ប្រសើរឡើង​ថែមទៀត ឈាន​សម្រេច​បានការ​គ្របដណ្តប់​សុខភាព​ជា​សកល ស្របតាម​គោលនយោបាយ​របស់​រាជរដ្ឋាភិបាល និង​ផែនការ​យុទ្ធសាស្ត្រ​សុខាភិបាល។

លោក​រដ្ឋមន្ត្រី បាន​ណែនាំ​ដល់​អ្នកជំនាញ​សុខាភិបាល​ទាំងអស់ និស្សិត​វេជ្ជសាស្ត្រ អ្នកគ្រប់គ្រង​មន្ទីរពេទ្យ សាធារណៈ និង​ឯកជន ត្រូវ​ប្រើប្រាស់​ម​គ្គុ​ទេ្ទ​សក៍​ព្យាបាល​គ្លីនិក​ទាំងនេះ ក្នុងការ​អនុវត្ត​កិច្ចការ​ប្រចាំថ្ងៃ​ឱ្យបាន​ខ្ជាប់ខ្ជួន​។ ពិនិត្យ​លទ្ធភាព​ក្នុងការ​បង្កើត​ជា Mobile App គ្រប់​មគ្គុទេសក៍​ព្យាបាល​គ្លីនិក ដើម្បី​ងាយស្រួល​ដល់​គ្រូពេទ្យ​ក្នុងការ​ប្រើប្រាស់​ក្នុងពេល​បម្រើសេវា​ និង​ធ្វើការ​សិក្សា​ស្ទង់​មតិ​អំពី​ផលប្រយោជន៍ ការពេញចិត្ត ក្នុងការ​អនុវត្ត​មគ្គុទេសក៍​ព្យាបាល​គ្លីនិក ក្នុង​កិច្ចការ​អនុវត្ត​ការ​ថែទាំ​ព្យាបាល​ប្រចាំថ្ងៃ៕

អត្ថបទ ៖ សំអឿន

The post រដ្ឋមន្ត្រីសុខាភិបាល អះអាងថា មគ្គុទេសក៍ព្យាបាលគ្លីនិកជាផែនទីចង្អុលផ្លូវដ៏សំខាន់ ក្នុងការផ្តល់សេវាថែទាំ និងព្យាបាលអ្នកជំងឺប្រកបដោយគុណភាព appeared first on Kampuchea Thmey Daily.

ក្នុងឱកាសចុះសួរសុខទុក្ខសហភាតរៈនៅតាមនាយកដ្ឋាននានា រដ្ឋមន្ត្រីក្រសួងសុខាភិបាលបាល បានអរគុណដល់វេជ្ជបណ្ឌិត គិលានុបដ្ឋាយិកា ឆ្មប និងក្រុមថែទាំសុខភាពទាំងអស់ ដែលកំពុងគាំទ្រការបន្តបម្រើសេវាសង្គ្រោះព្យាបាលប្រជាជន និងវីរកងទ័ព ជាមួយភាពក្លាហាន និងវិន័យខ្ពស់ក្នុងភារកិច្ចដោយឥតនឿយហត់។

បើតាមក្រសួងសុខាភិបាល នៅក្នុងស្ថានភាពបច្ចុប្បន្ន ដែលប្រទេសជាតិកំពុងប្រឈមមុខនឹងសកម្មភាពឈ្លានពានពីកងទ័ពថៃ មកលើដែនអធិបតេយ្យភាព និងបូរណភាពដែនដីកម្ពុជា ក្រសួងបានពង្រឹងប្រព័ន្ធសុខាភិបាលជាប់ជាប្រចាំ ជាពិសេសប្រព័ន្ធបញ្ជូនអ្នកជំងឺសង្គ្រោះបឋម និងសង្គ្រោះបន្ទាន់ មានសារៈសំខាន់ខ្លាំង និងជាអាទិភាពមួយក្នុងចំណោមវិស័យគន្លឹះទាំង៩ សម្រាប់ធានាសុវត្ថិភាព និងសុខុមាលភាពប្រជាពលរដ្ឋ។

ដោយឡែក នៅក្នុងសកម្មភាពចុះពិនិត្យ និងគាំទ្រការបម្រើសេវាសុខាភិបាល នៅតាមមន្ទីរពេទ្យបង្អែកខេត្ត ស្រុក និងមណ្ឌលសុវត្ថិភាព ក្នុងខេត្តព្រះវិហារ លោករដ្ឋមន្ត្រី តាមរយៈមន្ត្រីជាន់ខ្ពស់ក្រសួងសុខាភិបាល បានផ្តាំផ្ញើដល់មន្ត្រីសុខាភិបាលទាំងអស់ ដែលកំពុងបំពេញភារកិច្ចយ៉ាងសកម្ម នៅតាមខេត្តជាប់ព្រំដែន ក្នុងរូបភាពជាកងទ័ពអាវស។ ព្រមទាំងបានជួបពិភាក្សា និងផ្ដល់យោបល់ដល់ថ្នាក់ដឹកនាំ មន្ទីរ​សុខាភិបាល​ ការិយាល័យ​ស្រុក​ប្រតិបត្តិ​ មណ្ឌលសុខភាព មន្ទីរពេទ្យបង្អែក ក្នុង​ការ​ជំរុញ ការ​យកចិត្តទុកដាក់​ ការផ្សព្វផ្សាយសារអប់រំសុខភាព​នៅតាមមណ្ឌលសុវត្តិភាព រៀបចំ​ផែនការការពារសុខភាព​ និងសង្រ្គោះបន្ទាន់ ការបម្រើសេវា​ ជូន​វីរកងទ័ព​ ប្រជាជនភៀសសឹក​ និង​អនុវត្ត​បែងចែក​ភារកិច្ច​របស់មន្ត្រីសុខាភិបាល​​ឱ្យមានក្រុមគ្រូពេទ្យប្រចាំការ​២៤ម៉/​២៤ម៉ ព្រមទាំង​ការគ្រប់​គ្រង​ការផ្គត់ផ្គង់ឱសថបរិក្ខា​បានល្អ និង​ប្រព័ន្ធ​បញ្ជូន​ទាន់ពេល​វេលា​ផងដែរ៕

The post រដ្ឋមន្ត្រីសុខាភិបាល៖ សុខភាពប្រជាជន និងវីរកងទ័ព គឺជាអាទិភាពខ្ពស់បំផុត នៅគ្រប់កាលៈទេសៈទាំងអស់ appeared first on Kampuchea Thmey Daily.