រថភ្លើងធ្លាក់ផ្លូវ Archives - Kampuchea Thmey Daily

ជនរងគ្រោះស្លាប់ក្នុងឧបទ្ទវហេតុធ្លាក់រថភ្លើងនៅអេស្ប៉ាញនឹងទទួលសំណងជិត២៦ម៉ឺនដុល្លារក្នុងម្នាក់

Minea Neu — Wed, 28 Jan 2026 08:39:42 +0000

រដ្ឋមន្ត្រីដឹកជញ្ជូនប្រទេសអេស្ប៉ាញ លោក Oscar Puente បាននិយាយ កាលពីថ្ងៃអង្គារថា ប្រទេសអេស្ប៉ាញនឹងចំណាយប្រាក់ចំនួន ២៤លានដុល្លារ ជាសំណងដល់ជនរងគ្រោះនៃការធ្លាក់រថភ្លើងល្បឿនលឿនកាលពីសប្តាហ៍មុន សម្លាប់មនុស្ស ៤៥នាក់ និងមនុស្សជាង១៥០នាក់រងរបួស។

ធ្លាក់រថភ្លើងនៅអេស្ប៉ាញ។ Reuters

យោងតាមរ៉យទ័រ ប្រទេសនេះនៅតែជួបគ្រោះថ្នាក់ដោយសារធ្លាក់រថភ្លើងជាញឹកញាប់ ជាក់ស្តែងនៅថ្ងៃទី១៨ ខែមករា ក្នុងរដ្ឋ Adamuz ជិតទីក្រុង Cordoba ភាគខាងត្បូង បណ្តាលឱ្យមានអ្នកស្លាប់ជាច្រើននោះ។

មិនតែប៉ុណ្ណោះ ប្រទេសអេស្ប៉ាញមានអ្នកស្លាប់ដោយសារតែឧបទ្ទវហេតុរថភ្លើងខ្ពស់បំផុត ក្នុងប្រវត្តិសាស្ត្រអឺរ៉ុប និងជាប់ឈ្មោះជាប្រទេសដែលមានអ្នកស្លាប់ច្រើន ចាប់តាំងពីឆ្នាំ ២០១៣ មកនោះ។

ចំពោះសំណងនេះ គ្រួសារនៃអ្នកដំណើរដែលបានស្លាប់នឹងទទួលបានប្រាក់សំណងចំនួន ២៥៩ ១១២ ដុល្លារក្នុងម្នាក់ៗ មានសុពលភាពរយៈពេល ៣ខែ ដែលស្មើនឹង ៨៦ ៣៧០ដុល្លារ ជាជំនួយលើកលែងពន្ធពីរដ្ឋាភិបាល និងការទូទាត់ធានារ៉ាប់រងមុន ចំនួន ៨៦ ៣៧០ដុល្លា ចំណែកប្រាក់ ៨៦ ៣៧០ដុល្លារទៀតនឹងត្រូវបង់ក្រោយពីការធានារ៉ាប់រង។

លោក Puente បាននិយាយដោយបន្ថែមថា៖«ជនរងគ្រោះមិនអាចមានលទ្ធភាពរង់ចាំច្រើនឆ្នាំ ដើម្បីទទួលបានការគាំទ្រពីភាគីរដ្ឋាភិបាលទេ។ យើងដឹងថានីតិវិធីធម្មតា និងពេលវេលាផ្លូវច្បាប់មិនទាន់ឆ្លើយតបទៅនឹងភាពត្រូវការបន្ទាន់ នៃសោកនាដកម្មបែបនេះទេ។ ចំណែកភាពមិនប្រាកដប្រជាខាងសេដ្ឋកិច្ច មិនអាចត្រូវបានបូកបន្ថែមពីលើការឈឺចាប់ផ្លូវចិត្តនោះទេ»។

រដ្ឋមន្ត្រីរូបនេះ ស្ថិតនៅក្រោមសម្ពាធសាធារណៈចាប់តាំងពីការធ្លាក់រថភ្លើងនៅរដ្ឋ Adamuz និងឧប្បត្តិហេតុផ្សេងទៀតក្នុងសប្តាហ៍ដដែល រួមទាំងការស្លាប់របស់អ្នកបើកបររថភ្លើងនៅរដ្ឋ Catalonia និងគ្រោះថ្នាក់ពីរផ្សេងទៀត តែមិនមានមនុស្សស្លាប់ទេ។ គណបក្សប្រឆាំងដ៏សំខាន់ក្នុងប្រទេស បានទាមទារឱ្យលោក Puente លាលែងពីតំណែង។

តែយ៉ាងណា នៅពេលគេសួរពីអនាគតរបស់ខ្លួន លោក Puente បានប្រាប់អ្នកយកព័ត៌មានថា លោកមានមនសិការស្ងប់ស្ងាត់ អនុវត្តការងារឱ្យអស់ពីសមត្ថភាព និងខិតខំប្រឹងប្រែងធ្វើទំនាក់ទំនង ដែលខ្លួនបានដឹងដឹងទៅកាន់ប្រជាពលរដ្ឋ៕

ប្រែសម្រួល៖ ណឺ មិនា

The post ជនរងគ្រោះស្លាប់ក្នុងឧបទ្ទវហេតុធ្លាក់រថភ្លើងនៅអេស្ប៉ាញនឹងទទួលសំណងជិត២៦ម៉ឺនដុល្លារក្នុងម្នាក់ appeared first on Kampuchea Thmey Daily.

រថភ្លើងធ្លាក់ផ្លូវនៅអេហ្ស៊ីប ស្លាប់និងរបួសអ្នកដំណើរជាង៩០នាក់

Bun sopheap — Mon, 01 Sep 2025 02:17:47 +0000

យោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០១ខែកញ្ញា រថភ្លើងដឹកអ្នកដំណើរដែលធ្វើដំណើរពីទីក្រុង Matrouh ទៅទីក្រុង Cairo បានធ្លាក់ផ្លូវនៅភាគខាងលិចប្រទេសអេហ្ស៊ីបកាលពីថ្ងៃសៅរ៍ សម្លាប់មនុស្សយ៉ាងហោចណាស់ ៣ នាក់ និង៩៤ នាក់ផ្សេងទៀតរងរបួស។

(រូបភាព៖ AP)

នៅក្នុងសោកនាដកម្មនេះមានទូររថភ្លើងចំនួន៧បានចុះពីលើផ្លូវដោយមានពីរបានក្រឡាប់ផ្ងាជើង។ ជាការឆ្លើយតបភ្នាក់ងារសង្គ្រោះបន្ទាន់បានដាក់ពង្រាយរថយន្តសង្គ្រោះចំនួន៣០គ្រឿងដើម្បីដឹកអ្នករបួសទៅកាន់មន្ទីរពេទ្យក្បែរនោះ។ ចំពោះមូលហេតុមិនទាន់ត្រូវបានដឹងនៅឡើយ ដោយអាជ្ញាធរអេហ្ស៊ីបកំពុងបើកការស៊ើបអង្កេតលើមូលហេតុដែលបណ្ដាលឲ្យការណ៍ដ៏គួរឲ្យរន្ធត់នេះ។

គួរបញ្ចាក់ថាគ្រោះថ្នាក់រថភ្លើងនៅតែកើតមានជាញឹកញាប់នៅក្នុងប្រទេសអេហ្ស៊ីប ដោយសារប្រព័ន្ធផ្លូវដែកមានវ័យចំណាស់របស់ប្រទេស និងបញ្ហាការគ្រប់គ្រង។ កាលពីឆ្នាំ២០២១ ក៏មានរថភ្លើងធ្លាក់ផ្លូវ រួមទាំងការប៉ះទង្គិចគ្នាបានសម្លាប់មនុស្ស៣២ នាក់ បានបង្ហាញពីការព្រួយបារម្ភអំពីសុវត្ថិភាព ទោះបីជារដ្ឋាភិបាលសន្យាថានឹងវិនិយោគរាប់ពាន់លានក្នុងការធ្វើទំនើបកម្មបណ្តាញនេះក៏ដោយ ក៏ឧប្បត្តិហេតុសំខាន់ៗនៅតែបន្តកើតមាន ដែលបង្កើតជាសំណួរអំពីវឌ្ឍនភាពក្នុងកំណែទម្រង់ផ្លូវដែក៕

(រូបភាព៖ AP)

(រូបភាព៖ Egyptian Ministry of Health and Population)

អត្ថបទ៖ ប៊ុន សុភាព

The post រថភ្លើងធ្លាក់ផ្លូវនៅអេហ្ស៊ីប ស្លាប់និងរបួសអ្នកដំណើរជាង៩០នាក់ appeared first on Kampuchea Thmey Daily.

រថភ្លើងមួយខ្សែដឹកទូកុងតឺន័រដាច់ក្រឡាប់ធ្លាក់ចេញពីផ្លូវ សំណាងមិនមានគ្រោះថ្នាក់ដល់អាយុជីវិត

Kang Tola — Sat, 06 Jan 2024 13:57:38 +0000

ពោធិ៍សាត់ ៖ រថភ្លើងដឹកទូកុងតឺន័រមួយខ្សែបានដាច់ក្រឡាប់ធ្លាក់ចេញពីផ្លូវ បណ្ដាលឱ្យរងការខូចខាត សំណាងមិនបង្កការគ្រោះថ្នាក់ណាមួយដល់មនុស្សឡើយ។

ហេតុការណ៍នេះបានកើតឡើងនៅម៉ោងព្រឹកថ្ងៃទី៦ ខែមករា ឆ្នាំ២០២៤ ត្រង់ចំណុចជើងភ្នំក្បាលសៀម ស្ថិតក្នុងភូមិថ្មី ឃុំត្នោតជុំ ស្រុកក្រគរ ខេត្តពោធិ៍សាត់។

បើតាមសាក្សីដែលនៅក្បែរនោះបានឱ្យដឹងថា មុនកើតហេតុឃើញមានរថភ្លើង១ខ្សែធ្វើដំណើរក្នុងទិសដៅពីជើងទៅត្បូង ក្នុងល្បឿនលឿន លុះមកដល់ចំណុចកើតហេតុផ្លូវចំណុចដែលបត់បែនហើយចុះឡើងទៀត ស្រាប់តែដាច់បារុងជាកំណាត់ៗធ្លាក់កុងតឺន័រចេញស្រូវ និងអង្ករសម្រូបកំពប់រាយប៉ាយពេញដី សំណាងហើយមិនបង្កគ្រោះថ្នាក់ដល់មនុស្សឡើយ។

ចំណែកលោក យ៉ិន ឈុនហាក់ នាយប៉ុស្តិ៍រដ្ឋបាលមូលដ្ឋានឃុំត្នោតជុំ ដែលទៅដល់ទីតាំងកើតហេតុបានឱ្យដឹងថា រថភ្លើងដែលក្រឡាប់ខាងលើនេះ ដឹកទូកុងតឺទ័រចំនួន២៣កុងតឺន័រ ហើយបានដាច់បារុងត្រឹមទូកុងតឺន័រទី១០ បណ្ដាលឱ្យទូកុងតឺន័រចំនួន៤ទូធ្លាក់ចេញពីរថភ្លើង និងខូចខាតគ្រាប់ធញ្ញជាតិ(ស្រូវ និងអង្ករសម្រូប)។

លោកបន្តទៀតថា ចំពោះអត្តសញ្ញាណអ្នកបើករថភ្លើងមិនត្រូវបានស្គាល់ឡើយ តែបើតាមការពិនិត្យជាក់ស្ដែង ករណីគ្រោះថ្នាក់នេះ គឺអាចជាកត្តាល្បឿនលឿនពេក ការដឹកលើសទម្ងន់លើចំណុចផ្លូវបត់បែនច្រើន ទើបបណ្ដាលឱ្យកើតមានគ្រោះថ្នាក់នេះតែម្ដង៕

ដោយ ៖ លាន គ្រន

The post រថភ្លើងមួយខ្សែដឹកទូកុងតឺន័រដាច់ក្រឡាប់ធ្លាក់ចេញពីផ្លូវ សំណាងមិនមានគ្រោះថ្នាក់ដល់អាយុជីវិត appeared first on Kampuchea Thmey Daily.

អ្នកដំណើរជាង១០០នាក់ ស្លាប់និងរបួស ក្នុងហេតុការណ៍ រថភ្លើងធ្លាក់ផ្លូវ នៅ ប៉ាគីស្ថាន

Sok Sovann — Mon, 07 Aug 2023 00:03:23 +0000

មនុស្សយ៉ាងតិច៣០នាក់បានស្លាប់ និង១០០នាក់រងរបួស នៅពេលរថភ្លើង Hazara Express ធ្លាក់ផ្លូវនៅភាគខាងត្បូងប្រទេសប៉ាគីស្ថាន។

ហេតុការណ៍បានកើតឡើងនៅជិតស្ថានីយ៍រថភ្លើង Sahara ក្នុងតំបន់ Nawabshah ចម្ងាយប្រហែល ២៧៥គីឡូម៉ែត្រពីទីក្រុង Karachi។

ក្នុងវីដេអូដែលចែកចាយលើបណ្តាញសង្គម អ្នកដំណើរត្រូវបានគេឃើញដេករដូករណែលពាសពេញកន្លែងកើតហេតុ។

យោងតាមការឲ្យដឹងពីរដ្ឋមន្ត្រីផ្លូវដែក Saad Rafiq, ការស៊ើបអង្កេតដំបូងបង្ហាញថា រថភ្លើងកំពុងធ្វើដំណើរក្នុងល្បឿនធម្មតា ហើយពួកគេកំពុងព្យាយាមរកមូលហេតុនៃគ្រោះថ្នាក់នេះ។

បន្ទាប់ពីហេតុការណ៍កើតឡើង សេវាកម្មរថភ្លើងនៅទីនោះ ក៏ត្រូវបានផ្អាកផងដែរ។

គួរបញ្ជាក់ថា គ្រោះថ្នាក់ផ្លូវដែកក្នុងប្រទេសប៉ាគីស្ថាន មិនមែនជារឿងចម្លែកឡើយ។ នៅឆ្នាំ២០២១ រថភ្លើងពីរគ្រឿង ដែលធ្វើដំណើរក្នុងខេត្ត Sindh បានបុកគ្នាដោយសម្លាប់មនុស្សយ៉ាងតិច៤០នាក់ និងរាប់សិបនាក់រងរបួស។

ចន្លោះឆ្នាំ២០១៣ ដល់២០១៩ មនុស្សចំនួន១៥០នាក់បានស្លាប់ នៅក្នុងឧប្បត្តិហេតុបែបនេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ មនុស្ស១០នាក់បាត់បង់ជីវិត និង៥០នាក់របួស ក្នុងហេតុការណ៍រថភ្លើងធ្លាក់ផ្លូវ នៅ អ៊ីរ៉ង់

The post អ្នកដំណើរជាង១០០នាក់ ស្លាប់និងរបួស ក្នុងហេតុការណ៍ រថភ្លើងធ្លាក់ផ្លូវ នៅ ប៉ាគីស្ថាន appeared first on Kampuchea Thmey Daily.

រថភ្លើងបើកធ្លាក់ផ្លូវក្រឡាប់សង្កត់ផ្ទះពលរដ្ឋពីរខ្នង

Sokhom Khon — Mon, 13 Feb 2023 06:38:41 +0000

មានករណីមួយបានកើតឡើងបង្កការភ្ញាក់ផ្អើលទាំងព្រលឹម ខណៈមានរថភ្លើងមួយខ្សែបើកបរធ្លាក់គន្លងផ្លូវក្រឡាប់ធ្លាក់ទូកុងតឺន័រដឹកស្រូវចំនួន២ទូធ្វើឲ្យប៉ះពាល់ផ្ទះប្រជាពលរដ្ឋចំនួនពីរខ្នងក្នុងក្រុងបាត់ដំបង កាលពីវេលាម៉ោង០៥:០០
នាទីទៀបភ្លឺ ថ្ងៃទី១៣ ខែកុម្ភ: ឆ្នាំ២០២៣ ត្រង់កំណាត់ផ្លូវដែកក្នុងភូមិអណ្តូងចេញ សង្កាត់អូរចារ ក្រុងបាត់ដំបង។

ប្រភពពីពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុមានរថភ្លើងមួយខ្សែបានធ្វើដំណើរពីទិសដៅពីខេត្តបន្ទាយមានជ័យឆ្លងកាត់ខេត្តបាត់ដំបងឆ្ពោះទៅកាន់ទីក្រុងភ្នំពេញ។ លុះមកដល់ចំណុចកើតហេតុក៏ស្រាប់តែក្រឡាប់ទូកុងតឺន័រដឹកស្រូវចំនួន២ប៉ះពាល់ទៅលើផ្ទះពលរដ្ឋ២ខ្នងទាំងពួកគាត់ខ្លះមិនទាន់ភ្ញាក់ពីដំណេកផង ទើបបង្កការភ្ញាក់ផ្អើលទាំងព្រលឹមតែម្តង តែសំណាងមិនបង្កគ្រោះថ្នាក់ដល់ពលរដ្ឋណាម្នាក់។

ក្រោយកើតហេតុសមត្ថកិច្ចជំនាញបានពិនិត្យលើកន្លែងកើតហេតុហើយបានដាក់ការសន្និដ្ឋានថា ដោយសារស្ថានភាពផ្លូវដីមានសំណើម និងស្រុតផងនោះជាហេតុនាំឲ្យទូនៅផ្នែកកណ្តាលរបស់រថភ្លើងខ្ទាតចេញពីគន្លងផ្លូវ ហើយបានក្រឡាប់ទូដឹកស្រូវចំនួនពីរសង្កត់លើសំយ៉ាបផ្ទះរបស់បងប្អូនប្រជាពលរដ្ឋអស់ចំនួនពីរខ្នង ប៉ុន្តែសំណាងល្អម្ចាស់ផ្ទះជាច្រើននាក់ដែលកំពុងសម្រាកមិនមានគ្រោះថ្នាក់ដល់នណាម្នាក់នោះទេ។

មន្ត្រីអយស្ម័យយានខេត្តបានឲ្យដឹងថា ក្រោយកើតហេតុក្រុមបច្ចេកទេសគ្រប់គ្រងអយស្ម័យយានខេត្តបានចុះរៀបចំជួសជុលតភ្ជាប់កំណាត់ផ្លូវដែលរងការខូចខាតជាច្រើនម៉ែត្រយ៉ាងប្រញាប់ប្រញាល់ដើម្បីដាក់ដំណើរការដឹកជញ្ជូនបន្តធម្មតាឡើងវិញ។ មន្ត្រីដដែលថា ដោយឧបទ្ទវហេតុនេះបង្កឡើងតាមរយះជំនន់ទឹកភ្លៀងទើបមានកន្លែងមួយចំនួនផ្នែកខាងក្រោមដីនៅទន់ទើបបង្កឲ្យស្រុតតាមរយះទម្ងន់ធ្ងន់តែម្តង។

បើទោះយ៉ាងណាគេសង្កេតឃើញថា ផ្លូវដែកក្នុងក្រុងបាត់ដំបងបានបង្កឧបទ្ទវហេតុខាងលើនេះចំនួន២លើកហើយដែលទូរថភ្លើងបានផ្ទុកស្រូវដូចគ្នា។ ហើយករណីនេះត្រូវបានប្រជាពលរដ្ឋស្នើឲ្យខាងជំនាញត្រូវតែពិនិត្យ និងបន្តការជួសជុលជាពិសេសនៅតាមទីប្រជុំជនក្រុងតែម្តងដែលមានពលរដ្ឋរស់នៅតាមរ៉បមាត់ផ្លូវដែកច្រើនជៀសវាងបង្កផលប៉ះពាល់ដល់អាយុជីវិតរបស់ពលរដ្ឋនៅថ្ងៃក្រោយដោយយថាហេតុម្តងទៀត៕

អត្ថបទ៖ សៅ សារិទ្ធ

The post រថភ្លើងបើកធ្លាក់ផ្លូវក្រឡាប់សង្កត់ផ្ទះពលរដ្ឋពីរខ្នង appeared first on Kampuchea Thmey Daily.

មនុស្ស១០នាក់បាត់បង់ជីវិត និង៥០នាក់របួស ក្នុងហេតុការណ៍រថភ្លើងធ្លាក់ផ្លូវ នៅ អ៊ីរ៉ង់

Sok Sovann — Wed, 08 Jun 2022 06:37:29 +0000

រថភ្លើងដឹកអ្នកដំណើរមួយគ្រឿង បានធ្លាក់ផ្លូវនៅភាគខាងកើតប្រទេសអ៊ីរ៉ង់ កាលពីព្រឹកថ្ងៃពុធទី០៨ខែមិថុនានេះ ដោយបណ្តាលឲ្យអ្នកដំណើរចំនួន១០នាក់ បាត់បង់ជីវិត និង៥០នាក់ទៀតរងរបួស។

ទូរទស្សន៍រដ្ឋអ៊ីរ៉ង់បានផ្សាយថា ចំនួនអ្នកស្លាប់និងរបួសអាចកើនឡើងទៀត ថ្វីបើព័ត៌មានលម្អិតដំបូងអំពីគ្រោះមហន្តរាយនេះ នៅតែមិនទាន់ដឹងច្បាស់ក៏ដោយ។

តាមសេចក្តីរាយការណ៍ ទូរថភ្លើងចំនួនបួនក្នុងចំណោមប្រាំពីរ បានធ្លាក់ផ្លូវ ក្នុងពេលងងឹតនាព្រឹកព្រលឹម ក្បែរទីក្រុងវាលខ្សាច់ Tabas។

ក្រុមជួយសង្គ្រោះបានជិះរថយន្តសង្គ្រោះបន្ទាន់ និងឧទ្ធម្ភាគចក្រចំនួន ៣គ្រឿងទៅកាន់កន្លែងកើតហេតុនៅតំបន់ដាច់ស្រយាល។

ហេតុការណ៍នៅលើផ្លូវដែកដែលតភ្ជាប់ទៅកណ្តាលទីក្រុង Yazd មួយនេះ កំពុងស្ថិតក្រោមការស៊ើបអង្កេត។

គួរបញ្ជាក់ថា គ្រោះថ្នាក់រថភ្លើងមួយទៀតកាលពីឆ្នាំ២០១៦ បានសម្លាប់មនុស្សរាប់សិបនាក់ និងរបួសជាច្រើននាក់។

គ្រោះមហន្តរាយរថភ្លើងអាក្រក់បំផុតរបស់ប្រទេសអ៊ីរ៉ង់ បានកើតឡើងក្នុងឆ្នាំ ២០០៤ នៅពេលរថភ្លើងដែលផ្ទុកដោយប្រេងសាំង ជី ស្ពាន់ធ័រ និងកប្បាស បានជួបគ្រោះថ្នាក់នៅជិតទីក្រុងប្រវត្តិសាស្ត្រ Neyshabur ដោយសម្លាប់មនុស្សប្រហែល ៣២០ នាក់ របួស ៤៦០ នាក់ និងបំផ្លាញភូមិចំនួន ៥៕

ប្រែសម្រួល៖ Vann Vann

ប្រភព៖ Al Arabiya

ចុចអាន៖ គ្រោះថ្នាក់ចរាចរណ៍ រថភ្លើង បុកយន្តហោះ នៅអាមេរិក

The post មនុស្ស១០នាក់បាត់បង់ជីវិត និង៥០នាក់របួស ក្នុងហេតុការណ៍រថភ្លើងធ្លាក់ផ្លូវ នៅ អ៊ីរ៉ង់ appeared first on Kampuchea Thmey Daily.

រន្ធត់! ស្លាប់និងរបួសមនុស្សជាង១០០នាក់ ក្នុងហេតុការណ៍រថភ្លើងធ្លាក់ផ្លូវនៅ អេហ្ស៊ីប

Sok Sovann — Mon, 19 Apr 2021 01:57:29 +0000

មនុស្សចំនួន១១នាក់បានស្លាប់និង៩៨នាក់រងរបួស ក្នុងគ្រោះថ្នាក់រថភ្លើងនៅខេត្ត Qalyubia ភាគខាងជើងទីក្រុងគែរ ប្រទេសអេហ្ស៊ីប។

បណ្តាញរថភ្លើងជាតិអេហ្ស៊ីបបាននិយាយក្នុងសេចក្តីថ្លែងការណ៍ខ្លីមួយថា រថភ្លើងនេះកំពុងធ្វើដំណើរចេញពីទីក្រុងគែរ ឆ្ពោះទៅកាន់ទីក្រុង Mansoura នៅពេលទូចំនួន៤ បានធ្លាក់ចេញពីផ្លូវនៅម៉ោង១:៥៤នាទីរសៀល (ម៉ោងក្នុងស្រុក)។

ទោះបីជាយ៉ាងណាក៏ដោយ មូលហេតុនៃគ្រោះថ្នាក់នេះកំពុងត្រូវបានស៊ើបអង្កេត។

ក្នុងរយៈពេលប៉ុន្មានឆ្នាំថ្មីៗនេះ ប្រទេសអេហ្ស៊ីបបានជួបប្រទះសោកនាដកម្មផ្លូវដែកជាច្រើនលើក។

មនុស្សយ៉ាងតិច២០នាក់បានស្លាប់ និងជិត២០០នាក់រងរបួសកាលពីខែមីនា នៅពេលរថភ្លើងពីរគ្រឿងបុកគ្នាជិតតំបន់ Tahta ចម្ងាយប្រហែល៤៤០គីឡូម៉ែត្រ ភាគខាងត្បូងទីក្រុងគែរ។

កាលពីដើមសប្តាហ៍នេះ មនុស្សចំនួន១៥នាក់បានរងរបួស បន្ទាប់ពីរថភ្លើងមួយគ្រឿងទៀត រត់ធ្លាក់ផ្លូវនៅក្នុងខេត្ត Minya al-Qamh ភាគខាងជើង។

គ្រោះថ្នាក់រថភ្លើងសម្លាប់មនុស្សច្រើនបំផុតរបស់ប្រទេសអេហ្ស៊ីបគឺក្នុងឆ្នាំ២០០២ នៅពេលមនុស្សជាង៣៧០នាក់ ត្រូវបានសម្លាប់បន្ទាប់ពីមានអគ្គិភ័យកើតឡើងនៅក្នុងរថភ្លើងដែលកំពុងធ្វើដំណើរពីទីក្រុងគែរទៅភាគខាងត្បូងប្រទេសអេហ្ស៊ីប៕

ប្រែសម្រួលដោយ៖ Vann Vann

ប្រភព៖ Al Jazeera

The post រន្ធត់! ស្លាប់និងរបួសមនុស្សជាង១០០នាក់ ក្នុងហេតុការណ៍រថភ្លើងធ្លាក់ផ្លូវនៅ អេហ្ស៊ីប appeared first on Kampuchea Thmey Daily.

រកឃើញតម្រុយខ្លះហើយ! អាជ្ញាធរ តៃវ៉ាន់ បញ្ចេញវីដេអូពីគ្រោះថ្នាក់រថភ្លើងធ្លាក់ផ្លូវ

Sok Chivon — Wed, 07 Apr 2021 02:47:57 +0000

មន្ត្រីសុវត្ថិភាពនៃការដឹកជញ្ជូននៅតៃវ៉ាន់បានបញ្ចេញវីដេអូដែលថតចេញពីផ្នែកខាងមុខនៃរថភ្លើងដែលពាក់ព័ន្ធនឹងគ្រោះថ្នាក់ដ៏សាហាវមួយកាលពីសប្តាហ៍មុន ។

រថភ្លើងដែលស្ថិតនៅក្នុងផ្លូវរូងក្រោមដីក្នុងទីក្រុង Hualien កាលពីថ្ងៃសុក្របានសម្លាប់មនុស្សចំនួន ៥០ នាក់ និងច្រើនជាង ២០០ នាក់ទៀតរងរបួស ។

វីដេអូដែលចេញផ្សាយដោយក្រុមប្រឹក្សាសុវត្ថិភាពដឹកជញ្ជូនតៃវ៉ាន់កាលពីថ្ងៃអង្គារបង្ហាញថា រថភ្លើងបានបុកនឹងឡានដឹកទំនិញដែលបានរអិលចុះពីលើភ្នំចូលទៅផ្លូវដែកក្បែរផ្លូវរូងក្រោមដី ។

ទូរខាងមុខរបស់រថភ្លើងបានរអិលធ្លាក់ចុះផ្លូវ ក្រោយពីបុកជាមួយរថយន្ដដឹកទំនិញ ហើយបានបុកនឹងជញ្ជាំងផ្លូវរូងក្រោមដី ។

ក្រោយមកមន្ត្រីក្រុមប្រឹក្សាភិបាលបានវិភាគលើប្រព័ន្ធប្រតិបត្តិការរបស់រថភ្លើង ហើយបានរកឃើញថា អ្នកបើកបរបានជាន់ហ្វ្រាំងជាបន្ទាន់រយៈពេល ៥ វិនាទី បន្ទាប់ពីរថភ្លើងបានធ្លាក់ចេញពីផ្លូវរូងក្រោមដីមួយផ្សេងទៀតមុនពេលបុករថយន្តដឹកទំនិញនៅ ២ វិនាទីក្រោយមក ។

ក្រុមមន្រ្តីបាននិយាយថា រថភ្លើងកំពុងធ្វើដំណើរ ១២១ គីឡូម៉ែត្រក្នុងមួយម៉ោងនៅពេលនោះ ហើយរថយន្តនៅខាងមុខរបស់រថភ្លើងបានខ្ទាតចូលទៅដល់ជម្រៅប្រហែល ៣២០ ម៉ែត្រក្នុងផ្លូវរូងក្រោមដី ។

ពួកគេប៉ាន់ប្រមាណថា ឡានដឹកទំនិញបានរអិលធ្លាក់ទៅលើផ្លូវដែកប្រហែលមួយនាទីមុនពេលបុក ។

មន្ត្រីទាំងនោះក៏មានគម្រោងសិក្សាកំណត់ត្រាប្រតិបត្តិការរបស់រថភ្លើង និងរូបថតពីលើអាកាសដើម្បីស៊ើបអង្កេតពីមូលហេតុនៃគ្រោះថ្នាក់នេះឲ្យបានលម្អិតបន្ថែមទៀតផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រថភ្លើងធ្លាក់ផ្លូវនៅ តៃវ៉ាន់ សម្លាប់មនុស្ស ៤៨នាក់ត្រឹមល្ងាចថ្ងៃសុក្រនេះ

ចុចអាន ៖ Breaking News! រថភ្លើងធ្លាក់ផ្លូវនៅ តៃវ៉ាន់ ស្លាប់និងរបួសមនុស្សជាង ២០ នាក់

The post រកឃើញតម្រុយខ្លះហើយ! អាជ្ញាធរ តៃវ៉ាន់ បញ្ចេញវីដេអូពីគ្រោះថ្នាក់រថភ្លើងធ្លាក់ផ្លូវ appeared first on Kampuchea Thmey Daily.