រន្ធត់! ស្លាប់និងរបួសមនុស្សជាង១០០នាក់ ក្នុងហេតុការណ៍រថភ្លើងធ្លាក់ផ្លូវនៅ អេហ្ស៊ីប

មនុស្សចំនួន១១នាក់បានស្លាប់និង៩៨នាក់រងរបួស ក្នុងគ្រោះថ្នាក់រថភ្លើងនៅខេត្ត Qalyubia ភាគខាងជើងទីក្រុងគែរ ប្រទេសអេហ្ស៊ីប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្តាញរថភ្លើងជាតិអេហ្ស៊ីបបាននិយាយក្នុងសេចក្តីថ្លែងការណ៍ខ្លីមួយថា រថភ្លើងនេះកំពុងធ្វើដំណើរចេញពីទីក្រុងគែរ ឆ្ពោះទៅកាន់ទីក្រុង Mansoura នៅពេលទូចំនួន៤ បានធ្លាក់ចេញពីផ្លូវនៅម៉ោង១:៥៤នាទីរសៀល (ម៉ោងក្នុងស្រុក)។

ទោះបីជាយ៉ាងណាក៏ដោយ មូលហេតុនៃគ្រោះថ្នាក់នេះកំពុងត្រូវបានស៊ើបអង្កេត។

ក្នុងរយៈពេលប៉ុន្មានឆ្នាំថ្មីៗនេះ ប្រទេសអេហ្ស៊ីបបានជួបប្រទះសោកនាដកម្មផ្លូវដែកជាច្រើនលើក។

មនុស្សយ៉ាងតិច២០នាក់បានស្លាប់ និងជិត២០០នាក់រងរបួសកាលពីខែមីនា នៅពេលរថភ្លើងពីរគ្រឿងបុកគ្នាជិតតំបន់ Tahta ចម្ងាយប្រហែល៤៤០គីឡូម៉ែត្រ ភាគខាងត្បូងទីក្រុងគែរ។

កាលពីដើមសប្តាហ៍នេះ មនុស្សចំនួន១៥នាក់បានរងរបួស បន្ទាប់ពីរថភ្លើងមួយគ្រឿងទៀត រត់ធ្លាក់ផ្លូវនៅក្នុងខេត្ត Minya al-Qamh ភាគខាងជើង។

គ្រោះថ្នាក់រថភ្លើងសម្លាប់មនុស្សច្រើនបំផុតរបស់ប្រទេសអេហ្ស៊ីបគឺក្នុងឆ្នាំ២០០២ នៅពេលមនុស្សជាង៣៧០នាក់ ត្រូវបានសម្លាប់បន្ទាប់ពីមានអគ្គិភ័យកើតឡើងនៅក្នុងរថភ្លើងដែលកំពុងធ្វើដំណើរពីទីក្រុងគែរទៅភាគខាងត្បូងប្រទេសអេហ្ស៊ីប៕

ប្រែសម្រួលដោយ៖ Vann Vann

ប្រភព៖ Al Jazeera