រោងចក្រកាត់ដេរ Archives - Kampuchea Thmey Daily

អ្នកឃ្លាំមើល៖ ក្រុមប្រឆាំង និងសារព័ត៌មានគ្មានច្បាប់នៅក្រៅប្រទេស កំពុងបំភ្លៃព័ត៌មានទាក់ទងនឹងអតីតពលករ

hun sirivadh — Thu, 23 Apr 2026 08:11:00 +0000

ភ្នំពេញ៖ អ្នកឃ្លាំមើលបញ្ហានយោបាយ និងអ្នកជំនាញខាងភូមិសាស្ត្រនយោបាយ បានលើកឡើងថា ក្រុមប្រឆាំង និងសារព័ត៌មានខេមរភាសាគ្មានច្បាប់នៅក្រៅប្រទេសមួយចំនួន កំពុងបំភ្លៃព័ត៌មានមិនពិតទាក់ទងអតីតពលករដែលត្រឡប់មកពីប្រទេសថៃ ដើម្បីបន្ទោសបង្អាប់មកលើរាជរដ្ឋាភិបាល។

លោក សំ សឿន អ្នកឃ្លាំមើលបញ្ហាសង្គម និងនយោបាយបានថ្លែងថា ប៉ុន្មានថ្ងៃចុងក្រោយនេះ លោកបានសង្កេតឃើញក្រុមប្រឆាំង និងសារព័ត៌មានខេមរភាសាគ្មានច្បាប់នៅក្រៅប្រទេសមួយចំនួន តែងតែបំភ្លៃព័ត៌មានមិនពិតទាក់ទងពលរដ្ឋគ្មានការងារធ្វើ និងឆ្លងដែនខុសច្បាប់ទៅប្រទេសថៃ ដែលមានចេតនាស្ដីបន្ទោសមកលើរាជរដ្ឋាភិបាល។

លោកបញ្ជាក់ថា៖ «បើតាមក្រសួងការងារ គឺអតីតពលករខ្មែរមកពីថៃប្រមាណជាង ៦៧ម៉ឺននាក់មានការងារធ្វើនៅក្នុងស្រុក ដែលជាការប្រឹងប្រែងរបស់រាជរដ្ឋាភិបាល ប៉ុន្ដែក្រុមប្រឆាំង និងសារព័ត៌មានខុសច្បាប់ទាំងនោះ មិនព្រមជួយផ្សព្វផ្សាយឱ្យបានទូលំទូលាយទេ។ ពួកគេខំប្រឹងតែចាប់ច្បិចយកចំណុចមិនល្អតិចតួចមកផ្សាយ ដើម្បីបំពុលសង្គម បំភ្លៃព័ត៌មាន និងញុះញង់។ បើយើងមើលពីសមាមាត្ររវាងអ្នកមានការងារធ្វើ ៦៧ម៉ឺននាក់ និងអ្នកគ្មានការងារធ្វើ ១៦នាក់ គឺមានគម្លាតខុសគ្នាឆ្ងាយ គឺយើងមិនអាចយកតួលេខ ១៦នាក់នោះ មកដាក់បន្ទុកលើរាជរដ្ឋាភិបាលទាំងស្រុងបានទេ»។

ទោះបីជាយ៉ាង លោក សំ សឿន បានអំពាវនាវដល់អតីតពលករខ្មែរដែលមិនទាន់ទទួលបានការងារ គួរតែទាក់ទងទៅក្រសួងការងារ និងបណ្ដុះបណ្ដាលវិជ្ជាជីវៈតាមរយៈលេខទូរសព្ទ ១២៩៧ ដើម្បីទទួលបានការប្រឹក្សាស្វែងរកការងារធ្វើ ការបណ្ដុះបណ្ដាលវិជ្ជាជីវៈ និងអត្ថប្រយោជន៍របបសន្ដិសុខសង្គមផ្សេងៗទៀត។

សម្រាប់លោក ថុង ម៉េងដាវីត អ្នកជំនាញភូមិសាស្រ្តនយោបាយ និងសន្ដិសុខបានថ្លែងថា ក្រុមប្រឆាំងក្រៅប្រទេស គួរតែយកពេលវេលានេះជួយផ្សព្វផ្សាយព័ត៌មានដែលជាផលប្រយោជន៍ប្រជាពលរដ្ឋ និងប្រទេសជាតិ ដើម្បីរួមគ្នាកសាងប្រទេសជាតិ និងចៀសវាងការចាប់យកការលំបាករបស់ជាតិមកកេងចំណេញផលប្រយោជន៍នយោបាយ។

លោកបញ្ជាក់ថា៖ «ខ្ញុំក៏បានឃើញពីយន្តការរបស់រាជរដ្ឋាភិបាល និងក្រសួងការងារទាក់ទងការជួយអន្តរាគមន៍បងប្អូនពលករមកពីថៃ ហើយចំនួននៃអ្នកទទួលបានការងារធ្វើក៏មានច្រើនលើសលុបដែរ។ ក្នុងនាមជាជនជាតិខ្មែរ យើងគួរតែជួយគ្នាក្នុងការផ្សព្វផ្សាយពីផលប្រយោជន៍ជាតិ និងប្រជាពលរដ្ឋ ជាពិសេសទាក់ទងការជួយស្វែងរកការងារជូនអតីតពលករដែលមកពីថៃ»។

អ្នកស្រី អ៊ូ ស្រីឡូន អតីតពលករមកពីខេត្តសៀមរាប ហើយកំពុងបម្រើការងារនៅរោងចក្រ ស្ថិតនៅខេត្តកំពង់ស្ពឺបាននិយាយថា អំឡុងពេលស្នាក់នៅប្រទេសថៃ អ្នកស្រី និងស្វាមី ធ្វើជាកម្មករជូតកញ្ចក់តាមអគារពាណិជ្ជកម្ម ខុនដូរ និងផ្ទះវិឡានៅទីក្រុងបាងកក ដោយមិនមានជំនាញកាត់ដេរទេ។ តែពេលមកដល់កម្ពុជានឹងត្រូវបានក្រសួងការងារផ្គូផ្គងការងារក្នុងស្រុកឱ្យធ្វើឱ្យអ្នកស្រីមានទាំងជំនាញ និងប្រាក់ខែសមរម្យទៀតផង។

អ្នកស្រីបន្តថា៖ «នៅពេលដែលខ្ញុំមកដល់ខ្មែរវិញ ខ្ញុំទទួលបានការយកចិត្តទុកដាក់ណាស់ ហើយគេឱ្យខ្ញុំមករៀនដេរអត់អស់លុយហើយ បែរជាបានលុយថែមទៀត។ ឥឡូវនេះ ខ្ញុំបានទាំងជំនាញដេរមួយ បានទាំងប្រាក់ខែ ហើយបានការងារនៅក្នុងស្រុកយើងទៀត។ អីចឹង ខ្ញុំលែងបារម្ភអ្វីច្រើនហើយ ខ្ញុំពីរនាក់ប្ដី គឺខំប្រឹងសន្សំលុយ ដើម្បីជីវភាពគ្រួសារខ្ញុំ»។

អតីតពលកររូបនេះបានអំពាវនាវដល់អ្នកកំពុងស្វែងរកការងារធ្វើ ឬរៀនជំនាញដេរ អាចទាក់ទងតាមរយៈក្រសួងការងារ និងបណ្ដុះបណ្ដាលវិជ្ជាជីវៈបាន ព្រោះការងារនៅក្នុងស្រុក ក៏មានច្រើនមិនចាំបាច់ចំណាកស្រុកទៅឆ្ងាយទៀតទេ។

ក្រសួងការងារ និងបណ្ដុះបណ្ដាលវិជ្ជាជីវៈ បានបន្តអំពាវនាវដល់បងប្អូនពលករខ្មែរត្រឡប់មកពីថៃ និងបងប្អូនប្រជាពលរដ្ឋដែលមិនទាន់មានការងារធ្វើ សូមទាក់ទងមកលេខ ១២៩៧ ដើម្បីទទួលបានឱកាសការងារធ្វើនៅតាមក្រុមហ៊ុន រោងចក្រ សហគ្រាសខ្នាតតូច និងមធ្យម សិប្បកម្ម កសិដ្ឋាន ភោជនីយដ្ឋាន និងនៅតាមការដ្ឋានសំណង់ជាដើម៕

The post អ្នកឃ្លាំមើល៖ ក្រុមប្រឆាំង និងសារព័ត៌មានគ្មានច្បាប់នៅក្រៅប្រទេស កំពុងបំភ្លៃព័ត៌មានទាក់ទងនឹងអតីតពលករ appeared first on Kampuchea Thmey Daily.

អភិបាលខេត្តតាកែវចុះពិនិត្យខ្សែសង្វាក់ផលិតកម្មរោងចក្រថ្មីៗនៅស្រុកសំរោង

Sokhom Khon — Fri, 10 Apr 2026 07:15:14 +0000

នៅព្រឹកថ្ងៃសុក្រ ទី១០ ខែមេសា ឆ្នាំ២០២៦ លោក វ៉ី សំណាង អភិបាលនៃគណៈអភិបាលខេត្តតាកែវ បានដឹកនាំក្រុមការងារ រួមមាន អភិបាលរងខេត្ត នាយករដ្ឋបាល មន្ទីរអង្គភាពពាក់ព័ន្ធ និងអាជ្ញាធរមូលដ្ឋាន ចុះពិនិត្យដោយផ្ទាល់ខ្សែសង្វាក់ផលិតកម្មរបស់រោងចក្រសហគ្រាសថ្មីៗ ដែលទើបមកបោះទុនវិនិយោគ នៅក្នុងភូមិសាស្ត្រស្រុកសំរោង ខេត្តតាកែវ។

ក្នុងដំណើរត្រួតពិនិត្យនេះ លោកអភិបាលខេត្ត បានអញ្ជើញពិនិត្យរោងចក្រចំនួន៣ទីតាំង រួមមាន៖ រោងចក្រ ញូហ្គោលដេន ខហ័រ ហ្គាមិន អ៉ីមប្រយឌើអេនព្រីនធីង ឯ.ក ដែលមានសកម្មភាពកាត់ដេរ ប៉ាក់ និងបោះពុម្ព ស្ថិតនៅភូមិព្រៃស្នួល ឃុំរវៀង; រោងចក្រ ស៊ីន ហ្វេង ហឺ ហ្គាម៉ិន (ខេមបូឌា) ឯ.ក ផលិតសម្លៀកបំពាក់ ស្ថិតនៅភូមិតាមូង ឃុំលំចង់; និងរោងចក្រផលិតឈើច្រត់ឡើងភ្នំ និងសម្ភារៈវេចខ្ចប់ ស្ថិតនៅភូមិស្វាយទង ឃុំខ្វាវ។

ក្នុងឱកាសនោះ លោក វ៉ី សំណាង បានមានប្រសាសន៍កោតសរសើរដល់ម្ចាស់រោងចក្រ និងសហគ្រាស ដែលបានសម្រេចចិត្តមកបណ្តាក់ទុនវិនិយោគនៅខេត្តតាកែវ ហើយបានជំរុញឱ្យបន្តយកចិត្តទុកដាក់លើលក្ខខណ្ឌការងារ សុវត្ថិភាព និងសុខុមាលភាពរបស់កម្មករ កម្មការិនី ដើម្បីធានាការអភិវឌ្ឍប្រកបដោយចីរភាព។

លោកអភិបាលខេត្តក៏បានបញ្ជាក់ថា ការវិនិយោគរោងចក្រថ្មីៗទាំងនេះ មិនត្រឹមតែជំរុញកំណើនសេដ្ឋកិច្ចក្នុងតំបន់ប៉ុណ្ណោះទេ ប៉ុន្តែថែមទាំងបង្កើតឱកាសការងារជាច្រើនជូនប្រជាពលរដ្ឋក្នុងមូលដ្ឋានផងដែរ។

សូមបញ្ជាក់ផងដែរថា គិតត្រឹមពាក់កណ្តាលខែមីនា ឆ្នាំ២០២៦ ចំនួនរោងចក្រនៅក្នុងខេត្តតាកែវ បានកើនឡើងប្រមាណ១០ភាគរយ ប្រៀបធៀបនឹងឆ្នាំ២០២៥ ដោយមានសរុបចំនួន ១១ក្រុមហ៊ុន មានទុនវិនិយោគសរុបប្រមាណ ៤៤.៤៥ លានដុល្លារអាមេរិក និងអាចបង្កើតការងារបានប្រមាណជាង ៤,៧០០ កន្លែង៕

អត្ថបទ៖ វីរៈ

The post អភិបាលខេត្តតាកែវចុះពិនិត្យខ្សែសង្វាក់ផលិតកម្មរោងចក្រថ្មីៗនៅស្រុកសំរោង appeared first on Kampuchea Thmey Daily.

អភិបាលខេត្តកណ្ដាល ចុះពិនិត្យរោងចក្រ ស៊ី ហាវ ហ៊ែនប៊ែន ឯ.ក ក្រោយមានករណីកម្មករដួលសន្លប់ ក្នុងស្រុកមុខកំពូល

Ung Meng — Tue, 10 Mar 2026 03:04:45 +0000

បន្ទាប់ពីទទួលបានព័ត៌មាន កម្មកររោងចក្រដួលសន្លប់ កាលពីថ្ងៃទី០៩ ខែមីនា ឆ្នាំ២០២៦ លោក គួច ចំរើន អភិបាល នៃគណៈអភិបាលខេត្តកណ្តាល បានដឹកនាំមន្ទីរជំនាញ និងអាជ្ញាធរស្រុកមុខកំពូល ដោយមានការអញ្ជើញចូលរួម ពីក្រសួងពាក់ព័ន្ធ បានចុះពិនិត្យស្ថានភាពកម្មករដួលសន្លប់នៅរោងចក្រ ស៊ីហាវ ហ៊ែនប៊ែន ឯ.ក ស្ថិតនៅភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល។

លោក គួច ចំរើន អភិបាល នៃគណៈអភិបាលខេត្តកណ្តាល បានមានប្រសាសន៍ថា៖ តាមបញ្ជាក់របស់មន្ត្រីជំនាញនិមួយៗ បន្ទាប់ពីធ្វើការត្រួតពិនិត្យលក្ខខណ្ឌការងារ និងលក្ខខណ្ឌសុវត្ថិភាព និងសុខភាពការងារ ជាពិសេសពាក់ព័ន្ធនឹងបរិយាកាសការងារ កម្ដៅ ពន្លឺ ធូលី និងប្រព័ន្ធបញ្ចេញ-បញ្ចូលខ្យល់ ក្រុមការងារបានពិនិត្យឃើញថា លក្ខខណ្ឌសុវត្ថិភាព និងសុខភាពការងារនៅកន្លែងធ្វើការអាចជាមូលហេតុដែលបណ្ដាលឱ្យកម្មករ ដួលសន្លប់ដោយសារកង្វះប្រព័ន្ធត្រជាក់។

ក្នុងនោះដែរ លោក គួច ចំរើន អភិបាលខេត្តកណ្ដាល ក៏បានស្នើរអោយម្ចាស់រោចក្រ ត្រូវដោះស្រាយក្នុងស្ថានភាពបន្ទាន់ ដោយរោងចក្រត្រូវធ្វើការរាយប្រព័ន្ធទុយយូបាញ់ទឹកនៅលើដំបូលអគារគ្រប់អគារទាំងអស់ ដើម្បីធ្វើការបញ្ចុះកម្ដៅនៅក្នុងអាគារជាបណ្ដោះអាសន្ន នឹងត្រូវតែធ្វើការកែលំអរឡើងវិញ ដោយត្រូវរៀបចំប្រព័ន្ធត្រជាក់អោយបានត្រឹមត្រូវ ដើម្បីធានាថាមានសុវត្តិភាព និងមានខ្យល់គ្រប់គ្រាន់។

ជាមួយគ្នានេះផងដែរ លោកអភិបាលខេត្តកណ្ដាល ក៏បានថ្លែងកោតសរសើរដល់មន្ត្រីជំនាញ អាជ្ញាធរពាក់ព័ន្ធ ជាពិសេសប.ស.ស ដែលបានយកចិត្តទុកដាក់ ជួយដល់កម្មករដែលរងការដួលសន្លប់ ដោយមិនមានកម្មករណាម្នាក់រងគ្រោះធ្ងន់ធ្ងរឡើយ។

លោក ធុល នាង ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តកណ្ដាល បានឱ្យដឹងថា៖ កម្មករចំនួន ៧៣ នាក់បម្រើការងារនៅរោងចក្រ ស៊ី ហាវ ក្នុងខេត្តកណ្ដាល បានដួលសន្លប់ ចាប់តាំងពីថ្ងៃទី០៣ ខែមីនា មក ដោយបានទៅសម្រាកព្យាបាលនៅមន្ទីរពេទ្យបង្អែក ប៊ុនរ៉ានី ហ៊ុនសែន រការកោង, មណ្ឌលសុខភាព ព្រែកអញ្ចាញ និងមន្ទីរពេទ្យមិត្តភាពកម្ពុជា-គុយវ៉េត។

លោកប្រធានប្រធានមន្ទីរការងារ ក្នុងនាមក្រុមការងារចម្រុះបានតម្រូវឱ្យក្រុមហ៊ុន អនុញ្ញាតឱ្យកម្មករនិយោជិតឈប់ សម្រាកចំនួន៣ថ្ងៃ ដោយរក្សាប្រាក់ឈ្នួល និងប្រាក់រង្វាន់ការងារទៀងទាត់ជូនផលកម្មករនិយោជិតគ្រប់ៗ នឹងត្រូវចូលធ្វើការវិញតាមក្រុម តាមវេនរៀងៗខ្លួន៕ ដោយ ៖អុឹងម៉េង

The post អភិបាលខេត្តកណ្ដាល ចុះពិនិត្យរោងចក្រ ស៊ី ហាវ ហ៊ែនប៊ែន ឯ.ក ក្រោយមានករណីកម្មករដួលសន្លប់ ក្នុងស្រុកមុខកំពូល appeared first on Kampuchea Thmey Daily.

រដ្ឋមន្ត្រីក្រសួងឧស្សាហកម្មស្នើ IFC ជួយកម្ពុជាបង្កើនសមត្ថភាពផលិតវត្ថុធាតុដើមនៅក្នុងស្រុក

hun sirivadh — Wed, 21 Jan 2026 03:56:01 +0000

រដ្ឋមន្ត្រីឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ហែម វណ្ណឌី បានស្នើដល់តំណាងសាជីវកម្មហិរញ្ញវត្ថុអន្តរជាតិ (IFC) ប្រចាំកម្ពុជាលោកស្រី Towfiqua Hoque ជួយគាំទ្របន្ថែមលើការបង្កើនសមត្ថភាពផលិតវត្ថុធាតុដើមនៅកម្ពុជា បន្ទាប់ពីលោកបានលើកឡើងពីកម្រិតសមត្ថភាពផ្ដត់ផ្គង់វត្ថុធាតុដើមនៅក្នុងស្រុក។

លើកឡើងក្នុងជំនួបកាលពីថ្ងៃទី១៩ ខែមករា ឆ្នាំ២០២៦ លោក ហែម វណ្ណឌី បានថ្លែងថាកម្ពូជាបានអនុម័តគម្រោងវិនិយោគក្នុងទំហំខ្ពស់បំផុតមិនធ្លាប់មានក្នុងឆ្នាំ២០២៥ ដែលមានតម្លៃសរុបជាង១០ពាន់លានដុល្លារអាមេរិក តែបញ្ហានោះគឺវត្ថុធាតុដើមក្នុងស្រុកដើម្បីគាំទ្រដល់ការវិនិយោគនោះគឺនៅមានកម្រិតនៅឡើយ។

លោកបានស្នើដល់ IFC ជួយគាំទ្របន្ថែមលើការ ភ្ជាប់តួអង្គនៃខ្សែច្រវាក់ផ្គត់ផ្គង់ តាមរយៈការបណ្ដុះបណ្ដាលសហគ្រាសធុនតូច និងមធ្យមសក្ដានុពល ក្នុងអនុវិស័យ ដូចជាផលិតកម្មអំបោះ គ្រឿងភ្ជាប់និងលម្អ សារធាតុគីមី វត្ថុធាតុដើមជាស្បែក និងការវេចខ្ចប់ជាដើម។

លោកថា៖ «សហគ្រាសធុនតូច និងមធ្យមគឺជាតួអង្គគន្លឹះសម្រាប់តម្លៃបន្ថែមខ្ពស់ និងភាពប្រកួតប្រជែងរយៈពេលវែង»។

តំណាង IFC លោកស្រី Towfiqua Hoque បានលើកឡើងថាបច្ចុប្បន្ន IFC កំពុងសិក្សាលទ្ធភាពវិនិយោគលើកម្មវិធីមួយចំនួន ដូចជាតំបន់សេដ្ឋកិច្ចពិសេសបៃតង មជ្ឈមណ្ឌលភស្តុភារកម្ម និងយន្តការហិរញ្ញប្បទានសម្រាប់ទាំងសហគ្រាសធុនតូចនិងមធ្យម និងគម្រោងវិនិយោគផ្ទាល់ពីបរទេស។ លោកស្រីបន្ថែមថា IFC ក៏កំពុងគាំទ្រដល់គម្រោង រោងចក្រកាន់តែប្រសើរនៅកម្ពុជា និងកម្មវិធីនិរន្តរភាព ដោយក្នុងនោះក៏បានផ្ដល់ហិរញ្ញប្បទានខ្សែច្រវាក់ផ្គត់ផ្គង់រយៈពេលខ្លីប្រមាណ ១៥០ ទៅ២០០លានដុល្លារក្នុងមួយឆ្នាំផងដែរ។

បើតាមរដ្ឋមន្ត្រីឧស្សាហកម្ម ហែម វណ្ណឌី បច្ចុប្បន្នកម្ពុជាមានរោងចក្រសហគ្រាសជាង៣ពាន់កំពុងដំណើរការ ហើយឆ្នាំ២០២៦នេះក៏នឹងបង្កើនបន្ថែមទៀតផងដែរ

ប្រធានសហភាពពលកម្មជាតិកម្ពុជាលោក សំ សឿន បានឱ្យដឹងថា សមត្ថភាពនៃការផ្គត់ផ្គង់វត្ថុធាតុដើមក្នុងស្រុករបស់កម្ពុជាពិតជាមានកម្រិតជាហេតុដែលតម្រូវឱ្យមានការទិញវត្ថុធាតុដើមពីបរទេសមកផ្គត់ផ្គង់សង្វាក់ផលិតកម្មក្នុងស្រុកដើម្បីនាំចេញ។ លោកគាំទ្រដល់ការបោះជំហានក្នុងការបង្កើនវត្ថុធាតុដើមផ្គត់ផ្គង់ក្នុងស្រុកដោយថាការធ្វើបែបនេះនឹងជួយកាត់បន្ថយថ្លៃដើម បង្កើតការងារដល់ប្រជាពលរដ្ឋ កាត់បន្ថយការកកស្ទះលើការនាំចូលវត្ថុធាតុដើមពីបរទេស និងជំរុញការនាំចេញផលិតផលសម្រេចទៅកាន់ទីផ្សារពិភពលោកផងដែរ។

លោកបន្ថែមថា៖ «ហើយបើសិនជាមានការផលិតវត្ថុធាតុដើមនៅកម្ពុជា នោះយើងមើលឃើញថាកម្ពុជានឹងមានឱកាសក្នុងការប្រកួតប្រជែងទាំងក្នុងតំបន់លើការនាំចេញផលិតផលសម្រេច និងលើកស្ទួយដល់វិស័យការងារ និងឱកាសការងារដល់ប្រជាពលរដ្ឋផងដែរ»។

បើតាមលោក សំ សឿន ប្រទេសដែលនាំចូលវត្ថុធាតុដើមច្រើនជាងចូលកម្ពុជាគឺប្រទេសចិន ខណៈវិស័យឧស្សាហកម្មកាត់ដេរកម្ពុជាត្រូវការច្រើននូវអំបោះ កំណាត់ ស្បែកប្រណិតៗ ដើម្បីគាំទ្រដល់ច្រវាក់ផលិតកម្មរបស់ខ្លួន៕

អត្ថបទដោយ ហ៊ុន សិរីវឌ្ឍន៍

The post រដ្ឋមន្ត្រីក្រសួងឧស្សាហកម្មស្នើ IFC ជួយកម្ពុជាបង្កើនសមត្ថភាពផលិតវត្ថុធាតុដើមនៅក្នុងស្រុក appeared first on Kampuchea Thmey Daily.

រដ្ឋាភិបាល សម្រេចព្យួរការបង់ប្រាក់រំដោះពន្ធលើប្រាក់ចំណូលក្នុងវិស័យឧស្សាហកម្មកាត់ដេរ

deth leng — Tue, 13 Jan 2026 08:50:14 +0000

រដ្ឋាភិបាលកម្ពុជានៅថ្ងៃទី ១៣ ខែមករា ឆ្នាំ ២០២៦ សម្រេចព្យួរទុកការបង់ប្រាក់រំដោះពន្ធលើប្រាក់ចំណូលរបស់សហគ្រាសក្នុងវិស័យឧស្សាហកម្មផ្នែកវាយនភណ្ឌកាត់ដេររហូតដល់ដំណាច់ឆ្នាំ ២០២៨ ដើម្បីនិរន្តរភាព ជំរុញការនាំចេញ និងបង្កើតការងារដល់ប្រជាពលរដ្ឋ។

យោងតាមប្រកាសរបស់ក្រសួងសេដ្ឋកិច្ច និងហិរញ្ញវត្ថុចេញផ្សាយនៅថ្ងៃទី ១៣ ខែមករា ឆ្នាំ ២០២៦ ការសម្រេចនេះ មានវិសាលភាពអនុវត្តចំពោះសហគ្រាសជាគម្រោងវិនិយោគមានលក្ខណសម្បត្តិគ្រប់គ្រាន់ ក្នុងវិស័យវាយនភណ្ឌកាត់ដេរដែលផុតរយៈពេលលើកលែងពន្ធលើប្រាក់ចំណូល រួមមាន សហគ្រាស វាយនភណ្ឌ សហគ្រាសផលិតសម្លៀកបំពាក់ ស្បែកជើង មួក កាបូប ស្រោមដៃ កន្សែង និងសហគ្រាសផលិតកម្រាលតុ សម្រាប់បម្រើដល់ការនាំចេញ។

សហគ្រាសដូចមានចែងក្នុងប្រការ២ នៃប្រកាសនេះ ត្រូវបានអនុគ្រោះព្យួរទុកជាបណ្តោះអាសន្ននូវ ការបង់ប្រាក់រំដោះពន្ធលើប្រាក់ចំណូលប្រចាំខែ រហូតដល់ដំណាច់ឆ្នាំ២០២៨។

ដើម្បីទទួលបានការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ ដូចមានចែងក្នុងប្រការ៣ នៃ ប្រកាសនេះ សហគ្រាសត្រូវបំពេញលក្ខខណ្ឌដូចខាងក្រោម៖

កាន់បញ្ជីកាគណនេយ្យឱ្យបានត្រឹមត្រូវ ស្របតាមច្បាប់ និងលិខិតបទដ្ឋានគតិយុត្តស្តីពីពន្ធដារ និងច្បាប់ និងលិខិតបទដ្ឋានគតិយុត្តស្តីពីគណនេយ្យនិងសវនកម្មជាធរមាន ព្រមទាំងដាក់លិខិតប្រកាសសារពើពន្ធ និងបង់ប្រាក់ពន្ធអាករដទៃទៀតតាមកាលកំណត់ ដូចមានចែងក្នុង ច្បាប់ និងលិខិតបទដ្ឋានគតិយុត្តស្តីពីពន្ធដារជាធរមាន និងផ្តល់របាយការណ៍សវនកម្មឯករាជ្យប្រចាំឆ្នាំជូនរដ្ឋបាលសារពើពន្ធ។

ក្នុងករណីមិនបានបំពេញតាមលក្ខខណ្ឌទាំង ៣ ខាងលើ សហគ្រាសនឹងត្រូវដកហូតការព្យួរទុកការបង់ប្រាក់រំដោះពន្ធលើប្រាក់ចំណូលប្រចាំខែ ព្រមទាំងត្រូវទទួលរងទណ្ឌកម្មផ្សេងៗ តាមច្បាប់ជាធរមាន៕

អត្ថបទ៖ ឡេង ដេត

The post រដ្ឋាភិបាល សម្រេចព្យួរការបង់ប្រាក់រំដោះពន្ធលើប្រាក់ចំណូលក្នុងវិស័យឧស្សាហកម្មកាត់ដេរ appeared first on Kampuchea Thmey Daily.

កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់

Din Thary — Wed, 02 Jul 2025 05:20:00 +0000

ពាក់ព័ន្ធទៅនិងស្ថានភាពនាពេលបច្ចុប្បន្ននេះ តម្រូវការពលកម្មនៅក្នុងប្រទេសនៅមានតម្រូវការច្រើនទាំងវិស័យវាយនភណ្ឌ វិស័យកសិកម្ម និងវិស័យសំណង់ ដូច្នេះពលករចំណាកស្រុកនៅថៃទាំងអស់ អាចវិលត្រឡប់មកធ្វើការនៅស្រុកខ្មែរវិញបាន។ នេះគឺជាការលើកឡើងរបស់លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជា នៅក្នុងបទសម្ភាសសេដ្ឋកិច្ចជាមួយ«កម្ពុជាថ្មី»។

ពាក់ព័ន្ធទៅនិងបញ្ហាព្រំដែនរវាងកម្ពុជា-ថៃ ដែលឈានទៅដល់ការបិទច្រកព្រំដែនទាំងអស់រវាងប្រទេសទាំងពីរ និងការវិលត្រឡប់មកវិញពីពលករចំណាកស្រុកពីថៃ លោក តូច ចៅចេក បានមានប្រសាសន៍ថា ពលករដែលចំណាកស្រុកទៅធ្វើការនៅប្រទេសថៃ មិនមែនទៅដល់ធ្វើការនៅការិយាល័យទេ ប៉ុន្តែធ្វើការជាពលករ ដូច្នេះកម្លាំងពលកម្មនៅពេលត្រឡប់មកស្រុកខ្មែរវិញប្រហែលជាមានកន្លែងជាច្រើនដែលត្រូវការ។

លោកបានគូសបញ្ជាក់ថា «ប្រសិនបើគ្មានពន្ធបដិការជាមួយសហរដ្ឋអាមេរិកទេ ពន្ធនៅធម្មតា ចំនួនរោងចក្រនៅកម្ពុជាកាន់តែមានច្រើន ហើយពលករត្រឡប់មកពីថៃទាំងអស់នោះវិញ ប្រហែលជាមិនគ្រប់គ្រាន់សម្រាប់តម្រូវការរោងចក្រនៅក្នុងស្រុកខ្មែរផង»។

លោក តូច ចៅចេក បានបន្ថែមថា ពលករដែលចំណាកស្រុកទៅធ្វើការនៅប្រទេសទាំងអស់នោះ គឺអាចត្រឡប់មកស្រុកខ្មែរវិញបាន ព្រោះតម្លៃកម្លាំងពលកម្មក៏មិនខុសពីស្រុកថៃប៉ុន្មានដែរ ដោយលោកសង្កេតឃើញថា កម្មកររោងចក្រអាចទទួលបានប្រាក់កម្រៃជាមធ្យមចន្លោះពី ៣០០ដុល្លារ ទៅជាង ៣០០ ដុល្លារ ឬអាចលើសនេះទៅតាមស្ថានភាពការងារជាក់ស្ដែង ដែលនេះក៏ជាចំណែកមួយសមរម្យ ដូច្នេះប្រសិនបើពួកគេត្រឡប់មកពីថៃវិញ គាត់អាចមានឱកាសអាចធ្វើការបានជាពិសេសនៅតាមរោងចក្រវាយនភណ្ឌ និងវិស័យមួយចំនួនទៀតនៅកម្ពុជា។

ក្រៅពីវិស័យវាយនភណ្ឌ លោក តូច ចៅចេក បានបន្តថា ក៏នៅមានក្រុមហ៊ុនមួយចំនួនទៀតដែលទាក់ទងកសិកម្ម ព្រោះវិស័យកសិកម្មនៅកម្ពុជា ក៏ជាវិស័យមួយដែលធំល្មម និងមានតម្រូវការកម្លាំងពលកម្មច្រើនដូចគ្នាដែរ។

បន្ថែមពីនេះ ក៏នៅមានវិស័យសំណង់ ដែលមានតម្រូវការខាងពលកម្មខ្ពស់ ព្រោះវិស័យសំណង់នៅកម្ពុជា ប្រសិនបើតទៅមុខទៀតវិស័យអចលនទ្រព្យនៅកម្ពុជាមានការរីកចម្រើនដូចដើមវិញ នោះវិស័យមួយនេះក៏ទាមទារឱ្យមានតម្រូវការពលកម្មច្រើនដូចគ្នាដែរ។

បើតាមលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា គិតពីដំណាច់ឆ្នាំ២០២៤ ដល់ត្រឹមខែមេសា ឆ្នាំ២០២៥ នេះ សហគ្រាស គ្រឹះស្ថាន បានកើនពីចំនួនជាង ៤៤ពាន់ (៤៤ ៧៩៨) ដល់ចំនួនជាង ៤៥ ពាន់(៤៥ ៣៨៦) សហគ្រាស ហើយកម្មករនិយោជិតបានកើន ពីប្រមាណ ១,៨២លាននាក់ ដល់ប្រមាណ១,៨៧លាននាក់ ដែលអាចផ្តល់ប្រាក់ឈ្នួលដល់កម្មករនិយោជិកជាមធ្យមសរុបប្រចាំឆ្នាំប្រមាណ ៦ ពាន់លានដុល្លារអាម៉េរិក។ ក្នុងនោះ វិស័យកាត់ដេរមានសហគ្រាស គ្រឹះស្ថានសរុបចំនួន ១ ៦៥៧ សហគ្រាស មានកម្មករនិយោជិកប្រមាណ ៩៧ ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ពាន់ លានដុល្លារ៕

ដោយ៖ ឌិន ថារី

The post កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់ appeared first on Kampuchea Thmey Daily.

រដ្ឋមន្ត្រីការងារ៖ រោងចក្រកើន៥០៨៦ ក្នុងពេល២០ខែ ខណៈប្រាក់ឈ្នួលសរុបប្រចាំឆ្នាំមានជិត៦ពាន់លានដុល្លារ

Thoeun Vansong — Thu, 22 May 2025 06:43:04 +0000

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី២២ ខែឧសភា ឆ្នាំ២០២៥ បានអះអាងថា ប្រាក់ឈ្នួលសរុបរបស់កម្មករប្រចាំឆ្នាំនៅកម្ពុជា បានកើនឡើងជិត ៦ពាន់លានដុល្លារក្នុងមួយឆ្នាំៗ ខណៈរោងចក្រសហគ្រាសបានកើនឡើងពី៤០ ៣០០ ដល់៤៥ ៣៨៦សហគ្រាស គិតនៅត្រឹមខែមេសា ឆ្នាំ២០២៥។

នេះគឺជាការគូសបញ្ជាក់ ដែលលោករដ្ឋមន្ត្រី បានថ្លែងក្នុងពិធីអបអរសាទរការទទួលបានក្រុមហ៊ុនវិនិយោគចំនួន២០០ និងសំណេះសំណាលជាមួយបងប្អូនកម្មករនិយោជិត នៅក្នុងតំបន់សេដ្ឋកិច្ចពិសេសក្រុងព្រះសីហនុ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោករដ្ឋមន្ត្រី ហេង សួរ បានគូសបញ្ជាក់ថា ក្នុងរយៈពេល ២០ខែ ចំនួនរោងចក្រសហគ្រាស បានកើនពីចំនួន ៤០ ៣០០ ដល់ ចំនួន ៤៥ ៣៨៦សហគ្រាស ហើយកម្មករនិយោជិតបានកើនពីប្រមាណ១,៦៥លាននាក់ ដល់ប្រមាណ ១,៨៧លាននាក់ ដែលអាចផ្តល់ប្រាក់ឈ្នួលជូនបងប្អូនកម្មករនិយោជិតមធ្យមសរុបប្រចាំឆ្នាំប្រមាណ៥,៩ប៊ីលានដុល្លារអាម៉េរិក។ ក្នុងនោះ គ្រាន់តែវិស័យកាត់ដេរមានសហគ្រាសសរុបចំនួន ១៦៥៧សហគ្រាស ជាមួយនឹងកម្មករនិយោជិតប្រមាណ ៩៧ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ប៊ីលានដុល្លារអាម៉េរិក។

សូមបញ្ជាក់ថា ក្រសួងការងារ និងបណ្តុះបណ្តាលវិជ្ជាជីវៈ បានសហការជាមួយរដ្ឋបាលខេត្តព្រះសីហនុ និងស្ថាប័នពាក់ព័ន្ធ បានរៀបចំពិធីអបអរសាទរការទទួលបានក្រុមហ៊ុនវិនិយោគចំនួន២០០ ក្នុងតំបន់សេដ្ឋកិច្ចពិសេសក្រុងព្រះសីហនុ ដោយមានកម្មករនិយោជិតចូលរួមសរុបប្រមាណ៣,២ម៉ឺននាក់មកពីតំបន់សេដ្ឋកិច្ចពិសេសក្រុងព្រះសីហនុ ក្នុងនោះស្ត្រីមានផ្ទៃពោះចំនួន៧៥១នាក់៕

The post រដ្ឋមន្ត្រីការងារ៖ រោងចក្រកើន៥០៨៦ ក្នុងពេល២០ខែ ខណៈប្រាក់ឈ្នួលសរុបប្រចាំឆ្នាំមានជិត៦ពាន់លានដុល្លារ appeared first on Kampuchea Thmey Daily.

សម្ដេចធិបតី ថា កំពង់ឆ្នាំងជាខេត្តគោលដៅថ្មីនៃបណ្ដុំរោងចក្រ ខណៈកំពុងខ្វះកម្លាំងពលកម្ម

Thoeun Vansong — Sat, 17 May 2025 03:15:50 +0000

សម្ដេចធិបតី ហ៊ុន ម៉ាណែត បានលើកឡើងពីការអភិវឌ្ឍដ៏រីកចម្រើនរបស់ខេត្តកំពង់ឆ្នាំង ដែលបច្ចុប្បន្នខេត្តនេះ បានក្លាយជាគោលដៅថ្មីនៃបណ្ដុំរោងចក្រឧស្សាហកម្ម ខណៈសម្ដេច ក៏បានអះអាងពីកង្វះកម្លាំងពលកម្មបម្រើឱ្យវិស័យឧស្សាហកម្មកាត់ដេរនៅក្នុងខេត្តកំពង់ឆ្នាំង។

ការអះអាងរបស់សម្តេចធិបតី ហ៊ុន ម៉ាណែត បានធ្វើឡើងក្នុងពេលអញ្ជើញសម្ពោធដាក់ឱ្យប្រើប្រាស់អគារសិក្សា និងសមិទ្ធផលនានានៅក្នុងវិទ្យាល័យ ហ៊ុន សែន ប្រម៉ោយ ស្ថិតក្នុងស្រុកវាលវែង ខេត្តពោធិ៍សាត់ នាព្រឹកថ្ងៃសៅរ៍ ទី១៧ ខែឧសភា ឆ្នាំ២០២៥។

ពីវេទិកានេះ សម្ដេចធិបតី ហ៊ុន ម៉ាណែត បានថ្លែងថា កាលមុន ខេត្តពោធិ៍សាត់ និងខេត្តកំពង់ឆ្នាំង គឺជាខេត្តមកហួសទៅហួស ដោយនៅចន្លោះរាជធានីភ្នំពេញ និងខេត្តបាត់ដំបង។ តែពេលនេះ ខេត្តពោធិ៍សាត់ និងខេត្តកំពង់ឆ្នាំង លែងទៅហួសមកហួសទៀតហើយ តែជាគោលដៅថ្មីនៃការវិនិយោគ។

បើតាមសម្ដេចធិបតី នាយករដ្ឋមន្ត្រី កំពង់ឆ្នាំង ភ្ជាប់ជាមួយពោធិ៍សាត់ បានក្លាយជាខេត្តដ៏មានសក្តានុពល ដោយអ្នកវិនិយោគកំពុងចាប់ផ្ដើមបង្វែរការវិនិយោគមកខេត្តទាំងពីរនេះវិញ ពិសេសនោះ គឺការបើករោងចក្រកាត់ដេរក្នុងវិស័យវាយនភណ្ឌតែម្ដង។ សម្ដេចធិបតី បានគូសបញ្ជាក់ថា តាមការរាយការណ៍របស់អភិបាលខេត្តកំពង់ឆ្នាំង លោក ស៊ុន សុវណ្ណារិទ្ធ គឺឥលូវនេះនៅខេត្តកំពង់ឆ្នាំង កំពុងខ្វះកម្លាំងពលកម្មដែរ ខណៈរោងចក្របើកនៅទីនោះត្រូវការកម្លាំងពលកម្មជាង ៦ម៉ឺននាក់ ហើយអាចនឹងរីកបន្ថែមប្រមាណ ២ម៉ឺននាក់ទៀត។

សម្ដេចធិបតី ក៏បានលើកឡើងពីសក្តានុពលផ្លូវជាតិលេខ១០ និងផ្លូវដែក ដែលជាការតភ្ជាប់ហេដ្ឋារចនាសម្ព័ន្ធដឹកជញ្ជូនដ៏មានសារៈសំខាន់នៅច្រករបៀងភាគខាងលិចប្រទេសនេះផងដែរ៕

The post សម្ដេចធិបតី ថា កំពង់ឆ្នាំងជាខេត្តគោលដៅថ្មីនៃបណ្ដុំរោងចក្រ ខណៈកំពុងខ្វះកម្លាំងពលកម្ម appeared first on Kampuchea Thmey Daily.