សេដ្ឋកិច្ច

កម្ពុជា នៅមានតម្រូវការពលកម្មច្រើន ទាំងវិស័យវាយនភណ្ឌ កសិកម្ម និងសំណង់

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

ពាក់ព័ន្ធទៅនិងស្ថានភាពនាពេលបច្ចុប្បន្ននេះ តម្រូវការពលកម្មនៅក្នុងប្រទេសនៅមានតម្រូវការច្រើនទាំងវិស័យវាយនភណ្ឌ វិស័យកសិកម្ម និងវិស័យសំណង់ ដូច្នេះពលករចំណាកស្រុកនៅថៃទាំងអស់ អាចវិលត្រឡប់មកធ្វើការនៅស្រុកខ្មែរវិញបាន។ នេះគឺជាការលើកឡើងរបស់លោក តូច ចៅចេក ប្រធាននាយកប្រតិបត្តិធនាគារ ប្រៃសណីយ៍កម្ពុជា នៅក្នុងបទសម្ភាសសេដ្ឋកិច្ចជាមួយ«កម្ពុជាថ្មី»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធទៅនិងបញ្ហាព្រំដែនរវាងកម្ពុជា-ថៃ ដែលឈានទៅដល់ការបិទច្រកព្រំដែនទាំងអស់រវាងប្រទេសទាំងពីរ និងការវិលត្រឡប់មកវិញពីពលករចំណាកស្រុកពីថៃ លោក តូច ចៅចេក បានមានប្រសាសន៍ថា ពលករដែលចំណាកស្រុកទៅធ្វើការនៅប្រទេសថៃ មិនមែនទៅដល់ធ្វើការនៅការិយាល័យទេ ប៉ុន្តែធ្វើការជាពលករ ដូច្នេះកម្លាំងពលកម្មនៅពេលត្រឡប់មកស្រុកខ្មែរវិញប្រហែលជាមានកន្លែងជាច្រើនដែលត្រូវការ។

លោកបានគូសបញ្ជាក់ថា «ប្រសិនបើគ្មានពន្ធបដិការជាមួយសហរដ្ឋអាមេរិកទេ ពន្ធនៅធម្មតា ចំនួនរោងចក្រនៅកម្ពុជាកាន់តែមានច្រើន ហើយពលករត្រឡប់មកពីថៃទាំងអស់នោះវិញ ប្រហែលជាមិនគ្រប់គ្រាន់សម្រាប់តម្រូវការរោងចក្រនៅក្នុងស្រុកខ្មែរផង»។

លោក តូច ចៅចេក បានបន្ថែមថា ពលករដែលចំណាកស្រុកទៅធ្វើការនៅប្រទេសទាំងអស់នោះ គឺអាចត្រឡប់មកស្រុកខ្មែរវិញបាន ព្រោះតម្លៃកម្លាំងពលកម្មក៏មិនខុសពីស្រុកថៃប៉ុន្មានដែរ ដោយលោកសង្កេតឃើញថា កម្មកររោងចក្រអាចទទួលបានប្រាក់កម្រៃជាមធ្យមចន្លោះពី ៣០០ដុល្លារ ទៅជាង ៣០០ ដុល្លារ ឬអាចលើសនេះទៅតាមស្ថានភាពការងារជាក់ស្ដែង ដែលនេះក៏ជាចំណែកមួយសមរម្យ ដូច្នេះប្រសិនបើពួកគេត្រឡប់មកពីថៃវិញ គាត់អាចមានឱកាសអាចធ្វើការបានជាពិសេសនៅតាមរោងចក្រវាយនភណ្ឌ និងវិស័យមួយចំនួនទៀតនៅកម្ពុជា។

ក្រៅពីវិស័យវាយនភណ្ឌ លោក តូច ចៅចេក បានបន្តថា ក៏នៅមានក្រុមហ៊ុនមួយចំនួនទៀតដែលទាក់ទងកសិកម្ម ព្រោះវិស័យកសិកម្មនៅកម្ពុជា ក៏ជាវិស័យមួយដែលធំល្មម និងមានតម្រូវការកម្លាំងពលកម្មច្រើនដូចគ្នាដែរ។

បន្ថែមពីនេះ ក៏នៅមានវិស័យសំណង់ ដែលមានតម្រូវការខាងពលកម្មខ្ពស់ ព្រោះវិស័យសំណង់នៅកម្ពុជា ប្រសិនបើតទៅមុខទៀតវិស័យអចលនទ្រព្យនៅកម្ពុជាមានការរីកចម្រើនដូចដើមវិញ នោះវិស័យមួយនេះក៏ទាមទារឱ្យមានតម្រូវការពលកម្មច្រើនដូចគ្នាដែរ។

បើតាមលោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានគូសបញ្ជាក់ថា គិតពីដំណាច់ឆ្នាំ២០២៤ ដល់ត្រឹមខែមេសា ឆ្នាំ២០២៥ នេះ សហគ្រាស គ្រឹះស្ថាន បានកើនពីចំនួនជាង ៤៤ពាន់ (៤៤ ៧៩៨) ដល់ចំនួនជាង ៤៥ ពាន់(៤៥ ៣៨៦) សហគ្រាស ហើយកម្មករនិយោជិតបានកើន ពីប្រមាណ ១,៨២លាននាក់ ដល់ប្រមាណ១,៨៧លាននាក់ ដែលអាចផ្តល់ប្រាក់ឈ្នួលដល់កម្មករនិយោជិកជាមធ្យមសរុបប្រចាំឆ្នាំប្រមាណ ៦ ពាន់លានដុល្លារអាម៉េរិក។ ក្នុងនោះ វិស័យកាត់ដេរមានសហគ្រាស គ្រឹះស្ថានសរុបចំនួន ១ ៦៥៧ សហគ្រាស មានកម្មករនិយោជិកប្រមាណ ៩៧ ម៉ឺននាក់ ទទួលបានប្រាក់ឈ្នួលមធ្យមសរុបប្រចាំឆ្នាំប្រមាណ ៣,១ពាន់ លានដុល្លារ៕

ដោយ៖ ឌិន ថារី