រោងចក្រ Archives - Kampuchea Thmey Daily

លោក ស៊ុន មេសា ៖ គិតត្រឹម ៥ ខែ ដើមឆ្នាំនេះ ចំនួនសហគ្រាស ក្រុមហ៊ុន រោងចក្រ កើនឡើងថ្មីចំនួន ៦៥០

អ៊ិន ពិសី — Mon, 29 Jun 2026 07:09:32 +0000

គិតត្រឹម ៥ ខែ ដើមឆ្នាំ ២០២៦ នេះ ចំនួនសហគ្រាស ក្រុមហ៊ុន រោងចក្រ កើនពី ៤៦ ៦៤៩ សហគ្រាស នៅឆ្នាំ ២០២៥ ដល់ចំនួន ៤៧ ២៩៩ សហគ្រាស ពោលគឺចុះបញ្ជីថ្មីចំនួន ៦៥០ សហគ្រាស នៅក្រសួងការងារ និង បណ្ដុះបណ្ដាលវិជ្ជាជីវៈ ដែលធ្វើឱ្យមានកំណើនកម្មករ-និយោជិត បម្រើការងារសរុបចំនួន ២ ២៩៦ ៣៤៨ នាក់ (ស្រី ១ ៣០៩ ១៩០ នាក់)។

លោក ស៊ុន មេសា អ្នកនាំពាក្យក្រសួងការងារ និង បណ្ដុះបណ្ដាលវិជ្ជាជីវៈ បានឱ្យដឹងថា តាមរយៈកំណើន នៃការបង្កើតរោងចក្រថ្មីៗ នេះ នឹងមានតម្រូវការកម្លាំងពលកម្មច្រើន ហើយធ្វើឱ្យមានសន្ទុះ នៃការបញ្ជាទិញ និង ការនាំចេញកើនឡើងល្អពីមួយថ្ងៃទៅមួយថ្ងៃ។ កត្តាទាំងនេះ ដោយសារស្ថិរភាព នៃបរិយាកាសវិនិយោគ និង ការរក្សាបាននូវភាពប្រកួតប្រជែងដែលបានទាក់ទាញការវិនិយោគថ្មីៗ មកបន្ថែមទៀត។

លោកបានសង្កត់ធ្ងន់ទៅលើកំណើនទុនវិនិយោគ កំណើនរោងចក្រ និង ការងារនេះ គឺឆ្លុះបញ្ចាំងពីភាពរឹងមាំ នៃសេដ្ឋកិច្ចកម្ពុជា ដែលកើតចេញពីគោលនយោបាយត្រឹមត្រូវរបស់រាជរដ្ឋាភិបាលអាណត្តិទី ៧ ដែលបានធ្វើកំណែទម្រង់វិនិយោគឱ្យមានភាពងាយស្រួលជាងមុន។

លើសពីនេះ លោកបញ្ជាក់ថា «តាមរយៈគោលនយោបាយរបស់រាជរដ្ឋាភិបាល នីតិកាលទី ៧ យើងឃើញថា មានកំណើន នៃការបង្កើតរោងចក្រថ្មីៗ និង មានតម្រូវការកម្លាំងពលកម្មច្រើន ដែលនេះយើងសង្ឃឹមថា សន្ទុះ នៃការបញ្ជាទិញ និង ការនាំចេញ នឹងមានការកើនឡើងល្អពីមួយថ្ងៃទៅមួយថ្ងៃ»។

អ្នកនាំពាក្យរូបនេះ មានជំនឿយ៉ាងមុតមាំថា ការដឹកនាំដ៏ឈ្លាសវៃរបស់រាជរដ្ឋាភិបាល បន្តស្មារតីសាមគ្គីភាពដ៏រឹងមាំ ដើម្បីក្លាយជាកម្លាំងចលករក្នុងការទាក់ទាញវិនិយោគថ្មី និង បង្កើតទំនុកចិត្តជូនអ្នកវិនិយោគិនថ្មីៗ និង បង្កើនទំនុកចិត្តជូនអ្នកនិយោគដែលមានស្រាប់។ ភាពជោគជ័យ នៃអាណត្តិថ្មីនេះ នឹងនាំនូវផលប្រយោជន៍ដោយផ្ទាល់ដល់និយោជក និង កម្មករ-និយោជិត តាមរយៈការបង្កើតការងារ និង ប្រាក់ចំណូល ស្របតាមចក្ខុវិស័យវែងឆ្ងាយរបស់រាជរដ្ឋាភិបាល៕

The post លោក ស៊ុន មេសា ៖ គិតត្រឹម ៥ ខែ ដើមឆ្នាំនេះ ចំនួនសហគ្រាស ក្រុមហ៊ុន រោងចក្រ កើនឡើងថ្មីចំនួន ៦៥០ appeared first on Kampuchea Thmey Daily.

គម្រោងរោងចក្រផលិតឆ័ត្រ អាវភ្លៀង និងកាបូបថ្មី ត្រៀមបង្កើតការងារជូនពលរដ្ឋក្នុងក្រុងដូនកែវ

deth leng — Tue, 19 May 2026 08:22:40 +0000

ខេត្តតាកែវកំពុងក្លាយជាគោលដៅថ្មីមួយសម្រាប់អ្នកវិនិយោគក្នុងវិស័យឧស្សាហកម្ម និងរោងចក្រ ដោយសារមានទីតាំងភូមិសាស្ត្រអំណោយផល ជាប់ផ្លូវជាតិសំខាន់ៗ មានបណ្តាញដឹកជញ្ជូនងាយស្រួល និងនៅជិតរាជធានីភ្នំពេញ។

លោក ញ៉ែម ស្រស់ អភិបាលរង នៃគណៈអភិបាលខេត្តតាកែវ និងជាអនុប្រធានអនុគណៈកម្មាធិការវិនិយោគខេត្តតាកែវនៅព្រឹកថ្ងៃទី ១៩ ខែឧសភា ២០២៦ បានដឹកនាំក្រុមការងារជំនាញចុះពិនិត្យទីតាំងស្នើសុំវិនិយោគបង្កើតរោងចក្រផលិតឆ័ត្រ អាវភ្លៀង និងកាបូប របស់ក្រុមហ៊ុន ហ្គោលដិនរ៉េន អិនធើណេសិនណល (ខេមបូឌា) ឯ.ក (GOLDEN RAIN INTERNATIONAL (CAMBODIA) CO.,LTD) ស្ថិតនៅភូមិប្រហូត សង្កាត់រការក្រៅ ក្រុងដូនកែវ ខេត្តតាកែវ។

ការចុះពិនិត្យទីតាំងនេះ គឺជាផ្នែកមួយនៃនីតិវិធីវាយតម្លៃសក្តានុពល និងភាពសមស្របនៃគម្រោង វិនិយោគ មុនឈានទៅដំណើរការអនុវត្តជាផ្លូវការ ដោយផ្តោតលើហេដ្ឋារចនាសម្ព័ន្ធ ទំហំទីតាំង ប្រព័ន្ធទឹក ភ្លើង ផ្លូវចរាចរណ៍ និងផលប៉ះពាល់បរិស្ថាន ស្របតាមគោលការណ៍លើកកម្ពស់ការវិនិ យោគប្រកបដោយចីរភាព។

មន្ត្រីជំនាញបានលើកឡើងថា ការបង្កើតរោងចក្រថ្មីនៅក្នុងខេត្តតាកែវ មិនត្រឹមតែជួយបង្កើនសកម្មភាពសេដ្ឋកិច្ចក្នុងមូលដ្ឋានប៉ុណ្ណោះទេ ប៉ុន្តែថែមទាំងអាចបង្កើតឱកាសការងារជាច្រើនជូនប្រជាពលរដ្ឋក្នុងតំបន់ ជាពិសេសយុវជន និងកម្មករ ដែលកំពុងស្វែងរកការងារធ្វើនៅជិតលំនៅឋាន។

អាជ្ញាធរខេត្តក៏បានយកចិត្តទុកដាក់ជំរុញបរិយាកាសវិនិយោគ ប្រកបដោយភាពអំណោយផល តម្លាភាព និងសុវត្ថិភាព ដើម្បីទាក់ទាញក្រុមហ៊ុនក្នុង និងក្រៅប្រទេសឱ្យមកបណ្តាក់ទុនកាន់តែច្រើន។

មហាជនក្នុងមូលដ្ឋានយល់ឃើញថា កំណើនរោងចក្រ និងសហគ្រាសនៅក្នុងខេត្តតាកែវ កំពុងរួមចំណែកយ៉ាងសំខាន់ក្នុងការផ្លាស់ប្តូរមុខមាត់សេដ្ឋកិច្ចក្នុងតំបន់ ពិសេសការកាត់បន្ថយការធ្វើចំណាកស្រុកទៅរកការងារនៅតំបន់ឆ្ងាយ និងជួយលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

អាជ្ញាធរខេត្តតាកែវ ក៏បានបញ្ជាក់ពីការបន្តគាំទ្រ និងសម្របសម្រួលដល់គម្រោងវិនិយោគនានា ដែលអនុវត្តស្របតាមច្បាប់ និងមានគោលដៅរួមចំណែកអភិវឌ្ឍសេដ្ឋកិច្ចមូលដ្ឋាន ប្រកបដោយទំនួលខុសត្រូវ និងនិរន្តរភាព៕

អត្ថបទ៖ វីរៈ

The post គម្រោងរោងចក្រផលិតឆ័ត្រ អាវភ្លៀង និងកាបូបថ្មី ត្រៀមបង្កើតការងារជូនពលរដ្ឋក្នុងក្រុងដូនកែវ appeared first on Kampuchea Thmey Daily.

កម្មករ-កម្មការិនី ត្រូវរាយការណ៍ជាបន្ទាន់បើឃើញក្រុមហ៊ុនរោងចក្រណា មិនចុះបញ្ជីជាមួយ ប.ស.ស

អ៊ិន ពិសី — Fri, 23 May 2025 08:43:43 +0000

បេឡាជាតិសន្តិសុខសង្គម(ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានណែនាំដល់កម្មករ-កម្មការិនី ត្រូវរាយការណ៍មក ប.ស.ស. ឱ្យបានឆាប់បំផុត ប្រសិនបើក្រុមហ៊ុន រោងចក្រ សហគ្រាស គ្រឹះស្ថានដែលពួកគាត់កំពុងបម្រើការងារនោះមិនបានចុះបញ្ជីជាមួយ ប.ស.ស. ទេនោះ ដើម្បីឱ្យក្រសួងមានចាត់វិធានការទៅតាមច្បាប់។

លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា កម្មករ-កម្មការិនីដែលស្ថិតនៅក្នុងច្បាប់ការងារ ត្រូវទទួលបាន ប.ស.ស ដែលមានចែងនៅក្នុងច្បាប់។ ប៉ុន្តែប្រសិនបើមិនមានទេ ក្រសួងលើកទឹកចិត្តដល់កម្មករ-កម្មការិនីទាំងអស់ ប្តឹងមកក្រសួងតាមរយៈឃ្យូអកូដ(បណ្តឹងអនាមិក) តាមផេកផ្លូវការរបស់ក្រសួង ឬផេករដ្ឋមន្ត្រី ក៏ដូចជាអ្នកនាំពាក្យក្រសួង ដើម្បីចុះធ្វើការងារភ្លាមៗ ព្រោះថាក្រសួងជាសេនាធិការរបស់រាជរដ្ឋាភិបាល ហើយរាជរដ្ឋាភិបាលអាណត្តិទី ៧ នេះ នៅតែបន្តយកចិត្តទុកដាក់ចំពោះកម្មករ ដើម្បីលើកកម្ពស់សុខុមាលភាពពួកគាត់ មិនអនុញ្ញាតឱ្យមានការកេងបន្លំ ឬបង់ ប.ស.ស.ដល់កម្មករកម្មការិនីនោះទេ ព្រោះវាជាកាតព្វកិច្ច។

លោកបានបន្តថា រោងចក្រសហគ្រាស ត្រូវមានកាតព្វកិច្ចចុះបញ្ជីបុគ្គលិក ឬកម្មករ-និយោជិតរបស់ខ្លួនជាមួយ ប.ស.ស. និងបង់ភាគទានជូនពួកគាត់ទៅលើរបបសន្តិសុខសង្គមផងដែរ។ ក្នុងនោះថៅកែ ឬម្ចាស់សហគ្រាស គ្រឹះស្ថាន ត្រូវបង់ភាគទានជូនបុគ្គលិក និងកម្មករ-និយោជិតរបស់ខ្លួនទៅលើផ្នែកថែទាំសុខភាព ផ្នែកហានិភ័យការងារ និងផ្នែកប្រាក់សោធន បង់ ៤ ភាគរយ ក្នុងនោះ ថៅកែ ឬម្ចាស់សហគ្រាស គ្រឹះស្ថានបង់ ២ ភាគរយ និងសាមីខ្លួនផ្ទាល់បង់ ២ ភាគរយ។

លោកបានបន្តទៀតថា «នៅពេលបងប្អូនកម្មករ-និយោជិត បានចុះបញ្ជិកាជាមួយ ប.ស.ស. និងបានបង់ភាគទានប្រចាំខែមក ប.ស.ស. ហើយបានស្នើសុំប័ណ្ណ ប.ស.ស. រួចរាល់ នោះពួកគាត់នឹងមានសិទ្ធិប្រើប្រាស់សេវានៅមន្ទីរពេទ្យដៃគូ ប.ស.ស. ដោយឥតគិតថ្លៃ ដែលជាការជួយកាត់បន្ថយចំណាយរបស់សាមីខ្លួន រួមទាំងទទួលបានអត្ថប្រយោជន៍ផ្សេងៗ ពី ប.ស.ស. ផងដែរ»។

គួរបញ្ជាក់ថា គិតមកត្រឹមខែមេសា ឆ្នាំ ២០២៥ នេះ សមាជិក ប.ស.ស បានកើនឡើងដល់ ៣ ០៦០ ៣៩២ នាក់ ស្រី ១ ៦៨៦ ៨៨៧ នាក់ ក្នុងនោះ បុគ្គលស្ថិតក្នុងវិស័យសាធារណៈចំនួន ៥០៨ ៦៦៩ នាក់ ស្រី ១៥០ ៩០៨ នាក់ បុគ្គលដែលស្ថិតក្នុងវិស័យឯកជន ចំនួន ១ ៨៦៦ ១២២ នាក់ ស្រី ១១២៤ ៨០១ នាក់ បុគ្គលស្វ័យនិយោជន៍ចំនួន ៤៩៨ ៥៤៦ នាក់ ស្រី ៣០៣ ៤១៩ នាក់ និងអ្នកក្នុងបន្ទុក១៨៧ ០៥៥ នាក់ ស្រី ១០៧ ៧៥៩ នាក់៕

អត្ថបទ ៖ សំអឿន

The post កម្មករ-កម្មការិនី ត្រូវរាយការណ៍ជាបន្ទាន់បើឃើញក្រុមហ៊ុនរោងចក្រណា មិនចុះបញ្ជីជាមួយ ប.ស.ស appeared first on Kampuchea Thmey Daily.

គិតត្រឹមចុងខែមេសា ឆ្នាំ២០២៥ រោងចក្រ សហគ្រាសកើនដល់ជាង៤ម៉ឺន៥ពាន់ ខណៈឱកាសការងារមានរាប់ម៉ឺនកន្លែង

Sokhom Khon — Fri, 02 May 2025 08:55:22 +0000

គិតត្រឹមចុងខែមេសា ឆ្នាំ២០២៥នេះ ចំនួនរោងចក្រ សហគ្រាសនៅកម្ពុជាបានកើនដល់៤៥ ៣៧៣ សហគ្រាស ដែលបានផ្តល់ឱកាសការងារជូនដល់ប្រជាពលរដ្ឋរាប់ម៉ឺនកន្លែង។ នេះបើតាមការឱ្យដឹងពីលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី២ ខែឧសភានេះ។

លោកបញ្ជាក់ថា «រោងចក្រសហគ្រាសនៅកម្ពុជាយើង គិតត្រឹមថ្ងៃទី២៥ ខែមេសា បានកើនឡើងពីចំនួន ៤៤ ៧៩៨ សហគ្រាសក្នុងឆ្នាំ២០២៤ ដល់ចំនួន ៤៥ ៣៧៣ សហគ្រាស មានន័យថា រោងចក្រសហគ្រាសយើងមានការកើនឡើងចំនួន៥៧៥សហគ្រាស»។

ទន្ទឹមនឹងការកើនឡើងចំនួនរោងចក្រសហគ្រាសនេះបានផ្តល់ឱកាសដល់ប្រជាពលរដ្ឋប្រមាណជាង៦ម៉ឺននាក់មានការងារធ្វើ។ មិនតែប៉ុណ្ណោះ ក្នុងនាមជាសេនាធិការរាជរដ្ឋាភិបាល ក្រសួងការងារ តែងតែយកចិត្តទុកដាក់ ផ្តល់តម្លៃ លើកកម្ពស់សិទ្ធិសេរីភាព និងអត្ថប្រយោជន៍ផ្សេងៗ ទាំងអ្នកធ្វើការក្នុងប្រព័ន្ធ និងបុគ្គលស្វ័យនិយោជន៍ ធ្វើយ៉ាងណាធានាឱ្យបាននូវឱកាសស្មើៗគ្នា ការងារសមរម្យ លក្ខខណ្ឌការងារ និងប្រាក់ឈ្នួលសមរម្យ ទំនាក់ទំនងវិជ្ជាជីវៈល្អ។
នេះបើតាមការបញ្ជាក់បន្ថែមរបស់អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ។

លោក សំ សឿន ប្រធានសហភាពពលកម្មជាតិកម្ពុជា មើលឃើញថា កំណើនរោចក្រសហគ្រាសជាង៥០០សហគ្រាស ដែលបានដំណើរការបន្ថែមទៀតនៅកម្ពុជានេះ គឺជាសញ្ញាវិជ្ជមានមួយសម្រាប់វិស័យការងារនៅកម្ពុជា។ ទន្ទឹមនេះ ក៏បង្ហាញថា អ្នកវិនិយោគទុកចិត្តលើកត្តាសុខសន្តិភាពពេញលេញ និងបរិយាកាសវិនិយោគមានអំណោយផលល្អ។

លោកថ្លែងថា «ប្រទេសកម្ពុជាអនុវត្តបានយ៉ាងត្រឹមត្រូវចំពោះអនុសញ្ញាអន្តរជាតិខាងការងារ បទដ្ឋានការងារអន្តរជាតិនានាដែលអង្គការអន្តរជាតិខាងការងារគាត់តម្រូវទៅដល់ប្រទេសដែលជាសមាជិកត្រូវតែអនុវត្ត ហើយកម្ពុជាបានអនុវត្តបានយ៉ាងល្អប្រសើរទើបមានការទាក់ទាញអ្នកវិនិយោគជាពិសេសម្ចាស់ម៉ាកល្បីៗ»។

ទន្ទឹមនេះ លោក ហ្វា សាលី ប្រធានសម្ព័ន្ធសហជីពជាតិ បានសាទរចំពោះកំណើនយ៉ាងសម្បើមនូវចំនួនរោងចក្រសហគ្រាសនៅដើមឆ្នាំ២០២៥នេះ ដែលសបញ្ជាក់ឱ្យឃើញពីការខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការខិតខំធ្វើយ៉ាងណាឱ្យមានការទុកចិត្តពីអ្នកវិនិយោគទាំងអស់។ ហើយអ្វីដែលជាទំនុកចិត្តអ្នកវិនិយោគគឺការជឿជាក់លើកត្តាសុខសន្តិភាពស្ថេរភាពនៅកម្ពុជា។

លោកថ្លែងថា «នេះជាអ្វីដែលយើងបានឃើញអំពីប្រទេសដែលពោរពេញទៅដោយសុខសន្តិភាព សុវត្ថិភាព ស្ថេរភាពនយោបាយល្អ ទើបធ្វើឱ្យបណ្តាអ្នកវិនិយោគមិនថាជនជាតិចិន ជប៉ុន កូរ៉េ អឺរ៉ុប អីផ្សេងៗគឺ បានកំពុងយកកម្ពុជា ធ្វើជាគោលដៅមួយក្នុងការជំរុញការផលិតការនាំចេញផ្សេង ទាក់ទងវិស័យឧស្សាហកម្មកាត់ដេរ ដំឡើងគ្រឿងបង្គំ គ្រឿងរថយន្តផ្សេង»។

ពិតណាស់ រាជរដ្ឋាភិបាលកម្ពុជាទាំងអាណត្តិមុន ក៏ដូចជាអាណត្តិថ្មីនេះ តែងធ្វើការទាក់ទាញអ្នកវិនិយោគថ្មីៗ ដើម្បីបង្កើតឱកាសការងារជូនប្រជាពលរដ្ឋ។ ទន្ទឹមនេះ រដ្ឋាភិបាលតែងតែគិតគូរដល់សុខទុក្ខរបស់បងប្អូនកម្មករនិយោជិត លើកកម្ពស់លក្ខខណ្ឌការងារ ដំឡើងប្រាក់ឈ្នួល និងផ្តល់អត្ថប្រយោជន៍ផ្សេងៗជាច្រើន៕

The post គិតត្រឹមចុងខែមេសា ឆ្នាំ២០២៥ រោងចក្រ សហគ្រាសកើនដល់ជាង៤ម៉ឺន៥ពាន់ ខណៈឱកាសការងារមានរាប់ម៉ឺនកន្លែង appeared first on Kampuchea Thmey Daily.

រោងចក្រចំនួន ៤១ បានរៀបចំកម្មវិធីអបអរសាទរទិវាពលកម្មអន្តរជាតិ ១ ឧសភា មានកម្មករ-និយោជិតចូលរួមជាង ១ ម៉ឺននាក់

អ៊ិន ពិសី — Fri, 02 May 2025 02:48:22 +0000

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លើកឡើងថា «រោងចក្រចំនួន ៤១ បានរៀបចំកម្មវិធីអបអរសាទរទិវាពលកម្មអន្តរជាតិ ១ ឧសភា ដែលមានកម្មករ-និយោជិត ចូលរួមប្រមាណជាង ១ ម៉ឺននាក់ ខណៈមន្ទីរការងារ និងបណ្ដុះបណ្ដាលវិជ្ជាជីវៈរាជធានី-ខេត្ត បានធ្វើជាសេនាធិការជូនរដ្ឋបាលរាជធានី-ខេត្ត ក្នុងការរៀបចំអបអរសាទរទិវាពលកម្មអន្តរជាតិ ១ ឧសភា ទៅតាមទីកន្លែង និងកម្មវិធីរៀងៗ ខ្លួន ប្រកបដោយបរិយាកាសរីករាយ និងស្និទ្ធស្នាល»។

ការលើកឡើងនេះ បន្ទាប់ពីមានការប្រារព្ធខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ១ ឧសភា កាលពីថ្ងៃទី ០១ ខែឧសភា ឆ្នាំ ២០២៥ ម្សិលមិញ ដែលបានប្រព្រឹត្តទៅដោយបរិយាកាសរីករាយ ស្និទ្ធស្នាល និងមានការចូលរួមកាន់តែសកម្ម និងផុលផុសពីគ្រប់ភាគីពាក់ព័ន្ធ ក្រោមម្លប់សុខសន្តិភាពនៅកម្ពុជា។

លោក ស៊ុន មេសា លើកឡើងបន្តថា ការប្រារព្ធខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ១ ឧសភា ឆ្នាំនេះ បានប្រព្រឹត្តទៅដោយបរិយាកាសរីករាយ ស្និទ្ធស្នាល និងមានការចូលរួមកាន់តែសកម្ម និងផុលផុសពីគ្រប់ភាគីពាក់ព័ន្ធ ក្រោមម្លប់សុខសន្តិភាពនៅកម្ពុជា ដែលបាននាំមកនូវស្ថិរភាពអាជីវកម្មសុខដុមនីយកម្ម នៃទំនាក់ទំនងវិជ្ជាជីវៈ អធ្យាស្រ័យល្អរវាងកម្មករ-និយោជិត និងនិយោជក ប្រសិទ្ធភាព នៃយន្តការត្រីភាគី ការលើកកម្ពស់សេរីភាពអង្គការវិជ្ជាជីវៈ លក្ខខណ្ឌការងារកាន់តែល្អប្រសើរ យន្តការដោះស្រាយការងារកាន់តែមានប្រសិទ្ធភាព ដោយឈរលើគោលការណ៍ច្បាប់ជាធរមានរបស់កម្ពុជា និងបទដ្ឋានអន្តរជាតិខាងការងារ។

លោក ស៊ុន មេសា បន្តទៀតថា ក្នុងថ្ងៃប្រារព្ធទិវាពលកម្មអន្តរជាតិដ៏រីករាយ និងអធិកអធម ហើយក្លៀវក្លានេះ រាជរដ្ឋាភិបាល ក្រសួង កម្មករ សហជីព និងអ្នកពាក់ព័ន្ធផ្សេងទៀត ប្រមាណជាង ៣ ម៉ឺននាក់ នៅទូទាំងប្រទេស មកពីគ្រប់និន្នាការ បានប្រារព្ធទិវាពលកម្មអន្តរជាតិនេះ នៅទីតាំងផ្សេងៗ គ្នា ដែលជាការបង្ហាញពីផ្កាចម្រុះពណ៌ នៃសួនសុខសន្តិភាពរបស់កម្ពុជា បង្កើតឡើង និងបន្តថែរក្សាដោយរាជរដ្ឋាភិបាលកម្ពុជាដែលដឹកនាំដោយគណបក្សប្រជាជនកម្ពុជា។

លោកបញ្ជាក់ថា ការរៀបចំប្រារព្ធយ៉ាងអធិកអធម និងរីករាយនេះ គឺជាមនុញ្ញផលក្រោមម្លប់សុខសន្តិភាពដ៏ត្រជាក់នៅកម្ពុជាដែលបានផ្តល់ឱកាសពេញលេញដល់គ្រប់សហជីព និងអង្គការវិជ្ជាជីវៈឲ្យប្រារព្ធ និងសម្ដែងមតិយ៉ាងទូលំទូលាយ ស្ដែងពីលំហ នៃសិទ្ធិសេរីភាពនៅកម្ពុជា ដែលរាជរដ្ឋាភិបាលគ្រប់អាណត្តិ ជាពិសេសអាណត្តិទី ៧ នេះ បានបន្តផ្ដល់ និងលើកកម្ពស់ឥតឈប់ឈរទាំងផ្នែកជីវភាព និងសិទ្ធិការងារគ្រប់បែបយ៉ាង ធ្វើឲ្យវិស័យការងារនៅកម្ពុជារីកចម្រើនគួរជាទីមោទនៈដែលប្រជាពលរដ្ឋខ្មែរគ្រប់រូបចង់បាន និងពេញចិត្ត។

គួរជម្រាបថា កាលពីព្រឹកថ្ងៃទី ២៧ ខែមេសា ឆ្នាំ ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជួបសំណេះសំណាលជាមួយថ្នាក់ដឹកនាំអង្គការវិជ្ជាជីវៈ សេដ្ឋកិច្ចក្រៅប្រព័ន្ធ និងសមាគមបុគ្គលិកសិក្សាចំនួន ៥ ៦៩៦ នាក់ ហើយដោយឡែកនៅថ្ងៃទី ២៩ ខែមេសា ឆ្នាំ ២០២៥ លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានជួបសំណេះសំណាលជាមួយកម្មករ-និយោជិត ចំនួន ២ ៧១០ នាក់ ក្នុងតំបន់សេដ្ឋកិច្ចពិសេសខេត្តស្វាយរៀង។

ជាមួយនេះ កាលពីថ្ងៃទី ១ ខែឧសភា ឆ្នាំ ២០២៥ មានរៀបចំអបអរសាទរខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិចំនួន ៤ ទីតាំង និងទីតាំងផ្សេងៗ ទៀត ដូចជា នៅកំពង់ផែស្វយ័តក្រុងព្រះសីហនុ បានជួបសំណេះសំណាលជាមួយមន្ត្រីរាជការ បុគ្គលិក កម្មករ-និយោជិត ក្រោមអធិបតីភាពដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្ត្រី និងទីតាំងមជ្ឈមណ្ឌលសន្និបាត និងពិព័រណ៍កោះពេជ្រ , សួនច្បារកោះនរាហ៍ , សួនច្បារក្រុមប្រឹក្សាអភិវឌ្ឍន៍កម្ពុជា មានរៀបចំកម្មវិធីជួបជុំ ដោយសហភាពសហជីពចំនួន ២៤ សម្ព័ន្ធសហជីព អង្គការ សង្គមស៊ីវិល និងដៃគូសង្គម ដែលមានអ្នកចូលរួមសរុបប្រមាណ ៤ ៦០០ នាក់ ព្រមទាំងមានការប្រគល់ញត្តិជូនតំណាងក្រសួងការងារ និងបណ្ដុះបណ្ដាលវិជ្ជាជីវៈ តំណាងរដ្ឋសភា និងតំណាងខុទ្ទកាល័យសម្ដេចធិបតី៕

អត្ថបទ ៖ ពិសី

The post រោងចក្រចំនួន ៤១ បានរៀបចំកម្មវិធីអបអរសាទរទិវាពលកម្មអន្តរជាតិ ១ ឧសភា មានកម្មករ-និយោជិតចូលរួមជាង ១ ម៉ឺននាក់ appeared first on Kampuchea Thmey Daily.

តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបាន ពានរង្វាន់«សហគ្រាសមួយជាសហគមន៍សុខសាន្តមួយ»?

អ៊ិន ពិសី — Mon, 28 Apr 2025 07:47:02 +0000

ពានរង្វាន់ «សហគ្រាសមួយជាសហគមន៍សុខសាន្តមួយ» ជាពានរង្វាន់ថ្នាក់ជាតិ ផ្តល់ជូនជាលើកដំបូងនៅឆ្នាំ ២០២៥ ដែលពាននេះត្រូវបានបែងចែកជា ៣ កម្រិត គឺ ពានមាស ពានប្រាក់ និងពានសំរឹទ្ធ ហើយសហគ្រាសជ័យលាភី ត្រូវប្រកាសជាផ្លូវការក្នុងពិធីអបអរសាទរខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ១ ឧសភា ក្រោមអធិបតី សម្ដេចនាយករដ្ឋមន្ត្រី ហ៊ុន ម៉ាណែត។

តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបានពានរង្វាន់ «សហគ្រាសមួយជាសហគមន៍សុខសាន្តមួយ»?

តាមរយៈស្មារតីកិច្ចប្រជុំជាបន្តបន្ទាប់របស់គណៈកម្មការវាយតម្លៃការជ្រើសរើសសហគ្រាសមួយជាសហគមន៍សុខសាន្តមួយ បានឱ្យដឹងថា ដើម្បីទទួលបានពានរង្វាន់ «សហគ្រាសមួយជាសហគមន៍សុខសាន្តមួយ» រោងចក្រ-សហគ្រាស ត្រូវបំពេញគ្រប់លក្ខខណ្ឌវិនិច្ឆ័យ នៃអនុលោមភាពចំនួន ៨ រួមមាន ៖ ១.អនុលោមភាព នៃលក្ខខណ្ឌការងារ , ២.អនុលោមភាព នៃការប្រើប្រាស់កម្មករ-និយោជិតវ័យក្មេង , ៣.អនុលោមភាព នៃទំនាក់ទំនងវិជ្ជាជីវៈ , ៤.អនុលោមភាព នៃលក្ខខណ្ឌស្ដីពីសុវត្ថិភាព និងសុខភាពការងារ , ៥.អនុលោមភាព នៃរបបសន្តិសុខសង្គម , ៦.អនុលោមភាព នៃការប្រើប្រាស់កម្មករ-និយោជិតជាជនពិការ , ៧.អនុលោមភាព នៃការអនុវត្តកម្មវិធីលើកកម្ពស់ផលិតភាពការងារ និង ៨.អនុលោមភាព នៃការអនុវត្តកម្មវិធីទទួលខុសត្រូវសង្គម។

លោក ហ្វា សាលី ប្រធានសម្ព័ន្ធសហជីពជាតិ ថ្លែងថា បើសិនជាក្រុមហ៊ុន រោងចក្រ សហគ្រាស នីមួយៗ ធ្វើបានតាមអនុលោមភាពទាំង ៨ នេះ ហើយទទួលបានពានរង្វាន់ គឺជារឿងល្អក្រៃលែង។ មិនតែប៉ុណ្ណោះ រោងចក្រ-សហគ្រាសមួយចំនួនទៀត អាចនឹងយកតម្រាប់តាម ទោះបីមិនទទួលបានពានរង្វាន់ក៏ដោយ។ លោកបន្តថា នេះជាមធ្យោបាយល្អមួយដែលតម្រូវនូវលក្ខខណ្ឌការងារល្អ ធ្វើឱ្យអ្នកបញ្ជាទិញជឿទុកចិត្ត។

លោកបញ្ជាក់ថា «អ្នកបញ្ជាទិញគេជឿទុកចិត្តទៅលើអ្វីដែលម្ចាស់រោងចក្រសហគ្រាសបានអនុវត្តនូវអនុលោមទាំងអស់នេះ ដែលធ្វើឱ្យលក្ខខណ្ឌការងារកាន់តែប្រសើរ រោងចក្រកាន់តែល្អ មិនមានការប្រើប្រាស់ក្មេងមិនគ្រប់អាយុអីផ្សេងៗ។ អ្វីដែលជាអនុលោម ជាអនុសាសន៍នូវលក្ខខណ្ឌទាំង ៨ នេះ គឺជារឿងដែលខ្ញុំសាទរត្រេកអរបំផុត»។

ទន្ទឹមនេះ លោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ បានលើកឡើងថា អនុលោមទាំង ៨ ចំណុចនេះ បង្ហាញយ៉ាងច្បាស់ពីការយកចិត្តទុកដាក់ពីសំណាក់រាជរដ្ឋាភិបាលចំពោះកម្មករ-និយោជិត ក៏ដូចជាការពារអ្នកវិនិយោគឱ្យស្របតាមក្រមសីលធម៌ដែលអ្នកបញ្ជាទិញចង់បាន។

លោកថ្លែងថា «នៅពេលដែលអ្នកបញ្ជាទិញ ក៏ដូចជាអង្គការ ILO ចុះទៅជួបនឹងរោងចក្រ ជួបនឹងកម្មករ-និយោជិត គឺតែងតែបានកំណត់នូវលក្ខខណ្ឌមួយចំនួន ដើម្បីឱ្យរោងចក្រអនុវត្ត ពេលនេះយើងមើលឃើញជាក់ស្ដែង នៅពេលដែលរោងចក្រអនុវត្តតាមអនុលោមទាំង ៨ នេះ វាស្របទៅនឹងគំនិត និងការចង់បានរបស់អ្នកបញ្ជាទិញ»។

ចំណែក លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា បានបង្ហាញពីការពេញចិត្តចំពោះអនុលោមទាំង ៨ នេះ ព្រោះនៅពេលដែលក្រុមហ៊ុនអនុវត្តបាន នឹងអាចទទួលបានពានរង្វាន់«សហគ្រាសមួយជាសហគមន៍សុខសាន្តមួយ»។ មិនតែប៉ុណ្ណោះ អនុលោមទាំង ៨ នេះ នឹងធ្វើឱ្យអ្នកបញ្ជាទិញកាន់តែមានទំនុកចិត្តខ្ពស់ និងបញ្ជាទិញកាន់តែច្រើន។

លោកថ្លែងថា «ចំណុចទាំង ៨ នេះ គឺជាចំណុចស្នូល ចំណុចល្អ និងសំខាន់ ដែលប្រជាពលរដ្ឋកម្ពុជាគាត់ទទួលបាន ហើយអ្វីដែលក្រសួងការងារគិតគូរនេះ គឺគិតគូរពីសុខទុក្ខ សុវត្ថិភាព បងប្អូនកម្មករ-និយោជិតនៅទូទាំងប្រទេស ដើម្បីទទួលបានលក្ខខណ្ឌការងារកាន់តែល្អ ឈានទៅរកការអភិវឌ្ឍ និងជាប្រទេសជឿនលឿនក្នុងឆ្នាំ ២០២៥ ផងដែរ»។

សូមបញ្ជាក់ថា សហគ្រាសដែលទទួលបានជ័យលាភីក្នុងការប្រឡងប្រណាំង«សហគ្រាសមួយជាសហគមន៍សុខសាន្តមួយ» នឹងត្រូវទទួលបានការលើកទឹកចិត្តដូចជា ៖ ពានរង្វាន់«សហគ្រាសមួយជាសហគមន៍សុខសាន្តមួយ» ដែលមាន ៣ កម្រិត , វិញ្ញាបនបត្រ«សហគ្រាសមួយជាសហគមន៍សុខសាន្តមួយ» , ការលើកលែង ការចុះអធិការកិច្ចសាមញ្ញក្នុងរយៈពេលចាប់ពី ១ ឆ្នាំ ដល់ ៣ ឆ្នាំ ស្របតាមកម្រិត នៃពានរង្វាន់ទទួលបាន៕

The post តើរោងចក្រ-សហគ្រាស ត្រូវអនុវត្ត ឬរៀបចំខ្លួនដូចម្ដេចខ្លះ ដើម្បីទទួលបាន ពានរង្វាន់«សហគ្រាសមួយជាសហគមន៍សុខសាន្តមួយ»? appeared first on Kampuchea Thmey Daily.

រាជរដ្ឋាភិបាលកម្ពុជា បង្កើតពានរង្វាន់ជាលើកដំបូង វាយតម្លៃរោងចក្រសហគ្រាស នៅកម្ពុជា ដែលមានភាពសុខសាន្ត ដើម្បីអបអរទិវាពលកម្មអន្តរជាតិ១ឧសភា

អ៊ិន ពិសី — Fri, 25 Apr 2025 02:51:59 +0000

រាជរដ្ឋាភិបាលកម្ពុជា បានប្រកាសផ្តល់ពានរង្វាន់ជូនរោងចក្រសហគ្រាសដែលបានអនុវត្តលក្ខខណ្ឌការងារល្អប្រសើរនៅក្នុងរោងចក្ររបស់ខ្លួនដែលបង្កើតបានជាសហគ្រាសប្រកបដោយភាពសុខសាន្ត។

យោងតាមលិខិតដែលបានផ្សព្វផ្សាយនៅថ្ងៃទី ២៣ ខែមេសា ឆ្នាំ ២០២៥ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសផ្តល់ពានរង្វាន់ជាលើកទី ១ ដល់រោងចក្រសហគ្រាសដែលបំពេញលក្ខណវិនិច្ឆ័យគោរពតាមច្បាប់ស្ដីពីការងារ និងច្បាប់ពាក់ព័ន្ធផ្សេងៗ របស់រដ្ឋាភិបាល។ ការប្រកាសផ្តល់ពានរង្វាន់នេះ ដើម្បីអបអរសាទរខួបអនុស្សាវរីយ៍លើកទី ១៣៩ នៃទិវាពលកម្មអន្តរជាតិ ថ្ងៃទី ១ ខែឧសភា។

បើយោងតាមសារលិខិតដដែល ពានរង្វាន់ដែលរដ្ឋាភិបាល នឹងប្រគល់ជូនមានឈ្មោះថា ពានរង្វាន់ “សហគ្រាសមួយ ជាសហគមន៍សុខសាន្តមួយ”។ សហគ្រាសដែលត្រូវបានជ្រើសរើសគឺត្រូវអនុលោមទៅតាមលក្ខណវិនិច្ឆ័យចំនួន ៨ ចំណុច ដែលរួមមាន ៖ ១.អនុលោមភាព នៃលក្ខខណ្ឌការងារ។ ២.អនុលោមភាព នៃការប្រើប្រាស់កម្មករ-និយោជិតវ័យក្មេង។ ៣.អនុលោមភាពទំនាក់ទំនងវិជ្ជាជីវៈ។ ៤.អនុលោមភាព នៃលក្ខខណ្ឌស្ដីពីសុវត្ថិភាព និងសុខភាពការងារ។ ៥.អនុលោមភាព នៃរបបសន្តិសុខសង្គម។ ៦.អនុលោមភាព នៃការប្រើប្រាស់កម្មករ-និយោជិតជាជនពិការ។ ៧.អនុលោមភាព នៃការអនុវត្តកម្មវិធីលើកកម្ពស់ផលិតភាពការងារ និង ៨.អនុលោមភាព នៃការអនុវត្តកម្មវិធីទទួលខុសត្រូវសង្គម។

ជាមួយគ្នានេះ សម្តេចនាយករដ្ឋមន្ត្រី ក៏បានអបអរសាទរចំពោះជ័យលាភី ហើយក៏ថ្លែងអំណរគុណចំពោះគ្រប់រោងចក្រសហគ្រាស ជាពិសេសកម្មករ-និយោជិត អង្គការវិជ្ជាជីវៈ ដែលបានបន្តចូលរួមក្នុងចលនាជាតិ ដើម្បីប្រែក្លាយសហគ្រាសមួយ ជាសហគមន៍សុខសាន្តមួយ។

គួររំលឹកថា នៅក្នុងខួបលើកទី ១៣៩ នៃទិវាពលកម្មអន្តរជាតិ ១ ឧសភា រាជរដ្ឋាភិបាលកម្ពុជា បានកំណត់យកប្រធានបទរួមគ្នា ដើម្បីការងារសមរម្យ និងកំណើនប្រកបដោយចីរភាព និងភាពធន់ ធ្វើជាប្រធានបទសម្រាប់ទិវា ១ ឧសភា ឆ្នាំនេះ។

សម្រាប់រដ្ឋាភិបាលកម្ពុជា ការកំណត់យកប្រធានបទយ៉ាងដូច្នេះគឺជាការបង្ហាញឱ្យឃើញកាន់តែច្បាស់នូវការប្តេជ្ញាចិត្ត និងការយកចិត្តទុកដាក់ខ្ពស់របស់រដ្ឋាភិបាលក្នុងការបន្តលើកកម្ពស់លក្ខខណ្ឌការងារ សិទ្ធិការងារ សេរីភាពអង្គការវិជ្ជាជីវៈ អត្ថប្រយោជន៍របបសន្តិសុខសង្គម អត្ថប្រយោជន៍នានារបស់កម្មករ-និយោជិត និងការពង្រឹងយន្តការដោះស្រាយវិវាទការងារដែលធ្វើឱ្យទំនាក់ទំនងវិជ្ជាជីវៈកាន់តែល្អប្រសើរឡើង ដែលជាសូចនាករគន្លឹះរបស់រដ្ឋាភិបាលក្នុងគោលដៅប្រែក្លាយកម្ពុជាទៅជាប្រទេសដែលមានចំណូលមធ្យមកម្រិតខ្ពស់ឆ្នាំ ២០៣០ និងប្រទេសដែលមានចំណូលខ្ពស់នៅឆ្នាំ ២០៥០៕

The post រាជរដ្ឋាភិបាលកម្ពុជា បង្កើតពានរង្វាន់ជាលើកដំបូង វាយតម្លៃរោងចក្រសហគ្រាស នៅកម្ពុជា ដែលមានភាពសុខសាន្ត ដើម្បីអបអរទិវាពលកម្មអន្តរជាតិ១ឧសភា appeared first on Kampuchea Thmey Daily.

ក្រុមហ៊ុន KENPAX របស់ចិន គ្រោងនឹងសាងសង់រោងចក្របរិក្ខារពេទ្យដ៏ធំមួយនៅក្នុងស្រុកជុំគីរី ខេត្តកំពត

Kang Tola — Fri, 21 Feb 2025 14:27:32 +0000

កំពត ៖ ក្រុមហ៊ុន KENPAX របស់ប្រទេសចិន មានគម្រោងសាងសង់រោងចក្របរិក្ខារពេទ្យដ៏ធំមួយនៅក្នុងស្រុកជុំគីរី ខេត្តកំពត នៅក្នុងខែមីនា ខាងមុខនេះ ដែលអាចផ្គត់ផ្គង់សម្ភារៈបានជាង៤០ប្រទេស។

ថ្លែងនៅក្នុងឱកាសចូលជួបសម្ដែងការគួរសម ជាមួយលោកម៉ៅ ធនិន នាថ្ងៃទី២១ ខែកុម្ភៈ ឆ្នាំ២០២៥នេះ ប្រធានក្រុមហ៊ុន KENPAX មកពីប្រទេសចិន លោក Wayne Lin បានមានប្រសាសន៍ថា ក្រុមហ៊ុនរបស់លោក គឺជាក្រុមហ៊ុនផលិតនូវផលិតផលផ្អែកវេជ្ជសាស្រ្ត មកដល់បច្ចុប្បន្ននេះបានធ្វើការចែកចាយ និងផ្គត់ផ្គង់សម្ភារៈជាង៤០ប្រទេស នៅជុំវិញពិភពលោក។

លោកបានបន្តថា ដោយមើលឃើញពីសក្តានុពល និងភាពអំណោយផលរបស់ខេត្តកំពត ទើបក្រុមហ៊ុនសម្រេចយកធ្វើការវិនិយោគ ដោយសាងសង់រោងចក្រផលិតគ្រឿងបរិក្ខារពេទ្យ ស្ថិតនៅក្នុងភូមិព្រៃថ្មី ឃុំស្រែចែង ស្រុកជុំគីរី ខេត្តកំពត ហើយរោងចក្រនេះនឹងផ្ដល់ការងារចំនួន៣ ០០០ កន្លែងជូនប្រជាពលរដ្ឋនៅក្នុងខេត្តកំពត។

លោកប្រធានក្រុមហ៊ុនបានបញ្ជាក់ទៀតថា រោងចក្រនេះគ្រោងនឹងបើកការដ្ឋានសាងសង់នៅពាក់កណ្តាលខែមីនា ហើយគ្រោងនឹងបញ្ចប់ការសាងសង់នៅចុងឆ្នាំ២០២៥ខាងមុខនេះ។

លោកម៉ៅ ធនិន អភិបាលខេត្តកំពត បានសំដែងនូវការស្វាគមន៍ចំពោះការវិនិយោគ និងបង្កើតរោងចក្រផលិតបរិក្ខារពេទ្យ (ផលិតផលវេជ្ជសាស្រ្ត) របស់ក្រុមហ៊ុន KENPAX ក្នុងខេត្តកំពត ព្រោះនឹងផ្តល់ការងារជូនបងប្អូនកូនក្មួយ ដែលរស់នៅក្នុងខេត្ត ព្រមទាំងលើកកម្ពស់ជីវភាពរស់នៅរបស់បងប្អូនប្រជាពលរដ្ឋនៅតំបន់នោះផ្ទាល់។

លោកអភិបាលខេត្តកំពត បានគូសបញ្ជាក់ដែរថា ប្រទេសកម្ពុជាក្រោមម្លប់នៃសុខសន្តិភាព ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី បន្តមកដល់ការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី សម្តេចតែងតែលើកទឹកចិត្តចំពោះអ្នកវិនិយោគជាតិ និងអន្តរជាតិទាំងអស់ ឱ្យមកចូលរួមវិនិយោគក្នុងប្រទេសកម្ពុជា ដើម្បីបង្កើតការងារជូនពលរដ្ឋ ក៏ដូចជាឱ្យកំណើនសេដ្ឋកិច្ចជាតិ និងសេដ្ឋកិច្ចគ្រួសាររបស់ពលរដ្ឋកាន់តែប្រសើរឡើង។

លោកក៏បានលើកទឹកចិត្ត ដល់ក្រុមហ៊ុនឱ្យធ្វើការជ្រើសរើសបុគ្គលិកខ្មែរ និងកម្មករដែលរស់នៅក្បែរតំបន់សាងសង់រោងចក្រជាជម្រើសទី១ ហើយបន្តជ្រើសរើសតាមបណ្តាក្រុង-ស្រុក ក្នុងខេត្តកំពត ក្នុងន័យដើម្បីបង្កើនការងារជូនប្រជាពលរដ្ឋក្នុងខេត្តកំពត៕

ដោយ ៖ សឹង រ៉ាត់

The post ក្រុមហ៊ុន KENPAX របស់ចិន គ្រោងនឹងសាងសង់រោងចក្របរិក្ខារពេទ្យដ៏ធំមួយនៅក្នុងស្រុកជុំគីរី ខេត្តកំពត appeared first on Kampuchea Thmey Daily.

រោងចក្រ​​ Archives - Kampuchea Thmey Daily