សេដ្ឋកិច្ច

គម្រោងរោងចក្រផលិតឆ័ត្រ អាវភ្លៀង និងកាបូបថ្មី ត្រៀមបង្កើតការងារជូនពលរដ្ឋក្នុងក្រុងដូនកែវ

បានផុស

២ ខែ មុន

នៅ

ថ្ងៃអង្គារ ១៩ ឧសភា ២០២៦

ដោយ

ខេត្តតាកែវកំពុងក្លាយជាគោលដៅថ្មីមួយសម្រាប់អ្នកវិនិយោគក្នុងវិស័យឧស្សាហកម្ម និងរោងចក្រ ដោយសារមានទីតាំងភូមិសាស្ត្រអំណោយផល ជាប់ផ្លូវជាតិសំខាន់ៗ មានបណ្តាញដឹកជញ្ជូនងាយស្រួល និងនៅជិតរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ញ៉ែម ស្រស់ អភិបាលរង នៃគណៈអភិបាលខេត្តតាកែវ និងជាអនុប្រធានអនុគណៈកម្មាធិការវិនិយោគខេត្តតាកែវនៅព្រឹកថ្ងៃទី ១៩ ខែឧសភា ២០២៦ បានដឹកនាំក្រុមការងារជំនាញចុះពិនិត្យទីតាំងស្នើសុំវិនិយោគបង្កើតរោងចក្រផលិតឆ័ត្រ អាវភ្លៀង និងកាបូប របស់ក្រុមហ៊ុន ហ្គោលដិនរ៉េន អិនធើណេសិនណល (ខេមបូឌា) ឯ.ក (GOLDEN RAIN INTERNATIONAL (CAMBODIA) CO.,LTD) ស្ថិតនៅភូមិប្រហូត សង្កាត់រការក្រៅ ក្រុងដូនកែវ ខេត្តតាកែវ។

ការចុះពិនិត្យទីតាំងនេះ គឺជាផ្នែកមួយនៃនីតិវិធីវាយតម្លៃសក្តានុពល និងភាពសមស្របនៃគម្រោង វិនិយោគ មុនឈានទៅដំណើរការអនុវត្តជាផ្លូវការ ដោយផ្តោតលើហេដ្ឋារចនាសម្ព័ន្ធ ទំហំទីតាំង ប្រព័ន្ធទឹក ភ្លើង ផ្លូវចរាចរណ៍ និងផលប៉ះពាល់បរិស្ថាន ស្របតាមគោលការណ៍លើកកម្ពស់ការវិនិ យោគប្រកបដោយចីរភាព។

មន្ត្រីជំនាញបានលើកឡើងថា ការបង្កើតរោងចក្រថ្មីនៅក្នុងខេត្តតាកែវ មិនត្រឹមតែជួយបង្កើនសកម្មភាពសេដ្ឋកិច្ចក្នុងមូលដ្ឋានប៉ុណ្ណោះទេ ប៉ុន្តែថែមទាំងអាចបង្កើតឱកាសការងារជាច្រើនជូនប្រជាពលរដ្ឋក្នុងតំបន់ ជាពិសេសយុវជន និងកម្មករ ដែលកំពុងស្វែងរកការងារធ្វើនៅជិតលំនៅឋាន។

អាជ្ញាធរខេត្តក៏បានយកចិត្តទុកដាក់ជំរុញបរិយាកាសវិនិយោគ ប្រកបដោយភាពអំណោយផល តម្លាភាព និងសុវត្ថិភាព ដើម្បីទាក់ទាញក្រុមហ៊ុនក្នុង និងក្រៅប្រទេសឱ្យមកបណ្តាក់ទុនកាន់តែច្រើន។

មហាជនក្នុងមូលដ្ឋានយល់ឃើញថា កំណើនរោងចក្រ និងសហគ្រាសនៅក្នុងខេត្តតាកែវ កំពុងរួមចំណែកយ៉ាងសំខាន់ក្នុងការផ្លាស់ប្តូរមុខមាត់សេដ្ឋកិច្ចក្នុងតំបន់ ពិសេសការកាត់បន្ថយការធ្វើចំណាកស្រុកទៅរកការងារនៅតំបន់ឆ្ងាយ និងជួយលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

អាជ្ញាធរខេត្តតាកែវ ក៏បានបញ្ជាក់ពីការបន្តគាំទ្រ និងសម្របសម្រួលដល់គម្រោងវិនិយោគនានា ដែលអនុវត្តស្របតាមច្បាប់ និងមានគោលដៅរួមចំណែកអភិវឌ្ឍសេដ្ឋកិច្ចមូលដ្ឋាន ប្រកបដោយទំនួលខុសត្រូវ និងនិរន្តរភាព៕