គ្រាប់រ៉ុកកែតគន្លងគោចរដែលផលិតក្នុងស្រុកដំបូងគេបង្អស់របស់ប្រទេសអូស្ត្រាលីឈ្មោះ Eris បានធ្លាក់ត្រឹមតែ ១៤ វិនាទីប៉ុណ្ណោះបន្ទាប់ពីហោះចេញក្នុងអំឡុងពេលបាញ់សាកល្បងកាលពីថ្ងៃពុធ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃទី៣១ខែកក្កដានេះ។

គ្រាប់រ៉ុកកែតនេះបង្កើតឡើងដោយ Gilmour Space Technologies មានប្រវែង ២៣ ម៉ែត្របានបាញ់បង្ហោះពីយានអវកាសក្បែរទីក្រុង Bowen រដ្ឋ Queensland ដែលជាការប៉ុនប៉ងលើកដំបូងរបស់ប្រទេសក្នុងការបាញ់បង្ហោះគោចរក្នុងរយៈពេលជាង ៥០ ឆ្នាំមិនធ្លាប់មាន។

ទោះបីជាមានការបរាជ័យក៏ដោយ ក៏ក្រុមហ៊ុនបានហៅការធ្វើតេស្តនេះថាជាជោគជ័យ ដោយកត់សម្គាល់ថាម៉ាស៊ីនទាំងបួនបានបញ្ឆេះ ហើយជើងទម្ររ៉ុកកែតនៅតែមិនមានការខូចខាត។ នាយកប្រតិបត្តិលោក Adam Gilmour បានសម្តែងសុទិដ្ឋិនិយមដោយនិយាយថា ការចុះចេញបានពីដីគឺជាព្រឹត្តិការណ៍ដ៏សំខាន់មួយសម្រាប់ក្រុមហ៊ុនរ៉ុក្កែតឯកជននេះ។

មន្ត្រីក្នុងតំបន់ក៏បានសរសើរដល់កិច្ចខិតខំប្រឹងប្រែងនេះfaជាជំហានដំបូងដ៏សំខាន់ឆ្ពោះទៅរកការកសាងឧស្សាហកម្មអវកាសនៅក្នុងប្រទេសអូស្ត្រាលី។ ថ្មីៗនេះក្រុមហ៊ុនបានធានានូវទឹកប្រាក់ចំនួន ៥ លានដុល្លារអូស្រ្តាលីនៅក្នុងមូលនិធិសហព័ន្ធ បន្ទាប់ពីជំនួយដ៏ធំចំនួន ៥២ លានដុល្លារអូស្រ្តាលីក្នុងឆ្នាំ ២០២៣ដើម្បីគាំទ្រដល់ការអភិវឌ្ឍន៍បច្ចេកវិទ្យាអវកាស។

គ្មាននរណាម្នាក់រងរបួសទេ ហើយការធ្វើតេស្តនេះត្រូវបានគេមើលឃើញថាជាការចាប់ផ្តើមនៃការបាញ់បង្ហោះរ៉ុកកែតនាពេលអនាគតរបស់ប្រទេសអូស្ត្រាលី៕

អត្ថបទ៖ ប៊ុន សុភាព

The post គ្រាប់រ៉ុកកែតដើមដំបូងគេរបស់អូស្ត្រាលី បរាជ័យបន្ទាប់ពីហោះបាន ១៤ វិនាទី appeared first on Kampuchea Thmey Daily.

រ៉ុកកែត Aditya-L1 ដែលផ្ទុកឧបករណ៍វិទ្យាសាស្ត្រដើម្បីសង្កេតមើលស្រទាប់ខាងក្រៅរបស់ព្រះអាទិត្យ ត្រូវបាញ់បង្ហោះនៅម៉ោង ០១:២០នាទីរសៀល  (ម៉ោងនៅកម្ពុជា) ថ្ងៃសៅរ៍ទី២ខែកញ្ញាសម្រាប់ការធ្វើដំណើររយៈពេល៤ខែ។

ក្នុងការផ្សាយផ្ទាល់នៅលើគេហទំព័ររបស់អង្គការស្រាវជ្រាវអវកាសឥណ្ឌា (ISRO), គេបានឃើញក្រុមអ្នកវិទ្យាសាស្រ្ត ទះដៃអបអរសាទរដោយក្តីមោទកភាព ពេលរ៉ុកកែតហោះឡើង។

យោងតាម ISRO, យានអវកាសនេះ មានផ្ទុកឧបករណ៍វិទ្យាសាស្ត្រចំនួនប្រាំពីរ សម្រាប់ការសិក្សាជាប្រព័ន្ធលើព្រះអាទិត្យ។

គួរបញ្ជាក់ថា សហរដ្ឋអាមេរិក និងទីភ្នាក់ងារអវកាសអឺរ៉ុប (ESA) បានបញ្ជូនយានអវកាសជាច្រើនគ្រឿង ទៅកាន់ចំណុចកណ្តាលនៃប្រព័ន្ធព្រះអាទិត្យ ដោយចាប់ផ្តើមជាមួយនឹងកម្មវិធី Pioneer របស់អង្គការ NASA ក្នុងទសវត្សរ៍ឆ្នាំ១៩៦០។ ប៉ុន្តែប្រសិនបើបេសកកម្មចុងក្រោយរបស់ ISRO ទទួលបានជោគជ័យមែននោះ វានឹងក្លាយជាការបញ្ជូនរ៉ុកកែតសិក្សាដំបូងបង្អស់ដោយប្រទេសអាស៊ី នៅក្នុងគន្លងព្រះអាទិត្យ។

ការបាញ់បង្ហោះ Aditya-L1 គឺកើតឡើង បន្ទាប់ពីឥណ្ឌាបានយកឈ្នះរុស្ស៊ីកាលពីចុងខែមុន ដើម្បីក្លាយជាប្រទេសដំបូងគេ ដែលចុះចតនៅលើប៉ូលខាងត្បូងនៃឋានព្រះចន្ទ៕

សូមទស្សនាវីដេអូ៖ 

ប្រែសម្រួល៖ Vann Vann

ប្រភព៖ Aljazeera

ចុចអាន៖ ក្រោយជោគជ័យនៅឋានព្រះចន្ទ ឥណ្ឌា នឹងបាញ់ផ្កាយរណបទៅអង្កេតព្រះអាទិត្យម្តង

The post ក្រោយជោគជ័យនៅឋានព្រះចន្ទ ពេលនេះ ឥណ្ឌា បាញ់រ៉ុកកែតទៅព្រះអាទិត្យ ម្តង appeared first on Kampuchea Thmey Daily.

ក្រុមហ៊ុនអាកាសចរណ៍អង់គ្លេស Pulsar Fusion បានវាយតម្លៃថា បច្ចេកវិទ្យា ដែលនឹងត្រូវប្រើក្នុងរ៉ុកកែតដើរដោយថាមពលនុយក្លេអ៊ែរប្រវែង៨ម៉ែត្ររបស់ខ្លួន គឺមានសក្តានុពលក្នុងការនាំមនុស្សចូលទៅក្នុងទីអវកាស ជាមួយល្បឿនរហូតដល់ ៨០៤៦៧២ គីឡូម៉ែត្រក្នុងមួយម៉ោង។

ក្រុមហ៊ុននិយាយថា ប្រសិនបើវាដំណើរការមែននោះ រ៉ុកកែតនេះ អាចកាត់បន្ថយពេលវេលាធ្វើដំណើរទៅកាន់ភពព្រះអង្គារពីប្រហែល៧-៩ខែ មកត្រឹម៣០ថ្ងៃ និងកាត់បន្ថយពេលវេលាហោះហើរទៅកាន់ភពសៅរ៍ពី៨ឆ្នាំមកត្រឹម២ឆ្នាំ។

លោក Richard Dina នាយកប្រតិបត្តិក្រុមហ៊ុន Pulsar និយាយថា ទីបំផុត រ៉ុកកែតនេះ នឹងត្រូវបានប្រើប្រាស់នៅក្នុងយានអវកាស ដើម្បីផ្តល់ថាមពលដល់មនុស្សឲ្យចាកចេញពីប្រព័ន្ធព្រះអាទិត្យជាលើកដំបូង។

លោកបន្ថែមថា ក្រុមហ៊ុន កំពុងប្រើប្រាស់បច្ចេកវិទ្យា AI ដើម្បីជួយអភិវឌ្ឍគំរូម៉ាស៊ីនរ៉ុកកែត ហើយលោកសង្ឃឹមថា វានឹងសម្រេចបាននូវការផលិតម៉ាស៊ីន ដែលមានសមត្ថភាពធ្វើដំណើរទៅទីអវកាស។

ក្រុមហ៊ុន Pulsar Fusion អះអាងថា រ៉ុកកែតត្រូវបានផលិតរួចជាស្រេច ហើយនឹងសាកល្បងក្នុងឆ្នាំ២០២៧ នៅកន្លែងដ៏ក្តៅបំផុតមួយ ពោលគឺវាអាចសាកល្បងនៅតំបន់ Bletchley នៃទីក្រុង Milton Keynes ចក្រភពអង់គ្លេស។

ក្រុមហ៊ុន Pulsar សង្ឃឹមថា ខ្លួននឹងបង្កើតប្រវត្តិសាស្រ្ត ដោយការធ្វើដំណើរទៅលំហអាកាសក្នុងល្បឿនលឿនបំផុត ដើម្បីហែកមេឃ ដឹកអ្នកទេសចរ ធ្វើដំណើរកម្សាន្តចេញឆ្ងាយពីពិភពលោក នាពេលអនាគត៕

ប្រែសម្រួល៖ Vann Vann

ប្រភព៖ Daily Star

ចុចអាន៖ ណាសា បង្កើតម៉ាស៊ីនរ៉ុកកែតដើរដោយនុយក្លេអ៊ែរសម្រាប់នាំមនុស្សទៅភព​អង្គារ

The post ក្រុមហ៊ុនអង់គ្លេស ផលិតរ៉ុកកែតមហាល្បឿន ហែកមេឃ ដឹកអ្នកទេសចរ ទៅកម្សាន្ត ខាងក្រៅពិភពលោក appeared first on Kampuchea Thmey Daily.

បញ្ជាការអវកាសសហរដ្ឋអាមេរិក បានឱ្យដឹងថា គ្រាប់រ៉ុកកែត Long March 5B ទម្ងន់ប្រមាណ ២២.៥តោន បានធ្លាក់ចូលទៅក្នុងមហាសមុទ្រឥណ្ឌាជាច្រើនថ្ងៃមកហើយ ប៉ុន្តែចិនមិនបានប្រកាសព័ត៌មានអ្វីឡើយ  ខណៈទីតាំងដែលអាចរងផលប៉ះពាល់នៃការបែកខ្ចាត់ខ្ចាយរបស់កំទេចកំទីរ៉ុកកែត ក៏ពុំបង្ហាញជាសាធារណៈដែរ។

ដោយឡែក អ្នកគ្រប់គ្រងអង្គការ NASA លោក Bill Nelson មានប្រាសន៍ថា គ្រប់ប្រទេសដែលធ្វើដំណើរទៅទីអវកាសទាំងអស់ ត្រូវចែករំលែកព័ត៌មាននានាពាក់ព័ន្ធនឹងរ៉ុកកែតរបស់ខ្លួន ដើម្បីអនុញ្ញាតឱ្យមានការព្យាករណ៍ដែលអាចទុកចិត្តបានអំពីហានិភ័យនៃផលប៉ះពាល់នៃកំទេចកំទីរបស់វា។

កាលពីដើមសប្តាហ៍នេះដែរ ក្រុមអ្នកវិភាគនិយាយថា តួគ្រាប់រ៉ុកកែតរបស់ចិនដែលបានធ្លាក់មកផែនដី ​អាចធ្វើមានហានិភ័យធ្លាក់ភ្លៀងនៅលើផ្ទៃដីប្រហែល ១៤០,០០០ គីឡូម៉ែត្រការ៉េ។

ចំពោះរឿងនេះ ស្ថានទូត​ចិន​ប្រចាំ​ទីក្រុង​វ៉ាស៊ីនតោន​មិន​បាន​ធ្វើ​អត្ថាធិប្បាយ​ភ្លាមៗ​ទេ ខណៈប្រទេសចិនថ្លែងកាលពីដើមសប្តាហ៍នេះថា ខ្លួននឹងតាមដានយ៉ាងដិតដល់នូវកំទេចកំទីដែលខ្ចាត់ខ្ចាយ ហើយថាវាមានហានិភ័យតិចតួចប៉ុណ្ណោះ៕

ប្រែសម្រួល៖ សន្យា

ប្រភព៖​ CNA

ចុចអាន៖ អាមេរិក កំពុងទិញប្រព័ន្ធការពារមីស៊ីលមួយប្រភេទទៀតឲ្យ អ៊ុយក្រែន

The post គ្រាប់រ៉ុកកែតរបស់ចិន ទម្ងន់ជាង ២២តោន ធ្លាក់ពីលំហមកផែនដីវិញ appeared first on Kampuchea Thmey Daily.

លោក Andrew Jones នៃគេហទំព័រ SpaceNews បានរាយការណ៍ថា ពីដំបូង បំណែករ៉ុកកែត ដែលត្រូវបានគេប៉ាន់ស្មានថាមានទម្ងន់ជាង២០តោន ទំនងជានឹងត្រូវធ្លាក់ចូលទៅក្នុងដែនទឹកនៃមហាសមុទ្រដាច់ស្រយាល ប៉ុន្តែគន្លងបច្ចុប្បន្នរបស់វា នឹងត្រូវឆ្លងកាត់លើតំបន់ទីក្រុងនៅចុងភាគខាងជើងដូចជារដ្ឋញូវយ៉ក និងនៅភាគខាងត្បូងដូចជាប្រទេស នូវែលសេឡង់។

រ៉ុកកែតឈ្មោះ Long March 5B របស់ប្រទេសចិន បានបាញ់បង្ហោះកាលពីថ្ងៃពុធសប្តាហ៍មុន ហើយបានបញ្ជូនយាន “Tianhe” ដំបូងបង្អស់របស់ស្ថានីយ៍អវកាសថ្មីនៃប្រទេសនេះចូលទៅក្នុងគន្លងគោចរ។ តែមិនដូចការគិតឡើយ បណ្តូលដ៏ធំរបស់រ៉ុកកែតពិសេសដែលក៏ត្រូវបានគេស្គាល់ឈ្មោះថា CZ-5B នេះ ក៏បានបញ្ចប់នៅក្នុងគន្លងគោចរផងដែរ។

ផ្នែកខ្លះរបស់រ៉ុកកែតដែលចូលទៅក្នុងគន្លងគោចរ ជាញឹកញាប់ត្រូវបានបំពាក់ ដើម្បីនាំពួកគេចូលមកក្នុងបរិយាកាសវិញនៅលើតំបន់ដែលគ្មានមនុស្សរស់នៅ។

អ្នកតាមដានរ៉ាដាដែលមានមូលដ្ឋាននៅលើដីបានបង្ហើបថា ស្នូល CZ-5B កម្ពស់៣០ម៉ែត្រ កំពុងតែធ្លាក់ចូលក្នុងអវកាស។ ពួកគេបញ្ជាក់ថា ក្រុមមន្ត្រីអវកាសចិន មិនអាចគ្រប់គ្រងលើរឿងនេះបានទេ ដែលជាហេតុនាំឲ្យបំណែកធ្លាក់មកផែនដីទាំងមិនមានសុវត្ថិភាព។

ប្រទេសចិនបានបង្កឲ្យមានការរិះគន់ទូទាំងពិភពលោកម្តងរួចទៅហើយ នៅពេលដែលខ្លួនបាញ់បង្ហោះយាន CZ-5B នៅក្នុងខែឧសភាឆ្នាំ២០២០។ បំណែករបស់វា បានធ្លាក់រាយប៉ាយពាសពេញភូមិនានាក្នុងប្រទេសកូតឌីវ័រ។ ជាសំណាងល្អ មិនមានសេចក្តីរាយការណ៍អំពីអ្នករងរបួសឬស្លាប់ដែលបណ្តាលមកពីផលប៉ះពាល់នោះទេ៕

ប្រែសម្រួលដោយ៖ Vann Vann

ប្រភព៖ Vice

ចុចអាន៖ ចិន បាញ់បង្ហោះគ្រាប់រ៉ុកកែតទៅស្ថានីយអវកាសថ្មីរបស់ខ្លួន ដោយជោគជ័យ

The post បំណែករ៉ុកកែតរបស់ចិនទម្ងន់ជាង២០តោន កំពុងសំដៅមកផែនដី អាចធ្លាក់ចំតំបន់មានប្រជាជនរស់នៅច្រើន appeared first on Kampuchea Thmey Daily.

លោក Wang Zhanyu អនុប្រធាននៃបណ្ឌិត្យសភាបច្ចេកវិទ្យាបាញ់បង្ហោះយានចិនបាននិយាយថា មូលដ្ឋាននៅជិតទីក្រុង Haiyang ក្នុងខេត្ត Shandong នឹងបន្ថែមលើទីតាំងដែលមានស្រាប់ចំនួន៤ដែលមួយស្ថិតនៅលើកោះ Hainan និងមូលដ្ឋានផ្សេងទៀតនៅតំបន់ដាច់ស្រយាល Gansu, ខេត្ត Sichuan និងខេត្ត Shanxi។

លោក Wang បានប្រាប់ទីភ្នាក់ងារសារព័ត៌មានចិន Xinhua កាលពីថ្ងៃពុធថា “ជាមួយនឹងការរីកចម្រើនយ៉ាងឆាប់រហ័សនៃឧស្សាហកម្មអាកាសចរណ៍ពាណិជ្ជកម្ម តម្រូវការសម្រាប់ការបាញ់បង្ហោះកំពុងតែកើនឡើងពីមួយថ្ងៃទៅមួយថ្ងៃហើយការបាញ់រ៉ុកកែតចេញពីសមុទ្រគឺជាការបន្ថែមដ៏មានឥទ្ធិពលមួយដល់ការបាញ់បង្ហោះលើដីដូចទម្លាប់”។

កាលពីខែមិថុនាឆ្នាំមុន ចិនបានក្លាយជាប្រទេសដំបូងគេដែលគ្រប់គ្រងនិងដំណើរការមូលដ្ឋានបណ្តែតទឹកបាញ់រ៉ុកកែតចេញពីសមុទ្រនៅពេលកាំជ្រួច Long March 11 បានហោះចេញពីទីតាំងមួយក្នុងសមុទ្រលឿងក្បែរមូលដ្ឋានថ្មីដោយផ្ទុកផ្កាយរណបចំនួន៥គ្រឿងនិងយានពិសោធន៍ចំនួន២គ្រឿង។

នៅខែកញ្ញាឆ្នាំនេះ ប្រទេសចិនបានធ្វើការបាញ់បង្ហោះស្រដៀងគ្នានេះដោយបានបញ្ជូនផ្កាយរណបចំនួន៩គ្រឿងចូលទៅក្នុងទីអវកាសនៅក្នុងបេសកកម្មមួយដែលត្រូវបានសាទរថាជា “ជំហានដ៏សំខាន់” ដោយនាយកមជ្ឈមណ្ឌលបាញ់បង្ហោះផ្កាយរណប Taiyuan លោក Li Zongli។

បន្ទាប់ពីបេសកកម្មលើកដំបូង មន្រ្តីអវកាសបាននិយាយថា ពួកគេសង្ឃឹមថា ការបាញ់បង្ហោះចេញពីសមុទ្រអាចជួយកាត់បន្ថយការចំណាយនិងហានិភ័យនៃការបញ្ជូនរ៉ុកកែតចូលទៅក្នុងលំហអាកាសដោយវានឹងផ្តល់នូវភាពបត់បែនកាន់តែច្រើនលើជម្រើសនៃទីតាំងបាញ់បង្ហោះនិងកាលបរិច្ឆេទ។

ការបាញ់បង្ហោះចេញពីសមុទ្រក៏អាចកាត់បន្ថយហានិភ័យនៃកម្ទេចកម្ទីធ្លាក់លើតំបន់ដែលមានប្រជាជនរស់នៅច្រើននិងអនុញ្ញាតឲ្យអ្នកវិទ្យាសាស្ត្រជ្រើសរើសគន្លងបាញ់បង្ហោះបានច្បាស់លាស់ផងដែរ។

ទីតាំងថ្មីនេះគឺជាផ្នែកនៃកិច្ចព្រមព្រៀងដ៏ទូលំទូលាយមួយដែលត្រូវបានចុះហត្ថលេខារវាងក្រុមហ៊ុនផលិតរ៉ុកកែតចិននិងរដ្ឋាភិបាលក្រុង Haiyang កាលពីថ្ងៃពុធ។

ជាមួយនឹងការវិនិយោគក្នុងទំហំទឹកប្រាក់២៣ពាន់លានយ័ន (ប្រហែល៣.៥ពាន់លានដុល្លារអាមេរិក), គម្រោង Oriental Aerospace Harbour គឺបូករួមបញ្ចូលទាំងមូលដ្ឋានឧស្សាហកម្មលំហអាកាស កំពង់ផែសម្រាប់ការបាញ់រ៉ុកកែតចេញពីសមុទ្រនិងទីតាំងទេសចរណ៍លំហអាកាសផងដែរ។

មូលដ្ឋាននេះនឹងអាចផលិតរ៉ុក្កែតបានចំនួន២០គ្រាប់ជារៀងរាល់ឆ្នាំ៕

ប្រែសម្រួលដោយ៖ Vann Vann

ប្រភព៖ SCMP

ចុចអាន៖ ចិនជោគជ័យ​ក្នុង​ការ​បង្ហោះ​រ៉ុកកែតបញ្ជូន​យាន​អវកាសធំបំផុតទៅ​បំពេញ​បេសកកម្ម​នៅឋាន​ព្រះ​ច័ន្ទ (មានវីដេអូ)

ចុចអាន៖ អ៊ីស្រាអែលទទួលនាវាចម្បាំងទំនើបបំផុតរបស់ខ្លួន ស្របពេលមានភាពតានតឹងកើនឡើងជាមួយអ៊ីរ៉ង់

The post ចិន ត្រៀមសាងសង់មូលដ្ឋាននៅមាត់ឆ្នេរដើម្បីបាញ់រ៉ុកកែតចេញពីសមុទ្រ appeared first on Kampuchea Thmey Daily.