លីគបាល់ទាត់នារីកម្ពុជា Archives - Kampuchea Thmey Daily

លោកសំ វ៉ាន់ដេត ចុចឈ្មោះក្រុមនារី ៣ នឹងក្លាយជាឧបសគ្គសម្រាប់ក្រុមនារី ព្រះខ័នរាជស្វាយរៀង

Kosal Sem — Sat, 25 Apr 2026 06:26:58 +0000

គ្រូបង្វឹករបស់ក្រុមបាល់ទាត់នារី ព្រះខ័នរាជស្វាយរៀង លោកសំ វ៉ាន់ដេត បានសម្លឹងឃើញក្រុមបាល់ទាត់នារីចំនួន ៣ នឹងក្លាយយជាឧបសគ្គធំសម្រាប់ក្រុមនារី ព្រះខ័នរាជស្វាយរៀង ក្នុងការប្រកួតប្រជែងជើងឯកលីគកំពូលនារី កម្ពុជា ឆ្នាំ ២០២៦ នេះ។

លោកសំ វ៉ាន់ដេត

គ្រប់ក្រុមបាល់ទាត់នារីទាំងអស់ ដែលត្រៀមប្រកួតប្រជែងលីគកំពូលនារី កម្ពុជា ២០២៦ (Cambodian Women’s League) បានបង្ហាញការត្រៀមខ្លួនយ៉ាងល្អ។ ជាពិសេស មានក្រុមមួយចំនួន បាននាំចូលកីឡាការិនីបរទេសល្អៗច្រើន ដើម្បីមកពង្រឹងក្រុមឱ្យកាន់តែខ្លាំងក្លា ដែលខុសប្លែកពីឆ្នាំមុនៗ។

ចំណុចទាំងនេះបានធ្វើឱ្យលោក សំ វ៉ាន់ដេត យល់ ថា លីគនារី កម្ពុជា រដូវកាលនេះពិតជាមានការប្រកួតប្រជែងខ្លាំងគួរឱ្យកត់សម្គាល់។ ជាមួយគ្នានេះ លោកយល់ ថា មានក្រុមចំនួន ៣ នឹងក្លាយជាឧបសគ្គធំសម្រាប់ក្រុមនារី ព្រះខ័នរាជស្វាយរៀង ដើម្បីប្រជែងជើងឯកលីគ រួមមានក្រុមការពារតំណែងជើងឯក ភ្នំពេញក្រោន វិសាខា និង ក្រុមនារីខេត្ត សៀមរាប។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» លោកសំ វ៉ាន់ដេត បានមានប្រសាសន៍ ថា៖ «ខ្ញុំគិត ថា ឆ្នាំនេះកាន់តែខុសពីឆ្នាំមុនៗ ដោយសារមានក្រុមមួយចំនួនកំពុងបន្ថែមកីឡាការិនីបរទេស ដូចជាក្រុម ខេត្តសៀមរាប អិកស៍អូ ក៏ដូចជាក្រុម បឹងកេត ភ្នំពេញក្រោន វិសខា»។

ក្រុមនារី ព្រះខ័នរាជស្វាយរៀង

លោកសំ វ៉ាន់ដេត បានបន្តទៀត ថា៖ «ខ្ញុំគិត ថា ក្រុមដែលមានការប្រកួតប្រជែងខ្ពស់ គឺមាន ៣ ក្រុម។ ទី ១. គឺក្រុម ភ្នំពេញក្រោន ទី ២. ក្រុមវិសខា និងទី ៣. ក្រុមខេត្តសៀមរាប។ ក្រុម ៣ នេះ ជាក្រុមដែលមានការយកចិត្តទុកដាក់ខ្ពស់ មានការហ្វឹកហាត់កម្រិតខ្ពស់ និងមានកីឡាការិនីបរទេស»។

គួរបញ្ជាក់ ថា ការប្រកួតលីគកំពូលនារី កម្ពុជា សប្តាហ៍ទី ១ នឹងចាប់ផ្តើមនៅថ្ងៃ សៅរ៍ ទី ២៥ ខែ មេសា ដោយគូទី ១ ក្រុមនារី វិសាខា ត្រូវទទួលក្រុមនារី អិកស៍អូ យូណាយធីត និងគូទី ២ ក្រុមនារី ភ្នំពេញក្រោន ត្រូវទទួលក្រុមនារី មន្ទីរ អ.យ.ក ខេត្តកំពង់ឆ្នាំង។

ដោយឡែកនៅថ្ងៃ អាទិត្យ ទី ២៦ ខែ មេសា មាន ២ គូទៀត ដោយគូទី ១ ក្រុមនារី ព្រះខ័នរាជស្វាយរៀង ត្រូវទទួលក្រុមនារី បឹងកេត និងគូទី ២ ក្រុមនារី ណាហ្គាវើលដ៍ ត្រូវទទួលក្រុមនារីខេត្ត សៀមរាប៕

ក្រុមនារី ភ្នំពេញក្រោន

អត្ថបទ៖ សេម កុសល

The post លោកសំ វ៉ាន់ដេត ចុចឈ្មោះក្រុមនារី ៣ នឹងក្លាយជាឧបសគ្គសម្រាប់ក្រុមនារី ព្រះខ័នរាជស្វាយរៀង appeared first on Kampuchea Thmey Daily.

លោក សំ វ៉ាន់ដេត មើលឃើញសក្តានុពលក្រុមនារី ព្រះខ័នរាជស្វាយរៀង ឆ្នាំនេះ ជឿជាក់នឹងអាចលើកពានលីគ

Kosal Sem — Fri, 24 Apr 2026 09:20:35 +0000

គ្រូបង្វឹករបស់ក្រុមបាល់ទាត់នារី ព្រះខ័នរាជស្វាយរៀង លោក សំ វ៉ាន់ដេត ជឿជាក់យ៉ាងមុតមាំលើក្រុមរបស់លោកនឹងអាចដណ្តើមបានជើងឯកក្របខណ្ឌលីគកំពូលនារី កម្ពុជា ឆ្នាំ ២០២៦ បន្ទាប់ពីលោកមើលឃើញពីក្រុមទាំងមូល កំពុងតែមានសក្តានុពលខ្លាំង។

ក្រុមបាល់ទាត់នារី ព្រះខ័នរាជស្វាយរៀង បានបង្ហាញការត្រៀមខ្លួនយ៉ាងល្អ នាមុនការប្រកួតលីគនារី កម្ពុជា ២០២៦ (Cambodian Women’s League) ចាប់ផ្តើមនៅសប្តាហ៍នេះ ដោយពួកគេបានរៀបចំឡើងវិញទាំងគ្រូបង្វឹក និងសមភាសកីឡាការិនី។

ចាប់អារម្មណ៍ជាមួយនឹងសមាសភាពកីឡាការិនីបរសទេសថ្មីៗ គឺ ព្រះខ័នរាជស្វាយរៀង បាននាំចូលចំនួន ៤ នាក់ ដើម្បីជួយពង្រឹងក្រុម រួមមានខ្សែបម្រើសញ្ជាតិ នេប៉ាល់ Preeti Rai, ខ្សែប្រយុទ្ធសញ្ជាតិ កុងហ្គោ Dikisha Bushiri Esther, ខ្សែការពារសញ្ជាតិ តួកគី Bilmez Gamz និងខ្សែការពារសញ្ជាតិ ហ្គាណា Akasheeh Doris។

តាមរយៈសមាសភាពកីឡាការិនីក្នុងស្រុក ដែលមានស្រាប់ រួមជាមួយកីឡាការិនីបរទេសថ្មី ៤ នាក់បន្ថែម និងការយកចិត្តពីថ្នាក់ដឹកនាំក្លិបផងនោះ បានធ្វើឱ្យគ្រូបង្វឹកលោក សំ វ៉ាន់ដេត មានទំនុកចិត្តជាខ្លាំង ដើម្បីជួយក្រុមនារី ព្រះខ័នរាជស្វាយរៀង លើកពានលីគនារី កម្ពុជា ឆ្នាំ ២០២៦។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» លោក សំ វ៉ាន់ដេត បានមានប្រសាសន៍ ថា៖ «ចំពោះខ្ញុំ ដោយសារមានការជឿជាក់ពីថ្នាក់ដឹកនាំ ដែលបានផ្តល់កីឡាការិនីបរទេស ដែលបានផ្តល់ទីកន្លែងហ្វឹកហាត់ និងកម្មវិធីហ្វឹកហាត់បែបវិទ្យាសាស្ត្រកីឡាបែបនេះ។ ដូច្នេះវាជាក្តីរំពឹងមួយសម្រាប់ខ្ញុំដែលជឿជាក់ ហើយខ្ញុំសង្ឃឹម ថា យើងនឹងដណ្តើមពានឆ្នាំនេះឱ្យបាន។ វាជាឆន្ទៈរបស់ខ្ញុំ ដោយសារមានការជឿជាក់ពីថ្នាក់ដឹកនាំ និងកីឡាការិនីរបស់យើងដែលមានស្រាប់»។

អត្ថបទ៖ សេម កុសល

The post លោក សំ វ៉ាន់ដេត មើលឃើញសក្តានុពលក្រុមនារី ព្រះខ័នរាជស្វាយរៀង ឆ្នាំនេះ ជឿជាក់នឹងអាចលើកពានលីគ appeared first on Kampuchea Thmey Daily.

ជំហានថ្មីមួយទៀត! លីគបាល់ទាត់នារីកម្ពុជា ២ កម្រិតនឹងរៀបចំនៅឆ្នាំ ២០២៦ នេះ

chean virakbot — Fri, 10 Apr 2026 07:37:24 +0000

សហព័ន្ធកីឡាបាល់ទាត់កម្ពុជា នឹងរៀបចំការប្រកួតលីគបាល់ទាត់នារីចំនួន ២ កម្រិតផ្សេងគ្នានៅក្នុងឆ្នាំ ២០២៦។

នៅព្រឹកថ្ងៃទី ១០ ខែមេសា ឆ្នាំ ២០២៦ សហព័ន្ធកីឡាបាល់ទាត់កម្ពុជា បានរៀបចំធ្វើបទបង្ហាញស្តីពីច្បាប់ និងបទបញ្ជានៃការប្រកួត«ខេមបូឌានលីគនារីអាជីព» និង «ខេមបូឌានលីគនារីអាយុក្រោម ១៦ ឆ្នាំ» ប្រចាំឆ្នាំ ២០២៦។ ក្នុងពិធីបទបង្ហាញគឺមានក្រុមបាល់ទាត់នារីចំនួន ៨ ត្រូវចូលរួមប្រកួត។

ខេមបូឌានលីគនារី ត្រូវបានចាត់ទុកជាលីគនារីលំដាប់លេខ ១ នៅក្នុងប្រទេសកម្ពុជា ហើយជាពានបាល់ទាត់នារីតែមួយគត់ដែលរៀបចំដោយសហព័ន្ធកីឡាបាល់ទាត់កម្ពុជាជាច្រើនលើកមកហើយ។

ឥឡូវនេះ ខេមបូឌានលីគនារី អាយុក្រោម ១៦ ឆ្នាំ ជាការប្រកួតកីឡាបាល់ទាត់យុវតី លើកដំបូងរៀបចំជាផ្លូវការដោយសហព័ន្ធកីឡាបាល់ទាត់កម្ពុជា។ នេះជាជំហានថ្មីមួយទៀតដែលនឹងនឹងក្លាយជាមូលដ្ឋានគ្រឹះ និងជំរុញឲ្យកីឡាបាល់ទាត់នារីនៅកម្ពុជាកាន់តែរីកចម្រើន លូតលាស់ និងលេចធ្លោ ដើម្បីអាចប្រកួតប្រជែងជាមួយបណ្តាប្រទេសនៅក្នុងតំបន់។

បច្ចុប្បន្ននេះ ក្រុមបាល់ទាត់នារីជាច្រើនបាន និងកំពុងរៀបចំក្រុមឲ្យមានភាពល្អប្រសើរសម្រាប់ការចូលរួមប្រកួតលីគនារីរដូវកាលថ្មី។ ជាក់ស្តែង ក្រុមនារីភ្នំពេញក្រោនមានកីឡាការិនីក្នុងស្រុកល្អ និងមានកីឡាការិនីជប៉ុន ខណៈ ក្រុមនារី ព្រះខ័នរាជស្វាយរៀង ទើបតែប្រកាសនាំចូលកីឡាការិនី ៤ នាក់ ហើយក្រុមនារី សៀមរាប អេហ្វស៊ី មានកីឡាការិនីបរទេស ៤ នាក់៕

អត្ថបទ៖ វិរបុត្រ

The post ជំហានថ្មីមួយទៀត! លីគបាល់ទាត់នារីកម្ពុជា ២ កម្រិតនឹងរៀបចំនៅឆ្នាំ ២០២៦ នេះ appeared first on Kampuchea Thmey Daily.

លីគនារីកម្ពុជារដូវកាលថ្មី ចាប់ផ្តើមចុងខែនេះ តិចជាងរដូវកាលមុន២ក្រុម

chean virakbot — Fri, 23 May 2025 07:44:27 +0000

ការប្រកួតបាល់ទាត់លីគនារីកម្ពុជា រដូវកាល ២០២៥ នឹងចាប់ផ្តើមនៅថ្ងៃទី៣១ ខែឧសភា ឆ្នាំ២០២៥ ដោយមាន៨ក្រុមចូលរួមប្រកួត និងគ្រោងបញ្ចប់នៅថ្ងៃទី៣០ ខែវិច្ឆិកា ឆ្នាំ២០២៥។

ក្រុមដែលចូលរួមប្រកួតមាន ក្រុមនារីព្រះខ័នរាជស្វាយរៀង ក្រុមនារីភ្នំពេញក្រោន ក្រុមនារីវិសាខា ក្រុមនារីណាហ្គាវើលដ៍ ក្រុមនារីមីស្ទើរលេង ក្រុមនារីខេត្តកណ្តាល ក្រុមនារីបឹងកេត និងក្រុមនារីសៀមរាប។ ចំនួនតិចជាងរដូវកាលមុន២ក្រុម។

ក្រុម៣ដែលបានចូលរួមប្រកួតរដូវកាលមុន ប៉ុន្តែមិនបានចូលរួមប្រកួតរដូវកាលថ្មីនេះគឺ ក្រុមនារីខេត្តកំពង់ឆ្នាំង ក្រុមនារីខេត្តកំពង់ធំ និងក្រុមនារីសលត៍ខេត្តបាត់ដំបង។ ក្រុមថ្មីដែលចូលរួមប្រកួតនៅក្នុងរដូវកាលនេះគឺក្រុមនារីខេត្តកណ្តាល។

រហូតដល់ពេលនេះ មានក្រុមខ្លះបានបាននាំចូលសមាជិកថ្មី ប៉ុន្តែក៏មានក្រុមជាច្រើនមិនបានបង្ហាញពីការត្រៀមខ្លួនឡើយ។

ការប្រកួតលីគបាល់ទាត់នារីនេះពិតជាសំខាន់ណាស់នៅក្នុងឆ្នាំ២០២៥ ដោយសារក្រុមបាល់ទាត់នារីកម្ពុជា មានភារកិច្ចប្រកួតព្រឹត្តិការណ៍អន្តរជាតិចំនួន២គឺ ពាន ASEAN Women’s Championship និងកីឡាស៊ីហ្គេម។

ការបង្កើតឲ្យមានលីគនារីនេះឡើងជាការផ្តល់ឱកាសឲ្យកីឡាការិនីបាល់ទាត់កម្ពុជាបានបង្ហាញសមត្ថភាព បង្កើនបទពិសោធ ហើយក្រុមនីមួយៗអាចកាន់តែត្រៀមខ្លួនបានល្អ ពីព្រោះក្លិបជើងឯកលីគកំពូលកម្ពុជាក៏មានភារកិច្ចប្រកួតពានអន្តរជាតិដែរ។ កាលពីឆ្នាំ ក្រុមបាល់ទាត់នារីភ្នំពេញក្រោនជាជើងឯករដូវកាលមុន។

តាមដំណឹងដែលទទួលបានគឺ សហព័ន្ធកីឡាបាល់ទាត់កម្ពុជា មិនបានផ្សាយផ្ទាល់ដូចរដូវកាលមុនឡើយ ហើយអាចឲ្យក្លិបនីមួយៗផ្សាយផ្ទាល់ទៅតាមការប្រកួតរៀងៗខ្លួន។ ដូច្នេះមានន័យថា អាចនឹងមិនមានការផ្សាយផ្ទាល់តាមផេកគ្រប់ការប្រកួតឡើយ។

អត្ថបទ៖ វីរបុត្រ

The post លីគនារីកម្ពុជារដូវកាលថ្មី ចាប់ផ្តើមចុងខែនេះ តិចជាងរដូវកាលមុន២ក្រុម appeared first on Kampuchea Thmey Daily.

ថ្ងៃស្អែក ក្រុមនារីវិសាខា ប៉ះ ណាហ្គាវើលដ៍ វគ្គពាក់កណ្តាលផ្តាច់ព្រ័ត្រក្នុងលីគនារី

chean virakbot — Fri, 31 Jan 2025 03:01:30 +0000

ក្រុមបាល់ទាត់នារី វិសាខា នឹងប្រកួតជាមួយក្រុមបាល់ទាត់នារី ណាហ្គាវើលដ៍ ក្នុងវគ្គពាក់កណ្តាលផ្តាច់ព្រ័ត្រ លីគបាល់ទាត់នារីកម្ពុជារដូវកាល២០២៤-២៥ វេលាម៉ោង៣:៣៥នាទីរសៀល ថ្ងៃសៅរ៍ ទី១ ខែកុម្ភៈ នៅទីលានហ្វឹកហាត់ផ្លូវការរបស់ក្លិបវិសាខា។

ក្រុមបាល់ទាត់នារីវិសាខា

ឆ្លងកាត់វគ្គវិលជុំសន្សំពិន្ទុពីរជើងសរុប១៨ប្រកួត ក្រុមនារីវិសាខា រកបាន៤៤ពិន្ទុ ឈរចំណាត់ថ្នាក់លេខ២ បន្ទាប់ពីឈ្នះ១៤ប្រកួត ស្មើ២ប្រកួត និងចាញ់២ប្រកួត។ ចំណែក ណាហ្គាវើលដ៍ រកបាន៤០ពិន្ទុ ឈរចំណាត់ថ្នាក់លេខ៣ បន្ទាប់ពីឈ្នះ១៣ប្រកួត ស្មើ១ប្រកួត និងចាញ់៤ប្រកួត។ ណាហ្គាវើលដ៍នឹងលេងដោយគ្មានកីឡាការិនី យ៉ុន យ៉ើន និង ហុក សៅឌី ដោយសារកីឡាការិនីទាំងពីរត្រូវបានខ្ចីជើងទៅក្លិប Bangkok Women ក្នុងលីគនារីថៃ។

មុនឈានដល់វគ្គពាក់កណ្តាលផ្តាច់ព្រ័ត្រ ក្រុមនារីណាហ្គាវើលដ៍បានយកឈ្នះ ក្រុមនារីព្រះខ័នរាជស្វាយរៀង ដោយលទ្ធផល ៣-០ ក្នុងវគ្គខ្វែង៤ក្រុមចុងក្រោយ។ ក្រុមនារីវិសាខាជាក្រុមតែមួយគត់បានផ្តល់បរាជ័យដល់ក្រុមកំពូលតារាង នារីភ្នំពេញក្រោន ក្នុងរដូវកាលនេះ ដោយលទ្ធផល ២-១។

ក្រុមបាល់ទាត់នារីណាហ្គាវើលដ៍

ជួបគ្នា២លើកក្នុងវគ្គវិលជុំសន្សំពិន្ទុ ក្រុមនារីណាហ្គាវើលដ៍ បានយកឈ្នះ វិសាខា ដោយលទ្ធផល ១-០ ក្នុងជើងទី១ នៅទឹកដីខេត្តកំពង់ស្ពឺ ប៉ុន្តែនៅជើងទី២ក្នុងទឹកដីរាជធានីភ្នំពេញ ក្រុមនារីវិសាខា បានយកឈ្នះ ដោយលទ្ធផល ៤-០ វិញ។

ក្រុមដែលឈ្នះ រវាងក្រុមនារីវិសាខា និង ណាហ្គាវើលដ៍ នៅវគ្គពាក់កណ្តាលផ្តាច់ព្រ័ត្រនេះ នឹងឡើងទៅកាន់វគ្គផ្តាច់ព្រ័ត្រ ជួប ក្រុមនារីភ្នំពេញក្រោន នៅថ្ងៃទី៨ ខែមីនា ឆ្នាំ២០២៥ នៅកីឡដ្ឋានរបស់ក្លិបភ្នំពេញក្រោន។ ក្រុមនារីភ្នំពេញក្រោនជាក្រុមការពារតំណែងជើងឯកឆ្នាំចាស់ និងជាក្រុមឈរចាំវគ្គផ្តាច់ព្រ័ត្រ បន្ទាប់ពីធ្វើបានល្អឈរចំណាត់ថ្នាក់លេខ១ក្នុងតារាង ដោយឈ្នះ១៦ប្រកួត ស្មើ១ប្រកួត និងចាញ់១ប្រកួត៕

ក្រុមបាល់ទាត់នារីភ្នំពេញក្រោន

អត្ថបទ៖ វីរបុត្រ

The post ថ្ងៃស្អែក ក្រុមនារីវិសាខា ប៉ះ ណាហ្គាវើលដ៍ វគ្គពាក់កណ្តាលផ្តាច់ព្រ័ត្រក្នុងលីគនារី appeared first on Kampuchea Thmey Daily.

លីគនារីប្រកួតថ្ងៃស្អែក៥គូលេងម៉ោងដំណាលគ្នាទាំងអស់

chean virakbot — Fri, 16 Aug 2024 01:22:17 +0000

លីគបាល់ទាត់កំពូលនារីកម្ពុជា នឹងចាប់ផ្តើមនៅថ្ងៃសៅរ៍ ទី១៧ ខែសីហា ឆ្នាំ២០២៤ បន្ទាប់ពីខកខានតាំងពីឆ្នាំ២០២២ ដោយមាន១០ក្រុមចូលរួមប្រកួតប្រជែង។

ក្រុមដែលចូលរួមប្រកួតរដូវកាលនេះមានក្រុមនារីខេត្តកំពង់ធំ ក្រុមនារីព្រះខ័នរាជស្វាយរៀង ក្រុមនារីបឹងកេត ក្រុមនារីខេត្តកំពង់ឆ្នាំង ក្រុមនារីសៀមរាប ក្រុមនារីសលត៍ខេត្តបាល់ដំបង ក្រុមនារីភ្នំពេញក្រោន ក្រុមនារីណាហ្គាវើលដ៍ ក្រុមនារីមីស្ទើរលេង និងក្រុមនារីវិសាខា។

រូបមន្តនៃការប្រកួតគឺមាន២ដំណាក់កាល។ ដំណាលទី១ គឺជាការប្រកួតវិលជុំសន្សំពិន្ទុ២ជើង ក្នុងដី និងក្រៅដី។ ដំណាក់កាលទី២ ក្រុមដែលមានពិន្ទុឈរកំពូលទាំង៤ (Top 4) នឹងប្រកួតបន្តទៀត។ ក្នុងនោះក្រុមឈរលេខ៤ ត្រូវប្រកួតជាមួយក្រុមលេខ៣ ដើម្បីស្វែងរកក្រុមឈ្នះឡើងទៅប្រកួតជាមួយក្រុមចំណាត់ថ្នាក់លេខ២។ ក្រុមដែលទទួលបានជ័យជម្នះនឹងឡើងទៅប្រកួតជាមួយក្រុមចំណាត់ថ្នាក់លេខ១ក្នុងវគ្គផ្តាច់ព្រ័ត្រ ដូច្នេះមានន័យថា ក្រុមចំណាត់ថ្នាក់លេខ១ឈរចាំនៅវគ្គផ្តាច់ព្រ័ត្រ។

សម្រាប់សប្តាហ៍បើកឆាក ការប្រកួតធ្វើឡើង នៅថ្ងៃសៅរ៍ ទី១៧ ខែសីហា វេលាម៉ោង៣:៣០នាទីរសៀល ដែលប្រកួតនៅម៉ោងដំណាលគ្នាទាំង៥គូតែម្តង។

កម្មវិធីប្រកួតសប្តាហ៍ទី១

ក្រុមនារីមីស្ទើរលេង vs ក្រុមនារីវិសាខា នៅទីលានសាលាតម្រង់ទិសទិសព្រៃវែង
ក្រុមនារីព្រះខ័នរាជស្វាយរៀង vs ក្រុមនារីខេត្តកំពង់ធំ នៅកីឡដ្ឋានខេត្តស្វាយរៀង
ក្រុមនារីសលត៍ខេត្តបាត់ដំបង vs ក្រុមនារីសៀមរាប នៅអង្គការសលត៍បាត់ដំបង
ក្រុមនារីភ្នំពេញក្រោន vs ក្រុមនារីណាហ្គាវើលដ៍ នៅកីឡដ្ឋានស្មាត RSN ភ្នំពេញក្រោន
ក្រុមនារីបឹងកេត vs ក្រុមនារីខេត្តកំពង់ឆ្នាំង នៅទីលានហ្វឹកហាត់ ហាយធិក

សូមបញ្ជាក់ថា លីគបាល់ទាត់នារីកម្ពុជា កាលពីឆ្នាំ២០២១ ក្រុមនារីភ្នំពេញក្រោន ជាម្ចាស់ជើងឯក លេខ២បានទៅក្រុមណាហ្គាវើលដ៍កំពង់ស្ពឺ ហើយលេខ៣ក្រុមនារីសៀមរាប។ កីឡាការិនីរបស់ភ្នំពេញក្រោន បាន ជាវៃ ជាអ្នករកបានគ្រាប់បាល់ច្រើនជាងគេគឺ៣៥គ្រាប់ ខណៈកីឡាការិនី យ៉ុន យ៉ើន របស់ក្រុមនារីណាហ្គាវើលដ៍កំពង់ស្ពឺ បានក្លាយជាកីឡាការិនីឆ្នើមប្រចាំរដូវកាល៕

អត្ថបទ៖ វីរបុត្រ

The post លីគនារីប្រកួតថ្ងៃស្អែក៥គូលេងម៉ោងដំណាលគ្នាទាំងអស់ appeared first on Kampuchea Thmey Daily.

ភ្នំពេញក្រោន ជាក្រុមនារីដំបូងគេនាំចូលកីឡាការិនីជប៉ុនត្រៀមលីគ

Pha Rothana — Wed, 07 Aug 2024 05:10:34 +0000

ក្លិបបាល់ទាត់នារីភ្នំពេញក្រោន បានបង្កភាពភ្ញាក់ផ្អើល បន្ទាប់ពីប្រកាសនាំយកកីឡាការិនីជប៉ុន Ichikawa Miki ពីក្លិប Loveledge ក្នុងក្របខណ្ឌលីគទី ២ របស់ប្រទេសជប៉ុន។

បើនិយាយពីក្លិបបាល់ទាត់នារីក្នុងស្រុក ភ្នំពេញក្រោនជាក្លិបទី១ ដែលបាននាំយកកីឡាការិនីបរទេសមកចូលរួមក្រុម។ ការនាំចូលកីឡាការិនីជប៉ុន Ichikawa Miki គឺដើម្បីប្រកួតលីគកំពូលបាល់ទាត់នារីកម្ពុជា Cambodian Women’s League ដែលនឹងប្រព្រឹត្តនៅពីថ្ងៃទី១៧ ខែសីហា ឆ្នាំ២០២៤ ដល់ថ្ងៃទី៨ ខែកុម្ភៈ ឆ្នាំ២០២៥ ដោយមានក្លិបបាល់ទាត់ សមាគម មន្ទីរ និងអង្គការ សរុបចំនួន ១០ក្រុមចូលរួមប្រកួតប្រជែង។

មុនផ្លាស់មកកាន់ភ្នំពេញក្រោន កីឡាការិនី Ichikawa Miki ធ្លាប់បានមកធ្វើទស្សនកិច្ចហ្វឹកហាត់ និងចែករំលែកបទពិសោធ ជាមួយក្រុមនារីភ្នំពេញក្រោនរយ:ពេល៣ថ្ងៃ កាលពីខែកុម្ភៈ កន្លងទៅ។

នេះជាគោលដៅថ្មីមួយទៀត របស់ក្លិបបាល់ទាត់នារីភ្នំពេញក្រោន ក្នុងការប្រកួតប្រជែងជើងឯកលីគកំពូលបាល់ទាត់នារីកម្ពុជារដូវកាលថ្មី។ ភ្នំពេញក្រោនជាក្លិបមួយដែលទទូលបានជោគជ័យទាំងបុរស និងនារី៕

អត្ថបទ៖ ផា រតនា

The post ភ្នំពេញក្រោន ជាក្រុមនារីដំបូងគេនាំចូលកីឡាការិនីជប៉ុនត្រៀមលីគ appeared first on Kampuchea Thmey Daily.

លីគបាល់ទាត់នារីកម្ពុជាចាប់ផ្តើមវិញមានក្រុម១០ចូលរួមប្រកួត

chean virakbot — Wed, 31 Jul 2024 07:05:54 +0000

សហព័ន្ធកីឡាបាល់ទាត់កម្ពុជាបានរៀបចំរៀបចំការប្រកួតលីគបាល់ទាត់នារីវិញហើយ បន្ទាប់ពីខកខានតាំងពីឆ្នាំ២០២១ ដោយមានក្រុមបាល់ទាត់ចំនួន១០ចូលរួមប្រកួត។

តាមសេចក្តីប្រកាសរបស់សហព័ន្ធកីឡាបាល់ទាត់កម្ពុជា ការប្រកួត ខេមបូឌានលីគនារី ឆ្នាំ២០២៤ នឹងចាប់ផ្តើមដំណើរការពីថ្ងៃទី១៧ ខែសីហា ឆ្នាំ២០២៤ ដល់ថ្ងៃទី៨ ខែកុម្ភៈ ឆ្នាំ២០២៥ ដែលមានក្រុមចំនួន១០ចូលរួមប្រកួតប្រជែង។

ការប្រកួតត្រូវបានធ្វើឡើងជាលក្ខណៈអាជីពពិតប្រាកដដែលមានការប្រកួតក្នុងដី និងក្រៅដី តាមរូបមន្ត លីគពីរជុំ និងបន្ទាប់មក ចំណាត់ថ្នាក់ពីលេខ១ ដល់លេខ៤ នឹងត្រូវប្រកួតចំនួន៣ប្រកួតបន្ថែមទៀត ដើម្បីជ្រើសយក១ក្រុមដែល មានពិន្ទុខ្ពស់ជាងគេ ក្លាយជាក្រុមជើងឯក។ សរុបការប្រកួត៩៣ ប្រើពេល៧ខែ។

នេះជាការប្រកួតកម្រិតស្តង់ដាលីគអាជីពដូចលីគបាល់ទាត់បុរសទូទាំងពិភពលោកដែលធ្វើឡើងឆ្លងឆ្នាំ។

ក្រុមដែលចូលរួមប្រកួតមានដូចជា ក្រុមបាល់ទាត់នារីភ្នំពេញក្រោន ក្រុមបាល់ទាត់នារីណាហ្គាវើលដ៍ ក្រុមបាល់ទាត់នារីវិសាខា ក្រុមបាល់ទាត់នារីបឹងកេត ក្រុមបាល់ទាត់ព្រះខ័នរាជស្វាយរៀង ក្រុមបាល់ទាត់រីខេត្តកំពង់ឆ្នាំង ក្រុមបាល់ទាត់នារីមីស្ទើរលេង ក្រុមបាល់ទាត់នារីសៀមរាប ក្រុមបាល់ទាត់នារីខេត្តកំពង់ធំ និងក្រុមបាល់ទាត់ខេត្តបាត់ដំបង។

ការបង្កើតឲ្យមានលីគបាល់ទាត់នេះឡើងពិតជាសំខាន់ណាស់ដែលជួយជំរុញវិស័យបាល់ទាត់នារីនៅកម្ពុជាឲ្យកាន់តែរីកចម្រើន ពីព្រោះក្រុមបាល់ទាត់នារីជម្រើសជាតិកម្ពុជាមានកាតព្វកិច្ចសំខាន់ៗជាច្រើនលើឆាកអន្តរជាតិដូចជា កីឡាស៊ីហ្គេម ពានរង្វាន់នារីប្រចាំតំបន់អាស៊ាន ហើយពានរង្វាន់កម្រិត AFC ក៏មានផ្នែកនារី៕

អត្ថបទ៖ វីរបុត្រ

The post លីគបាល់ទាត់នារីកម្ពុជាចាប់ផ្តើមវិញមានក្រុម១០ចូលរួមប្រកួត appeared first on Kampuchea Thmey Daily.

លីគបាល់ទាត់នារីកម្ពុជា Archives - Kampuchea Thmey Daily

លោកសំ វ៉ាន់ដេត ចុចឈ្មោះក្រុមនារី ៣ នឹងក្លាយជាឧបសគ្គសម្រាប់ក្រុមនារី ព្រះខ័នរាជស្វាយរៀង

លោក សំ វ៉ាន់ដេត មើលឃើញសក្តានុពលក្រុមនារី ព្រះខ័នរាជស្វាយរៀង ឆ្នាំនេះ ជឿជាក់នឹងអាចលើក​ពានលីគ

ជំហាន​ថ្មី​មួយទៀត! លីគ​​បាល់ទាត់នារី​កម្ពុជា ២ កម្រិត​នឹង​រៀបចំ​នៅ​ឆ្នាំ ២០២៦ ​នេះ

លីគ​នារី​​កម្ពុជា​រដូវ​កាល​ថ្មី​ ចាប់​ផ្តើមចុង​ខែ​នេះ តិច​ជាងរដូវ​កាលមុន​២​ក្រុម

ថ្ងៃ​ស្អែក ក្រុម​នារី​វិសាខា ប៉ះ ណាហ្គាវើលដ៍ វគ្គ​ពាក់​កណ្តាល​ផ្តាច់​ព្រ័ត្រ​ក្នុងលីគនារី

លីគ​នារី​​ប្រកួត​ថ្ងៃស្អែក៥គូ​លេងម៉ោង​ដំណាលគ្នាទាំងអស់

​ភ្នំពេញក្រោន ជាក្រុម​នារីដំបូង​គេនាំចូលកីឡាការិនីជប៉ុន​​ត្រៀមលីគ

លីគ​​បាល់ទាត់នារី​កម្ពុជា​ចាប់ផ្តើមវិញមានក្រុម១០ចូលរួមប្រកួត

លោក សំ វ៉ាន់ដេត មើលឃើញសក្តានុពលក្រុមនារី ព្រះខ័នរាជស្វាយរៀង ឆ្នាំនេះ ជឿជាក់នឹងអាចលើកពានលីគ

ជំហានថ្មីមួយទៀត! លីគបាល់ទាត់នារីកម្ពុជា ២ កម្រិតនឹងរៀបចំនៅឆ្នាំ ២០២៦ នេះ

លីគនារីកម្ពុជារដូវកាលថ្មី ចាប់ផ្តើមចុងខែនេះ តិចជាងរដូវកាលមុន២ក្រុម

ថ្ងៃស្អែក ក្រុមនារីវិសាខា ប៉ះ ណាហ្គាវើលដ៍ វគ្គពាក់កណ្តាលផ្តាច់ព្រ័ត្រក្នុងលីគនារី

លីគនារីប្រកួតថ្ងៃស្អែក៥គូលេងម៉ោងដំណាលគ្នាទាំងអស់

ភ្នំពេញក្រោន ជាក្រុមនារីដំបូងគេនាំចូលកីឡាការិនីជប៉ុនត្រៀមលីគ

លីគបាល់ទាត់នារីកម្ពុជាចាប់ផ្តើមវិញមានក្រុម១០ចូលរួមប្រកួត